‘Ọkokẹ Cha Ghọghọ’

NẸ AWANRE rhe yen izobo eze vwọ dia emu ọvo rọ pha ghanghanre vwẹ ẹga rẹ uyota. Ihwo rẹ Izrẹl ze izobo rẹ eranvwe. A je riẹn Inenikristi rẹ ọke nana phiyọ ihwo ri ze izobo rẹ “ẹbẹrunu.” Ẹkẹvuọvo, izobo efa je herọ re ghanre kẹ Ọghẹnẹ. (Hib. 13:15, 16) Izobo nana eje ghwa aghọghọ vẹ ebruba cha, kirobo ra cha mrẹ vwẹ idje nana.

Hanah, ọyen odibo rẹ Ọghẹnẹ vwẹ ọke awanre, rọ guọnọ ọmọ jẹ o ji rhi vwiẹ-ẹ. O de ve kẹ Jihova vwẹ ẹrhovwo nẹ o de vwiẹ ọmọ, ọ cha vwọ kẹ “Ọrovwohwo vwẹ ẹdẹ rẹ akpọ rọye ejobi.” (1 Sam. 1:10, 11) Ọke vwọ yanran na, Hanah da mrevun, o de vwiẹ ọmọshare, e de se Samuẹl. Ọmọ na vwo brevie nu, Hanah de muo kpo uwevwin rẹ Ọghẹnẹ kirobo ro veri. Jihova de ku ebruphiyọ ku Hanah fikirẹ ẹwẹn rẹ omaevwoze rọyen. Ukuko na, o de vwiẹ emọ iyorin efa; Samuẹl da je rhe dia ọmraro kugbe ọvo usun rẹ ihwo ri si Baibol na.—1 Sam. 2:21.

Kerẹ Hanah vẹ Samuẹl, Inenikristi rẹ ọke nana ji vwo uphẹn rẹ ayen vwọ reyọ arhọ rayen vwọ kpahotọ vwẹ ẹga rẹ Jihova. Jesu veri nẹ, osaẹhwa herọ vwọ kẹ kemu kemu rẹ avwanre vwo ze vwẹ ẹga rẹ Jihova.—Mak 10:28-30.

Vwẹ ẹgbukpe ujorin rẹsosuọ, aye ọvo herọ re se Dọkas. A riẹn Dọkas phiyọ “oruẹse o ki rhe vwo uruemu esiri,” fikirẹ ekuakua sansan ro siobọnu vwọ chọn ihwo efa uko. Ọ da ohwo mamọ, kidie Dọkas “kọ rhe mwọga o de ghwu,” ukoko na eje de muomaphiyọ. Iniọvo na vwo nyo nẹ Pita hẹ ekogho na, ayen da rẹ nẹ ọ kpare owọ bru ayen rhe. Vwẹ ẹwẹn roro aghọghọ rayen ọke rẹ Pita vwọ rhe, rhe rhọvwọn Dọkas nẹ ughwu. Ọnana yen evrẹnushi rẹsosuọ rẹ ọyinkọn ruru! (Iruo 9:36-41) Izobo eze rẹ Dọkas na chọrọ Ọghẹnẹ ẹro-o. (Hib. 6:10) E si ikuegbe rẹ ẹse eruo rọyen vwẹ Baibol na, rere avwanre sa vwọ vwẹrokere.

Ọyinkọn Pọl ji dje omamọ rẹ udje kẹ avwanre, rọ vwọ vwẹ ọke vẹ ẹgba rọyen vwọ ze. Vwẹ ọbe ro si vwo rhe iniọvo rẹ Kọrẹnt, Pọl da ta: “Me vwẹ aghọghọ ghwọrọ obo ri mi vwori ejobi fiki rẹ erhi rẹ ovwan.” (2 Kọr. 12:15) Fikirẹ obo ro rhiẹromrẹ, Pọl da rhe mrẹvughe nẹ omavwerhovwẹn herọ siẹrẹ a da vwẹ oma rẹ ohwo vwo ze fikirẹ ihwo efa; ma rho kparobọ, ọ je cha nẹrhẹ a mrẹ ebruphiyọ vẹ ẹroesiri rẹ Jihova.—Iruo 20:24, 35.

O muẹro nẹ oma vwerhen Jihova siẹrẹ avwanre da vwẹ ọke vẹ ẹgba rẹ avwanre vwo ruiruo rẹ Uvie na, je vwẹ ukẹcha kẹ iniọvo rẹ avwanre. Ẹkẹvuọvo, idjerhe efa herọ re se vwo bicha iruo rẹ Uvie na? E! Vwọ vrẹ ọke vẹ ẹgba rẹ avwanre, e ji se ru itetoro ro nẹ otọ rẹ ẹwẹn rhe. Itetoro tiọyena yen nẹrhẹ iruo rẹ aghwoghwo rẹ akpọeje rẹ avwanre na sa yan obaro. Ọyen a je vwọ vwẹrote imishọnare vẹ iniọvo efa rehẹ ẹga rẹ ọkieje rẹ oghẹresan. Vwọba, a je vwẹ itetoro na vwo biẹcha iruo rẹ isiesi vẹ efanfan rẹ ẹbe vẹ ividio, iruo rẹ ebanbọn rẹ Eguan Ruvie kpokpọ, kugbe ukẹcha ra vwọ kẹ ihwo rẹ oghwọrọ te oma. Vwọrẹ uyota, “ohwo rọ mrẹ otu ghọghọ [yẹrẹ ọkokẹ,] cha vwo ebruba.” Ma rho, siẹrẹ a da vwẹ ekuakua eghanghanre rẹ avwanre vwo brọghọ phiyọ Jihova oma.—Isẹ 3:9; 22:9.

Idjerhe Sansan Rẹ Ihwo Evo Vwo Toro Phiyọ Iruo Rẹ Akpọeje Na

Vwo nene udje rẹ iniọvo re herọ vwẹ ọke rẹ Pọl, nonẹna ihwo buebun ji “phiẹ ememu vwọ hẹ akakọ” rẹ ayen che phi phiyọ ekpeti re si “Iruo rẹ Akpọeje” phiyọ vwẹ Ọguan Ruvie. (1 Kọr. 16:2) Emeranvwe de re, ukoko vuọvo reyọ igho ra mrẹre vwẹ ekpeti na vwo rhe oghọn ukoko rọhẹ ẹkuotọ rayen. Wẹwẹ komobọ je sa reyọ itetoro wẹn vwo rhe oghọn ukoko rọhẹ ẹkuotọ wẹn. Biko vwẹ ovuẹ vwo rhe oghọn ukoko, siẹrẹ wọ da guọnọ riẹn odẹ rẹ wo se si nẹ a hwa itetoro wẹn kẹ. Wọ sa mrẹ edẹ tiọyena vwẹ www.jw.org/urh. Biko sane oka rẹ itetoro ri shephiyọ vẹ ekogho wọ dia:

ITETORO

Wọ sa vwẹ ifonu yẹrẹ ikọmputa vwọ hwa igho nẹ akantu wẹn vwo rhe ukoko, yẹrẹ vwẹ ikadi rẹ ATM wẹn vwo ruo. Vwẹ ẹkuotọ evo, e se ru itetoro tiọna womarẹ jw.org yẹrẹ wẹbsaiti efa ra rhọnvwe kẹ.
Wo se toro igho, erọnvwọn ohọre vẹ e rẹ abọ, yẹrẹ erọnvwọn eghanghanre efa wo vwori. Si ọbe nene itetoro wẹn na, ro che djephia nẹ igho yẹrẹ ekuakua eghanghanre na, eyen obo wo torori.

ITETORO RẸ WỌ SA RHOMA REYỌ RHIVWIN

A sa rhoma hwa igho wo torori rhivwin siẹrẹ wọ da guọnọ.
Si ọbe nene oborẹ wo torori ro che djephia nẹ wọ sa rhoma reyọ rhivwin.

ITETORO RE GUỌNỌ OMAMỌ IROROẸJẸ

Vwọba igho vẹ ekuakua eghanghanre, o ji vwo idjerhe efa rẹ wo se vwo toro phiyọ iruo rẹ akpọeje rẹ avwanre. Tavwen wo ki ru oka rẹ itetoro ro je we, biko nọ mie oghọn ukoko rọhẹ ẹkuotọ wẹn rere ayen vuẹ wẹ ọ rẹ urhi rẹ ẹkuotọ wẹn rhọnvwephiyọ. Kidie nẹ urhi rẹ osa uyovwin rẹ ẹkuotọ ọvo sa fẹnẹ ọ rẹ ẹkuotọ ọfa, ofori nẹ wọ nọ mie ohwo rọ riẹn kpahen urhi rẹ ẹkuotọ rẹ wọ hepha, tavwen wo ki ru itetoro wẹn.

Ishọransi vẹ Igho rẹ Wo Vwo Wontọ nẹ Iruo: Ohwo se sio phiyotọ nẹ a hwa igho rẹ ishọransi rẹ arhọ rọyen, igho rẹ pẹnshọni, yẹrẹ osa ro vwo wontọ nẹ iruo, vwọ kẹ ukoko rẹ Iseri rẹ Jihova.

Igho re Phi Phiyọ Ibanki: Ọ da dia oborẹ ibanki wẹn rhọnvwephiyọ, wo se ru ọrhuẹrẹphiyotọ ra vwọ hwa igho rọhẹ akantu wẹn kẹ ukoko na siẹrẹ wo de ghwu.

Istọku vẹ Bọndu: Ohwo se siobọnu erere rẹ istọku vẹ bọndu rọyen kẹ ukoko na, yẹrẹ sio phiyotọ nẹ a hwa kẹ ukoko na siẹrẹ o de ghwu.

Etọ Yẹrẹ Iwevwin: Wo de vwo otọ yẹrẹ uwevwin ra sa rhoma shẹ, wọ sa reyọ vwo ru itetoro kẹ ukoko na. Ọ da dia uwevwin rẹ wọ dia yen wọ guọnọ vwo ru itetoro, wo se sio phiyotọ nẹ wọ cha dia evun rọyen duvwun ẹdẹ ughwu wẹn tavwen ukoko na ke reyọ.

Uku vẹ Okẹ: Wo se si ọbe rẹ uku wẹn phiyotọ nẹ a vwẹ ekuakua yẹrẹ igho wẹn kẹ ukoko na siẹrẹ wo de ghwu, yẹrẹ nẹ ukoko na sa reyọ ayen, wọ je vwọ hẹ akpọ na. Ọkiọvo, urhi rẹ ẹkuotọ wẹn se si nẹ unu igho rẹ osa uyovwin ra reyọ mie ihwo ri ruẹ itetoro tiọna.

Ọ guọnọ uvi ọrhuẹrẹphiyotọ e ki se ru “itetoro re guọnọ omamọ iroroẹjẹ” na. Asaọkiephana, e ru ibroshọ re se Charitable Planning to Benefit Kingdom Service Worldwide vwẹ Oyibo vẹ Spanish, rọ vwọ vwẹ ukẹcha kẹ ihwo re guọnọ ru itetoro vwọ kẹ iruo rẹ akpọeje rẹ avwanre. E si ibroshọ na rere ọ vwẹ ukẹcha kẹ ihwo re guọnọ vwẹ igho yẹrẹ erọnvwọn efa rẹ ayen vwori vwo ruẹse kẹ ukoko ọke nana rẹ ayen vwọ hẹ akpọ na yẹrẹ ọke rẹ ayen de ghwu nu. Noso nẹ ọ ghwa dia evuẹ na eje rehẹ evun rọyen yen cha wian vwẹ ẹkuotọ wẹ-ẹn, fikirẹ irhi rẹ osa uyovwin vẹ irhi efa rehẹ ẹkuotọ wẹn. Idjerhe tiọna yen ihwo buebun vwo toro vwọ kẹ ẹyan-obaro rẹ iruo rẹ akpọeje rẹ avwanre, ro churobọ si ukẹcha ra vwọ kẹ ihwo rẹ oghwọrọ te oma, kugbe iruo efa, ọ je nẹrhẹ osa uyovwin re mie ayen vwọ kẹ itetoro tiọyena kpotọ. Ibroshọ na da herọ vwẹ ẹkuotọ wẹn, wọ sa reyọ ọvo mie osiẹbe rẹ ukoko wẹn.

Wọ da guọnọ evuẹ efa, kpo “Toro Vwọkẹ Ẹyaobaro rẹ Iruo Akpọeje Avwanre” rọhẹ obotọ rẹ karuọbe karuọbe rẹ jw.org, yẹrẹ si ovuẹ rhe oghọn ukoko rẹ ẹkuotọ wẹn.