ONỌ 7
Mavọ Me Sa Vwọ Họnre Vwọso Ọnyẹ rẹ Mi Vwo Bru Ehware?
DIE WO CHE RU?
Vwẹ ẹro roro udje nana: Emeranvwe ivẹ ọvo re yen Heather kugbe Mike vwọ riẹn ohwohwo, ẹkẹvuọvo Heather rorori nẹ ọyen vẹ Mike riẹn oma kri re. Ayen si ovuẹ rhe ohwohwo ọkieje, je ta ota ọke grongron vwẹ ifonu, ayen tobọ riẹn obo rehẹ ẹwẹn ohwohwo ọkiọvo! Ẹkẹvuọvo, Mike guọnọ orọnvwọn ọfa vrẹ eta rẹ ayen ta kuẹgbe na.
Uvwre rẹ emeranvwe ivẹ re wanre na, Mike kugbe Heather fiọnfiọn unu krẹn, je yọnrọn obọ rẹ ohwohwo. Ọyena te vwọ kẹ Heather. Jẹ, ọ guọnọre nẹ Mike yan jovwo-o. Mike yen nẹrhẹ oma vwerhọn, o ji no ghanghanre. ‘Vwọba,’ Heather kọ ta kẹ oma rọyen nẹ, ‘mẹvwẹ vẹ Mike vwo ẹguọnọ rẹ ohwohwo . . .’
Wo de hirharoku ẹdia rẹ Heather na, wọ je ghwanre te edje rẹ ohwo ra kọnphiyọ re, die yen wo che ru?
FỌ WO RORO!
Ehware ọyen okẹ ro nẹ obọ rẹ Ọghẹnẹ rhe vwọ kẹ ihwo re rọvwọn re ọvo. Re vwo bru ehware tavwen a ke rọvwọn dje ọghọ phia kẹ okẹ yena-a. Ọ pha kerẹ omamọ rẹ ewun re vwo ru ẹse kẹ wẹ, wọ da reyọ vwo ru ẹbẹre-amwa
Wọ de pho nẹ enu rẹ urhe rhe nẹ wọ cha rhan kerẹ ọmọphran, wọ cha rioja rẹ obo ri che nẹ obuko rọyen rhe. Ọtiọyen ọ je hepha siẹrẹ wọ da churhi rẹ ẹfuọn, kerẹ ọ rọ tare nẹ “siobọ nẹ igberadja.”—1 Tẹsalonaika 4:3.
A rha kerhọ rẹ urhi yena-a, die yen che no rhe? Baibol na da ta: “Ohwo ro gbe ọfanrhiẹ ru umwemwu kpahe oma rẹ obọ rọye.” (1 Kọrẹnt 6:18) Mavọ ọ vwọ dia ọtiọyen?
Ihwo ri ruẹ ehahiẹ rhe mrẹvughe re nẹ buebun rẹ ighene ri bru ehware tavwen ayen ke rọvwọn hirharoku ọvo yẹrẹ evo usun rẹ erọnvwọn nana.
OMAEMUPHIYỌ. Buebun rẹ ighene ri bru ehware jẹ ayen je rọvwọ-ọn tare nẹ ayen viẹ diekpọvwẹ ukuotọ rọyen.
JẸ ẸROẸVWỌSUA. Ọke rẹ ayen de bru ehware nu, dohwo doma rọyen kọ nọ, ‘Ọmọtẹ yẹrẹ ọmọshare ọfa vọ yen o ji nene vwerhẹn re?’
OFUDJEVWE. Buebun rẹ emetẹ guọnọ ohwo rọ cha chochọ rayen, ọ dia ohwo rọ guọnọ ehware ọvo-o. Emeshare buebun je rhe mrẹvughe nẹ ayen de nene ọmọtẹ vwerhẹn nu, ọmọtẹ na rhe je ayen kirobo ri jovwo-o.
Ẹkpo na: Wo de bru ehware tavwen wọ ke rọvwọn, jẹ wo ru oma wẹn kueku, emu ọghanghanre ọvo je va wẹ abọ. (Rom 1:24) Oma wẹn pha ghanghanre mamọ, o rhe fo nẹ wo gbe oma na ẹgua-a!
Djephia nẹ wo vwo ẹgba wo vwo “siobọ nẹ igberadja.” (1 Tẹsalonaika 4:3) Ọke wọ da rọvwọn re, ku wo se bru ehware. Ku wọ sa nabọ riavwerhen rọyen vọnvọn, wọ je cha vrabọ rẹ udubruvwe, idiekpọvwẹ, kugbe omaemuophiyọ ro no cha.—Isẹ 7:22, 23; 1 Kọrẹnt 7:3.
DIE WO RORORI?
Ohwo ro ghini vwo ẹguọnọ wẹn che phi we phiyọ ẹdia rẹ imuoshọ?
Ohwo ro ghini vwo ẹguọnọ wẹn cha nẹrhẹ wo ru orọnvwọn ro che miovwo oyerinkugbe wẹn vẹ ọ rẹ Ọghẹnẹ?—Hibru 13:4.