UYONO 4
O ru Obo re Vwerhen Ọsẹ Rọyen vẹ Jihova Oma
Die yen Jẹfta ve kẹ Jihova?
Ọ lọhọre kẹ ọmọtẹ ri Jẹfta rovwo ru obo rẹ ọsẹ rọyen veri-i
Wọ mrẹ ọmọtẹ rọ hẹ evunrẹ uhoho na?— Ọyen ọmọtẹ rẹ ọshare ọvo re se Jẹfta. Baibol na vuẹ avwanre odẹ rẹ ọmọtẹ na-a, ẹkẹvuọvo avwanre riẹnre nẹ o ru obo re nẹrhẹ oma vwerhen ọsẹ rọyen vẹ Jihova. E jẹ avwanre yono kpahen ọmọtẹ nana vẹ ọsẹ rọyen.
Jẹfta ọyen omamọ ohwo, ọ nabọ ghwọrọke vwo yono ọmọtẹ rọyen kpahen Jihova. Ọyen ọgba, ọ ke rha je dia omamọ osun. Ọke rẹ emọ rẹ Izrẹl vẹ ivweghrẹn rayen che vwo phi ofovwin, ayen de se Jẹfta nẹ ọ rhe kobaro rẹ ofovwin na.
Jẹfta da nẹrhovwo rhe Ọghẹnẹ nẹ ọ chọn ayen uko vwo phikparobọ. Jẹfta de ve kẹ Ọghẹnẹ nẹ, o de se phi ivweghrẹn rọyen kparobọ, ọ cha reyẹ ohwo rẹsosuọ ro nẹ uwevwin rọyen rhe rhi dede vwọ kpahotọ kẹ Jihova. Ohwo na kọ ga vwevunrẹ tabanako rẹ Ọghẹnẹ bẹdẹ. Tabanako ọyen asan rẹ ihwo da ga Ọghẹnẹ ọke yena. Ukuotọ rọyen, Jẹfta de phi ofovwin na kparobọ! Wọ riẹn ohwo rẹsosuọ ro nẹ uwevwin rọyen rhe rhi dede?—
E, ọmọtẹ ri Jẹfta! Ọyen ọmọ ọvuọvo ro vwiẹre, asaọkiephana Jẹfta che siobọ no kẹ Ọghẹnẹ. Ọnana darọ mamọ. Karophiyọ nẹ, o vuve kẹ Ọghẹnẹ. Ọmọtẹ rọyen da vuẹ nẹ: ‘Ọsẹ mẹ, wo ve kẹ Jihova nure, ofori nẹ wo ru obo wo veri.’
Kukpe kukpe ọyen igbeyan rẹ ọmọtẹ ri Jẹfta vwo bro ra vwobẹ tabanako na
Ọ je da ọmọtẹ ri Jẹfta mamọ. Vwẹ obẹ tabanako na, ọmọtẹ ri Jẹfta cha rọvwọ-ọn, o ji che vwiẹ-ẹ. Jẹ ọ guọnọ ru oborẹ ọsẹ rọyen veri na rere oma vwọ vwerhen Jihova. Ọyena yen ma ghanre kẹ vrẹ orọvwen kugbe emọ. O de vrẹn nẹ uwevwin rẹ ọsẹ rọyen kpẹ uwevwin rẹ Ọghẹnẹ, etiyin kọyen ọ diare da ga rhirin re te ẹdẹ ughwu rọyen.
Wo rori nẹ obo ro ruru na nẹrhẹ oma vwerhen ọsẹ rọyen vẹ Jihova?— E, ọtiọyen dẹn! Wo de nyupho ri Jihova, wo de ji vwo ẹguọnọ kpahọn, jẹ wọ vwẹrokerẹ ọmọtẹ ri Jẹfta. Ku wọ je nẹrhẹ oma vwerhen ọsẹ vẹ oni wẹn kugbe Jihova.