Efian rẹ Ihwo Gunru rọ Nẹrhẹ E Roro nẹ Ọghẹnẹ Vwo Oderhi-i

OBORẸ IHWO BUEBUN SEGBUYOTA

“Avwanre je rhọnvwephiyọ sẹ Ọghẹnẹ vwo oderhi-i, siẹvo kẹ a vwọ ta oborẹ odẹ na cha dia-a.”—Professor David Cunningham, Theological Studies.

UYOTA RO NẸ OBỌ RẸ ỌGHẸNẸ RHE

Ọghẹnẹ da ta: “Mẹvwẹ Ọrovwohwo [“Jihova,” NW ], ọye odẹ mẹ.” (Aizaya 42:8) Jihova ọyen odẹ rẹ Hibru ro mudiaphiyọ “Ọ ro se Ru Kemu Kemu ro Rhere Ẹwẹn.”—Jẹnẹsis 2:4.

Jihova guọnọ nẹ a vwẹ odẹ rọyen vwo ruiruo. Baibol na da ta: “Se odẹ rọye; ghwoghwo uruemu rọye kẹ irere na ejobi, ghwoghwo nẹ e mu odẹ rọye kpenu.”—Aizaya 12:4.

Jesu vwẹ odẹ rẹ Ọghẹnẹ vwo ruiruo. Vwẹ ẹrhovwo, Jesu da vuẹ Jihova: “Mi dje odẹ wẹn kẹ ayen riẹn [idibo ri Jesu], ki mi ruo re ayen riẹn.” Diesorọ Jesu vwọ vuẹ idibo rọyen oderhi rẹ Ọghẹnẹ? Ọ da je ta: “Rere ẹguọnọ ru wọ [Ọghẹnẹ] kẹ vwẹ na vwọ sa dia evun rẹ ayen, re me dia evun rẹ ayen.”—Jọn 17:26.

DIESORỌ Ọ VWỌ GHANRE

Olori ẹga re se Walter Lowrie da ta: “Ohwo rha riẹn oderhi rẹ Ọghẹnẹ-ẹ, jẹ ọ je nabọ vughe Ọghẹnẹ-ẹ, o ji che se vwo ẹguọnọ rọye-en, ọ da tobọ dianẹ ọ riẹnrẹ kerẹ ohwo vẹ ẹgba.

Dede nẹ ọshare ọvo re se Victor kpo ishọshi kudughwrẹn kudughwrẹn, jẹ o rorori nẹ ọyen ghene riẹn Ọghẹnẹ-ẹ. Ọ da ta: “Mi de rhi yono nẹ Jihova yen odẹ rẹ Ọghẹnẹ, kọ ghwa họhọ nẹ o dje oma rọyen kẹ vwẹ. Asaọkiephana, kọ họhọ nẹ me mrẹ Ohwo ri mi nyo eta buebun kpahen re. Ọ rhe dia obọdẹn rẹ Ohwo ri mi se vwo mu ugbeyan re.”

Jihova ji siẹkẹrẹ ihwo re reyọ odẹ rọyen vwo ruiruo. Vwọ kpahen ihwo “ri roro iroro rẹ odẹ rọye na,” Ọghẹne de ve: “Ke me cha vwẹ obọ pẹpẹ kirobo rẹ ohwo da vwẹ obọ pẹpẹ ọmọ rọ ga.” (Malakae 3:16, 17) Ọghẹnẹ je hwosa kẹ ihwo ri se odẹ rọyen. Baibol na da ta: “Kohwo kohwo ro se odẹ rẹ Ọrovwohwo kọ rhọ.”—Rom 10:13.