DANIẸL

1 Vwẹ ukpe rerha rẹ usuon rẹ Ovie Jehoyakim ri Juda, Ovie Nẹbukadnẹza ri Babilọn da rhe Jerusalẹm rhe gba riariẹ phiyọ. 2 Ọke vwọ yanran na, Jihova de phi Ovie Jehoyakim ri Juda vẹ evo vwẹ usun rẹ ekuakua rẹ uwevwin* rẹ Ọghẹnẹ rẹ uyota na phiyọ obọ rọyen, ọ da ghwẹ ekuakua na kpo otọ ri Shaina* vwo kpo uwevwin* rẹ eghẹnẹ rọyen. Ọ da ghwẹ ekuakua na phiyọ asan rọ sẹro rẹ ekuakua rẹ eghẹnẹ rọyen phiyọ.

3 Ovie na da vwẹ iji vwọ kẹ Ashpinaz rọ dia onotu rẹ ediaguare rọyen nẹ ọ reyọ evo vwẹ usun rẹ ihwo rẹ Izrẹl* na rhe, ma rho kẹ ihwo ri nẹ orua rẹ ivie kugbe orua rẹ ihwo ri titiri rhe. 4 Ayen me dia ighene* ri vwo oshechọ vuọvo vwẹ oma rayeen, ri vwo erhuvwu, aghwanre, erianriẹn, kugbe ọmrẹvughe, ri ji muwan re vwọ ga vwẹ ọguan rẹ ovie na. O che yono ayen isiesi vẹ ephẹrẹ rẹ ihwo ri Kaldia. 5 Vwọba, ovie na kẹ ayen ẹkẹn rẹ emu ri kẹdi kẹdẹ vwo nẹ udemu rọyen kugbe iwaini rọ da. E che yono ayen vwẹ ẹgbukpe erha, vwẹ oba rẹ ọke yena kẹ ayen cha ton owian phiyọ vwẹ ọguan rẹ ovie na.

6 Asaọkiephana ihwo rẹ orua* ri Juda evo hẹ usun rayen: Daniẹl,* Hananaya,* Mishẹl,* kugbe Azaraya.* 7 Onotu rẹ ediaguare na de mu odẹ* kẹ ayen; o mu odẹ na Bẹltẹshaza kẹ Daniẹl, Shedrak kẹ Hananaya, Mishak kẹ Mishẹl, o de rhe mu Abẹdnigo vwọ kẹ Azaraya.

8 Ẹkẹvuọvo Daniẹl de brorhiẹn vwevunrẹ ubiudu rọyen nẹ ọyen cha vwẹ udemu rẹ ovie na kugbe iwaini rọyen vwo gbe oma rọyen ẹguaa. Ọtiọyena ọ da vuẹ onotu rẹ ediaguare na nẹ ọ kẹ ọyen uphẹn rere ọyen vwo jẹ erọnvwọn nana ri che gbe ọyen ẹgua na ẹriọ. 9 Ọghẹnẹ rẹ uyota na da nẹrhẹ onotu rẹ ediaguare na gbe arodọnvwẹ ji dje ẹroesiri* vwọ kẹ Daniẹl. 10 Ẹkẹvuọvo onotu rẹ ediaguare na da ta kẹ Daniẹl: “Oshọ rẹ ovie na rọ dia ọrovwovwe na mu vwe, ohwo rọ tare nẹ a kẹ ovwan emu vẹ udi na. Kẹ ọ da rha mrẹ nẹ ovwan dọn vrẹ ighene* ri chekọ re vẹ ovwan gba hẹ edje na vwo? Ovwan cha nẹrhẹ me riabe vwẹ obaro rẹ ovie na.” 11 Daniẹl da ta kẹ ohwo rẹ onotu rẹ ediaguare na vwo mu nẹ ọ vwẹrote ọyen, Hananaya, Mishẹl, kugbe Azaraya: 12 “Biko, davwen idibo wẹn ni vwẹ ẹdẹ ihwe rere wọ kẹ avwanre ifọ* re, je kẹ avwanre ame da; 13 rere wọ vwẹ avwanre vwọ vwanvwe ighene* ri chekọ na re ria udemu rẹ ovie na, ọke yena ku wo se ru idibo wẹn obo ri je we vwo nene obo wọ mrẹ avwanre phiyọ.”

14 Ọtiọyena ọ da rhọnvwephiyọ oborẹ ayen tare na, ọ da davwen ayen ni vwẹ ẹdẹ ihwe. 15 Vwẹ oba rẹ ẹdẹ ihwe na, urhoma rayen de yovwin je kpokpọ vrẹ e rẹ ighene* ri chekọ re ria udemu rẹ ovie na. 16 Ọ rọ vwẹrote ayen na mi mu udemu rayen vẹ iwaini rayen mie ayen, ọ me kẹ ayen ifọ. 17 Ọghẹnẹ rẹ uyota na da vwẹ erianriẹn vẹ ẹruọ ri koka koka rẹ isiesi vẹ aghwanre vwọ kẹ ighene* ẹne nana; ọ da je kẹ Daniẹl ẹruọ ri koka koka rẹ emramrẹ vẹ evwerhẹn.

18 Ọke rẹ ovie na bruru nẹ a vwọ reyọ ayen rhe vwo te, onotu rẹ ediaguare na da reyọ ayen rhe obaro ri Nẹbukadnẹza. 19 Ọke rẹ ovie na vẹ ayen vwọ ta ota, a mrẹ ohwo vuọvo vwẹ usun rayen eje na rọ họhọ Daniẹl, Hananaya, Mishẹl, kugbe Azarayaa; ayen da daji etiyin je ga vwẹ obaro rẹ ovie na. 20 Vwẹ kota kota rọ guọnọ aghwanre vẹ ẹruọ rẹ ovie na nọ mie ayen eje, ọ da mrẹvughe nẹ ayen vwẹ abọ ihwe vwo yovwin vrẹ irherẹn ri ruẹ imajiki kugbe ihwo ri nene irivwin ta ota eje rehẹ ọsoso rẹ usuon rọyen na. 21 Daniẹl da daji etiyin re te ukpe rẹsosuọ rẹ usuon rẹ Ovie Sairọs.

2 Vwẹ ukpe rivẹ rẹ usuon rọyen, Nẹbukadnẹza da vwerhẹn evwerhẹn evo, i de kpokpo* te ẹdia rẹ ọ rha sa vwerhẹẹn. 2 Ovie na da vwẹ iji phia nẹ e se irherẹn ri ruẹ imajiki na, ihwo ri nene irivwin ta ota, ebọepha na, kugbe ihwo ri Kaldia* na rhe rere ayen rhe vuẹ ovie na evwerhẹn rọyen. Ayen de rhi mudia obaro rẹ ovie na. 3 Ovie na da ta kẹ ayen: “Me vwerhẹn evwerhẹn, ko kpokpo uvwe ẹwẹn kidie me guọnọ riẹn evwerhẹn na.” 4 Ihwo ri Kaldia na da kpahen kẹ ovie na vwẹ ephẹrẹ rẹ Arameik:* “E ovie, e jẹ wọ dia bẹdẹ. Vuẹ idibo wẹn evwerhẹn na, kẹ avwanre cha fan otọ rọyen kẹ wẹ.”

5 Ovie na da kpahen kẹ ihwo ri Kaldia na: “Ọnana yen ota mẹ rọ koba, ovwan rha vuẹ vwẹ evwerhẹn na vẹ obo ro mudiaphiyọọ, e che bru ovwan ibribro, ji hirhe iwevwin rẹ ovwan phiyọ asan re de ne.* 6 Ẹkẹvuọvo ovwan da vuẹ vwẹ evwerhẹn na je fan otọ rọyen kẹ vwẹ, ki mi che brọghọ rode phiyọ ovwan oma, hwosa kẹ ovwan, je kẹ ovwan okẹ buebun. Ọtiọyena ovwan gba vuẹ vwẹ evwerhẹn na vẹ otọ rọyen.”

7 Ayen da kpahen kẹ obọ rivẹ: “E jẹ ovie na vuẹ idibo rọyen evwerhẹn na, kẹ avwanre cha fan otọ rọyen vwọ kẹ.”

8 Ovie na da kpahen: “Me nabọ riẹn nẹ ovwan de guọnọ hwọke, kidie ovwan riẹn oborẹ ota mẹ rọ koba na mudiaphiyọ. 9 Ovwan rha vuẹ vwẹ evwerhẹn naa, emu vuọvo yen cha phia kẹ ovwan ihwo eje. Ẹkẹvuọvo ovwan brorhiẹn rẹ ovwan vwo gun efian kẹ vwẹ, je phiẹn vwẹ bẹsiẹ rẹ ẹdia na vwo wene. Ọtiọyena ovwan vuẹ vwẹ evwerhẹn na, ke me cha riẹn nẹ ovwan sa fan otọ rọyen.”

10 Ihwo ri Kaldia na da kpahen kẹ ovie na: “O vwo ohwo vuọvo vwẹ otọrakpọ* na ro se ru oborẹ ovie na nokpẹn rọyen naa, kidie o ji rhi vwo ovie rode vuọvo yẹrẹ osun vuọvo rọ nokpẹn rẹ orọnvwọn tiọna mie orherẹn ro ruẹ imajiki yẹrẹ ohwo ro nene irivwin ta ota yẹrẹ ohwo ri Kaldia dẹvoo. 11 Oborẹ ovie na nokpẹn rọyen na pha bẹnbẹn, o vwo ohwo vuọvo rọ herọ rọ sa vuẹ ovie naa, jokparẹ eghẹnẹ na, re dia ohri rẹ ihworakpọọ.”

12 Ọtiọyena ophu de mu ovie na gangan, ọ da vwẹ iji phia nẹ a teyen evwaghwanre ri Babilọn eje hwe. 13 Ọke rọ vwọ vwẹ iji na phia ra vwọ guọnọ teyan evwaghwanre na hwe, ka je guọnọ Daniẹl vẹ igbeyan rọyen rere a je teyen ayen hwe.

14 Vwẹ ọke yena, Daniẹl da bẹbẹ yanran ra vwẹ aghwanre ta ota kẹ Ariọk rọ dia onotu rẹ ihwo re rhẹrẹ ovie na vwẹ ọke rọ vwọ hẹ idjerhe yanran ra teyen evwaghwanre ri Babilọn na hwe. 15 Ọ da nọ Ariọk rọ dia onotu rọ wian kẹ ovie na: “Diesorọ ovie na vwọ vwẹ iji ọgangan tiọna phia?” Ariọk da vuẹ Daniẹl obo re phiare. 16 Ọtiọyena Daniẹl de bru ovie na ra ra rẹ nẹ ọ kẹ ọyen ọke rere ọyen sa vwọ vuẹ otọ rẹ evwerhẹn rọyen na.

17 Daniẹl de kpo uwevwin rọyen, ọ da je vuẹ igbeyan rọyen Hananaya, Mishẹl, kugbe Azaraya kpahen ota ro sheri na. 18 Daniẹl da vuẹ ayen nẹ ayen nẹrhovwo rhe Ọghẹnẹ rẹ odjuvwu na vwọ kẹ arodọnvwẹ fikirẹ odjahọn nana rere e vwo jẹ ọyen vẹ igbeyan rọyen na ehwe vẹ evwaghwanre ri Babilọn ri chekọ na.

19 Ọtiọyena e de rhie odjahọn na phiyọ kẹ Daniẹl vwevunrẹ emramrẹ vwẹ ason. Daniẹl de jiri Ọghẹnẹ rẹ odjuvwu na. 20 Daniẹl da ta:

24 Daniẹl de bru Ariọk ra, ohwo rẹ ovie na vwo mu nẹ ọ teyen evwaghwanre ri Babilọn hwe na, ọ da ta kẹ: “Wo hwe ọvwaghwanre ri Babilọn vuọvoo. Reyọ ovwẹ bru ovie na ra, ke me cha vuẹ otọ rẹ evwerhẹn na.”

25 Ariọk de brokpakpa reyọ Daniẹl bru ovie na ra, ọ da vuẹ: “Me mrẹ ọshare ọvo vwẹ usun rẹ ihwo re mu nẹ Juda rhe na rọ sa vuẹ ovie na otọ rẹ evwerhẹn rọyen na.” 26 Ovie na da ta kẹ Daniẹl rẹ odẹ rọyen dia Bẹltẹshaza: “Wọ ghene sa vuẹ vwẹ evwerhẹn re me vwerhẹnre na je fan otọ rọyen kẹ vwẹ?” 27 Daniẹl da kpahen kẹ ovie na: “O vwo ohwo vuọvo vwẹ usun rẹ evwaghwanre na, ihwo ri nene irivwin ta ota na, irherẹn ri ruẹ imajiki na, yẹrẹ ihwo ri nẹ isio na rọ sa vuẹ ovie na odjahọn rọ nokpẹn rọyen naa. 28 Ẹkẹvuọvo Ọghẹnẹ ọvo herọ vwẹ idjuvwu na rọ dia Ọ rọ vwẹ edjahọn vwọ phia, ọ nẹrhẹ Ovie Nẹbukadnẹza riẹn obo re cha phia vwẹ ẹbẹre rọ koba rẹ ẹdẹ na re. Ọnana yen evwerhẹn wẹn kugbe emramrẹ rẹ uyovwin wẹn ọke wo vwo sherhẹn ehwa wẹn:

29 “Vwọ kẹ wẹ, E ovie, ọke wọ vwọ hẹ enu rẹ ehwa wẹn, iroro wẹn da djẹ kpo obo re cha phia vwẹ obaro na, Ọ rọ vwẹ odjahọn vwọ phia na da nẹrhẹ wọ riẹn obo re cha phia. 30 Vwọ kẹ vwẹ, ọ dia ọ vwẹ odjahọn nana phia kẹ vwẹ kidie nẹ mi vwo aghwanre vrẹ kohwo kohwo ro yerẹẹn; ukperẹ ọtiọyen, o ruro rere me vwọ vuẹ ovie na otọ rẹ evwerhẹn na rere wọ vwọ riẹn iroro rẹ ubiudu wẹn.

31 “E ovie, wo vwo nẹ, wọ da mrẹ oma rode ọvo. Oma na rọ pha rhuarho ro ji lo gangan na mudia obaro wẹn, ọ vọnre vẹ udidi. 32 Uyovwin rẹ oma na uvi rẹ oro, udu rọyen vẹ igbabọ rọyen idọnọ efuanfon, evun rọyen vẹ ekpoghawọ rọyen ẹrovwo, 33 awọ rọyen utehru, vwo nẹ ẹghrowọ na kpo obotọ ke rha utehru ro ku kugbe vẹ ọphiẹn.* 34 Ku wo no bẹsiẹ re vwo bru ukuta ọvo rhe, ọ dia abọ yen e vwo broo, o de she teyen obo ẹghrowọ rẹ oma na kpotọ, rọ dia utehru vẹ ophiẹn ro ku kugbe na, ọ da guọghọ ayen. 35 Vwẹ ọke yena utehru na, ọphiẹn na, ẹrovwo na, idọnọ efuanfon na, kugbe oro na, ayen ejobi da guọghọ totọ, ayen da rhe dia kerẹ ehọrọ ri nẹ asan ra da frẹ ibi ekankọn vwẹ ọke uvo rhe, odju de mu ayen yanran, a rha mrẹ ọvuọvo rayen ọfaa. Ẹkẹvuọvo ukuta ro she teyen oma na da rhe dia ugbenu rode, ọ da vọn otọrakpọ na eje.

36 Ọnana yen evwerhẹn na, avwanre je cha vuẹ ovie na otọ rọyen. 37 Wẹwẹ, E ovie—ovie rẹ ivie rẹ Ọghẹnẹ rẹ odjuvwu na vwẹ uvie na, ogangan na, ẹgba na, kugbe urinrin na vwọ kẹ, 38 kugbe ohwo rẹ Ọghẹnẹ phi ihwo re dia kasan kasan phiyọ obọ rọyen, ọtiọyen ji te eranvwe rẹ aghwa vẹ ephran rẹ idjuvwu na kugbe ohwo ro ji vwo mu osun vwẹ enu rayen eje na—wẹwẹ komobọ yen uyovwin rẹ oro na.

39 “Ẹkẹvuọvo wo de sun wan nu, uvie ọfa kọ cha rhe, rọ cha gan te wee; uvie ọfa ko che nene ọyena, kọyen ọrerha, ọ rẹ ẹrovwo ro che sun akpọ na eje.

40 “Vwọ kẹ uvie rẹne na, ọ cha gan kerẹ utehru. Kirobo rẹ utehru guọghọ je lọ erọnvwọn eje vworovworo, e, kerẹ utehru rọ ghwọrọ erọnvwọn, ọ cha guọghọ je ghwọrọ enana eje.

41 “Kirobo wọ mrẹ ẹghrowọ na kpotọ kugbe irhiawọ na rọ dia ọphiẹn rẹ ọmechẹ ro ku kugbe vẹ utehru na, ọtiọyen uvie na je cha ghare, ẹkẹvuọvo emerha rẹ ogangan rẹ utehru cha dia evun rọyen kirobo wọ mrẹ utehru ro ku kugbe vẹ ọphiẹn ọlọlọhọ na. 42 Kirobo rẹ irhiawọ na dia utehru ro ku kugbe vẹ ọphiẹn na, ọtiọyen uvie na je cha gan vwẹ ẹbẹre ọvo, ọ me rha vwiẹrẹ vwẹ ẹbẹre ọfa. 43 Kirobo wọ mrẹ utehru ro ku kugbe vẹ ọphiẹn ọlọlọhọ na, ayen che ku kugbe vẹ ihwo na,* ẹkẹvuọvo ayen cha tamu ohwohwoo, ọvo cha tamu ọ ro chekọọ, kirobo rẹ utehru vẹ ophiẹn che se ku kugbe naa.

44 “Vwẹ ẹdẹ rẹ ivie yena, Ọghẹnẹ rẹ odjuvwu na cha vwẹ uvie ọvo vwo mu ra cha sa ghwọrọọ. A cha vwẹ uvie nana vwọ kẹ ihwo efaa. Ọ cha ghwọrọ ji phioba phiyọ ivie nana eje, ọyen ọvo kọyen che mudia bẹdẹ, 45 kirobo wọ mrẹre nẹ e bru ukuta ọvo nẹ ugbenu na rhe jẹ ọ dia abọ yen e vwo bro naa, ọ da guọghọ utehru na, ẹrovwo na, ọphiẹn na, idọnọ efuanfon na, kugbe oro na. Ọghẹnẹ rode na nẹrhẹ ovie na riẹn obo re cha phia vwẹ obaro na re. Evwerhẹn na uyota, a je sa vwẹroso otọ rọyen.”

46 Etiyin Ovie Nẹbukadnẹza de she bọvwọn opharo rhuotọ vwẹ obaro ri Daniẹl ji brọghọ phiyọ oma. Ọ da vwẹ iji phia nẹ a vwẹ okẹ kẹ je torhẹ insẹnsi vwọ kẹ. 47 Ovie na da ta kẹ Daniẹl: “Vwọrẹ uyota, Ọghẹnẹ rẹ ovwan na ọyen Ọghẹnẹ rẹ eghẹnẹ, Ọrovwori rẹ ivie kugbe Ọ rọ vwẹ odjahọn vwọ phia, kidie wọ sa vwẹ odjahọn nana vwọ phia.” 48 Ovie na de phi Daniẹl phiyọ ẹdia rode, ọ da vwẹ okẹ iyoyovwin buebun vwọ kẹ, o de vwo mu osun vwẹ ubrakpọ ri Babilọn eje kugbe onotu rẹ evwaghwanre ri Babilọn eje. 49 Vwo nene oyare ri Daniẹl, ovie na da vwẹ Shedrak, Mishak, kugbe Abẹdnigo vwo mu isun vwẹ ubrakpọ ri Babilọn, jẹ Daniẹl ga vwẹ ọguan rẹ ovie na.

3 Nẹbukadnẹza ovie na da ma oma rẹ oro ro kpenu te kubit 60,* rọ je hẹre te kubit 6.* O de vwo vi vwẹ otọ ọriẹriẹriẹ ri Dura vwẹ ubrakpọ ri Babilọn. 2 Ovie Nẹbukadnẹza da vwẹ iji phia nẹ e koko setrap na, inotu, isun, ibruche, eyọnrọn-igho, iguẹdjọ, imajistreti, kugbe ihwo eje rehẹ ẹdia rẹ usuon vwẹ ubrakpọ na vwọ kẹ ẹvwọkpahotọ rẹ oma rẹ Ovie Nẹbukadnẹza vwo vi na.

3 Ọtiọyena setrap na, inotu na, isun na, ibruche na, eyọnrọn-igho na, iguẹdjọ na, imajistreti na, kugbe ihwo eje rehẹ ẹdia rẹ usuon vwẹ ubrakpọ na de koko vwọ kẹ ẹvwọkpahotọ rẹ oma rẹ Ovie Nẹbukadnẹza vwo vi na. Ayen de mudia obaro rẹ oma rẹ Nẹbukadnẹza vwo vi na. 4 Ọ ro ghwoghwo aghwoghwo na da ta gorigori: “E jurhi kẹ ovwan, E ihwo, ẹgborho, kugbe ẹko rẹ ephẹrẹ sansan, 5 nẹ ovwan de nyo edo rẹ owanre, ipaipi, izita, ihapu, ekuakua rẹ uhworo ro vwo ifi tẹnrẹnrẹn, ipaipi ro vwo inu ivẹ, kugbe ekuakua uhworo ri chekọ eje, ovwan mi shiguẹ totọ rere ovwan vwẹ ẹga kẹ oma rẹ oro rẹ Ovie Nẹbukadnẹza vwo vi na. 6 Kohwo kohwo rọ rhọnvwe shiguẹ totọ rere ọ vwẹ ẹga kẹẹ, ke che do phiyọ ogidi erhanre ichichiyin na.” 7 Ọtiọyena, ihwo na eje vwo nyo edo rẹ owanre na, ipaipi na, izita na, ihapu na, ekuakua rẹ uhworo ro vwo ifi tẹnrẹnrẹn na, kugbe ekuakua rẹ uhworo ri chekọ eje na, ihwo na eje, ẹgborho na, kugbe ẹko rẹ ephẹrẹ sansan na de shiguẹ totọ je vwẹ ẹga kẹ oma rẹ oro rẹ Ovie Nẹbukadnẹza vwo vi na.

8 Vwẹ ọke yena, ihwo ri Kaldia evo da rhe rhe ta ota vwọso* ihwo ri Ju na. 9 Ayen da ta kẹ Ovie Nẹbukadnẹza: “E ovie, e jẹ wọ dia bẹdi bẹdẹ. 10 E ovie, wẹwẹ yen jurhi nẹ kohwo kohwo ro nyo edo rẹ owanre na, ipaipi, izita, ihapu, ekuakua rẹ uhworo ro vwo ifi tẹnrẹnrẹn, ipaipi ro vwo inu ivẹ, kugbe ekuakua rẹ uhworo ri chekọ na eje mi shiguẹ totọ je vwẹ ẹga vwọ kẹ oma rẹ oro na; 11 kohwo kohwo ro shiguẹ totọ je vwẹ ẹga kẹẹ, ke do phiyọ ogidi erhanre na. 12 Ẹkẹvuọvo o vwo ihwo ri Ju evo ru wo vwo mu nẹ i sun vwẹ ubrakpọ ri Babilọn: Shedrak, Mishak, kugbe Abẹdnigo. Eshare nana davwerhọ wẹẹn, E ovie. Ayen ga eghẹnẹ wẹẹn, ayen je rhọnvwe ga oma rẹ oro ru wo vwo vi naa.”

13 Ophu de mu Nẹbukadnẹza gangan, ọ da vwẹ iji phia nẹ a reyọ Shedrak, Mishak, kugbe Abẹdnigo rhe. A da reyọ eshare nana bru ovie na rhe. 14 Nẹbukadnẹza da ta kẹ ayen: “Shedrak, Mishak, kugbe Abẹdnigo, ghini uyota nẹ ovwan ga eghẹnẹ mẹẹ, nẹ ovwan je sen nẹ ovwan cha vwẹ ẹga vwọ kẹ oma rẹ oro ri mi vwo vi naa? 15 Asaọkiephana ovwan de nyo edo rẹ owanre na, ipaipi na, izita na, ihapu na, ekuakua rẹ uhworo ro vwo ifi tẹnrẹnrẹn na, ipaipi ro vwo inu ivẹ na, kugbe ekuakua rẹ uhworo ri chekọ eje na, ovwan de muegbe rẹ ovwan vwo shiguẹ totọ je vwẹ ẹga kẹ oma re me mare na, jẹ o shephiyọ. Ẹkẹvuọvo ovwan da sen nẹ ovwan cha vwẹ ẹga kẹẹ, ke che do ovwan phiyọ ogidi erhanre na ichichiyin na. Kẹ ono yen ọghẹnẹ yena ro se sivwin ovwan nẹ obọ mẹ?”

16 Shedrak, Mishak, kugbe Abẹdnigo da kpahen kẹ ovie na: “E Nẹbukadnẹza, o rhe vwo oborẹ avwanre cha kpahen kẹ wẹ vwẹ ota nana rọhẹ otọ naa. 17 Ọ da dia ọtiọyen, E ovie, Ọghẹnẹ rẹ avwanre ga na se sivwin avwanre nẹ ogidi erhanre na, o ji se sivwin avwanre nẹ obọ wẹn. 18 O rhe ru ọtiọyen dedee, E ovie, avwanre juwe riẹn nẹ avwanre cha ga eghẹnẹ wẹẹn, yẹrẹ vwẹ ẹga vwọ kẹ oma rẹ oro ru wo vwo vi naa.”

19 Ọtiọyena ophu de mu Nẹbukadnẹza gangan kpahen Shedrak, Mishak, kugbe Abẹdnigo te ẹdia rẹ opharo rọyen de wene* kpahen ayen, ọ da vwẹ iji phia nẹ e ru ogidi erhanre na rere ọ la ganphiyọ abọ ighwrẹn vrẹ obo ri jovwo. 20 Ọ da vwẹ iji kẹ egba evo vwẹ otuofovwin rọyen nẹ ayen gba Shedrak, Mishak, kugbe Abẹdnigo rere ayen do ayen phiyọ ogidi erhanre na.

21 Ọtiọyena a da gba eshare nana ọke rẹ ayen ji vwo ku iwun rẹ obotafe rayen, iwun igrongron, erhu, kugbe iwun rayen ri chekọ eje phiyọ, e de do ayen phiyọ ogidi erhanre na. 22 Kidie nẹ iji rẹ ovie na tuare mamọ, ogidi erhanre na je tuabọ vrẹka, eshare ri mu Shedrak, Mishak, kugbe Abẹdnigo na keyen erhanre na hweri. 23 Ẹkẹvuọvo eshare erha na, Shedrak, Mishak, kugbe Abẹdnigo ra gbare na de she phiyọ ogidi erhanre na.

24 Oshọ de mu Ovie Nẹbukadnẹza, o de vrẹn kpakpata, ọ da nọ ihwo ride rọyen: “Ọ dia eshare erha yen avwanre gbare ji do phiyọ evunrẹ erhanre na?” Ayen da kpahen kẹ ovie na: “E, ovie.” 25 Ọ da ta: “Nighere! Me mrẹ eshare ẹne ra gbaree re yan vwevunrẹ erhanre na, emu vuọvo ru ayeen, ọrẹne na họhọ ọmọ rẹ eghẹnẹ na.”

26 Nẹbukadnẹza da yan kpo asan ẹchẹ rẹ ogidi erhanre na, ọ da ta: “Shedrak, Mishak, kugbe Abẹdnigo, ovwan idibo rẹ Ọghẹnẹ ro Me Kpenu na, ovwan yan phia rere ovwan rhe etinẹ!” Shedrak, Mishak, kugbe Abẹdnigo da yan nẹ evunrẹ erhanre na rhe. 27 Setrap na, inotu na, isun na, kugbe ihwo ride rẹ ovie na ri kokori vwẹ etiyin da mrẹ nẹ erhanre na vwan eshare na omaa; ẹton rẹ uyovwin rayen vuọvo torhẹree, aro rẹ iwun rẹ obotafe rayen wenerii, ayen je tobọ gbon ọnrhe rẹ ivwirhii.

28 Nẹbukadnẹza da ta: “Ejiro dia kẹ Ọghẹnẹ ri Shedrak, Mishak, kugbe Abẹdnigo, ro ji amakashe rọyen rhe rhi sivwin idibo rọyen. Ayen vwẹrosuọ, ayen da vwọso iji rẹ ovie na ji muegbe rẹ ayen vwo ghwu* ukperẹ ayen vwọ vwẹ ẹga kẹ eghẹnẹ efa, jokparẹ Ọghẹnẹ rayen na. 29 Mi jurhi nẹ e jẹ e bru kohwo kohwo, ẹgborho, yẹrẹ ẹko rẹ ephẹrẹ rọ ta ota vwọso Ọghẹnẹ ri Shedrak, Mishak, kugbe Abẹdnigo ibribro, e mi ji hirhe uwevwin rọyen phiyọ asan re de ne;* kidie o vwo Ọghẹnẹ ọfa ro se sivwin kerẹ ọnanaa.”

30 Ovie na de phi Shedrak, Mishak, kugbe Abẹdnigo phiyọ ẹdia rode vwẹ ubrakpọ ri Babilọn.

4 “Ọnana ovuẹ rẹ Ovie Nẹbukadnẹza vwọ kẹ ihwo eje, ẹgborho, kugbe ẹko rẹ ephẹrẹ re dia otọrakpọ na eje: E jẹ ufuoma rẹ ovwan bunphiyọ! 2 Oma vwerhen ovwẹ me vwọ vuẹ ovwan kpahen eka kugbe igbevwunu rẹ Ọghẹnẹ ro Me Kpenu na ru kẹ vwẹ. 3 Eka rọyen iride, igbevwunu rọyen je pha rhuarho! Uvie rọyen uvie ri bẹdẹ, usuon rọyen je herọ vwo nẹ uvwiẹ ra ro uvwiẹ.

4 “Mẹvwẹ ri Nẹbukadnẹza vwo omafuvwe vwẹ uwevwin mẹ, erọnvwọn ji shephiyọ kẹ vwẹ vwẹ ọguan mẹ. 5 Me da vwerhẹn evwerhẹn rọ nẹrhẹ oshọ mu vwe. Ọke me vwọ vwerhẹn vwẹ ehwa mẹ, ihoho vẹ emramrẹ rẹ uyovwin mẹ da djẹ uguegue mu vwe. 6 Me da vwẹ iji phia nẹ a reyọ evwaghwanre ri Babilọn eje vwo rhe vwe rere ayen fan otọ rẹ evwerhẹn na kẹ vwẹ.

7 “Ọke yena, irherhẹn ri ruẹ imajiki, ihwo ri nene irivwin ta ota, ihwo ri Kaldia na, kugbe ihwo ri nẹ isio na de bru vwe rhe. Me vwọ vuẹ ayen evwerhẹn na, ayen sa fan otọ rọyen kẹ vwẹẹ. 8 Ukuotọ rọyen Daniẹl de bru vwe rhe, ọ rẹ odẹ rọyen dia Bẹltẹshaza rọ dia ọkpọ rẹ ọghẹnẹ mẹ kugbe ohwo rẹ ẹwẹn rẹ eghẹnẹ efuanfon na hẹ oma rọyen, me da vuẹ evwerhẹn na:

9 “‘E Bẹltẹshaza, onotu rẹ irherẹn ri ruẹ imajiki na, me riẹnre dẹn nẹ ẹwẹn rẹ eghẹnẹ efuanfon na hẹ oma wẹn, o ji vwo odjahọn vuọvo rọ gan nọ kẹ wẹẹ. Ọtiọyena gbe djisẹ rẹ emramrẹ re me mrẹre vwẹ evwerhẹn mẹ rere wọ je fan otọ rọyen kẹ vwẹ.

10 “‘Vwẹ emramrẹ re me mrẹre ọke me vwọ vwerhẹn vwẹ ehwa mẹ, me mrẹ urhe ọvo vwẹ uherevie rẹ otọrakpọ na, o gronri mamọ. 11 Urhe na da rho je rhe dia gangan, enu rọyen de te idjuvwu na, ka sa mrẹ vwẹ oba rẹ akpọ na eje. 12 Ẹbe rọyen pha yoyovwin, emamọ rọyen je pha buebun, emu rọyen te ihwo ejobi ria. Eranvwe rẹ aghwa na dia ophie rọyen, eghọn rọyen yen ephran rẹ idjuvwu na je dia, emama* na eje ria emamọ rọyen.

13 “‘Vwẹ emramrẹ re me mrẹre ọke me vwọ vwerhẹn vwẹ ehwa mẹ na, me mrẹ ọrhẹrotọ ọvo, ohwo ọfuanfon ro wontọ nẹ idjuvwu na cha. 14 O de kperi gangan: “Gbọ urhe na she, bru eghọn rọyen, kpogho ẹbe rọyen she rere wọ je hra emamọ rọyen! Jẹ eranvwe rẹ aghwa na djẹ nẹ obotọ rọyen rere ephran na je rhan nẹ eghọn rọyen. 15 Ẹkẹvuọvo yanjẹ uchuku na vẹ awọ rọyen vwo vwẹ otọ na, wọ me vwẹ utehru vẹ ẹrovwo vwọ gba, rere ọ dia ohri rẹ odin rẹ aghwa na. Jẹ irho rẹ idjuvwu na kpọrhọ rere ọ vẹ eranvwe rẹ aghwa na dia ohri rẹ odin rẹ akpọ na. 16 E jẹ e wene ubiudu rọyen nẹ ọ rẹ ohworakpọ rere a vwẹ ubiudu rẹ eranvwe vwọ kẹ, e jẹ ọke ighwrẹn je wan vrẹ. 17 Ọnana orhiẹn rẹ erhẹrotọ na, a vwẹ oyare nana phia fikirẹ ota rẹ ihwo efuanfon na tare, rere ihwo ri yerẹn vwọ riẹn nẹ Ọ ro Me Kpenu na yen Osun vwẹ uvie rẹ ihworakpọ, ayen je vwọ riẹn nẹ kohwo kohwo ro jere yen o vwo muẹ vwẹ enu rọyen, owenẹ ọ dia ohwo ro me kpotọ dede.”

18 “‘Ọnana yen evwerhẹn rẹ omẹvwẹ Ovie Nẹbukadnẹza vwerhẹnre; asaọkiephana wẹwẹ, E Bẹltẹshaza, fan otọ rọyen kẹ vwẹ, kidie evwaghwanre rẹ uvie mẹ ri chekọ eje sa fan otọ rọyen kẹ vwẹẹ. Ẹkẹvuọvo wo se ru ọtiọyen kidie ẹwẹn rẹ eghẹnẹ efuanfon na hẹ oma wẹn.’

19 “Ọke yena oshọ de mu Daniẹl rẹ odẹ rọyen dia Bẹltẹshaza, iroro rọyen ke djẹ uguegue muo.

“Ovie na da ta, ‘E Bẹltẹshaza, wo jẹ evwerhẹn na vẹ otọ rọyen guegue uwee.’

“Bẹltẹshaza da kpahen, ‘E ọrovwovwe, e jẹ evwerhẹn na shekpahen ihwo ri vwo utuoma kpahen owẹ, rere otọ rọyen ji shekpahen ivwighrẹn wẹn.

20 “‘Urhe ru wọ mrẹre nẹ ọ rhoro, ọ da je rhe dia gangan, rẹ obenu rọyen te idjuvwu na, ra je sa mrẹ vwẹ otọrakpọ na eje na, 21 rẹ ẹbe rọyen pha yoyovwin, rẹ emamọ rọyen pha buebun, rẹ emu rọyen ji te ihwo ejobi ria, rẹ eranvwe rẹ aghwa na dia ophie rọyen, rẹ ephran rẹ idjuvwu na je dia eghọn rọyen na, 22 wẹwẹ yen urhe na, E ovie, kidie wọ rhe dia rhuarho, wọ je rhe gan, ọrho wẹn kpenu o de re te idjuvwu na, usuon wẹn ji te oba rẹ akpọ na.

23 “‘Ovie na je mrẹ ọrhẹrotọ, ohwo ọfuanfon, ro nẹ idjuvwu na cha, rọ tanẹ, “Gbọ urhe na she rere wọ ghwọrọ, ẹkẹvuọvo yanjẹ uchuku rọyen vẹ awọ rọyen vwo vwẹ otọ, vẹ ẹrovwo kugbe utehru ra vwọ gba vwẹ ohri rẹ odin rẹ aghwa na. E jẹ irho rẹ idjuvwu na je kpọrhọ, ọ vẹ eranvwe rẹ aghwa na me je dia bẹsiẹ ọke ighwrẹn vwọ wan vrẹ.” 24 Ọnana yen otọ rọyen, E ovie; ọnana oborẹ Ọ ro Me Kpenu na tare nẹ ọ cha phia kẹ ọrovwovwe ovie na. 25 A cha djẹ wẹ nẹ ohri rẹ ihworakpọ, ku wo che re nene eranvwe rẹ aghwa dia, a cha kẹ wẹ odin re kerẹ erhuẹn; irho rẹ idjuvwu na je cha kpọrhọ owẹ, ọke ighwrẹn ke cha wanvrẹ wẹ, bẹsiẹ wọ vwọ riẹn nẹ Ọ ro Me Kpenu na yen Osun vwẹ uvie rẹ ihworakpọ, nẹ kohwo kohwo ro jere yen ọ vwọ kẹ.

26 “‘Ẹkẹvuọvo rọ vwọ dianẹ a tare nẹ a yanjẹ urhe na vẹ uchuku rọyen vwo na, uvie wẹn na cha rhoma dia ọwẹn ọke ru wọ da rhe riẹn re nẹ idjuvwu na yen suẹn. 27 Ọtiọyena, E ovie, biko rhiabọreyọ uchebro mẹ. Siobọnu umwemwu wẹn rere wo rhe ruẹ obo ri yovwirin, ji siobọnu orukuruku wẹn rere wo gbe arodọnvwẹ kẹ igbere. Ọkiọvo ku wọ sa dia vwọrẹ ufuoma vwẹ ọke grongron.’”

28 Enana ejobi phia kẹ Ovie Nẹbukadnẹza.

29 Emeranvwe ihwivẹ vwọ wan nu, kọ yan vwẹ enu rẹ ọguan rọyen vwẹ Babilọn. 30 Ovie na kọ ta: “Ọnana dia Babilọn rode re me vwẹ ẹgba vẹ ogangan mẹ vwọ bọn rere ọ dia asan ri mi de suẹn kugbe urinrin rẹ ọrho mẹ?”

31 Ota na je vwọ hẹ unu rẹ ovie na, urhuru ọvo de nẹ obodjuvwu rhe: “Wẹwẹ yen a ta ota nana kẹ, E Ovie Nẹbukadnẹza, ‘Uvie na nẹ obọ wẹn re, 32 a je djẹ wẹ nẹ ohri rẹ ihworakpọ re. Wẹ vẹ eranvwe rẹ aghwa yen gba cha dia, a je cha kẹ wẹ odin re kerẹ erhuẹn, ọke ighwrẹn ke cha wanvrẹ wẹ, bẹsiẹ wọ vwọ riẹn nẹ Ọ ro Me Kpenu na yen Osun vwẹ uvie rẹ ihworakpọ, nẹ kohwo kohwo ro jere yen ọ vwọ kẹ.’”

33 Ugege yena ota na de rugba vwẹ oma ri Nẹbukadnẹza. A da djẹ nẹ ohri rẹ ihworakpọ, kọ ria odin kerẹ erhuẹn, irho rẹ idjuvwu na da kpọrhọ oma rọyen, bẹsiẹ rẹ ẹton rọyen rhe vwọ dia grongron kerẹ iphoro rẹ ugo, rẹ ififabọ vẹ ififawọ rọyen je rhe vwọ dia kerẹ ififawọ rẹ ephran.

34 Vwẹ oba rẹ ọke yena, mẹvwẹ ri Nẹbukadnẹza de ni idjuvwu na, ọhọ mẹ de rhivwin bru vwe rhe; mi de jiri Ọ ro Me Kpenu na, mi de jiri Ọ rọ herọ bẹdi bẹdẹ na je vwẹ urinrin kẹ kidie usuon rọyen ọyen usuon ri bẹdi bẹdẹ, uvie rọyen je herọ vwo nẹ uvwiẹ ra ro uvwiẹ. 35 Ihwo eje re dia otọrakpọ na fiemu vuọvoo, o ji ruẹ kemu kemu rọ guọnọre vwẹ ohri rẹ otuofovwin rẹ idjuvwu na kugbe ihwo re dia otọrakpọ na. O ji vwo ohwo vuọvo rọ sa dobọ rọyen ji* yẹrẹ nọ nẹ, ‘Die yen wo ruru na?’

36 “Ọke yena ọhọ mẹ de rhivwin bru vwe rhe, urinrin rẹ uvie mẹ, ọrho mẹ, kugbe erhuvwu mẹ de ji rhivwin bru vwe rhe. Ihwo ride mẹ kugbe ihwo ri titiri ki bru vwe cha, a da rhoma vwẹ uvie mẹ kẹ vwẹ, a da je vwẹ ọrho rọ tobọ vrẹ ọ ri jovwo na vwọ ba kẹ vwẹ.

37 “Asaọkiephana, mẹvwẹ ri Nẹbukadnẹza jiri Ovie rẹ idjuvwu na je vwẹ urinrin kẹ, me je kparọ kpenu kidie iruo rọyen eje uyota, idjerhe rọyen jẹ ọsoso, kidie ọ sa phọphọ ihwo re kparoma.”

5 Vwọ kpahen Ovie Bẹlshaza, ọ re orẹ rode vwọ kẹ ihwo ride rọyen uriorin ọvo, kọ da iwaini vwẹ obaro rayen. 2 Ọke rẹ udi vwo muo re, Bẹlshaza da vwẹ iji phia nẹ a reyọ iko rẹ oro vẹ idọnọ efuanfon rẹ ọsẹ rọyen Nẹbukadnẹza reyọ nẹ uwevwin rẹ ẹga rọhẹ Jerusalẹm rhe, rere ovie na vẹ ihwo ride rọyen, esen rọyen kugbe eya rọyen efa sa vwọ reyọ ayen vwọ da udi. 3 Ayen da ghwẹ iko rẹ iro ra reyọ nẹ uwevwin rẹ ẹga rẹ Ọghẹnẹ rọhẹ Jerusalẹm rhe, ovie na vẹ ihwo ride rọyen, esen rọyen kugbe eya rọyen efa da vwẹ ayen vwọ da udi. 4 Ayen da iwaini ji jiri eghẹnẹ rẹ oro vẹ idọnọ efuanfon, e rẹ ẹrovwo, utehru, urhe, kugbe ukuta.

5 Ugege yena irhiabọ rẹ ohworakpọ da vwomaphia, ko siẹ eta phiyọ igbẹhẹ ro hirhe opharo ku ogburhukpẹ na vwẹ ọguan rẹ ovie na, ovie na mrẹ obuko rẹ obọ na ọke ro vwo siẹ eta na. 6 Oma rẹ ovie na de wene, iroro rọyen da djoshọ muo, ehun rọyen ko kpogho, igbon rọyen ke teyan ohwohwo.

7 Ovie na de kperi gangan nẹ e se ihwo ri nene irivwin ta ota, ihwo ri Kaldia* na, kugbe ihwo ri nẹ isio na rhe. Ovie na da ta kẹ evwaghwanre ri Babilọn: “Kohwo kohwo ro se se eta nana je fan otọ rọyen kẹ vwẹ, a cha vwẹ amwa rẹ ipọpo vwo rhuon ji ku orọnvwọn ohọre rẹ oro phiyọ ohọre rọyen, o ji che sun kerẹ ọrerha vwẹ uvie na.”

8 Evwaghwanre rẹ ovie na eje da rhe, ẹkẹvuọvo ayen se se eta na yẹrẹ fan otọ rọyen kẹ ovie naa. 9 Ọtiọyena oshọ de mu Ovie Bẹlshaza mamọ, opharo rọyen de wene; o de ji gbe ihwo ride rọyen unu.

10 Fikirẹ eta rẹ ovie na kugbe ihwo ride rọyen, ovie aye* na da ro ọguan ra da riemu na. Ọ da ta: “E ovie, e jẹ wọ dia bẹdi bẹdẹ. Wo jẹ iroro wẹn na djoshọ mu wee, wo ji jẹ opharo wẹn wenee. 11 O vwo ọshare ọvo* vwevunrẹ uvie wẹn na ro vwo ẹwẹn rẹ eghẹnẹ efuanfon na. Ọke rẹ ọsẹ wẹn vwọ hẹ akpọ, a mrẹ erianriẹn, ẹruọ, kugbe aghwanre rọ họhọ aghwanre rẹ eghẹnẹ na vwẹ oma rọyen, ọsẹ wẹn Ovie Nẹbukadnẹza da reyọ vwo mu onotu rẹ irherẹn ri ruẹ imajiki, ihwo ri nene irivwin ta ota, ihwo ri Kaldia na, kugbe ihwo ri nẹ isio; ọnana yen oborẹ ọsẹ wẹn ruru, E ovie. 12 Kidie Daniẹl rẹ ovie na se Bẹltẹshaza na vwo ẹwẹn ra mrẹ ọkpọ rọyeen kugbe erianriẹn vẹ ẹruọ rọ sa vwọ fan otọ rẹ evwerhẹn vẹ ido, je rhuẹrẹ ebẹnbẹn egangan phiyọ. Asaọkiephana e jẹ e se Daniẹl rhe, kọ cha fan otọ rọyen kẹ wẹ.”

13 Ọtiọyena a da reyọ Daniẹl rhe obaro rẹ ovie na. Ovie na da nọ Daniẹl: “Wẹwẹ yen Daniẹl rọhẹ usun rẹ ihwo rẹ ọsẹ mẹ ovie na mu nẹ Juda rhe na? 14 Mi nyori nẹ ẹwẹn rẹ eghẹnẹ na hẹ oma wẹn, wo ji vwo erianriẹn, ẹruọ, kugbe aghwanre ra mrẹ ọkpọ rọyeen. 15 A vwẹ evwaghwanre na kugbe ihwo ri nene irivwin ta ota rhe obaro mẹ rere ayen se eta nana je fan otọ rọyen kẹ vwẹ, ẹkẹvuọvo ayen sa fan otọ rẹ ovuẹ na kẹ vwẹẹ. 16 Ẹkẹvuọvo mi nyori nẹ wọ sa fan otọ rẹ erọnvwọn je rhuẹrẹ ebẹnbẹn egangan phiyọ. Asaọkiephana wo de se se eta na je fan otọ rọyen kẹ vwẹ, a cha vwẹ amwa rẹ ipọpo vwo rhuon we, e che ku orọnvwọn ohọre rẹ oro phiyọ ohọre wẹn, wo mi ji sun kerẹ ọrerha vwẹ uvie na.”

17 Daniẹl da kpahen kẹ ovie na: “Wọ sa yọnre okẹ wẹn je vwẹ ekuakua wẹn kẹ ihwo efa. Ẹkẹvuọvo mi che se eta na kẹ ovie na, me je cha vuẹ otọ rọyen. 18 Vwọ kẹ wẹ, E ovie, Ọghẹnẹ ro Me Kpenu na vwẹ uvie na, ọrho, ọghọ, kugbe urinrin vwọ kẹ ọsẹ wẹn Nẹbukadnẹza. 19 Fikirẹ ọrho Rọ vwọ kẹ, oshọ ko muẹ ihwo eje, ẹgborho, kugbe ẹko rẹ ephẹrẹ sansan ọke rẹ ayen dahẹ obaro rọyen, kohwo kohwo rọ guọnọre yen o hwe yẹrẹ nẹrhẹ ọ dia akpọ, kohwo kohwo rọ je guọnọ yen ọ kpara kpenu yẹrẹ phọphọ. 20 Ẹkẹvuọvo ọke rẹ omaẹkparọ rhe vwọ ro ubiudu rọyen, rẹ ẹwẹn rọyen je vwọ gan, ro vwo dje uruemu rẹ omaẹkparọ phia, a da reyọ nẹ ekete rẹ uvie rọyen rhe otọ, e de ji mie ọghọ rọyen. 21 A da djẹ nẹ ohri rẹ ihworakpọ, e de ru ubiudu rọyen họhọ ọ rẹ eranvwe rẹ aghwa, ọ vẹ ekẹkẹtẹ rẹ aghwa keyen gba dia. A da vwẹ odin kẹ re kerẹ erhuẹn, irho rẹ idjuvwu na da kpọrhọ oma rọyen, bẹsiẹ rọ rhe vwọ riẹn nẹ Ọghẹnẹ ro Me Kpenu na yen Osun vwẹ uvie rẹ ihworakpọ, nẹ kohwo kohwo ro jere yen ọ vwọ kẹ.

22 Ẹkẹvuọvo wẹwẹ ri Bẹlshaza rọ dia ọmọ rọyen na, wọ vwomakpotọọ dede nẹ wọ riẹn enana eje. 23 Ukperẹ ọtiọyen, wọ da kpare oma wẹn kpenu vwọso Ọrovwori rẹ idjuvwu na, wọ da tanẹ a ghwẹ iko rẹ uwevwin rọyen rhe we. Wẹ vẹ ihwo ride wẹn, esen wẹn, kugbe eya wẹn ri chekọ da reyọ ayen vwọ da iwaini ji jiri eghẹnẹ rẹ idọnọ efuanfon vẹ iro, e rẹ ẹrovwo, utehru, urhe, kugbe ukuta, eghẹnẹ re mrẹ orọnvwọn vuọvo, nyo orọnvwọn vuọvo, yẹrẹ riẹn orọnvwọn vuọvoo. Ẹkẹvuọvo wọ vwẹ urinrin kẹ Ọghẹnẹ rẹ ẹwẹn wẹn vẹ idjerhe wẹn eje hẹ obọ rọyen naa. 24 Ọtiọyena ọyen ji obọ na rhe rhi si eta nana. 25 Enana yen eta ro siri: MINI, MINI, TIKẸL, kugbe PASIN.

26 “Ọnana yen otọ rẹ eta na: MINI, Ọghẹnẹ kere ẹdẹ rẹ uvie wẹn, o de vwo te oba.

27 “TIKẸL, e mu we phiyọ uwan, a da mrẹ nẹ wo sirii.

28 “PIRẸS, a ghare uvie wẹn, a da vwọ kẹ ihwo ri Midia kugbe Pẹsha.”

29 Bẹlshaza da vwẹ iji phia, a da vwẹ amwa rẹ ipọpo vwo rhuon Daniẹl, e de ji ku orọnvwọn ohọre rẹ oro phiyọ ohọre rọyen; e de ghwoghwo nẹ ọyen cha dia osun rerha vwẹ uvie na.

30 Ason yena yen e hwe Bẹlshaza ovie rẹ ihwo ri Kaldia na. 31 A da vwẹ uvie na kẹ Derayọs rọ dia ohwo ri Midia; ọ hẹ omarẹ ẹgbukpe 62 vwẹ ọke yena.

6 Derayọs de no nẹ o yovwirin rọ vwọ vwẹ setrap 120 vwo mu vwẹ uvie na eje. 2 Ihwo ride erha hẹ enu rayen, Daniẹl ọyen ọvo vwẹ usun rayen; setrap na ke niyẹnrẹn kẹ ayen rere e vwo jẹ okọn rẹ ovie na ẹghwọrọ. 3 Asaọkiephana Daniẹl fẹnẹ ihwo ride ri chekọ na vẹ setrap na, kidie ẹwẹn ra mrẹ vwo djee hẹ oma rọyen, ovie na ji vwo ẹwẹn rọ vwọ kparọ kpenu vwẹ uvie na eje.

4 Ọke yena ihwo ride na vẹ setrap na ke guọnọ oborẹ ayen sa vwọ yọnrọn Daniẹl womarẹ obo rọ vwẹrote iruo rọyen wan vwevunrẹ uvie na, ẹkẹvuọvo ayen mrẹ oborẹ ayen sa vwọ yọnrọn yẹrẹ mrẹ orọnvwọn ọbrabra vuọvo ro ruruu, kidie ọyen ohwo ra sa vwẹrosua, ayen mrẹ oshechọ vwẹ iruo rọyen yẹrẹ ọghware vwẹ oma rọyeen. 5 Etiyin eshare na da ta: “Avwanre cha mrẹ asan vuọvo vwọ yọnrọn Daniẹl nana kakakaa, jokpanẹ ka guọnọ obo re vwọso urhi rẹ Ọghẹnẹ rọyen.”

6 Ọtiọyena ihwo ride na vẹ setrap na de bru ovie na ra kerẹ ẹko, ayen da ta kẹ: “E ovie Derayọs, e jẹ wọ dia bẹdi bẹdẹ. 7 Ihwo eje re wian kẹ ovie na, inotu na, setrap na, ihwo ride rẹ ovie na, kugbe isun na siomakoko vwo ru urhi ọvo ji phi ẹgha phiyọ nẹ vwẹ ẹdẹ 30, kohwo kohwo rọ nẹrhovwo rhe ọghẹnẹ ọfa yẹrẹ ohwo ọfa vwọ vrẹ wẹ, E ovie, e jẹ e do phiyọ unu rẹ ikpohrokpo. 8 Asaọkiephana, E ovie, gba rhọnvwephiyọ urhi na rere wọ ghwobọphiyọ rere e vwo jẹ urhi na ese wene kirobo rẹ urhi rẹ ihwo ri Midia kugbe Pẹsha hepha ra sa phaan.”

9 Ọtiọyena ovie Derayọs da ghwobọphiyọ urhi na kugbe ẹgha na.

10 Ẹkẹvuọvo ugege rẹ Daniẹl vwọ riẹn nẹ a ghwobọphiyọ urhi na re, o de kpo uwevwin rọyen ro vwo ubruwevwin rẹ obenu, rẹ ovakpo rọyen ro rhiephiyọ na hirhe opharo ku Jerusalẹm. Abọ erha ẹdọke kọyen o vwo shiguẹ totọ nẹrhovwo ji jiri Ọghẹnẹ rọyen kirobo ro ruẹ kọke kọke jovwo. 11 Ọke yena eshare na da họrhọ ro uwevwin na, ayen da mrẹ Daniẹl rọ nẹrhovwo je yara ẹroesiri mie Ọghẹnẹ rọyen.

12 Ọtiọyena ayen de bru ovie na ra ra karophiyọ kpahen ẹgha rọyen na: “Wọ ghwobọphiyọ ẹgha rọ tare nẹ vwẹ ẹdẹ 30, kohwo kohwo rọ nẹrhovwo kẹ ọghẹnẹ ọfa jokparẹ owẹ, E ovie, e do phiyọ unu rẹ ikpohrokpo?” Ovie na da kpahen: “Ota na nabọ muotọ kirobo rẹ urhi rẹ ihwo ri Midia kugbe Pẹsha hepha ra cha sa phaan.” 13 Ugege yena ayen da ta kẹ ovie na: “Daniẹl rọ dia ọvo usun rẹ ihwo re mu nẹ Juda rhe na davwerhọ wẹẹn, E ovie, ọ je davwerhọ rẹ ẹgha ru wọ ghwobọphiyọ naa, ẹkẹvuọvo ọ nẹrhovwo abọ erha ẹdọke.” 14 Ovie na ghwe vwo nyo ọnana, o de muomaphiyọ gangan, kọ guọnọ idjerhe ro se vwo sivwin Daniẹl; ọ da davwẹngba rọyen eje ro se vwo sivwon bẹsiẹ rẹ ọke rhi vwo she. 15 Ukuotọ rọyen, eshare na de bru ovie na ra kerẹ ẹko, ayen da ta kẹ ovie na: “Noso, E ovie, nẹ urhi rẹ ihwo ri Midia kugbe Pẹsha tare nẹ kẹgha kẹgha yẹrẹ kurhi kurhi rẹ ovie na ghwobọphiyọ nure, e che se wenee.”

16 Ọtiọyena ovie na de jurhi na, ayen de mu Daniẹl rhe, ayen de do phiyọ unu rẹ ikpohrokpo na. Ovie na da ta kẹ Daniẹl: “Ọghẹnẹ wẹn ru wọ ga kọke kọke na che sivwin uwe.” 17 E de mu oragha ọvo rhe, a da reyọ vwo rhurhu unu rẹ asan na, ovie na da vwẹ ubiosa rọyen vẹ ubiosa rẹ ihwo ride rọyen vwo te, rere e vwo jẹ emu vuọvo ewene vwẹ orhiẹn re bru kpahen Daniẹl na.

18 Ovie na de kpo ọguan rọyen. Ọ rhọnvwe riemuu, ọ je rhọnvwe nẹ e hworo ihwehworo kẹ ọyeen,* ọ je sa vwerhẹn vwẹ ason yenaa. 19 Ukuotọ rọyen vwẹ edegburhiọke, ovie na de vrẹn, o de brokpakpa kpo unu rẹ ikpohrokpo na. 20 Ọke ro vwo sikẹrẹ unu na, o de kperi se Daniẹl vẹ urhuru rẹ omaemuomaphiyọ. Ovie na da nọ Daniẹl: “E Daniẹl, odibo rẹ Ọghẹnẹ ro jeghwo na, Ọghẹnẹ ru wọ ga kọke kọke na se sivwin uwe nẹ abọ rẹ ikpohrokpo na?” 21 Ugege yena Daniẹl da kpahen kẹ ovie na: “E ovie, e jẹ wọ dia bẹdi bẹdẹ. 22 Ọghẹnẹ mẹ ji amakashe rọyen rhe rhi rhurhu unu rẹ ikpohrokpo na, ayen rha wan vwẹ omaa, kidie abọ mẹ fonro vwẹ obaro rọyen; mi ji ru we emu vuọvo rọ chọree, E ovie.”

23 Ovie na da ghọghọ gangan, o de jurhi nẹ e mu Daniẹl nẹ unu rẹ ikpohrokpo na rhe. Ọke re vwo mu Daniẹl phia, ọ wan oma kakakaa, kidie ọ vwẹroso Ọghẹnẹ rọyen.

24 Ovie na de jurhi, e de mu eshare ri gun nyẹ* Daniẹl na rhe, e de do ayen vẹ emọ rayen kugbe eya rayen phiyọ unu rẹ ikpohrokpo na. Ayen te obotọ rẹ unu na tavwen ikpohrokpo na ki pho mu ayen ji vwirhin ibeku rayen ejee.

25 Ovie Derayọs de si rhe ihwo na eje, ẹgborho na, kugbe ẹko rẹ ephẹrẹ sansan re dia otọrakpọ na eje: “E jẹ ovwan vwo ufuoma gbidiki! 26 Mi jurhi nẹ vwẹ kasan kasan rọhẹ otọ rẹ uvie mẹ na, e jẹ ihwo djoshọ rẹ Ọghẹnẹ ri Daniẹl. Kidie ọyen Ọghẹnẹ ro jeghwo rọ herọ bẹdi bẹde. Uvie rọyen cha ghwọrọ kakakaa, usuon rọyen je herọ bẹdi bẹdẹ. 27 Ọ sẹro rẹ ihwo, sivwin ihwo, ji ruẹ eka vẹ igbevwunu vwẹ idjuvwu vẹ otọrakpọ na, kidie o sivwin Daniẹl vwo nẹ abọ rẹ ikpohrokpo na.”

28 Ọtiọyena erọnvwọn de yovwin kẹ Daniẹl nana vwẹ otọ rẹ usuon ri Derayọs kugbe ọ ri Sairọs rọ dia ohwo ri Pẹsha.

7 Vwẹ ukpe rẹsosuọ ri Bẹlshaza ovie ri Babilọn, Daniẹl da vwerhẹn evwerhẹn je mrẹ emramrẹ ọke rọ vwọ vwerhẹn vwẹ ehwa rọyen. O de si evwerhẹn na phiyotọ; o si ikuegbe na ejobi gba. 2 Daniẹl da ta:

“Mi vwo nẹ vwevunrẹ emramrẹ mẹ vwẹ ason, nighere! odju ẹne rẹ idjuvwu na ki djuẹ abadi rode na. 3 Eranvwe rẹ aghwa ride ẹne de nẹ evunrẹ abadi na rhe, ayen fẹnẹ ohwohwo.

4 “Ọrẹsosuọ na pha kerẹ okpohrokpo, o vwo ibekpe kerẹ ugo. Ki mi no bẹsiẹ ra vwọ sanvwe ibekpe rọyen no, a da kparọ kpenu nẹ otọrakpọ na, a da reyọ vwo mudia vẹ awọ ivẹ kerẹ ohworakpọ, a da je vwẹ ubiudu rẹ ohworakpọ vwọ kẹ.

5 “Nighere! eranvwe rẹ aghwa ọfa, ọrivẹ, ọ pha kerẹ okorhi. Ọ kpare ẹbẹre ọvo rẹ ọma rọyen kpenu, ọ vwẹ akon rọyen vwọ hwa ibiedada erha; a da vuẹ nẹ, ‘Vrẹn rere wọ re uvwo buebun.’

6 “Ọnana vwọ wan nu, ki mi ji nẹ, nighere! me da mrẹ eranvwe rẹ aghwa ọfa, ọ pha kerẹ ubido, ẹkẹvuọvo ibekpe ẹne hẹ ugbuko rọyen kerẹ ibekpe rẹ ọphran, eranvwe rẹ aghwa na vwo uyovwin ẹne, a je vwẹ ogangan kẹ ro vwo sun.

7 “Ọnana vwọ wan nu, ki mi ji nẹ vwẹ emramrẹ rẹ ason na, me da mrẹ eranvwe rẹ aghwa rẹne, o muoshọ, ọ vẹ udidi, o vwo ẹgba gangan, o ji vwo ibiakon rẹ utehru ride. Ọ ria je ghwọrọ, ọ me rha vwẹ awọ rọyen vwo chiyin obo ri chekọ muotọ. Ọ fẹnẹ eranvwe rẹ aghwa ri chekọ eje re kobaro kẹ, o ji vwo idjo ihwe. 8 Mi vwo nẹ idjo na, nighere! idjo ọfa, ọ rẹ otete, da djẹ rhe vwẹ ohri rayen, erha vwẹ usun rẹ idjo rẹsosuọ na da kpanre she tavwen ọ ke vwomaphia. Nighere! idjo nana vwo ibiẹro kerẹ e rẹ ohworakpọ, o ji vwo unu rọ vwọ ta eta rẹ omaẹkparọ.*

9 “Ki mi nẹ bẹsiẹ ra vwọ vwẹ ekete sansan vwo vi, Ọ rọ Herọ nẹ Awanre Rhe na de chidia. Ewun rọyen fuan kerẹ imicho, ẹton rẹ uyovwin rọyen je pha kerẹ ẹton rẹ ogodẹ rọ fonro. Ekete rọyen erhanre; idjugẹn rọyen erhanre rọ la. 10 Erhanre djẹ nẹ obaro rọyen cha kerẹ ivwori. Uriorin manẹ uriorin buebun ki gbodibo kẹ, uriorin ihwe manẹ uriorin ihwe mudia obaro rọyen. Aguare na de chidia, e de rhie ẹbe phiyọ.

11 “Ọke yena ki mi nẹ fikirẹ edo rẹ eta rẹ omaẹkparọ* rẹ idjo na ta; mi de no bẹsiẹ re vwo hwe eranvwe rẹ aghwa na je ghwọrọ ugboma rọyen, e de do phiyọ erhanre na rere ọ torhẹ. 12 Ẹkẹvuọvo vwọ kẹ eranvwe rẹ aghwa ri chekọ na, a da reyọ usuon rayen mie ayen, a da yanjẹ arhọ rayen vwo vwẹ ọke ọvo kugbe aruọke ọvo.

13 “Mi ji vwo nẹ vwevunrẹ emramrẹ rẹ ason na, nighere! ohwo ọvo rọ họhọ ọmọ rẹ ohwo, kọ cha vẹ evwru rẹ idjuvwu na; a da rhọnvwe nẹ o te asan rẹ Ọ rọ Herọ nẹ Awanre Rhe na hepha, ayen da reyọ kẹrẹ Ohwo yena. 14 A da vwẹ usuon, ọghọ, kugbe uvie vwọ kẹ rere ihwo na, ẹgborho na, kugbe ẹko rẹ ephẹrẹ sansan vwo gbodibo kẹ. Usuon rọyen ọyen usuon ri bẹdẹ rọ cha wanvrẹẹ, a je cha ghwọrọ uvie rọyeen.

15 “Vwọ kẹ vwẹ ri Daniẹl, ẹwẹn mẹ ko kpokpo uvwe vwẹ obevun kidie emramrẹ rẹ uyovwin mẹ nẹrhẹ oshọ mu vwe. 16 Mi de sikẹrẹ ọvo vwẹ usun rẹ ihwo ri mudia etiyin na, me da nọ kpahen oborẹ ọnana ghini mudiaphiyọ. Ọ da kpahen kẹ vwẹ, je fan otọ rẹ erọnvwọn nana kẹ vwẹ.

17 Eranvwe rẹ aghwa ride ẹne nana eyen ivie ẹne ri che vrẹn nẹ akpọ na rhe. 18 Ẹkẹvuọvo a cha vwẹ uvie na vwọ kẹ ihwo efuanfon rẹ Ọ ro Me Kpenu na, kẹ ayen che sun vwẹ uvie na bẹdi bẹdẹ, e, rhirin bẹdi bẹdẹ.’

19 “Mi de rhi vwo ẹwẹn re me vwọ riẹn kpahen eranvwe rẹne na kpobarophiyọ, ọ rọ fẹnẹ i ri chekọ eje na; a mrẹ vwo dje udidi rọyeen, fikirẹ ibiakon rẹ utehru kugbe ififabọ vẹ ififawọ rẹ ẹrovwo rọyen na, ọ ria je ghwọrọ, ọ me rha vwẹ awọ rọyen vwo chiyin obo ri chekọ muotọ. 20 Me je guọnọ riẹn kpahen idjo ihwe rehẹ uyovwin rọyen na kugbe idjo rọ djẹ rhe ọke rẹ erha vwọ kpanre she nu, idjo ro vwo ibiẹro kugbe unu rọ ta eta rẹ omaẹkparọ* na, rọ je rho nọ i ri chekọ na.

21 “Ki mi nẹ rẹ idjo na vwo nene ihwo efuanfon na phiẹ ofovwin, ko phiẹ ayen kparobọ, 22 bẹsiẹ Ọ rọ Herọ nẹ Awanre Rhe na vwọ rhe, e de brorhiẹn kẹ ihwo efuanfon rẹ Ọ ro Me Kpenu na, ọke re bruphiyọ rẹ ihwo efuanfon na cha vwọ reyọ uvie na de rhi te.

23 “Ọnana yen obo rọ tare: ‘Vwọ kpahen eranvwe rẹ aghwa rẹne na, uvie rẹne ọvo herọ rọ cha dia otọrakpọ na, ọ cha fẹnẹ uvie ri chekọ eje, ọ cha re otọrakpọ na fiotọ, o mi chiyon muotọ je ghwọrọ. 24 Vwọ kpahen idjo ihwe na, ivie ihwe che nẹ uvie yena rhe; ọfa me rha vwọ kpahen ayen, ọ cha fẹnẹ e rẹsosuọ na, ọ me phọphọ ivie erha. 25 Ọ cha ta eta vwọso Ọ ro Me Kpenu na, o ji che kpokpo ihwo efuanfon rẹ Ọ ro Me Kpenu na ọkieje. O che vwo ẹwẹn ro vwo wene ọke kugbe urhi, ke che phi ayen phiyọ obọ rọyen vwẹ ọke ọvo, ọke ivẹ, kugbe ubrọke.* 26 Ẹkẹvuọvo Aguare na de chidia, ayen da reyọ usuon rọyen mie rere a sa vwọ guọghọ je ghwọrọ totọ karekare.

27 “‘A da vwẹ uvie na vẹ usuon na kugbe ọrho rẹ uvie sansan rehẹ otọ rẹ idjuvwu na eje vwọ kẹ ihwo re dia ihwo efuanfon rẹ Ọ ro Me Kpenu na. Uvie rayen ọyen uvie ri bẹdẹ, usuon eje che gbodibo kẹ ayen ji muọghọ kẹ ayen.’

28 “Ọnana yen oba rẹ ota na. Vwọ kẹ vwẹ ri Daniẹl, iroro mẹ djoshọ mu vwe gangan, oma mẹ de wene; ẹkẹvuọvo mi phi ota na phiyọ ubiudu mẹ.”

8 Vwẹ ukpe rerha rẹ usuon rẹ Ovie Bẹlshaza, mẹvwẹ ri Daniẹl da mrẹ emramrẹ ọfa ọke me vwọ mrẹ ọ ri jovwo na nu. 2 Me mrẹ emramrẹ na, mi vwo nẹ me da mrẹ nẹ me hẹ Shushan,* asan ra gbogba riariẹ phiyọ* rọhẹ ubrakpọ rẹ Ilam; vwevunrẹ emramrẹ na, mi mudia kẹrẹ ame ri Yulai. 3 Me vwọ kpare ẹro mẹ kpenu, nighere! me da mrẹ egbon ọvo ro mudia obaro rẹ ame na, o vwo idjo ivẹ. Idjo ivẹ na pha grongron. Ẹkẹvuọvo ọvo gron vrẹ ọvo, ọ ro me gron na yen djẹ rhe kuko. 4 Me da mrẹ egbon na rọ họrhọ kpo ẹbẹre ọnre shera vẹ obohwẹre ọnre na, kugbe obọrhen ọnre na, o vwo eranvwe rẹ aghwa vuọvo ro se mudia vwọsuọọ, o ji vwo ohwo vuọvo ro se sivwin ayen nẹ ogangan* rọyeen. O de ru obo ri jere je kpare oma rọyen kpenu.

5 Mi ji vwo nẹ na, nighere! me da mrẹ okri* ọvo ro nẹ ẹbẹre ọnre shera na cha, ọ da wan otọrakpọ na eje vrẹ jẹ awọ rọyen totọọ. Okri na vwo idjo ọvo rọ nabọ teyenphia vwẹ uvwre rẹ ibiẹro rọyen. 6 O brẹ egbon ro vwo idjo ivẹ na ra, egbon re me mrẹre ro mudia obaro rẹ ame na; ọ djẹ bro ra vẹ ophu ọgangan.

7 Me da mrẹ nẹ o sikẹrẹ egbon na mamọ re, o ji muophu gangan fiki rọyen. O de dje egbon na she ji vwirhin idjo rọyen ivẹ na, egbon na vwo ẹgba ro se vwo nene họnree. O genre egbon na she ji chiyon muotọ, o vwo ohwo vuọvo ro se sivwon nẹ ogangan* rọyeen.

8 Okri na da kpare oma rọyen kpenu gangan, ẹkẹvuọvo ugege ro vwo vwo ẹgba re, idjo rode na de vwirhin; ẹne efa re nabọ teyenphia da djẹ rhe vwẹ ẹdia rẹ ọvo yena, ayen hirhe opharo ku odju ẹne rẹ idjuvwu na.

9 Idjo ọfa rọ dia ọ rẹ otete da djẹ nẹ evunrẹ ọvo vwẹ usun rayen rhe, ọ da rhe rho gangan ji hirhe opharo ku obọrhen ọnre na, ẹbẹre ọnre va nẹcha, kugbe Otọ Oyoyovwin* na. 10 Ọ rhoro gangan te ẹdia ro de kpenu re te otuofovwin rẹ idjuvwu na, ọ da nẹrhẹ evo vwẹ usun rẹ otuofovwin na kugbe evo vwẹ usun rẹ isio na she rhe otọrakpọ na, o de chiyin ayen muotọ. 11 Ọ tobọ kpare oma rọyen kpenu vwọso Osun rẹ otuofovwin na, a da reyọ izobo ri kọke kọke na mie Osun na, a da je ghwọrọ asan ọfuanfon rọyen re vwo vi kokoroko na totọ. 12 A da vwẹ otuofovwin vẹ izobo ri kọke kọke na vwọ kẹ fikirẹ urhiẹchọ; ko genre uyota cha otọrakpọ na, o de ru obo ri jere ji phikparobọ.

13 Mi de nyo ohwo ọfuanfon ọvo rọ ta ota, ohwo ọfuanfon ọfa da ta kẹ ọ rọ ta ota na: “Mavọ yen emramrẹ rẹ izobo ri kọke kọke na vẹ ọ rẹ urhiẹchọ rọ sua oghwọrọ na kugbe emramrẹ rẹ asan ọfuanfon na vẹ otuofovwin re che chiyin muotọ na che kri te?” 14 Ọ da ta kẹ vwẹ: “Bẹsiẹ rẹ ovwọnvwọn vẹ urhiọke 2,300 vwọ wan; o vwo obo rọ wanree, asan ọfuanfon na ko che rhivwin kpo obo rọ hepha jovwo.”

15 Ọke rẹ omẹvwẹ ri Daniẹl vwo nẹ vwevunrẹ emramrẹ na je guọnọ oborẹ mi se vwo vwo ẹruọ rọyen, siẹvuọvo na me da mrẹ ohwo ọvo rọ họhọ ohworakpọ ro mudia obaro mẹ. 16 Mi de nyo urhuru rẹ ohwo ọvo vwẹ ohri rẹ ame ri Yulai na, o de kperi phia: “Gebrẹl, cha ohwo yena uko vwo vwo ẹruọ rẹ obo rọ mrẹre na.” 17 Ọtiọyena o de sikẹrẹ asan ri mi mudia na, ẹkẹvuọvo ọke rọ vwọ yanrhe, oshọ de mu vwe mamọ te asan ri mi de she bọvwọn opharo rhuotọ. Ọ da ta kẹ vwẹ: “Ọmọ rẹ ohwo, noso nẹ emramrẹ na shekpahen ọke rẹ oba na.” 18 Ẹkẹvuọvo ro ji vwo nene uvwe ta ota na, ovwerhẹn okokodo de mu vwe yanran je me bọvwọn opharo mẹ rhuotọ. Ọtiọyena o de djobọte vwe je reyọ ovwẹ vwo mudia asan ri mi mudia jovwo na. 19 Etiyin ọ da ta: “Me cha nẹrhẹ wọ riẹn obo re cha phia vwẹ okuphiyọ rẹ ẹdjọeguo na kidie o shekpahen ọke re bruphiyọ rọ dia ọke rẹ oba na.

20 “Egbon ru wọ mrẹre ro vwo idjo ivẹ na mudiaphiyọ ivie ri Midia kugbe Pẹsha. 21 Okri ro vwo ẹton na mudiaphiyọ ovie ri Gris; idjo rode rọhẹ uvwre rẹ ibiẹro rọyen na mudiaphiyọ ovie rẹsosuọ na. 22 Vwọ kpahen idjo ro vwirhirin rẹ ẹne efa da djẹ rhe vwẹ ẹdia rọyen na, uvie ẹne cha vwomaphia vwo nẹ ẹgborho rọyen rhe, ẹkẹvuọvo ayen che vwo ẹgba tee.

23 “Vwẹ okuphiyọ rẹ uvie rayen, ihwo ri churhi na de ru ẹkẹn rayen gba re, ovie ọvo rọ djoma ro vwo ẹruọ rẹ eta re chahenre kọ cha vwomaphia. 24 O che vwo ẹgba mamọ, ẹkẹvuọvo ọ dia womarẹ ẹgba romobọ rọyeen. Ọ cha so oghwọrọ vwẹ idjerhe ra mrẹ vwo djee, o che phikparobọ, ona rọyen je cha wian. Ọ cha ghwọrọ ihwo ri vwo ẹgba kugbe ihwo re dia ihwo efuanfon na. 25 O che hworo ona rẹ ophiẹnvwe vwo phikparobọ; omaẹkparọ je cha dia ubiudu rọyen; ọ je cha ghwọrọ ihwo buebun vwẹ ọke rẹ ofuvwegbe.* Ọ cha tobọ họnre vwọso Osun rẹ isun na, ẹkẹvuọvo o che vwirhin, jẹ ọ dia obọ rẹ ohworakpọ yen che vwirhoon.

26 “Obo ra tare vwẹ emramrẹ na kpahen ovwọnvwọn kugbe urhiọke na uyota, ẹkẹvuọvo wọ me djahen emramrẹ na kidie o shekpahen ọke rọ cha, ẹdẹ buebun da wan nu.

27 Vwọ kẹ vwẹ ri Daniẹl, oma ghwọrọ ovwẹ, me da je muọga vwẹ ẹdẹ ibro. Ọyena vwọ wan nu, mi de vren re ruiruo rẹ ovie na; ẹkẹvuọvo ẹwẹn mẹ ejobi yanghanre fikirẹ obo re me mrẹre na, o vwo ohwo vuọvo ro se vwo ẹruọ rọyeen.

9 Vwẹ ukpe rẹsosuọ ri Derayọs ọmọ rẹ Ahasuirọs—ohwo ri Midia re vwo mu ovie vwẹ uvie rẹ ihwo ri Kaldia— 2 vwẹ ukpe rẹsosuọ rẹ usuon rọyen, mẹvwẹ ri Daniẹl da womarẹ ẹbe na* vwọ riẹn uche ikpe re djunute vwẹ ota rẹ Jihova ta kẹ Jerimaya ọmraro na, uche ikpe rẹ Jerusalẹm cha dia ẹdia rẹ oghwọrọ kri te, kọyen ẹgbukpe 70. 3 Ọtiọyena mi de hirhe opharo ku Jihova Ọghẹnẹ rẹ uyota na, ke me rẹ vwẹ ẹrhovwo vẹ owẹnvwe echiro, emwa rẹ esiso kugbe iwurhie. 4 Me nẹrhovwo rhe Jihova Ọghẹnẹ mẹ, me da fan imwemwu kẹ, me vwọ ta:

“E Jihova Ọghẹnẹ rẹ uyota na, Ohwo rode rọ vọnre vẹ udidi, rọ sẹro rẹ ọphọ rọyen ji dje ẹguọnọ ro jẹ rhẹriẹ kẹ ihwo ri vwo ẹguọnọ rọyen ri ji nene iji rọyen, 5 avwanre ru umwemwu, avwanre ru chọ, avwanre ru obo re brare, avwanre ji gbe vwọso owẹ; avwanre chukoku iji wẹn kugbe orhiẹn-ebro wẹn. 6 Avwanre kerhọ rẹ idibo wẹn re dia emraro naa, ihwo re vwẹ odẹ wẹn vwọ ta ota kẹ ivie rẹ avwanre, isun rẹ avwanre, esẹ rẹ avwanre ride, kugbe ihwo rẹ otọ na eje. 7 Ophiọnphiọn ọwẹn, E Jihova, ẹkẹvuọvo avwanre yen vwo omavovwẹ na kirobo rọ hepha nonẹna, oma vua ihwo ri Juda, ihwo re dia Jerusalẹm, kugbe Izrẹl eje, te e re kẹrẹre vẹ i ri sherabọ vwẹ otọ na eje ru wọ hra ayen ra na, kidie ayen fuevun kẹ wẹẹ.

8 “E Jihova, avwanre yen vwo omavovwẹ na, oma vua ivie rẹ avwanre, isun rẹ avwanre, kugbe esẹ rẹ avwanre ride, kidie avwanre ru umwemwu vwọso owẹ. 9 Jihova Ọghẹnẹ rẹ avwanre yen che gbe arodọnvwẹ kẹ avwanre ji vwo ghovwo avwanre, kidie avwanre gbe vwọsuọ. 10 Avwanre nyupho ri Jihova Ọghẹnẹ rẹ avwanree, kidie avwanre nene irhi rọyen rọ vwọ kẹ avwanre womarẹ idibo rọyen re dia emraro naa. 11 Izrẹl ejobi gbe Urhi wẹn ku ji chukokuo kidie ayen nyupho wẹẹn, wo de ku ekan vẹ iyorin re si kpahen vwẹ Urhi ri Mosis odibo rẹ Ọghẹnẹ rẹ uyota na ku avwanre, kidie avwanre ru umwemwu so owẹ. 12 O ru nene eta rọyen rọ ta kpahen avwanre vẹ isun ri suẹn avwanre,* rọ vwọ reyọ okpetu rode nana bru avwanre rhe; obo ro ruru vwẹ Jerusalẹm na, a je rhe mrẹ ọkpọ rọyen vwẹ otọ rẹ idjuvwu na eje dẹvoo. 13 Kirobo re siro vwẹ Urhi ri Mosis, okpetu nana eje bru avwanre rhire, dedena avwanre rẹ Jihova Ọghẹnẹ rẹ avwanre nẹ o dje ẹroesiri kẹ avwanree, kidie avwanre kuobọrhẹriẹ nẹ oruchọ rẹ avwanre ji djephia nẹ avwanre vwo ẹruọ rẹ uyota* wẹẹn.

14 “Ọtiọyena Jihova ko nẹ avwanre, ọ da hwarhiẹ okpetu bru avwanre rhe, kidie Jihova Ọghẹnẹ rẹ avwanre na ọvwata vwẹ iruo rọyen eje ro ruru; dedena avwanre nyupho rọyeen.

15 “Asaọkiephana, E Jihova Ọghẹnẹ rẹ avwanre, Wẹwẹ rọ reyọ ihwo wẹn nẹ otọ rẹ Ijipt rhe vẹ obọ ọgangan, rọ je nẹrhẹ ihwo riẹn odẹ wẹn rhi te nonẹna, avwanre ru umwemwu ji ru obo re brare. 16 E Jihova, vwo nene irueru rẹ ọsoso wẹn eje, biko jẹ ophu wẹn vẹ ivun emiovwo wẹn vrẹn nẹ orere wẹn Jerusalẹm, ugbenu ọfuanfon wẹn na; kidie fikirẹ umwemwu rẹ avwanre kugbe oruchọ rẹ esẹ rẹ avwanre ride, Jerusalẹm vẹ ihwo wẹn rhe dia orọnvwọn ra vwọ jehwẹ vwọ kẹ ihwo eje re riariẹ avwanre phiyọ re. 17 Asaọkiephana, E Ọghẹnẹ rẹ avwanre, kerhọ rẹ ẹrhovwo rẹ odibo wẹn kugbe oyare rọyen rere wọ nẹrhẹ opharo wẹn lo mu asan ọfuanfon wẹn rọ ghwọrọ totọ na, fikirẹ odẹ wẹn, E Jihova. 18 Rhie erhọ wẹn phiyọ rere wo nyo, E Ọghẹnẹ mẹ! Rhie ẹro wẹn phiyọ rere wọ mrẹ ẹdia rẹ oghwọrọ rẹ avwanre hepha kugbe orere ra vwẹ odẹ wẹn vwo se na; kidie ọ dia avwanre rẹ wẹ fikirẹ irueru rẹ ophiọnphiọn rẹ avwanree, ẹkẹvuọvo fikirẹ arodọnvwẹ rode wẹn. 19 E Jihova, kerhọ rẹ avwanre, E Jihova, vwo ghovwo avwanre. E Jihova, davwerhọ rẹ avwanre rere wo sivwin avwanre! Wo hwọkee fikirẹ odẹ wẹn, E Ọghẹnẹ mẹ, kidie a vwẹ odẹ wẹn vwo se orere wẹn kugbe ihwo wẹn.”

20 Me je vwọ ta ota, nẹrhovwo, fan imwemwu mẹ vẹ imwemwu rẹ ihwo mẹ Izrẹl, je yara ẹroesiri vwẹ obaro ri Jihova Ọghẹnẹ mẹ fikirẹ ugbenu ọfuanfon rẹ Ọghẹnẹ mẹ na, 21 e, re me je vwọ ta ota vwẹ ẹrhovwo mẹ na, ọshare na Gebrẹl re me mrẹre vwẹ emramrẹ na jovwo, de bru vwe rhe ọke rẹ oma vwọ ghwọrọ ovwẹ mamọ vwẹ omarẹ ovwọnvwọn ọke ra vwọ vwẹ okẹ vwọ kpahotọ kẹ Ọghẹnẹ. 22 Ọ da nẹrhẹ mi vwo ẹruọ, rọ vwọ ta:

“E Daniẹl, me rhere asaọkiephana me vwọ nẹrhẹ wo vwo ẹruọ vẹ ọmrẹvughe. 23 Ọke wọ vwọ tuẹn oyare wẹn phiyọ, a da ta ota na phia, me rhere rhe niyẹnrẹn rọyen kẹ wẹ, kidie wẹwẹ ohwo rọ pha ghanghanre mamọ. Ọtiọyena gbe roro kpahen ota na rere wo ji vwo ẹruọ rẹ emramrẹ na.

24 “E brorhiẹn rẹ idughwrẹn* 70 vwọ kẹ ihwo wẹn kugbe orere ọfuanfon wẹn na, rere e se vwo phioba phiyọ urhiẹchọ na, si umwemwu no, ji ru arhuẹrẹ vwọ kẹ oruchọ, rere a sa vwọ hwarhiẹ ophiọnphiọn ri bẹdẹ rhe, vwẹ utẹ vwo te emramrẹ vẹ aroẹmrẹ* na, je vwẹ evwri vwo ghworo Ọfuanfon rẹ Efuanfon na.* 25 Wọ me riẹn ji vwo ẹruọ rọyen nẹ vwo nẹ ọke ra vwọ ta ota na nẹ a reyọ Jerusalẹm rhivwin kpo obo rọ hepha jovwo je rhoma bọn, re te ọke rẹ Mesaya* na rọ dia osun na cha vwọ rhe, a cha mrẹ idughwrẹn 7, kugbe idughwrẹn 62. Ka cha reyọ kpo obo rọ hepha jovwo je rhoma bọn vẹ ọsuorere kugbe ọgọdọ ra tọn riariẹ phiyọ, ẹkẹvuọvo e che ruo vwẹ ọke rẹ ukpokpogho.

26 “Idughwrẹn 62 na da wan nu, ke che bru Mesaya na no,* o che vwo orọnvwọn vuọvo kẹ oma rọyeen.

“Ihwo rehẹ otọ rẹ osun ọvo rọ cha, cha ghwọrọ orere na kugbe asan ọfuanfon na. Oghwe na kọyen e che vwo phioba phiyọ. E che phi ofovwin bẹsiẹ oba na cha vwọ rhe; oghwọrọ yen orhiẹn re bruru.

27 “Ọ cha nẹrhẹ ọphọ na dia vwọ kẹ ihwo buebun vwẹ udughwrẹn ọvo; vwẹ uherevie rẹ udughwrẹn na, kọ cha nẹrhẹ izobo vẹ okẹ dobọji.

“Ọ rọ sua oghwọrọ na cha dia ibekpe rẹ erọnvwọn ri tuoma; bẹsiẹ ọke rẹ oghwọrọ na vwo te, ke ji che ku ophu re brorhiẹn rọyen kpahọn na ku ọ rọhẹ ẹdia rẹ oghwọrọ na.”

10 Vwẹ ukpe rerha rẹ Ovie Sairọs ri Pẹsha, a da vwẹ ẹvwọphia ọvo vwọ kẹ Daniẹl, ohwo re se Bẹltẹshaza; ovuẹ na uyota, o shekpahen ohọnre ọgangan ọvo. O vwo ẹruọ rẹ ovuẹ na, a je cha uko vwo vwo ẹruọ rẹ obo rọ mrẹre.

2 Vwẹ ọke yena, jẹ omẹvwẹ ri Daniẹl vwere uvweri vwẹ idughwrẹn erha soso re. 3 Me re omamọ rẹ emuu, me re eranvwe yẹrẹ da iwainii, me je vwẹ ori vuọvo vwo ghworo oma mẹ vwẹ idughwrẹn erha sosoo. 4 Vwẹ ẹdẹ 24 rẹ emeranvwe rẹsosuọ na, ọke me vwọ hẹ orhoma rẹ urhie rode re se Taigris,* 5 me vwọ kpare opharo, me da mrẹ ọshare ọvo ro ku ewun ri linẹn phiyọ, rọ vwẹ umuehun rẹ oro ri Yufaz vwo mu ehun. 6 Ugboma rọyen pha kerẹ krisolaiti, opharo rọyen pha kerẹ enu rọ nyavwaro, ẹro rọyen pha kerẹ ibiurhe re la, igbabọ vẹ igbawọ rọyen họhọ ẹrovwo ro lo, eta rọyen mra kerẹ edo rẹ otu buebun. 7 Mẹvwẹ ri Daniẹl ọvo yen mrẹ emramrẹ na, eshare re vẹ ovwẹ gba herọ mrẹ emramrẹ naa. Ẹkẹvuọvo oshọ mu ayen gangan, ayen da djẹ re siomanu.

8 Mẹvwẹ ọvo kọyen hẹ etiyin, ọke me vwọ mrẹ emramrẹ rode nana, ẹgba vuọvo rhe rhe vwee, opharo mẹ de wene mamọ, ogangan mẹ eje de ji nuvwe oma. 9 Ọshare na kọ ta ota; ọke mi vwo nyo ota rọyen, ovwerhẹn okokodo de mu vwe yanran je me bọvwọn opharo mẹ rhuotọ. 10 Obọ ọvo de te vwe oma, o de kpogho uvwe vrẹn, jẹ abọ vẹ igbon mẹ jehẹ otọ. 11 Etiyin ọ da ta kẹ vwẹ:

“E Daniẹl, wẹwẹ rọ dia ọshare rọ pha ghanghanre mamọ na, kerhọ rẹ eta re me cha vuẹ wẹ na. Asaọkiephana vrẹn mudia vwẹ asan wọ hepha na, kidie e ji vwe bru we rhe.”

Ọke rọ vwọ vuẹ vwẹ ọnana nu, mi de vrẹn, je me phariẹ.

12 Ọ da ta kẹ vwẹ: “Wọ djoshọọ, E Daniẹl. E nyo eta wẹn vwo nẹ ẹdẹ rẹsosuọ wo vwo rhie ubiudu wẹn phiyọ vwọ kẹ ẹruọ, je vwomakpotọ vwẹ obaro rẹ Ọghẹnẹ wẹn, me rhere fikirẹ eta wẹn na. 13 Ẹkẹvuọvo osun rẹ uvie ri Pẹsha de mudia vwọso ovwẹ vwẹ ẹdẹ 21. Maikẹl* rọ dia ọvo usun rẹ isun rehẹ ẹdia ri me kpenu da rhe cha vwẹ uko; me da dia etiyin kẹrẹ ivie ri Pẹsha. 14 Me rhere rhe cha wẹ uko vwo vwo ẹruọ rẹ obo re cha phia kẹ ihwo wẹn vwẹ oba rẹ ẹdẹ na, kidie ọyen aroẹmrẹ ro shekpahen ẹdẹ re cha vwẹ obaro na.”

15 Ọke rọ vwọ ta eta nana kẹ vwẹ nu, mi de gbe opharo phiyotọ, me rha sa ta otaa. 16 Etiyin ohwo ọvo rọ họhọ ohworakpọ de djobọte ẹbẹrunu mẹ, mi de rhie unu phiyọ, me da ta kẹ ohwo ro mudia obaro mẹ na: “Ọrovwovwe, me phariẹ fikirẹ emramrẹ na, mi vwo ẹgbaa. 17 Ọtiọyena kẹ mavọ yen odibo rẹ ọrovwovwe se vwo nene ọrovwovwe ta ota? Kidie asaọkiephana, mi vwo ẹgbaa, ẹwẹn vuọvo rha hẹ oma mẹẹ.”

18 Ọ rọ họhọ ohworakpọ na da rhoma djobọte vwe, ọ da kẹ vwẹ ẹgba. 19 Ọ da ta: “Wo jẹ oshọ mu wee, E ọshare rọ pha ghanghanre mamọ na. E jẹ ufuoma nene uwe dia. Goma, e, goma.” Ọke rọ vẹ ovwẹ vwọ ta ota na, mi de rhi vwo ẹgba, me da ta: “E jẹ ọrovwovwe ta ota, kidie wọ kẹ vwẹ ẹgba re.”

20 Ọ da ta: “Wọ riẹn oboresorọ mi vwo bru we rhe? Asaọkiephana mi che rhivwin re nene osun ri Pẹsha họnre. Ọke me da yanran nu, osun ri Gris kọ cha rhe. 21 Ẹkẹvuọvo me cha vuẹ wẹ erọnvwọn re si phiyọ isiesi rẹ uyota na. O vwo ohwo vuọvo ro biẹcha vwẹ vwẹ erọnvwọn nanaa, jokparẹ Maikẹl rọ dia osun rẹ ovwan na.

11 “Vwọ kẹ vwẹ, vwẹ ukpe rẹsosuọ ri Derayọs ohwo ri Midia, mi de vrẹn ra bọn gan je sẹro rọyen.* 2 Oborẹ me cha vuẹ wẹ enẹna uyota:

“Nighere! Ivie erha efa cha vwomaphia* vwẹ Pẹsha, ọrẹne rọyen che koko efe buebun vwọ vrẹ i ri chekọ eje. O de rhi vwo ẹgba fikirẹ efe rọyen na re, kọ cha kpare kemu kemu vwọso uvie ri Gris.

3 “Ovie ọvo ro vwo ẹgba cha vwomaphia, ko che sun ẹkuotọ buebun ji ru obo ri jere. 4 Ẹkẹvuọvo ọke ro de mudia re, uvie rọyen ko che vwirhin, ka cha gharọ nene odju ẹne rẹ idjuvwu na, ẹkẹvuọvo ọ dia emọ rọyen yen a cha gharọ kẹẹ, o ji che vwo ẹgba kerẹ ọke ro vwo suoon; kidie e che ghwie uvie rọyen, a me je vwọ kẹ ihwo efa ukperẹ enana.

5 “Ovie rẹ obọrhen ọnre na ko che rhi vwo ẹgba, kọyen ọvo vwẹ usun rẹ isun rọyen; ẹkẹvuọvo ohwo ọvo che phio kparobọ o mi sun vẹ ẹgba rode rọ vrẹ ẹgba rẹ ọ ro chekọ na.

6 “Ikpe evo da wan nu, kẹ ayen che vwo obọechuro, ọmọtẹ rẹ ovie rẹ obọrhen ọnre na ko che bru ovie rẹ obohwẹre ọnre na ra rere ayen se vwo vwo ọrhuẹrẹphiyotọ.* Ọmọtẹ na rhe che vwo ẹgba robọ rọyeen; ovie na ji che se mudia yẹrẹ vwo ẹgba robọ rọyeen; ke che siobọnu ọmọtẹ na, te te ihwo re reyerọ rhe, te ohwo ro vwiẹ rẹ, kugbe ihwo re kẹ ẹgba vwẹ ọke yena. 7 Ohwo rẹ orua rẹ ọmọtẹ na ọvo che sun vwẹ ẹdia rẹ ovie na, ko che bru otuofovwin na ra je họnre vwọso ogba ọgangan rẹ ovie rẹ obohwẹre ọnre na, ọ cha họnre vwọso ayen ji phikparobọ. 8 O ji che mu eghẹnẹ rayen, ema rẹ utehru rayen,* ekuakua iyoyovwin rayen rẹ idọnọ efuanfon vẹ iro kugbe ivie rayen rhivwin kpo Ijipt. Ọ cha kẹnoma kẹ ovie rẹ obohwẹre ọnre na vwẹ ikpe evo, 9 ovie rẹ obohwẹre ọnre na cha vwọso uvie rẹ ovie rẹ obọrhen ọnre na, ẹkẹvuọvo o che rhivwin kpo otọ robọ rọyen.

10 “Vwọ kẹ emọ* rọyen, ayen che muegbe vwọ kẹ ofovwin ji koko otuofovwin buebun. Ọ cha rhe ji hwerhe erọnvwọn ejobi yanran kerẹ oghwe. Ẹkẹvuọvo o che rhivwin, o mi phi ofovwin rhirin bẹsiẹ ro vwo te ogba ọgangan rọyen.

11 “Ophu ko che mu ovie rẹ obọrhen ọnre na, ko che re nene ovie rẹ obohwẹre ọnre na họnre; ko* che koko otu buebun, ẹkẹvuọvo e che phi otu na phiyọ obọ rẹ ovie yena.* 12 O mi mu otu na yanran. Omaephuo kọ cha ro ubiudu rọyen, kọ cha nẹrhẹ uriorin ihwe buebun she; ẹkẹvuọvo ọ cha reyọ ophikparobọ rode rọyen na vwo ru emu vuọvoo.

13 “Ovie rẹ obohwẹre ọnre na ko che rhivwin rhe, o mi koko otu ro bun vrẹ ọrẹsosuọ na; vwẹ oba rẹ ọke na, ikpe evo da wan nu, kọ cha ghene rhe vẹ otuofovwin rode kugbe ekuakua buebun. 14 Vwẹ ọke yena, ihwo buebun che vrẹn vwọso ovie rẹ obọrhen ọnre na.

“A cha riẹriẹ otu ri gbozighi* vwẹ ohri rẹ ihwo wẹn rere ayen davwẹngba vwo ru orugba rẹ emramrẹ ọvo; ẹkẹvuọvo ayen che she.

15 “Ovie rẹ obohwẹre ọnre na cha rhe, ọ me gba riariẹ orere ọvo ra gbogba riariẹ phiyọ ji phio kparobọ. Ituofovwin rẹ obọrhen ọnre na che se mudia vwọsuọọ, yẹrẹ kẹ isodje rọyen ri me vwo ẹgbaa; ayen che vwo ẹgba rẹ ayen vwọ họnre vwọsuọọ. 16 Ọ rọ cha rhe vwọsuọ na che ru obo ri jere, o vwo ohwo vuọvo ro se mudia obaro rọyeen. O che mudia Otọ Oyoyovwin* na, ẹgba rọ vwọ so oghwọrọ cha dia obọ rọyen. 17 O che brorhiẹn rọ vwọ rhe vẹ ogangan rẹ uvie rọyen eje, ke che nene vwo ọrhuẹrẹphiyotọ; o mi ru obo rọ guọnọre. Vwọ kpahen ọmọtẹ rẹ eya na, a cha rhọnvwe kẹ nẹ ọ so oghwọrọ kẹ. Ọmọtẹ na che se mudiaa, ọ je cha fuevun kẹ ovie na ọfaa. 18 Ovie na che rhivwin re nene ihwo re dia orhoma rẹ urhie na họnre, o mi phi etọ buebun kparobọ. Osun ọvo ko che phioba phiyọ aroeyinvwo rọyen, rere aroeyinvwo rọyen na vwọ dobọji. Ọ cha nẹrhẹ aroeyinvwo rọyen na she hwe. 19 Ọyena da wan nu, ko che hirhe opharo ku irere ra gbogba riariẹ phiyọ rehẹ otọ rọyen, ọ me kprowọ ji she, a rha cha mrẹ ọfaa.

20 “Ohwo ọvo kọ cha reyọ ẹdia rọyen, ohwo rọ cha nẹrhẹ ọ rọ vwẹ ẹgba vwọ reyọ orọnvwọn* wan uvie oyoyovwin na, ẹkẹvuọvo ẹdẹ evo da wan nu, ko che vwirhin, jẹ ọ dia womarẹ ophu yẹrẹ ofovwiin.

21 “Ohwo ọvo ra jẹfia kọ cha reyọ ẹdia rọyen, a cha vwẹ ọrho rẹ uvie na vwọ kẹẹ; ọ cha rhe vwẹ uvwre rẹ ọke rẹ ofuvwegbe,* ọ me reyọ uvie na womarẹ oriẹriẹvwe.* 22 O che phi ituofovwin ri vwo ẹgba kerẹ oghwe kparobọ, kẹ ayen che vwirhin kirobo rẹ Osun rẹ ọphọ na ji che vwirhin. 23 Fikirẹ obọechuro re nenire ru na, kọ cha rha phiẹn ihwo, ọ me ro ẹdia rẹ usuon ji vwo ẹgba womarẹ ẹgborho ro tumukuu. 24 Ọ cha ro ẹbẹre ri me fe vwẹ ubrotọ na vwẹ ọke rẹ ofuvwegbe* ji ru oborẹ esẹ rọyen kugbe esẹ rayen ruruu. O mi gborho ekuakua je ghare ayen vwẹ ohri rayen; ọ cha jiroro rẹ umiovwo vwọso asan ra gbogba riariẹ phiyọ, ẹkẹvuọvo vwẹ uvwre rẹ ọke ọvo.

25 “Ọ cha rhanre oma vi ji muegbe rẹ ubiudu rọyen vẹ otuofovwin buebun vwọso ovie rẹ obọrhen ọnre na, ovie rẹ obọrhen ọnre na ko che muegbe rẹ oma rọyen vwọ kẹ ofovwin vẹ otuofovwin buebun ro ji vwo ẹgba mamọ. Ẹkẹvuọvo o che se mudiaa, kidie ayen cha jiroro rẹ umiovwo vwọsuọ. 26 Ihwo re ria udemu rọyen cha so eshe kẹ.

“Vwọ kẹ otuofovwin rọyen, e che hwerhe ayen kufia, e ji che hwe ihwo buebun.

27 “Vwọ kpahen ivie ivẹ nana, ubiudu rayen che mu ayen vwo ru obo re brare, ayen che chidia imẹjẹ ọvo, jẹ ayen guẹn efian kẹ ohwohwo. Ẹkẹvuọvo o vwo emu vuọvo rẹ ayen ruẹ ro che phikparobọọ, kidie oba na cha rhe vwẹ ọke re bruphiyọ.

28 “Ko che rhivwin kpo otọ rọyen vẹ ekuakua buebun, ubiudu rọyen cha vwọso ọphọ ọfuanfon na. Ko che ru obo rọ guọnọre ji rhivwin kpo otọ rọyen.

29 “O che rhivwin rhe vwẹ ọke re bruphiyọ na ra họnre vwọso obọrhen ọnre na. Ẹkẹvuọvo ọ rẹ udje nana cha dia kerẹ ọ ri jovwoo, 30 kidie ikuna ri Kitim cha rhe vwọsuọ, kẹ ayen cha phọphọ.

“O che rhivwin re muophu kpahen ọphọ ọfuanfon na ji ru obo rọ guọnọre; o mi rhivwin re dje ẹroesiri kẹ ihwo re yanjẹ ọphọ ọfuanfon na vwo. 31 Ituofovwin rọyen ke cha rhe, kẹ ayen che gbe asan ọfuanfon na ro vwo igbẹhẹ ọgangan na ẹgua, ayen mi ji si izobo ri kọke kọke na no.

“Kẹ ayen che phi emu rẹ ẹgua rọ sua oghwọrọ na phiyọ ẹdia.

32 “Ọ cha vwẹ eta rẹ ophiẹnvwe vwọ riẹriẹ ihwo ri ruẹ umwemwu vwọsua ọphọ na vwo gbe vwọso Ọghẹnẹ. Ẹkẹvuọvo ihwo re riẹn Ọghẹnẹ rayen che phikparobọ ji ru oborẹ ayen guọnọre. 33 Otu ri vwo ọhọ vwẹ usun rẹ ihwo na ke cha nẹrhẹ ihwo buebun vwo ẹruọ. A cha nẹrhẹ ayen she womarẹ ọlọkọ vẹ erhanre, womarẹ emuo re che mu ayen kugbe ekuakua rayen re che gborho vwẹ ẹdẹ evo. 34 Ẹkẹvuọvo ọke rẹ ayen da kprowọ re, ka cha vwẹ umukẹcha vwọ kẹ ayen; ihwo buebun ke cha vwẹ eta rẹ ophiẹnvwe vwo bicha ayen. 35 A cha nẹrhẹ evo vwẹ usun rẹ ihwo ri vwo ọhọ kprowọ, rere e se vwo ru ihwo fon fiki rayen, ihwo na ke cha dia fuanfon je vrabọ rẹ upe bẹsiẹ ọke rẹ oba na vwo te; kidie ọ cha rhe vwẹ ọke re bruphiyọ na.

36 “Ovie na che ru obo ri jere, o che phuoma je kpare oma rọyen kpenu vwọ vrẹ eghẹnẹ eje; ọ cha ta eta ri gbe ohwo unu vwọso Ọghẹnẹ rẹ eghẹnẹ na. O che phikparobọ bẹsiẹ ophu na vwo vwoba, kidie obo re brorhiẹn rọyen nure che jẹ phiaa. 37 O che muọghọ kẹ Ọghẹnẹ rẹ esẹ rọyeen; ọ je cha davwerhọ rẹ ojevwe rẹ eya yẹrẹ kẹ ọ rẹ eghẹnẹ efaa, ẹkẹvuọvo ọ cha kpare oma rọyen kpenu vwọ vrẹ kohwo kohwo. 38 Ẹkẹvuọvo ọ cha vwẹ urinrin vwọ kẹ ọghẹnẹ rẹ ogba egangan; ọ cha vwẹ iro, idọnọ efuanfon, ibieragha eghanghanre, kugbe erọnvwọn iyoyovwin vwọ vwẹ urinrin vwọ kẹ ọghẹnẹ rẹ esẹ rọyen jẹriẹn. 39 O che ru obo rọ guọnọre vwọso irere rẹ ogba rayen ma gan kparobọ womarẹ ukẹcha rẹ ọghẹnẹ ọrhorha. Ọ cha vwẹ urinrin rode vwọ kẹ ihwo ri brọghọ phiyọ oma je nẹrhẹ ayen sun vwẹ ohri rẹ ihwo buebun; ọ me je ghare otọ na vwọ kẹ kohwo kohwo rọ hwosa kẹ.

40 “Vwẹ ọke rẹ oba na, ọ vẹ ovie rẹ obọrhen ọnre na che genre ohwohwo,* ovie rẹ obohwẹre ọnre na kọ cha rhe vwọsuọ vẹ ekpẹrẹ kugbe eshare re gua iyesi, vẹ ikuna buebun; kọ cha ro etọ na ji hwerhe ayen yanran kerẹ oghwe. 41 Ọ je cha ro Otọ Oyoyovwin* na ji phi etọ buebun kparobọ. Ẹkẹvuọvo enana yen e re cha vabọ rọyen: Idọm kugbe Moab vẹ ẹbẹre rọ ma ghanre rẹ ihwo rẹ Amọn. 42 Ọ je cha rha riẹn obọ rọyen phia vwọsua etọ na; otọ rẹ Ijipt cha vabọọ. 43 O che sun efe re sinu na, e rẹ iro, idọnọ efuanfon, kugbe erọnvwọn iyoyovwin eje rẹ Ijipt. Ihwo ri Libia kugbe ihwo rẹ Itiopia ki che nene.

44 “Ẹkẹvuọvo iyẹnrẹn ri nẹ ẹbẹre rẹ ọnre va nẹcha kugbe obohwẹre ọnre na rhe che kpokpo ẹwẹn rọyen, kọ cha yanran vẹ ophu ọgangan ra ghwọrọ ihwo buebun. 45 Kọ cha vwẹ itughẹ rẹ uvie rọyen vwo vi vwẹ uvwre rẹ abadi rode na vẹ ugbenu ọfuanfon rọhẹ Otọ Oyoyovwin na; kọ cha yanran rhirin re te oba rọyen, ohwo vuọvo cha cha ukoo.

12 “Vwẹ ọke yena, Maikẹl ko che vrẹn mudia, osun rode ro muẹdia vwọ kẹ ihwo wẹn na. Oka rẹ ukpokpogho ra je rhe mrẹ ọkpọ rọyen dẹvoo vwo nẹ ọke rẹ ẹgborho rhe vwọ dia re duvwun ọke yena kọ cha vwomaphia. Vwẹ uvwre rẹ ọke yena, ihwo wẹn ke cha djẹ vabọ, kohwo kohwo re si odẹ rọyen phiyotọ vwẹ ọbe na. 2 Ihwo buebun re vwerhẹn vwevunrẹ ekpẹn rẹ otọ na ki che vrẹn, evo che vwo arhọ ri bẹdẹ, efa mi rhe rhiẹromrẹ ophọphọvwe kugbe ọjẹfia ri bẹdẹ.

3 “Ihwo ri vwo ẹruọ ki che lo gangan kerẹ ophephe na, e re vwẹ ukẹcha kẹ ihwo efa vwo ruẹ obo re dia ọsoso na che lo kerẹ isio bẹdi bẹdẹ.

4 “Vwọ kẹ wẹ, Daniẹl, djahen eta na rere wo rhurhu ọbe na bẹsiẹ ọke rẹ oba na vwo te. Ihwo buebun cha yanrhe yankpo,* erianriẹn rẹ uyota na ko che bunphiyọ.”

5 Etiyin mẹvwẹ ri Daniẹl de ni, me da mrẹ ihwo ivẹ efa ri mudia etiyin, ọvo hẹ ẹbẹre obonẹ rẹ orhoma rẹ ivwori na, ọ ro chekọ hẹ ẹbẹre oboyin vwẹ orhoma rẹ ivwori na. 6 Ọvo da ta kẹ ọshare ro ku ewun ri linẹn phiyọ na, ọ rọhẹ obenu rẹ ame rẹ ivwori na: “Mavọ yen o che kri te tavwen oba rẹ erọnvwọn rẹ igbevwunu nana ke rhe?” 7 Mi de nyo ọshare ro ku ewun ri linẹn phiyọ na rọhẹ enu rẹ ame rẹ ivwori na, rọ vwọ kpare obọrhen vẹ obohwẹre rọyen kpo idjuvwu na je vwẹ Ohwo rọ herọ bẹdi bẹdẹ na vwo duvwun iyorin nẹ, “ọ cha rhe vwẹ ọke re bruphiyọ, ọke ivẹ re bruphiyọ, kugbe ubrọke.* A da ghwa ghwọrọ ẹgba rẹ ihwo efuanfon na ibribro nu, erọnvwọn nana eje ki che vwoba.”

8 Vwọ kẹ vwẹ, asaọkiephana mi nyori, ẹkẹvuọvo mi se vwo ẹruọọ; ọtiọyena me da ta: “E ọrovwovwe, die yen cha dia okuphiyọ rẹ erọnvwọn nana?”

9 Ọ da ta: “Yanran Daniẹl, kidie a cha djahen eta na ji rhurhu ayen bẹsiẹ ọke rẹ oba na vwo te. 10 Ihwo buebun che ru oma rayen fon je vrabọ rẹ upe, kẹ ayen cha rhe dia fuanfon. Ihwo umwemwu che ru umwemwu, ohwo umwemwu vuọvo che vwo ẹruọọ; ẹkẹvuọvo ihwo ri vwo ọhọ che vwo ẹruọ.

11 “Vwo nẹ ọke re vwo si izobo ri kọke kọke na no kugbe ọke re vwo phi emu rẹ ẹgua rọ sua oghwọrọ na phiyọ ẹdia, a cha mrẹ ẹdẹ 1,290.

12 “Omavwerhovwẹn dia vwọ kẹ ohwo rọ vwẹ erhiorin hẹrhẹ te oba rẹ ẹdẹ 1,335 na!

13 “Ẹkẹvuọvo vwọ kẹ wẹ, mudia gan re te oba. Wo che rovwoma, ẹkẹvuọvo wo che vrẹn vwọ kẹ ẹkẹn wẹn vwẹ oba rẹ ẹdẹ na.”