UYONO 6

Iphiẹrophiyọ Vọ Yen Herọ Vwọ kẹ Ihwo ri Ghwuru?

1. Iyẹnrẹn esiri vọ yen herọ kpahen ihwo ri ghwuru?

Martha vẹ Meri dede Lazarọs ra rhọvwọn nushi rhe

Jesu vwo te Bẹtani rọ kẹri Jerusalẹm, jẹ ugbeyan rọyen Lazarọs ghwuru ẹdẹ ẹne re. Jesu vẹ iniọvo ri Lazarọs re se Meri kugbe Mata de kpẹ asan re shiro phiyọ. Siẹvuọvo na, etiyin kọ rhe vọn vẹ ihwo. Di roro obo rẹ oma vwerhẹn Meri vẹ Mata te, ọke ri Jesu vwọ rhọvwọn Lazarọs nẹ ushi!—Se Jọn 11:21-24, 38-44.

Mata riẹn kpahen iphiẹrophiyọ rọ herọ vwọkẹ ihwo ri ghwuru. Ọ riẹnre ni Jihova cha rhọvwọn ayen nẹ ushi rere ayen vwọ rhoma dia akpọ na.—Se Job 14:14, 15.

2. Ẹdia vọ yẹn ihwo ri ghwuru hepha?

Ọke ravwọ ma Adam, kugbe ọke rovwo ghwu — Ọghẹnẹ vuẹ Adam: ‘Ekpẹn avwọ ma wẹ, ekpẹn wo ji che rhivwin ra.’—JẸNẸSIS 3:19.

Ekpẹn yẹn avwọ ma ihworakpọ. (Jẹnẹsis 2:7; 3:19) Avwanre vwo erhi ro jeghwo rọ dia evunrẹ ugboma ravwanre-e. Avwanre ihworakpọ. O rhe vwo ẹbẹre vuọvo rẹ ugboma ravwanre rọ vrabọ rẹ ughwu-u. Ohwo de ghwu nu, jẹ afọnrhe vẹ iroro rọyen ji ghwu. Ọyen sorọ, Lazarọs gbikun vuọvo kpahen obo ro rhiẹromrẹ vwẹ ọke rovwo ghwu-u, keridie ọ rha riẹn emu vuọvo-o.—Se Une Rẹ Ejiro 146:4; Aghwoghwo 9:5, 6, 10.

Kẹ Ọghẹnẹ vwẹ erhanre gboja kẹ ihwo ri ghwu nure? Baibol na djere nẹ ihwo ri ghwu nure riẹn emu vuọvo-o. Kọyen uyono rẹ orho rẹ erhanre ofian, revwo miovwon odẹ rẹ Ọghẹne. Ọghẹnẹ vwo utuoma kpahen uruemu ravwọ torhẹ ihwo vwevunrẹ erhanre.—Se Jerimaya 7:31.

Ni ividio na Ẹdia vọ Yen Ihwo ri Ghwuru Hepha?

3. Ihwo ri ghwuru sa tota kẹ avwanre?

Ihwo ri ghwu nure sa tota-a. Ayen ji nyẹme-e. (Une Rẹ Ejiro 115:17) Ẹkẹvuọvo, emekashe umwemwu sa tota kẹ ihwo, kẹ ayen nẹrhẹ ihwo roro nẹ ihwo ri ghwu nure na yen tota kẹ ayen. (2 Pita 2:4) Jihova vwo utuoma kpahen uruemu ravwọ nọ mie ihwo ri ghwu nure.—Se Urhi Rivẹ 18:10, 11.

4. Amono yẹn a cha rhọvwọn nẹ ushi rhe?

Ọshare ra rhọvwọn nushi rhe vwẹ Iparadaisi yono kpahen Ọghẹnẹ. Ọshare na yono ihwo efa ra rhọvwọn nushi rhe.

A cha rhọvwọn iduduru rẹ ihwo ri ghwuru nẹ ushi rhiẹ otọrakpọ na. A je cha rhọvwọn evo re tobọ riẹn Ọghẹnẹ jovwo-o, ri ru umwemwu ayen ki ghwu.—Se Luk 23:43; Iruo Rẹ Iyinkọn na 24:15.

E che yono ihwo ra rhọvwọn nẹ ushi na, uyota kpahen Ọghẹnẹ, kugbe oborẹ ayen se vwo dje esegbuyota kpahen Jesu, ji nyo urhuru rọyen. (Ẹvwọphia 20:11-13) Itu ra rhọvwọn nẹ ushi rhe, ri ru ọrẹ esiri ke dia otọrakpọ na bẹdẹ.—Se Jọn 5:28, 29.

5. Die yẹn evrẹnushi na yono avwanre kpahen Jihova?

Ọmọ rẹ Ọghẹnẹ ro ji rhe rhi ghwu kẹ avwanre, yen nẹrhẹ iphiẹrophiyọ rẹ evrẹnushi na sa dia. Evrẹnushi na nẹrhẹ avwanre riẹn ẹguọnọ vẹ ẹserọphẹ ri Jihova. Vwẹ ọke rẹ evrẹnushi na, ono wo rhẹro rọyen?—Se Jọn 3:16; Rom 6:23.

Wọ da guọnọ evuẹ efa, ni uyovwin rẹ 6, 7 kugbe ọrẹ 10 rẹ ọbe na Die Yen Baibol na Se Yono Avwanre?