Daniẹl hẹ Evunrẹ Unu rẹ Ikpohrokpo

Ovie ọfa ro sun Babilọn yen Dariọs ohwo rẹ Mid. Dariọs mrẹ Daniẹl kerẹ ohwo rẹ oghẹresan. Ọ de vwo mu ẹdia rẹ ohwo rọ vwẹrote ihwo ride rẹ orere na. Eshare na ke rioma kpahen Daniẹl, kẹ ayen guọnọ hwe. Ayen riẹnre nẹ Daniẹl nẹrhovwo kẹ Jihova abọ erha edọke, ọtiọyena ayen da vuẹ Dariọs: ‘E ovie, ji urhi nẹ wẹwẹ ọvo yen ihwo ejobi nẹrhovwo rhe. Kohwo kohwo rọ churhi nana ke do phiyọ unu rẹ ikpohrokpo.’ Iroro na je Dariọs, ọ da ghwobọphiyọ ọbe na.

Daniẹl ghwe vwo nyo urhi na, ọ da ro uwevwin rọyen. O vwo rhie ovakpo rọyen, o de shiguẹ vwẹ obaro rọyen ọ da nẹrhovwo rhe Jihova. Eshare nana re rioma kpahọn na da ghwa ro uwevwin na, ayen da mrẹ nẹ ọ nẹrhovwo. Ayen da djẹ bru Dariọs ra, ayen da ta: ‘Daniẹl churhi wẹn. Ọ nẹrhovwo kẹ Ọghẹnẹ rọyen abọ erha kẹdẹ kẹdẹ.’ Dariọs vwo ẹguọnọ rẹ Daniẹl, ọ je guọnọ nẹ o ghwu-u. Ọ davwẹngba ro vwo sivwin Daniẹl vwẹ ọsoso ẹde yena. Ẹkẹvuọvo ovie na cha sa tobọ wene urhi rọ ghwobọphiyọ nure na-a. Ọ da vuẹ eshare rọyen nẹ ayen do Daniẹl phiyọ unu rẹ ikpohrokpo na.

Vwẹ ason yena, Dariọs sa vwerhẹn kakaka-a kidie o roro kpahen Daniẹl. Ọke vwo rhie, ọ da djẹ kpo unu na o de kperi se Daniẹl: ‘Ọghẹnẹ wẹn se sivwin uwe?’

Dariọs de nyo upho ọvo. Ọ rẹ Daniẹl! Ọ da kpahen kẹ Dariọs: ‘Amakashe rẹ Jihova rhurhu unu rẹ ikpohrokpo na. Ayen djobọte vwe-e.’ Oma vwerhen Dariọs mamọ! Ọ da tanẹ e mu Daniẹl phia. A tobọ mrẹ oka vuọvo vwẹ oma rọye-en. Ovie na da ta: ‘Ovwan do eshare re vwọso Daniẹl na phiyọ unu rẹ ikpohrokpo na.’ E vwo do ayen phiyọ, ikpohrokpo na da re ayen ejobi.

Dariọs de ji urhi nana kẹ ihwo rọyen: ‘E jẹ kohwo kohwo djoshọ rẹ Ọghẹnẹ rẹ Daniẹl. O sivwin Daniẹl nẹ unu rẹ ikpohrokpo.’

Wọ nẹrhovwo rhe Jihova kẹdẹ kẹdẹ kerẹ Daniẹl?