Ohwo re Vwo Ẹguọnọ Kpahen de Ghwu

Bebe vẹ ọsẹ rọyen kpẹkpẹre mamọ. Ugbeyan rọ nabọ vwo ọdavwẹ rẹ orua rọyen, yen ta eta nana, ẹkẹvuọvo eta nana rhoma hra ẹwẹn rọyen ukperẹ e vwọ dia uchebro vwọ kẹ. Kọke kọke yen ọ vwọ vuẹ oma rọyen nẹ, “O rhe ghwu kakaka-a.” Ikpe evo vwọ wan nu, ọke rẹ Bebe vwo si ikuegbe rẹ ughwu na, ka rhe mrẹvughe nẹ ọ jehẹ ẹdia rẹ uvweri na.

Kirobo rẹ Bebe rhe mrẹvughe, ọ sa reyọ ọke ogrongron e ki se yerin ghene uvweri, ma rho ọ da dianẹ ohwo ro ghwuru na nabọ kẹrẹ avwanre mamọ. Vwevunrẹ Baibol na, e djisẹ rẹ ughwu kerẹ “ọvweghrẹ ra ka uko.” (1 Kọrẹnt 15:26) Vwẹ ọke ra rhẹro rọye-en, ohwo rẹ avwanre vwo ẹguọnọ kpahen sa va avwanre abọ, o vwo emuvuọvo rọ sa dobọ rẹ ughwu jẹ-ẹ, ohwo se ghwẹ kpregede. O vwo ohwo vuọvo rọ sa vrabọ rẹ ọmiaovwẹ rọ sua-a. Ọtiọyena, ọ bẹn re vwo yerin ghene ughwu vẹ uvweri ro no cha.

Ọkiọvo wọ sa nọ oma wẹn: ‘Mavọ yen uvweri na kri te? Mavọ yen ohwo se vwo yerin ghene uvweri? Mavọ me sa vwọ vwẹ uchebro kẹ ihwo rehẹ ẹdia rẹ uvweri? Iphiẹrophiyọ herọ vwọ kẹ ihwo ri ghwuru?’