AIZAYA

 2 Nyo, E idjuvwu, rere wọ kerhọ, E akpọ,

Kidie Jihova tarọ nure:

“Me yọnrọn emọ ghwanre je ghẹrẹ ayen,

Ẹkẹvuọvo ayen gbe vwọso ovwẹ.

 3 Erhuẹn nabọ riẹn ohwo rọ dẹrẹ,

Ekẹkẹtẹ ji vughe asan rẹ ọrovworo rhuẹrẹ kẹ nẹ ọ da riemu;

Ẹkẹvuọvo Izrẹl vughe uvwee,*

Ihwo robọ mẹ vwo ẹruọọ.”

 4 Okpetu rode vwọ kẹ ẹgborho umwemwu na,

Ihwo rẹ oruchọ nyẹ muotọ,

Emọ rẹ ihwo umwemwu, erharhe rẹ emọ!

Ayen kpairoro vrẹ Jihova;

Ayen muọghọ kẹ Ohwo Ọfuanfon rẹ Izrẹl naa;

Ayen chukokuo.

Uyovwin na ejobi muọga.

Ọga hẹ evunrẹ ubiudu na eje.

Era kugbe ipe rẹ era kugbe era ri rhiephiyọ herọ

—E ji rhi sivwin* ayen yẹrẹ gba ayen yẹrẹ vwẹ evwri vwọ rhuọnrhuọn* ayeen.

 8 A yanjẹ ọmọtẹ ri Zayọn vwo kerẹ utughẹ* vwevunrẹ ogba rẹ ivaini,

Kerẹ umuwevwin vwevunrẹ udju rẹ ikukumba,

Kerẹ orere ra gba riariẹ.

 9 Mane kẹ Jihova rẹ otuofovwin na yanjẹ imihwo evo vwo ri sivwin rhọọ,

Avwanre rha dia kerẹ Sọdọm,

Avwanre rha họhọ Gomora.

“Ofu rẹ izobo rẹ ẹtorhẹ rẹ egbon kugbe ivwri rẹ eranvwe re pha tubie tubie rẹ ovwan dje vwe,

Mi vwo omavwerhovwẹn kpahen ọbara rẹ erhuẹn itete, imigodẹ, kugbe ẹvwee.

12 Ọke rẹ ovwan da rhe rhe vwomaphia vwẹ obaro mẹ,

Ono yen vuẹ ovwan nẹ ovwan rhe,

Rhi chiyin otegodo mẹ ivẹ na?

Orẹ rẹ emeranvwe kpokpọ, ẹdẹ urovwoma, use rẹ ọghwẹkoko

—Mi che se chirakon rẹ imajiki rẹ ovwan ruẹ vẹ ọghwẹgbe ọfuanfon rẹ ovwaan.

Ayen rhe dia oghwa ọhọhọhọ kẹ vwẹ;

Ofu rayen dje vwe.

15 Ọke rẹ ovwan da bẹrẹ abọ rẹ ovwan,

Mi si ẹro mẹ nẹ kẹ ovwan.

Dede nẹ ovwan nẹrhovwo buebun,

Me kerhọọ;

Abọ rẹ ovwan vọnre vẹ ọbara.

16 Ovwan hworhẹ oma rẹ ovwan, ovwan ru oma rẹ ovwan fon;

Ovwan si iruemu ebrabra rẹ ovwan na nẹ obaro mẹ;

Ovwan dobọ rẹ eruo rẹ obo re brare ji.

17 Ovwan yono obo re ruẹ emu esiri, ovwan guọnọ orhiẹn ọsoso,

Ovwan kpọ ọ ro shenyẹ ihwo vi,

Ovwan chochọn rẹ uturhi rẹ ọmọ ro jẹ ọsẹ evwo,*

Ovwan je chochọn rẹ ayeuku.”

“Dede nẹ imwemwu rẹ ovwan pha kerẹ amwa ọvwavware,*

E che ru ayen fon kerẹ imicho;

Dede nẹ ayen pha vwavware kerẹ ewun ọvwavware,*

E che ru ayen fon kerẹ oruru.

19 Ovwan de dje owenvwe phia je kerhọ,

Ovwan cha riemu iyoyovwin rẹ otọ na.

20 Ẹkẹvuọvo ovwan da sen ji gbe vwọso,

A cha vwẹ ọlọkọ vwọ ghwọrọ ovwan,

Kidie unu ri Jihova tarọ nure.”

Ọ vọnre vẹ orhiẹn ọsoso jovwo;

Ophiọnphiọn dia evun rọyen jovwo,

Jẹ asaọkiephana izighẹ keyen dia evun rọyen.

22 Idọnọ ọfuanfon rẹ ovwan rhi hirhephiyọ obo ri jẹfuọn,

A vwẹ ame vwọ gua udi rẹ ovwan.*

Ayen brorhiẹn ọsoso kẹ emọ ri jẹ esẹ evwoo,*

Ẹdjọ rẹ ayeuku te asan rẹ ayen hephaa.

24 Ọtiọyena Ọrovwori rẹ uyota na, Jihova rẹ otuofovwin,

Ọrovwẹgba rẹ Izrẹl da ta:

“E! Me cha ghwọrọ ivwighrẹn mẹ,

Me je cha vwẹ ivwighrẹn mẹ vwọ reihri.

25 Me cha rhẹriẹ obọ mẹ vwọso ovwan,

Me cha wran ekangba rẹ ovwan kufia kirobo ra vwẹ odja hworhẹ,

Mi che si jẹfuọn rẹ ovwan eje no.

26 Me cha rhoma vwẹ iguẹdjọ rẹ ovwan vwo mu kirobo rọ hepha vwẹ ẹsosuọ

Ibruche rẹ ovwan kirobo rọ hepha vwẹ ọtonphiyọ.

27 A cha tan Zayọn rhivwin vẹ orhiẹn ọsoso,

Ihwo rọyen ri rhivwin rhe, vẹ ophiọnphiọn.

28 A cha ghwọrọ ihwo ri gbe vwọsua vẹ irumwemwu na kugbe,

A je cha ghwọrọ ihwo re yanjẹ Jihova vwo.

29 Oma rẹ irhe ride ri je ovwan na cha vo ayen,

A cha phọphọ ovwan fikirẹ ogba* rẹ ovwan jẹre na.

30 Kidie ovwan cha dia kerẹ urhe rode rẹ ẹbe rọyen vwioro,

Kerẹ ogba ro vwo amee.

31 Ọgba na che hirhephiyọ odin ọyaya,

Iruo rọyen cha sa erhanre;

Ayen ihwo ivẹ na che fru erhanre kugbe,

Ohwo vuọvo che se fun ayeen.”

 2 Vwẹ ẹbẹre rọ koba rẹ ẹdẹ na,*

Ugbenu rẹ uwevwin ri Jihova che kpenu nọ igbenu ri chekọ na,

A cha reyọ vwo vi kokoroko,

A cha kparọ kpenu vrẹ igbenu itete na,

Evun rọyen kọyen ẹgborho na eje che rhurie ra.

“Yanrhe, jẹ avwanre kpo ugbenu ri Jihova,

Kpo uwevwin rẹ Ọghẹnẹ ri Jekọp.

O che yono avwanre kpahen idjerhe rọyen,

Avwanre cha yan vwevunrẹ ada rọyen.”

Kidie urhi* che nẹ Zayọn rhe,

Ota ri Jihova mi rhe nẹ Jerusalẹm rhe.

 4 O che guẹdjọ vwẹ ohri rẹ ẹgborho na

Ọ cha rhuẹrẹ erọnvwọn phiyọ* vwọ kẹ ihwo buebun.

Ayen che duvwun elọkọ rayen phiyọ erọnvwọn re vwo voro otọ

Ishuẹ rayen phiyọ erọnvwọn re vwo brẹ abọ rẹ irhe.

Ẹgborho rha cha kpare ọlọkọ vwọso ẹgborhoo,

Ayen rhe che yono obo re phiẹ ofovwin ọfaa.

 5 E uwevwin ri Jekọp, yanrhe,

Jẹ avwanre yan vwẹ elo ri Jihova.

 6 Kidie wọ kpairoro vrẹ ihwo wẹn, uwevwin ri Jekọp,

Kidie ayen rhe vọn vẹ erọnvwọn ri nẹ Ẹbẹre Ọnre Va Nẹcha rhe;

Ayen ruẹ imajiki kerẹ ihwo ri Filistia,

Emọ rẹ erhorha vọn ohri rayen.

 7 Otọ rayen vọnre vẹ idọnọ efuanfon kugbe iro,

Efe rayen vwo obaa.

Otọ rayen vọnre vẹ iyesi,

Ekpẹrẹ rayen vwo unuu.

Ayen vwẹ uyovwin kpotọ kẹ iruo rẹ abọ rayen,

Kẹ oborẹ irhiabọ rayen ruru.

 9 Ọtiọyena ohwo da vwẹ uyovwin kpotọ kẹ ayen, ọ da phọphọ oma rọyen,

Wo che se vwo ghovwo ayeen.

10 Ro evunrẹ oragha na rere wo si oma wẹn nu vwevunrẹ ekpẹn na

Fikirẹ ophu ri Jihova ro phiẹ oshọ phiyọ ohwo oma na

Vẹ ọrho rẹ urinrin rọyen.

11 A cha vwẹ ẹro rẹ ohwo rọ kparoma vwo kpotọ,

A cha vwẹ uyovwin rẹ ihwo ri phuoma vwo kpotọ.

Ọ cha enu ri kohwo kohwo rọ kparoma kpenu ro ji phuikpe,

Enu ri kohwo kohwo, owenẹ a kparerọ kpenu yẹrẹ e vwiro kpotọ,

13 Vwẹ enu rẹ irhe rẹ isida eje ri Lẹbanọn ri kpenu ra je kpare kpenu

Vwẹ enu rẹ irhe ri ok eje ri Beshan,

14 Vwẹ enu rẹ igbenu ri kpenu eje

Vwẹ enu rẹ igbenu itete eje,

15 Vwẹ enu rẹ kuwevwin kuwevwin ro kpenu kugbe kigbẹhẹ kigbẹhẹ ra gbogba riariẹ,

16 Vwẹ enu rẹ ikuna ri Tashish eje

Kugbe vwẹ enu rẹ ekọ iyoyovwin eje.

17 A cha vwẹ omaẹkparọ rẹ ohworakpọ vwo kpotọ,

A cha vwẹ uyovwin rẹ ihwo ri phuoma vwo kpotọ.

19 Ihwo ke cha ro evunrẹ inu rẹ eragha na

Kugbe inu rẹ otọ na,

Fikirẹ ophu ri Jihova ro phiẹ oshọ phiyọ ohwo oma na

Vẹ ọrho rẹ urinrin rọyen,

Vwẹ ọke ro de vrẹn rọ vwọ nẹrhẹ otọrakpọ na kpogho vẹ oshọ.

20 Vwẹ ẹdẹ yena, ihwo ke cha reyọ eghẹnẹ rẹ idọnọ efuanfon vẹ e rẹ iro rayen ri fiemuu

Rẹ ayen ru kẹ oma rayen rẹ ayen vwẹ uyovwin kpotọ kẹ,

Kẹ ayen che do ayen vwọ kẹ ọhrowanre* vẹ adjan,

21 Rere ayen sa vwọ ro inu rẹ eragha na

Ro asan ri rhiephiyọ vwẹ eragha na,

Fikirẹ ophu ri Jihova ro phiẹ oshọ phiyọ ohwo oma na

Kugbe ọrho rẹ urinrin rọyen,

Vwẹ ọke ro de vrẹn rọ vwọ nẹrhẹ otọrakpọ na kpogho vẹ oshọ.

22 Fikirẹ erhuvwu rẹ ovwan, ovwan rha vwẹrosua ohworakpọ ghevweghee,

Ohwo ghevweghe ro ghwẹ.

3 Kidie nighere! Ọrovwori rẹ uyota na, Jihova rẹ otuofovwin,

O siẹ koka koka rẹ obicha vẹ emuọre vwo nẹ Jerusalẹm kugbe Juda,

Obicha eje rẹ ibrẹdi kugbe ame,

 2 Ohwo ro vwo ẹgba kugbe ọgba ofovwin,

Oguẹdjọ kugbe ọmraro, ọboepha kugbe ọkpako,

 3 Osun rẹ 50, ohwo re muọghọ kẹ mamọ, kugbe obruche,

Ọwena rẹ imajiki kugbe ọwena rẹ inehweri.

 4 Me cha vwẹ emeshare vwo ru isun rayen,

Ihwo ri wene ẹwẹn cha wene kpo* che sun vwẹ enu rayen.

 5 Ihwo na che shenyẹ ohwohwo,

Ohwo ọvuọvo vẹ ọrivẹ rọyen.

Ọmọshare che shenyẹ ọmare ọshare,

Ohwo ro fi emuọvoo che yinvwaro kpahen ohwo re muọghọ kẹ.

“Me cha vwẹrote era* rẹ ovwaan;

Mi vwo emu yẹrẹ iwun vwẹ uwevwin mẹẹ.

 8 Kidie Jerusalẹm kprowọ,

Juda ji she re,

Fikiridie ayen vwẹ eta vẹ uruemu vwo gbe vwọsua Jihova;

Ayen gbe vwọsua vwẹ irharo rẹ urinrin rọyen.*

 9 Oborẹ ayen ru opharo wan soseri hwe ayen,

Ayen ghwoghwo umwemwu rayen kerẹ Sọdọm;

Ayen davwẹngba vwo sionuu.

10 Ta kẹ evwata na nẹ o che yovwin kẹ ayen;

A cha hwosa rẹ oborẹ ayen ruẹ vwọ kẹ ayen.*

Okpetu che te oma,

Kidie oborẹ abọ rọyen ruru ọyen e che ru kẹ!

12 Vwọ kẹ ihwo mẹ, ihwo re ghara iruo kẹ ayen bọphiẹ ayen,

Eya ki rhe suẹn vwẹ enu rẹ ayen.

Ihwo mẹ, isun rẹ ovwan nẹrhẹ ovwan ghoro,

Ayen gbe oyanghan phiyọ idjerhe rẹ ovwan.

13 Jihova mudia ẹdia rọyen ro vwo guẹdjọ;

O vrẹn mudia ro vwo brorhiẹn rẹ ihwo.

“Ovwan torhẹ ogba rẹ ivaini na muotọ nure,

Oborẹ ovwan ji cho mie igbere na hẹ iwevwin rẹ ovwan.

15 Ono yen kẹ ovwan udu nẹ ovwan ghwọrọ ihwo mẹ

Je vwẹ epharo rẹ ivwiogbere na vwo buotọ?” ọtiọyen Ọrovwori ro Me Kpenu, Jihova rẹ otuofovwin na tare.

16 Jihova da ta: “Kidie nẹ emetẹ ri Zayọn kparoma,

Ayen yan phuikpe,

Yan frẹfrẹ, vwiovwio ẹro, fẹnrẹn ọkron,

Jẹ erọnvwọn rẹ ayen kuphiyọ awọ do,

17 Jihova je cha vwẹ era vwọ ghwiẹ uyovwin rẹ emetẹ ri Zayọn,

Jihova cha nẹrhẹ ayen hwerhe akpan.

18 Vwẹ ẹdẹ yena, Jihova che mie ayen erọnvwọn re nẹrhẹ ayen vwo erhuvwu: erọnvwọn abọ vẹ awọ rayen,

Erọnvwọn re kuẹphiyọ uyovwin kugbe ekuakua rẹ osẹnvwe re họhọ emeranvwe kpokpọ rọ vwomaphia,

19 Erọnvwọn erhọ,* erọnvwọn obọ, kugbe oga,*

20 Epharuyovwin, isheni re kuẹ phiyọ owọ, kugbe omuivie,

Egọ rẹ ishani* kugbe erọnvwọn re kuẹphiyọ vwọ kẹ ochọnvwe,

21 Isa rẹ obọ kugbe isa rẹ uwen,

22 Iwun rẹ orẹ, iwun re kuẹ rhurhu iwun, iwun rẹ ekpahen, kugbe imikpu,

23 Ighegbe rẹ obọ kugbe iwun rẹ linẹn,*

Ọpharuyovwin kugbe oga.

24 Ukperẹ evwri ri balsam, ọnrhe ogbongbon;

Ukperẹ umuehun, ufi;

Ukperẹ ẹton ra riẹn me, akpan;

Ukperẹ omamọ rẹ ewun, ewun rẹ esiso;

Ukperẹ erhuvwu, oka ra ka phiyọ oma.

25 A cha vwẹ ọlọkọ vwọ teyen eshare wẹn hwe,

A me rha teyen egba eshare wẹn hwe vwẹ ofovwin.

26 Ihwo che muomaphiyọ ji vwere uvweri vwẹ anurhoro rẹ orere na,

O che vwere uvweri ji chidia totọ.”

“Avwanre cha re ibrẹdi robọ rẹ avwanre

Avwanre che ku ewun robọ rẹ avwanre phiyọ;

Takpe nẹ a vwẹ odẹ wẹn se avwanre

Re vwo si ophọphọvwe* rẹ avwanre no.”

5 Biko, juvwe so une kẹ ọ ri mi vwo ẹguọnọ rọyen

Une kpahen ọ ri mi vwo ẹguọnọ rọyen vẹ ogba rẹ ivaini rọyen.

Ọ kọn omamọ rẹ ivaini ọvwavware phiyọ evun rọyen,

Ọ bọn uwevwin ro kpenu phiyọ uherevie rọyen,

Je tọn ọgọdọ re de mie iwaini phiyọ evun rọyen.

Ọtiọyena ko rhẹro rọyen nẹ ọ cha mọ igrepu,

Ẹkẹvuọvo orharhe igrepu ọvo kọyen ọ mọre.

 3 “Asaọkiephana, ovwan ihwo re dia Jerusalẹm kugbe ihwo ri Juda,

Biko ovwan guẹdjọ mẹ vẹ ogba rẹ ivaini mẹ.

 4 Die ọfa yen mi se ru kẹ ogba rẹ ivaini mẹ

Ri mi ji rhi ruu?

Diesorọ ọke ri mi vwo rhẹro rẹ igrepu,

Orharhe igrepu ọvo kọyen ọ mọre?

 5 Asaọkiephana, biko, je me vuẹ ovwan

Oborẹ mi che ru ogba rẹ ivaini mẹ:

Mi che si obo me vwọ gbogba riariẹ phiyọ na no,

A cha torhẹ muotọ.

Mi che kporon igbẹhẹ rẹ ukuta rọyen,

Ke che chiyon muotọ.

 6 Mi che ruo hirhephiyọ otọ ofefe;

A cha nyavwe eghọn rẹ ivaini rọyen yẹrẹ voro otọ rọyeen.

Imirhe ri vwo inwe kugbe odin che din rhurho,

Me cha vwẹ iji vwọ kẹ evwru na nẹ o siobọnẹ osio rere ọ rhọ kuoo.

 7 Kidie ogba rẹ ivaini ri Jihova rẹ otuofovwin na yen uwevwin rẹ Izrẹl;

Ihwo ri Juda yen ivaini* ro vwo ẹguọnọ rọyen.

Ko rhẹro rẹ orhiẹn ọsoso,

Ẹkẹvuọvo nighere! oshenyẹ yen ọ mrẹre;

O rhẹro rẹ ophiọnphiọn,

Ẹkẹvuọvo nighere! oviẹ rẹ ihwo re shenyẹ yen o nyori.”

 8 Okpetu rode vwọ kẹ ihwo re vwẹ uwevwin ọvo vwọ ba uwevwin ọfa

Kugbe ihwo re vwẹ udju ọvo vwọ ba udju ọfa

Bẹsiẹ asan vuọvo rhe rhiephiyọọ

Ovwan ọvo kọyen dia otọ na!

 9 Mi nyo Jihova rẹ otuofovwin ro duvwun iyorin nẹ

Dede nẹ iwevwin buebun rhoro ji vwo erhuvwu,

I che hirhephiyọ obo ri muẹ ohwo oshọ,

Ohwo vuọvo cha dia evun rayeen.

10 Kidie ovwanvwọ rẹ ibati* ọvo yen ogba rẹ ivaini rọ hẹre te eka ihwe* cha mọ,

Ovwanvwọ rẹ ifah* ọvo yen ibi re vọn ovwanvwọ ri homa* ọvo cha mọ.

11 Okpetu rode vwọ kẹ ihwo ri vrẹn vwẹ edegburhiọke ra da udi,

Re da rhirin re te ovwọnvwọn bẹsiẹ iwaini vwo mu ayen!

12 Ayen vwo ihapu kugbe ekuakua rẹ uhworo ri vwo ifi tẹnrẹnrẹn,

Itamborini, iflutu, kugbe iwaini vwẹ erẹ rayen;

Ẹkẹvuọvo ayen roro kpahen iruo ri Jihovaa,

Ayen je mrẹ iruo rẹ abọ rọyeen.

13 Ọtiọyena ihwo mẹ che kpo ighuvwu

Fikirẹ jẹ erianriẹn evwo;

Owẹnvwe che hwe eshare rayen re muọghọ kẹ,

Urhuru rẹ ame che si ihwo rayen eje hwe.

14 Ọtiọyena Ushi* na ru oma* rọyen hẹrephiyọ

O rhie unu rọyen phiyọ ghwroro;

Urinrin rọyen,* ihwo rọyen buebun ri do, kugbe ihwo rọyen re ria orẹ

Che jẹ evun rọyen ẹruọọ.

15 Ohworakpọ cha vwẹ uyovwin kpotọ,

A cha vwẹ ohwo vwo kpotọ,

A me rha vwẹ ẹro rẹ ohwo rọ kparoma vwo kpotọ.

16 A cha kpare Jihova rẹ otuofovwin na kpenu womarẹ ẹdjọeguo* rọyen;

Ọghẹnẹ rẹ uyota na, Ohwo Ọfuanfon na, che ru oma rọyen fon womarẹ ophiọnphiọn.

17 Imigodẹ na cha riemu odedede kerẹsiẹ ra da mrẹ nẹ asan rẹ ayen da ria odin yen ayen hepha;

Erhorha re dia otọ na cha riemu vwẹ asan rẹ eranvwe re pha tubie tubie da ria odin jovwo.

18 Okpetu rode vwọ kẹ ihwo re vwẹ ifi rẹ ophiẹnvwe vwo siẹ abe rayen nene oma

Re vwẹ ifi rẹ akpẹrẹ vwo siẹ imwemwu rayen;

19 Ihwo re tanẹ: “E jẹ O ruiruo rọyen kpata;

E jẹ ọ rhe phẹre rere avwanre sa vwọ mrẹ.

E jẹ ọhọre* rẹ Ohwo Ọfuanfon rẹ Izrẹl na rugba

Rere avwanre sa vwọ riẹn!”

20 Okpetu rode vwọ kẹ ihwo re tanẹ erhuvwu umiovwo, umiovwo erhuvwu,

Ihwo re vwẹ ebri vwo wene elo, re vwẹ elo vwo wene ebri,

Ihwo re vwẹ obo re yara vwo wene obo re miẹmiẹ, obo re miẹmiẹ vwo wene obo re yara!

21 Okpetu rode vwọ kẹ ihwo re ghwanre vwẹ ẹro romobọ rayen

Ri roro nẹ ayen vwo ọhọ!

22 Okpetu rode vwọ kẹ ihwo re dia egba rẹ iwaini ẹda

Vwọ kẹ ihwo re dia ewena vwẹ ẹgua rẹ udi ro muẹ ohwo,

23 Ihwo ri siobọnẹ orumwemwu fikirẹ udi ra jẹ kẹ ayen

Kugbe ihwo re rhọnvwe brorhiẹn ọsoso kẹ ọvwataa!

24 Ọtiọyena, kirobo rẹ imwerhanre torhẹ igbẹn rẹ ekankọn

Rẹ odin ọyaya da torhẹ wẹnrẹwẹnrẹ vwevunrẹ erhanre ye,

Ọtiọyen awọ rayen che gbon,

Idodo rayen mi tue kufia kerẹ ipọda,

Kidie ayen sen urhi* ri Jihova rẹ otuofovwin na

Ayen muọghọ kẹ ota rẹ Ohwo Ọfuanfon rẹ Izrẹl naa.

25 Kọyensorọ ophu ri Jihova vwọ tuan kpahan ihwo rọyen,

Ọ cha rionbọ rọyen phia vwọso ayen je ghwiẹ ayen.

Igbenu na che kpogho,

Irivwin rayen ke cha dia kerẹ erhurhu vwẹ irhuvwun na.

Fikirẹ enana eje, ophu rọyen ji rhi fueen,

Ẹkẹvuọvo obọ rọyen je riẹn phia rọ vwọ ghwọrọ.

26 Ọ kpare oka* kpenu vwọ kẹ ẹgborho ro sherabọ;

O gbe ophiọrọ vwo se ayen nẹ ayen nẹ oba rẹ akpọ na rhe;

Nighere! ayen cha vẹ okpakpa.

Umuehun rẹ ehun rayen rhanree,

Yẹrẹ kẹ ifi rẹ isabatu rayen vwrẹree.

28 Edada rayen ejobi pha dandan,

Imirhabọ rayen eje nuẹre.*

Ikawọ rẹ iyesi rayen pha kerẹ ukuta ọgangan,

Idjugẹn rayen pha kerẹ ogiribo.

29 Ẹguan rayen pha kerẹ ọ rẹ okpohrokpo;

Ayen guan kerẹ ikpohrokpo itete.*

Ayen cha guan ji mu eranvwe

Ayen che muo yanran, ohwo vuọvo che sivwoon.

30 Vwẹ ẹdẹ yena, ayen cha guan fiki rọyen

Kerẹ edo rẹ abadi.

Kohwo kohwo ro ni otọ na cha mrẹ ebri rọ nẹrhẹ oshọ muẹ ohwo;

Elo dede hirhephiyọ ebri fikirẹ evwru na.

Kọ ghwa họhọ nẹ mi ghwure,*

Kidie mẹvwẹ ohwo rẹ ẹbẹrunu rọyen fonroo;

Me dia ohri rẹ ihwo rẹ ẹbẹrunu rayen fonroo;

Kidie ẹro mẹ mrẹ Ovie na re, Jihova rẹ otuofovwin na komobọ!”

E si abe wẹn no re,

A je vwẹ imwemwu wẹn vwo ghovwo uwe re.”

‘Ovwan che dje enyenyo,

Ẹkẹvuọvo ovwan che vwo ẹruọọ;

Ovwan che dje ẹmrẹmrẹ,

Ẹkẹvuọvo ovwan che vwo erianriẹn vuọvoo.’

10 Ru ubiudu rẹ ihwo nana gan,

Din erhọ rayen,

Rhurhu ẹro rayen,

Rere ayen vwo jẹ orẹ ẹmrẹ

Ayen ji vwo jẹ ẹme enyo,

Rere ubiudu rayen vwo jẹ ẹruọ evwo

Rẹ ayen vwo jẹ oma ekuorhẹriẹ ji sivwin.”

“Re te ọke rẹ irere na vwọ guọghọ totọ rẹ ihwo vwo jẹ ẹdia

Rẹ ihwo vwo jẹ iwevwin na ẹdia

Rẹ otọ na vwọ guọghọ totọ je dia ofefe;

12 Re te ọke rẹ Jihova vwo si ihwo no kpo asan oshesheri

Rẹ ẹdia ofefe rẹ otọ na hepha na vwọ bra phiyọ.

“Ayen che se phi kparobọọ,

Ọ cha phiaa.

 8 Kidie uyovwin ri Siria yen Damaskọs,

Uyovwin ri Damaskọs ke rha Rizin.

Vwẹ uvwre rẹ ẹgbukpe 65

A cha ghwọrọ Ifrem totọ, ọ rha cha dia ẹgborho ọfaa.

 9 Uyovwin rẹ Ifrem yen Sameria,

Uyovwin ri Sameria ke rha ọmọ ri Remalaya.

Jokpanẹ ovwan vwo esegbuyota rọ ganre,

Ovwan che se mudia kokorokoo.”’”

 6 “Kidie nẹ ihwo nana sen ame ri Shiloa* rọ djẹ ememerha na

Je ghọghọ vwẹ enu ri Rizin kugbe ọmọ ri Remalaya,

 7 Ọtiọyena nighere! Jihova cha reyọ

Ame buebun rode rẹ Urhie na* vwọso ayen,

Kọyen ovie rẹ Asiria kugbe urinrin rọyen eje.

Ọ cha rhe enu rẹ ivwori rọyen eje

Je vọn ro orhoma rọyen eje

 8 O che hwerhe Juda.

O che kuo te ohọre je mwavwe vrẹ;

Ibekpe rọyen rọ hraphiyọ na che rhurhu ohẹhẹre rẹ otọ wẹn,

E Imanuẹl!”*

Ovwan ta obo ri je ovwan, ẹkẹvuọvo ọ cha phiaa,

Kidie Ọghẹnẹ vẹ avwanre herọ!*

Ovwan djoshọ rẹ oborẹ ayen djoshọ rọyeen;

Ovwan phariẹ fiki rọyeen.

13 Jihova rẹ otuofovwin—ọyen yen Ohwo ru wo ni kerẹ ọfuanfon,

Ọyen yen Ohwo ru wọ djoshọ rọyen,

Ọyen yen Ohwo ru wọ phariẹ kẹ.”

14 Ọ cha dia kerẹ asan ọfuanfon,

Ẹkẹvuọvo ọ je cha dia kerẹ ukuta rọ kprọ ohwo owọ

Kerẹ oragha rọ sua eshe

Vwọ kẹ uwevwin ivẹ rẹ Izrẹl,

Kerẹ ariri kugbe ufi

Vwọ kẹ ihwo re dia Jerusalẹm.

15 Buebun rayen cha kprowọ, she, je wan oma;

A cha kpahen ufi kẹ ayen ji mu ayen.

16 Kpirhin ọbe rẹ iseri re siri na*

Gba ukpirhin ọbe re si urhi* na phiyọ na vwẹ ohri rẹ idibo mẹ!

 2 Ihwo re yan vwevunrẹ ebri

Mrẹ elo rode re.

Vwọ kẹ ihwo re dia otọ rẹ ebri hwi,

Elo lo mu ayen re.

 3 Wọ nẹrhẹ ẹgborho na dia buebun;

Wọ nẹrhẹ aghọghọ rọyen rho.

Ayen ghọghọ vwẹ obaro wẹn

Kirobo rẹ ihwo ghọghọ vwẹ ọke rẹ orhọ,

Kerẹ ihwo re ghara ekuakua ra ghwẹ nẹ ofovwin rhe vẹ aghọghọ.

 4 Kidie wọ guọghọ urhekpe rẹ oghwa rayen chẹghẹchẹghẹ,

Ọkpọ rọhẹ igabọ rayen, ọkpọ rẹ onini rẹ owian na,

Kirobo rọ hepha vwẹ ọke ri Midian.

 5 Kisabatu kisabatu ro kpogho otọ na ọke ro de chiyon

Kugbe kewun kewun re bru phiyọ ọbara

Cha dia obo re vwo koko erhanre.

 6 Kidie e vwiẹ ọmọ ọvo kẹ avwanre,

A vwẹ ọmọ ọvo kẹ avwanre;

Usuon* na cha dia enu rẹ igabọ rọyen.

 7 Usuon* rọyen che nene asan eje

Ufuoma ji che vwo obaa,

Vwẹ enu rẹ ekete ri Devid kugbe uvie rọyen

Rere a sa vwọ reyọ vwo muotọ kokoroko je sẹro rọyen

Womarẹ orhiẹn ọsoso kugbe ophiọnphiọn,

Vwo nẹ ọke nana ra ro bẹdẹ.

 8 Jihova vwẹ ovuẹ rẹ ẹdjọeguo vwo rhe Jekọp,

Ọ rhe enu rẹ Izrẹl re.

 9 Ihwo na eje cha riẹn kpahọn

—Ifrem kugbe ihwo re dia Sameria—

Ihwo re ta vẹ omaẹkparọ kugbe udu ọgangan nẹ:

10 “Ibriki kporon she,

Ẹkẹvuọvo avwanre cha vwẹ ikuta re bruru vwọ bọn.

A gbọ irhe ri sikamọ she,

Ẹkẹvuọvo avwanre cha vwẹ irhe rẹ isida vwo wene ayen.”

11 Jihova cha kpare ivwighrẹn ri Rizin mudia vwọsuọ

Ọ cha kpare ẹwẹn rẹ ivwighrẹn rọyen vwọsuọ,

12 Siria nẹ ẹbẹre ọnre va nẹcha rhe, Filistia de rhe nẹ ẹbẹre ọnre shera rhe,*

Ayen che mu Izrẹl rọ vẹ unu ri rhiephiyọ.

Fikirẹ enana eje, ophu rọyen ji rhi fueen,

Ẹkẹvuọvo obọ rọyen je riẹn phia rọ vwọ ghwọrọ.

13 Kidie ihwo na ji rhi rhivwin bru Ohwo rọ ghwiẹ ayen na rhee;

Ayen je rhe guọnọ Jihova rẹ otuofovwiin.

14 Jihova che bru uyovwin kugbe urhurhu,

Odin rọ djẹ rhe obọ vẹ ọ ro gron kpenu re* vwo nẹ Izrẹl vwẹ ẹdẹ vuọvo.

15 Ekpako na kugbe ihwo re muọghọ kẹ mamọ yen uyovwin na,

Emraro re vwẹ odjekẹ rẹ efian vwọ phia keyen rha urhurhu na.

16 Ihwo ri suẹn ihwo nana nẹrhẹ ayen ghoro,

Ihwo rẹ ayen suẹn na ki beghe.

17 Ọyena yen sorọ Jihova cha ghọghọ fikirẹ ighene eshare rayeen,

O che gbe arodọnvwẹ kẹ emọ rayen ri jẹ esẹ evwo* vẹ eyauku rayeen

Fikiridie ayen eje egọẹdjọ kugbe irumwemwu

Kunu kunu ta ota rẹ ọhọ hephaa.

Fikirẹ enana eje, ophu rọyen ji rhi fueen,

Ẹkẹvuọvo obọ rọyen je riẹn phia rọ vwọ ghwọrọ.

18 Kidie umwemwu la kerẹ erhanre,

Ọ torhẹ imirhe ri vwo inwe kugbe odin.

O che phi erhanre phiyọ asan ri me din vwẹ egbo na,

Ivwirhi rayen ki che guvwie kpenu.

19 Fikirẹ ophu ri Jihova rẹ otuofovwin

E phi erhanre phiyọ otọ na,

Ihwo na che hirhephiyọ obo re nẹrhẹ erhanre la gan.

20 Ohwo ọvo che bru emu phiyotọ vwẹ obọrhen

Ẹkẹvuọvo owẹnvwe ji hwe;

Ohwo ọvo cha re emu vwẹ obohwẹre

Ẹkẹvuọvo evun cha vọọn.

Ohwo ọvuọvo cha re uvwo rẹ ugbobọ rọyen,

21 Manasẹ che mu Ifrem rọ,

Ifrem mi rhe mu Manasẹ rọ.

Fikirẹ enana eje, ophu rọyen ji rhi fueen,

Ẹkẹvuọvo obọ rọyen je riẹn phia rọ vwọ ghwọrọ.

10 Okpetu rode vwọ kẹ ihwo ri jurhi re sua omaẹkuọn,

Ihwo ri siẹ irhi rẹ oshenyẹ ọkieje,

 2 Rẹ ayen vwo mie ivwiogbere uturhi rayen,

Rẹ ayen vwo jẹ orhiẹn ọsoso ebro kẹ ihwo ri kpotọ vwẹ ohri rẹ ihwo mẹ,

Rẹ ayen vwọ reyọ ekuakua rẹ eyauku

Ji gborho ekuakua rẹ emọ ri jẹ esẹ evwo!*

 3 Die yen wo che ru vwẹ ẹdẹ rẹ ẹdjọeguo na,*

Ọke rẹ oghwọrọ de nẹ asan oshesheri rhe?

Ono yen wọ cha djẹ bru ra vwọ kẹ ukẹcha,

Ono yen wọ cha yanjẹ efe* wẹn na vwo kẹ?

 4 O vwo emu vuọvo ro chekọọ jokparẹ e vwo rhuẹn vwẹ ohri rẹ ihwo re mu phiyọ uwodi na

Yẹrẹ re vwo she vwẹ ohri rẹ ihwo re hweri na.

Fikirẹ enana eje, ophu rọyen ji rhi fueen,

Ẹkẹvuọvo obọ rọyen je riẹn phia rọ vwọ ghwọrọ.

 5 “Ẹhẹn! Ihwo rẹ Asiria na,

Ọkpọ ri mi che vwo dje ophu mẹ phia

Ọkpọ rọhẹ obọ rayen yen mi che vwo brorhiẹn hwe!

 6 Mi che jo nẹ ọ vwọso ẹgborho rọ ga ẹdjọ na,

Vwọso ihwo re kpara ophu mẹ;

Me cha vwẹ iji kẹ nẹ ọ reyọ ekuakua buebun ra ghwẹ reyọ kugbe ekuakua buebun re gborhori

Rere o chiyin ayen muotọ kerẹ ekpẹn vwevunrẹ irhuvwun.

 7 Ẹkẹvuọvo o che vwo ẹwẹn ro vwo ru ọnanaa

Ubiudu rọyen che roro iroro vwẹ idjerhe ọtiọnaa;

Kidie o vwo ẹwẹn rọ vwọ ghwọrọ karekare,

Ro vwo bru ẹgborho buebun kufia, ọ dia ẹmẹgborhoo.

 8 Kidie ọ ta,

‘Isun mẹ eje dia ivie?

10 Obọ mẹ reyọ ivie rẹ eghẹnẹ ri fiemuu na,

Rẹ ema rayen bun vrẹ i ri Jerusalẹm kugbe Sameria!

11 Mi rhe ji ru Jerusalẹm vẹ edjọ rọyen

Kirobo ri mi ru Sameria vẹ eghẹnẹ rọyen ri fiemuu na?’

12 “Ọke rẹ Jihova de ruiruo rọyen eje re vwẹ Ugbenu ri Zayọn kugbe Jerusalẹm nu, Ko* che gboja kẹ ovie rẹ Asiria fikirẹ udu ọgangan kugbe ẹro rẹ omaẹkparọ rọyen ro vwo nẹ ihwo. 13 Kidie ọ ta,

‘Me cha vwẹ ogangan robọ mẹ vwo ru ọnana

Vẹ aghwanre mẹ, kidie me ghwanre.

Mi che si ighwru rẹ ihwo vwo no

Je kua efe rayen fiotọ,

Mi che phi ihwo re dia otọ na kparobọ kerẹ ọgba.

14 Kerẹ ohwo ro duvwun obọ phiyọ ẹho,

Obọ mẹ cha reyọ erọnvwọn eghanghanre rẹ ihwo na;

Kerẹ ohwo rọ ghwẹ ikẹn ra yan jovwo koko,

Mi che koko otọrakpọ na eje!

16 Ọtiọyena Ọrovwori rẹ uyota na, Jihova rẹ otuofovwin,

Cha nẹrhẹ ihwo rọyen re rhuoma siame,

O che koko erhanre rọ la gidigidi phiyọ obotọ rẹ urinrin rọyen.

17 Elo rẹ Izrẹl che hirhephiyọ erhanre,

Ohwo Ọfuanfon rọyen na erhanre rọ la;

O che fru erhanre je torhẹ odin rọyen kugbe imirhe ri vwo inwe rọyen vwẹ ẹdẹ vuọvo.

18 O che si urinrin rẹ egbo rọyen kugbe ogba rọyen ra kọn irhe re mọ emamọ phiyọ no karekare;

Ọ cha dia kerẹ ohwo rọ muọga rẹ oma rọyen braphiyọ braphiyọ.

19 Irhe ri chekọ vwẹ egbo rọyen

Cha hanvwe te ẹdia rẹ omotete de se kere ayen.

20 Vwẹ ẹdẹ yena, ihwo ri chekọ vwẹ Izrẹl

Kugbe ihwo ri chekọ vwẹ uwevwin ri Jekọp

Rha cha vwẹ oma rẹrẹ ohwo rọ ghwiẹ ayen naa;

Ẹkẹvuọvo ayen cha vwẹ oma rẹrẹ Jihova,

Ohwo Ọfuanfon rẹ Izrẹl na vẹ evun-ẹfuọn.

21 Uchekotọ ọvo yen che rhivwin

Bru Ọghẹnẹ ro vwo ẹgba na ra, uchekotọ ri Jekọp.

22 Kidie dede nẹ ihwo wẹn, E Izrẹl,

Pha buebun kerẹ ekpẹn rẹ abadi,

Uchekotọ rẹ usun rayen ọvo yen che rhivwin.

E brorhiẹn rẹ oghwọrọ rẹ karekare nure,

Orhiẹn ọsoso* che ku ayen kerẹ oghwe.

23 E, oghwọrọ rẹ karekare rẹ Ọrovwori ro Me Kpenu Jihova rẹ otuofovwin brorhiẹn rọyen nure na,

Cha phia vwẹ otọ na eje.

27 Vwẹ ẹdẹ yena, e che mu oghwa rọyen vwo nẹ igabọ rẹ ovwan,

Urhekpe rọyen vwo nẹ ohọre rẹ ovwan,

E che vwirhin urhekpe na fikirẹ evwri na.”

28 Ọ rhe Aiat re;

Ọ wan Migrọn vrẹ;

O de mu oghwa rọyen phiyotọ vwẹ Mikmash.

29 Ayen wan asan ra sa vwẹ owọ shue na vrẹ re;

Ayen ghwọrọ ason na vwẹ Giba;

Rema phariẹ, Gibia ri Sọl djẹ re.

O kpogho obọ ro che vwo djubi vwẹ asan ugbenu rẹ ọmọtẹ ri Zayọn,

Ugbenu otete ri Jerusalẹm.

33 Nighere! Ọrovwori rẹ uyota na, Jihova rẹ otuofovwin,

Gbọ eghọn rẹ irhe she brabra;

A gbọ irhe ri me gron she teyen otọ,

Ka rha vwẹ i ri kpenu vwo kpotọ.

34 Ọ vwẹ ushurhe vwọ gbọ asan ro me din vwevunrẹ egbo na,

Ọgba ọvo che genre Lẹbanọn she.

11 Omoghọn ọvo cha djẹ vwo nẹ uchuku ri Jẹsi rhe,

Ẹro rọ sa nẹ awọ rọyen rhe cha mọ omamọ.

 2 Ẹwẹn ri Jihova cha dia oma rọyen,

Ẹwẹn rẹ aghwanre kugbe ọ rẹ ẹruọ,

Ẹwẹn rẹ uchebro kugbe ọ rẹ ọrho,

Ẹwẹn rẹ erianriẹn kugbe ọ rẹ oshọẹdjẹ ri Jihova.

O che guẹdjọ vwo nene oborẹ ẹro rọyen ghwa mrẹẹ,

Yẹrẹ vwẹ ọghwọku phia fikirẹ oborẹ erhọ rọyen ghwe nyoo.

 4 O che guẹdjọ rẹ ihwo ri kpotọ na vẹ orhiẹn abavo,*

Ọ cha vwẹ ọghwọku phia vwẹ ọsoso fikirẹ ihwo dẹndẹn rẹ akpọ na.

Ọ cha vwẹ ọkpọ rẹ unu rọyen vwọ ghwiẹ akpọ na

Je vwẹ odju* rẹ ẹbẹrunu rọyen vwọ teyen ihwo umwemwu hwe.

 5 Ophiọnphiọn cha dia umuehun rẹ ehun rọyen,

Evun-ẹfuọn me rha dia umuehun rẹ ọchọn rọyen.

 6 Iwofu* vẹ omogodẹ cha dia kugbe vwẹ ọmọke,

Ẹmẹvwe vẹ ubido che sherhẹn kugbe,

Ọmọ rẹ erhuẹn vẹ okpohrokpo* kugbe eranvwe re pha tubie tubie, ayen eje cha dia kugbe;*

Omotete kọyen che sun ayen.

 7 Erhuẹn vẹ okorhi cha riemu vwẹ asan ọvo,

Emọ rayen che sherhẹn kugbe.

 8 Ọmọ ro vievie cha heha vwẹ asan rẹ ọrobiebi dia,

Ọmọ ra djẹre evie nu che duvwun obọ rọyen phiyọ unu rẹ ọrọdekọ ro vwo obi.

 9 Ayen cha so omaẹwan vuọvo

Yẹrẹ so oghwọrọ vuọvo vwẹ ugbenu ọfuanfon mẹ naa,

Kidie akpọ na cha vọn vẹ erianriẹn ri Jihova

Kirobo rẹ ame vọn abadi.

Ẹgborho na che bro ra vwọ kẹ odjekẹ,*

Asan rẹ omaerovwon rọyen cha vọn vẹ urinrin.

13 Omaẹriọ rẹ Ifrem che no,

A cha ghwọrọ ihwo re vwọso Juda.

Ifrem rha cha rioma kpahen Judaa,

Yẹrẹ kẹ Juda cha vwọso Ifremuu.

14 Ayen cha họrhọ nene eghwrọrọ* rẹ ihwo ri Filistia kpo ẹbẹre ọnre shera;

Ayen che koko gborho ekuakua rẹ ihwo rẹ Ẹbẹre Ọnre Va Nẹcha na.

Ayen cha riẹn abọ rayen phia vwọso* Idọm kugbe Moab,

Ihwo rẹ Amọn ke cha dia obotọ rayen.

15 Jihova cha ghare uto* rẹ abadi rẹ Ijipt*

Ji kpogho obọ rọyen phiyọ enu rẹ Urhie na.*

Ọ cha vwẹ odju* ọrhorhorho rọyen vwọ ghwiẹ vwevunrẹ* ọkẹre ighwrẹn rọyen,

Je nẹrhẹ ihwo yan wanvrẹ vẹ isabatu rayen.

16 Idjerhe rode ọvo ro nẹ Asiria rhe cha dia vwọ kẹ uchekotọ rẹ ihwo rọyen ri chekọ,

Kirobo rọ hepha vwọ kẹ Izrẹl vwẹ ẹdẹ ro nẹ otọ rẹ Ijipt rhe.

“Me kpẹvwẹ owẹ, E Jihova,

Kidie dede nẹ wo muophu kpahan ovwẹ jovwo,

Ememerha na ophu wẹn kpotọ, wo de bru vwe uche.

Me cha vwẹrosuọ, oshọ gbi mu vwee;

Kidie Jah* Jihova yen ogangan mẹ vẹ ẹgba mẹ,

O rhi hirhephiyọ esivwon mẹ re.”

 3 Wo che vo ame vẹ aghọghọ

Vwo nẹ igbugbu rẹ esivwon.

“Vwẹ akpẹvwẹ kẹ Jihova, se odẹ rọyen,

Jẹ a riẹn iruo rọyen vwẹ ohri rẹ ihwo na!

 6 Kperi phia wo ji kperi vẹ aghọghọ, wẹ rọ dia* Zayọn,

Kidie Ohwo Ọfuanfon rẹ Izrẹl rọhẹ ohri rẹ ovwan na ohwo rode.”

Kperi se ayen, dju obọ wẹn,

Rere ayen sa vwọ rhe inurhoro rẹ ihwo ride na.

Mi se egba ofovwin mẹ rere ayen dje ophu mẹ phia,

Ihwo mẹ re ghọghọ vẹ omaẹkparọ.

 4 Kerhọ! Otu buebun hẹ igbenu na;

Edo na pha kerẹ ọ rẹ ihwo buebun!

Kerhọ! Edo rẹ uvie sansan na,

Rẹ ẹgborho re ghwẹ koko!

 5 Jihova kugbe ekuakua ofovwin rẹ ophu rọyen

Nẹ otọ oshesheri cha,

Ayen nẹ oba rẹ idjuvwu na cha,

Rere ọ vwọ ghwọrọ akpọ na eje.

 7 Kọyensorọ abọ eje cha vwọ dia ghwrọghọ,

Ubiudu ri kohwo kohwo cha vwọ wran vẹ oshọ.

Iriẹn yọnrọn ayen vẹ ọmiaovwẹ,

Kerẹ aye rọ chuvwiẹ.

Ayen nẹ ohwohwo vẹ oshọ,

Vẹ ọmiaovwẹ rọ teyenphia vwẹ opharo rayen.

 9 Nighere! Ẹdẹ ri Jihova cha,

Vẹ ophu kugbe ophu rọ tuan, o che gbe arodọnvwẹ kẹ ohwo vuọvoo,

Ro vwo ru otọ na phiyọ obo ri muẹ ohwo oshọ

Je ghwọrọ irumwemwu rẹ otọ na no.

10 Kidie isio rẹ idjuvwu na kugbe ẹko rayen*

Cha vwẹ elo rayen vwọ phiaa;

Ọnre na che muebri ọke rọ da va rhe,

Emeranvwe na je cha vwẹ elo rọyen vwọ phiaa.

11 Me cha nọ akpọ na orhiẹn fikirẹ umwemwu rọyen,

Kugbe irumwemwu na fikirẹ umwemwu rayen.

Mi che phioba phiyọ omaẹkparọ rẹ ohwo rọ kparoma,

Je vwẹ isun re kparoma ri shenyẹ ihwo na vwo kpotọ.

12 Me cha nẹrhẹ ohworakpọ bẹn ẹmrẹ vrẹ oro re ru fon,

Ihworakpọ me rha bẹn ẹmrẹ vrẹ oro rẹ Ofiẹ.

13 Ọyena yen sorọ me cha vwọ nẹrhẹ idjuvwu na kpogho,

E che kpogho akpọ na nẹ ẹdia rọyen

Fikirẹ ophu ri Jihova rẹ otuofovwin vwẹ ẹdẹ rẹ ophu ọtuatua rọyen.

14 Kerẹ uzo ra bẹrẹ ibefi rọyen, kerẹ ichuru ri vwo ohwo ro che koko ayeen,

Ọvuọvo che rhivwin bru ihwo robọ rọyen;

Ọvuọvo cha djẹ kpo otọ robọ rọyen.

15 Kohwo kohwo ra mrẹre e che duvwon fi,

Kohwo kohwo re muru a cha vwẹ ọlọkọ teyọn hwe.

16 A cha nyavwe emọ rayen kẹnẹkẹnẹ vwẹ irharo rayen,

A cha kua ekuakua rẹ iwevwin rayen fiotọ,

A je cha gba eya rayen du.

17 Me kpara ihwo ri Midia vrẹn vwọsua ayen,

Ri nẹ idọnọ efuanfon fi emuọvoo

Ri vwo omavwerhovwẹn kpahen oroo.

18 Imirhabọ rayen cha guọghọ ighene eshare;

Ayen cha re ehrọre rẹ akpẹn rẹ evuun

Yẹrẹ gbe arodọnvwẹ kẹ emọọ.

19 Babilọn, uvie ro me vwo urinrin kparobọ* vwẹ usun rẹ uvie sansan na,

Erhuvwu vẹ oborẹ ihwo ri Kaldia vwọ yonma,

Cha dia kerẹ Sọdọm vẹ Gomora ọke rẹ Ọghẹnẹ vwo phi ayen kparobọ.

20 O vwo ọke vuọvo ra cha vwọ dia ọfaa,

Yẹrẹ kọ cha dia asan ra cha dia vwẹ uvwiẹ na ejee.

Ohwo rẹ Arab vuọvo cha vwẹ utughẹ rọyen vi vwẹ etiyiin,

O ji vwo osuigodẹ vuọvo ro che mu igodẹ rọyen kpo etiyin re rovwomaa.

21 Eranvwe rẹ aton che sherhẹn totọ vwẹ etiyin;

Iwevwin rayen cha vọn vẹ ikpukpurhu.

Igomugoro cha dia etiyin,

Ẹvwe rẹ aghwa* che pho kraekrae vwẹ etiyin.

22 Eranvwe rẹ aghwa ri kperẹ che kperi vwẹ iwevwin rọyen ri kpenu,

Eranko rẹ aghwa* me rha vọn eguan rẹ ivie iyoyovwin rọyen.

 5 Jihova vwirhin ọkpọ rẹ orumwemwu na re,

Ọkpọ rẹ isun na,

 6 Ohwo rọ vwẹ ubi dje ihwo vẹ ophu vwọrẹ jobọ ẹdajo,

Ohwo ro muẹkpahan ẹgborho ọkieje je vwẹ ophu phiẹ ayen kparobọ.

 8 Irhe ri junipa na dede ghọghọ fiki wẹn,

Ọtiọyen ji te isida ri Lẹbanọn.

Ayen ta, ‘Rhanvwẹ ọke wo vwo she na,

Obrirhe vuọvo je rhe vwọso avwanree.’

 9 Ushi* na dede vwẹ obotọ, oyanghan herọ

Rẹ ayen vwọ rhe vwa wẹ vwẹ ọke wọ da rhe.

Fiki wẹn, ọ rhọvwọn ihwo ri ghwuru rehẹ evun rọyen,

Isun* rẹ akpọ na eje ri shenyẹ ihwo.

10 Ayen eje da ton ota eta phiyọ je ta kẹ wẹ nẹ,

‘Wọ je rhe vwiẹrẹ kerẹ avwanre re?

11 A vwẹ omaẹkparọ vẹ edo rẹ ekuakua rẹ uhworo ri vwo ifi tẹnrẹnrẹn wẹn

Vwo kpotọ kpo obo Ushi.*

Ihori hra nene obotọ wẹn kerẹ ehwa,

Ihori kọyen wo rhe vwo phopho.’

12 Gbe nighe oborẹ wo she nẹ odjuvwu rhe,

E ọ ro lo na, ọmọ rẹ urhiọke!

Nighe obo ra gbọ wẹ she teyen akpọ na,

Wẹwẹ ro phiẹ ẹgborho kparobọ na!

Me cha kpare ekete mẹ kpenu vwọ vrẹ isio rẹ Ọghẹnẹ na,

Mi che chidia enu rẹ ugbenu rẹ omẹvwa na,

Vwẹ ẹbẹre ro me sheri rẹ obohwẹre ọnre na.

14 Mi che yerin kpenu vrẹ enu rẹ evwru na;

Mi che ru oma mẹ họhọ Ọ ro Me Kpenu na.’

15 Ukperẹ ọtiọyen, a cha vwẹ owẹ kpotọ kpo obo Ushi* na,

Kpo asan ro me kodo vwẹ ukpotọ na.

16 Ihwo re mrẹ wẹ ke cha tẹnrovi we;

Ayen cha nabọ fuẹrẹn owẹ, ayen me tanẹ,

‘Ọnana yen ohwo ro kpogho akpọ na,

Ohwo ro kpogho uvie sansan na,

17 Rọ nẹrhẹ akpọ na dia kerẹ aton

Ji phi irere rọyen kparobọ,

Ohwo rọ rhọnvwe siobọnu ihwo ro muru nẹ i rhivwin kpoo na?’

18 Ivie ri chekọ eje rẹ ẹgborho na,

E, ayen eje sherhẹn totọ vwevunrẹ urinrin,

Ọvuọvo vwevunrẹ ushi* robọ rọyen.

19 Ẹkẹvuọvo e do we kufia, wo vwo ushii,

Kerẹ okankọn* rọ djẹ rhe obọ re vwo utuoma kpahen,

Ihwo ra vwẹ ọlọkọ duvwun hwe rhurhu uwe muotọ,

Ri kpo obotọ bru ikuta rehẹ ukpotọ,

Kerẹ irivwin re chiyin muotọ.

20 Wọ cha vwomaba ayen vwẹ ushii,

Kidie wọ ghwọrọ otọ robọ wẹn,

Wo hwe ihwo robọ wẹn.

21 Muegbe rẹ asan re de che hwe emọ rọyen

Fikirẹ abe rẹ esẹ rayen ride,

Rere ayen vwo je vrẹn je reyọ otọrakpọ na

Je fan irere rayen vọn otọ na.”

“Kirobo ri mi vwori vwẹ ẹwẹn, ọtiọyen ọ cha phia,

Kirobo ri mi brorhiẹn rọyen, ọtiọyen o che rugba.

25 Me cha ghwọrọ ihwo rẹ Asiria vwẹ otọ mẹ,

Mi che chiyon muotọ vwẹ enu rẹ igbenu mẹ.

E che si urhekpe rọyen vwo nẹ ayen,

Ji mu oghwa rọyen vwo nẹ igabọ rayen.”

26 Ọnana yen orhiẹn re bru hwe* akpọ na eje,

Ọnana yen obọ ra riẹn phia vwọso* ẹgborho na eje.

27 Kidie Jihova rẹ otuofovwin brorhiẹn nure,

Kẹ ono yen sa vwọsuọ?

Obọ rọyen riẹn phia,

Kẹ ono yen se kpirhon?

29 “Ovwan ọvuọvo ghọghọọ, Filistia,

Kidie e vwirhin ọkpọ rẹ ohwo rọ ghwiẹ ovwan naa.

Kidie ọrọdekọ ro vwo obi che nẹ uvwiẹ rẹ ọrọdekọ rhe,

Ọmọ rọyen cha dia ọrọdekọ rọ la erhanre jẹ ọ rhan.*

30 Rẹ ọmọkpako rẹ ohwo ro kpotọ vwọ riemu

Rẹ igbere vwo sherhẹn vwẹ ofuvwegbe ye,

Me cha vwẹ owẹnvwe vwo hwe ihwo* wẹn ghwu,

Ji hwe obo ri chekọ vwẹ oma wẹn ghwu.

Kidie ivwirhi nẹ obohwẹre ọnre cha,

O vwo ọvuọvo ro bo ghwru nẹ usun rayeen.”

Nẹ Jihova vwẹ uchivwo ri Zayọn vi re,

Nẹ ihwo ri kpotọ vwẹ usun rẹ ihwo rọyen cha reyọ vwo ru adjarhọ.

Kidie nẹ a ghwọrerọ totọ vwẹ ason vuọvo,

Ar ri Moab fotovwin re.

Kidie nẹ a ghwọrerọ totọ vwẹ ason vuọvo,

Kiẹ ri Moab fotovwin re.

 2 O yerin kpo obo Uwevwin na* ji kpo Daibọn re,

O kpo asan ri kpenu na ra viẹ.

Ayen eje vwerhe oma vwẹ enu rẹ iwevwin rayen vẹ ọsuorere rayen;

Ayen viẹ rẹ ayen vwo wontọ na.

 4 Hẹshbọn kugbe Ẹliela kperẹ;

E nyupho rayen shesheri vwẹ Jehaz.

Ayen viẹ rẹ ayen vwo yerẹn ugbenu ri Luhit;

Ayen viẹ fikirẹ oghwọrọ na rẹ ayen vwọ hẹ idjerhe kpo Horoneim.

 6 Kidie ame ri Nimrim kpọ yamu;

Odin wọnwọnwọn na yamu,

Odin na ghwure, odin wọnwọnwọn vuọvo rhe chekọọ.

 7 Ọyensorọ ayen vwo muẹ ekuakua ri chekọ vwẹ asan rẹ ayen sẹro rẹ erọnvwọn phiyọ kugbe efe rayen yanran;

Ayen shariẹ iyara* rẹ irhe ri pọpla vrẹ.

Uvwerhe na te Ẹgleim;

Uvwerhe na te Biẹ-ilim.

 9 Kidie ame ri Daimọn vọnre vẹ ọbara,

Mi ji vwo emu buebun ri mi che ru Daimọn:

Okpohrokpo ọvo vwọ kẹ ihwo ri Moab re djẹ vabọ

Kugbe ihwo ri chekọ vwẹ otọ na.

16 Reyọ egbon ọvo vwo nẹ Sila

Rere wọ wan aton na kpo ugbenu rẹ ọmọtẹ ri Zayọn

Ra vwọ kẹ osun rẹ otọ na.

 2 Kerẹ ọphran ra djẹ vwo nẹ ẹho rọyen,

Ọtiọyen emetẹ ri Moab cha dia vwẹ asan ame ra sa vwẹ owọ shue rẹ Anọn.

Ọ ro shenyẹ ihwo na che te oba rọyen,

Oghwọrọ na che vwoba,

A me rha ghwọrọ ihwo ri chiyẹn ihwo efa muotọ vwo nẹ otọrakpọ na.

Ohwo ro chidia phiyọ enu rọyen vwẹ utughẹ ri Devid cha fuevun;

O che guẹdjọ ọsoso ji brorhiẹn rẹ ophiọnphiọn kpakpata.”

 6 Avwanre nyo kpahen omaẹkparọ ri Moab—ọ kparoma gangan—

Omaephuo, omaẹkparọ, kugbe ophu rọyen;

Ẹkẹvuọvo eta ghevweghe rọyen na che vwoba.

 7 Ọtiọyena Moab che vwerhe oma vwọ kẹ Moab;

Ayen eje che vwerhe oma.

 8 Egba rẹ ivaini ri Hẹshbọn vwioro re,

Ivaini ri Sibma,

Isun rẹ ẹgborho na chiyin eghọn rọyen re mọ emamọ rẹ igrepu* muotọ re;

Eghọn na te Jeza re;

E hẹrabọ ro aton na.

Me cha vwẹ ameoviẹ mẹ vwọ kpọrhọ owẹ, E Hẹshbọn kugbe Ẹliela,

Kidie ukperi re kperẹ fikirẹ emamọ rẹ ọke uvo wẹn kugbe ọke rẹ orhọ wẹn vwoba re.*

10 E si omavwerhovwẹn kugbe aghọghọ vwo nẹ ogba ra kọn irhe re mọ emamọ na phiyọ,

A rha so ine rẹ aghọghọ yẹrẹ kperẹ ukperi vwẹ ogba rẹ ivaini naa.

Ọ ro chiyẹn igrepu rhe chiyẹn igrepu vwẹ asan re de mie iwaini naa,

Kidie me nẹrhẹ ukperi na dobọji re.

11 Ọyena yen sorọ me vwọ phariẹ vwẹ obevun fikirẹ omaemuophiyọ mẹ kpahen Moab,

Kerẹ ihwehworo rẹ ihapu,

Obevun mẹ guan fikirẹ Kiẹ-harisẹt.

“Nighere! Damaskọs rha cha dia orere ọfaa,

O che hirhephiyọ asan ra ghwọrọ totọ.

 2 A cha kpairoro vrẹ irere rẹ Aroa;

Ayen che hirhephiyọ asan rẹ ichuru de sherhẹn totọ

O vwo ohwo vuọvo rọ cha djoshọ mu ayeen.

 3 Irere ra gbogba riariẹ rha cha dia Ifremuu,

Usuon rhe che nẹ Damaskọs rhee;

Ihwo ri chekọ vwẹ Siria

Cha họhọ urinrin rẹ ihwo rẹ Izrẹl,”* ọtiọyen Jihova rẹ otuofovwin tare.

 4 “Vwẹ ẹdẹ yena, urinrin ri Jekọp che shekpotọ,

Oma rọyen rọ pha tubie tubie na che si dọn.

 5 Ọ cha họhọ ọke rẹ ohwo ro vuẹn orhọ vwọ ghwẹ iwiti ri mudia koko

Obọ rọyen brẹ iwiti,

Kerẹ ọke rẹ ohwo de gbugbon rẹ iwiti vwẹ Iyara* ri Rẹfeim.

 6 Ugbon ọvo yen che chekọ,

Kerẹ ọke re de kpogho urhe rẹ oliv:

Ibi ivẹ yẹrẹ erha rẹ emamọ rẹ oliv re vware ọvo yen chekọ vwẹ oghọn ro me kpenu na,

Ibi ẹne yẹrẹ iyorin ọvo yen chekọ vwẹ eghọn rọyen re mọ emamọ,” ọtiọyen Jihova Ọghẹnẹ rẹ Izrẹl tare.

 9 Vwẹ ẹdẹ yena, irere rọyen ra gbogba riariẹ cha dia kerẹ asan ra kpairoro vrẹ vwevunrẹ egbo,

Kerẹ oghọn ra kpairoro vrẹ vwẹ obaro rẹ ihwo rẹ Izrẹl;

O che hirhephiyọ otọ ofefe.

10 Kidie Ọghẹnẹ rẹ esivwon wẹn chọrọ owẹ ẹro;

Wọ rha karophiyọ Oragha rẹ adjarhọ wẹẹn.

Ọyensorọ wọ vwọ kọn ekankọn iyoyovwin sansan*

Je kọn okankọn ọboba rẹ ọrhorha* phiyọ ohri rayen.

11 Vwẹ aruphẹn, wọ jomaotọ gbogba riariẹ ekankọn wẹn,

Vwẹ urhiọke, wọ da nẹrhẹ ubi wẹn djẹ,

Ẹkẹvuọvo orhọ na cha ranvwiẹ vwẹ ẹdẹ rẹ ọga kugbe omiamiavwe re che se sivwin kpoo.

12 Kerhọ! Ihwo buebun do edo rẹ oyanghan,

Ayen do kerẹ abadi rọ họnra!

Ẹgborho buebun do edo,

Edo rayen pha kerẹ edo rẹ ọgbogho rẹ ame buebun!

Ọ cha ghwọku ayen, kẹ ayen cha djẹ shesheri,

Kerẹ ehọrọ rẹ ekankọn rẹ odju muẹ vwẹ enu rẹ ugbenu

Kerẹ ekpia* ro djuẹ riariẹ fikirẹ ogiribo.

Ọnana yen ẹkẹn rẹ ihwo re kua ekuakua rẹ avwanre

Ẹkẹn rẹ ihwo ri gborho avwanre.

18 Okpetu rode vwọ kẹ otọ rọ vọnre vẹ edo rẹ ibekpe rẹ insẹti re rhan

Vwẹ ekogho rẹ irhie rẹ Itiopia!

 2 O ji ikọn wan abadi na,

Ayen da vwẹ ekọ ra vwẹ papairọs vwo ru vwọ shariẹ ame na vrẹ, rọ vwọ ta:

“Ovwan yanran, ovwan ikọn re djẹ kpakpata na,

Bru ẹgborho rọ pha grongron rẹ oma rọyen je pha hwrẹhwrẹhwrẹ* na ra,

Ihwo ra djoshọ rayen vwẹ kasan kasan,

Ẹgborho rọ goma ro ji phiẹkparobọ,*

Rẹ urhie hwerhe otọ rọyen yanran na.”

 3 Ovwan ihwo eje re dia otọ na kugbe ovwan re dia akpọ na,

Oborẹ ovwan cha mrẹ cha họhọ oka* ra kpare kpenu vwẹ enu rẹ igbenu na,

Ovwan che nyo edo rọ họhọ edo rẹ ọgban re hworo.

“Emu vuọvo che kpokpo uvwee, mi che ni* asan mẹ re me rhuẹrẹ phiyọ na,

Kerẹ oheri ọgangan rẹ uvo sua,

Kerẹ irho ro rho kuotọ vwẹ ọke rẹ aruọke na da rhorha vwẹ ọke rẹ orhọ.

 5 Kidie tavwen orhọ na ki te,

Vwẹ ọke rọ da kpipho nu, rẹ idodo na de hirhephiyọ igrepu rọ vware,

Ka cha vwẹ erọnvwọn re vwo brẹ abọ rẹ irhe vwo bru eghọn boba na kufia,

Bru abọ rayen no je ghwẹ ayen kufia.

 6 A cha yanjẹ ayen eje vwo vwọ kẹ ephran rẹ igbenu re ria eranvwe

Vwọ kẹ eranvwe re djoma rẹ otọrakpọ na,

Ephran na cha re ayen vwẹ ọke uvo,

Eranvwe re djoma rẹ otọrakpọ na eje me rha re ayen vwẹ ọke rẹ orhọ.

 7 Vwẹ ọke yena, a cha reyọ okẹ rhe Jihova rẹ otuofovwin na,

Vwo mie ẹgborho rọ pha grongron rẹ oma rọyen je pha hwrẹhwrẹhwrẹ na,*

Vwo mie ihwo ra djoshọ rayen vwẹ kasan kasan,

Vwo mie ẹgborho rọ goma ro ji phiẹkparobọ,*

Rẹ urhie hwerhe otọ rọyen yanran

Kpo Ugbenu ri Zayọn, asan ra vwẹ odẹ ri Jihova rẹ otuofovwin na vwo se.”

Eghẹnẹ ri fiemuu rẹ Ijipt cha phariẹ vwẹ obaro rọyen,

Ubiudu rẹ Ijipt cha wran vwẹ oma rọyen.

 2 “Me cha kpare ẹwẹn rẹ ihwo rẹ Ijipt vwọso ihwo rẹ Ijipt,

Ayen cha họnre ohwohwo,

Ohwo ọvuọvo vwọso oniọvo rọyen kugbe ọrivẹ rọyen,

Orere vwọso orere, uvie vwọso uvie.

 3 Ẹwẹn rẹ Ijipt cha yanghan ku vwẹ oma rọyen,

Mi che phi otighi phiyọ iroro rọ jẹre.

Kẹ ayen che bru eghẹnẹ ri fiemuu,

Ihwo ri ruẹ inehweri, ihwo ri nene emekashe rẹ Idẹbono ruẹ kuẹgbe, kugbe ebọepha ra.

 4 Mi che phi Ijipt phiyọ obọ rẹ onini ro sianro,

Ovie rọ djoma che sun vwẹ enu rayen,” ọtiọyen Ọrovwori rẹ uyota na, Jihova rẹ otuofovwin tare.

 5 Ame rẹ abadi na cha kpọ muotọ,

Urhie na cha kpọ yamu.

 6 Irhie na che gbon erharhe ọnrhe;

Ugbo ri Nail rẹ Ijipt cha kpọ yamu.

 7 Ekankọn rehẹ orhoma rẹ urhie ri Nail, vwẹ unu ri Nail na,

Kugbe otọ na eje ra kọn ubi phiyọ vwẹ orhoma ri Nail na cha yamu.

 8 Ihwiyerin na che vweri,

Ihwo re fan eghọre phiyọ Nail na che vwerhe oma,

Ihwo re fan ariri rayen phiyọ ame na rhe che buun.

 9 Oma cha vo ihwo re vwẹ okankọn re se iflasi vwo ruẹ amwa

Kugbe ihwo ri ruẹ emwa efuanfon vwẹ urhe re vwo rhuon amwa.

10 A cha ghwọrọ ihwo rọyen ri rhuon emwa;

Ihwo eje rọ reyọ vwo ruiruo che muomaphiyọ.*

“Mẹvwẹ ọmọ rẹ ihwo ri vwo aghwanre,

Ọmọ rẹ ivie rẹ awanre”?

13 Isun ri Zoan dje uruemu rẹ ẹkpa phia;

A phiẹn isun ri Nọf;*

Igbuyovwin rẹ ivwiẹ rayen suẹn Ijipt ghwru.

14 Jihova ku ẹwẹn rẹ oyanghan kuo;

Ayen sun Ijipt ghwru vwẹ kemu kemu ro ruẹ,

Kerẹ ọgbaudi ro gele vwẹ enu rẹ obo rọ kpare.

15 Ijipt che vwo iruo vuọvo ro che ruu,

Owenẹ ọ dia uyovwin yẹrẹ urhurhu, odin rọ djẹ rhe obọ yẹrẹ ọ ro gron kpenu re.*

Ọ cha kerẹ ogiribo ro djuẹ wan ẹbẹre obọrhen ọnre na,

Vwo nẹ aton na rhe, vwo nẹ otọ ro muoshọ rhe.

Ọ rọ phiẹn ihwo na dje uruemu rẹ ophiẹnvwe phia,

Ọ rọ ghwọrọ na ghwọrọ.

Iriẹn yọnrọn ovwẹ

Kerẹ e rẹ aye rọ chuvwiẹ.

Ofu dje vwe hwe, mi rhe nyẹmee;

Ofu dje vwe hwe, me rha mrorẹẹ.

 7 Ọ da mrẹ akpẹrẹ rẹ ofovwin vẹ iyesi ivẹ,

Akpẹrẹ rẹ ofovwin rẹ ekẹkẹtẹ,

Akpẹrẹ rẹ ofovwin rẹ ikamẹl.

“E Jihova, ọkieje yen mi vwo muẹdia enu rẹ uwevwin orhẹrẹ na vwẹ aruphẹn,

Mi mi rhe mudia asan ra tanẹ mi mudia phiyọ kason kason.

10 E ihwo mẹ re wonrori,

Ọka* rẹ asan re de wonro ibi ekankọn mẹ,

Me niyẹnrẹn rẹ oborẹ mi nyo mie Jihova rẹ otuofovwin, Ọghẹnẹ rẹ Izrẹl vwọ kẹ wẹ.

Vwevunrẹ egbo rẹ aton na yen wọ da cha ghwọrọ ason na,

E ẹko rẹ ihwo ri Didan ri kpo oyan.

14 Mu ame rhe vwa ọ rẹ urhuru rẹ ame siẹ na,

Ovwan ihwo re dia otọ ri Tima,

Reyọ ibrẹdi rhe ọ rọ djẹ na.

15 Kidie ayen djẹ fikirẹ elọkọ, elọkọ re yoro phia,

Fikirẹ umurhabọ re siri, kugbe fikirẹ ogidi rẹ ofovwin na.

 2 Wọ vọnre vẹ otighi,

Orere ro do, orho ra kpare kpenu.

Ihwo wẹn ri ghwuru, ọ dia ọlọkọ yen e vwo hwe ayeen,

Yẹrẹ kẹ ayen ghwuru vwẹ ofovwiin.

E mu ihwo eje ra mrẹre kpo uwodi,

Dede nẹ ayen djẹ kpo asan oshesheri.

 4 Kọyensorọ me vwọ ta: “Wo gbi ni vwee,

Me cha viẹ gangan.

Wọ davwẹngba wo vwo bru vwe uche

Fikirẹ oghwọrọ rẹ ọmọtẹ rẹ ihwo mẹẹ.

 5 Kidie ọyen ẹdẹ rẹ oyanghan, ophikparobọ kugbe oshọ,

Vwo nẹ obọ rẹ Ọrovwori ro Me Kpenu, Jihova rẹ otuofovwin na rhe,

Vwevunrẹ Iyara rẹ Emramrẹ na.

A ghwọrọ igbẹhẹ na, ihwo kperẹ vwọ kẹ ukẹcha

E nyo oviẹ rayen vwẹ ugbenu na.

 6 Ilam mu ekpu rẹ edada na

Ọ gua vwẹ enu rẹ akpẹrẹ kugbe iyesi rẹ ofovwin,

Kiẹ si obo re vwo rhurhu ekpọfia na no.*

 7 Iyara* wẹn ri me yovwin

Cha vọn vẹ ekpẹrẹ rẹ ofovwin,

Iyesi* na cha reyọ ẹdia rayen vwẹ asan anurhoro na,

 8 E che si ochọnvwe ri Juda no.

12 Vwẹ ẹdẹ yena, Ọrovwori ro Me Kpenu, Jihova rẹ otuofovwin na,

Che se ihwo nẹ e viẹ ji vwere uvweri,

Nẹ ayen wanre uyovwin ji ku iwun rẹ esiso phiyọ.

13 Ẹkẹvuọvo ukperẹ ayen vwo ru ọtiọyen, kẹ ayen ria orẹ je ghọghọ,

Kẹ ayen hwe erhuẹn kugbe igodẹ,

Kẹ ayen ria eranvwe je da iwaini.

 3 E mu iwiti* ri Shaihọ* kugbe orhọ ri Nail wan enu rẹ ame buebun,

Taya mrẹ erere rọyen vwo nẹ enana rhe,

Ọnana fierere kẹ ẹgborho na.

 4 Jẹ oma vo owẹ, E Saidọn, wẹwẹ rẹ asan ọgangan rẹ abadi na,

Kidie abadi na tare:

“Evun rẹ uvwiẹ je rhe miavwe ovwẹẹ, mi ji rhi vwiẹẹ,

Siẹvo ke gba yọnrọn ighene eshare yẹrẹ eya* ghwanree.”

 5 Kirobo rọ hepha rẹ ayen vwo nyo kpahen Ijipt,

Ọtiọyen ọ je cha da ihwo ọke rẹ ayen de nyo kpahen Taya.

 8 Ono yen brorhiẹn nana kpahen Taya,

Rọ vwẹ isun vwo muẹ na,

Rẹ ineki rọyen ride dia isun na,

Re brọghọ phiyọ ewena rọyen oma vwẹ otọrakpọ na eje na?

 9 Jihova rẹ otuofovwin komobọ yen brorhiẹn nana,

Ro vwo phi oba phiyọ uruemu rẹ omaẹkparọ rọyen fikirẹ erhuvwu rọyen eje,

Rọ vwọ phọphọ ihwo eje re brọghọ phiyọ oma vwẹ otọrakpọ na eje.

11 Ọ riẹn obọ rọyen phiyọ enu rẹ abadi na;

O kpogho uvie sansan.

12 Ọ da ta: “Wọ rha cha ghọghọ ọfaa,

E ọ re shenyẹ na, ọmọtobẹ ri Saidọn.

Ọnana yen ihwo na—ọ dia Asiriaa—

Ayen ruro phiyọ asan rẹ eranvwe rẹ aton dia.

Ayen bọn iwevwin rẹ ofovwin ri kpenu kẹ oma rayen;

Ayen kporon iwevwin rọyen ride ri kpenu ra gbogba riariẹ totọ,

Ayen ghwọrerọ karekare.

14 Vwerhe oma, ovwan ikuna ri Tashish,

Kidie a ghwọrọ asan ọgangan rẹ ovwan na re.

Nabọ hworo ihapu wẹn;

So ine buebun,

Rere ayen vwọ karophiyọ owẹ.”

Ihwo na ọtiọyen ji te orherẹn na,

Odibo kugbe onini rọyen,

Odibo rẹ ọmọtẹ kugbe onini rọyen rẹ aye,

Ọ rọ dẹ kugbe ọ rọ shẹ,

Ọ ro momo kẹ ihwo kugbe ọ ro momo mie ihwo,

Ọ ra riosa rọyen kugbe ọriosa.

 3 Otọ na cha dia ofefe riẹriẹriẹ;

A cha kua fiotọ karekare,

Kidie Jihova ta ota nana nure.

 5 Ihwo re dia otọ na gbe otọ na ku,

Kidie ayen ruẹ nene irhi naa,

Ayen wene iji na,

Ji gbe ọphọ ri bẹdẹ* na ku.

 6 Ọyena yen sorọ otọ na vwọ ghwọrọ kuẹfia fikirẹ iyorin na,

Ihwo re dia evun rọyen riabe.

Ọyensorọ ihwo re dia otọ na vwọ hanvwe,

Imihwo keyen chekọ.

 7 Iwaini kpokpọ na yamu, ivaini kpokpọ na vwioro,

Ihwo eje rẹ oma vwerhan fiunu.

 8 Edo rẹ aghọghọ rẹ itamborini na vwọ phia fuen re;

Edo rẹ ihwo re riakpọ kuoma na fuen re;

Edo rẹ omavwerhovwẹn rẹ ihapu na vwọ phia fuen re.

 9 Ayen gbe da iwaini sua inee,

Udi ro muẹ ohwo yara vwọ kẹ ihwo re da.

10 Orho ra kpairoro vrẹ na guọghọ totọ;

A kanre kuwevwin kuwevwin rere ohwo vuọvo vwo jẹ ẹruọ.

Aghọghọ ejobi vwoba;

Aghọghọ rha hẹ otọ naa.

12 A guọghọ orere na totọ;

A guọghọ anurhoro na chẹghẹchẹghẹ hirhephiyọ erhurhu.

Kerẹ ọke re de kpogho urhe rẹ oliv,

Kerẹ ọke rẹ ugbon rẹ orhọ rẹ igrepu de vwoba.

14 Ayen cha kpare urhuru rayen,

Ayen che kperi ukperi rẹ aghọghọ.

15 Ọyena yen sorọ ayen cha vwọ vwẹ urinrin kẹ Jihova vwẹ ekogho rẹ urhukpẹ na;*

Ayen cha vwẹ urinrin kẹ odẹ ri Jihova Ọghẹnẹ rẹ Izrẹl vwẹ etọ rẹ ame riariẹ phiyọ rẹ abadi na.

Okpetu rode kẹ vwẹ! Ihwo re phiẹn ihwo na dje uruemu rẹ ophiẹnvwe phia;

Ihwo re phiẹn ihwo na vwẹ ophiẹnvwe vwọ phiẹn ihwo.”

18 Kohwo kohwo rọ djẹ fikirẹ edo rẹ uguegue che she ro ukpotọ,

Kohwo kohwo ro nẹ evunrẹ ukpotọ na cha, ufi che muo.

Kidie evakpo rẹ odjuvwu na che rhiephiyọ,

Ichivwo rẹ otọ na che kpogho.

19 Otọ na bẹrẹ rhiephiyọ;

E kpogho otọ na re;

Otọ na kpogho gangan.

20 Otọ na gele kerẹ ohwo rẹ udi muẹ,

O kpogho cha kpogho kpo kerẹ utughẹ rẹ odju muẹ.

Umwemwu rọyen pha họhọhọ yẹngbẹ vwẹ enu rọyen,

O che she, o rhe che se vrẹn ọfaa.

21 Vwẹ ẹdẹ yena, Jihova che gboja kẹ otuofovwin rehẹ obenu na

Kugbe ivie rẹ akpọ na vwẹ otọrakpọ na.

22 A cha ghwẹ ayen koko

Kerẹ ihwo re mu phiyọ uwodi ra ghwẹ koko phiyọ evunrẹ ukpotọ,

A cha kanre ayen phiyọ uwodi;

Ẹdẹ buebun da wan nu, ke che nenesi rayen.

23 A cha phọphọ emeranvwe na,

Oma cha vo ọnre ro lo na,

Kidie Jihova rẹ otuofovwin na rhe dia Ovie re vwẹ Ugbenu ri Zayọn kugbe Jerusalẹm,

Ọ vọnre vẹ urinrin vwẹ obaro rẹ ekpako rẹ ihwo rọyen.*

Me kpare owẹ kpenu, mi jiri odẹ wẹn,

Kidie wo ru emu rẹ igbevwunu,

Erọnvwọn re muegbe rọyen nẹ awanre rhe,

Wo ru ota wẹn gba, wo djerephia nẹ wẹwẹ ohwo ra sa vwẹroso,

 2 Kidie wọ rhẹriẹ orere ọvo phiyọ asan ra ghwẹ ikuta buebun phiyọ,

Wọ guọghọ orere ra gbogba riariẹ totọ.

Orere rẹ erhorha na rha dia orere ọfaa;

A rha cha rhoma bọọn.

 3 Ọyena yen sorọ ihwo re goma cha vwọ vwẹ urinrin kẹ wẹ;

Orere rẹ ẹgborho ri shenyẹ ihwo cha djoshọ wẹ.

 4 Kidie wọ rhe dia asan ọgangan vwọ kẹ ohwo ro kpotọ,

Asan ọgangan vwọ kẹ ovwiogbere vwẹ ọke rẹ ukpokpogho rọyen,

Adjarhọ vwẹ ọke rẹ ogiribo,

Ophie vwẹ ọke rẹ oheri.

Ọke rẹ ophu rẹ isun ri shenyẹ ihwo na da teyen igbẹhẹ kerẹ ogiribo,

 5 Kerẹ oheri vwẹ otọ ọyaya,

Wo fun edo rẹ erhorha.

Kirobo rẹ ophie rẹ evwru nẹrhẹ oheri kpotọ ye,

Ọtiọyen une rẹ isun ri shenyẹ ihwo na fọre riẹi.

 6 Vwẹ ugbenu nana Jihova rẹ otuofovwin che muegbe vwọ kẹ ihwo na eje

Udemu rẹ omamọ rẹ emuọre,

Udemu rẹ omamọ rẹ iwaini,*

Rẹ obọdẹn rẹ emuọre rọ vọnre vẹ otu rẹ ibeku

Rẹ omamọ rẹ iwaini ra rhẹre.

 7 Vwẹ ugbenu nana o che si orọnvwọn ro rhurhu ihwo na eje no

Kugbe amwa* re rhuonri re vwo rhurhu ẹgborho na eje.

 8 O che mu ughwu rọ bẹdẹ,

Ọrovwori ro Me Kpenu Jihova che rien ameoviẹ vwo nẹ opharo rẹ ihwo eje.

O che si ehwẹjẹ rẹ ihwo rọyen nẹ otọrakpọ na eje,

Kidie Jihova komobọ tarọ nure.

Avwanre phi ẹro phiyọ,

O che sivwin avwanre.

10 Kidie obọ ri Jihova cha dia enu rẹ ugbenu nana,

E che chiyin Moab muotọ vwẹ asan rọyen

Kerẹ odin re chiyin hirhephiyọ ẹko rẹ imaniọ.*

11 Ọ cha vwẹ abọ rọyen vwọ fa

Kirobo rẹ ohwo rọ rhẹrhẹ vwẹ abọ rọyen vwọ fa ame rọ sa vwọ rhẹrhẹ,

Ọ cha reyọ ona vwọ vwẹ abọ rọyen vwọ fa

Je vwẹ omaẹkparọ rọyen vwo kpotọ.

12 Orere ra gbogba riariẹ na, vẹ igbẹhẹ rẹ ochọnvwe rọyen ri kpenu na,

Ọ cha guọghọ totọ;

O che kporon she totọ hirhephiyọ ekpẹn.

 2 Rhie inurhoro na rere ẹgborho rẹ ọvwata na sa vwọ ruọ,

Ẹgborho rọ sẹro rẹ uruemu rẹ evun-ẹfuọn.

 3 Wọ cha sẹro rẹ ihwo re vwẹroso owẹ karekare;*

Wọ cha kẹ ayen ufuoma ro vwobaa,

Kidie owẹ yen ayen vwẹroso.

 4 Vwẹroso Jihova bẹdẹ,

Kidie Jah* Jihova yen Oragha ri bẹdẹ.

Ọ ghwọrerọ totọ,

Ọ ghwọrerọ totọ riẹriẹriẹ;

O muro teyen otọ.

 6 Awọ rẹ ihwo rẹ akpọ bẹn, awọ rẹ ihwo re vwo kpotọ

Che chiyon muotọ.”

Kidie wẹwẹ ohwo ọsoso,

Wo che ru idjerhe rẹ ọvwata riẹriẹriẹ.

 8 E Jihova, avwanre vwo nene idjerhe rẹ ẹdjọeguo wẹn na,

Wẹwẹ yen avwanre phiẹrophiyọ.

 9 Me vwẹ ubiudu* mẹ ejobi vwọ guọnọ owẹ vwẹ ason,

E, ẹwẹn mẹ guọnọ owẹ ọkieje;

Kidie ọke rẹ ẹdjọeguo de nẹ obọ wẹn rhe akpọ na,

Ihwo re dia otọ na ki yono kpahan ophiọnphiọn.

10 A da tobọ dje ẹroesiri kẹ orumwemwu,

O che yono obo re ruẹ obo ri shephiyọọ.*

Vwevunrẹ otọ rẹ ophiọnphiọn* dede, o che ru umwemwu,

Ọ je cha mrẹ ọrho ri Jihovaa.

12 E Jihova, wọ cha kẹ avwanre ufuoma,

Kidie erọnvwọn eje rẹ avwanre ruru

Owẹ yen ru ayen wiẹn vwọ kẹ avwanre.

13 E Jihova Ọghẹnẹ rẹ avwanre, inini efa sun avwanre,

Ẹkẹvuọvo odẹ wẹn ọvo yen avwanre se.

Kidie wọ rhẹriẹ opharo wẹn ni ayen

Rẹ wọ vwọ ghwọrọ ayen karekare rere e vwo jẹ ayen ẹkarophiyọ.

15 Wo ru ẹgborho na bunphiyọ, E Jihova,

Wo ru ẹgborho na bunphiyọ;

Wọ vwẹ urinrin kẹ oma wẹn.

16 E Jihova, vwẹ ọke rẹ ukpokpogho ayen djẹ bru we rhe;

Ayen vwẹ unu kpotọ ta evun rayen kẹ wẹ vwẹ ẹrhovwo vwẹ ọke ru wọ vwọ ghwọku ayen.

17 Kerẹ aye rọ mrevun rọ guọnọ vwiẹ

Rẹ evun rẹ uvwiẹ miavwa rọ je viẹ fikirẹ omiamiavwe,

Ọtiọyen avwanre hepha fiki wẹn, E Jihova.

18 Avwanre mrevun, evun rẹ uvwiẹ miavwe avwanre,

Ẹkẹvuọvo kọ ghwa họhọ nẹ odju yen avwanre vwiẹre.

Avwanre je rhe ghwa esivwon rhe otọ naa,

O ji vwo ohwo vuọvo re vwiẹre rọ cha dia otọ naa.

Ovwan rhọvwọn rere ovwan kperi ukperi rẹ aghọghọ,

Ovwan rehẹ evunrẹ ekpẹn!

Kidie irho wẹn pha kerẹ irho rẹ urhiọke,*

Otọ na che siobọnẹ* ihwo ri ghwuru rehẹ evun rọyen.

20 Yanran ihwo mẹ, ovwan ro ivun rẹ obevun rẹ ovwan,

Rere ovwan bi ẹchẹ rẹ ovwan gbe.

Ovwan siomanu vwẹ ọmọke

Bẹsiẹ ophu* na vwọ wanvrẹ.

21 Kidie nighere! Jihova nẹ asan rọ dia cha

Rọ vwọ nọ ihwo re dia otọ na orhiẹn kpahen umwemwu rayen,

Otọ na che tueghe ọbara ro ku kuotọ phia

O rhe che se rhurhu ihwo ro hwerii.”

27 Vwẹ ẹdẹ yena, Jihova cha vwẹ ọlọkọ rọyen rọ pha dandan, rhuarho, ro ji muoshọ na,

Vwọ nyavwe Levayatan,* ọrọdekọ rọ djẹ kpakpata na hwe,

Levayatan, ọrọdekọ rọ djẹ gugunu na,

Ọ cha teyen ọrọdekọ rode rọhẹ evunrẹ abadi na hwe.

Me sẹro rọyen te ason te uvo,

Rere ohwo vuọvo vwo jẹ oma ẹwan.

E jẹ o nene uvwe rhuẹrẹ kugbe;

E jẹ ufuoma dia vwẹ uvwre mẹ vẹ ọyen.”

 6 Vwẹ ẹdẹ re cha na, Jekọp cha vwẹ owọ muotọ,

Izrẹl cha ghwẹ ẹbe phiyọ je kpa ipho,

Emamọ rayen ke cha vọn otọ na.

 9 Ọtiọyena, enẹ yen e che vwo ru arhuẹrẹ fikirẹ umwemwu ri Jekọp,

Ọnana yen erere rọ cha mrẹ ọke re de si umwemwu rọyen no:

O che ru ikuta rẹ agbada na eje

Kerẹ ishọki ra lọre vworovworo,

A cha yanjẹ ekpọ rẹ ẹga* yẹrẹ asan ra da torhẹ insẹnsi vuọvo vwoo.

10 Kidie a cha kpairoro vrẹ orere ra gbogba riariẹ na;

A cha kpairoro vrẹ ji chukoku odin na kerẹ aton.

Etiyin yen ọmọ rẹ erhuẹn da cha re odin ji sherhẹn

Ọ cha re eghọn rọyen.

11 Ọke rẹ eghọn rọyen da ya re,

Eya ke cha rhe ji vwirhin ayen,

Ayen me reyọ ayen vwo koko erhanre.

Ọyensorọ Ọ rọ ma ayen che vwo jẹ arodọnvwẹ egbe kẹ ayen,

Ọ rọ ma ayen na che vwo jẹ ẹroesiri e dje kẹ ayen.

28 Okpetu rode vwọ kẹ erhu rẹ ovie* oyoyovwin* rẹ egbaudi rẹ Ifrem

Kugbe urinrin rẹ erhuvwu rọyen ro vwioro kerẹ ododo,

Rọhẹ uyovwin rẹ iyara ro yovwon emu rẹ ihwo rẹ iwaini muẹ!

Kerẹ osio rẹ imicho vẹ agbraran, odju rẹ ogiribo rọ ghwọrọ,

Kerẹ oghwe rode ro do edo ọgangan,

Ọ cha reyọ ogangan vwo do rhe otọrakpọ na.

 3 E che chiyin erhu rẹ ovie oyoyovwin*

Rẹ egbaudi rẹ Ifrem muotọ.

 4 Urinrin rẹ erhuvwu rọyen ro vwioro kerẹ ododo,

Rọhẹ uyovwin rẹ iyara ro yovwon emu na,

Cha họhọ ifigi boba rọ vwomaphia tavwen ọke uvo ki te.

 7 Enana ji bo ghwru fikirẹ iwaini;

Udi rayen ro muẹ ohwo na nẹrhẹ ayen gele.

Orherẹn kugbe ọmraro bo ghwrẹ fikirẹ udi ro muẹ ohwo;

Ayen rha riẹn oborẹ ayen ruẹẹ fikirẹ iwaini na,

Udi rayen ro muẹ ohwo na nẹrhẹ ayen gele;

Emramrẹ rayen nẹrhẹ ayen bo ghwrẹ,

Ayen brorhiẹn chọ.

 8 Imẹjẹ rayen vọnre vẹ oborẹ ayen kpare

—O nene asan eje.

 9 Ono yen e che yono ro de vwo erianriẹn,

Ono yen e che dje ovuẹ na fiotọ kẹ?

Ihwo ra ghwa djẹ evie obọ na,

Ihwo re ghwe mu jẹ evie rẹ ayen vie vwo na?

10 Kidie “iji vwọ kpahen iji, iji vwọ kpahen iji,

Urhi vwọ kpahen urhi, urhi vwọ kpahen urhi,*

Emerha etinẹ, emerha etiyin.”

“Iji vwọ kpahen iji, iji vwọ kpahen iji,

Urhi vwọ kpahen urhi, urhi vwọ kpahen urhi,*

Emerha etinẹ, emerha etiyin,”

Rere ọke rẹ ayen da yan,

Kẹ ayen cha kprowọ ji she kpuko

Ayen cha wan oma, she ro ufi, e mi ji mu ayen reyọ.

14 Ọtiọyena ovwan nyo ota ri Jihova, ovwan ihwo re yonma na,

Ovwan isun rẹ ihwo nana vwẹ Jerusalẹm,

15 Kidie ovwan ta:

“Avwanre vẹ Ughwu re ọphọ,

Avwanre vẹ Ushi* vwo ọrhọnvwekugbe.

Ọke rẹ oghwe ọgangan na da mwavwa vrẹ,

O che te avwanre omaa,

Kidie avwanre vwẹ efian vwo ru adjarhọ rẹ avwanre

Avwanre siomanu vwevunrẹ efian ẹvwọrọn.”

“Me vwẹ uchivwo vwo viẹ vwẹ Zayọn, ukuta ra davwen ni,

Ubienyẹ ọghanghanre rẹ uchivwo ọgangan.

17 Me cha vwẹ orhiẹn ọsoso vwo ru ufi rẹ ovwanvwọ na

Obo re dia ọsoso vwo ru orọnvwọn ra vwọ vwanvwa emu sẹ ọ phiọnre.*

Imicho che hwerhe adjarhọ rẹ efian na kufia,

Ame che ku asan re siomanẹ phiyọ na.

18 A cha phan ọphọ rẹ ovwan vẹ Ughwu rere na,

Ọrhọnvwekugbe rẹ ovwan vẹ Ushi* vwori na che mudiaa.

Ọke rẹ oghwe ọgangan na da mwavwa vrẹ,

Ọ cha ghwọrọ ovwan totọ.

19 Kọke kọke rọ da mwavwa vrẹ,

O che hwerhe ovwan yanran;

Kidie ọ cha mwavwe vrẹ kurhiọke kurhiọke,

Vwẹ aruphẹn kugbe ason.

20 Kidie ehwa na krẹn nọ obo ra riẹn oma phiyọ,

Amwa re rhuonri na hanvwe nọ ro vwo te vwo phopho.

21 Kidie Jihova che vrẹn kirobo ro ruru vwẹ Ugbenu ri Pẹrezim;

Ọ cha kparoma kirobo ro ruru vwẹ iyara* rọ kẹrẹ Gibiọn,

Rere o se vwo ruiruo rọyen—iruo rẹ igbevwunu rọyen—

Rere ọ sa vwọ wiowian rọyen—owian rọyen ro rhie ohwo unu.

22 Asaọkiephana, wọ vwẹ ovuẹ nana jehwẹẹ,

Rere e vwo jẹ ifi ra vwọ gba wẹ na esio gan phiyọ,

Kidie mi nyo mie Ọrovwori ro Me Kpenu Jihova rẹ otuofovwin na,

Nẹ e brorhiẹn rẹ oghwọrọ hwe otọ na eje.*

23 Ovwan kerhọ rere ovwan nyo urhuru mẹ;

Kerhọ rere ovwan nyo obo re me ta.

25 Ọke rọ da rhuẹrẹ otọ na nu,

Ọ dia kọ hrahra kumin obiebi nene je kọn kumin ghevweghe,

Ọ dia kọ kọn iwiti, imilẹti, kugbe ibali phiyọ ẹdia rayen

Je kọn iwiti efa nene ughwru na?

26 Kidie O yono* vwẹ idjerhe ro shephiyọ;

Ọghẹnẹ rọyen yono.

27 Kidie ọ dia ephapha re vwo wonro ibi rẹ ekankọn yen e vwo wonro kumin obiebii,

Ọ je dia akpẹrẹ yen a djẹ wan enu rẹ kumin ghevweghee.

Ukperẹ ọtiọyen, ọkpọ yen a vwọ teyan kumin obiebi,

Urhe yen a vwọ teyan kumin ghevweghe.

Ẹjo, o dje ewewonroo;

Ọke rọ da gua akpẹrẹ rọyen rẹ iyesi kpono wan enu rọyen,

Ọ lọ vworovworoo.

29 Ọnana ji nẹ obọ ri Jihova rẹ otuofovwin na rhe,

Rẹ uchebro* rọyen vọnre vẹ igbevwunu

Ro phiẹkparobọ vwẹ kemu kemu ro ruẹ.*

Nẹ ukpe ra ro ukpe;

Ovwan rhe ruẹ erẹ ri kukpe kukpe rẹ ovwan.

 2 Ẹkẹvuọvo me cha so okpetu kẹ Ariẹl,

Ko che vweri ji vwerhe oma,

Kọ cha dia kerẹ enyerhanre rẹ agbada kẹ vwẹ.

 3 Mi che wonphiyọ kẹbẹre kẹbẹre vwọso owẹ,

Me cha vwẹ irhe vwọ gbogba riariẹ owẹ

Je gbogba vwọso owẹ.

 4 A cha vwẹ owẹ vwo kpotọ;

Vwevunrẹ otọ na yen wọ cha ta ota nurhe,

Ota wẹn cha mra phiaa fikirẹ ekpẹn.

Urhuru wẹn che nẹ evunrẹ otọ na rhe

Kerẹ urhuru rẹ ohwo ro nene emekashe rẹ Idẹbono ruẹ kuẹgbe,

E che nyo eta wẹn ghẹrẹnghẹrẹn vwo nẹ otọ na rhe.

 5 Ivwighrẹn* wẹn re pha buebun na cha dia kerẹ omamọ rẹ ipọda,

Isun buebun ri shenyẹ ihwo na kerẹ ehọrọ rẹ ekankọn rẹ odju muẹ.

 6 Jihova rẹ otuofovwin cha davwerhọ wẹn

Vẹ agbraran, otọ ro kpogho kugbe edo rode,

Vẹ ogiribo, odju ọgangan kugbe erhanre rọ ghwọrọ erọnvwọn fiotọ.”

 7 Etiyin ẹgborho na eje ri nene Ariẹl phiẹ ofovwin na

—Ihwo eje ri nene phiẹ ofovwin,

Iwevwin ri kpenu ra bọn riariẹ,

Kugbe ihwo re ghwa okpetu bro cha—

Cha dia kerẹ evwerhẹn, emramrẹ rẹ ason na.

 8 E, ọ cha dia kerẹ ọke rẹ ohwo rẹ owẹnvwe hwe da vwerhẹn evwerhẹn nẹ ọyen riemu,

Ẹkẹvuọvo rọ vwọ rhọvwọn, owẹnvwe hwe,*

Kerẹ ọke rẹ ohwo rẹ urhuru rẹ ame siẹ da vwerhen evwerhẹn nẹ ọyen da ame,

Ẹkẹvuọvo rọ vwọ rhọvwọn, oma bruro ku, urhuru rẹ ame ji sio.*

Ọtiọyen ọ cha dia vwọ kẹ ẹgborho na eje

Ri nene Ugbenu ri Zayọn phiẹ ofovwin.

 9 Ovwan ghwu mudia vẹ igbevwunu;

Ovwan rhurhu ẹro rẹ ovwan rere ovwan vwo jẹ orẹ ẹmrẹ.

Ayen da udi vroma ẹkẹvuọvo ọ dia iwainii;

Ayen gele ẹkẹvuọvo ọ dia fikirẹ udi ro muẹ ohwoo.

10 Kidie Jihova ku ẹwẹn rẹ ovwerhẹn okokodo ku ovwan;

O rhurhu ẹro rẹ ovwan emraro na,

O rhurhu uyovwin rẹ ovwan emremramrẹ na.

13 Jihova da ta: “Ihwo nana bru vwe cha vẹ unu rayen

Ẹbẹrunu rayen ọyen ayen vwo muọghọ kẹ vwẹ,

Ẹkẹvuọvo ubiudu rayen sheri vwọ kẹ vwẹ mamọ;

Ayen djoshọ mẹ fikirẹ iji rẹ ihworakpọ yono ayen.

14 Ọtiọyena, mẹvwẹ yen ohwo rọ cha rhoma ru ihwo nana obo ri che gbe ayen unu,

Igbevwunu kpahen igbevwunu;

Aghwanre rẹ egbaghwanre rayen che vwoba,

E che si ẹruọ rẹ egbaghwanre rayen nu.”

Ayen ruiruo rayen vwevunrẹ ebri,

Jẹ ayen ta: “Ono yen mrẹ avwanre?

17 Ọmọke krẹn yen chekọ, Lẹbanọn ko che hirhephiyọ ogba ra kọn irhe re mọ emamọ phiyọ,

Ogba ra kọn irhe re mọ emamọ phiyọ na cha dia kerẹ egbo.

18 Vwẹ ẹdẹ yena, idierhọ che nyo eta rẹ ọbe na,

Irhuẹro cha mrorẹ vwẹ ebri hwi kugbe okuku.

19 Ihwo dẹndẹn cha ghọghọ gangan fikirẹ Jihova,

Ivwiogbere rehẹ ohri rẹ ihwo cha ghọghọ fikirẹ Ohwo Ọfuanfon rẹ Izrẹl na.

20 Kidie osun ro shenyẹ ihwo na rha cha dia ọfaa,

Ọ rọ yonma na rha cha diaa,

A je cha ghwọrọ ihwo eje re choma ri vwo ru umiovwo,

21 Ihwo re nẹrhẹ ihwo efa riabe fikirẹ efian ẹvwọrọn rayen,

Re kpahan ufi vwọ kẹ ohwo rọ chochọn* vwẹ anurhoro rẹ orere na,

Re vwẹ aphro ifefe vwo brorhiẹn hwe ọvwata.

“Oma rha cha vo Jekọp ọfaa,

Omavovwẹ rha cha dia opharo rọyeen.

23 Kidie ọke rọ da mrẹ emọ rọyen,

Re dia iruo rẹ abọ mẹ vwẹ ohri rọyen,

Kẹ ayen che ru odẹ mẹ fon;

E, ayen che ru Ohwo Ọfuanfon ri Jekọp na fon,

Oshọ rẹ Ọghẹnẹ rẹ Izrẹl ko che mu ayen.

24 Ihwo ri bo ghwru che vwo ẹruọ,

Ihwo ri brenu che rhiabọreyọ odjekẹ.”

30 “Okpetu rode vwọ kẹ emọ ri ruẹ uyovwin gangan na,” ọtiọyen Jihova tare,

“Emọ ri ruẹ obo rehẹ ẹwẹn rayen, ọ dia ọmẹẹ,

Ri nene ihwo efa vwo obọechuro,* jẹ ọ dia ẹwẹn mẹ yen mu ayeen,

Rere ayen vwọ vwẹ umwemwu vwọ ba umwemwu.

 2 Ayen kpo Ijipt, jẹ ayen nọ mie vwe tavween,

Rere ayen ra guọnọ ochọnvwe vwẹ obọ ri Fero*

Rere ayen vwẹ uhoho rẹ Ijipt vwo ru adjarhọ!

 3 Ẹkẹvuọvo ochọnvwe ri Fero che hirhephiyọ omavovwẹ vwọ kẹ ovwan,

Uhoho rẹ Ijipt rẹ ovwan vwo ru adjarhọ na cha so ophọphọvwe vwọ kẹ ovwan.

 4 Kidie isun rọyen hẹ Zoan,

Ikọn rọyen te Henis re.

 5 Ihwo ri fierere vuọvo kẹ ayeen

Cha nẹrhẹ oma vo ayen eje,

Ihwo re vwẹ ukẹcha yẹrẹ erere vuọvo vwọ phiaa,

Omavovwẹ kugbe ophọphọvwe ọvo.”

Ayen mu efe rayen phiyọ uko rẹ ekẹkẹtẹ

Ji mu emu rayen phiyọ uko* rẹ ikamẹl,

Wan otọ rẹ ukpokpogho kugbe ọbẹnvwẹ,

Otọ rẹ okpohrokpo, okpohrokpo rọ guan,

Otọ rẹ ọrọdekọ* kugbe ọrọdekọ rọ la erhanre jẹ ọ rhan,*

 8 “Asaọkiephana yanran, rere wo sio phiyọ ophapha vwẹ irharo rayen,

Sio phiyọ ọbe,

Rere ọ sa vwọ dia oseri ri bẹdẹ

Vwẹ ọke rọ cha vwẹ obaro.

 9 Kidie ayen ihwo ri gbe vwọsua, emọ re vọnre vẹ ophiẹnvwe,

Emọ re guọnọ nyo urhi ri Jihovaa.

“Rọ vwọ dianẹ ovwan sen ota nana

Rẹ ovwan vwọ vwẹroso ọghware kugbe ophiẹnvwe

Je vwẹroso erọnvwọn nana na,

13 Ọtiọyena umwemwu nana cha dia kerẹ igbẹhẹ rọ vare kẹ wẹ,

Kerẹ igbẹhẹ ro kpenu rọ vẹnre rọ guọnọ she.

14 Ọ cha guọghọ kerẹ ochẹ rode rẹ ọmechẹ,

Ọ cha guọghọ chẹghẹchẹghẹ te ẹdia a gbe cha mrẹ ẹbẹre vuọvo

Ra cha vwọ wan erhanre vwo nẹ enyerhanre

Yẹrẹ vwọ sẹrhẹ ame vwo nẹ asan rẹ ame vẹrhẹree.”*

“Ovwan de rhivwin bru vwe rhe, fọ, je vwẹroso ovwẹ, kẹ ovwan che sivwin rhọ;

Ovwan che vwo ogangan siẹrẹ ovwan de hwomamu je vwẹroso ovwẹ.”

17 Ohwo ọvo cha djẹ uguegue mu ihwo uriorin;

Ihwo iyorin cha djẹ uguegue mu ovwan, ovwan me djẹ

Bẹsiẹ ọ ro chekọ vwẹ usun rẹ ovwan cha vwọ dia kerẹ ọkpọ ro mudia goi vwẹ enu rẹ ugbenu,

Kerẹ ọkpọ rẹ oka vwẹ enu rẹ ugbenu otete.

18 Ẹkẹvuọvo Jihova vwẹ erhiorin hẹrhẹ ro vwo dje ẹroesiri kẹ ovwan,

Ko che vrẹn rere o gbe arodọnvwẹ kẹ ovwan.

27 Nighere! Jihova nẹ asan oshesheri cha,*

Ọ cha vẹ ophu kugbe evwru ro vwo ọkpan.

Ọ ta ota vẹ ophu,

Ẹrẹnvwe rọyen pha kerẹ erhanre rọ ghwọrọ erọnvwọn fiotọ.

28 Ẹwẹn rọyen pha kerẹ oghwe ro ku te ohọre,

Ro vwo kpogho ẹgborho na cha kpogho kpo; bẹsiẹ orọnvwọn vuọvo rhe che chekọọ;

Ọ cha gba ufi phiyọ unu rẹ ihwo na vwo sun ayen ghwru.

29 Ẹkẹvuọvo une rẹ ovwan cha họhọ une ra sua vwẹ ason

Vwẹ ọke rẹ ovwan de muegbe rẹ* orẹ,

Ubiudu rẹ ovwan cha ghọghọ kerẹ ohwo

Rọ yan vẹ* iflutu

Kpo ugbenu ri Jihova, Oragha rẹ Izrẹl na.

30 Jihova cha nẹrhẹ e nyo urhuru rọyen rọ vọnre vẹ urinrin na

O dje ugbobọ rọyen phia ro vwo wontọ cha vẹ ophu ọgangan,

Vẹ erhanre rọ ghwọrọ erọnvwọn fiotọ,

Vẹ osio ọgangan, agbraran kugbe imicho.

31 Kidie fikirẹ urhuru ri Jihova, uguegue cha ro Asiria oma;

Ọ cha vwẹ ọkpọ vwọ ghwiẹ.

32 Kọke kọke rẹ Jihova da reyọ ọkpọ rọyen

Ro vwo gboja kẹ ihwo vwọ ghwiẹ Asiria,

Vwẹ ọke rọ da kpare obọ rọyen kpenu vwọso ayen vwẹ ofovwin

E che nyo edo rẹ itamborini vẹ ihapu.

33 O muegbe rẹ Tofẹt* rọyen nure;

O ji muegbe rọyen kẹ ovie na.

Ọ rhuẹrẹ irhe koko kpenu gegerege hẹhẹre,

Vẹ erhanre rọ la gidigidi kugbe irhe.

Ẹwẹn ri Jihova rọ pha kerẹ ọkẹre rẹ isọfọ* na,

Che phi erhanre phiyọ.

31 Okpetu rode vwọ kẹ ihwo re yan kpo Ijipt vwọ kẹ ukẹcha,

Re vwẹroso iyesi,

Re vwẹroso ekpẹrẹ rẹ ofovwin kidie e pha buebun,

Kugbe iyesi* rẹ ofovwin kidie i vwo ẹgba.

Ẹkẹvuọvo ayen vwẹroso Ohwo Ọfuanfon rẹ Izrẹl naa,

Ayen je hiẹ guọnọ Jihovaa.

 2 Ẹkẹvuọvo o vwo aghwanre, ọ je cha ghwa okpetu rhe,

O che si ota rọyen reyọọ.

O che vrẹn vwọso ẹko rẹ irumwemwu

Kugbe ihwo re vwẹ ukẹcha kẹ irumwemwu.

 3 Ihwo rẹ Ijipt na ihworakpọ ghevweghe, ayen dia Ọghẹnẹẹ;

Iyesi rayen eranvwe ghevweghe, e dia ẹwẹẹn.

Ọke rẹ Jihova da rionbọ rọyen phia,

Kohwo kohwo rọ vwẹ ukẹcha phia cha kprowọ

Kohwo kohwo ra vwẹ ukẹcha kẹ che she;

Ayen eje cha ghwọrọ vwẹ ọke vuọvo.

“Kirobo rẹ okpohrokpo, okpohrokpo otete rọ goma* guan fikirẹ eranvwe ro hweri,

Ọke re de se ẹko rẹ isuigodẹ na eje koko rhe vwọsuọ,

Rọ djoshọ fikirẹ urhuru rayen

Yẹrẹ guegue fikirẹ edo rayeen ye,

Ọtiọyen Jihova rẹ otuofovwin che wontọ rhe rhi phi ofovwin

Fikirẹ Ugbenu ri Zayọn kugbe ugbenu otete rọyen.

 8 A cha vwẹ ọlọkọ rọ dia ọ rẹ ohworakpọọ vwọ teyen ihwo rẹ Asiria hwe;

Ọlọkọ rọ dia ọ rẹ ohworakpọọ cha ghwọrọ ayen.

Ayen cha djẹ fikirẹ ọlọkọ na,

A je cha gba ighene eshare rọyen vwọ wiowian.

 9 Oragha rọyen cha ghwọrọ totọ fikirẹ oshọ,

Oshọ cha ro isun rọyen oma fikirẹ ọkpọ rẹ oka na,” ọtiọyen Jihova tare,

Ohwo rẹ elo* rọyen hẹ Zayọn, rẹ ogidi erhanre rọyen hẹ Jerusalẹm.

32 Nighere! Ovie ọvo che sun vwẹ ophiọnphiọn,

Isun mi rhe sun vẹ orhiẹn ọsoso.

 2 Ọvuọvo cha dia kerẹ asan re de se siomanẹ* vwẹ ọke rẹ odju de djuẹ,

Asan re de se siomanẹ* vwẹ ọke rẹ ogiribo,

Kerẹ ivwori vwẹ otọ ro vwo amee,

Kerẹ uhoho rẹ oragha rode vwẹ otọ ọyaya.

 3 Ọke yena, ẹro rẹ ihwo re mrorẹ rhe che rhurhuu,

Ihwo ri vwo erhọ ke cha kerhọ.

 4 Ihwo ri roro emu tavwen ayen ki ruẹẹ ke cha nabọ roro kpahen erianriẹn,

Ihwo re jẹ ikọkọ* ke cha ta ota fiotọ phephẹn.

 5 E rhe che se ohwo ro vwo ọhọọ oruẹsee,

E rhe ji che se ohwo ro vwo omamọ rẹ uruemuu ohwo rodee;

 6 Kidie ohwo ro vwo ọhọọ cha ta eta rẹ ẹkpa,

Je jiroro rẹ umiovwo vwevunrẹ ubiudu rọyen,

Ro vwo tito kẹ ihwo efa nẹ ayen kpairoro vrẹ* Jihova je ta eta ebrabra kpahọn,

Rọ vwọ nẹrhẹ ohwo rẹ owẹnvwe hwe vwo jẹ emu ẹriọ

Ohwo rẹ urhuru rẹ ame siẹ vwo jẹ ame ẹda.

 7 Iroro rẹ ohwo ro vwo omamọ rẹ uruemuu jẹ, pha brabra;

O titi iruemu re nẹrhẹ oma vua ohwo

Rọ vwọ vwẹ efian ghwọrọ ohwo rọ rioja,

Ọ da tobọ dianẹ ogbere ta obo ri shephiyọ.

 8 Ẹkẹvuọvo oruẹse vwo ẹwẹn ro vwo ruẹse,

Ẹse yen o muomaphiyọ eruo.

10 Ẹgbukpe vẹ ẹmẹdẹ evo da wan nu, ovwan re davwerhọ rẹ emu vuọvoo na cha phariẹ,

Kidie e che koko emamọ vuọvo bẹsiẹ orhọ rẹ igrepu vwo vwobaa.

Ovwan ban oma rẹ ovwan phiyọ,

Rere ovwan vwẹ emwa rẹ esiso vwo rhuon.

12 Ovwan teyen udu rẹ ovwan vwọrẹ omaevwerhe

Fikirẹ idju iyoyovwin kugbe ivaini re mọ emamọ.

13 Kidie idjigbẹn vẹ irhe ri vwo inwe che din rhurhu otọ rẹ ihwo mẹ;

I che din rhurhu iwevwin rẹ aghọghọ na eje,

E, orere rẹ aghọghọ na.

14 Kidie a kpairoro vrẹ uwevwin ro kpenu ra gbogba riariẹ na;

A kpairoro vrẹ orere rọ vọnre vẹ edo na.

Ofẹl kugbe uwevwin orhẹrẹ na hirhephiyọ otọ ra kua nu bẹdẹ,

Etiyin kọyen ekẹkẹtẹ rẹ aghwa de shue,

Evun rọyen kọyen ichuru da re odin,

15 Bẹsiẹ Ọghẹnẹ che vwo ku ẹwẹn rọyen ku avwanre,

Rẹ aton na che vwo hirhephiyọ ogba ra kọn irhe re mọ emamọ phiyọ,

Rẹ ogba ra kọn irhe re mọ emamọ phiyọ cha vwọ dia kerẹ egbo.

16 Ọke yena, orhiẹn ọsoso kọ cha dia evunrẹ aton na,

Ophiọnphiọn kọ cha dia evunrẹ ogba ra kọn irhe re mọ emamọ phiyọ na.

17 Ufuoma yen cha dia erere rẹ uvi rẹ ophiọnphiọn,

Ufuoma kugbe ofuvwegbe ri bẹdẹ kọyen cha dia emamọ rẹ uvi rẹ ophiọnphiọn.

18 Ihwo mẹ cha dia asan rọ vọnre vẹ ufuoma,

Asan rẹ ofuvwegbe kugbe asan rẹ omaerovwon rọ pha fuefu.

19 Ẹkẹvuọvo imicho na cha ghwọrọ egbo na totọ,

A je cha ghwọrọ orere na karekare.

20 Omavwerhovwẹn kẹ ovwan re kọn ubi nene orhoma rẹ ame na eje,

Rẹ erhuẹn kugbe ekẹkẹtẹ rayen hẹ evunrẹ idju.”

33 Okpetu rode kẹ wẹ, wẹwẹ rọ ghwọrọ ihwo jẹ a je rhe ghwọrọ owẹẹ na;

Wẹwẹ rọ phiẹn ihwo jẹ a je rhe phiẹn wẹẹ na!

Bicha avwanre vẹ ugbobọ* wẹn kurhiọke kurhiọke,

E, dia esivwon rẹ avwanre vwẹ ọke rẹ ukpokpogho.

 4 Kirobo rẹ igurube ria kemu kemu rẹ ayen mrẹre fiotọ ye, ọtiọyen a je cha ghwẹ ekuakua wo mu nẹ ofovwin rhe fiotọ;

Ihwo cha họrhọ ro ayen kerẹ igurube.

 5 A cha kpare Jihova kpenu,

Kidie obenu yen ọ dia.

 6 Ọyen yen ohwo rọ nẹrhẹ wo vwo ofuvwegbe vwẹ ọke wẹn;

Esivwon buebun, aghwanre, erianriẹn, kugbe oshọẹdjẹ ri Jihova

—Ọnana yen efe rọyen.

 7 Nighere! Ihwo rayen ri vwo uduoyivwin bunu vwẹ urhuvwun na;

Ikọn rẹ ufuoma na viẹ gangan.

 8 A kpairoro vrẹ idjerhe ride na;

Ohwo vuọvo rha wan idjerhe itete naa.

O* gbe ọphọ na ku;

Ọ sen irere na;

O se ohwo vuọvo gbe ohwoo.

Sharọn rhe dia kerẹ aton,

Beshan kugbe Kamẹl tue ẹbe rayen kufia.

10 “Asaọkiephana mi che vrẹn,” ọtiọyen Jihova tare,

“Asaọkiephana me cha kpare oma mẹ kpenu;

Asaọkiephana me cha vwẹ urinrin kẹ oma mẹ.

14 Oshọ muẹ irumwemwu rehẹ Zayọn;

Ihwo re kpairoro vrẹ Ọghẹnẹ na phariẹ:

15 Ohwo ro ruẹ obo ri shephiyọ ọkieje,

Rọ ta ota ọsoso,

Rọ sian obo re dia uyotaa kugbe erere rẹ ọghware,

Rọ sian udi ẹriọ ukperẹ o vwo rhiabọreyọ,

Rọ kerhọ kẹ iroroẹjẹ re vwo ku ọbara kuotọọ,

Ro ji rhurhu ẹro rọyen rere o vwo jẹ obo re brare ẹmrẹ.

16 —Ọ cha dia asan ri kpenu na;

Adjarhọ rọyen cha dia ohri rẹ eragha re bẹn e te,

A cha vwẹ emuọre rọyen kẹ ọkieje,

Asan rẹ ame rọyen djẹ nẹcha cha kaa.”

17 Ovwan cha mrẹ ovie ọvo vwẹ urinrin rọyen;

Ovwan cha mrẹ otọ ọvo vwẹ ugboko.

19 Wọ rha cha mrẹ ihwo ri yinvwaro na ọfaa,

Ihwo rẹ ephẹrẹ* rayen kodori mamọ re se vwo ẹruọ rọyeen,

Ihwo rẹ wo che se vwo ẹruọ rayeen, kidie ayen jẹ ikọkọ.

Wọ cha mrẹ Jerusalẹm kerẹ asan ro fuoma ra dia,

Utughẹ re che mu nẹ ẹdia rọ hephaa.

O vwo ọke vuọvo re che vwo yoro ipini rọyeen,

O ji vwo ọvuọvo vwẹ usun rẹ ifi rọyen re che vwrẹẹ.

21 Ẹkẹvuọvo Jihova rọ dia Ohwo Rode na,

Cha sẹro avwanre kerẹ urhie kugbe ugbo ehẹhẹre vwẹ etiyin,

Asan rẹ ikuna rẹ ofovwin vuọvo che bi raa

Kugbe asan rẹ ikuna ride vuọvo che bi waan.

22 Kidie Jihova yen Oguẹdjọ rẹ avwanre,

Jihova yen Ojurhi rẹ avwanre,

Jihova yen Ovie rẹ avwanre;

Ọyen Ohwo ro che sivwin avwanre.

23 Irihrẹ wẹn che dogho;

E cha sa yọnrọn ọkpọ rẹ okọ na mudia yẹrẹ riẹn emwa rẹ okọ naa.

Ọke yena ka cha ghare ekuakua buebun ra ghwẹ nẹ ofovwin rhe;

Ukpono dede che gborho erọnvwọn buebun reyọ.

34 Ovwan rhe rhi nyo, ovwan ẹgborho na,

Ovwan rhe kerhọ, ovwan ihwo na.

E jẹ otọrakpọ na vẹ erọnvwọn eje rehẹ evun rọyen kerhọ,

Otọ na kugbe erọnvwọn eje rehẹ evun rọyen.

 2 Kidie Jihova muophu kpahan ẹgborho na eje,

O muophu kpahan otuofovwin rayen eje.

Ọ cha vwẹ ayen kpahotọ vwọ kẹ oghwọrọ;

Ọ cha vwẹ ayen kpahotọ vwọ kẹ ehwe.

 3 E che shi ihwo rayen re hwerii,

Ọnrhe rẹ irivwin rayen che gbon kpenu;

Igbenu na cha wran fikirẹ ọbara rayen.*

 4 Otuofovwin rẹ idjuvwu na eje che gbon kufia,

E che kpirhin idjuvwu na kerẹ ukpirhin ọbe.

Kirobo rẹ ẹbe ro vwiorori kpanra she vwo nẹ urhe rẹ ivaini

Rẹ ifigi rọ yare kpanra she vwo nẹ urhe rẹ ifigi ye,

Ọtiọyen otuofovwin rayen eje che vwioro kufia.

O che wontọ rhe enu rẹ Idọm vwẹ ẹdjọeguo,

Vwẹ enu rẹ ihwo re me vwọ kpahotọ vwọ kẹ oghwọrọ.

Ivwri che ghworo oma rọyen eje,

Ọtiọyen ji te ọbara rẹ egbon itete kugbe ẹvwe,

Vẹ ivwri rẹ ibiehun rẹ egbon.

Kidie Jihova vwo izobo ro che ze vwẹ Bọzra,

Ọ cha nẹrhẹ e ku ọbara buebun kuotọ vwẹ otọ rẹ Idọm.

 7 E che hwe ayen vẹ erhuẹn rẹ aghwa na,

Erhuẹn itete vẹ i ri vwo ẹgba.

Ọbara cha kpọrhọ otọ rayen,

Ivwri me rha kpọrhọ ekpẹn rayen.”

 8 Kidie Jihova bru ẹdẹ rẹ ihriẹriọ nure,

Ukpe rẹ osaẹhwa fikirẹ obo re brare re ru Zayọn.

 9 Ivwori rọyen* che hirhephiyọ ọda ri bitumẹn,

Ekpẹn rọyen che hirhephiyọ isọfọ,*

Otọ rọyen cha dia kerẹ bitumẹn rọ tuan.

10 E che fuon vwẹ ason yẹrẹ aruphẹẹn;

Ivwirhi rọyen che bru kpenu bẹdẹ.

Ọ cha dia asan ra ghwọrọre vwo nẹ uvwiẹ re te uvwiẹ;

O vwo ohwo vuọvo rọ cha wan vrẹ bẹdẹẹ.

11 Ipẹlikani kugbe irigbẹn cha dia evun rọyen,

Ikpukpurhu rẹ erhọ rayen pha grongron kugbe ikpemu cha dia evun rọyen.

Ọ cha riẹn ufi rẹ ovwanvwọ ofefe

Kugbe ufi* rẹ oghwọrọ phiyọ enu rọyen.

12 O vwo ọvuọvo vwẹ usun rẹ ihwo rọyen ride na rọ cha dia oviee,

Isun rọyen eje rha cha dia ọfaa.

13 Idjigbẹn che din phiyọ iwevwin ri kpenu rọyen ra gbogba riariẹ,

Odin vẹ ẹbe ri vwo inwe che din phiyọ asan rọyen ra gbogba riariẹ.

Ọ cha dia urhuẹn rẹ eranko rẹ aghwa,

Kugbe asan rẹ igomugoro dia.

14 Emama rẹ aton kugbe eranvwe ri kperẹ cha vwoma,

Ẹvwe rẹ aghwa* che kperi se ọrivẹ rọyen.

15 Etiyin yen ọrọdekọ cha bọn uwevwin rọyen je rhọghọ ikẹn phiyọ,

Ọ cha sa ayen je sẹro rayen.

O vwo ọvuọvo vwẹ usun rẹ eranvwe na ro che ghwruu;

O vwo ọvuọvo vwẹ usun rayen ro che jẹ ọrivẹ evwoo,

Kidie Jihova yen vwẹ iji nana phia,

Ẹwẹn rọyen yen ghwẹ ayen koko.

17 Ọyen yen Ohwo ro duvwun itẹ na vwọ kẹ ayen,

Ọ vwẹ obọ rọyen vwọ ghare asan rayen kẹ ayen.*

Ayen cha dia evun rọyen bẹdẹ;

Ayen cha dia evun rọyen vwẹ uvwiẹ eje.

35 Idodo cha vọn aton kugbe otọ ọyaya na, ihwo ke cha ghọghọ,

Aton na cha ghọghọ je vọn vẹ idodo ri safrọn.*

 2 Odin wọnwọnwọn cha dia evun rọyen;

Ihwo cha ghọghọ ji kperi ukperi rẹ aghọghọ.

A cha vwẹ urinrin ri Lẹbanọn vwọ kẹ,

Erhuvwu ri Kamẹl kugbe ọ ri Sharọn.

 3 Ovwan phi ẹgba phiyọ abọ re vwiẹre,

Ovwan ji ru igbon ri kpogho gan.

Nighere! Ọghẹnẹ rẹ ovwan cha rhe vẹ ihriẹriọ,

Ọghẹnẹ cha rhe vẹ osaẹhwa.

 5 Vwẹ ọke yena, ẹro rẹ irhuẹro ki che rhie,

Erhọ rẹ idierhọ ki che nyẹme.

 6 Vwẹ ọke yena, ikpono ki che pho kerẹ orhua,

Ẹrẹnvwe rẹ ihwo re sa ta otaa che kperi ukperi rẹ aghọghọ.

Kidie ame cha va nẹ evunrẹ aton na rhe,

Ivwori me rha dia evunrẹ aton na.

 7 Otọ rẹ uvo mu ya kpahra che hirhephiyọ ẹtẹrhe ame rẹ odin din phiyọ,

Otọ ọyaya che hirhephiyọ ogbugbu rẹ ame.

Odin re pha wọnwọnwọn vẹ ekankọn kugbe ekankọn ri papairọs

Che din phiyọ urhuẹn rẹ eranko rẹ aghwa de rovwoma.

 8 Idjerhe rode ọvo cha dia etiyin,

E, idjerhe re seri Idjerhe rẹ Ofuanfon.

A sẹro rọyen vwọ kẹ ohwo rọ yan vwẹ idjerhe na;

O vwo ẹkpa vuọvo ro che bo ruọọ.

 9 Okpohrokpo vuọvo cha dia etiyiin,

Eranvwe rẹ aghwa re djoma vuọvo cha ro evun rọyeen.

A cha mrẹ ayen vwẹ etiyiin;

Ihwo ra tan nẹ ighuvwu rhe ọvo yen cha yan vwẹ etiyin.

Omavwerhovwẹn kugbe aghọghọ cha dia vwọ kẹ ayen,

Omaemuophiyọ kugbe unuẹfiọn cha djẹ ghwru.

Ono yen wọ kpare upho wẹn kpenu vwọso

Je wiẹn ẹro ni?

24 Wọ vwẹ Jihova jehwẹ womarẹ idibo wẹn, wọ vwọ tanẹ,

‘Mi che yerin kpenu rẹ igbenu na

Vẹ ekpẹrẹ rẹ ofovwin mẹ buebun,

Kpo ẹbẹre ri me sheri ri Lẹbanọn.

25 Me cha tọn erhare je da ame;

Me cha vwẹ ẹhẹrhawọ mẹ vwọ nẹrhẹ ivwori* rẹ Ijipt kpọ yamu.’

27 Ihwo re dia ayen che vwo ọchukoo;

A cha djẹ uguegue mu ayen je phọphọ ayen.

Ayen cha dia kerẹ ẹbe rẹ aghwa kugbe odin ekpokpọ,

Kerẹ odin rọhẹ enu rẹ iwevwin rẹ odju rẹ ẹbẹre ọnre va nẹcha dju ya.

28 Ẹkẹvuọvo me nabọ riẹn ọke wo de chidia, ọke wọ da ro otafe, ọke wọ da ro uwevwin,

Kugbe ọke wo de muophu kpahan ovwẹ,

29 Kidie wo muophu kpahen ovwẹ, mi nyo edo rẹ ovan wẹn.

Me cha jẹ oghọre mẹ phiyọ uwen wẹn je vwẹ ufi* mẹ vwọ gba ẹbẹrunu wẹn,

Me cha nẹrhẹ wọ wan idjerhe rẹ wọ wan rhe rhivwin.”

“Ọ cha ro evunrẹ orere nanaa

Yẹrẹ sa odada vwẹ etiyiin

Yẹrẹ vwẹ ekpọfia nene họnree

Yẹrẹ gbogba riariẹ vwọsuọọ.”’

34 ‘Idjerhe rọ wan rhe yen ọ cha wan rhivwin;

Ọ cha ro evunrẹ orere nanaa,’ ọtiọyen Jihova tare.

35 ‘Me cha chochọn rẹ orere nana ji sivwon fikirẹ odẹ mẹ

Kugbe fikirẹ odibo mẹ Devid.’”

10 Me da ta: “Vwẹ uherevie rẹ ẹdẹ rẹ akpọ mẹ

Mi che jẹ anurhoro rẹ Ushi* ẹruọọ.

Me rha cha mrẹ ihworakpọ ọfaa

Ọke me vẹ ihwo re dia asan rẹ arhọ hephaa da herọ.

12 E ghwie asan me dia notọ ji muo juvwe vwo

Kerẹ utughẹ rẹ osuigodẹ.

Mi kpirhin arhọ mẹ koko kerẹ amwa re kinphiyọ urhe rẹ ohwo ro ruẹ emwa;

O bru vwe kufia kerẹ amwa re bru vwo nẹ urhe re kinro phiyọ.

Kerẹ okpohrokpo, o vwirhẹn ibeku mẹ eje;

Vwo nẹ uvo ra ro ason yen wọ vwọ vwẹ arhọ mẹ vwo te oba.

14 Mi kperẹ gangan ọkieje kerẹ ọphran re se iswifti yẹrẹ ọmọkan;*

Mi kperẹ ọkieje kerẹ erurẹ.

‘E Jihova, me hẹ okpetu rode;

Biko bicha vwẹ!’*

Me cha vwẹ oma mẹ kpotọ* vwẹ ẹdẹ rẹ akpọ mẹ eje

Fikirẹ emu ọgangan ri mi rhiẹromrẹ.*

16 ‘E Jihova, womarẹ erọnvwọn nana* yen kohwo kohwo vwo yerẹn,

Wan oma rayen yen me je vwọ wẹn na.

17 Nighere! Ukperẹ ufuoma, ofu de dje vwe hwe;

Ẹkẹvuọvo fikirẹ ẹguọnọ ru wo vwo kpahen ovwẹ,*

Wọ da sẹro rẹ arhọ mẹ vwo nẹ ọgọdọ rẹ oghwọrọ.

18 Kidie ihwo rehẹ evunrẹ Ushi* cha sa vwẹ urinrin kẹ wẹẹ,

Ihwo ri ghwuru che se jiri uwee.

19 Ihwo ri yerẹn, ihwo ri yerẹn yen se jiri uwe,

Kirobo ri mi se ruẹ nonẹna.

20 E Jihova, sivwin uvwe,

Avwanre cha vwẹ ekuakua rẹ uhworo ri vwo ifi tẹnrẹnrẹn vwo hworo ine mẹ

Vwẹ uwevwin ri Jihova vwẹ ẹdẹ rẹ akpọ rẹ avwanre eje.’”

 2 “Ta ota ro che te ubiudu ri Jerusalẹm,*

Ghwoghwo kẹ nẹ ọke rẹ ojaẹriọ rọyen vwoba re,

Nẹ a hwosa rẹ abe rọyen nure.

 4 E jẹ e gbe kiyara kiyara,

Ji kporon kugbenu kugbenu rode kugbe otete totọ.

E jẹ otọ chohri chohri hirhephiyọ otọ ọriẹriẹriẹ,

Otọ rọ vọnre vẹ ikuta me rha dia riẹriẹriẹ.

 5 E che dje urinrin ri Jihova phia,

Ihwo* ejobi che koko mrẹ,

Kidie Jihova tarọ nure.”

 7 Odin wọnwọnwọn na ghwẹ,

Idodo na vwioro,

Kidie Jihova wẹn kuo.

 8 Odin wọnwọnwọn na ghwẹ,

Idodo na vwioro,

Ẹkẹvuọvo ota rẹ Ọghẹnẹ rẹ avwanre herọ bẹdẹ.”

 9 Yanran kpo enu rẹ ugbenu ro kpenu na,

Wẹ rẹ aye rọ ghwẹ iyẹnrẹn esiri cha Zayọn.

Kpare upho wẹn kpenu vẹ ogangan,

Wẹ rẹ aye rọ ghwẹ iyẹnrẹn esiri cha Jerusalẹm.

10 Nighere! Ọrovwori ro Me Kpenu Jihova cha rhe vẹ ogangan,

Ugbobọ rọyen che sun vwọ kẹ.

Nighere! Osa rọyen rhere,

Osa rọ hwa kẹ ihwo hẹ obaro rọyen.

Ọ cha vwẹ obọ rọyen vwọ ghwẹ imigodẹ na koko,

Ko che mu ayen phiyọ obọ* rọyen.

12 Ono yen vwẹ ẹkuobọ rọyen vwọ vwanvwe ame rẹ abadi na eje

Rọ vwẹ irhiabọ rọyen vwọ vwanvwe idjuvwu na?

Ono yen ghwẹ ekpẹn rẹ akpọ na phiyọ ovwanvwọ

Yẹrẹ vwanvwe igbenu na

Kugbe igbenu itete na vwẹ ovwanvwọ?

13 Ono yen vwanvwe* ẹwẹn ri Jihova,

Ono yen sa vwẹ odjekẹ vwọ kẹ kerẹ obruche rọyen?

14 Ono yen ọ nọ mie rere o vwo vwo ẹruọ,

Yẹrẹ ono yen yono Ọghẹnẹ orhiẹn ọsoso,

Yẹrẹ ono yen yono Ọghẹnẹ erianriẹn,

Yẹrẹ dje idjerhe rẹ uvi rẹ ẹruọ vwọ kẹ?

15 Nighere! Ẹgborho na pha kerẹ ame ro sun nẹ ikoroba rhe,

Ayen pha kerẹ ibiekpẹn vwẹ enu rẹ ovwanvwọ.

16 Irhe ri Lẹbanọn dede che te vwo mu erhanre rọ da la ọkiejee,

Eranvwe rẹ aghwa ri Lẹbanọn che te vwo ze izobo rẹ ẹtorhẹẹ.

17 Ẹgborho na eje pha kerẹ obo re herọọ vwẹ obaro rọyen;

O ni ayen kerẹ emu fefe, kerẹ emu diodi.

19 Ọwena ru ẹdjọ ọvo,*

Odjogun da vwẹ oro vwọ pharọ,

O de duvwun ejọnrọn rẹ idọnọ ọfuanfon vwọ rhuẹrẹ fia.

20 Ọ sane urhe ọvo rọ cha vwọ kpahotọ,

Urhe ro che gboon.

Kọ guọnọ ọwena rọ tẹn ona

Rere ọ kare oma ro che shee.

22 O vwo Ohwo ọvo rọ dia obenu rẹ akpọ na* rọ pha ghorien ghorien na,

Ihwo re dia evun rọyen pha kerẹ ebaka.

Ọ riẹn idjuvwu na kerẹ amwa rọ pha phoghophogho,

Ọ riẹn ayen kerẹ amwa rẹ utughẹ ra dia.

23 Ọ vwẹ isun vwo kpotọ

Ji hirhe iguẹdjọ* rẹ akpọ na phiyọ ihwo ghevweghe.

24 Ayen pha kerẹ ekankọn ra ghwa kọn nu obọ,

Kerẹ ekankọn re ghwe bru phiyotọ obọ,

Igbẹn rayen ji rhi vwo awọ vwẹ otọọ,

Odju de dju ayen, ayen da ya,

Odju na de mu ayen yanran kerẹ ehọrọ rẹ ekankọn.

Ọyen yen Ohwo ro suẹn ayen kerẹ otuofovwin, ro kere ayen ọvuọvo;

Ọ vwẹ odẹ vwo se ayen eje.

Kidie nẹ ọ vọnre vẹ ẹgba, ogangan rọyen ji mu ohwo oshọ,

O rhe vwo ọvuọvo vwẹ usun rayen ro ghwrẹẹ.

27 Diesorọ wọ vwọ ta, E Jekọp, diesorọ wo vwo ghwoghwo, E Izrẹl nẹ,

‘Jihova mrẹ oborẹ mi hirharokuẹẹ,

Ọghẹnẹ kuẹrofia vwọ kẹ oshenyẹ re me rioja rọyen’?

29 Ọ vwẹ ẹgba kẹ ohwo rẹ oma rhọ

Je vwẹ ogangan kẹ ohwo ro jẹ ogangan evwo.

30 Oma cha rhọ emeshare, oma je cha ghwọrọ ayen,

Ighene eshare cha kprowọ ji she,

31 Ẹkẹvuọvo ihwo ri phiẹrophiyọ Jihova cha rhoma vwo ogangan.

Ayen cha djẹ jẹ oma cha ghwọrọ ayeen;

Ayen cha yan jẹ oma cha rhọ ayeen.”

41 “Ovwan fọ rere ovwan kerhọ mẹ,* ovwan etọ rẹ ame riariẹ phiyọ;

Jẹ ẹgborho na rhoma vwo ogangan rayen.

 2 Ono yen kpare ohwo ọvo vrẹn vwo nẹ ẹbẹre ọnre va nẹcha,

Ro se cha asan awọ Rọyen ro vwo brorhiẹn ọsoso,*

Rọ vwọ vwẹ ẹgborho vwọ kẹ

Je nẹrhẹ o phi ivie kparobọ?

Ono yen hirhe ayen phiyọ ekpẹn vwẹ obaro rẹ ọlọkọ rọyen,

Kerẹ ehọrọ rẹ ekankọn rẹ odju muẹ vwẹ obaro rẹ umurhabọ rọyen?

 3 Ọ vwọtua ayen wan idjerhe rẹ awọ rọyen ji rhi chiyin dẹvoo

Jẹ emu vuọvo darọ obọ jii.

 4 Ono yen ru ọnana,

Ro se ivwiẹ vwo nẹ ọtonphiyọ rhe?

Mẹvwẹ ri Jihova, mẹvwẹ yen Ohwo Rẹsosuọ;

Me je cha dia ọtiọyen ọkieje vẹ e re koba na.”

 6 Ohwo ọvuọvo kọ vwẹ ukẹcha kẹ ọrivẹ rọyen

Rọ vwọ ta kẹ oniọvo rọyen: “Goma.”

 7 Ọtiọyena ọwena phiuduphiyọ odjogun awọ;

Ohwo rọ vwẹ ihama vwọ ghwiẹ erọnvwọn rere e dia rionrionrion

Phiuduphiyawọ rẹ ohwo rọ vwẹ ihama vwo ruiruo vwẹ enu rẹ utehru ra da teyan erọnvwọn

 8 “Ẹkẹvuọvo wẹwẹ, E Izrẹl, odibo mẹ,

Wẹwẹ, E Jekọp, ohwo re me jẹreyọ,

Ọmọ* rẹ Ebraham, ugbeyan mẹ.

 9 Wẹ re me reyọ nẹ oba rẹ akpọ na rhe,

Wẹ ri mi se vwo nẹ asan ri me sheri vwẹ evun rọyen rhe.

Me ta kẹ wẹ nẹ, ‘Wẹwẹ odibo mẹ;

Me jẹ wẹ reyọ; me je rhe sen wẹẹn.

Me cha kẹ wẹ ogangan, e, me cha cha wẹ uko,

Me cha ghene vwẹ obọrhen rẹ ophiọnphiọn mẹ na vwọ yọnrọn owẹ.’

12 Wọ cha guọnọ ihwo ri nene uwe họnra na, ẹkẹvuọvo wọ cha mrẹ ayeen;

Ihwo ri nene uwe phiẹ ofovwin na che hirhephiyọ obo re herọọ, kerẹ obo ri fiemu kakakaa.

13 Kidie mẹvwẹ, Jihova, Ọghẹnẹ wẹn, yọnrọn obọrhen wẹn,

Ohwo rọ ta kẹ wẹ nẹ, ‘Wọ djoshọọ. Me cha cha wẹ uko.’

14 Wọ djoshọọ, wẹ ri Jekọp rọ dia ohori,*

Ovwan ihwo rẹ Izrẹl, me cha cha ovwan uko,” ọtiọyen Jihova Ọtan rẹ ovwan, Ohwo Ọfuanfon rẹ Izrẹl na tare.

15 “Nighere! Mi ru we phiyọ ophapha re vwo wonro ibi ekankọn,

Orọnvwọn kpokpọ ro vwo akon ivẹ re vwo wonro ibi ekankọn.

Wo che chiyin igbenu na muotọ je ghwọrọ ayen

Ji ru igbenu itete na phiyọ ehọrọ rẹ ekankọn.

16 Wọ cha frẹ ayen,

Odju na ko che mu ayen yanran;

Ogiribo cha hra ayen.

Ku wọ cha ghọghọ fikirẹ Jihova,

Je yan eyan fikirẹ Ohwo Ọfuanfon rẹ Izrẹl na.

18 Me cha nẹrhẹ irhie djẹ vwẹ igbenu itete rẹ odin vuọvo hephaa

Igbugbu rẹ ame me rha dia evunrẹ iyara na.

Mi che hirhe aton na phiyọ ẹtẹrhe ame rẹ odin din phiyọ

Mi mi rhe hirhe otọ ro vwo amee phiyọ igbugbu rẹ ame.

19 Me cha kọn urhe rẹ isida,

Urhe rẹ akesha, urhe rẹ imito kugbe urhe rẹ ipaini phiyọ evunrẹ aton na.

Me cha kọn urhe ri junipa,

Vẹ urhe rẹ ash kugbe urhe ri saiprẹs phiyọ evunrẹ aton na,

20 Rere ihwo eje sa vwọ mrẹ je riẹn

Kerhọ ji vwo ẹruọ

Nẹ obọ ri Jihova yen ru ọnana,

Ohwo Ọfuanfon rẹ Izrẹl na yen ruro.”

Ovwan vuẹ avwanre erọnvwọn re wanre,*

Rere avwanre se vwo roro kpahen ayen* je riẹn obo ri che nẹ obuko rayen rhe.

23 Ovwan vuẹ avwanre obo re cha phia vwẹ obaro,

Rere avwanre sa vwọ riẹn nẹ ovwan eghẹnẹ.

E, ovwan ru orọnvwọn ọvo, te o yovwirin yẹrẹ ọ brare,

Rere o se vwo gbe avwanre unu ọke rẹ avwanre da mrẹ.

24 Nighere! Ovwan obo re herọọ,

Iruo rẹ ovwan ofefe.

25 Me kpare ohwo ọvo vrẹn vwẹ obohwẹre ọnre na, ọ cha rhe,

Ohwo ro nẹ ẹbẹre ọnre va nẹcha rhe ro che se odẹ mẹ.

O che chiyin isun* muotọ kerẹsiẹ ra da mrẹ nẹ ayen ọphiẹn,

Kerẹ ọmechẹ ro chiyin ọphiẹn re phi ame phiyọ.

26 Ono yen ta ota kpahen ọnana nẹ ọtonphiyọ rhe, rere avwanre sa vwọ riẹn,

Yẹrẹ nẹ ọke re wanre rhe, rere avwanre sa vwọ tanẹ, ‘Obo rọ tare na gbare’?

28 Ẹkẹvuọvo ki mi nẹ, jẹ me mrẹ ohwo vuọvoo;

O vwo ohwo vuọvo vwẹ usun rayen rọ vwẹ uchebro phiaa.

Mi phi ẹwẹn mẹ phiyọ oma rọyen;

O che brorhiẹn ọsoso kẹ ẹgborho na.

 2 O che kperi phia yẹrẹ kpare urhuru rọyen kpenuu,

Ọ cha nẹrhẹ e nyo urhuru rọyen vwẹ urhuvwun naa.

 3 O che vwirhin ugbẹn vuọvo rọ guọghọ ree,

O ji che fun erhanre rẹ iwiki vuọvo rọ joma fun ree.

 4 Oma cha rhọọ, ofu ji che djee bẹsiẹ rọ vwọ nẹrhẹ orhiẹn ọsoso dia evunrẹ otọrakpọ na;

Etọ rẹ ame riariẹ phiyọ na rha hẹrhẹ urhi* rọyen.

 5 Ọnana yen oborẹ Ọghẹnẹ rẹ uyota na, Jihova tare,

Ọmemama rẹ idjuvwu na kugbe Ohwo Rode rọ riẹn ayen phia,

Ohwo rọ ma* otọrakpọ na kugbe kemu kemu rọhẹ evun rọyen,

Ohwo rọ vwẹ odju kẹ ihwo rehẹ evun rọyen

Je vwẹ ẹwẹn kẹ ihwo re yan vwẹ evun rọyen:

 6 “Mẹvwẹ, Jihova, mi se we vwẹ ophiọnphiọn;

Me yọnrọn obọ wẹn.

Me cha sẹro wẹn, wọ je cha dia kerẹ ọphọ vwẹ uvwre mẹ vẹ ihwo na

Kerẹ urhukpẹ rẹ ẹgborho na,

 7 Ru wo vwo rhie ẹro ri rhuru,

Wọ vwọ reyọ ihwo re mu phiyọ uwodi ro otafe

Kugbe ihwo ri chidia ebri vwo nẹ uwodi rhe.

 8 Mẹvwẹ Jihova. Ọyena yen odẹ mẹ;

Me vwẹ urinrin mẹ vwọ kẹ ohwo vuọvoo,*

Yẹrẹ vwẹ ujiri mẹ vwọ kẹ ema ra karee.

 9 Nighere, erọnvwọn rẹsosuọ na rugba re;

Asaọkiephana mi ghwoghwo erọnvwọn kpokpọ.

10 So une kpokpọ kẹ Jihova,

So une rẹ ujiri kẹ vwo nẹ oba rẹ akpọ na rhe,

Ovwan ri kpo obotọ rẹ abadi na kugbe erọnvwọn eje rehẹ evun rọyen,

Ovwan etọ rẹ ame riariẹ phiyọ kugbe ihwo re dia evun rayen.

11 E jẹ aton na kugbe irere rọyen kpare urhuru rayen kpenu,

Eko rẹ Kida dia.

E jẹ ihwo re dia oragha na kperi ukperi rẹ aghọghọ;

E jẹ ayen kperi phia vwo nẹ enu rẹ igbenu na rhe.

12 E jẹ ayen vwẹ urinrin kẹ Jihova

Ji ghwoghwo ejiro rọyen vwẹ etọ rẹ ame riariẹ phiyọ na.

O che kperi, e, o che kperi ukperi rẹ ofovwin;

O che djephia nẹ ọyen goma nọ ivwighrẹn rọyen.

Kerẹ aye rọ chuvwiẹ,

Mi che dirhivwẹn, wẹn fẹkpẹ fẹkpẹ ji se ẹwẹn reyọ vwẹ ọke vuọvo na.

15 Me cha guọghọ igbenu ride kugbe igbenu itete

Je nẹrhẹ ekankọn rayen ejobi ghwu.

Mi che hirhe irhie na phiyọ etọ rẹ ame riariẹ phiyọ*

Je nẹrhẹ ẹtẹrhe ame rẹ odin din phiyọ yamu.

16 Mi che sun irhuẹro na wan idjerhe rẹ ayen vugherii

Me cha nẹrhẹ ayen wan idjerhe rẹ ayen riẹnree.

Me cha rhẹriẹ ebri rọhẹ obaro rayen na kpo elo

Je rhẹriẹ idjerhe re pha chohri chohri na kpo otọ ọriẹriẹriẹ.

17 E che phi ayen kparobọ je phọphọ ayen,

Ihwo re vwẹroso ema ra kare,

Ihwo re ta kẹ ema rẹ utehru:* “Ovwan eghẹnẹ rẹ avwanre.”

18 Ovwan kerhọ, ovwan idierhọ;

Ovwan mrorẹ ji ni, ovwan irhuẹro.

19 Ono yen rhuẹro jokparẹ odibo mẹ,

Ro dierhọ kerẹ ikọn ri mi jiri?

Ono yen rhuẹro kerẹ ohwo ra hwosa kẹ,

Ro rhuẹro kerẹ odibo ri Jihova?

21 Oma vwerhen Jihova ro vwo dje oborẹ urhi* na rho te vẹ obo ro kpenu te,

Kidie ọyen ọvwata.

22 Ẹkẹvuọvo enana ihwo re gborhori ji mu ekuakua rayen reyọ;

E ke ayen eje dje inu ji mu ayen phiyọ evunrẹ uwodi.

E gborho ayen jẹ o vwo ohwo vuọvo ro sivwin ayeen,

E mu ayen reyọ jẹ o vwo ohwo vuọvo rọ tanẹ, “Mu ayen rhivwiin!”

24 Ono yen vwẹ Jekọp kpahotọ nẹ e muo yanran

Nẹ a je kua ekuakua rẹ Izrẹl reyọ?

Ayen rhọnvwe yan vwevunrẹ idjerhe rọyeen,

Ayen ji muọghọ vwọ kẹ urhi* Rọyeen.

25 Ọtiọyena Ko kuẹ ophu ọgangan rọyen,

Ivun emiovwo rọyen, kugbe ophu rẹ ofovwin kuo.

43 Asaọkiephana ọnana yen oborẹ Jihova tare,

Ọmemama wẹn, E Jekọp, Ohwo rọ ma wẹ, E Izrẹl:

 2 Ọke wọ da wan ame vrẹ, mi che nene uwe dia,

Ọke wọ da wan irhie vrẹ, i che re wee.

Ọke wọ da wan erhanre vrẹ, ọ cha torhẹ owẹẹ,

Erhanre na cha yare owẹẹ.

 3 Kidie mẹvwẹ Jihova Ọghẹnẹ wẹn,

Ohwo Ọfuanfon rẹ Izrẹl na, Osivwin wẹn.

Me vwẹ Ijipt kpahotọ kẹ wẹ kerẹ ọtanhirhe,

Me vwẹ Itiopia kugbe Siba vwo wene uwe.

 4 Kidie wọ rhe ghanre vwẹ ẹro mẹ,

Mi brọghọ phiyọ owẹ oma, mi ji vwo ẹguọnọ wẹn.

Ọtiọyena me cha vwẹ ihwo kpahotọ fiki wẹ

Je vwẹ ẹgborho vwo wene arhọ* wẹn.

Me cha reyọ emọ* wẹn vwo nẹ ẹbẹre ọnre va nẹcha rhe

Je ghwẹ ovwan koko vwo nẹ ẹbẹre ọnre shera rhe.

Reyọ emeshare mẹ vwo nẹ asan oshesheri rhe, emetẹ mẹ vwo nẹ oba rẹ akpọ na rhe,

 7 Kohwo kohwo ra vwẹ odẹ mẹ se

Re me mare vwọ kẹ urinrin mẹ,

Ihwo re me mare.’

 8 Reyọ ihwo ri vwo ẹro jẹ ayen mrorẹẹ,

Kugbe ihwo ri vwo erhọ jẹ ayen nyẹmee vwọ phia.

 9 Jẹ ẹgborho na eje ghwomakoko vwẹ asan ọvo,

Jẹ ihwo na ghwomakoko.

E jẹ ayen vwẹ iseri rayen vwọ phia vwo djephia nẹ ayen riase,

Yẹrẹ e jẹ ayen nyo je tanẹ, ‘Ọyen uyota na!’”

10 “Ovwan iseri mẹ,” ọtiọyen Jihova tare,

“E, odibo mẹ re me jẹreyọ,

Rere ovwan sa vwọ riẹn ji se vwe gbuyota,*

Je riẹn nẹ mẹvwẹ yen Ohwo vuọvo na.

Tavwen a ke mrẹ vwẹ, Ọghẹnẹ vuọvo herọọ,

A je vwọ mrẹ vwẹ nu, a je rhe mrẹ ọvuọvoo.

12 “Mẹvwẹ yen Ohwo ro ghwoghwori, ro sivwinri, rọ je nẹrhẹ a riẹn ọnana

Vwẹ ọke rẹ ọghẹnẹ ọrhorha vwo jẹ ohri rẹ ovwan ẹdia.

13 Vwọba, mẹvwẹ yen Ohwo vuọvo na ọkieje;

O vwo ohwo vuọvo ro se fru orọnvwọn vwo nẹ obọ mẹẹ.

“Fiki wẹn, mi che ji ohwo kpo Babilọn rere o mu irhe ra vwọ kanra ẹchẹ na eje phiyotọ,

Ihwo ri Kaldia rehẹ evunrẹ ikuna rayen che kperi phia fikirẹ ofudjevwe.

16 Ọnana yen oborẹ Jihova tare,

Ohwo rọ vwẹ idjerhe vwọ wan abadi na

Rọ je vwẹ idjerhe vwọ wan ame rọ họnra dede,

17 Ohwo ro suẹn ekpẹrẹ rẹ ofovwin kugbe iyesi rua otafe,

Otuofovwin kugbe egba ofovwin na:

18 “Ovwan karophiyọ erọnvwọn re wanree,

Ovwan mu ẹwẹn phiyọ obo re wanree.

19 Nighere! Mi ruẹ orọnvwọn kpokpọ;

Asaọkiephana dede, ọ vwomaphia re.

Me cha nẹrhẹ idjerhe wan aton na vrẹ

Irhie me rha djẹ wan aton na.

20 Eranvwe rẹ aghwa, eranko rẹ aghwa, kugbe igomugoro

Che muọghọ kẹ vwẹ,

Kidie me nẹrhẹ ame dia aton na,

Je nẹrhẹ irhie dia evunrẹ aton na,

Rere ihwo mẹ re me jẹreyọ sa vwọ mrẹ da,

21 Ihwo re me ma vwọ kẹ oma mẹ

Rere ayen se vwo ghwoghwo ejiro mẹ.

22 Ẹkẹvuọvo wo ji rhi se vwee, E Jekọp,

Kidie ofu mẹ dje we, E Izrẹl.

23 Wo ji rhi mu ogodẹ rhe vwe vwọ kẹ izobo rẹ ẹtorhẹ wẹẹn

Yẹrẹ vwẹ izobo wẹn vwọ vwẹ urinrin kẹ vwẹẹ.

Me gba wẹ nẹ wọ vwẹ okẹ rhe vwee,

Yẹrẹ nẹrhẹ ofu dje we fikirẹ ifrankisẹnsi re me nokpẹn rọyen mie wee.

24 Wọ vwẹ igho wẹn vwọ dẹ kalamọs* vwọ kẹ vwẹẹ,

Wọ je vwẹ evwri rẹ izobo wẹn vwọ nẹrhẹ oma vwerhen ovwẹẹ.

Ukperẹ ọyena, ku wo krẹn oghwa rẹ imwemwu wẹn nyẹ vwẹ

Je nẹrhẹ oma rhọ vwẹ fikirẹ oruchọ wẹn.

25 Mẹvwẹ, mẹvwẹ yen Ohwo ro phoro imwemwu wẹn* fikirẹ odẹ mẹ,

Me cha karophiyọ imwemwu wẹẹn.

26 Karophiyọ ovwẹ ọ da dianẹ o vwo orọnvwọn ọvo rọ chọrọ ovwẹ ẹro;

Gun ẹkẹn rẹ unu wẹn vwo djephia nẹ wọ riase.

27 Ọsẹ wẹn rode rẹsosuọ ru umwemwu,

Etota* wẹn komobọ gbe vwọso ovwẹ.

28 Ọtiọyena mi che ni isun rẹ asan ọfuanfon na kerẹ ihwo re fonroo,

Me cha vwẹ Jekọp vwọ kpahotọ kẹ oghwọrọ

Je vwẹ Izrẹl vwọ kpahotọ kẹ ehwẹjẹ.

44 “Asaọkiephana kerhọ, E Jekọp odibo mẹ,

Wẹ, E Izrẹl, re me jẹreyọ.

 2 Ọnana yen oborẹ Jihova tare,

Ọmemama wẹn rọ dia Ohwo rọ ma wẹ,

Ohwo rọ cha wẹ uko vwo nẹ evun rhe:*

‘Wọ djoshọọ, odibo mẹ Jekọp,

Wẹ, Jẹshurọn* re me jẹreyọ.

 3 Kidie me cha vwẹ ame kẹ ohwo rẹ urhuru ame siẹ nẹ ọ da

Je nẹrhẹ ivwori re djẹ ọkẹre dia evunrẹ otọ ọyaya.

Mi che ku ẹwẹn mẹ ku emọ* wẹn

Ji bruba vwọ kẹ emọ wẹn.

 4 Ayen cha varhe vwẹ ohri rẹ odin wọnwọnwọn,

Kerẹ irhe ri pọpla vwẹ orhoma rẹ ivwori.

Ọfa cha vwẹ odẹ ri Jekọp vwo se oma rọyen,

Ọfa mi ji si phiyọ obọ rọyen: “Ọ ri Jihova.”

 6 Ọnana yen oborẹ Jihova tare,

Ovie rẹ Izrẹl kugbe Ọtan rọyen, Jihova rẹ otuofovwin:

Vwo nẹ ọke re me vwọ ma ihwo vwẹ ọke awanre,

Jẹ ayen ta obo re cha phia kẹrẹkpẹ

Kugbe obo re cha phia vwẹ obaro na.

 8 Ovwan djoshọọ,

Ovwan jẹ oshọ kon ovwan phiyotọọ.

 9 Ihwo eje re kare ema fiemu vuọvoo,

Ekuakua rayen re pha ghanghanre che fierere vuọvoo.

Kerẹ iseri rayen, ayen* cha mrẹ emu vuọvoo, ayen je cha riẹn emu vuọvoo,

A cha phọphọ ihwo ri ru ayen.

10 Ono yen cha ma Ọghẹnẹ yẹrẹ ku oma rẹ utehru*

Rọ cha sa ghwa erere rhee?

Ọ vwẹ ihama vwọ teyọn,

Je vwẹ ugbobọ rọyen vwọ wian.

Ọtiọyena owẹnvwe ko hwe, ẹgba de ji no oma;

Ọ da amee, oma ko bro kuẹ.

Ọ da karọ họhọ ohworakpọ,

Yoyovwin kerẹ ohworakpọ,

Rere o chidia phiyọ evunrẹ uwevwin.*

Ọ sane oka rẹ urhe ọvo, urhe rẹ ok,

Ọ da nẹrhẹ ọ rho vwẹ uvwre rẹ irhe rẹ egbo na.

Ọ reyọ ẹbẹre ọvo rọyen vwo koko erhanre rere ọ dia;

O koko erhanre ji ru ibrẹdi.

16 Ọ vwẹ ubro rẹ urhe na vwo koko erhanre;

Ọ da vwẹ eranvwe rọ rere vwọ tọn vwọ, evun da vọn.

18 Ayen riẹn emu vuọvoo, ayen vwo ẹruọ rẹ emu vuọvoo,

Kidie e rhurhu ẹro rayen, ayen cha sa mrorẹẹ,

Ubiudu rayen ji vwo ẹruọọ.

19 O vwo ohwo vuọvo ro roriro vwẹ ubiudu rọyeen

Yẹrẹ vwo erianriẹn yẹrẹ vwo ẹruọọ, rọ da tanẹ,

“Ubro rọyen ọyen mi vwo koko erhanre,

Me da vwẹ imwerhanre rọyen vwo ru ibrẹdi je vwẹ eranvwe me rere tọn vwọ.

21 “Karophiyọ erọnvwọn nana, E Jekọp, kugbe owẹ, E Izrẹl,

Kidie wẹ odibo mẹ.

22 Mi che phoro orukuruku wẹn

Je vwẹ evwru vwo rhurhu imwemwu wẹn.

23 Kperi ukperi rẹ aghọghọ, ovwan idjuvwu na,

Kidie Jihova ru ọnana nure!

Kperi ukperi rẹ aghọghọ, ovwan igbenu na,

Ovwan egbo vẹ irhe rehẹ evunrẹ ovwan eje!

Kidie Jihova tan Jekọp rhivwin,

Ji dje urinrin rọyen phia womarẹ Izrẹl.”

24 Ọnana yen oborẹ Jihova tare, Ọtan wẹn,

Ohwo rọ ma wẹn vwo nẹ evun rhe:

Mẹvwẹ komobọ yen riẹn idjuvwu na,

Je riẹn akpọ na.

25 Mi phiẹ oyanghan phiyọ eka rẹ ihwo re ta eta ifefe na,*

Je nẹrhẹ ebọepha na ruẹ kerẹ ẹkpa;

Mẹvwẹ yen Ohwo rọ nẹrhẹ ẹwẹn rẹ eshare ri vwo aghwanre na tighẹ

Je rhẹriẹ erianriẹn rayen phiyọ ughẹnghẹn.

26 Ọ rọ nẹrhẹ ota rẹ odibo rọyen ruẹgba

Rọ nẹrhẹ aroẹmrẹ rẹ ikọn rọyen ruẹgba karekare;

Ohwo rọ ta kpahen Jerusalẹm nẹ, ‘A cha rhoma dia,’

Rọ ta kpahen irere ri Juda nẹ, ‘A cha rhoma bọn ayen,

Me je cha bọn asan re guọghọre vwọ’;

27 Ọ rọ ta kẹ ame ikokodo na nẹ, ‘Kpọ,

Me cha nẹrhẹ irhie wẹn eje kpọ yamu’;

28 Ohwo rọ ta kpahen Sairọs nẹ, ‘Ọyen osuigodẹ mẹ,

O che ru ọhọre mẹ eje gba’;

Ọ rọ ta kpahen Jerusalẹm nẹ, ‘A cha rhoma bọn,’

45 Ọnana yen oborẹ Jihova ta kẹ ohwo rọ jẹreyọ, Sairọs,

Re me yọnrọn obọrhen rọyen

Rere o vwo phi ẹgborho rehẹ obaro rọyen kparobọ,

Rere ọ vwọ reyọ ekuakua ifovwin vwo mie* ivie,

Rere o vwo rhie ẹchẹ ivẹ rehẹ obaro rọyen na,

Rere e vwo jẹ ẹchẹ rẹ anurhoro na ẹkanrọn.

 2 “Me cha ka obaro kẹ wẹ,

Ji kporon igbenu itete na totọ.

Me cha guọghọ ẹchẹ rẹ ẹrovwo na ibribro,

Je nyavwe ekpọ rẹ utehru ra vwọ kanra ẹchẹ na.

 3 Me cha vwẹ efe rehẹ evunrẹ ebri vwọ kẹ wẹ

Efe re sinu vwẹ asan re djahenre,

Rere wọ vwọ riẹn nẹ mẹvwẹ yen Jihova,

Ọghẹnẹ rẹ Izrẹl, rọ vwẹ odẹ wẹn vwo se we.

 4 Fikirẹ odibo mẹ Jekọp kugbe Izrẹl ohwo re me jẹreyọ,

Me vwẹ odẹ wẹn vwo se we.

Mi che ru we gan* dede nẹ wọ riẹn vwẹẹ,

 6 Rere ihwo vwọ riẹn

Vwo nẹ ẹbẹre ọnre va nẹcha re te ẹbẹre ọnre shera

Nẹ o vwo ohwo ọfa vwọ vrẹ vwẹẹ.

 7 Mẹvwẹ yen ma orẹmrẹ kugbe ebri,

Mẹvwẹ yen vwẹ ufuoma kugbe okpetu vwọ phia;

Mẹvwẹ, Jihova, yen ruẹ erọnvwọn nana eje.

 8 Ovwan idjuvwu, jẹ osio rhọ nẹ obenu rhe;

Jẹ osio rẹ ophiọnphiọn rhọ ku otọ na eje.

E jẹ akpọ na vọn vẹ emamọ rẹ esivwon,

E jẹ ọ je nẹrhẹ ophiọnphiọn va rhe vwẹ ọke vuọvo na.

 9 Okpetu rode kẹ ohwo ro nene Ọmemama rọyen* phraphro,*

Kidie ẹmẹbẹre ochẹ ọvo vwẹ usun rẹ ẹbẹre echẹ

Ri ghwu nene otọ yen ọ hepha!

“Wọ cha nọ vwẹ onọ kpahen erọnvwọn re cha,

Je vwẹ iji kẹ vwẹ kpahen emọ mẹ kugbe iruo rẹ abọ mẹ?

Mẹvwẹ yen vwẹ abọ mẹ vwọ riẹn idjuvwu na,

Je vwẹ iji vwọ kẹ erọnvwọn eje rehẹ evun rayen.”*

13 “Me kpare ohwo ọvo vrẹn vwẹ ophiọnphiọn,

Me cha nẹrhẹ idjerhe rọyen eje dia ọsoso.

Ọyen ohwo rọ cha bọn orere mẹ

Ji siobọnẹ ihwo mẹ rehẹ ighuvwu ababọ rẹ osa yẹrẹ udi ẹriọ,” ọtiọyen Jihova rẹ otuofovwin tare.

“Erere* rẹ Ijipt vẹ eghwa* rẹ Itiopia kugbe ihwo ri Sabi re pha grongron

Che bru we rhe, je dia ewẹn.

Ayen cha ta kpahen owẹ vwẹ ẹrhovwo nẹ, ‘Vwọrẹ imuẹro, Ọghẹnẹ vẹ owẹ herọ,

O vwo ohwo ọfaa; Ọghẹnẹ ọfa herọọ.’”

15 Vwọrẹ uyota, wẹwẹ Ọghẹnẹ rọ vwẹ ọkieje vwo dje obo ro ruẹ phiaa,

E Ọghẹnẹ rẹ Izrẹl, Osivwin na.

16 A cha nẹrhẹ oma vo ayen eje je phọphọ ayen;

Ihwo eje re ma edjọ cha wanvrẹ vwẹ ophọphọvwe.

18 Kidie ọnana yen oborẹ Jihova tare,

Ọmemama rẹ idjuvwu na, Ọghẹnẹ rẹ uyota na,

Ohwo rọ ma akpọ na, ro vwiro vi kokoroko,

Ọ dia ọ marọ kufiaa,* ẹkẹvuọvo ọ marọ rere a vwọ dia:

19 Me ta ota vwẹ odjahọọn, vwẹ otọ rẹ ebrii;

Me ta kẹ emọ* ri Jekọp nẹ,

‘Ovwan guọnọ ovwẹ ghevweghee.’

Ihwo ri muẹ ema ra kare yan,

Je nẹrhovwo rhe ọghẹnẹ ro che se sivwin ayeen riẹn emu vuọvoo.

Ono yen ta ọnana phiyotọ vwẹ ọke grongron re

Ji ghwoghwo vwo nẹ ọke re wanre rhe?

O vwo Ọghẹnẹ ọfaa jokparẹ omẹvwẹ;

Ọghẹnẹ rọ dia ọvwata kugbe Osivwin, ọfa herọ vwọ vrẹ vwẹẹ.

22 Rhivwin bru vwe rhe ji sivwin rhọ, ovwan ihwo rehẹ oba rẹ akpọ na eje,

Kidie mẹvwẹ yen Ọghẹnẹ, ọfa herọọ.

23 Me vwẹ oma mẹ duvwun iyorin nure;

Ota na nẹ unu mẹ yanran vwẹ ophiọnphiọn nure,

O che rhivwiin:

Kugbon kugbon che shiguẹ vwọ kẹ vwẹ,

Kẹrẹnvwe kẹrẹnvwe che duvwun iyorin rẹ evun-ẹfuọn kẹ vwẹ

24 Ayen me ta, ‘Vwọrẹ imuẹro, ophiọnphiọn vẹ ogangan rhe Jihova.

25 Emọ* rẹ Izrẹl eje cha mrẹvughe nẹ ọyen obo ri shephiyọ rẹ ayen vwọ ga Jihova,

Ọyen yen ayen je cha vwọ yonma.’”

E krun edjọ rayen phiyọ enu rẹ eranvwe, enu rẹ eranvwe re vwo muẹ oghwa,

Kerẹ oghwa ọhọhọhọ re krun nyẹ eranvwe rẹ oma rhọ.

 2 Ayen rhuẹnre ji gbe uyovwin phiyotọ kugbe;

Ayen che se sivwin eghwa* naa,

Ayen* komobọ kpo imu.

 3 “Ovwan kerhọ mẹ, E uwevwin ri Jekọp, kugbe ovwan eje ri chekọ vwẹ uwevwin rẹ Izrẹl,

Ovwan re me vwẹrote vwo nẹ evun rhe, ri mi ji bicha vwo nẹ ọkiemọ rhe.

 4 Bẹsiẹ wọ vwọ ghwo, mi che wenee;

Bẹsiẹ wọ vwọ djẹ esha, mi che rhe biẹcha wẹ.

 5 Ono yen ovwan se vwo dje vwe yẹrẹ ono yen me vẹ ọyen gba abavo yẹrẹ vwọ vwanvwe ovwẹ,

Rẹ me vẹ ọyen da họhọ ohwohwo?

 6 O vwo ihwo evo re rhaphiẹ oro vwo nẹ ekpu rayen;

Ayen vwẹ ovwanvwọ vwọ vwanvwa idọnọ ọfuanfon.

 7 Ayen de muo phiyọ igabọ rayen;

Ayen de muo ra rhuẹrẹphiyọ asan rọyen, o de mudia etiyin.

Ayen kperi se, ẹkẹvuọvo ọ kpahenree;

O che se sivwin ohwo vuọvo vwo nẹ ukpokpoghoo.

 9 Karophiyọ erọnvwọn re wanre* vwẹ ọke grongron re,

Nẹ mẹvwẹ Ọghẹnẹ, ọfa herọọ.

10 Vwo nẹ ọtonphiyọ rhe yen me vwọ ta oborẹ oba na cha dia,

Vwo nẹ ọke grongron rhire yen me vwọ ta erọnvwọn re ji rhi ruu.

Me tare nẹ, ‘Orhiẹn* mẹ che mudia,

Mi ji che ru kemu kemu re me guọnọre.’

11 Mi se ọphran rọ ria eranvwe nẹ ẹbẹre ọnre va nẹcha cha,

Mi se ohwo ro che ru oborẹ mi brorhiẹn rọyen* vwo nẹ otọ oshesheri cha.

12 Ovwan kerhọ mẹ, ovwan ihwo ri ruẹ udu gangan,

Ovwan ri sherabọ vwọ kẹ ophiọnphiọn.

13 Ọke mi che vwo dje ophiọnphiọn mẹ phia sikẹre re;

O rhe sherii,

Esivwon mẹ che hwọkee.

47 Wontọ rhe rere wo chidia ekpẹn,

E ọmọtobẹ ri Babilọn.

Chidia totọ vwẹ asan ro vwo eketee,

E ọmọtẹ ri Kaldia,

Kidie ihwo gbi che se we ọmọtẹ rẹ ovie ọfaa.

 4 “Ohwo rọ tan avwanre na

—Jihova rẹ otuofovwin yen odẹ rọyen—

Ọyen Ohwo Ọfuanfon rẹ Izrẹl na.”

 5 Chidia wo hwomamu rere wọ ro evunrẹ ebri,

E ọmọtẹ rẹ ihwo ri Kaldia;

E gbi che se we Ovie aye rẹ Uvie sansan ọfaa.

Mi gbe uku mẹ ẹgua,

Mi de phi ayen phiyọ obọ wẹn.

Wọ reyọ erọnvwọn nana te ubiuduu;

Wo roro kpahen obo re cha dia ukuotọ rọyeen.

 8 Asaọkiephana nyo ọnana, E wẹwẹ ro vwo ẹguọnọ rẹ akpọẹriọ,

Ro chidia vwẹ ofuvwegbe, rọ ta vwẹ ubiudu rọyen nẹ:

Erọnvwọn nana cha ghene phia kẹ wẹ

Fikirẹ ephaẹbọ wẹn buebun kugbe inehweri wẹn eje.

Aghwanre vẹ erianriẹn wẹn yen sun we ghwru,

Wọ ta vwẹ ubiudu wẹn: “Mẹvwẹ yen ohwo na, ohwo ọfa herọọ.”

11 Ẹkẹvuọvo okpetu che shenyẹ wẹ,

Inehweri wẹn vuọvo cha sa da obọ jii.*

12 Ọtiọyena gba reyọ inehweri wẹn vẹ ephaẹbọ buebun wẹn,

Ru wo vwo ruiruo nẹ ọke eghene rhe na vwo ruiruo.

Ọkiọvo wọ sa mrẹ erere no rhe;

Ọkiọvo wo se ru obo ri che gbe ihwo unu.

Jẹ ayen vrẹn asaọkiephana rere ayen sivwin uwe,

Ihwo re ga idjuvwu na,* ri nẹ isio na,

Ihwo re ta obo re cha phia kẹ wẹ

Ọke rẹ emeranvwe kpokpọ da vwomaphia.

Enana dia imwerhanre ra vwọ yara omaa,

Ọnana je dia erhanre re chidia kẹrẹẹ.

15 Ọtiọyen ihwo ri ruẹ inehweri kẹ wẹ cha dia,

Ihwo re vẹ owẹ gba lagha oma nẹ ọke eghene wẹn rhe.

48 Ovwan nyo ọnana, E uwevwin ri Jekọp,

Ovwan ihwo ri mu odẹ rẹ Izrẹl kẹ oma

Kugbe ihwo ri nẹ agada* ri Juda rhe,

Ovwan re vwẹ odẹ ri Jihova duvwun iyorin

Ri se Ọghẹnẹ rẹ Izrẹl,

Dede nẹ ọ dia vwọrẹ uyota kugbe ophiọnphiọọn.

 2 Kidie ayen tanẹ ayen dia orere ọfuanfon na

Je guọnọ obicha rẹ Ọghẹnẹ rẹ Izrẹl,

Rẹ odẹ rọyen dia Jihova rẹ otuofovwin na.

Unu mẹ yen i nurhe,

Me da vwẹ ayen phia.

 4 Kidie me riẹnre nẹ ovwan vwo udu

—Nẹ iriẹn ohọre rẹ ovwan pha gangan kerẹ utehru, arhare rẹ ovwan pha kerẹ ẹrovwo—

 5 Me vuẹ ovwan ọke grongron rọ wanre.

Tavwen ọ ke phia, me nẹrhẹ ovwan nyo kpahọn,

Rere ovwan vwo jẹ tanẹ, ‘Ẹdjọ mẹ yen ru ọnana;

Oma mẹ ra kare kugbe oma rẹ utehru mẹ* yen ji iji nana.’

Vwo nẹ ọke nana yanran, mi ghwoghwo erọnvwọn kpokpọ kẹ ovwan,

Odjahọn ra nabọ sinu rẹ ovwan je rhe riẹẹn.

 7 Enẹna yen a vwọ ma ayen, o ghwe krii,

Erọnvwọn rẹ ovwan ji rhi nyoo tavwen nonẹna ki te,

Rere ovwan vwo jẹ tanẹ, ‘Nighere! me riẹn ayen jovwo.’

 8 Ẹjo, wo ji rhi nyoo, wọ je rhe riẹẹn,

Vwẹ ọke re wanre na, erhọ wẹn rhierii.

Kidie me riẹnre nẹ wọ vọnre vẹ ophiẹnvwe,

E ji se we ọchurhi nẹ ọke evwiẹ rhe.

 9 Ẹkẹvuọvo fikirẹ odẹ mẹ mi che muophuu;

Fikirẹ ujiri romobọ mẹ mi che sun oma mẹ kpahen owẹ,

Me cha ghwọrọ owẹẹ.

11 Fikirẹ odẹ mẹ, fikirẹ odẹ mẹ mi che ruo,

Kidie mavọ me sa vwọ rhọnvwe nẹ e gbe vwe ẹgua?

13 Obọ mẹ yen vwẹ uchivwo rẹ akpọ na vi,

Obọrhen mẹ yen riẹn idjuvwu na.

O che ru ọhọre rọyen vwọso Babilọn,

Je kpare ugbobọ rọyen vwọso ihwo ri Kaldia.

“Mẹvwẹ, Jihova, yen Ọghẹnẹ wẹn,

Ohwo ro yono uwe wọ vwọ mrẹ erere kẹ oma wẹn,*

Ro sun we vwẹ idjerhe ro fori nẹ wọ wan.

Ọke yena ufuoma wẹn kọ rha dia kerẹ urhie

Ophiọnphiọn wẹn kọ rha dia kerẹ ọgbogho rẹ abadi.

19 Emọ* wẹn cha dia buebun kerẹ ekpẹn

Uvwiẹ wẹn cha dia buebun kerẹ ibiekpẹn.

Ọ nẹrhẹ ame djẹ nẹ oragha rhe vwọ kẹ ayen;

Ọ bẹrẹ oragha, ame da mwavwe no rhe.”

49 Kerhọ mẹ, ovwan etọ rẹ ame riariẹ phiyọ,

Kerhọ, ovwan ẹgborho re pha shesheri.

 2 O ru unu mẹ kerẹ ọlọkọ rọ pha dandan;

O si vwe nu vwevunrẹ uhoho rẹ obọ rọyen.

O ru vwe phiyọ odada ra lọre dandan;

O si vwe nu vwevunrẹ ekpu rọ ghwẹ edada phiyọ.

 3 Ọ da ta kẹ vwẹ: “Wẹwẹ odibo mẹ, E Izrẹl,

Re me cha wan oma rọyen dje urinrin mẹ phia.”

Ẹkẹvuọvo vwọrẹ imuẹro, ẹdjọeguo mẹ hẹ obọ ri Jihova,*

Osa mẹ jehẹ obọ rẹ Ọghẹnẹ mẹ.”