UYOVWINROTA RẸ ỌBE NA | DIESORỌ A VWỌ DIA OHWO RẸ UYOTA?
A Ghene Sa Dia Ohwo rẹ Uyota Nonẹna?
Hitoshi ruiruo vwẹ ọfisi rọ vwẹrote ekpu igho rẹ ikọpini ọvo vwẹ Japan. Ọke ro vwo si iyẹnrẹn rẹ obo ra ghwọrọ igho wan vwọ kẹ ọga rọyen, ọga na da vuẹ nẹ ofori nẹ o gun efian phiyọ. Hitoshi da vuẹ nẹ ẹwẹn obrorhiẹn rọyen rhọnvwephiyọ uruemu tiọyena-a. Ọga na da vuẹ Hitoshi nẹ ọ cha djẹ nẹ iruo, ukuotọ rọyen, ọ da ghene djẹ.
Emeranvwe evo vwọ wan nu, ofu de rhi dje Hitoshi kidie o roro sẹ ọ ghene sa mrẹ iruo ọfa. Kerẹ udje, rọ vwọ guọnọ iruo ọvo, Hitoshi da vuẹ ọga rẹ iruo na nẹ ọyen che se vwobọ vwẹ iruo rẹ iwayo-o. Ọga na da vuẹ nẹ, “Uruemu wẹn fẹnẹ ọ rẹ ihwo efa!” Ihwo rẹ orua vẹ igbeyan rẹ Hitoshi da vuẹ nẹ ọ gbomavwra orhiẹn ro bruru rọ vwọ dia ohwo rẹ uyota na, dedena, Hitoshi ji vwo ẹwẹn ivivẹ. Kerẹ udje, ọ da ta, “Ki mi roro sẹ orhiẹn mi bruru na ghene gba.”
Ikuegbe rẹ Hitoshi na nẹrhẹ a riẹn nẹ ọ dia ihwo ejobi yen titi uruemu ra vwọ dia ohwo rẹ uyota-a. Ihwo evo tobọ roro nẹ ra vwọ dia ohwo rẹ uyota sa so ebẹnbẹn kẹ eki yẹrẹ iruo rẹ ohwo. Aye ọvo vwẹ South Africa da ta: “Ihwo re ta uyota-a yen mẹ vẹ ayen gbe ruiruo, okeke me vwọ vwẹrokere ayen dia gangan ọkiọvo.”
Idjerhe ọvo ro me titi nonẹna re vwo jẹ ohwo rẹ uyota ẹdia yen efian eguon. Vwẹ ikpe evo re wanre na, ehiahiẹ ọvo rẹ Robert S. Feldman rọ dia ohwo ro yono kpahen uruemu rẹ ihworakpọ vwẹ University of Massachusetts Amherst, djere nẹ asan rẹ ihwo 100 hepha, ihwo 60 yen gun efian ọ da hanvwe mamọ obọvo vwẹ ibrẹro ihwe. Feldman tare nẹ, “Iyẹnrẹn nana gbe ohwo unu mamọ, kidie e rhẹro rọyen nẹ efian eguon cha dia uruemu ri kẹdẹ kẹdẹ rẹ ihworakpọ-ọ.” Ihwo buebun guọnọre nẹ e gun efian kẹ aye-en, jẹ efian eguon vọn asan eje, ọnana rhe gbe ohwo unu?
Diesorọ efian eguon, uji echo, vẹ iruemu rẹ jẹ ohwo rẹ uyota ẹdia efa vwọ vọn asan eje nonẹna? Idjerhe vọ yen jẹ ohwo rẹ uyota ẹdia vwo djobọte ihwo ejobi nonẹna? Ma rho, mavọ yen avwanre sa vwọ kẹnoma kẹ uruemu nana?