Mavọ Yen E Siẹ je Fan Ẹbe Avwanre Wan?

Avwanre fan ẹbe avwanre kpẹ ejajẹ re vrẹ 750, rere e se vwo ghwoghwo “iyẹnrẹn esiri” na vwọ kẹ “ẹgborho kẹgborho kugbe orua korua kugbe ephẹrẹ kephẹrẹ kugbe ohwo kohwo.” (Ẹvwọphia 14:6) Mavọ yen e sevwo ruiruo nana rọ vọnre vẹ egbabọse na? Avwanre ruẹ ọnana womarẹ iniọvo re vwomakpahotọ vwọ kẹ iruo rẹ ẹbe esio vẹ efanfan.

Ẹsosuọ, Oyibo yen e vwo siẹ ẹbe na. Ẹko Rọvwẹrote na yen vwẹrote Akon Iruo rẹ Ẹbe-esio rọhẹ esiri ukoko avwanre. Akon Iruo nana kọyen rha vwẹrote iruo rẹ iniọvo ri siẹ ẹbe, rehẹ esiri ukoko vẹ eghọn ukoko efa. E se siẹ eta ri djobọte ihwo sansan kidie ihwo ri siẹ ẹbe na nẹ ẹkuotọ sansan rhe.

A vwẹ ọ rẹ Oyibo na vwo rhe efan-eta na. A da fuẹrẹn ẹbe na je rhọnvwe phiyọ ayen nu, kẹ a vwẹ ayen vwo rhe efan-eta avwanre rehẹ akpọneje womarẹ intanẹti. Iniọvo na da fan eta na nu, kẹ ayen nabọ fuẹrẹn, ji se ayen. Ayen frẹkotọ “si eta rẹ uyota” na, rere e sa vwọ reyọ ọhọ rẹ ọrẹ Oyibo na phia, vwẹ ejajẹ rayen.​—Aghwoghwo 12:10.

Ikọmputa nẹrhẹ iruo na kpata. Ikọmputa cha sa reyọ ẹdia rẹ ihwo re fan eta vẹ ihwo ri siẹ ẹbe-e. Ẹkẹvuọvo, idishọnare vẹ erọnvwọn efa re vwo ruẹ ehiahiẹ vwevunrẹ ikọmputa, nẹrhẹ iruo rayen kpata. Iseri ri Jihova ru ona oghẹresan re se MEPS (Multilanguage Electronic Publishing System) phiyọ ikọmputa rayen; MEPS nẹrhẹ e se siẹ ibieta rẹ ejajẹ ri te omarẹ ujorin buebun, o ji phi ihoho phiyọ ayen, je nabọ rhuẹrẹ ayen vwọkẹ ijini ravwọ teyen ẹbe.

Diesorọ avwanre vwọ davwẹngba mamọ vwọ fan eta vwo kpẹ ejajẹ buebun? Keridie ọyen ọhọre ri Jihova nẹ “ihwo na ejobi rhọre rere ayen rhi vwo erianriẹn rẹ uyota na.”​—1 Timoti 2:3, 4.

• Mavọ yen e ruiruo rẹ ẹbe-esio avwanre wan?

• Diesorọ avwanre vwọ fan ẹbe avwanre vwo kpẹ ejajẹ buebun?