Ọghẹnẹ Tota Womarẹ Emraro Rọyen

ỌKE rẹ ivie ri Juda vẹ ivie rẹ Izrẹl vwo suẹn, ẹko rẹ eshare evo da vwomaphia, e se ayen emraro na. Eshare nana re vwẹ ovuẹ rẹ Ọghẹnẹ vwọphia na, vwo esegbuyota kugbe uduefiogbere rẹ oghẹresan. Roro kpahen evuẹ ẹne rẹ emraro nana vwọphia.

1. Oghwọrọ ri Jerusalẹm. Ọke grongron a ke ghwọrọ Jerusalẹm, ọyen ọmraro Aizaya vẹ Jerimaya vwọ reyọ orhọ-esio na vwọphia. Ayen nabọ dje oboresorọ Ọghẹnẹ vwo muophu kpahen ihwo ri Jerusalẹm. Iruemu rẹ ẹga rẹ efian, umiovwo, kugbe ozighi rẹ ihwo gbe, djerephia nẹ eta rẹ ayen tanẹ ayen ga Jihova, ofian.—2 Ivie 21:10-15; Aizaya 3:1-8, 16-26; Jerimaya 2:1–3:13.

2. Ẹrhomavwomuẹ rẹ ẹga rẹ uyota. Ẹgbukpe 70 yen cha wanvrẹ tavwen e ki siobọnu ihwo rẹ Izrẹl vwo nẹ eviẹn vwẹ Babilọn. Kẹ ayen che rhivwin kpo Jerusalẹm, je rhoma bọn uwevwin rẹ ẹga ri Jihova. (Jerimaya 46:27; Emọs 9:13-15) Aizaya mraro nẹ Sairọs yin che phi Babilọn kparobọ, ji siobọnu ihwo rẹ Izrẹl nẹ ayen ra rhoma bọn uwevwin rẹ ẹga rẹ Ọghẹnẹ na. Ọnana rugba omarẹ ikpe 200 vwọ wan nu. Aizaya tobọ dje idjerhe oghẹresan ro che vwo phi orere na kparobọ.—Aizaya 44:24–45:3.

3. Ẹcha rẹ Mesaya na kugbe obo ro che rhiẹromrẹ. E che vwiẹ Mesaya na vwẹ orere rẹ Bẹtlẹhẹm. (Maika 5:2) Ọ cha dia ohwo rọ vwomakpotọ, rọ cha gua ekẹtẹkẹtẹ ro Jerusalẹm. (Zekaraya 9:9) Dede nẹ ọ pha dẹndẹn, o che titi-i, ihwo buebun je cha siọn. (Aizaya 42:1-3; 53:1, 3) O che ghwu ughwu rẹ oja. Ọnana ko mudiaphiyọ nẹ ọyena yen cha dia oba rẹ akpeyeren rọyen? Ẹjo, kidie ughwu rọyen na cha nẹrhẹ ihwo buebun vwo evwoghovwo rẹ imwemwu rayen. (Aizaya 53:4, 5, 9-12) Evrẹnushi rọyen ọvo yen se ru ọnana.

4. Usuon ri Mesaya na vwẹ otọrakpọ na eje. Ihworakpọ ri jẹgba se sun omobọ rayen vwọrẹ ufuoma-a, ẹkẹvuọvo, e che se Mesaya rọ dia Ovie na, Ọmọ rẹ Ovie rẹ Ufuoma. (Aizaya 9:6, 7; Jerimaya 10:23) Vwẹ otọ rẹ usuon rọyen, omamọ oyerinkugbe cha dia uvwre rẹ ihworakpọ vẹ eranvwe na. (Aizaya 11:3-7) Ọga che no kare kare. (Aizaya 33:24) Ọghẹnẹ che mu ughwu rọ bẹdẹ. (Aizaya 25:8) Ọke yena, ihwo ri ghwuru che vrẹn nẹ ushi vwẹ otọrakpọ na.—Daniẹl 12:13.

​—E muro kpahen ẹbe rẹ Aizaya, Jerimaya, Daniẹl, Emọs, Maika, vẹ Zekaraya.