ẸBẸRE 17
Jesu Yono Ihwo Kpahen Uvie Ọghẹnẹ
Jesu yono idibo rọyen erọnvwọn buebun, jẹ ọ tẹnrovi uyovwinrota vuọvo, ọyehẹ Uvie Ọghẹnẹ
DIESORỌ Jesu vwọ rhe akpọ na? Ọ da ta komobọ: “Mi ji re gbe ikun esiri rẹ uvie Ọghẹnẹ kẹ irere efa rhe; fiki rẹ ọnana e vwo ji vwe rhe.” (Luk 4:43) Roro kpahen erọnvwọn ẹne rẹ Jesu yono ihwo kpahen Uvie na, rọ dia uyovwinrota rẹ aghwoghwo rọyen na.
1. Jesu yen cha dia Ovie na. Jesu tarọ phephẹn nẹ ọyehẹ Mesaya na. (Jọn 4:25, 26) O ji djephia nẹ ọyehẹ Ovie rẹ ọmraro Daniẹl mrẹre vwevunrẹ emramrẹ na. Jesu vuẹ idibo rọyen nẹ o che chidia enu rẹ “ekete rẹ urinrin rọye” ayen ji che chidia ekete rayen. (Matiu 19:28) O se ẹko rẹ ihwo nana nẹ ayen “imigegede,” ọ da je tanẹ o ji vwo “igodẹ efa,” re dia evunrẹ ẹko nana-a.—Luk 12:32; Jọn 10:16.
2. Uvie Ọghẹnẹ che titi orhiẹn-ebro abavo. Jesu djerephia nẹ Uvie na che si oshenyẹ ejobi no, womarẹ orufon rẹ odẹ ri Jihova Ọghẹnẹ; o ji che si ekan ejobi rẹ Eshu hwarhiẹ rhe odẹ na no. Ekan na ejobi rọ hwarhiẹ rhe odẹ na vwo nẹ ọke rẹ ẹvwọsuọ rẹ Idẹn. (Matiu 6:9, 10) Jesu yono kohwo kohwo, te eshare te eya, ivwiogbere vẹ edafe. Dedevwo nẹ ihwo rẹ Izrẹl yen e jiro bru rhe, o ji ghwoghwo ota na kẹ ihwo efa. Vwọ fẹnẹ ilori ẹga rẹ ọke rọyen, Jesu ni ohwo ruẹ-ẹ.
3. Uvie Ọghẹnẹ cha dia ẹbẹre ọvo rẹ akpọ na-a. Ihwo buebun vwobọ vwẹ oseghe rẹ usuon ọke rẹ Jesu vwọ hẹ otọrakpọ na. Ẹkuotọ ọfa yen suẹn orere ro nurhe. Jẹ ọke rẹ ihwo vwọ guọnọ nẹ o vwobọ vwẹ usuon rẹ ọke yena, o de siomareyọ. (Jọn 6:14, 15) Ọ vuẹ osun ọvo nẹ: “Uvie mẹ dia ọ rẹ akpọ nana-a.” (Jọn 18:36) Ọ da rha ta kẹ idibo rọyen nẹ: “Ovwan rha dia e rẹ akpọ na-a.” (Jọn 15:19) Ọ rhọnvwe kẹ idibo na nẹ ayen vwẹ ekuakua rẹ ofovwin vwọ chochọ rọye-en.—Matiu 26:51, 52.
“Kọ yan wan . . . ẹko na, ro ghwoghwo jo gbe iyẹnrẹ esiri rẹ uvie Ọghẹnẹ.”—Luk 8:1
4. Usuon ri Jesu cha dia ọ rẹ ẹguọnọ. Jesu veri nẹ ọyen cha vwẹ urovwoma vwọ kẹ ihwo, ji ru oghwa rayen pharhe. (Matiu 11:28-30) O ru nene ota rọyen. Ọ kẹ ihwo uchebro ri shekpahen ẹnwan, oyerinkugbe rayen vẹ ihwo efa, ravwọ kẹnoma kẹ ẹguọnọ ri igho, vẹ obo re se vwo vwo omavwerhovwẹn. (Matiu, uyovwin 5-7) Kohwo kohwo se brora, tobọ te ihwo re shenyẹ dede, kidie o dje ẹguọnọ phia; ayen vwo imuẹro nẹ o che dje erorokẹ vwọ kẹ ayen, ji brọghọ phiyọ ayen oma. Jesu cha ghene dia omamọ rẹ Osun!
O vwo idjerhe ọfa rẹ Jesu vwo yono ihwo kpahen Uvie Ọghẹnẹ. O ru igbevwunu buebun. Diesorọ? Jẹ e roro kpahọn.