Wọ Riẹn Ọke Na?
DIE yen wo che ru siẹrẹ wọ da guọnọ riẹn asan ọke hepha? Aphro herọ-ọ, wo che nẹ ughọjọ. Die yen wọ cha ta siẹrẹ ugbeyan wẹn da nọ wẹ asan rẹ ọke hepha? Ẹkẹvuọvo, mavọ yen wọ cha kpahen kẹ wẹn? O vwo idjerhe sansan re vwo se ọke. Mavọ avwanre ru riẹn?
Reyọ phiyọ nẹ ọke na hẹ ughọjọ ọvo gbubro rẹ oghẹruvo. Ọkiọvo, wọ cha tanẹ 1:30. Fikirẹ asan rẹ ayen nurhe yẹrẹ ẹkuruemu rẹ asan rẹ ayen dia, ihwo evo je sa tanẹ 13:30 yen ọke na hepha. Eyena kẹ ihwo ri vwo ughọjọ rẹ unọke 24. Vwẹ asan evo, “ughọjọ ọvo gbubro” se mudiaphiyọ ibrẹro 30 yen chekọ ọke na vwo te ughọjọ ivẹ.
Kerẹ ohwo ro se Baibol, ọkiọvo o se gbevwunu oborẹ ihwo se ọke wan vwẹ ọke re vwo si Baibol na. O ghwe vwo idjerhe ọvo kiriguo rẹ ayen vwo se ọke-e. E djunute “irhiọke,” “oghẹruvo,” kugbe “ovwọnvwọn” vwẹ ẹbẹre ra vwẹ Hibru si vwẹ Baibol na. (Jẹn. 8:11; 19:27; 43:16; Urhi 28:29; 1 Ivie 18:26) Jẹ, o vwo ọke evo re vwo se ọke na mrẹmrẹ.
Vwẹ ọke rẹ Baibol, irere buebun vwo erhẹrotọ, marho kẹ evunrẹ ason. Ikpe ujorin evo tavwen e ki vwiẹ Jesu, ihwo rẹ Izrẹl ghare ason na kpo ẹrhẹrẹ erha. (Une 63:6) Iguẹdjọ 7:19 djunute “ẹrhẹrẹ rẹ uherevie” rẹ ason. Vwẹ ọke rẹ Jesu, ihwo rẹ Ju da vwẹrokere ihwo rẹ Grik vẹ Rom vwọ ghare ason na kpo ẹrhẹrẹ ẹne.
Ẹbe rẹ ikuegbe ri Jesu djunute ẹrhẹrẹ nana abọ buebun. Kerẹ udje, Baibol na tare nẹ Jesu yan vwẹ enu rẹ abadi bru idibo rọyen ra, vwẹ “ẹrhẹrẹ rẹne vwẹ asọn.” (Mak 6:48) Vwẹ itẹ ọvo rẹ Jesu kperi, ọ da ta: “Ohwo ro vwo uwevwi da riẹn ọke [yẹrẹ ẹrhẹrẹ] rẹ iji cha vwọ rhe, kọ rhẹrẹ hrọke, ọ gbe sa fọ nẹ iji tọn uwevwi rọye fi-i.”—Mat. 24:43.
Jesu djunute ẹrhẹrẹ ẹne na ọke rọ vwọ ta kẹ idibo rọyen: “Vwẹ ọtiọye na ovwan rhẹrẹ: kidie ovwan riẹn ọke rẹ ọ ro vwọ uwevwi na vwọ rhe-e, sẹ ovwọnvwọn, gbenẹ uherevie ason, gbenẹ ọke rẹ ọhọ de bo, eyẹ urhiọke.” (Mak 13:35) Ẹrhẹrẹ rẹsosuọ rọ dia “ovwọnvwọn” na, e kere vwo nẹ ọke rẹ ọnre na de shekpotọ nu re te ughọjọ irhirin rẹ ason. Ẹrhẹrẹ rivẹ na kẹ “uherevie ason.” E kere vwo nẹ ughọjọ irhirin re te uherevie rẹ ason. Ọrerha ke rha “otubo.” O nẹ ughọjọ ihwivẹ re te ughọjọ erha rẹ urhiọke. Ọ sa dianẹ ẹrhẹrẹ nana yen ọhọ vwo bo vwẹ ason re vwo mu Jesu. (Mak 14:72) Ẹrhẹrẹ rẹne na yen “edegburhiọke.” O nẹ ughọjọ erha rẹ urhiọke re te ọke rẹ uvo da va cha.
Eriyina, dede nẹ ihwo rẹ ọke awanre vwo ughọjọ rẹ ayen vwo nẹ ọke-e, jẹ ayen vwo ona rẹ ayen vwo se ọke.