Emekashe Umwemwu Herọ?

E, emekashe umwemwu herọ. Tivọ yen ayen nurhe? Karophiyọ nẹ Ọghẹnẹ ma emekashe na, ọ da je kẹ ayen okẹ rẹ ọmuvwiẹ. Ọmọke krẹn a ghwa vwọ ma Adam vẹ Ivi nu, ọvo vwẹ usun rẹ emekashe na da vwẹ ọmuvwiẹ rọyen vwo ru umiovwo, rọ vwọ nẹrhẹ ihwo ru umwemwu vwẹ otọrakpọ. Amakashe na da nẹrhẹ Adam vẹ Ivi ru umwemwu vwọso Ọghẹnẹ. (Jẹnẹsis 3:1-7; Ẹvwọphia 12:9) Baibol na se odẹ rẹ amakashe na yẹrẹ ẹdia rọ hepha vwẹ odjuvwu jovwo tavwen o ki ru umwemwu-u. Ẹkẹvuọvo ro vwo ru umwemwu nu, Baibol na de se nẹ Eshu, ro mudiaphiyọ “Ọrọvwọsua,” kugbe Idẹbono ro mudiaphiyọ “Ọromiovwohwo.”​—Matiu 4:8-11.

Ọ da ohwo mamọ nẹ ẹvwọsua na vwoba vwẹ etiyi-in. Vwẹ ọke rẹ Noa, emekashe evo rẹ Baibol na se uchunu raye-en da “yan jẹ ẹdia rayen vwo” vwẹ orua rẹ Ọghẹnẹ vwẹ odjuvwu. Ayen da rhe otorakpọ na, ayen de hirhomaphiyọ ihworakpọ rere ayen se vwo gbe ọfanrhiẹn, ọnana fẹnẹ oboresorọ Ọghẹnẹ vwọ ma ayen.​—Jude 6; Jẹnẹsis 6:1-4; 1 Pita 3:19, 20.

Die yen phia kẹ emekashe umwemwu yena? Ọke rẹ Ọghẹnẹ vwọ vwẹ oghwe rode vwọ ghwọrọ akpọ na, ayen da rhoma hirhomaphiyọ emekashe, ayen de rhivwin kpo odjuvwu. Ẹkẹvuọvo, Ọghẹnẹ rhọvwen kẹ ayen nẹ ayen rhoma reyọ “ẹdia rayen” rẹ ayen hepha jovwo-o. Ukperẹ ọtiọyen, ọ da vwẹ ọjọnrọn kanre ayen mu phiyọ “ebri ri bẹdẹ” ra riẹn phiyọ Tartarus. (Jude 6; 2 Pita 2:4) Emekashe umwemwu nana vwẹ uphẹn kẹ Eshu rọ dia “onotu” rẹ emekashe umwemwu na, rọ je “vwẹ oma nẹ kerẹ amakashe rẹ urhukpe” na nẹ o sun ayen.​—Matiu 12:24; 2 Kọrẹnt 11:14.

Baibol na yonori nẹ a vwẹ Jesu vwo mu Ovie rẹ Uvie rẹ Ọghẹnẹ, rọ dia igọmẹti rọhẹ odjuvwu vwẹ ukpe rẹ 1914.a A ghwa vwọ vwẹ Jesu mu Ovie nu, ọ da djẹ Eshu vẹ emekashe rọyen rhe otọrakpọ na, ayen rhe che se rhivwin kpo odjuvwu ọfa-a. Umiovwo kugbe ọfanrhiẹn rọ vọn akpọ na nonẹna ghwe djephia nẹ ophu mu eshu vẹ emekashe rọyen, kọyensorọ ayen vwọ nẹrhẹ ihwo ruẹ umiovwo.​—Ẹvwọphia 12:9-12.

Ẹkẹvuọvo, ọfanrhiẹn vẹ ozighi re rhoma ganphiyọ na, ọyen odjephia nẹ chekemerha, Ọghẹnẹ ko che si umiovwo no. O rhe che kri-i, a cha ghwọrọ emekashe umwemwu na. Ọke rẹ Uvie rẹ Ọghẹnẹ de sun akpọ rẹ iparadaisi vwẹ ikpe 1,000 nu, ka cha vwẹ uphẹn rọ koba vwọ kẹ emekashe umwemwu na vwẹ ọmọke rere ayen davwen ihworakpọ ni. Ọyena da wan nu, ka ghwọrọ ayen kufia bẹdẹ.​—Matiu 25:41; Ẹvwọphia 20:1-3, 7-10.