Idẹbono Davwen Jesu Ni

Jesu vwo bromaphiyame nu, ẹwẹn ọfuanfon na de muo ro aton. Ọ riemu ẹdẹ ujuvẹ-ẹ, owẹnvwe de rhi hwe mamọ. Idẹbono da rhe davwen Jesu ni, ọ da ta kẹ: ‘Wọ da ghene dia Ọmọ rẹ Ọghẹnẹ, hirhe ikuta nana phiyọ emu wọ re.’ Jesu da vwẹ eta rehẹ Baibol na vwọ kpahen kẹ nẹ, ‘E siro phiyotọ nẹ ọ dia emu ọvo yen a guọnọre e ki se yeri-in, jokpanẹ a kerhọ rẹ kota kota rẹ Jihova tare.’

Ọrivẹ, Idẹbono da vuẹ Jesu: ‘Wọ da ghene dia Ọmọ rẹ Ọghẹnẹ, gbe pho nẹ enu rẹ uwevwin ẹga na rhe. E siro phiyotọ nẹ Ọghẹnẹ che ji emekashe rọyen nẹ ayen ya we.’ Ẹkẹvuọvo, Jesu da rhoma vwẹ eta rẹ Baibol na vwọ kpahen kẹ nẹ, ‘E siro phiyotọ nẹ wọ davwẹn Jihova nẹ-ẹ.’

Ọrerha, Eshu de dje ivie rẹ akpọ na, efe, kugbe urinrin rayen ejobi vwọ kẹ Jesu, ọ da ta: ‘Me cha vwẹ ivie nana eje vẹ urinrin rayen vwọ kẹ wẹ siẹrẹ wọ da ga vwẹ obọ vuọvo nana.’ Ẹkẹvuọvo, Jesu da vuẹ: ‘Wan nẹ obaro mẹ, Eshu! E siro phiyotọ nẹ Jihova Ọghẹnẹ ọvo yen wọ ga.’

Idẹbono da yan jovwo, emekashe de mu emu rhe Jesu nẹ ọ re. Vwo nẹ ọke yena yanran, Jesu ko ghwoghwo iyẹnrẹn esiri rẹ Uvie na. Fikirẹ owian nana yen e vwo jo rhe akpọ na. Ihwo vwo ẹguọnọ rẹ oborẹ Jesu yono ayen na, ayen ki nene kpo kasan kasan rọ rare ejobi.