Pọl vẹ Timoti

Timoti ọyen eghene rọhẹ ukoko rẹ Listra. Ọsẹ rọyen ohwo rẹ Grik, oni rọyen ohwo rẹ Ju. Oni rọyen Yunaisi vẹ oni rọyen rode Lọis yono Timoti kpahen Jihova nẹ ọkiemọ rhe.

Ọke rẹ Pọl vwo kpo Listra vwẹ oyan aghwoghwo rọyen rivẹ, ọ da mrẹvughe nẹ Timoti ghini vwo ẹguọnọ rẹ iniọvo na, ọ je guọnọ chọn ayen uko. Pọl de durhie Timoti nẹ o kuomakugbe ọyen vwẹ oyan rẹ aghwoghwo na. Ọke vwọ yanran na, Pọl de yono Timoti, ọ da rhe dia omamọ rẹ oghwoghwota rẹ iyẹnrẹn esiri na.

Ẹwẹn ọfuanfon yen sun Pọl vẹ Timoti kpo asan rẹ ayen rare ejobi. Vwẹ ason ọvo, Pọl da mrẹ ọshare ọvo vwẹ emramrẹ rọ vuẹ nẹ ọ rhe Masidonia rhe chọn ayen uko. Pọl, Timoti, Sailas vẹ Luk de kpo oboyin re ghwoghwo je vwẹ ikoko vwo mu.

Ihwo buebun de kurhẹriẹ vwẹ Tẹsalonaika rọ dia orere rẹ Masidonia. Ẹkẹvuọvo, ihwo rẹ Ju evo ke rioma kpahen Pọl vẹ irivẹ rọyen. Ihwo rẹ Ju na de kpono ayen bru isun rẹ orere na, ayen da ta: ‘Eshare nana eyen ihwo re vwọsua usuon rẹ Rom!’ Arhọ rẹ Pọl vẹ ọ rẹ Timoti hẹ ẹdia rẹ imuoshọ, ayen da djẹ kpo Biria vwẹ ason yena.

Ihwo rẹ Biria vwo owenvwe rẹ ayen vwo nyo iyẹnrẹn esiri na, ọtiọyena ihwo rẹ Ju vẹ Grik rehẹ orere na de kurhẹriẹ. Ẹkẹvuọvo, ihwo rẹ Ju evo de nẹ Tẹsalonaika rhe rhe so okpetu kẹ Pọl, ọnana da nẹrhẹ ọ kpo Atẹns. Timoti vẹ Sailas da daji Biria, rere ayen sa vwọ bọn iniọvo na gan. Ọke vwọ yanran na, Pọl de ji Timoti rhivwin kpo Tẹsalonaika ra vwẹ ukẹcha kẹ iniọvo na vwo yerin ghene omukpahen ọgangan rẹ ayen hirharoku. Ukuko na, Pọl de ji Timoti kpo ikoko sansan, ra bọn ayen gan.

Pọl vuẹ Timoti nẹ ‘idibo rẹ Jihova che hirharoku omukpahen.’ E mu kpahen Timoti, ji muo phiyọ uwodi fikirẹ esegbuyota rọyen. Dedena, oma vwerhenrọ kidie ọnana kẹrẹ uphẹn rọ vwọ fuevun kẹ Jihova.

Pọl da vuẹ iniọvo rẹ Filipae na: ‘Mi che ji Timoti bru ovwan rhe. O che yono ovwan oborẹ ovwan sa vwọ yan vwevunrẹ uyota na kugbe ena rẹ iruo aghwoghwo na.’ Pọl riẹnre nẹ ọ sa vwẹroso Timoti. Ayen ihwo ivẹ na wian kugbe kerẹ igbeyan vwẹ ikpe buebun.