Pita Sen Jesu

Jesu vẹ iyinkọn na vwọ hẹ evunrẹ ubruwevwin yena vwẹ Jerusalẹm, ọ da vuẹ ayen: ‘Ovwan eje cha djẹ juvwe vwo ason nana.’ Pita da ta: ‘Ọ dia omẹvwẹ-ẹ! Ihwo ichekọ eje da tobọ djẹ juwe vwo, me cha yan juwe vwo kakaka-a.’ Ẹkẹvuọvo, Jesu da vuẹ Pita: ‘Bẹsiẹ ọhọ ki bo, wọ cha sen vwẹ abọ erha.’

Ọke rẹ ihwo na vwo mu Jesu kpo uwevwin rẹ Kaifas, iyinkọn na buebun da djẹ. Ẹkẹvuọvo, ivẹ usun rayen nene ihwo na. Ọvo yen Pita. Ọ da ro egodo rẹ Kaifas re chidia okọkọ rẹ erhanre rere oma rọyen vwọ sasa. Fikirẹ erhanre na, ọmọtẹ ọvo da mrẹ opharo rọyen, ọ da ta: ‘Mi vughe uwe! Wo nene Jesu!’

Pita da ta: ‘Ẹjo, ọ dia omẹvwẹ-ẹ! Me tobọ riẹn obo wọ ta na-a!’ Ọ da yan kpo anurhoro rẹ egodo na. Ọmọtẹ ọfa da rhoma mrẹ, ọ da vuẹ ihwo na: ‘Ọshare nana nene Jesu!’ Pita da ta: ‘Me tobọ vughe Jesu-u!’ Ọshare ọvo da je ta: ‘Wẹwẹ ọvo usun rayen! Wọ ta ota kerẹ ohwo rẹ Galili, kerẹ Jesu.’ Ẹkẹvuọvo, Pita de duvwun iyori: ‘Mi vughire kakaka-a!’

Ugege yena, ọhọ de bo. Pita da mrẹ Jesu ro kuomarhẹriẹ, o de no. Ọ da karophiyọ eta rẹ Jesu, o de kpo otafe ra viẹ gangan.

Enana vwọ phia na, jẹ aguare na kokori vwẹ uwevwin rẹ Kaifas rẹ ayen vwọ nọ Jesu enọ. Ayen muegbe ayen vwo hwe Jesu, asaọkiephana ayen guọnọ oborẹ ayen vwọ yọnrọn. Ẹkẹvuọvo, ayen mrẹ emu vuọvo-o. Ukuotọ rọyen, Kaifas da nọ Jesu: ‘Wẹwẹ Ọmọ rẹ Ọghẹnẹ?’ Jesu da kpahen: ‘E.’ Kaifas da ta: ‘Avwanre rha guọnọ ẹdjọeguo ọfa-a. O yinvwaro kpahen Ọghẹnẹ!’ Aguare na da rhọnvwe nẹ,‘Ọshare nana fo ughwu.’ Ayen da ghwiẹ Jesu, dje enya kuo, ayen de rhurhu ẹro rọyen kẹ ayen teyọn, ayen me ta: ‘Wọ da dia ọmraro, vuẹ avwanre ohwo rọ teyen owẹ!’

Ọke vwo rhie, ayen de mu Jesu kpo aguare na, ayen da rhoma nọ: ‘Wẹwẹ Ọmọ rẹ Ọghẹnẹ?’ Jesu da kpahen: ‘Ovwan yen tarọ.’ Ayen da rhoma brorhiẹn hwe, ayen de muo kpo ọguan rẹ Pọntiọs Pailet, rọ dia osun rẹ Rom. Die kọyen rhe phia? E jẹ e yono kpahọn.