Revwo Ruẹ Ona rẹ Aghwoghwo Ravwanre Yovwẹn Phiyọ—Ru Ọrhuẹrẹphiyoto rẹ Orhivwinbrura

Oboresorọ ọ vwọ Ghanre: Avwanre da mrẹ ohwo ro dje omavwerhovwẹn, o fori nẹ avwanre rhivwin bro ra ọke rọ cha vwọ dia uwevwin, ọtiọyena, avwanre ki se kuame ku ubi rẹ uyota rẹ avwanre kọnre na. (1 Kọr. 3:⁠6) Ọyen sorọ avwanre ke yan jẹ ohwo na vwo, o fori nẹ e ru ọrhuẹrẹphiyotọ rẹ orhivwinbrura. Vwọba, o ji yovwin nẹ avwanre nọ onọ ra cha kpahen phiyọ siẹrẹ e de rhivwin. Ọnana cha nẹrhẹ ohwo na rhẹro rẹ avwanre, siẹrẹ ọbe avwanre vwọkẹ na da kpahen phiyọ onọ a nọre na, omuẹro nẹ o che vwo omawerhovwẹn ro vwo se. Revwo muegbe rẹ uyovwinrota ọfa ra cha tota kpahen je nẹrhẹ e vwo uphẹn revwo rhivwin. Siẹrẹ avwanre de rhivwin, avwanre ke tota kpahen uyovwinrota rẹ avwanre djunute jovwo na.

Obo re Che Ruo Wan:

Siẹrẹ wo de muegbe aghwoghwo rẹ nuwevwin kpuwevwin, ji muegbe rẹ onọ ru wọ cha kpahen phiyọ wọ da rhoma bru ohwo na ra. Wọ sa nọ onọ rọhẹ evunrẹ ọbe ru wọ vwọ kẹ na, yẹrẹ ọ sa dia onọ ra kpahen phiyọ vwẹ ẹbe ọfa rẹ avwanre vwo yono ihwo, ru wọ savwọ kẹ siẹrẹ wo de rhivwin.
Siẹrẹ wẹ vẹ ohwo ro dje omavwerhovwẹ phia na da guọnọ ku ota na phioyọ, jọ riẹn nẹ wọ guọnọ rhivwin bro rhe ọke ọfa, gba nọ onọ ru wo muegbe rọyen na. Vwẹ asan evo, ihwo mrẹ uphẹ-ẹn, ọtiọyena ayen rha guọnọ nẹ a rhoma bru ayen rhe-e. Ọ da diẹ ọtiọyen, wọ sa ta: “A sa mrẹ wẹ vwẹ uwevwin ọke ọtiọna ẹdẹ ọfa? [Kẹ uphẹn ọ vwọ kpahen phiyọ.] Udughwrẹn rọ cha na, mi guọnọ rhe rhi kpahenphiyọ onọ nana . . . ọ da dianẹ wọ cha mrẹ uphẹ-ẹn, ju vwe riẹn.”
Wọ da vuẹ ohwo na nẹ wo che rhivwin rhe ọke ọfa, ru nene ota wẹn na. (Mat. 5:37) Vwẹ oba rẹ orhivwinbrura wẹn na, vwo ọrhuẹrẹphiyotọ wo vwo rhivwin ọke ọfa.

Davwen Iroroẹjẹ Nana Vwẹ Emeranvwe Na:

Ọke wo de muegbe rẹ aghwoghwo wẹn, ji muegbe rẹ onọ wọ cha nọ siẹrẹ wo de rhivwin. Vuẹ ighwoghwota rẹ wẹ vẹ ayen gba wian kpahen ona rẹ aghwoghwo ru wo muegbe rọyen na.