Oka rẹ Ihwo vọ Yen Iseri ri Jihova Hepha?

Bro Iseri ri Jihova yin wo vugheri? Ọkiọvo, evo dia kẹrowẹ, yẹrẹ i nenuwe wian vwẹ asan ọvo, yẹrẹ e hẹ isikuru wẹn. Ọ je sa dianẹ avwanre ghwoghwo ota kẹ wẹ jovwo re. Amono yen avwanre ghini hepha, kẹ diesorọ avwanre vwọ vuẹ ihwo kpahen oborẹ avwanre segbuyota?

Avwanre ihwo kerẹ owẹ. Avwanre nẹ asan sansan rhe. Evo usun avwanre kpẹ ẹga efa jovwo, efa vwo imuẹro kpahen Ọghẹnẹ jovwo-o. Jẹ, tavwen avwanre ke rhe dia Iseri ri Jihova, avwanre nabọ ghwọrọ ọke vwo yono Baibol na. (Iruo 17:11) Avwanre rhọvwen phiyọ obo re yono avwanre, ukuotọ rọyen, avwanre ohwo vuọvo de brorhiẹn nẹ Jihova yen avwanre cha ga.

Avwanre mrẹ erere vwo nẹ uyono ri Baibol. Kerẹ ihwoefa, avwanre vwo ebẹnbẹn sansan kugbe ẹdia ri jẹgba rẹ avwanre nene muabọ. Ẹkẹvuọvo, irhi ri Baibol rẹ avwanre vwo yerẹn, nẹrhẹ akpeyeren avwanre yovwẹn phiyọ. (Une Rẹ Ejiro 128:1, 2) Ọnana orọnvwọn ọvo rọ nẹrhẹ avwanre vuẹ ihwo kpahen oborẹ avwanre yono nẹ Baibol na rhe.

Avwanre nene uchebro ri Baibol na. Uchebro nana kẹ ohwo omavwerhovwẹn, e nẹrhẹ avwanre muọghọ kẹ ihwo, e je nẹrhẹ avwanre dia ihwo uyota, kugbe ihwo ri ruẹse. Uchebro ri Baibol na nẹrhẹ ihwo vwo uvi uruemu vẹ omakpokpọ, e je nẹrhẹ ihwo rẹ orua yerẹn kuẹgbe. Avwanre vwo imuẹro nẹ “Ọghẹnẹ ghwẹ oma hẹ abọvo jẹ ọvo vwo-o,” ọtiọyena, Iseri ri Jihova rehẹ akpọneje, ihwo rẹ orua ọvuọvo, avwanre fẹnẹ oma-a yẹrẹ vwobọ vwẹ oseghe rẹ usuo-on. Dede nẹ avwanre ihwo kerẹ owẹ, jẹ avwanre fẹnẹre.​—Iruo 4:13; 10:34, 35.

• Idjerhe vọ yen Iseri ri Jihova vwọ họhọ ihwoefa?

• Uchebro ri Baibol vọ yen Iseri ri Jihova nene?