Enọ Rẹ Ihwo Ri Se Ẹbe Avwanre Nọre

Ihwo ivẹ re dia aye gbẹ ọshare-e da vwerhẹn uwevwin ọvo kọkirhie, jẹ ọ dianẹ kẹ orọnvwọn yen sorọ-ọ, a sa tanẹ ayen ru umwemwu ra da vwẹ umẹ rẹ ẹdjọeguo vwo mu kẹ ayen?

E, ọ rha dia emuọvo kiriguo yen sorọ-ọ, a cha vwẹ umẹ rẹ ẹdjọeguo vwo mu kẹ ayen, vẹ ẹwẹn nẹ ayen gbe ọfanrhiẹn.​—1 Kọr. 6:18.

Ekpako na cha nabọ fuẹrẹn ẹdia na sẹ o ghini fo nẹ a vwẹ umẹ rẹ ẹdjọeguo vwo mu. Kerẹ udje: Ayen kọn phiyọ ohwohwo? E ke bru ayen uche kpahen uruemu rayen jovwo re? Die yen ghene nẹrhẹ ayen vwerhẹn uwevwin ọvo kọkirhie? Ayen jiroro rọyen phiyotọ jovwo? O vwo oborẹ ayen sa vwọ kẹnoma kẹ ẹdia na jovwo? Gbanẹ emu rẹ kpregede ra cha sa kẹnoma kẹ-ẹ yen nẹrhẹ ayen vwerhẹn uwevwin ọvo kọkirhie? (Aghwo. 9:11) Asan ọvo yen ayen sherhẹn? Ọkiọvo erọnvwọn efa je herọ rẹ ekpako na che ni vwo brorhiẹn, kidie ẹdia na ejobi cha sa dia ọvo-o.

Ekpako na da fuẹrẹn ẹdia na ejobi nu, kẹ ayen che brorhiẹn sẹ oborẹ ayen ruru na te vwọ vwẹ umẹ rẹ ẹdjọeguo vwo mu.