‘Vwo Omamọ rẹ Uruemu vwẹ Uvwre rẹ Ihworakpọ na’

1. Diesorọ ovwo fo nẹ avwanre vwo omamọ rẹ uruemu vwẹ eghwẹkoko re cha na?

¹ Avwanre de ruẹ ọghwẹkoko rẹ avwanre kukpe kukpe, ihwo mrẹ avwanre. Kọyen sorọ ovwo fo avwanre vwọ riẹn oma ghwa kerẹ ihwo re ga Ọghẹnẹ. (Liv. 20:26) Ofori nẹ omamọ uruemu, irhuon vẹ osẹvwen rẹ avwanre dje avwanre phiyọ Inene-ri-Kristi rẹ uyota. Avwanre che vwo kpẹ ọghwẹkoko rubrotọ vẹ ọghwẹkoko rakpọeje rọ cha na, mavọ avwanre se vwo ‘vwo omamọ rẹ uruemu vwẹ uvwre rẹ ihworakpọ’ ji jiri Ọsẹ rẹ avwanre rọhẹ odjuvwu?—⁠1 Pita 2:12.

2. Uphẹn vọ yen herọ kẹ avwanre re vwo dje uruemu rẹ Onene-ri-Kristi phia vwẹ ọghwẹkoko na?

² Dje Uruemu rẹ Onene-ri-Kristi Phia: Ẹguọno rẹ avwanre vwo kẹ ohwohwo vẹ obo rẹ avwanre nene “ihwo rẹ obada” na yerẹn wan fẹnẹ uruemu rẹ akpọ na. (Kọl. 3:10; 4:5; 2 Tim. 3:1-5) Ofori avwanre vwo dje uruemuesiri vẹ akoechiro phia kẹ ihwo re wian vwẹ ihotẹ vẹ asan ra da semu ria, ọ da tobọ dia nẹ obẹnbẹn vwomaphia. Ọyen omamọ rẹ uruemu siẹrẹ avwanre de ru ẹse kẹ ihwo re wian vwẹ asan tiọyen na.

3. Die yen a guọnọre nẹ emiọvwọn karophiyọ, diesorọ?

³ A guọnọre nẹ emiọvwọn vwẹrote emọ rayen vwẹ otọ rẹ ọghwẹkoko na, ihotẹ vẹ asan rẹ a da semu ria. (Isẹ 29:15) Ọga rẹ ihotẹ ọvo da vuẹ aye gbe ọshare ọvo: “Oma ovwan vwerhe avwanre mamọ. Erua vẹ emọ rẹ ovwan eje pha dẹndẹn, ovwan ji vwo omamọ rẹ uruemu. Ihwo re wian kẹ avwanre eje yen ta omamọ rẹ ota kpahen ovwan, mane kẹ ovwan sa dia etinẹ kudughwrẹn kudughwrẹn.”

4. Die yen avwanre che niso kpahen irhuon rẹ avwanre vwẹ ekogho rẹ ọghwẹkoko na?

⁴ Osẹvwen rẹ Abavo: E jẹ avwanre sẹ osẹvwen rẹ abavo ro fori vwẹ ọghwẹkoko na, ọ dia osẹvwen rẹ akpọ nana-a. (1 Tim. 2:⁠9) Ọ da tobọ dia ọke rẹ avwanre cha vwọ ro ihotẹ na yẹrẹ vrẹno, yẹrẹ ọke avwanre de ronvwoma echidiotọ ke tonphiyọ yẹrẹ o de re nu, e jẹ avwanre sẹ osẹvwen rẹ abavo. Ọna cha nẹrhẹ avwanre sa ibaji rẹ avwanre mu ọkieje, ji ghwoghwota siẹrẹ uphẹn na de rhiephiyọ. Omamọ rẹ uruemu vẹ osẹvwen abavo rẹ avwanre vwẹ ọghwẹkoko na cha nẹrhẹ ihwo ri vwo ẹwẹn esiri kerhọ rẹ ovuẹ usivwin ri Baibol na. Oma je cha vwerhe Jihova.—⁠Zẹf. 3:17.

Ẹkarophiyọ Kpahen Ọghwẹkoko Rubrotọ ri 2014

◼ Ọke rẹ Omẹvwa Na: A cha reyọ uhworo vwọ ton ọrhuẹrẹphiyotọ rẹ ọghwẹkoko na phiyọ vwẹ 8:20 a.m. ẹdẹ erha na. Ọke re de ghwoghwo nẹ a cha ton uhworo phiyọ re, avwanre eje gbe chidia hwomamu rere ọrhuẹrẹphiyotọ na sa tonphiyọ vẹ ọghọ. Vwẹ Friday vẹ Saturday, a cha so une je nẹrhovwo rọ koba vwẹ 3:55 p.m., ẹkẹvuọvo Sunday 2:50 p.m.

◼ Ọghwẹkoko Rakpọeje: Ọghwẹkoko rakpọeje cha dia vwẹ ẹkuotọ evo. Karophiyọ nẹ oghọn rukoko vwo ikoko vẹ iniọvo rẹ ayen durhieri vwo nene uche rẹ egbara, asan ra rhuẹrẹ kẹ imoto, vẹ asan rẹ iniọvo na che won. Siẹrẹ iniọvo de kpẹ ọghwẹkoko rakpọeje re durhie ayen ra-a, ọ cha nẹrhẹ ihwo bun nọ. Wọ da guọnọ kpẹ ọghwẹkoko ọfa vrẹ ọwẹn, wo jẹ ọ dia ọ rakpọeje-e.

◼ Asan ra rhuẹrẹ kẹ imoto: O vwo iniọvo re vwẹrote asan ra rhuẹrẹ kẹ imoto. Biko yan nene ọrhuẹrẹphiyotọ rẹ iniọvo nana.—⁠1 Kọr. 13:4, 5.

◼ Asan re che Chidia: Wọ sa sẹro rẹ asan re chidia kẹ orua wẹn, ihwo rẹ wẹ vẹ ayen ro imoto ọvo yẹrẹ ihwo ru wo yono Baibol na. A rhuẹrẹ asan rẹ ihwo re ghwore vẹ erẹ oma rayen ghwa ga-an che chidia. Ọ vwọ dianẹ egbara nana ghwe bun na-a, ohwo ọvo yẹrẹ ivẹ re cha vwẹrote ayen eyen a guọnore nẹ i chidia kẹrẹ ayen.

◼ Eha Rudje: Ofori iniọvo rẹ eya vwọ gba olẹso rọ sa nẹrhẹ ihwo rehẹ obuko rẹ ayen mrẹ eha rudje na.

◼ Emuẹriọ rẹ Oghẹruvo: Biko mu emu rẹ oghẹruvo wẹn rhe ukperẹ wo vwo kpẹ otafe ra semu re. Wo se mu ikula otete rọ sa ruẹ obotọ rẹ agbara na. A guọnọ ikula ride, isete yẹrẹ iganasi vwẹ ọguan rẹ ọghwẹkoko na-a.

◼ Itetoro: Avwanre se dje ọdavwaro phia kpahen ọrhuẹrẹphiyotọ rẹ ọghwẹkoko na womarẹ itetoro ro nẹ ẹwẹn rhe vwọ kẹ iruo rakpọeje. Ọ da dia ishẹki, ovwan si phiyọ nẹ a hwa kẹ “Watch Tower” re siri vwẹ eta ivẹ.

◼ Ihunvwun: Wo de vwo ihunvwun wọ reyọ kọke kọke, ghwa ayen nene oma, keridie e cha dia ọghwẹkoko na-a. E je do igbede revwo duvwun ihwo re mwọga ephẹ kufia vwẹ asan ri fori, ọ diẹ kasan kasan ra mrẹre vwẹ ọguan na yẹrẹ asan re wonri-i.

◼ Revwo Gbẹrophiyotọ: Biko kẹnoma kẹ erọnvwọn re sa kprọ owọ vẹ asan re ghworiẹ keridie kukpe kukpe yen isabato ri kpenu nọ vwọ wan ihwo oma. Isabato ri kpenu nọ-ọ, ri ji shephiyọ awọ rẹ avwanre yen avwanre kuphiyọ rere avwanre sa vwọ yan vwẹ asan eje.

◼ Egbara Revwo Ghorie Emọ vẹ Egbara: A guọnọ egbara revwo ghorie emọ yẹrẹ egbara ra rioma phiyọ vwẹ ọghwẹkoko na-a. Ẹkẹvuọvo, a rhọnvwe phiyọ egbara re vwo mwu emọboba, ọ die ọ re ghorie na-a. E jẹ emiọvwọn mwu egbara tiọyen kẹrẹ oma.

◼ Ishani: A guọnọ ishani egangan re sa rhanra ohwo-o, ena sa rhanriẹ ega rẹ iniọvo rẹ avwanre evo.—⁠1 Kọr. 10:⁠24.

◼ Ifọmu ri Please Follow Up (S-43): A guọnọre nẹ avwanre ghwa ifọmu nana nene oma rhe ọghwẹkoko na rere a vwọ niyẹnrẹn rẹ ihwo re ghwoghwota kẹ ri dje omavwerhovwẹn phia vwẹ ọke ọghwẹkoko na. Vwẹ iyẹnrẹn na kẹ oniọvo rọhẹ asan ra da reyọ ẹbe yẹrẹ vwọkẹ osiọbe rẹ ukoko wẹn siẹrẹ wo de te uwevwin.

◼ Asan ra da Semu Ria vẹ Ineki rehẹ Otafe rẹ Ọghwẹkoko na: Brọghọ phiyọ Jihova oma womarẹ omamọ uruemu wẹn vwẹ asan ra da semu ria. Sẹ osẹvwen rẹ abavo. O fori avwanre vwo kpẹ otafe ra dẹ erọnvwọn siẹrẹ omẹvwa na da tonphiyọ nure-e.

◼ Asan re won:

Uchunu rẹ ibruwevwin wọ cha dia yen wo ru ọrhuẹrẹphiyotọ rọyen, uchunu rẹ ihwo ra guọnọre nẹ e dia asan wo wonri na, eyen cha dia.
Yan mu ọrhuẹrẹphiyotọ ru wo ruru kpahen asan wo che won, jokpanẹ emu ri kpregede phiare. Ọ da dia ọtiọyen, gba fobọ vuẹ ihwo ri vwo asan na rere ohwọfa sa vwọ reyọ. (Mat. 5:37) Wọ da guọnọ siobọnu asan na, wẹ vẹ ohwo na ta phiyọ. Wọ da guọnọ nẹ ayen rhan igho wẹn kẹ wẹ, gba vuẹ ayen te ẹdẹ ivẹ tavwen wo ki siobọnu asan na.
Muegbe rẹ eghwa wẹn phiyotọ tavwen wọ ke reyọ orọnvwọn revwo ghorie eghwa vwo mwu ayen, wọ me je fobọ reyọ rhivwin.
Asan re dje kẹ wẹ ọvo ọyen wo de cheremu. E jẹ ohwo vuọvo cheremu siẹre omẹvwa na da tonphiyọ nure-e.
Ọ da dianẹ ihotẹ wo wonri na, vwo ọrhuẹrẹphiyotọ rẹ iti, ikọfi vẹ efa ọphẹ, wo mu ayen mwẹ reyọ-ọ.
Ọkieje, dje omamọ rẹ ẹwẹn ọfuanfon na phia vwẹ obaro rẹ ihwo re wian vwẹ ihotẹ na vẹ iniọvo re wian vwẹ akon iruo rẹ asan re won. Ọ vwọ dianẹ ihwo buebun yen ayen vwẹrote na, ọ cha da ayen ẹro siẹrẹ avwanre de vwo akoechiro, ji dje uruemuesiri kugbe erorokẹ phia.
Ọkieje, e jẹ emiọvwọn vwẹrote emọ rayen vwẹ ihotẹ, asan ra da rhẹrhẹ vẹ asan rẹ ayen wonri na.
Asan rẹ ukoko vwọ kẹ wẹ ọvo ọyen wọ dia. Yan nene ọrhuẹrẹphiyotọ rẹ asan ra vwọ kẹ wẹ na. A guọnọre nẹ eshare diotọ kri yẹrẹ vwerhẹn vwẹ uvun rẹ iniọvo eya-a, ọtiọyen ọ je hepha vwọ kẹ iniọvo eya.
Siẹrẹ ebẹnbẹn da vwomaphia vwẹ asan wo wonri, fobọ vuẹ akon iruo re vwẹrote asan re won vwẹ ọghwẹkoko na rere ayen chọnwuko.

◼ Omaẹvwọkpahotọ kẹ owian: Kohwo kohwo rọ guọnọ vwomakpahotọ kẹ owian, e jẹ o bru akon iruo re vwẹrote ẹdia nana vwẹ ọghwẹkoko na. Emọ ri ji rhi te ẹgbukpe 16, se nene ọsẹ yẹrẹ oni, ohwo rẹ ayen nene dia, yẹrẹ oniọvo ọfa rẹ ọsẹ rayen rhọnvwe kẹ wian.