Igbunu Vwẹ Abadi Ọvwavware Na

Fero ghwe vwo nyo nẹ ihwo rẹ Izrẹl na vrẹn nẹ Ijipt re, o de wene ẹwẹn rọyen. Ọ da vuẹ isodje rọyen: ‘Ovwan muegbe rẹ ekpẹrẹ rẹ ofovwin mẹ rere a vwọ tua ayen! Avwanre rhe siobọnẹ aye-en.’ Ọ vẹ isodje rọyen da vwọ tua ihwo rẹ Izrẹl.

Jihova suẹn ihwo rọyen, ọ vwẹ egho vwo suẹn ayen vwẹ oghẹruvo, ọ me rha vwẹ erhanre vwo sun ayen vwẹ ason. Ayen vwo te Abadi Ọvwavware na, ọ da tanẹ, ayen dia etiyin.

Ihwo rẹ Izrẹl da mrẹ Fero vẹ isodje rọyen re vwọ tua ayen. Isodje rẹ Ijipt djẹ ayen mu abadi na re, kọ ghwa họhọ nẹ obọ te ayen re. Ayen da viẹ se Mosis: ‘Avwanre che ghwure! Wọ rha yanje avwanre vwo vwẹ Ijipt.’ Ẹkẹvuọvo Mosis da ta: ‘Ovwan djoshọ-ọ. Ovwan mudia rere ovwan mrẹ oborẹ Jihova che sivwin avwanre wan.’ Mosis ghene vwẹroso Jihova dẹn, ọ diẹ ọtiọyen?

Jihova da vuẹ ihwo rẹ Izrẹl na nẹ ayen vrẹn nẹ etiyin. Vwẹ ason yena, Jihova de mu egho na kpo obuko rẹ ihwo rẹ Izrẹl na rere ọ dia uherevie rayen vẹ ihwo rẹ Ijipt na. Vwẹ ẹbẹre rẹ ihwo rẹ Ijipt na, ebri yehẹ oboyin. Ẹkẹvuọvo, urhukpẹ yehẹ ẹbẹre rẹ ihwo rẹ Izrẹl.

Jihova da vuẹ Mosis nẹ ọ riẹn obọ rọyen phiyọ abadi na. Jihova da nẹrhẹ odju rode dju vwẹ ason yena. Abadi na da hẹriẹ kpo ẹkẹn ivẹ, idjerhe da rhe dia uherevie rọyen. Ihwo rẹ Izrẹl ri te oduduru buebun na da yan otọ ọyaya wan uherevie rẹ abadi na.

Fero vẹ isodje rọyen de nene ihwo rẹ Izrẹl wan otọ ọyaya na. Jihova de phi ọyanghan phiyọ uvwre rẹ isodje na. Adjugẹ rẹ akpẹrẹ rayen ke kparan she. Isodje na de kperi: ‘Jẹ e rhivwin! Jihova họnra vwọ kẹ ayen.’

Jihova da vuẹ Mosis: ‘Riẹn obọ wẹn phiyọ abadi na.’ Siẹvuọvo na, ame na de rhurhu isodje rẹ Ijipt na. Fero vẹ ihwo rọyen eje de ghwu. Ọvuọvo sa vrabọ-ọ.

Ẹkẹvuọvo, vwẹ ẹbẹre ochekọ rẹ abadi na, otu gbidigbidi so une vwo jiri Ọghẹnẹ nẹ, “So une kẹ Ọrovwohwo, kidie o phi kparobọ vẹ urinrin, te iyesi vẹ ohwo rọ gua ọ kpare ayen phihọ abadi na.” Ihwo na vwo so une na, jẹ eya na gbeha je hworo ekpagha. Oma nabọ vwerhen ayen eje, kidie ayen rha dia eviẹ-ẹn.