Rehab Si Eshare na Nu

Ọke rẹ eshare re ji yanran ra bẹbẹ ni Jẹriko vwo te oboyin, ayen da ro uwevwin rẹ aye ọvo re se Rehab. Ovie rẹ Jẹriko vwo nyo, ọ de ji isodje kpo uwevwin rẹ Rehab. Rehab de si eshare ivẹ na nu vwẹ obenu rẹ uwevwin rọyen, kọ riobọ phiyọ idjerhe ọfa kẹ isodje na nẹ eshare na wan oboyin yanran re. Ọ da vuẹ eshare na nẹ, ‘Me cha chọn ovwan uko kidie me riẹnre nẹ Jihova hẹ ẹbẹre rẹ ovwan, ovwan che phi otọ na kparobọ. Biko, we ve kẹ vwẹ nẹ ovwan che sivwin orua mẹ.’

Eshare na da ta: ‘Avwanre ve kẹ wẹ nẹ emu vuọvo cha phia kẹ ihwo rehẹ evunrẹ uwevwin wẹ-ẹn.’ Ayen da je ta: ‘Gba ufi ọvwavware si ovakpo wẹn, rere ihwo orua wẹn se vwo vwo usivwin.’

Rehab de churu ufi si ovakpọ rọyen rere eshare na reyọ vwo yerin kpotọ. Ayen de kpo obo ugbenu na re siomanu ẹdẹ erha ayen ki rhivwin bru Joshua ra. Ihwo rẹ Izrẹl da wan Urhie rẹ Jọdan vrẹ, ayen da chọma rẹ ayen vwọ reyọ otọ na. Jẹriko yen orere rẹsosuọ rẹ ayen phi kparobọ. Jihova vuẹ ayen nẹ ayen yan riariẹ orere na ẹdẹ esan, obọ ọvo ẹdọke. Vwẹ ẹdẹ righwrẹn ayen da yan riariẹ orere na abọ ighwrẹn. Irherẹn na de hworo ewanre rayen, isodje na de kperi gangan. Igbẹhẹ rẹ orere na da guọghọ totọ! Ẹkẹvuọvo, emu vuọvo ru uwevwin rẹ Rehab rọhẹ orhoma rẹ igbẹhẹ na-a. Rehab vẹ orua rọyen sivwinrhọ kidie ọ vwẹroso Jihova.