Ọdavwini Vwẹ Ugbenu rẹ Karmẹl

Erharhe ivie buebun yen sun uvwiẹ ihwe rẹ uvie rẹ Izrẹl na, ẹkẹvuọvo Ehab ọvo usun rẹ ivie re ma bra kparobọ. Ọ rọvwọn orharhe aye ọvo rọ ga Baal. Odẹ rẹ aye na yen Jẹzibẹl. Ehab vẹ Jẹzibẹl da nẹrhẹ edjọẹgọ vọn otọ na, ayen de ji hwe emraro rẹ Jihova. Die yen Jihova ruru? Ọ da vwẹ ovuẹ rhe Ehab womarẹ ọmraro Ilaija.

Ilaija da vuẹ Ovie Ehab nẹ fikirẹ umwemwu rọyen, osio rha cha rhọ vwẹ Izrẹ-ẹl. Ọ vrẹ ẹgbukpe erha rẹ osio vwo jẹ ẹrhọ, ekankọn rha djẹ-ẹ, owẹnvwe ko hwe ihwo na. Jihova da rhoma ji Ilaija bru Ehab ra. Ovie na da ta: ‘Wẹwẹ ohwo rẹ okpetu! Wẹ yen so ojaẹriọ nana eje.’ Ilaija da kpahen: ‘Ọ diẹ omẹvwẹ yen sorọ-ọ. Wẹwẹ yen sorọ kidie wọ ra ga Baal. Gbe jẹ e ru orọnvwọn ọvo. Koko ihwo rẹ orere na vẹ emraro rẹ Baal kpo enu rẹ Ugbenu rẹ Karmẹl.’

Ihwo na de koko vwẹ ugbenu na. Ilaija da ta: ‘Ovwan brorhiẹn na. Ọ da dianẹ Jihova yen Ọghẹnẹ rẹ uyota na, ovwan nene. Ọ da rha dianẹ Baal, ovwan gbe nene. Mi se ovwan abọ. E jẹ emraro rẹ Baal 450 na muegbe rẹ izobo rere ayen kperi se ọghẹnẹ rayen, mi ji che muegbe rẹ izobo mẹ rere mi kperi se Jihova. Ọghẹnẹ ro se siobọnu erhanre rhe kọyen Ọghẹnẹ rẹ uyota na.’ Ihwo na ejobi da rhọnvwe.

Emraro rẹ Baal da rhuẹrẹ izobo rayen phiyọ. Kẹ ayen kperẹ se ọghẹnẹ rayen: ‘E Baal, kpahen kẹ avwanre!’ Ilaija kọ vwẹ ayen vwọ jehwẹ kidie Baal rha kpahan kẹ aye-en. Ọ da vuẹ ayen: ‘Ovwan nabọ kperi se gangan. Ọkiọvo ọ vwerhẹn, ọtiọyena ọ guọnọre nẹ ovwan rhọnvwọn.’ Emraro rẹ Baal na de kperi te ovwọnvwọn, dedena, Baal kpahen kẹ aye-en.

Ilaija de mu izobo rọyen phiyọ enu rẹ agbada na, o de ku ame vọn izobo na kugbe agbada na. Ọ da nẹrhovwo: ‘E Jihova, biko jẹ ihwo nana riẹn nẹ wẹwẹ yen Ọghẹnẹ rẹ uyota na.’ Ugege yena, Jihova de siobọnu erhanre nẹ odjuvwu rhe, ọ da torhẹ izobo na fiotọ. Ihwo na de kperi phia: ‘Jihova yen Ọghẹnẹ rẹ uyota na!’ Ilaija da ta: ‘Ovwan jẹ emraro rẹ Baal na djẹ vabọ-ọ!’ Vwẹ ẹdẹ yena, e de hwe emraro 450 rẹ Baal na ejobi.

Enu na vwo sikoko emerha, Ilaija da vuẹ Ehab: ‘Ogiribo cha. Ro akpẹrẹ wẹn, wọ djẹ kpo.’ Enu na de rhi biphiyọ, odju ko djuẹ, okposio rode da rhe ton ẹrhọ phiyọ. Ọkanrovwẹ rẹ ame na te oba re. Ehab da djẹ akpẹrẹ rọyen na gangan. Ẹkẹvuọvo, womarẹ ukẹcha rẹ Jihova Ilaija da tobọ djẹ kpata vrẹn akpẹrẹ na! Dedena, ebẹnbẹn rẹ Ilaija na vwoba vwẹ etiyin? E jẹ a mrẹ ẹkpahọnphiyọ rẹ onọ nana.