Obo ra sa vwọ Vwẹ Ukẹcha kẹ Ihwo ri Vwo Obẹnbẹn Revwo Se Ẹbe

1. Egbabọse vọ yen herọ siẹrẹ a da vwẹ Baibol na yono ihwo re riẹn se-e?

¹ Ihwo rẹ avwanre ghwoghwota kẹ ri vwo obẹnbẹn rẹ ẹbe ese se vwo omavwerhovwẹn kpahen ota rẹ Ọghẹnẹ, ẹkẹvuọvo, oshọ ri Baibol na vẹ ẹbe efa se mu ayen kidie ayen riẹn obo re se-e. Wọ da vwẹ ọbe ri Bible Teach vwọ kẹ ihwo ọtiọyen vwẹ ẹsosuọ, ọ cha bẹn ayen ese. Mavọ yẹn avwanre sa vwọ chọn ayen uko? Avwanre riẹnmie ighwoghwota ri nẹ ẹkuotọ 20 sansan rhe. Ena yẹn obo rẹ ayen tare.

2. Ẹbe vọ yẹn a sa vwọ chọn ihwo ri vwo obẹnbẹn rẹ ẹbe ese uko?

² Ọda dianẹ ohwo re yono na riẹn se-e, yẹrẹ o se emerha, wọ sa vwẹ ibroshọ rẹ Kerhọ rẹ Ọghẹnẹ yẹrẹ Kerhọ rẹ Ọghẹnẹ Rere Wọ dia Bẹdẹ vwọ ton uyono phiyọ. Ọkobaro ọvo vwẹ America de djẹ ibroshọ ivẹ na kẹ ihwo nu, ọ me vuẹ ayen nẹ ayen sane ọ ro me je ayen. Oghọn rukoko vwẹ Kenya da niyẹnrẹn nẹ ẹbe na yovwin kẹ ihwo rẹ Africa mamọ keridie, esia egbe yẹn e me vwo yono ihwo ukperẹ enọ vẹ ẹkpahọnphiyọ. Dede nẹ, ohwo rọ riẹn ẹbe se, se vwo omavwerhovwẹn kpahen ese, kugbe enọ vẹ ẹkpahọnphiyọ, jẹ ọyena cha nẹrhẹ ofu dje ohwo rọ riẹn ẹbe se-e. Ọ da dia ohwo rọ riẹn se emerha, ighwoghwota buebun reyẹ Good News from God! yẹrẹ You Can Be God’s Friend! yẹrẹ My Book of Bible Stories vwọ ton uyono ri Baibol phiyọ.

3. Ọmrẹvughe vọ kpahen ihwo re riẹn se-e yen sa chọn avwanre uko vwo yono ayen fiotọ?

³ Jiri Ayen: Oma sa vo ihwo re riẹn ọbe se-e. Efa, oshọ yin mu ayen. Rere avwanre sevwo yono ayen uyota na, ko fori nẹ avwanre chọn ayen uko vwo si oshọ vẹ omavovwẹ nẹ ẹro rayen. Buebun rẹ ihwo re riẹn obo re se-e, se yono obo re se. Brọghọ phiyẹ ayen oma. (1 Pita 3:​15) Ayen da mrẹvughe nẹ erhuvwu nẹ ẹgbaẹdavwọn rayen cha, kọ sa nẹrhẹ ayen yono kpobaro phiyọ. Ọtiọyen na, Wo mi jiri ayen mamọ.

4. Mavọ yẹn avwanre sa vwọ tuduphiyọ ihwo rẹ avwanre yono awọ rere ayen se vwo muegbe vwọkẹ uyono na?

⁴ Ọ da tobọ dianẹ ohwo re yono na ghwa riẹn ọbe se-e, jiro kẹ nẹ o muegbe rẹ uyono rọyen phiyotọ. Ighwoghwota evo vwẹ South Africa jiro kẹ ihwo rẹ ayen yono nẹ ayen vuẹ ihwo rẹ orua yẹrẹ igbeyan rayen re riẹn se, nẹ ayen vwẹ ukẹcha kẹ ayen. Oghwoghwota ọvo vwẹ Britain vwẹ ukẹcha kẹ ihwo ro yono rere ayen vwo muegbe. O ruẹ ọtiọyen womarẹ ọyen vẹ ihwo ro yono na vwo se ẹkoreta evo vwo nẹ ọbe rọyen ọke rẹ ayen de yono. Ọtiọyen na, ayen ke sa mrẹ obo rọ phẹre te ravwọ mrẹ ẹkpahenphiyọ rẹ eno na siẹrẹ a da joka phiyọ ẹkpahenphiyọ na. Oghwoghwota ọvo vwẹ India vuẹ ihwo ro yono na nẹ ayen ni ihoho rehẹ evunrẹ asan rẹ ayen che yono na, rere ayen ji roro kpahen ihoho na bẹsiẹ ro vwo rhivwin rhe.

5. Mavọ yẹn avwanre se vwo dje erhiorin siẹrẹ e de ruẹ uyono na?

⁵ Vwo Erhiorin: O toro ọbe ru wo vwo yono aye-en, tẹnrovi ẹkpo ru wọ guọnọre nẹ ayen riẹn na, wọ chọn ayen uko vwo vwo ẹruọ rọyen. Wọ sa vwẹ ibrẹro 10 fiẹ 15 wo ru uyono na obọ rẹsosuọ. Jẹ uyono na dia krẹn, ẹkoreta na buẹ-ẹn. Ọ re yono na rhe ghwe se kpata-a, vwo erhiorin. Siẹrẹ o de vwo ẹguọnọ kpahen Jihova, ọ cha yan phiaro vwẹ ese rọyen. O se vwo ru ọnana, durhie rhe uyono nẹ ọtonphiyọ rhe.

6. Mavọ yẹn avwanre sa vwọ vwẹ ukẹcha kẹ ihwo vwọ riẹn obo re se?

⁶ Ọ re yono na da sa riẹn obo re se, ọ cha nẹrhẹ oyerinkugbe rọyen vẹ ọrẹ Jihova gan phiyọ. (Une 1:​1-3) Iniọvo buebun reyẹ ọbe na How to Read and Write vwọ chọn ihwo rẹ ayen yono uko. Ayen vwẹ ibrẹro krẹn vwo se siẹrẹ ayen de ru uyono na nu. Ọ da dianẹ ofu rẹ uyono na dje, jiro kpahen erọnvwọn evo ro se yono re. Jẹ ọ riẹn nẹ Jihova che bruba kẹ siẹrẹ ọ da davwoma. Vuẹ nẹ ọ nẹrhovwo kẹ ukẹcha ri Jihova. (Isẹ 16:3; 1 Jọn 5:​14, 15) Ighwoghwota evo vwẹ Britain vuẹ ihwo rẹ ayen yono nẹ ayen bru ẹkẹ rẹ ayen sa yanmu kẹ oma, ayen sa vwẹ uyono rẹ ibieta na tuọnphiyọ, ayen da riẹn ọyena nu, ayen mi rhe yono obo ra guọnọ ẹdia ri Baibol ra riobọ ra kugbe obo re se, ukuotọ rọyen, ayen yono obo re se ẹbe rukoko na re lọhọre. Revwo yono ihwo vwọ riẹn obo re se ọbe, churobọsi ravwọ chọn ayen uko vwo vwo owenvwe rẹ ọbe ese.

7. Diesorọ avwanre vwo jẹ oshọ ẹdjẹ revwo dje uyota na kẹ ihwo ri vwo obẹnbẹn revwo se ọbe?

⁷ Ihwo re ghwa riẹn obo re se-e, Jihova nẹ ayen sakamu-u. (Job 34:19) Ubiudu rẹ ohwo na yẹn Jihova hiẹ. (1 Ikun 28:⁠9) Fikirẹ ọnana, wọ djoshọ ru wo vwo dje uyota na kẹ ihwo ri vwo obẹnbẹn revwo se-e. Ẹbe buebun yen herọ ru wọ sa vwọ tuọnphiyọ. Ukuotọ rọyen, wo se wene ọbe revwo yono na kpẹ Bible Teach rọ cha chọn uko vwo vwo ẹruo rẹ Isiesi Efuanfon na gbagba.