Itabanako ra da Ga Ọghẹnẹ

Ọke rẹ Mosis vwọ hẹ enu rẹ Ugbenu rẹ Sinai, Jihova da vuẹ nẹ ọ bọn utughẹ oghẹresan ọvo re se itabanako; asan rẹ ihwo rẹ Izrẹl da sa ga. A bọn itabanako na vwẹ idjerhe rẹ ayen de se muo kpo kasan kasan rẹ ayen ra.

Jihova da ta: ‘Vuẹ ihwo na nẹ ayen toro oborẹ ẹgba rayen muru ra vwọ bọn itabanako na.’ Ihwo rẹ Izrẹl de toro iro, idọnọ efuanfon, ẹrovwo, ibieragha eghanghanre kugbe evwarha. Ayen ji toro ẹton rẹ eranvwe, emwa, ophiẹn rẹ eranvwe vẹ erọnvwọn efa buebun. Ihwo na vwo ẹwẹn rẹ okẹ te ẹdia rẹ Mosis da vuẹ ayen nẹ, ‘I teri! Ovwan rhe muẹ cha-a.’

Buebun rẹ eya vẹ eshare re tẹn ona sansan vwomakpahotọ kẹ iruo na. Jihova kẹ ayen aghwanre rẹ ayen se vwo ruiruo na. Evo rhuon oruru, ko emwa, yẹrẹ ru ona phiyọ ayen. Efa vwẹ eragha vwọ rhuẹrẹ asan, vwẹ oro vwo ru erọnvwọn yẹrẹ kare irhe.

Ayen bọn itabanako na nene odjekẹ rẹ Jihova vwọ kẹ ayen. Ayen ru amwa oyoyovwin ọvo, a da vwọ ghare itabanako na kpo ẹkẹn ivẹ; asan rọ Fonro kugbe asan rọ Ma Fon. Asan rọ Ma Fon na yen okọ rẹ ọphọ na hepha, a vwẹ omamọ urhe vẹ oro vwọ kanrọ. E mu igburhukpẹ rẹ oro, imẹjẹ kugbe agbada ra da torhẹ insẹnsi phiyọ asan rọ Fonro na. Oze rẹ ẹrovwo kugbe agbada ọrhuarho re de ze izobo hẹ egodo rẹ itabanako na. Okọ rẹ ọphọ na nẹrhẹ ihwo rẹ Izrẹl karophiyọ ive rẹ ayen ve kẹ Jihova nẹ ayen che nyupho rọyen. Wọ riẹn obo re se ọphọ? Ọyen ive oghẹresan.

Jihova sane Erọn vẹ emeshare rọyen nẹ ayen ga kerẹ irherẹn vwẹ itabanako na. Ayen cha vwẹrote itabanako na, ji ze izobo kẹ Jihova vwẹ etiyin. Erọn rọ dia orherẹn rode na ọvo, yen sa ro evunrẹ asan rọ Ma Fon na. Obọ ọvo ẹgbukpe yen ọ vwọ ruọ re ze izobo fikirẹ imwemwu rọyen, ọ rẹ orua rọyen kugbe ọ rẹ ihwo Izrẹl eje.

Ihwo rẹ Izrẹl bọn itabanako na re ẹgbukpe ọvo rẹ ayen vwo nẹ Ijipt nu. Asaọkiephana, ayen vwo asan rẹ ayen da ga Jihova re.

Jihova de ku urinrin rọyen ku itabanako na, evwru da dia enu rọyen. Evwru na da he enu rẹ itabanako na, ihwo rẹ Izrẹl ke dia etiyin. Evwru na de rhe vrẹn nẹ enu rẹ itabanako na, kẹ rhe ayen mu oyan phiyọ. Ayen mi mu itabanako na vwo nene evwru na.