A Ghwọrọ Jerusalẹm

Ọke buebun yen ihwo rẹ Juda vwo chukokuẹ Jihova ayen me ga eghẹnẹ rẹ efian. Jihova davwẹngba rọ vwọ chọn ayen uko vwẹ ikpe buebun. O ji emraro bru ayen ra, ẹkẹvuọvo ayen kerhọ-ọ. Ukperẹ ọtiọyen, kẹ ayen vwẹ emraro na vwọ jehwẹ. Mavọ yen Jihova vwo phi oba phiyọ edjọẹgọ rayen na?

Ovie rẹ Babilọn, Nẹbukadreza phi irere buebun kparobọ re. Ọke rẹsosuọ ro vwo phi Jerusalẹm kparobọ, o de mu Ovie Jehoyakin, isun na, egbofovwin, kugbe ewena na eje kpo Babilọn. O ji ghwa efe na ejobi rehẹ uwevwin rẹ Jihova nene oma. Nẹbukadreza da vwẹ Zẹdikaya mu ovie rẹ Juda.

Ọke ẹsosuọ, Zẹdikaya nyupho rẹ Nẹbukadreza. Ẹkẹvuọvo, irere re riarierẹ phiyọ vẹ emraro rẹ efian na da vuẹ Zẹdikaya nẹ o gbevwọso Babilọn. Jerimaya da vwẹ orhọ-esio nana vwọ kẹ: ‘Wo de gbevwọsuọ, orere rẹ Juda che rhiẹromrẹ ohwekufia, owẹnvwe, vẹ ọga.’

Zẹdikaya vwo sun ẹgbukpe ẹrenren nu, o de gbevwọso Babilọn. Ọ da nokpẹn rẹ ukẹcha vwo mie Ijipt. Nẹbukadreza de ji isodje rọyen kpo Jerusalẹm, ayen da gbogba riariẹ orere na. Jerimaya da vuẹ Zẹdikaya: ‘Jihova tare nẹ wọ da vwọmakpahotọ kẹ Babilọn, usivwin kọ dia kẹ wẹ vẹ orere na. Ẹkẹvuọvo, wo rhe ru ọtiọye-en, ihwo rẹ Babilọn cha torhẹ Jerusalẹm totọ, ayen ji che mu we kpo eviẹn.’ Zẹdikaya da ta: ‘Me cha vwomakpahotọ-ọ!’

Ẹgbukpe ọvo gbẹ ubro vwọ wan nu, isodje rẹ Babilọn da ghwọrọ igbẹhẹ rẹ Jerusalẹm, ayen da torhẹ orere. Ayen torhẹ uwevwin ẹga na, hwe ihwo buebun, ji mu ihwo buebun kpo eviẹn.

Zẹdikaya da djẹ nẹ Jerusalẹm, ẹkẹvuọvo isodje rẹ Babilọn na da vwọtua. Ayen da yọnrọn vwẹ asan rọ kẹrẹ Jẹriko, ayen de muo rhe Nẹbukadreza. Ovie rẹ Babilọn de hwe emeshare rẹ Zẹdikaya vwẹ irharo rọyen. Nẹbukadreza de rhuẹro rẹ Zẹdikaya, o de muo phiyọ uwodi, etiyin kọyen o ghwu phiyọ. Ẹkẹvuọvo, Jihova de ve kẹ ihwo rẹ Juda: ‘Ẹgbukpe 70 da wan nu, me cha reyọ ovwan rhivwin rhe Jerusalẹm.’

Die yen cha phia kẹ ighene re mu kpo eviẹn vwẹ Babilọn? Ayen cha fuevun kẹ Jihova ọkieje?