Ohwo de Ghwu nu o ji Yerẹn?

ESEGBUYOTA sansan yen ihwo vwo kpahen arhọ vẹ ughwu. Evo vwo esegbuyota nẹ ayen de ghwu nu, ayen che kpo asan ọfa ra dia bẹdẹ. Efa vwo esegbuyota nẹ a cha rhoma vwiẹ ayen rhe dia akpọ na. Evo ji vwo esegbuyota nẹ ughwu yen oba rẹ akpeyeren.

Esegbuyota wẹn kpahen ota nana sa fẹnẹ fikirẹ ẹkuruemu rẹ asan wo nurhe. Ọ vwọ dianẹ esegbuyota sansan yen ihwo vwo kpahen ughwu na, kẹ tivọ yen a da sa mrẹ ẹkpahọnphiyọ ro fiotọ ra sa vwẹroso?

O krire rẹ ilori rẹ ẹga vwo yono nẹ erhi ghwẹ-ẹ. Buebun rẹ ẹga ra riẹn odẹ nonẹna kerẹ ẹga rẹ Inenikristi, Hindu, Ju, Alufa, vẹ efa yono nẹ erhi ghwẹ-ẹ, ayen tare nẹ siẹrẹ ohwo de ghwu nu, erhi na ko nẹ oma rọyen kpo orho rẹ erivwin ra dia. Ẹkẹvuọvo uyono rẹ ẹga rẹ Buddha fẹnẹre, ayen yono nẹ ohwo de ghwu nu, ka rhoma vwiẹ ohwo na abọ buebun tavwen ohwo na ki te asan rẹ ufuoma vẹ omavwerhovwẹn re se Nirvana.

Fikirẹ iyono tiọyena, ihwo buebun ki rhi vwo esegbuyota nẹ ohwo de ghwu nu, ko kpo akpọ ọfa de re yerin. Ọtiọyena ihwo ki rhi vwo esegbuyota nẹ ughwu ọyen ẹbẹre ọvo rẹ akpeyeren, nẹ ọyen ọhọre rẹ Ọghẹnẹ vwọ kẹ ihworakpọ. Ẹkẹvuọvo die yen Baibol na ta kpahen ota nana? Biko se uyovwinrota rọ vwọ kpahen ọnana. Oborẹ Baibol na tare se gbewunu.