Enọ Rẹ Ihwo Ri Se Ẹbe Avwanre Nọre

Ọke rẹ Eshu vwọ vuẹ Ivi nẹ o che ghwu-u siẹrẹ ọ da re omamọ rẹ urhe rẹ erianriẹn rẹ erhuvwu vẹ umiovwo na, uyono rẹ erhi ghwẹ-ẹ yen ọ kọnphiyọ ẹwẹn rọyen?

Ọ dia Eshu vuẹ Ivi nẹ ọ da re omamọ rẹ Ọghẹnẹ vuẹ ayen nẹ ayen ria-a na, ọ cha de họhọ nẹ o ghwuru jẹ ẹbẹre ọvo rẹ oma na ra mrẹ-ẹ (rẹ ihwo evo se erhi ro jeghwo nonẹna) yerẹn vwẹ asan ọfa-a. Eshu womarẹ ọrọdekọ na ta kẹ Ivi nẹ siẹrẹ ọ da rẹ omamọ na, o ‘che ghwu’ kakaka-a. Eta rẹ Eshu na mudiaphiyọ nẹ Ivi che yeren omamọ rẹ akpọ siẹrẹ ọ rha hẹ otọ rẹ usuon rẹ Ọghẹnẹ-ẹ.—Jẹn. 2:17; 3:3-5.

Ọ da dianẹ uyono ọchọchọ nẹ erhi ghwẹ-ẹ tonphiyọ vwẹ ogba rẹ Idẹni-i, kẹ tivọ yen ọ da tonphiyọ? A ghwa riẹn asan na dẹ-ẹn. Ẹkẹvuọvo, avwanre riẹnre nẹ a ghwọrọ ẹga rẹ efian eje vwẹ Oghwe rẹ ọke ri Noa. Ẹga rẹ efian vuọvo sivwin wan Oghwe na-a, kidie Noa vẹ orua rọyen re dia egọghẹnẹ rẹ uyota ọvo yen wan Oghwe na vrẹn.

Ọtiọyena, ka sa tanẹ uyono rẹ erhi ghwẹ-ẹ tonphiyọ ọke rẹ Oghwe na vwọ wan nu. O muẹro nẹ ọke rẹ Ọghẹnẹ vwo tighi ephẹrẹ rẹ ihwo jẹ vwẹ Babel, ra vwọ “hra ayen nene enu rẹ akpọ na ejobi” yen ayen vwọ hwarhiẹ uyono rẹ erhi ghwẹ-ẹ na nene oma. (Jẹn. 11:8, 9) O toro ọke rẹ uyono efian nana vwọ tonphiyọ-ọ, o muẹro nẹ Eshu rọ dia “ọsẹ rẹ ofian” na yehẹ obuko rẹ uyono nana, oma je vwerhọn rọ vwọ mrẹ nẹ uyono nana hrabọ nene asan eje nonẹna.—Jọn 8:44.