Revwo Ruẹ Ona rẹ Aghwoghwo Ravwanre Yovwẹn Phiyọ—Ravwọ Tuẹn Otaẹtakuẹgbe Phiyọ vẹ Ihwo Rere e se vwo ru Aghwoghwo ri Kpregede

Oboresorọ ọ Vwọ Ghanre: Ọke rẹ avwanre de ghwoghwo nuwevwin kpuwevwin, avwanre fobọ mrẹ ihwo vwẹ uwevwi-in. Ẹkẹvuọvo, avwanre sa mrẹ ayen vwevunrẹ imoto rẹ avwanre ro ro, ọke rẹ avwanre de kpẹ họsipito, ọke rẹ omaerovwon vwobẹ iruo kugbe isikuru, kugbe asan efa. Jihova guọnọre nẹ ihwo ejobi nyo ovuẹ rẹ Uvie na. (1 Tim. 2:3, 4) Rere avwanre se vwo ghwoghwota kẹ ayen, kẹ avwanre jowọ ravwọ tuẹn otaẹtakuẹgbe phiyọ vẹ ihwo tiọyena.

Obo re Che Ruo Wan:

Vwẹ oniso. Opharo ohwo na sasare? Ẹdia ru wọ mrẹ ohwo na phiyọ sa nẹrhẹ ovwan tota kugbe? Ighwoghwota evo ke nẹ opharo ohwo na, ayen me hwẹ emehwẹ. Ohwo na da je hwẹ, kẹ ayen nene tota.
Nẹ ẹrhovwo kprẹn vwẹ ubiudu wẹn siẹrẹ oshọ wọ vwọ tota de mwu we.—⁠Neh. 2:4; Iruo 4:29.
Ke yeren ohwo na. Ọ diẹ ota rẹ Uvie na yin Jesu vwọ tuẹn otaẹtakuẹgbe phiyọ vẹ aye ri Sameria na-a. (Jọn 4:⁠7) Ọkiọvo, wọ sa tuọn phiyọ vẹ eta rẹ ujiri kerẹ: “Uruemu rẹ emọ wẹn je vwe mamọ!” Wọ je sa vwẹ onọ vwọ tuẹn otaẹtakuẹgbe phiyọ kerẹ: “Wọ kerhọ rẹ iyẹnrẹn rẹ ason rẹ odẹ rọ wanre na?”
Wọ da tuẹn otaẹtakuẹgbe na phiyọ nu, gbe churu eta wẹn si iyẹnrẹn esiri rẹ Uvie na, ẹkẹvuọvo wo brokpakpa ruẹ ọnana-a. Reyẹ ona vwọ kpẹ ọtakugbe na kpẹ ota rẹ Ọghẹnẹ. Ọkiọvo, wọ sa ta eta re sa nẹrhẹ ohwo na nọ enọ. Kerẹ udje, siẹrẹ otaẹtakuẹgbe na de she kpahen orua, wọ sa ta, “Me mrẹ omamọ uchebro ọvo rọ sa chọn avwanre uko vwo yono emọ ravwanre.” Ọ da dianẹ wọ tota kpahen iyẹnrẹn wo seri, wọ sa ta, “O kri nọ-ọ na, mi se iyẹnrẹn esiri evo kpahen ewene re cha.” Wo jẹ ofu dje we-e, siẹrẹ wo rhe se ghwoghwota kẹ ohwo na tavwen otaẹtakuẹgbe rovwan na ki bru dje-e.
Ghwa ẹmẹbe vẹ ẹbe efa rẹ ukoko na nene oma rere wọ sa reyẹ ayen kẹ ihwo ri dje omavwerhovwẹn phia.

Davwen Iroroẹjẹ Nana Vwẹ Emeranvwe Na:

Kudughwrẹn kudughwrẹn, siẹrẹ ọ da hanvwen, davwẹngba wọ vwọ tuẹn aghwoghwo ri kpregede phiyọ vẹ ohwo ọvo.