Wọ Riẹnre Jovwo?

Urhi rẹ Mosis na yen e vwo brorhiẹn rẹ kota kota ro sheri vwẹ uvwre rẹ ihwo rẹ Izrẹl rẹ ọke awanre?

Ọ SA DIA ọtiọyen ọkiọvo. Jẹ a fuẹrẹn udje ọvo. Urhi Rivẹ 24:14, 15 da ta: “Wo shenyẹ odibo re durhieri rọ dia ogbere rẹ akpọ bẹ-ẹn, owenẹ ọ dia ọvo vwẹ usun rẹ imoni wẹn na eyẹ ọvo vwẹ usun rẹ erhorha na re hẹ evun rẹ otọ irere wẹn na . . . O de brenu kẹ Ọrovwohwo kpahen owẹ, kọ dia umwemwu kẹ wẹ.”

A mrẹ oyare ọvo re siri vwẹ ẹgbukpe ujorin ighwrẹn a ke rhe mrẹ ọke rẹ Kristi, vwẹ asan rọ kerẹ Ashdod. Ọ sa dianẹ e siro kẹ ọwiowian ra tare nẹ, o se koko uche ọka ra guọnọ mie-e. Eta re si phiyọ ẹbẹre ochẹ na da ta: “Ọke rẹ odibo wẹn [ọ ro si oyare na kẹ na] vwo koko eka na eje ro vunru vwẹ uvwre rẹ ẹdẹ ibro re wanre na, Hoshayahu ọmọ rẹ Shobay da rhe reyọ adagba rẹ odibo wẹn. . . . Ihwo eje re vẹ ovwẹ gba wian vwevunrẹ oheri na riẹnre . . . nẹ uyota yen me ta na. Mi ru emu vuọvo-o. . . . Osun na da tobọ no nẹ adagba re mie odibo rọyen na tere-e, e jẹ ọ chọn odibo rọyen uko fikirẹ arodọvwe! Biko wo kuẹrofia kẹ odibo wẹn rọ banphiyọ na-a.”

Ogbikuegbe Simon Schama da ta: “Ọ họhọre nẹ ọnana ghwa dia oyare rẹ ọwiowian rọ de guọnọ nẹ a vwẹ [adagba rọyen] kẹ rhivwi-in. Ukperẹ ọtiọyen, ọ họhọre nẹ ọwiowian na je riẹn kpahen irhi rehẹ evunrẹ Baibol na, ma rho kẹ e rehẹ Livitikọs vẹ Urhi Rivẹ, ri shekpahen ra vwọ gboja kẹ ovwiogbere.”