Jihova Chochọ rẹ Jehoshafat

Jehoshafat, ọyen ovie rẹ Juda, ọ guọghọ egbada rẹ Baal kugbe edjọ rẹ otọ na eje. Ọ guọnọrẹ nẹ ihwo na riẹn irhi rẹ Jihova. Ọtiọyena, o de ji isun na kugbe ihwo rẹ Livae nẹ ayen vwẹ irhi rẹ Jihova vwo yono ihwo rẹ Juda eje.

Oshọ muẹ irere re riariẹ Juda phiyọ kidie ayen riẹnre nẹ Jihova vẹ ihwo rọyen herọ. Ayen tobọ vwẹ okẹ sansan vwọ kẹ Ovie Jehoshafat. Ẹkẹvuọvo ihwo rẹ Moab, Ammọn, vẹ ihwo ri nẹ ubrakpọ rẹ Seir rhe, de koko nẹ ayen che nene Juda phi ofovwin. Jehoshafat riẹnre nẹ ọyen guọnọ ukẹcha rẹ Jihova. O de se eshare, eya, vẹ emọ rẹ orere na eje koko vwẹ Jerusalẹm. Vwẹ irharo rẹ ihwo na eje, ọ da nẹrhovwo: ‘Jihova, wẹwẹ ọvo yen sa kẹ avwanre ophikparobọ. Biko vuẹ avwanre oborẹ avwanre che ru.’

Jihova kpahenphiyọ ẹrhovwo na, ọ da ta: ‘Wo jẹ oshọ mu ovwa-an. Me cha chọn ovwan uko. Ovwan mudia, we hwe oma mu, rere ovwan mrẹ usivwin re me cha vwọ kẹ ovwan.’ Idjerhe vọ yen Jihova vwo sivwin ayen?

Ọke vwo rhie, Jehoshafat da sane ibuine, ọ da vuẹ ayen nẹ ayen kobaro kẹ isodje na. Ayen da yan nẹ Jerusalẹm kpo asan re de che phi ofovwin na vwẹ Tekoa.

Ibuine na vwọ suine jiri Jihova vẹ upho ọgangan, Jihova de phi ofovwin na vwọ kẹ ayen. O phi otighi phiyọ uvwre rẹ ihwo rẹ Ammọn vẹ Moab na, kẹ ayen họnra ohwohwo, ayen de hwe omoma rayen ejobi. Ẹkẹvuọvo, Jihova sẹro rẹ ihwo rẹ Juda, isodje rayen, kugbe irherẹn na. Irere re riariẹ ayen phiyọ nyo kpahen oborẹ Jihova ruru na, ayen da je riẹn nẹ Jihova chochọ rẹ ihwo rọyen ọkieje. Idjerhe vọ yen Jihova vwo sivwin ihwo rọyen? Vwẹ idjerhe buebun. Ọ guọnọ ukẹcha rẹ ohworakpọ vuọvo-o.