“Mi Dje Odẹ Wẹn Kẹ Ayen”

“Me vwẹ odẹ wẹn phia kẹ ihwo re wọ kẹ vwẹ vwẹ evun rẹ akpọ na. . . . Mi dje odẹ wẹn kẹ ayen riẹn, ki mi ruo re ayen riẹn.”—JỌN 17:6, 26.

Obo ro Mudiaphiyọ: Jesu dje odẹ rẹ Ọghẹnẹ kẹ ihwo rọ vwọ reyọ vwo ruiruo vwevunrẹ iruo aghwoghwo rọyen. Ọtiọyena, ọke rẹ Jesu de se vwo nẹ Ọbe Ọfuanfon na, ọkieje yen ọ vwọ vwẹ oderhi rẹ Ọghẹnẹ vwo ruiruo. (Luk 4:16-21) O yono idibo rọyen nẹ ayen nẹrhovwo nẹ, “Ọsẹ, jẹ avwanre vwẹ ọghọ kẹ odẹ wẹn.”—Luk 11:2.

Oborẹ Inenikristi rẹ Ẹgbukpe Ujorin Rẹsosuọ Vwo Djephia: Ọyinkọn Pita vuẹ ekpako rehẹ Jerusalẹm nẹ Ọghẹnẹ reyọ ihwo vwo nẹ ẹgborho na rhe “fiki rẹ odẹ rọye.” (Iruo Rẹ Iyinkọn Na 15:14) Iyinkọn na vẹ idibo efa ghwoghwori nẹ “kohwo kohwo ro se odẹ ri Jihova ko vwo usivwin.” (Iruo Rẹ Iyinkọn Na 2:21; Rom 10:13, NW ) Ayen je reyọ oderhi rẹ Ọghẹnẹ vwo ruiruo vwẹ isiesi rayen. Ọbe re se The Tosefta, rọ dia isiesi rẹ irhi rẹ Ihwo ri Ju re si re vwẹ omarẹ 300 C.E., ta ota kpahen ihwo re vwọsua re torhẹ ẹbe rẹ Inenikristi siri kerẹ ọbe ri Matiu, Mak, Luk kugbe Jọn, dede nẹ oderhi rẹ Ọghẹnẹ hẹ evun rayen.

Amono Yen Ruo Nonẹna? Baibol ri Revised Standard Version da ta vwẹ ọtonphiyọ rọyen: “Ihwo ri Ju dobọ rẹ oderhi rẹ Ọghẹnẹ re vwo ruiruo ji tavwen e ki vwiẹ Jesu, kidie nẹ ayen niro nẹ ọyen obo re chọre Ishọshi rẹ Inenikristi vwọ vwẹ oderhi rẹ Ọghẹnẹ vwo se.” Ọtiọyena, ayen de wene oderhi rẹ Ọghẹnẹ vwo kpo “ỌROVWOHWO” vwẹ efanfan ri Baibol yena. Ihwo ri Vatican da je vuẹ bishọp rayen nẹ “Ayen se oderhi rẹ Ọghẹnẹ-ẹ rọ dia ibieta ri Hibru ẹne, YHWHa yẹrẹ reyọ vwo ruiruo vwẹ ẹrhovwo vẹ ine raye-en.”

Amono yen ghwoghwo je reyọ oderhi rẹ Ọghẹnẹ vwo ruiruo nonẹna? Ọke rẹ Sergey je vwọ hẹ eghene vwẹ ẹkuotọ ri Kyrgyzstan, o ni ifimu ro dje odẹ rẹ Ọghẹnẹ phiyọ Jihova. Omarẹ ẹgbukpe ihwe vwọ wan nu, o rhe nyo odẹ rẹ Ọghẹnẹ na ọfa-a. Ọke vwọ yanran na, Sergey da kua kpo United States, Iseri ri Jihova ivẹ de bro rhe vwẹ uwevwin rọyen, ayen de dje odẹ rẹ Ọghẹnẹ vwẹ Baibol na vwọ kẹ. Oma da vwerhen Sergey mamọ nẹ ọ mrẹ ẹko rẹ ihwo re reyọ odẹ na, Jihova vwo ruiruo. Webster’s Third New International Dictionary tare nẹ “Jihova Ọghẹnẹ, ọyen Ọghẹnẹ ro me kpenu kparobọ, ọyen jehẹ Ọghẹnẹ vuọvo rẹ Iseri ri Jihova ga.”

[Eta rehẹ obotọ na]