ONỌ 10

Mavọ Yen Baibol na Sa Vwọ Chọn Vwẹ Uko?

OBORESORỌ Ọ VWỌ GHANRE

Baibol na tare nẹ “Ọbe ọfuanfon na ejobi rẹ Ọghẹnẹ mu ihwo vwo si.” (2 Timoti 3:16) Ọ da dia uyota, kọyen Baibol na sa kẹ wẹ odjekẹ ru wọ guọnọre.

DIE WO CHE RU?

Vwẹ ẹro roro udje nana: David djẹ imoto vwẹ asan ro vugheri-i. Eka rẹ urhuvwun kugbe ọ rẹ idjerhe na djerephia nẹ ọ dia asan rọ ra na ọyen ọ hepha na-a. David kọ rhe mrẹvughe nẹ ọyen ghwruru. Ọ sa dianẹ ọ djẹ idjerhe na chọ.

Wọ da dia David, die wo che ru?

FỌ WO RORO!

Wo vwo ojẹ sansan:

Nọ rere e dje idjerhe na kẹ wẹ.
Ni imapu, yẹrẹ reyọ GPS vwọ wian.
Rha djẹ yanran, vẹ iphiẹrophiyọ nẹ wọ cha djẹ te asan wọ ra na.

Ophẹnri, Ojẹ 3 yen ma bra.

Ojẹ rivẹ na yovwin nẹ ọrẹsosuọ na, kidie imapu yẹrẹ GPS che rhe we vwẹ oyan na rọ vwẹ ukẹcha kẹ wẹ.

Baibol na sa chọn wẹ uko vwẹ idjerhe tiọyena!

Ọbe nana ra mrẹ vwo dje na-a, sa

kẹ wẹ odjekẹ wọ da hẹ ebẹnbẹn
chọn wẹ uko vwọ riẹn oma wẹn, je dia omamọ rẹ ohwo
nẹrhẹ wo yeren akpọ ro me yovwin

ẸKPAHỌNPHIYỌ RẸ ENỌ RI SHEKPAHEN AKPEYEREN

Vwo nẹ ọke rẹ avwanre ghwa vwọ riẹn obo ra ta ota, yen avwanre vwọ nọ enọ.

Bro isio yehẹ ophephe na?
Ono yen ma isio na?

Avwanre vwọ ghwaran na, a nọ enọ ri shekpahen akpeyeren.

Diesorọ erọnvwọn ebrabra vwọ phia?
Diesorọ ihwo vwo ghwẹ?

Kẹ ọ da rha dianẹ ẹkpahọnphiyọ na hẹ evunrẹ Baibol na rhabae vwo?

Ihwo buebun tare nẹ ikuegbe rẹ esia yen vọn Baibol na, evo nẹ o kpo awanre re, efa nẹ e che se vwo ẹruọ rọyen bẹdẹ-ẹ. Baibol na yen ghene suọ re vwo jẹ ẹkpahọnphiyọ na ẹmrẹ, gbanẹ oborẹ ihwo roro kpahọn yen ebẹnbẹn na? E yono ayen chọ?

Kerẹ udje, ihwo roro nẹ Baibol na tare nẹ Ọghẹnẹ yen sun akpọ na. Ọ ghene sa dia ọtiọyen? Akpọ nana yanghan ku! Ọ vọnre vẹ ọmiaovwẹ kugbe ojaẹriọ, ega vẹ ughwu, ọbẹnvwẹ kugbe oghwọrọ. Diesorọ Ọghẹnẹ ro vwo ẹguọnọ vwọ rhoma so erọnvwọn nana eje?

Wọ guọnọ riẹn ẹkpahanphiyọ rẹ onọ na? Oborẹ Baibol na tare se gbe we unu!

Ọkiọvo wo niro so nẹ ichebro rehẹ ibroshọ nana, Baibol na yen a reyọ ayen nurhe. Iseri rẹ Jihova vwo imuẹro nẹ Baibol na ọyen esiri rẹ odjekẹ ra sa vwẹroso. Kidie “ọbe ọfuanfon na ejobi rẹ Ọghẹnẹ mu ihwo vwo si na, vọnre vẹ erere kẹ uyono, ẹghwọkuo, ẹrhuẹrẹ phiyọ.” (2 Timoti 3:16, 17) Brorhiẹn wọ vwọ fuẹrẹn ọbe nana ro kpo awanre na-a, komobọ wẹn!