Ọmọ-oniọvo ri Pọl Fiudugbere

E jẹ e yono kpahen eghene ọvo ro sivwin arhọ rẹ ọniọvo oni rọyen. Ọyinkọn Pọl ọyehẹ oniọvo oni rọyen na. Baibol na ghwe se odẹ rẹ eghene nana-a, jẹ avwanre riẹnre nẹ o fiudugbere ru orọnvwọn ọvo. Wọ guọnọ nyo obo ro ruru?—

Pọl hẹ evunrẹ uwodi vwẹ Jerusalẹm. E mwuro phiyẹ uwodi fikiridie o ghwoghwo kpahen Jesu. Erharhe rihwo evo vwo utuoma kpahen Pọl, ayen da jiroro rẹ ayen vwo hwe. Ayen tare nẹ: ‘E jẹ avwanre vuẹ onotu rẹ isodje na nẹ e mwu Pọl rhiẹ aguare. Avwanre che siomanu vwẹ idjerhe, ọke re de mwẹ Pọl wan vrẹ, avwanre ke teyọn hwe!’

Ọmọ-oniọvo ri Pọl de nyo kpahen iroroẹjẹ nana. Kẹ die yen o che ru? O de kpẹ uwodi na ra vuẹ Pọl kpahọn. Kpakpata, Pọl da vuẹ nẹ ọ yanran ra vuẹ onotu rẹ isodje na kpahen iroroẹjẹ nana. Wo rori nẹ ọ lọhọre vwọ kẹ ọmọ-oniọvo ri Pọl rọvwọ vuẹ onotu na?— Ẹjo, keridie onotu rẹ isodje ọyen ohwo rode re mwọghọ kẹ. Eghene na fiudugbere, ọ da ra vuẹ onotu na.

Onotu rẹ isodje na riẹn obo ro che ru. O de se isodje ri te omarẹ 500 nẹ ayen serọ ri Pọl! Ọ vuẹ ayen nẹ ayen reyẹ Pọl kpẹ Sizaria vwẹ ason yena. Ayen sa sẹro rẹ arhọ ri Pọl?— E, obọ rẹ erharhe ihwo na se te-e! Iroro rẹ ayen jẹre na she hwe ayen.

Die yen ikuegbe nana yonuwe?— Wo ji se fiudugbere kerẹ ọmọ-oniọvo ri Pọl. Ofori nẹ avwanre fiudugbere vwo ghwoghwo ota ri Jihova kẹ ihwoefa. Wo se fiudugbere vwo ghwoghwo ota ri Jihova kẹ ihwo?— Wo de ru ọtiọyen, wo se sivwin arhọ rihwo.