Wọ Mrẹ Oma Wẹn Vwẹ Ẹdia Ọruvwohwo vẹ Oshọ Dẹvore?

Wọ mrẹ ọmọtete rọ hẹ evunrẹ uhoho na? Ọ hẹ evunrẹ ẹdia rẹ ọruvwohwo, oshọ ji mwo, gbanẹ ọ diẹ ọtiọyen? Wọ mrẹ oma wẹn vwevunrẹ ẹdia tiọyen dẹvore?— Ọkiọvo avwanre mrẹ oma avwanre vwẹ ẹdia yena. Baibol na tota kpahen igbeyan ri Jihova re mrẹ oma rayen vwevunrẹ ẹdia rẹ ọruvwohwo vẹ oshọ. Ilaija ọyen ọvo usun rayen. E jẹ e yono kpahọn.

Ilaija yerin vwẹ ọke grọgrọn vwẹ Izrẹl tavwen e ki vwiẹ Jesu. Ehab, rọ dia ovie rẹ Izrẹl, ga Jihova, Ọghẹnẹ ruyota na-a. Baal, rọ dia ọghẹnẹ refian ọyen Ehab vẹ aye rọyen Jẹzibẹl ga. Fikirẹ ọtiọyena, buebun rẹ ihwo rẹ Izrẹl ke je ga Baal. Jẹzibẹl ọyen ohwo ro sianro, ọ je guọnọ teyen ihwo re ga Jihova eje hwe, ji te Ilaija! Wọ riẹn oborẹ Ilaija ruru?—

Ilaija da djẹ shesheri ro aton re siomanu vwevunrẹ unu. Diesorọ o vwo ru ọtiọyen?— E, oshọ yin mwuro. Jẹ ofori nẹ oshọ mwu Ilaija-a. Diesorọ? Keridie ọ riẹnre nẹ Jihova sa vwẹ ukẹcha kẹ. Jihova dje ẹgba rọyen kẹ jovwo re. O vwẹ ọke ọvo rẹ Jihova vwọ vwẹ erhanre ro nẹ odjuvwu rhe vwọ kpahenphiyẹ ẹrhovwo rọyen. Kọyen Jihova je sa vwẹ ukẹcha kẹ Ilaija asaọkiephana!

Ọke rẹ Ilaija vwọ hẹ evunrẹ unu na, Jihova da nọ: ‘Die wo ruẹ vwẹ etinẹ?’ Ilaija da ta: ‘Mẹvwẹ ọvo yẹn odibo wẹn ro chekọ. Mẹvwẹ ọvo yen ga wẹ asaọkiephana, jẹ oshọ mwu vwe kidie a guọnọ ovwẹ hwe.’ Ilaija roro nẹ e hwe idibo ri Jihova ejobi ri chekọ nure. Ẹkẹvuọvo Jihova da ta kẹ: ‘Ọyena dia uyota-a. Ihwo ri te 7000 efa je herọ re ga vwẹ. Fiudugbere. Iruo efa je herọ wo ji che ru kẹ vwẹ!’ Wo rori nẹ oma vwerhen Ilaija rovwo nyo ota yena?—

Die yen obo re phia kẹ Ilaija na yonuwe?— Wọ dia ẹdia ọruvwohwo-o, wo jẹ oshọ ji mwu we-e. Wo vwo igbeyan ri vwo ẹguọnọ ri Jihova, ri ji vwo ẹguọnọ wẹn. Jihova, ọyen ohwo vẹ ẹgba, ọ je cha chọnwuko ọkeneje! Oma vwerhen owẹ wọ vwọ riẹn nẹ ọ diẹ owẹ ọvo yen herọ-ọ?—