Iruo Roghẹresan re Che ru Vwẹ August!
A Cha Ghare Ọmọbe Kpokpọ Vwẹ Akpọeje
1. Avwanre vwo siẹkẹrẹ ọke rẹ Uvie na che vwo te ikpe 100 na, egbada-ẹdjẹ vọ yẹn avwanre che ru?
1 Avwanre vwo siẹkẹrẹ ọke rẹ Uvie rẹ Ọghẹnẹ che vwo te ikpe 100 na, mavọ ọghanre te avwanre vwo bru ọghọ phiyẹ Jihova oma womarẹ egbada-ẹdjẹ roghẹresan! Vwẹ emeranvwe rẹ August, avwanre cha ghare ọmọbe kpokpọ na Tivọ Yẹn a da sa Mrẹ Ẹkpahọnphiyọ rẹ Enọ ri Shekpahen Akpeyeren? vwẹ akpọ na eje. Ọmọbe nana cha chọn ihwo ri sere uko vwọ riẹn nẹ ayen sa mrẹ ẹkpahọnphiyọ rẹ enọ rayen vwẹ Baibol na. O ji che dje obo rẹ wẹbsaiti ravwanre jw.org sa vwẹ ukẹcha kẹ ayen.
2. Mavọ yẹn avwanre se vwo toroba ‘ukperi ọgangan vwo jiri Ọrovwohwo na’ vwẹ August?
2 Ukperi Ọgangan rẹ Ujiri: Rere ighwoghwota sa vwọ hẹre iruo ruvie rayen phiyọ, uvi rẹ ọrhuẹrẹphiyotọ herọ rere ohwo rọ guọnọre se vwo ruiruo rẹ ọchuko rẹ ọkobaro vwẹ emeranvwe rẹ August. Uphẹn herọ vwẹ emeranvwe yena rẹ ighwoghwota re bru phiyame re, ri se ru inọke 30 vwọ ga kerẹ ọchuko rẹ ọkobaro. Ọvwọ dianẹ emeranvwe rẹ August vwẹ Friday, Saturday, kugbe Sunday iyiyorin na, buebun rẹ ighwoghwota ri vwo owian, yẹrẹ ri kpẹ isukuru sa vwẹ ọke nana vwo ruiruo rẹ ọchuko rẹ ọkobaro. Wo de vwo ohwo ru wọ vwẹ Baibol yono ro muwan rọ vwọ dia oghwoghwota, yẹrẹ ọmọ rọ guọnọ dia oghwoghwota, gba vuẹ ọrọvwẹrote iruo rẹ ekpako na. Oma cha vwerhe ihwo ọtiọyen na mamọ siẹrẹ ayen da vwomaba ighwoghwota ruvie na vwẹ emeranvwe nana! Vwẹ ẹkuotọ evo, ekobaro ọkieje evo ronvwoma vwẹ emeranvwe rẹ August siẹrẹ inọke ra guọnọ mie ayen vwẹ ukpe yena da gba nu. E jiriro vwọ kẹ ekobaro ọtiọyen na nẹ, ayen rhuẹrẹ ọke rayen rere ayen se vwobọ vwẹ egbada-ẹdjẹ roghẹresan nana. Ofori nẹ orua eje jiroro rẹ obo rẹ ayen se vwo toroba “ukperi ọgangan, rẹ ayen vwo jiri Ọrovwohwo na” vwẹ emeranvwe rẹ August.—Ẹzra 3:11; Isẹ 15:22.
3. Die yẹn avwanre rhẹro rọyen vwẹ egbada-ẹdjẹ roghẹresan na?
3 Dedenẹ avwanre vwobọ vwẹ oka rẹ egbada-ẹdjẹ ọtiọna vẹrhe re, avwanre rhẹro nẹ ọnana cha dia ọ roghẹresan. Vwẹ emeranvwe rẹ August na, inọke, ighwoghwota, kugbe ọchuko rẹ ekobaro ravwanre se bun vrẹ obo ri jovwo? Rẹ ukpe rẹga rẹ 2014 vwo siẹkẹrẹ oba na, e ji Jihova bruphiyọ kẹ ihwo rọyen rehẹ akpọ na eje gbidiki, rere aghwoghwo rẹ emeranvwe rẹ August na dia ọ ro kperusi!—Mat. 24:14.