Ofori nẹ Inenikristi Ru Ikrismasi?

Ihwo buebun vwẹ akpọ na rorori nẹ Ikrismasi ọyen orẹ rẹ ẹdevwiẹ rẹ Jesu Kristi. Wo se roro kpahọn re, sẹ Inenikristi rẹ ẹgbukpe ujorin ẹsosuọ re dia ihwo ri sikẹre Jesu ru Ikrismasi? Wọ riẹn oborẹ Baibol na ta kpahen ẹdevwiẹ? Ẹkpahọnphiyọ vwọ kẹ enọ nana cha chọn wẹ uko vwọ riẹn sẹ ofori rẹ Inenikristi vwo ru Ikrismasi.

Ẹsosuọ, Baibol na vwẹ ọke vuọvo vwọ ta ota kpahen orẹ rẹ ẹdevwiẹ rẹ Jesu yẹrẹ ọ rẹ idibo rẹ Ọghẹnẹ efa re fuevu-un. Ihwo ivẹ ọvo yen Baibol na djunute nẹ ayen re orẹ rẹ ẹdevwiẹ. Ihwo ivẹ na dia idibo rẹ Jihova rọ dia Ọghẹnẹ rẹ Baibol na-a, orharhe iyẹnrẹn yen ji nẹ orẹ rẹ ẹdevwiẹ rayen na rhe. (Jẹnẹsis 40:20; Mak 6:21) Kirobo rẹ Encyclopædia Britannica, tare, Inenikristi rẹsosuọ vwọso “orẹ rẹ ẹdevwiẹ, kidie ọyen ẹkuruemu rẹ egedjọ.”

Baibol na se ẹdẹ re vwo vwiẹ Jesu-u. McClintock and Strong’s Cyclopedia da ta: “A cha sa mrẹ ẹdẹ re vwiẹ Jesu vwẹ Ọphọ Kpokpọ na yẹrẹ vwẹ asan ọfa-a.” Vwọrẹ uyota, ọ da dianẹ Jesu guọnọ nẹ a re orẹ rẹ ẹdevwiẹ rọyen, ọ ra nẹrhẹ a riẹn ẹdẹ re vwiẹrẹ vwevunrẹ Baibol na.

Ọrivẹ, o vwo asan vuọvo vwẹ Baibol na rọ tare nẹ Jesu yẹrẹ iyinkọn rọyen ru Ikrismasi-i. Kirobo rẹ New Catholic Encyclopedia tare, obọ rẹsosuọ re vwo djunute Ikrismasi ọyen ọ ra mrẹre “vwẹ Chronograph rẹ Philocalus rọ dia ikalẹnda rẹ ihwo rẹ Rom re siri oma ukpe rẹ 336 [C.E.].” O muẹro nẹ e si Baibol na nu, Jesu ji rhivwin kpo odjuvwu ikpe ujorin buebun tavwen e ki si ọbe yena. Ọtiọyena, ọbe rẹ McClintock and Strong na da ta nẹ “orẹ rẹ Ikrismasi nẹ obọ rẹ Ọghẹnẹ rhe-e, a je mrẹ vwẹ Ọphọ Kpokpọ na-a.”a

Jesu rọ dia Oyono Rode na vwẹ odjekẹ kẹ idibo rọyen kpahen obo rọ guọnọ nẹ ayen ru, e ji si odjekẹ na phiyọ Baibol na. Ẹkẹvuọvo, orẹ rẹ Ikrismasi dia ọvo usun rẹ odjekẹ na-a. Kirobo rẹ oyono vwẹ isikuru guọnọre nẹ emọ rẹ isikuru na ru vrẹ odjekẹ ra vwọ kẹ aye-en ye, ọtiọyen yen Jesu je guọnọ nẹ idibo rọyen “yeri kirobo rẹ Ọbe Ọfuanfon na djeri.”​—1 Kọrẹnt 4:6.

Ukperẹ Ikrismasi, o vwo irueru ọghanghanre ọvo rẹ Inenikristi rẹsosuọ na nabọ ru, ọyen Ẹkarophiyọ rẹ Ughwu ri Jesu. Jesu komobọ yen vuẹ idibo rọyen ọke vẹ obo re ru Ẹkarophiyọ na wan. E si odjekẹ na vẹ ẹdẹ re vwo ru Ẹkarophiyọ na phiyọ Baibol na.​—Luk 22:19; 1 Kọrẹnt 11:25.

Kirobo re dje cha na, Ikrismasi ọyen orẹ rẹ ẹdevwiẹ, Inenikristi ẹgbukpe ujorin rẹsosuo vwobọ vwẹ orẹ rẹ egedjọ yena-a. Kpobarophiyọ, o vwo asan vuọvo rẹ Baibol na da tanẹ Jesu yẹrẹ ohwo ọfa ru Ikrismasi-i. Fikirẹ odjefiotọ nana, Iduduru rẹ Inenikristi vwẹ akpọeje da rhe rhọvwen nẹ ofori rẹ Inenikristi vwo ru Ikrismasi-i.