JOB

“Ẹbẹban yen mi vwo nẹ uwevwiẹ rẹ oni mẹ rhe,

Ẹbẹban yen mi ji che vwo rhivwin.

 3 “E jẹ ẹdẹ re vwiẹ vwẹ na ghwọrọ,

Kugbe ason rẹ ohwo ọvo vwọ tanẹ, ‘A mrevun rẹ ọmọshare!’

E jẹ Ọghẹnẹ rọhẹ obenu davwerhọ rọyeen;

E jẹ urhukpẹ vuọvo lo muoo.

 6 Ason yena—e jẹ ebri hwi shabọ phiyọ;

E jẹ ọ ghọghọ vwẹ ohri rẹ ẹdẹ rẹ ukpee,

E jẹ ọ je dia usun rẹ emeranvwe re kerẹẹ.

 7 Vwọrẹ uyota! E jẹ ason yena dia ẹgan;

E jẹ e nyo ukperi rẹ aghọghọ vuọvo vwọọ.

 8 E jẹ ihwo re hanrha ẹdẹ hanrhọ,

Ihwo re sa rhọvwọn Levayatan.*

 9 E jẹ isio rẹ urhiọke rọyen muebri;

E jẹ ọ hẹrhẹ elo rẹ ẹdẹ na kufia,

E jẹ ọ je mrẹ elo rẹ edegburhiọkee.

10 Kidie ọ kanre ẹchẹ rẹ uwevwiẹ rẹ oni mẹẹ;

Yẹrẹ ko si okpetu nu vwọ kẹ ẹro mẹẹ.

12 Diesorọ a vwọ mrẹ igbon ri rhiabọreyọ ovwẹ

Kugbe ivie ri mi vieri?

13 Manẹ asaọkiephana ji mi sherhẹn ababọ rẹ ukpokpoma;

Je me vwerhẹn ji rovwoma

14 Vẹ ivie rẹ akpọ na kugbe ibruche rayen,

Re bọn asan re ghwọrọre asaọkiephana kẹ oma rayen,

15 Yẹrẹ vẹ emọ rẹ ivie ri vwo iro,

Rẹ iwevwin rayen vọnre vẹ idọnọ efuanfon.

16 Yẹrẹ diesorọ me rha họhọ evun ro sherii,

Kerẹ emọ re nama mrẹ urhukpẹẹ?

17 Etiyin orumwemwu dede de jẹ ophu emuo;

Etiyin ọvwiẹrẹ de rovwoma.

18 Etiyin oma de fuẹn ihwo rehẹ uwodi;

Ayen nyo urhuru rẹ ohwo rọ gba ayen vwo ruiruoo.

19 Ihwo itete vẹ ihwo ride abavo vwẹ etiyin,

E ji si ọviẹn nẹ obọ rẹ onini rọyen.

20 Diesorọ ọ vwọ vwẹ orẹmrẹ vwọ kẹ ohwo rọ rioja

Kugbe arhọ vwọ kẹ ihwo rehẹ ẹdia rẹ omaemuophiyọ ọgangan?*

Ayen tọn guọnọ vwọ vrẹ efe re sinu,

22 Ihwo re ghọghọ gangan,

Ihwo rẹ oma vwerhan ọke rẹ ayen da mrẹ ushi.

23 Diesorọ ọ vwọ vwẹ orẹmrẹ vwọ kẹ ohwo rọ yan ghwru,

Ohwo rẹ Ọghẹnẹ ke dje?

24 Kidie ukperẹ emuọre unu kọyen me fiọn,

Ẹguan mẹ kuẹ kufia kerẹ ame.

25 Kidie oborẹ oshọ rọyen mu vwe na bru vwe rhire,

Obo re me djoshọ rọyen na phia kẹ vwẹ re.

26 Mi vwo ufuoma, omafuvwe, kugbe omaerovwon vuọvoo,

Ẹkẹvuọvo okpetu kọyen cha okpokpahọn.”

 3 Uyota, wọ kpọ ihwo buebun vi re,

Wo ji ru abọ re vwiẹrẹre gan.

 4 Eta wẹn kpara kohwo kohwo rọ kprowọ vrẹn,

Wo ji ru ihwo rẹ igbon rayen kpogho gan.

 5 Ẹkẹvuọvo asaọkiephana ọ phia kẹ wẹ re, ofu dje we hwe re;*

O te we oma re, wo muomaphiyọ re.

 8 Oborẹ me mrẹre yen ihwo ri voro* obo re brare

Kugbe ihwo re kọn okpetu, orọnvwọn ọvuọvo yen ayen che vun.

 9 Womarẹ ẹwẹn rẹ Ọghẹnẹ ayen ghwọrọre,

Womarẹ ophu ọgangan rọyen ayen te oba.

10 Okpohrokpo guan, okpohrokpo otete do,

Ẹkẹvuọvo akon rẹ ikpohrokpo re goma* dede kparan.

11 Okpohrokpo ghwuru kidie ọ mrẹ eranvwe hwee,

Emọ rẹ okpohrokpo je hrabọ.

12 Asaọkiephana a vwẹ ota ọvo rhe vwe vwẹ odjahọn,

Ophiọrọ rọyen te orhọ mẹ.

13 Vwẹ iroro ro kpokpo ohwo vwẹ emramrẹ rẹ ason,

Ọke rẹ ovwerhẹn okokodo vwo muẹ ihwo,

14 Uguegue ọgangan da ro ovwẹ oma,

Ọ da nẹrhẹ ibeku mẹ eje vọn vẹ oshọ.

15 Ẹwẹn ọvo da wanvrẹ opharo mẹ;

Ẹton ekpahen de ku vwe oma.

16 O de mudia asan ọvo,

Ẹkẹvuọvo mi vughiree.

Orọnvwọn ọvo hẹ obaro mẹ;

Asan eje da fọ, mi de nyo urhuru ọvo:

18 Nighere! O vwo esegbuyota kpahen idibo rọyeen,

Ọ je guọnọ echobọ vwẹ oma rẹ emekashe rọyen.*

19 Siẹvo kẹ ihwo re dia iwevwin rẹ ikerekpẹn,

Rẹ ichivwo rayen hẹ evunrẹ ekpẹn,

Ra fobọ guọghọ kerẹ eghwọghwọ!

20 A ghwọrọ ayen karekare vwo nẹ urhiọke re te ovwọnvwọn;

Ayen ghwọrọ bẹdi bẹdẹ, ohwo vuọvo nẹ ayen suaa.

 2 Ophu che hwe ẹkpa rẹ ohwo,

Omaẹriọ ọgangan cha teyen ọvwughẹnghẹn hwe.

 3 Me mrẹ ẹkpa rẹ ohwo rọ tan awọ muotọ,

Ẹkẹvuọvo kpregede na a da hanrhe asan rọ dia.

 4 Emọ rọyen sherabọ kẹ ofuvwegbe,

A ghwọrọ ayen vwẹ anurhoro rẹ orere na, ohwo vuọvo herọ ro che sivwin ayeen.

 5 Ihwo rẹ owẹnvwe hwe ria oborẹ ayen vunru,

Ayen tobọ reyọ vwo nẹ ohri rẹ inwe,

Ufi muẹ ekuakua rayen.

 6 Kidie erọnvwọn re sua omaẹwan djẹ nẹ ekpẹn chaa,

Okpetu je djẹ nẹ otọ chaa.

 7 Kidie e vwiẹ ohworakpọ vwọ kẹ okpetu,

O muẹro kirobo rẹ imuerhanre rhan kpenu.

 8 Ẹkẹvuọvo me cha rẹ Ọghẹnẹ,

Ọghẹnẹ yen mi che mu ẹdjọ mẹ bru ra,

 9 Vwo rhe Ohwo ro ruẹ erọnvwọn ride re che se vwo ẹruọ rayeen,

Erọnvwọn rẹ igbevwunu re che se kerii.

10 Ọ vwẹ osio kẹ akpọ na

Ọ je vwẹ ame kẹ idju na.

11 Ọ kpara ohwo ro kpotọ kpenu,

Ọ je kpara ohwo ro muomaphiyọ kpo usivwin.

12 Ọ yanghan iroro rẹ ihwo ri hworo ona,

Rere iruo rẹ abọ rayen vwo jẹ ephiokparobọ.

13 O muẹ evwaghwanre na vwevunrẹ ona rẹ ophiẹnvwe rayen,

Rere ọ vwọ dobọ rẹ iroroẹjẹ rẹ evwaghanre na ji.

14 Ayen yan vwevunrẹ ebri vwẹ aruphẹn,

Ayen ji beghe vwẹ oghẹruvo kerẹsiẹ ra da mrẹ nẹ ason.

15 O sivwẹn vwo nẹ ọlọkọ rẹ unu rayen,

O sivwẹn ogbere nẹ abọ rẹ ọgba,

16 Rere iphiẹrophiyọ sa vwọ dia vwọ kẹ ohwo ro kpotọ,

Ẹkẹvuọvo e che rhurhu unu rẹ ihwo ri jẹ evwata ẹdia.

17 Nighere! Omavwerhovwẹn dia vwọ kẹ ohwo rẹ Ọghẹnẹ ghwọku;

Ọtiọyena wọ sian ọghwọku rẹ Ọromevwẹgba naa!

18 Kidie ọ sua omiamiavwe, ẹkẹvuọvo ọ gba ora na;

O vwirhẹn, ẹkẹvuọvo ọ vwẹ obọ rọyen vwo sivwẹn.

19 O che sivwin uwe vwo nẹ okpetu esan,

Ọrighwrẹn na dede cha wan wẹ omaa.

20 O che sivwin uwe vwo nẹ ughwu vwẹ ọke rẹ owẹnvwe,

Ji vwo nẹ ẹgba rẹ ọlọkọ vwẹ ọke rẹ ofovwin.

21 O che sivwin uwe vwo nẹ uphiaphia rẹ ẹrẹnvwe na,

Wọ cha djoshọ rẹ oghwọrọ ọke rọ da rhee.

22 Wọ cha vwẹ oghwọrọ vẹ owẹnvwe vwọ jehwẹ,

Wọ je cha djoshọ rẹ eranvwe rẹ aghwa rẹ akpọ naa.

23 Kidie ikuta rẹ aghwa na cha wan wẹ omaa,*

Eranvwe rẹ aghwa na vẹ owẹ je cha dia vwọrẹ ufuoma.

24 Wọ cha riẹn nẹ utughẹ wẹn hẹ ẹdia rẹ ofuvwegbe,*

Orọnvwọn vuọvo che ghwru ọke ru wọ da fuẹrẹn otọ rẹ ichuru wẹn da ria odiin.

25 Wo che vwo emọ buebun,

Emọ wẹn cha dia buebun kerẹ odin rẹ akpọ na.

26 Wọ cha dia gangan ọke ru wo de kpo ushi,

Kerẹ ekrun rẹ eka re kokori vwẹ aruọke rayen.

 2 “Mane ka sa vwanvwe odjadja mẹ ejobi

Ji muo vẹ okpetu mẹ phiyọ ovwanvwọ!

 4 Kidie edada rẹ Ọromevwẹgba na duvwun uvwe,

Ẹwẹn mẹ kọ da obi rayen;

Uguegue ro nẹ obọ rẹ Ọghẹnẹ rhe tẹnrẹn urhiẹ vwọso ovwẹ.

 5 Ekẹkẹtẹ rẹ aghwa che kperi phia siẹrẹ ọ da mrẹ odin re,

Yẹrẹ erhuẹn che kperi siẹrẹ ọ da mrẹ emuọre?

 6 A riemu ro jẹ avwerhen evwo ababọ rẹ ughwanka,

Gbanẹ avwerhen hẹ evunrẹ ame rẹ okankọn ro jẹ avwerhen evwo?

 8 E, mane kẹ oborẹ me nokpẹn rọyen na se te vwe obọ

Mane kẹ Ọghẹnẹ se ru ọdavwẹ mẹ kẹ vwẹ!

 9 Mane kẹ Ọghẹnẹ se vwo owenvwe rọ vwọ ghwọrọ ovwẹ,

Mane kọ sa rionbọ rọyen phia rọ vwọ teyen ovwẹ hwe!

10 Kidie ọyena dede cha hwarhiẹ onẹrhẹvwe bru vwe rhe;

Mi che kperi phia vẹ aghọghọ dede nẹ mi rhiẹromrẹ ọmiaovwẹ ọgangan,

Kidie me je rhe sen eta rẹ Ohwo Ọfuanfon naa.

13 O vwo idjerhe ọvo re me sa vwọ cha oma mẹ uko

Ra vwọ djẹ erọnvwọn eje re me sa vwọ cha oma mẹ uko nuvwe oma re na?

14 Kohwo kohwo rọ djahen ẹguọnọ ro jẹ rhẹriẹ vwọ kẹ ọrivẹ rọyen

Che chukoku oshọẹdjẹ rẹ Ọromevwẹgba na.

15 Iniọvo robọ mẹ rhe dia ihwo rẹ ophiẹnvwe kerẹ urhie rẹ ame rẹ imicho re wranre,

Kerẹ urhie rẹ ame rẹ imicho re wranre re yamuẹ.

16 Ame ro djeri nẹrhẹ ayen muebri,

Imicho re wran siomanu vwẹ evun rayen.

17 Ẹkẹvuọvo ọke rọyen de te re, ame kọ kanra ayen, kẹ ayen te oba;

Ọke rẹ aruọke na da tuabọ re, kẹ ayen yamuẹ.

18 A kpọ ugbo rayen;

Ayen djẹ ro aton na, ayen me ranvwiẹ.

19 Ẹko rẹ ihwo ri Tima guọnọ ayen;

Eyonyan ri nẹ Shiba rhe* hẹrhẹ ayen.

20 Oma vo ayen kidie ayen vwẹroso ayen nọ;

E ku ayen phiyotọ ọke rẹ ayen vwọ rhe etiyin.

21 Kidie enẹ ovwan rhe dia kẹ vwẹ;

Ovwan mrẹ uguegue rẹ okpetu mẹ re, oshọ ji mu ovwan.

23 Me rẹre jovwo re nẹ e sivwin uvwe nẹ abọ rẹ ọvweghrẹn

Yẹrẹ e sivwin uvwe* nẹ abọ rẹ ihwo ri shenyẹ ihwo?

24 Ovwan yono uvwe, ke me cha fọ gbiẹi;

Ovwan cha vwẹ uko vwo vwo ẹruọ rẹ echobọ mẹ.

26 Ovwan hworo ona rẹ ovwan vwọ ghwọku uvwe fikirẹ eta mẹ,

Eta rẹ ohwo rọ riẹn obo ro ruẹẹ, rẹ odju muẹ yanran?

27 Ovwan ji che duvwun itẹ fikirẹ ọmọphrorivwin

Je shẹ ugbeyan romobọ rẹ ovwan!

28 Ọtiọyena rhẹrioma asaọkiephana rere ovwan ni vwe,

Kidie mi che gun efian vwẹ obaro rẹ ovwaan.

29 Biko ovwan rhoma roro—ovwan vwẹ ovwẹ vwo guẹdjọọ—

E, rhoma roro, kidie ophiọnphiọn mẹ jehẹ obo rọ hepha.

7 “Akpeyeren rẹ ohworakpọ vwẹ otọrakpọ na rha họhọ iruo ra gba vwo ruẹ,

Ẹdẹ rọyen rha je họhọ ẹdẹ rẹ ọwiowian ra reyọ phiyọ iruo?

 2 Kerẹ ọviẹn, o rhẹro rẹ uhoho na,

Kerẹ ọwiowian ra reyọ phiyọ iruo, ọ hẹrhẹ osa rọyen.

 3 Ọtiọyena emeranvwe ifefe yen a ghare vwọ kẹ vwẹ

E ji kere ason rẹ ofudjevwe vwọ kẹ vwẹ.

 5 Ihori vẹ ọkpan rẹ inuhu rhurhu oma mẹ;

Era re yare vẹ orin vọn oma mẹ.

 6 Ẹdẹ mẹ yanran kpakpata vwọ vrẹ ukoti rẹ ohwo ro rhuon orọnvwọn,

Ayen de rhi te oba ababọ rẹ iphiẹrophiyọ.

 7 Karophiyọ nẹ arhọ mẹ odju,

Nẹ ẹro mẹ rha cha mrẹ omavwerhovwẹn* ọfaa.

 8 Ẹro rọ mrẹ vwẹ enẹna rha cha mrẹ vwẹ ọfaa;

Ẹro wẹn cha guọnọ ovwẹ, ẹkẹvuọvo me yanran re.

 9 Kerẹ evwru rọ phoriẹn je ranvwiẹ,

Ohwo rọ ro otọ kpo Ushi* nu rhe rhivwẹn chaa.

10 O rhe che rhivwin kpo uwevwin rọyen ọfaa,

Asan rọyen rhe ji che vughe ọfaa.

Me cha ta ota vwẹ odjadja rẹ ẹwẹn mẹ;

Mi che brenu vwẹ ukpokpogho ọgangan mẹ!

12 Mẹvwẹ yen abadi na yẹrẹ emama rode rẹ abadi na,

Ru wọ vwọ rhẹrẹ ovwẹ?

13 Ọke me da tanẹ, ‘Ehwa mẹ cha nẹrhẹ ovwẹ;

Ehwa mẹ che si ofudjevwe mẹ kpotọ,’

14 Etiyin wọ da vwẹ evwerhẹn vwọ djẹ uguegue mu vwe

Je vwẹ emramrẹ vwọ djoshọ mu vwe,

15 Rere me* vwọ jẹ ofudjevwe,

E, ughwu ukperẹ ugboma* mẹ nana.

17 Ono yen ohworakpọ ru wọ davwerhọ rọyen

Ru wọ je tẹnro wẹn viẹ?*

18 Diesorọ wọ vwọ fuẹrẹn kurhiọke kurhiọke

Wọ je vwọ davwọn nẹ kọke kọke?

19 Wo che kuẹrofia kẹ vwẹ

Je yanjẹ uvwe vwo te ọke ri mi vwo rhivwin enya mẹ rọ?

21 Diesorọ wọ rha reyọ ogbeku mẹ vwo ghovwo uvwe

Je kpairoro vrẹ oruchọ mẹẹ?

Kidie chekemerha ki mi che sherhẹn vwẹ ekpẹn na,

Ku wọ cha guọnọ ovwẹ, ẹkẹvuọvo me yanran re.”

 3 Ọghẹnẹ cha rhẹriẹ orhiẹn ọsoso,

Yẹrẹ Ọromevwẹgba na cha gẹrẹ obo re dia ọsoso?

 4 Emọ wẹn de ru umwemwu vwọsuọ,

Ọ me nẹrhẹ ayen rioja fikirẹ ẹvwọsuọ rayen;*

 5 Ẹkẹvuọvo wọ da guọnọ Ọghẹnẹ

Je rẹ Ọromevwẹgba na vwọ kẹ ẹroesiri,

 6 Wọ da ghene dia ohwo rọ fonro kugbe ohwo ọsoso,

Ọ cha davwerhọ wẹn*

Je reyọ owẹ rhivwin vwo kpo asan ro fo we.

 7 Dede nẹ ọtonphiyọ wẹn hanvwere,

Obaro akpeyeren wẹn cha rho.

 8 Biko nọ uvwiẹ rọ wanre na,

Rere wọ davwerhọ rẹ erọnvwọn rẹ esẹ rayen mrẹvughe.

 9 Kidie odẹ rọ wanre na yen e vwiẹ avwanre, avwanre je riẹn emu vuọvoo,

Kidie ẹdẹ rẹ avwanre vwẹ otọrakpọ na uhoho.

10 Ayen rhe che yono uwe

Je vuẹ wẹ oborẹ ayen riẹnre?*

12 Ọke rọ da kpipho, jẹ a je rhe kọrọọ,

Ọ cha kare ekankọn efa yamu.

13 Ọnana yen obo re cha phia kẹ ohwo rọ kpairoro vrẹ Ọghẹnẹ,

Kidie iphiẹrophiyọ rẹ ohwo ro jẹ Ọghẹnẹ ẹriẹn* cha ghwọrọ,

14 Ohwo rẹ ẹroẹvwọsuọ rọyen dia ofefe

Rẹ ẹroẹvwọsuọ rọyen je pha ghẹghẹghẹ kerẹ ifi* alẹ.*

15 Ọ cha vwẹ oma rẹrẹ uwevwin rọyen, ẹkẹvuọvo o che mudiaa;

Ọ cha davwẹngba vwọ yọnrọn, ẹkẹvuọvo ọ cha tọọn.

16 Ọyen okankọn ro vwo ame vwẹ uvo,

Eghọn rọyen hra nene ogba na.

17 Awọ rọyen ghrẹn phiyọ ohwohwo vwevunrẹ ikuta ra ghwẹ koko;

Ọ guọnọ uwevwin vwẹ ohri rẹ ikuta na.*

18 Ẹkẹvuọvo e de ghwie* nẹ asan rọyen,

Asan na cha siọn je tanẹ, ‘Me je rhe mrẹ wẹ dẹvoo.’

19 E, ọtiọyen ọ cha ranvwiẹ;

Efa me rha djẹ nẹ otọ na rhe.

20 O muẹro nẹ Ọghẹnẹ cha sen ihwo re sẹro rẹ ọyọnregan rayeen;*

Yẹrẹ bicha* ihwo umwemwuu,

21 Kidie ọ cha nẹrhẹ unu wẹn vọn vẹ ehwẹ

Je nẹrhẹ ẹbẹrunu wẹn vọn vẹ ukperi rẹ aghọghọ.

22 Oma cha vo ihwo ri vwo utuoma kpahen owẹ,

Utughẹ rẹ ihwo umwemwu rha cha dia ọfaa.”

 3 Ohwo da guọnọ nene phraphro,*

Ohwo yena cha sa kpahen phiyọ ọvo usun rẹ enọ uriorin Rọyeen.

 5 O muẹ* igbenu nẹ asan rẹ ayen hepha jẹ ohwo vuọvo riẹẹn;

Ọ bọvwọn ayen rhuẹ vwẹ ophu rọyen.

 6 O kpogho otọrakpọ na nẹ ẹdia rọyen,

Rere ichivwo rọyen vwo yeghe.

 7 O jurhi kẹ ọnre na nẹ o loo

O ji siẹ elo rẹ isio na nẹ;

 8 Ọyen komobọ yen riẹn idjuvwu na phia,

Ọ je yan vwẹ enu rẹ ọgbogho ọgangan rẹ abadi na.

 9 Ọ ma ẹko rẹ isio re se Ash,* Kisil,* kugbe Kaima,*

Ọtiọyen ji te ẹko rẹ isio rehẹ irharheghe rẹ obọrhen ọnre na;*

10 O ruẹ erọnvwọn ride ra je cha sa hiẹ mrẹẹ,

Erọnvwọn rẹ igbevwunu re che se kerii.

11 Ọ wanvrẹ vwẹ, je me cha sa mrẹẹ;

Ọ wanvrẹ vwẹ, ẹkẹvuọvo mi vughiree.

13 Ọghẹnẹ cha da ophu rọyen jii;

Ihwo re vwẹ ukẹcha kẹ Rehab* dede cha vwẹ uyovwin kpotọ kẹ.

14 Kẹ mavọ yen ọ cha dia siẹrẹ me da kpahen kẹ

Me cha nabọ sane eta mẹ tavwen mẹ vẹ ọyen ke phraphro!

O muvwẹro nẹ ọ cha kerhọ rẹ urhuru mẹẹ,

17 Kidie ọ vwẹ ogiribo vwọ ghwọrọ ovwẹ

Ọ je nẹrhẹ era mẹ bunphiyọ ji mi ru emu vuọvoo.

18 Ọ vwẹ uphẹn kẹ vwẹ nẹ me wẹn totọọ;

Erọnvwọn re yara yen ọ kẹ vwẹ ọkieje.

20 Ọ da dia omẹvwẹ yen riase, unu robọ mẹ che bru hwe vwe;

Me da tobọ sẹro rẹ ọyọnregan mẹ,* ọ cha tanẹ me riabe.*

21 Me da tobọ sẹro rẹ ọyọnregan mẹ,* me vwẹroso oma mẹẹ;*

Me sen arhọ mẹ nana.

22 Ejobi na ọvuọvo. Ọyensorọ me vwọ tanẹ,

‘Ọ ghwọrọ ohwo rọ riase* vẹ ohwo umwemwu.’

23 Oghwe rode da so ughwu ri kpregede,

Ọ cha vwẹ ẹdia ri jẹ iphiẹrophiyọ evwo rẹ ohwo rọ riase vwọ jehwẹ.

24 E mu akpọ na phiyọ obọ rẹ orumwemwu na re;

O rhurhu ẹro* rẹ iguẹdjọ rọyen.

25 Asaọkiephana ẹdẹ mẹ kpata vrẹ ọdjonẹ;

Ayen djẹ yanran jẹ ayen mrẹ erhuvwuu.

26 Ayen yanran riẹnriẹn kerẹ ekọ ra vwẹ ekankọn re se rid* vwo ru,

Kerẹ ugo rọ rhan kpotọ re muẹ eranvwe rọ cha re.

27 Me da tanẹ, ‘Me cha kpairoro vrẹ ẹdjọ mẹ,

Me cha sasa opharo mẹ rere me ghọghọ,’

28 Oshọ ji che mu vwe fikirẹ emiamiavwe mẹ eje,

Me je riẹn nẹ wọ cha rhọnvwe nẹ me riasee.

30 Me da vwẹ ame rẹ imicho rọ wranre vwọ hworhẹ oma mẹ,

Me da je vwẹ odja* vwọ hworhẹ abọ mẹ,

31 Ku wo che duvwun uvwe phiyọ evunrẹ ọgọdọ,

Rere iwun robọ mẹ dede vwo vwo utuoma kpahen ovwẹ.

32 Kidie ọ dia ohworakpọ kerẹ omẹvwẹ re me vwọ kpahen kẹẹ,

Re me vẹ ọyen che kpo aguaree.

33 Ohwo vuọvo herọ ro che brorhiẹn* vwẹ uvwre rẹ avwanree,

Rọ cha dia oguẹdjọ rẹ avwanree.*

34 Ọ da sa dobọ rẹ ehwe ro hwe vwe na ji*

Ọ rha je nẹrhẹ udidi rọyen guegue uvwee,

35 Ki mi che fiudugberi ta ota kẹ,

Kidie mi vwo ẹkuruemu re me vwọ ta ota vẹ oshọọ.

 3 Wọ mrẹ erere vwẹ oshenyẹ,

Ru wo vwo chukoku iruo rẹ abọ wẹn

Ju wo rhiabọreyọ uchebro rẹ orumwemwu?

 4 Wo vwo ẹro rẹ uvwo,

Yẹrẹ wọ mrẹ kirobo rẹ ohworakpọ mrẹ?

 5 Ẹdẹ wẹn pha kerẹ ẹdẹ rẹ ihworakpọ,

Yẹrẹ ikpe wẹn pha kerẹ e rẹ ohworakpọ,

 6 Ru wọ vwọ hiẹ oruchọ mẹ phia

Je guọnọ umwemwu mẹ ọkieje?

 7 Wọ riẹnre nẹ me riabee;

O ji vwo ohwo vuọvo ro se sivwin uvwe nẹ obọ wẹẹn.

 8 Abọ wẹn yen ma vwẹ,

Jẹ asaọkiephana ku wọ cha ghwọrọ ovwẹ karekare.

 9 Biko, karophiyọ nẹ evunrẹ ekpẹn yen wọ ma vwẹ nurhe,

Jẹ asaọkiephana ku wọ cha nẹrhẹ mi rhivwin kpo ekpẹn.

10 Ọ dia owẹ yen ku vwe phia kerẹ ameivie

Je nẹrhẹ mi dje kerẹ ichizi?*

11 Wo ku ohọroma vẹ uvwo phiyọ ovwẹ,

Wọ da vwẹ ibeku vẹ iriẹn vwo rhuon vwe kugbe.

12 Wọ kẹ vwẹ arhọ vẹ ẹguọnọ ro jẹ rhẹriẹ;

Wọ vwẹ ẹroevwote wẹn vwọ sẹro rẹ ẹwẹn* mẹ.

14 Mi de ru umwemwu, wo che ni vwe so,

Wọ cha vwẹ oruchọ mẹ vwo ghovwo uvwee.

Me da tobọ riase, me cha sa kpare uyovwin mẹẹ,

Kidie me vọnre vẹ ophọphọvwe kugbe ọmiaovwẹ.

16 Me da kpare uyovwin mẹ kpenu, ku wọ guọnọ ovwẹ kerẹ okpohrokpo

Wọ me rhoma vwẹ ẹgba wẹn vwọso ovwẹ.

17 Wọ ghwa iseri kpokpọ cha rhe vwọso ovwẹ

Wo ji ruẹ ophu wẹn ganphiyọ vwọso ovwẹ,

Jẹ okpetu bru vwe cha okpokpahọn.

19 Ọ rha họhọ nẹ me tobọ rhe akpọ kakakaa;

A rha reyọ ovwẹ nẹ uwevwiẹ vwo kpo ushi siẹvuọvo.’

20 Ẹdẹ mẹ rha hanvwe? E jẹ ọ yanjẹ uvwe vwo;

E jẹ o si ẹro rọyen nuvwe, rere mi se vwo rovwoma emerha*

21 Tavwen me ke yanran—ji mi che rhivwin rhee—

Vwo kpo otọ rẹ ebri hwi,*

22 Vwo kpo otọ rẹ okuku rode,

Otọ rẹ uhoho vẹ ozighi,

Asan rẹ urhukpẹ dede da họhọ ebri.”

 2 “A rha cha kpahen phiyọ eta nana eje,

Yẹrẹ eta ibuebun sa nẹrhẹ ohwo riase?*

 4 Kidie wọ tare nẹ, ‘uyono mẹ fiotọ,

Me je fon vwẹ ẹro wẹn.’

 5 Ẹkẹvuọvo mane kẹ Ọghẹnẹ sa ta ota

Ji rhie ẹbẹrunu rọyen kẹ wẹ!

 6 Ọke yena kọ cha vwẹ odjahọn rẹ aghwanre vwọ phia kẹ wẹ,

Kidie uvi aghwanre vwo ẹbẹre buebun.

 7 Wọ sa riẹn erọnvwọn ikokodo rẹ Ọghẹnẹ

Yẹrẹ riẹn kemu kemu kpahen Ọromevwẹgba na?

 9 O gron vrẹ akpọ na

Ọ je hẹre vrẹ abadi na.

10 Ọ da wanvrẹ, mu ohwo, ji se aguare,

Ono yen se nene guẹdjọ?

12 Ẹkẹvuọvo ohwo rẹ iroro kanre che vwo ẹruọ

Siẹrẹ ekẹkẹtẹ rẹ aghwa de se vwiẹ ohworakpọ.*

13 Mane ku wo se muegbe rẹ ubiudu wẹn

Je riẹn abọ wẹn phia vwọ kẹ.

14 Obọ wẹn de ruẹ chọ, sionu shesheri,

E jẹ umwemwu vuọvo dia evunrẹ itughẹ wẹẹn.

15 Kidie ọke yena ku wọ sa kpare opharo wẹn ababọ rẹ upe;

Ku wo se mudia kokoroko vwọ vrabọ rẹ oshọ.

16 Ọke yena okpetu wẹn kọ cha chọrọ owẹ ẹro;

Ku wọ cha karophiyọ kerẹ ame rọ djẹ wanvrẹ owẹ nure.

17 Akpeyeren wẹn ko che fiotọ vrẹ oghẹruvo;

Ebri rọyen dede kọ cha họhọ urhiọke.

18 Wo che fiudugberi kidie iphiẹrophiyọ herọ,

Ku wo che ni oma riariẹ ji sherhẹn vwọrẹ ofuvwegbe.

19 Wo che sherhẹn, ohwo vuọvo cha djoshọ mu wee,

Ihwo buebun ke cha guọnọ ẹroesiri wẹn.

20 Ẹkẹvuọvo ẹro rẹ irumwemwu che she divwin;

Ayen cha mrẹ asan vuọvo djẹ raa,

Iphiẹrophiyọ ọvuọvo ro che rhe ayen kẹ ughwu.”

 2 “Vwọrẹ uyota ovwan yen ihwo re riẹnre,*

Ovwan de ghwu nu jẹ aghwanre reri!

 4 Mi rhi hirhephiyọ emu rẹ ehwẹjẹ vwọ kẹ igbeyan mẹ,

Ohwo ro kperẹ se Ọghẹnẹ nẹ ọ kpahen kẹ ọyen.

 5 Ohwo rẹ oma funru davwerhọ rẹ okpetuu,

O roro nẹ ihwo rẹ awọ rayen yeghe* ọvo yen okpetu brẹ cha.

 6 Itughẹ rẹ iji vwo ufuoma,

Ihwo re kpare ophu rẹ Ọghẹnẹ ji vwo ofuvwegbe,

Ihwo rẹ ọghẹnẹ rayen hẹ obọ rayen.

 7 Ẹkẹvuọvo, biko nọ eranvwe na, kẹ ayen che yono uwe;

Je nọ ephran rẹ idjuvwu na, kẹ ayen cha vuẹ wẹ.

 8 Yẹrẹ roro kpahen* otọrakpọ na, ko che yono uwe;

Iyerin rẹ abadi na ji che ghwoghwo kẹ wẹ.

 9 Ono vwẹ usun rẹ enana eje yen jẹ riẹn

Nẹ obọ ri Jihova yen ru ọnana?

10 Obọ rọyen yen arhọ rẹ erọnvwọn eje ri yerẹn* hepha

Ọtiọyen ji te ẹwẹn ri kohwo kohwo.*

11 Orhọ na rha davwan eta

Kirobo rẹ ẹrẹnvwe* na davwan emu?

12 Ọ dia ohri rẹ ihwo re ghwore yen aghwanre hepha,

Ọ je dia otọnvwe yen ghwa ẹruọ cha?

13 Aghwanre vẹ ogangan hẹ obọ rọyen;

O vwo uchebro vẹ ẹruọ.

14 Ọke rọ da ghwọrọ orọnvwọn totọ nu, a cha sa rhoma bọọn;

Obo rọ kanre nu, ohwo vuọvo che se rhiee.

15 Ọ da da ame na ji, erọnvwọn eje ke yamuẹ;

O de siobọnu ayen, kẹ ayen kuẹ akpọ na.

16 Ẹgba vẹ aghwanre hẹ obọ rọyen;

Ọyen vwo ọ ro ghwrẹ vẹ ohwo ro suon ghwrẹ;

17 Ọ nẹrhẹ ibruche vwẹ awọ fefe yan,*

O ji ruẹ iguẹdjọ phiyọ ẹkpa.

18 Ọ rhan ọjọnrọn rẹ ivie vwọ kanre ihwo,

Ọ je vwẹ umuehun vwo muẹ ehun rayen.

19 Ọ nẹrhẹ irherẹn vwẹ awọ fefe yan,

O ji siẹ ihwo rẹ awọ rayen muotọ kokoroko vwevunrẹ ogangan nẹ ẹdia;

20 O gbota phiyọ unu rẹ ibruche ra vwẹroso

Ọ je reyọ ọhọ rẹ eshare re ghwore* mie ayen;

21 Ọ phọphọ ihwo ride,

Ọ je nẹrhẹ ihwo ri vwo ẹgba vwiẹrẹ;*

22 O siẹ erọnvwọn ikokodo nẹ evunrẹ ebri cha,

Ọ je reyọ ebri hwi kpo asan rẹ elo hepha;

23 Ọ nẹrhẹ ẹgborho rhuaphiyọ rere ọ sa vwọ ghwọrọ ayen;

Ọ nẹrhẹ ẹgborho hẹrẹphiyọ rere o se vwo sun ayen kpo ighuvwu.

24 Ọ reyọ ẹruọ* rẹ isun rẹ ihwo na mie ayen

Ọ je nẹrhẹ ayen ghoro vwẹ otọ ọyaya rẹ idjerhe hephaa.

25 Ayen yan divwin divwin vwevunrẹ ebri, asan rẹ elo hephaa;

Ọ nẹrhẹ ayen ghoro kerẹ eshare re da idi vroma.

13 “E, ẹro mẹ mrẹ enana ejobi,

Orhọ mẹ nyoro ji vwo ẹruọ rọyen.

 2 Oborẹ ovwan riẹnre, me je riẹn;

Ovwan yovwin nọ vwẹẹ.

 3 Vwọ kẹ vwẹ, me guọnọ ta ota kẹ Ọromevwẹgba na komobọ;

Me guọnọ nene Ọghẹnẹ guẹdjọ.

 4 Ẹkẹvuọvo ovwan vwẹ efian vwo ghworo uvwe;

Ovwan eje erharhe ebo.

 5 Mane kẹ ovwan se fotovwin gbiẹi,

Ọyena che dje aghwanre phia vwẹ ẹbẹre rẹ ovwan.

 6 Biko, ovwan kerhọ rẹ ẹdjọ mẹ,

Ovwan ji nyo orẹ rẹ ẹbẹrunu mẹ.

 7 Ovwan cha ta ogbeta nẹ ovwan chochọn rẹ Ọghẹnẹ,

Je ta eta rẹ ophiẹnvwe fiki rọyen?

 8 Ovwan cha ka ẹbẹre rọyen,*

Ovwan cha davwẹngba vwọ chochọn rẹ Ọghẹnẹ rẹ uyota na?

10 Vwọrẹ imuẹro ọ cha ghwọku ovwan

Ovwan da davwẹngba vwo phoro aro kẹ vwẹ odjahọn.

11 Ọrho rọyen rha djoshọ mu ovwan

Uguegue rọyen rhe ji she mu ovwan?

12 Eta rẹ aghwanre rẹ ovwan eyen isẹ rẹ iwurhie;

Ochọnvwe* rẹ ovwan pha ghẹghẹghẹ kerẹ ochọnvwe rẹ ophiẹn.

14 Diesorọ mi vwo phi oma mẹ phiyọ ẹdia rẹ imuoshọ*

Ji phi arhọ* mẹ phiyọ abọ mẹ?

15 Dede nẹ ọ sa teyen ovwẹ hwe, me je cha hẹrhẹ;

Mi che guẹdjọ mẹ* vwẹ obaro rọyen.

16 Kọ cha rhe dia usivwin mẹ,

Kidie o vwo ohwo vuọvo ro jẹ Ọghẹnẹ ẹriẹn* rọ sa rhe obaro rọyeen.

17 Ovwan nabọ kerhọ rẹ ota mẹ;

Ovwan davwerhọ rẹ obo re me ta.

18 Nighere, asaọkiephana mi muegbe rẹ ẹdjọ mẹ re;

Me riẹnre nẹ mi ru chọọ.

20 Erọnvwọn ivẹ ọvo yen me guọnọ mie we, E Ọghẹnẹ,*

Rere mi vwo jẹ oma mẹ esionẹ kẹ wẹ:

21 Si obọ ọhọhọhọ wẹn na sheri kẹ vwẹ,

Wọ je nẹrhẹ oshọ wẹn guegue uvwee.

22 Se rere me kpahen,

Yẹrẹ juvwe ta ota rere wọ kpahen kẹ vwẹ.

24 Diesorọ wo vwo siẹ opharo wẹn nẹ

Ji ni vwe kerẹ ọvweghrẹn?

25 Wọ cha davwẹngba vwọ djẹ uguegue mu ẹbe rẹ odju muẹ?

Yẹrẹ vwọtua odin ọyaya?

26 Kidie ọkieje yen wo vwo siẹ erọnvwọn ebrabra ru wọ tare nẹ mi ruru phiyotọ,

Wọ je nẹrhẹ ovwẹ rioja fikirẹ imwemwu rẹ ọke ighene mẹ.

27 Wo phi awọ mẹ phiyọ igoni,

Wọ fuẹrẹn idjerhe mẹ eje,

Wọ je jokaphiyọ ichiyin rẹ awọ mẹ ọvuọvo.

28 Ọtiọyena ohworakpọ* gbon kerẹ orọnvwọn ro gbonri,

Kerẹ ewun rẹ eghwọghwọ rere.

14 “Ohwo rẹ aye vwiẹre,

Ọ tọọn, akpọ rọyen je vọn vẹ okpetu.*

 2 Ọ djẹ cha kerẹ ododo, o mi rhe vwioro yanran;*

Ọ djẹ kerẹ uhoho, ọ me ranvwiẹ.

 3 E, wọ tọn ẹro wẹn vio,

Wọ je reyọ* rhe rhi nene uwe guẹdjọ.

 5 E de brorhiẹn rẹ ẹdẹ rọyen nu,

Uche emeranvwe rọyen rhe we;

Wo gbere ughwru kẹ rere o vwo jẹ etiyin ẹshariẹ vrẹ.

 6 Si ẹro wẹn no rere o se vwo rovwoma,

Bẹsiẹ ro vwo ru ẹdẹ rọyen gba kerẹ ọwiowian ra reyọ phiyọ iruo.

A da gbọ she, ọ cha rhoma tan,

Eghọn rọyen je cha rha djẹ.

 8 Awọ rọyen de kri vwẹ otọ na

Uchuku rọyen de ji ghwu vwevunrẹ otọ na,

 9 Ọnrhe rẹ ame cha nẹrhẹ ọ djẹ;

Ko che vwo eghọn kerẹ okankọn kpokpọ.

10 Ẹkẹvuọvo ohwo de ghwu, o rhe vwo ẹgba ọfaa;

Ọke rẹ ohwo de ghwu nu, tivọ yen ọ hepha?

11 Ame ranvwiẹ nẹ abadi.

Urhie kpọ, ọ me yamu.

Bẹsiẹ rẹ odjuvwu vwo jẹ dia, ayen che vrẹẹn,

Yẹrẹ a cha rhọvwọn ayen nẹ ovwerhẹn rayeen.

13 E mane ku wo se si vwe nu vwevunrẹ Ushi,*

Mane ku wo se si vwe nu bẹsiẹ rẹ ophu wẹn vwọ wanvrẹ,

Mane ku wo se bru ọke phiyotọ kẹ vwẹ je karophiyọ ovwẹ!

Me cha hẹrhẹ vwẹ ẹdẹ rẹ iruo mẹ eje ra gba vwẹ vwo ruẹ na

Bẹsiẹ omaerovwon mẹ vwọ rhe.

16 Jẹ asaọkiephana, wo kere ichiyin mẹ eje;

Umwemwu mẹ ọvo yen wọ guọnọ.

17 Wọ gba oruchọ mẹ kokoroko phiyọ ekpu,

Wọ je vwẹ igọmu vwo din oruchọ mẹ.

18 Kirobo rẹ ugbenu she ọ me guọghọ

Rẹ oragha ji vwo nẹ asan rọyen ye,

19 Kirobo rẹ ame nẹrhẹ ikuta fa

Rẹ ọkẹre rọyen mi hwerhe ekpẹn rẹ otọ na no ye,

Ọtiọyen wọ je ghwọrọ iphiẹrophiyọ rẹ ohworakpọ.

20 Wo phio kparobọ bẹsiẹ ro vwo ghwu;

Wo wene oma rọyen, wo mi rhe siobọno yanran.

21 E brọghọ phiyọ emọ rọyen oma, ẹkẹvuọvo ọ riẹn kpahọọn;

Ayen rhe fiemuu, ẹkẹvuọvo ọ riẹnree.

22 Ọke rọ je vwọ hẹ akpọ ọvo yen o vwo rhiẹromrẹ ọmiaovwẹ;

Ọke rọ je vwọ hẹ akpọ ọvo yen o* vwo vwere uvweri.”

 2 “Ohwo ro vwo aghwanre cha kpahen vẹ aphro fefe,*

Yẹrẹ ọ cha ghwẹ odju rẹ ẹbẹre ọnre va nẹcha na vọn evun rọyen?

 3 A vwọ vwẹ eta diodi vwọ ghwọkuẹ ohwo fiemuu,

Ota ọvo ji fiereree.

 4 Kidie wọ jẹ oshọẹdjẹ rẹ Ọghẹnẹ fia,

Wọ je nẹrhẹ ọdavwẹ re vwo kpahen Ọghẹnẹ shekpotọ.

 5 Kidie oruchọ wẹn yen mu we vwọ ta ota,*

Wọ je sane eta rẹ ophiẹnvwe.

 6 Unu robọ wẹn yen brorhiẹn hwe we, ọ dia omẹvwẹẹ;

Ẹbẹrunu robọ wẹn yen soseri hwe we.

 7 Wẹwẹ yen ohwo rẹsosuọ re vwiẹre,

Yẹrẹ e vwiẹ wẹ tavwen a ke mrẹ igbenu itete na?

 8 Wọ kerhọ rẹ ota rẹ odjahọn rẹ Ọghẹnẹ,

Yẹrẹ wo roro nẹ wẹwẹ ọvo yen vwo aghwanre?

10 Ihwo re djẹ esha vẹ ihwo re ghwore hẹ ohri rẹ avwanre,

Eshare ri vien ọsẹ wẹn shesheri.

11 Uchebro rẹ Ọghẹnẹ te kẹ wẹ?

Yẹrẹ eta ra ta kẹ wẹ bọrọbọrọ na te kẹ wẹ?

12 Diesorọ ubiudu wẹn vwo mu we yanran,

Diesorọ ẹro wẹn je vwọ la vẹ ophu?

13 Kidie wo ku ẹwẹn wẹn rhẹriẹ vwọso Ọghẹnẹ komobọ,

Wọ je vwẹ uphẹn kẹ eta tiọyen nẹ i nẹ unu robọ wẹn rhe.

14 Die yen ohworakpọ hepha rọ vwọ dia fuanfon,

Yẹrẹ ohwo rẹ aye vwiẹre rọ vwọ dia ọvwata?

15 Nighere! O vwo esegbuyota kpahen ihwo efuanfon rọyeen,

Idjuvwu na dede je fon vwẹ ẹro rọyeen.

16 Siẹvo kẹ ohwo ro vwo utuoma kpahen ro ruẹ erọnvwọn ri jẹfuọn,

Ohwo rọ da umwemwu vọn evun kerẹ ame!

Me cha vuẹ wẹ obo re me mrẹ re,

18 Oborẹ eshare ri vwo aghwanre nyo mie esẹ rayen,

Erọnvwọn rẹ ayen sinuu.

19 Ayen ọvo yen a vwẹ otọ na kẹ,

Ọrhorha vuọvo je wan ohri rayeen.

20 Ohwo umwemwu rioja rẹ ukpokpoma vwẹ ẹdẹ rọyen eje,

Vwẹ uvwre rẹ ikpe na eje ra sẹro rọyen vwọ kẹ ohwo rẹ oshenyẹ.

21 Edo ri muoshọ hẹ erhọ rọyen;

Vwẹ ọke rẹ ufuoma, igborhugborho che gborho.

22 O vwo imuẹro nẹ ọyen cha djẹ vabọ nẹ ebrii;

A sẹro rọyen vwọ kẹ ọlọkọ.

24 Ukpokpogho vẹ odjadja djẹ uguegue muo ọkieje;

Ayen phio kparobọ kerẹ ovie rọ choma vwọ kẹ ofovwin.

25 Kidie ọ kpare obọ rọyen vwọso Ọghẹnẹ komobọ

Ọ je davwẹngba ro vwo phi Ọromevwẹgba na kparobọ;

26 O ru udu gangan họrhọ bro ra,

Vẹ ekpọfia ọgangan rọyen ro vwo ọkpan na;

27 Ivwri rhurhu opharo rọyen,

Ehun rọyen je rho fikirẹ ivwri;

28 Ọ dia evunrẹ irere ra cha ghwọrọ,

Evunrẹ iwevwin rẹ ohwo vuọvo cha diaa,

Rọ cha rhe dia ikuta re ma kpenu.

29 O che fee, efe rọyen ji che kokoo,

Yẹrẹ kẹ ekuakua rọyen cha hra nene otọ naa.

30 Ọ cha djẹ vabọ nẹ ebrii;

Erhanre cha nẹrhẹ oghọn* rọyen yamu,

Ọ je cha wanvrẹ womarẹ odju ọgangan ro nẹ unu rẹ Ọghẹnẹ* rhe.

31 E jẹ o bo ghwrẹ je vwẹrosua obo re dia ofefee,

Kidie osa ra cha hwa kẹ cha dia ofefe;

32 Ọ cha phia tavwen ẹdẹ rọyen ki te,

Eghọn rọyen je cha djẹẹ.

33 Ọ cha dia kerẹ ivaini ro kpogho igrepu rọyen re je vwaree she,

Ọ je cha dia kerẹ urhe rẹ oliv rọ kparan idodo rọyen she.

34 Kidie ọghwẹgbe rẹ ihwo ri jẹ Ọghẹnẹ ẹriẹn* ghwa emu vuọvo chaa,

Erhanre je cha torhẹ itughẹ rẹ udi ẹriọ.

35 Ayen mrevun rẹ okpetu, ayen mi vwiẹ obo re brare,

Ophiẹnvwe ji nẹ evun rayen cha.”

Mane kẹ ovwan yehẹ ẹdia mẹ jovwo,*

Me rha sa ta eta rẹ oriẹriẹvwẹ vwọso ovwan

Ji kpogho uyovwin mẹ kẹ ovwan.

 5 Ukperẹ ọtiọyen, me cha vwẹ eta rẹ unu mẹ vwọ bọn ovwan gan,

Uchebro rẹ ẹbẹrunu mẹ je cha nẹrhẹ ẹwẹn rẹ ovwan totọ.

 6 Me da ta ota, omiamiavwe robọ mẹ na che vworo uvwee,

Me da je dobọ rẹ ota eta ji, mavọ yen omiamiavwe mẹ na che kpotọ te?

 7 Ẹkẹvuọvo asaọkiephana, ọ nẹrhẹ oma ghwọrọ ovwẹ;

Ọ ghwọrọ evwruwevwin mẹ eje re.*

 8 Wọ je jabọ phiyọ ovwẹ, ọ da rhe dia oseri,

Rere ẹdọn romobọ mẹ vwo vrẹn ji soseri hwe vwe.

10 Ayen rhie unu rayen phiyọ ghwroro vwọso ovwẹ,

Ayen ghwiẹ egban mẹ vwọrẹ ehwẹjẹ;

Ayen kokori buebun vwọso ovwẹ.

11 Ọghẹnẹ reyọ ovwẹ kẹ emeshare,

O phi vwe phiyọ obọ rẹ ihwo umwemwu.

12 Oma fun vwe jovwo, ẹkẹvuọvo ọ da yanghan ovwẹ;

Ọ yọnrọn ovwẹ vwẹ ugbohọre, ọ da ghwọrọ ovwẹ;

Ọ vwẹ edada rọyen vi vwe rere ọ vwọ sa vwẹ.

13 Ihwo rọyen re sa umurhabọ riariẹ ovwẹ phiyọ;

Ọ sa ibiehun mẹ, o ni arodọnvwẹ mẹẹ;

O ku ukpavwrẹ mẹ kuotọ.

14 O dje iphrophro ebrebro phiyọ ovwẹ;

Ọ họrhọ bru vwe cha kerẹ ọgba ofovwin.

15 Mi ko amwa rẹ esiso kugbe vwo rhurhu ohọroma mẹ,

Me je tọn ọghọ* mẹ phiyotọ.

16 Opharo mẹ vwara fikirẹ oviẹ,

Uhoho okokodo* ji rhurhu iphophẹro* mẹ,

17 Dede nẹ abọ mẹ gbe ozighi vuọvoo

Ẹrhovwo mẹ je fon.

19 Asaọkiephana dede, oseri mẹ hẹ obo idjuvwu na;

Ohwo ọvuọvo ro se soseri kẹ vwẹ hẹ asan ri kpenu.

20 Igbeyan mẹ vwẹ ovwẹ jehwẹ

Ọke rẹ ẹro mẹ vwo suẹn ameoviẹ* vwọ kẹ Ọghẹnẹ.

21 E jẹ ohwo ọvo brorhiẹn vwẹ uvwre rẹ ohworakpọ vẹ Ọghẹnẹ,

Kirobo rẹ ohwo ruẹ vwẹ uvwre rẹ ohworakpọ vẹ ọrivẹ rọyen.

22 Kidie ikpe re cha na bunruu,

Ke me cha yanran kpo idjerhe re de je rhivwẹn cha.

17 “Ẹwẹn mẹ guọghọre, e fun ẹdẹ mẹ re;

Ushi hẹrhẹ ovwẹ.

 2 Otu re vwẹ ihwo vwọ jehwẹ riariẹ ovwẹ phiyọ,

Me cha tọn ẹro mẹ vi* uruemu rẹ ẹvwọsuọ rayen.

 4 Kidie wo si oniso nu vwọ kẹ ubiudu rayen;

Kọyensorọ wo vwo jẹ ayen ẹkparọ kpenu.

 5 Ọ sa tanẹ ọyen che nene igbeyan rọyen ghare obo ro vwori,

Jẹ ẹro rẹ emọ rọyen she divwẹn.

 6 Ọ nẹrhẹ ovwẹ dia obo ra vwọ jehwẹ* vwẹ ohri rẹ ihwo na,

Rere me vwọ dia ohwo rẹ ayen dje enya kuẹ opharo rọyen.

 7 Ẹro mẹ she divwin fikirẹ ọdjarhe,

Abọ vẹ awọ mẹ kẹ uhoho.

 8 Ihwo ọsoso tẹnrovi ẹdia mẹ na vwọrẹ igbevwunu,

Ẹwẹn rẹ ohwo rọ riase kpokpo fikirẹ ohwo ro jẹ Ọghẹnẹ ẹriẹn.*

 9 Ọvwata yọnrọn idjerhe rọyen gan kokoroko,

Ohwo rẹ abọ rọyen fonro je goma phiyọ.

10 Ẹkẹvuọvo ovwan ihwo eje gba yanrhe rhe rhoma nene uvwe phraphro,

Kidie me mrẹ ohwo vuọvo ro vwo aghwanre vwẹ usun rẹ ovwaan.

11 Ẹdẹ mẹ re re;

Iroroẹjẹ mẹ, kọyen ọdavwẹ rẹ ubiudu mẹ hra totọ re.

12 Ayen kuẹ ason rhẹriẹ kpo aruphẹn,

Rẹ ayen vwọ tanẹ, ‘Elo cha rhe kẹrẹkpẹ kidie ebri herọ asaọkiephana.’

13 Me da hẹrhẹ, Ushi* kọ cha dia uwevwin mẹ;

Me cha hwa ehwa mẹ vwevunrẹ ebri.

16 Ọ* cha ro otọ vwo kpo anurhoro rẹ Ushi*

Ọke rẹ avwanre eje de koko ro otọ vwo kpo ekpẹn.”

 3 Diesorọ wo vwo nẹ avwanre kerẹ eranvwe

Wo ji vwo nẹ avwanre kerẹ ihwo ri vwo ọhọọ?*

 4 Wọ da tobọ bẹrẹ oma* wẹn ibribro vwevunrẹ ophu wẹn,

E che vrẹn nẹ otọrakpọ na fiki wẹn,

Yẹrẹ kẹ oragha che ghwie nẹ asan rọ hepha?

 5 E, urhukpẹ rẹ orumwemwu che fun,

Erhanre rọyen cha laa.

 6 Vwọrẹ imuẹro, elo rọhẹ utughẹ rọyen che muebri,

Urhukpẹ ro lo muo ji che fun.

 7 Ẹgba rọ vwọ yan rhe rhee,

Uchebro robọ rọyen cha nẹrhẹ o she.

 8 Kidie awọ rọyen che suon ro ariri,

Ko che beghe ro evun rọyen.

 9 Ufi che muo vwẹ uchukowọ;

Ufi che muo.

10 E si ufi nu kẹ vwẹ otọ na,

A kpahen ufi phiyọ idjerhe rọyen.

11 Uguegue djoshọ muo vwẹ kẹbẹre kẹbẹre

Ọ je vwọtua chachacha.

12 Ogangan rọyen kuro phiyotọ,

Okpetu je cha nẹrhẹ ọ yẹnghrẹn.*

13 Ọga hra nene ohoroma rọyen;

Ọga ro me muoshọ* rhurhu abọ vẹ awọ rọyen.

14 E siro vwo nẹ ofuvwegbe rẹ utughẹ rọyen

Je nẹrhẹ ọ yan bru ovie rẹ uguegue ra.*

15 Erhorha* cha dia utughẹ rọyen;

A cha hrahra isọfọ phiyọ uwevwin rọyen.

16 Awọ rọyen cha yamu vwẹ obotọ rọyen,

Eghọn rọyen che vwioro vwẹ obenu rọyen.

17 E che phoro ẹkarophiyọ rọyen vwo nẹ otọrakpọ na,

A je cha riẹn odẹ rọyen* vwẹ urhuvwun naa.

18 A cha djẹ vwo nẹ urhukpẹ ra ro ebri

A je cha djẹ vwo nẹ otọ ro yovwon emu.

19 O che vwo ọmọ vuọvo yẹrẹ uvwiẹ vuọvo vwẹ ohri rẹ ihwo rọyeen,

O ji che vwo ohwo vuọvo ro che sivwin rhọ vwẹ asan rọ diaa.*

20 Siẹrẹ ẹdẹ rọyen de te, ofu che dje ihwo rehẹ Ẹbẹre Ọnre Shera

Uguegue cha ro oma rẹ ihwo rehẹ Ẹbẹre Ọnre Va Nẹcha.

21 Ọnana yen obo re phia kẹ itughẹ rẹ orumwemwu

Kugbe asan rẹ ohwo rọ je rhe riẹn Ọghẹnẹẹ.”

 2 “Mavọ o kri te rẹ ovwan vwọ rha nẹrhẹ ivun miovwo erhi mẹ,*

Rẹ ovwan vwọ rha vwẹ eta vwọ guọghọ ovwẹ?

 3 Abọ ihwe nana yen ovwan ghwọku uvwe* re;

Oma vo ovwan rẹ ovwan vwọ ta ota kẹ vwẹ gbaegbaee.

 4 Me da tobọ ru chọ dede,

Ọyena ẹdjọ rọ so ovwẹ.

 5 Ovwan de siẹ isiesi nẹ ovwan cha kparoma kpenu nọ vwẹ,

Tanẹ ophọphọvwe ra vwọ kẹ vwẹ na shephiyọ,

 6 Ovwan gba riẹn nẹ Ọghẹnẹ yen phiẹn vwẹ,

Ọ je reyọ ariri rọyen vwo mu vwe.

 7 Nighere! Mi kperẹ phia, ‘Ozighi!’ ẹkẹvuọvo mi nyo ẹkpahọnphiyọ vuọvoo;

Mi kperẹ phia vwọ kẹ ukẹcha, ẹkẹvuọvo orhiẹn ọsoso vuọvo herọọ.

 8 Ọ vwẹ igbẹhẹ rẹ ukuta vwo gbere idjerhe mẹ, me cha sa wanvrẹẹ;

Ọ vwẹ ebri vwo rhurhu idjerhe mẹ.

 9 Ọ ban urinrin mẹ nuvwe oma

O ji ku erhu rẹ ovie na nẹ uyovwin mẹ.

10 O vwirhin uvwe phiyotọ vwẹ kẹbẹre kẹbẹre bẹsiẹ me vwọ ghwọrọ;

O ghwie iphiẹrophiyọ mẹ nẹ otọ kerẹ urhe.

11 Ophu rọyen tua kpahen ovwẹ,

O ji ni vwe kerẹ ọvweghrẹn rọyen.

12 Ituofovwin rọyen siomakoko je gbogba riariẹ ovwẹ phiyọ,

Ayen won riariẹ utughẹ mẹ phiyọ.

13 Ọ djẹ iniọvo robọ mẹ nuvwe oma shesheri,

Otu ri vughe uvwe chukoku uvwe.

14 Igbeyan re kẹrẹ ovwẹ* yanjẹ uvwe vwo re,

Otu re me nabọ vughe kpairoro vrẹ vwẹ.

15 Erhorha rehẹ uwevwin mẹ kugbe idibo emetẹ mẹ ni vwe kerẹ ọrhorha;

Mẹvwẹ kẹ ọrhorha vwẹ ẹro rayen.

16 Mi se odibo mẹ, ẹkẹvuọvo ọ kpahen kẹ vwẹẹ;

Me vwẹ unu mẹ vwọ rẹ nẹ o gbe arodọnvwẹ kẹ vwẹ.

17 Ẹwẹn re me wẹn phia dede ko tuẹn aye mẹ oma,

Mẹvwẹ jẹ ọnrhe ro gbon hwe iniọvo robọ mẹ.*

18 Imitete dede vwẹ ovwẹ jehwẹ;

Ọke mi de vrẹn, kẹ ayen ton ehwẹjẹ phiyọ.

19 Igbeyan mẹ re kẹrẹ ovwẹ eje vwo utuoma kpahen ovwẹ,

Ihwo ri mi vwo ẹguọnọ kpahen je vwọso ovwẹ re.

20 Ibeku mẹ tamu ohọroma mẹ kugbe uvwo mẹ,

Ẹgbẹgba me vwọ djẹ vabọ.

21 Gbe arodọnvwe kẹ vwẹ, igbeyan mẹ, gbe arodọnvwẹ kẹ vwẹ,

Kidie obọ rẹ Ọghẹnẹ te vwe re.

22 Diesorọ ovwan vwọ reyọ vwọso ovwẹ ọkieje kirobo rẹ Ọghẹnẹ ruẹ,

Rẹ ovwan vwọ họnra ovwẹ vwọrẹ jẹ obọ ẹdajo?*

23 Mane ke si eta mẹ phiyotọ,

Mane ke se si ayen phiyọ evunrẹ ọbe!

24 E mane ka kare ayen phiyọ oragha bẹdẹ,

Vẹ ugbẹn* rẹ utehru kugbe ilẹdi!*

25 Kidie me nabọ riẹn nẹ ọ rọ tan vwẹ hirhe* na herọ;

Ọ cha rhe ukuko na, o mi mudia enu rẹ akpọ na.*

26 Ohọroma mẹ vwọ ghwọrọ nure na,

Re me vwọ jehẹ evunrẹ uvwo mẹ na, me cha mrẹ Ọghẹnẹ,

27 Ohwo rẹ omẹvwẹ komobọ cha mrẹ,

Ohwo rẹ ẹro robọ mẹ cha mrẹ, ọ dia ọ rẹ ohwo ọfaa.

29 Ovwan komobọ djoshọ rẹ ọlọkọ na,

Kidie ọlọkọ na yen gboja kẹ ohwo ro ru chọ;

Ovwan me riẹn nẹ oguẹdjọ ọvo herọ.”

 2 “Ọnana yen sorọ iroro romobọ mẹ ro kpokpo uvwe na vwo mu vwe vwọ kpahan

Fikirẹ ophu ro mu vwe na.

 3 Mi nyo ọghwọku ro yinvwaro kpahen ovwẹ;

Ẹruọ mẹ* de mu vwe vwọ kpahen.

 4 O muẹro nẹ ọ dia nonẹ akpọ wọ riẹn ọnanaa,

Kidie ọtiọyen ọ hepha rhanvwẹ ọke rọ vwọ ma ohworakpọ* phiyọ akpọ na,

 5 Nẹ oviẹ rẹ aghọghọ rẹ orumwemwu che krii

Aghọghọ rẹ ohwo ro jẹ Ọghẹnẹ ẹriẹn* ọ rẹ ọmọke.

 6 Dede nẹ ọrho rọyen te obodjuvwu

Uyovwin rọyen ji te irharheghe na,

 7 Ọ cha ghwọrọ bẹdi bẹdẹ kerẹ isọn robọ rọyen;

Ihwo re mrẹ jovwo ke cha tanẹ, ‘Tivọ yen ọ hepha?’

 8 Ọ cha rhan yanran kerẹ evwerhẹn, ayen rha cha mrẹẹ;

A cha djẹ yanran kerẹ emramrẹ rẹ ason.

 9 Ẹro rọ mrẹrẹ jovwo rhe che ru ọtiọyen ọfaa,

Asan rọyen je cha mrẹ ọfaa.

10 Emọ robọ rọyen cha guọnọ ẹroesiri rẹ ogbere,

Abọ robọ rọyen je cha vwẹ efe rọyen rhivwin.

11 Ibeku rọyen vọnre vẹ ogangan rẹ eghene jovwo,

Ẹkẹvuọvo ọ* vẹ ọyen che sherhẹn ekpẹn diodi.

12 Obo re brare da dia vwevwerhen vwẹ unu rọyen,

O de sionu vwẹ otọ rẹ ẹrẹnvwe rọyen,

13 Ọ da riavwerhen rọyen, o rhe rhivwon rọọ

Ẹkẹvuọvo kọ yan jovwo vwẹ unu rọyen,

14 Emu rọyen cha ken vwẹ evun rọyen;

Ọ me rhe dia kerẹ obi* rẹ ọrobiebi vwẹ oma rọyen.

15 Ọ rọ efe nure, ẹkẹvuọvo ọ cha kpa phiyotọ;

Ọghẹnẹ che sio nẹ evun rọyen karekare.

16 Obi rẹ ọrobiebi yen o che vie;

Akon* rẹ ọrọdekọ* che hwe.

17 Ọ cha mrẹ ame rẹ urhie kakakaa,

Ọkẹre rẹ ame ọnyọn kugbe ibọta.

18 Ọ cha vwẹ ekuakua rọyen rhivwin, ọ cha re ayeen;*

Ọ cha riavwerhen rẹ efe ro nẹ ekiẹchuọ rọyen rhee.

19 Kidie ọ ghwọrọ ogbere na ji chukokuo;

Ọ vwẹ ẹgba vwọ reyọ uwevwin rọ bọnree.

20 Ẹkẹvuọvo o che vwo ufuoma vwẹ oma rọyeen;

Efe rọyen cha sa cha uko vwọ djẹ vabọọ.

21 Orọnvwọn vuọvo rhe chekọ rọ cha reyọọ;

Kọyensorọ efe rọyen cha tọọn.

22 Efe rọyen de bun mamọ re, ẹnwan ko che muo rọ;

Irhevwa ọgangan ko che bro rhe.

23 Rọ vwọ ria evun vọn na,

Ọghẹnẹ ko* che siobọnu ophu ọtuatua rọyen bro rhe,

Ọ me nẹrhẹ ọ rhọ kuo je ro evunrẹ evun rọyen.

24 Ọke rọ da djẹ kẹ ekuakua ofovwin rẹ utehru,

Edada ri nẹ umurhabọ rẹ ẹrovwo rhe ki che duvwon.

25 O yoro odada ọvo nẹ ugbuko rọyen rhe,

Ekuakua ofovwin ọvo rọ nyavwaro vwo nẹ ukpavwrẹ rọyen rhe,

Oshọ da ro oma rọyen.

26 Ebri hwi hẹrhẹ efe rọyen;

Erhanre rẹ ohwo vuọvo djuruu cha torhẹ;

Ukpokpogho hẹrhẹ kohwo kohwo ro chekọ vwẹ utughẹ rọyen.

27 Odjuvwu che rhie oruchọ rọyen phiyọ;

Otọrakpọ na che vrẹn vwọsuọ.

28 Oghwe che hwerhe uwevwin rọyen yanran;

Ọkẹre rode vwẹ ẹdẹ rẹ ophu rẹ Ọghẹnẹ.*

29 Ọnana yen ẹkẹn rẹ ohwo umwemwu na vwo nẹ obọ rẹ Ọghẹnẹ rhe,

Uku rẹ Ọghẹnẹ ghare kẹ.”

 2 “Ovwan nabọ kerhọ rẹ obo re me ta;

E jẹ ọnana dia onẹrhẹvwe rẹ ovwan cha vwọ kẹ vwẹ.

 3 Ovwan chirakon mẹ re me cha vwọ ta ota na;

Me da ta nu, ovwan sa vwẹ ovwẹ jehwẹ.

 5 Ovwan ni vwe je tẹnrovi vwe vwọrẹ igbevwunu;

Ovwan vwẹ obọ vwo rhurhu unu rẹ ovwan.

 6 Ọke mi de roro kpahọn, ẹwẹn ko kpokpo uvwe,

Oma mẹ eje ko kpogho.

 7 Diesorọ ihwo umwemwu vwọ tọn,

Ghwa, ji fe?*

 8 Emọ rayen vẹ ayen herọ ọkieje,

Ayen je mrẹ emọ rayen.

 9 Iwevwin rayen hẹ ẹdia rẹ ofuvwegbe, ayen vrabọ rẹ oshọ,

Ọghẹnẹ je vwẹ ọkpọ rọyen vwo gboja kẹ ayeen.

10 Erhuẹn rayen vwiẹ gbẹrhẹnẹdẹ;

Erhuẹn rayen vwiẹ, evun rayen shee.

11 Emeshare rayen djẹ rua otafe kerẹ ekrun rẹ igodẹ,

Emọ rayen ji pho kraekrae nene asan eje.

12 Ayen sua une vẹ itamborini kugbe ihapu

Je ghọghọ ọke rẹ ayen de nyo edo rẹ iflutu.*

13 Ayen ghwọrọ ẹdẹ rayen vwọrẹ otekẹvwẹ

Ayen me ro otọ kpo evunrẹ Ushi* vwọrẹ ufuoma.*

18 O vwo ọke rẹ ayen vwọ họhọ ẹbe eyaya vwevunrẹ odju?

Je dia kerẹ ohọrọ rẹ odju rẹ ogiribo muẹ yanran?

20 E jẹ ẹro robọ rọyen mrẹ oghwọrọ rọyen,

E jẹ ọ je dia ohwo rọ cha da vwo nẹ ophu rẹ Ọromevwẹgba na.

21 Kidie die yen tere te obo re phia kẹ uwevwin rọyen siẹrẹ ọ da yanran nu

Siẹrẹ e de bru uche emeranvwe rọyen krẹ?*

22 O vwo ohwo ọvo ro se yono Ọghẹnẹ erianriẹn,*

Rọ vwọ dianẹ Ọyen ohwo rọ tobọ vwẹ ihwo ri me kpenu vwo guẹdjọ na?

23 Ohwo ọvo ghwuru ọke rẹ ẹgba rọyen eje je vwọ hẹ oma rọyen

Ọke rẹ oma vwo fuon karekare rẹ ẹwẹn rọyen ji vwo totọ,

24 Ọke rẹ ekpoghawọ rọyen vwọ vọn vẹ ivwri

Rẹ ibeku rọyen je vwọ gan.*

25 Ẹkẹvuọvo ohwo ọfa ghwuru vẹ omaemuophiyọ ọgangan,*

Ọ danvwe erọnvwọn iyoyovwin kakakaa.

26 Ayen ihwo ivẹ na che sherhẹn ekpẹn,

Ihori che rhurhu ayen ihwo ivẹ na.

27 Nighere! me riẹn oborẹ ovwan roro dẹn

Kugbe ona rẹ ovwan hworo rẹ ovwan vwo gbe vwe ku.*

28 Kidie ovwan tanẹ, ‘Tivọ yen uwevwin rẹ ohwo ro titiri na hepha?

Tivọ yen utughẹ rẹ ohwo umwemwu na diare jovwo na je hepha?’

Wọ rha nabọ fuẹrẹn oborẹ ayen tare,*

30 Nẹ e vwo ghovwo ohwo umwemwu vwẹ ẹdẹ rẹ okpetu

Ji sivwon vwẹ ẹdẹ rẹ ophu?

31 Ono yen cha nọ enọ kpahen idjerhe rọyen,

Je hwosa kẹ fikirẹ obo ro ruru?

32 Ọke re de muo kpo asan re shẹ ihwo phiyọ,

A cha rhẹrẹ ushi rọyen.

33 Ukonri rẹ ekpẹn rẹ iyara* na cha dia vwevwerhen vwọ kẹ,

Ihworakpọ eje ki che nene*

Kerẹ ihwo re se kerii re kobaro kẹ.

 3 Ọromevwẹgba na davwerhọ sẹ* wẹwẹ ọvwata,

Yẹrẹ o fierere kẹ kidie nẹ wo nene idjerhe rẹ ọsoso?

 4 O che gboja kẹ wẹ

Ji nene uwe guẹdjọ fikirẹ ọghọ ru wo muẹ kẹ?

 5 Ọ dia kidie nẹ umwemwu wẹn ganre mamọ

Oruchọ wẹn ji vwo obaa?

 6 Kidie wọ vwẹ ẹgba vwọ reyọ oborẹ iniọvo wẹn vwo viẹnwan ekueku,

Wọ je reyọ iwun rẹ ihwo mie ayen, wọ da yanjẹ ayen vwo ẹbẹban.*

 7 Wọ vwẹ ame kẹ ohwo rẹ oma rhọ nẹ ọ daa,

Wo ji si emu wẹn nu kẹ ohwo rẹ owẹnvwe hwe.

 8 Ọgba yen vwo otọ na,

Ọ ro yovwin kẹ yen dia evun rọyen.

 9 Ẹkẹvuọvo wo siobọnu eyauku yanran vẹ abọ fefe,

Wọ je guọghọ obọ rẹ emọ ri jẹ esẹ evwo.*

10 Ọyensorọ a vwọ kpahen ifi* riariẹ owẹ phiyọ,

Uguegue ri kpregede je vwọ djoshọ mu we;

11 Ọyensorọ ebri vwọ dia te asan ru wọ rha sa mrorẹẹ,

Ame rẹ oghwe ji vwo rhurhu uwe.

14 Evwru na rhurho rere o vwo jẹ orẹ ẹmrẹ

Rọ vwọ yan kpenẹ kpenẹ vwẹ usikẹ rẹ odjuvwu na.’

15 Wo che nene idjerhe rẹ awanre

Rẹ ihwo umwemwu neneri,

16 Ihwo re fru reyọ* tavwen ọke rayen ki te,

Rẹ oghwe* hwerhe uchivwo rayen kufia?

19 Ọvwata cha mrẹ ọnana, ọ me ghọghọ,

Ohwo rẹ abọ rọyen fonro cha vwẹ ayen jehwẹ, ọ me ta:

20 ‘A ghwọrọ ihwo re vwọsua avwanre re,

Erhanre cha torhẹ i ri chekọ vwẹ usun rayen.’

21 Nabọ vughe, ku wo che vwo ufuoma;

Erọnvwọn iyoyovwin ki che bru we rhe.

22 Rhiabọreyọ urhi na vwo nẹ unu rọyen,

Wọ me je sẹro rẹ eta rọyen vwẹ ubiudu wẹn.

23 Wo de rhivwin bru Ọromevwẹgba na ra, kọ cha rhoma yovwin kẹ wẹ;

Wo de si obo ri jẹ ọsoso ẹdia vwo nẹ utughẹ wẹn,

24 Wo de do oro wẹn phiyọ ekpẹn

Ji do oro rẹ Ofiẹ phiyọ iyara* rọ vọnre vẹ ikuta,

25 Ọke yena Ọromevwẹgba na kọ cha dia oro wẹn,

Kọ je cha dia idọnọ ọfuanfon wẹn ro me yovwin.

26 Aghọghọ wẹn kọ cha dia ọ rẹ Ọromevwẹgba na,

Ku wọ cha kpare opharo wẹn vwo ni Ọghẹnẹ.

27 Wọ cha rẹ, ko che nyo we;

Ku wọ cha hwosa rẹ ive wẹn.

28 Kemu kemu ru wo brorhiẹn nẹ wo che ru che phikparobọ,

Urhukpẹ ji che lo mu idjerhe wẹn.

29 Kidie ọ cha phọphọ owẹ siẹrẹ wọ da ta ota vẹ aroeyinvwo,

Ẹkẹvuọvo o che sivwin ohwo rọ vwomakpotọ.*

30 O che sivwin ihwo rẹ abọ rayen fonro;

Ọtiọyena abọ wẹn da fon, o che ghini sivwin uwe.”

 2 “Nonẹna dede me cha gbaudu brenu;*

Ogangan mẹ re re fikirẹ unuẹfiọn mẹ.

 4 Mi che guẹdjọ mẹ vwẹ obaro rọyen

Je ghwẹ unu mẹ vọn vẹ aphro;

 5 Me cha mrẹ obo rọ cha kpahen kẹ vwẹ wan

Je jokaphiyọ obo rọ cha ta kẹ vwẹ.

 7 Ohwo ọsoso vẹ ọyen sa rhuẹrẹkugbe vwẹ etiyin,

Oguẹdjọ mẹ ko che bru kẹ vwẹ nẹ me riase bẹdi bẹdẹ.

 8 Ẹkẹvuọvo mi de kpo ẹbẹre ọnre va nẹcha, ọ hẹ etiyiin;

Mi de ji rhivwin rhe, me je cha mrẹẹ.

 9 Ọke rọ da wian vwẹ obohwẹre, mi che se noo;

O de kuomarhẹriẹ kpo obọrhen, ẹkẹvuọvo me je sa mrẹẹ.

11 Awọ mẹ nene ichiyin rọyen kpẹkpẹkpẹ;

Me daji idjerhe rọyen, me nama vrẹn noo.

14 Kidie o che ru obo ro brorhiẹn rọyen kpahen ovwẹ gbagba,

O ji vwo erọnvwọn tiọyen buebun vwẹ ẹwẹn.

15 Ọyensorọ me vwọ rua ẹnwan fiki rọyen;

Ọke mi de roro kpahọn, oshọ mẹ kọ ganphiyọ.

16 Ọghẹnẹ nẹrhẹ udu bru vwe,

Ọromevwẹgba na nẹrhẹ oshọ mu vwe.

17 Dedena ebri na ji rhi rhurhu unu mẹẹ

Yẹrẹ kẹ okuku ro rhurhu opharo mẹ naa.

 2 Ihwo muẹ obo re vwo gbere ughwru nẹ asan re phi ayen phiyọ;

Ayen cho ichuru vwọ ba e robọ rayen.

 3 Ayen reyọ ekẹkẹtẹ rẹ emọ ri jẹ esẹ evwo

Ayen je vwẹ ẹgba vwọ reyọ erhuẹn rẹ ayeuku kerẹ obo ro vwo viẹnwan vwọ kẹ obo ro momori.

 4 Ayen djẹ igbere nẹ idjerhe;

Ihwo ri vwo ọchuko vwẹ akpọ naa siomanẹ kẹ ayen.

 5 Igbere guọnọ emuọre kerẹ ekẹkẹtẹ rẹ aghwa vwevunrẹ aton;

Ayen guọnọ emuọre vwọ kẹ emọ rayen vwevunrẹ aton.

 6 Ayen che vun vwẹ udju* rẹ ohwo ọfa

Ji gbugbon vwẹ ogba rẹ ivaini rẹ orumwemwu.

 7 Ayen vwẹ ẹbẹban vwo sherhẹn hrọke, ayen ku iwun phiyọọ;

Ayen vwo oborẹ ayen vwo phopho fikirẹ ekpaheen.

 8 Osio rẹ igbenu na kpọrhọ ayen totọ;

Ayen vwẹ oma rẹrẹ eragha na kidie ayen vwo asan rẹ ayen cha djẹ roo.

 9 E fru ọmọ ro jẹ ọsẹ evwo vwo nẹ evie rẹ oni rọyen;

A je reyọ ewun rẹ ogbere kerẹ obo ro vwo viẹnwan vwọ kẹ obo ro momori,

10 A gba ayen vwọ yan ẹbẹban jẹ ayen ku iwun phiyọọ,

Vẹ owẹnvwe, jẹ ayen mu ekrun rẹ eka.

11 Ayen wian gangan vwẹ ohri rẹ igbẹhẹ rẹ ikuta* vwẹ oheri rẹ ẹdẹ na;

Aye chiyẹn vwẹ asan re de mie iwaini, dedena upho rayen yare.

12 Ohwo ro ghwẹ guan vwevunrẹ orere na;

Ohwo rọ wan oma brabra* kperẹ phia vwọ kẹ ukẹcha,

Ẹkẹvuọvo Ọghẹnẹ ni ọnana kerẹ obo re braree.*

13 O vwo ihwo re vwọsua urhukpẹ;

Ayen riẹn idjerhe rọyeen,

Ayen ji nene idjerhe rọyeen.

14 Ozighẹ na vrẹn vwẹ urhiọke;

Ọ teyan ihwo ri jẹ ọchuko evwo kugbe igbere hwe,

O mi rhe chuji vwẹ ason.

15 Ẹro rẹ igberadja hẹrhẹ ovwọnvwọn,

Jẹ ọ ta: ‘Ohwo vuọvo cha mrẹ vwẹẹ!’

16 Ayen bẹrẹ ẹchẹ rua* iwevwin vwẹ ebri;

Ayen biẹ ẹchẹ gbe oma rayen vwẹ aruphẹn.

17 Urhiọke vẹ ebri hwi ọvuọvo vwọ kẹ ayen;

Uguegue rẹ ebri hwi riẹnriẹn ayen oma re.

19 Kirobo rẹ ọkanrovwẹ rẹ ame vẹ oheri reyọ imicho re wranre,

Ushi* reyọ ihwo ri ru umwemwu!

21 O shenyẹ ẹgan,

O ji gboja kẹ ayeuku.

22 Ọghẹnẹ* cha vwẹ ogangan rọyen vwọ ghwọrọ ihwo ri vwo ẹgba;

Dede nẹ ayen se vrẹn, jẹ arhọ rayen mu ayen ẹroo.

23 Ọghẹnẹ* kẹ ayen uphẹn rẹ ayen vwo vwo uduefiogbere kugbe ofuvwegbe,

Ẹkẹvuọvo ẹro rọyen mrẹ kemu kemu rẹ ayen ruẹ.*

A vwẹ ayen kpotọ ji koko ayen kerẹ ihwo efa;

E brẹ ayen kuẹfia kerẹ eka.

25 Asaọkiephana ono yen se dje vwe phiyọ ọvwọrefian

Yẹrẹ phrọ ota mẹ?”

 2 “Usuon vẹ ogangan ro muoshọ erọyen;

Ọ vwẹ ufuoma vwo mu vwẹ obodjuvwu.*

 4 Ọtiọyena mavọ ohworakpọ sa vwọ dia ọvwata vwẹ obaro rẹ Ọghẹnẹ,

Yẹrẹ mavọ ohwo rẹ aye vwiẹre sa vwọ riase?*

 5 Emeranvwe na dede lo fiotọọ

Isio na je fon vwẹ ẹro rọyeen,

 6 Siẹvo kẹ ohworakpọ rọ dia ọdọn,

Kugbe ọmọ rẹ ohworakpọ rọ dia ohori!”

 4 Ono yen wọ guọnọ ta ota kẹ,

Ono yen mu we vwọ ta eta tiọyen?*

 5 Ihwo ri ghwure ri jẹ ẹgba evwo na guegue;

Ayen tobọ kpotọ vwọ vrẹ ame na vẹ emama ri vwo arhọ re dia evun rayen.

 6 Ushi* banphiyọ vwẹ obaro rẹ Ọghẹnẹ,*

Asan rẹ oghwọrọ* rhiephiyọ.

 7 Ọ riẹn irharheghe rẹ obohwẹre ọnre na* phiyọ ophephe na,*

Ọ vwẹ akpọ na vwọ ya emu vuọvoo;

 8 Ọ vwẹ evwru rọyen vwọ phara ame na,

Rere evwru na vwo jẹ va fikirẹ ọnyẹ rayen;

 9 O rhurhu ekete rọyen rere e vwo jẹmrẹ,

Rọ vwọ riẹn evwru rọyen phia vwẹ enu rọyen.

10 Ọ jokaphiyọ ughwru* rọhẹ uvwre rẹ irharheghe na vẹ abadi na;

O gbere ughwru phiyọ uvwre rẹ urhukpẹ vẹ ebri.

11 Ichivwo rẹ idjuvwu na kpoghori;

Ayen guegueri fikirẹ ọghwọku rọyen.

12 Ọ vwẹ ẹgba rọyen vwo kpogho abadi na,

Ọ vwẹ ẹruọ rọyen vwọ guọghọ emama rode rẹ abadi na* ibribro.

13 Ọ vwẹ ẹwẹn* rọyen vwo ruẹ irharheghe na fuan;

Obọ rọyen duvwun ọrọdekọ ro djẹ kpakpata na fi.

14 Nighere! Enana ghwa ejọjọ rẹ idjerhe rọyen;

Omophiọrọ rọyen ọvo yen e nyo re!

 2 “Ọghẹnẹ vwọ herọ na, ohwo rọ djahen orhiẹn ọsoso kẹ vwẹ,

Ọromevwẹgba na vwọ herọ na, ohwo rọ nẹrhẹ ivun miovwo uvwe,*

 3 Ẹwẹn mẹ vwọ hẹ oma mẹ na

Ẹwẹn ro nẹ obọ rẹ Ọghẹnẹ rhe je vwọ hẹ iwen mẹ na,

 4 Ẹbẹrunu mẹ cha ta eta ri jẹ ọsoso ẹdiaa;

Yẹrẹ kẹ ẹrẹnvwe mẹ cha ta eta rẹ ophiẹnvwee!

 6 Me cha sẹro rẹ ophiọnphiọn mẹ, mi che siobọnoo;

Ubiudu mẹ che brorhiẹn hwe vwe* vwẹ uchọke re me cha dia akpọ kri tee.*

 7 E jẹ ivwighrẹn me dia kerẹ irumwemwu,

Ihwo ri kpokpo uvwe kerẹ ihwo ri jẹ evwata ẹdia.

 8 Kidie iphiẹrophiyọ vọ yen ohwo ro jẹ Ọghẹnẹ ẹriẹn* vwori ọke ra da ghwọrọ,

Ọke rẹ Ọghẹnẹ da reyọ arhọ* rọyen?

 9 Ọghẹnẹ che nyo oviẹ rọyen

Ọke rẹ ukpokpogho de bro rhe?

11 Mi che yono ovwan kpahen ẹgba* rẹ Ọghẹnẹ;

Mi che si emu vuọvo ro shekpahen Ọromevwẹgba na nuu.

12 Nighere! Ọ da dianẹ ovwan ihwo eje na mrẹ emramrẹ re,

Diesorọ eta rẹ ovwan vwọ dia ifefe?

13 Ọnana yen ẹkẹn rẹ Ọghẹnẹ ghare kẹ ohwo umwemwu,

Uku rẹ Ọromevwẹgba na ghare kẹ ihwo ri shenyẹ ihwo.

14 Emọ rọyen da dia buebun, ayen che she womarẹ ọlọkọ,

Emọ rọyen cha mrẹ emu ro che te ayen ree.

15 Ọtiekọ che shi ihwo ro ghwu jovwo,

Eyauku rayen cha viẹ ayeen.

16 Ọ da tobọ koko idọnọ efuanfon kerẹ ekpẹn

Ji koko iwun iyoyovwin kerẹ ọphiẹn,

17 Dede nẹ o se koko,

Ọvwata che ku ayen phiyọ,

Ihwo rẹ abọ rayen fonro cha ghare idọnọ efuanfon rọyen.

18 Uwevwin rọ bọnre pha ghẹghẹghẹ kerẹ uwevwin rẹ erhi,*

Kerẹ utughẹ rẹ ọrhẹrotọ bọnre.

19 Ọ cha dia ọdafe o ki sherhẹn ẹkẹkuọvo o che koko emu vuọvoo;

Ọke ro de rhie ẹro rọyen, emu vuọvo cha dia etiyiin.

20 Uguegue cha vwa kerẹ oghwe;

Ogiribo che muo yanran vwẹ ason.

21 Odju ro nẹ ẹbẹre ọnre va nẹcha rhe che muo yanran, ọ me yanran;

O hwerhire yanran vwo nẹ asan rọyen.

22 O che djuo gangan, o che gbe arodọnvwẹ kẹẹ

Rọ vwọ davwẹngba rọ vwọ djẹ vabọ rẹ ogangan rọyen.

23 Ọ teyen abọ rọyen kẹ

O ji gbe ophiọrọ kẹ vwo nẹ asan rọyen rhe.*

28 “O vwo asan ra da tọn idọnọ efuanfon

Kugbe asan ra da sẹro rẹ oro rẹ ayen ruẹ fuan;

 2 Otọ yen a reyọ utehru nẹcha,

A wran ẹrovwo vwo nẹ ikuta.

 3 Ohworakpọ phiẹ ebri kparobọ;

Ọ hiẹ te oba vwẹ okuku kugbe ebri,

Rọ vwọ guọnọ ibiukuta eghanghanre.

 4 Ọ ton otọ kokodo vwẹ asan ro sherabọ kẹ asan rẹ ihwo dia,

Vwẹ asan re chọrọ ihwo ẹro re, shesheri vwo nẹ asan rẹ ihwo wan;

Eshare evo rorọ kpotọ, kẹ ayen phieghe.

 5 Emuọre djẹ vwẹ enu rẹ akpọ na;

Ẹkẹvuọvo vwẹ obotọ, a yanghọn kerẹsiẹ ra da mrẹ nẹ erhanre torhẹ.*

 6 Safaya hẹ evunrẹ ibiukuta na,

Oro hẹ evunrẹ ekpẹn na.

 7 Ọphran vuọvo rọ ria eranvwe riẹn asan ra wan tee;

Ẹro rẹ ọso obiebi je rhe mrẹẹ.

 8 Eranvwe rẹ aghwa rode vuọvo je rhe yan vwẹ enu rọyeen;

Okpohrokpo otete je rhe guọnọ emuọre kpo oboyiin.

 9 Ohworakpọ vwẹ obọ rọyen vwọ ghwiẹ oragha ọgangan;

O kuẹ igbenu na rhẹriẹ vwẹ ichivwo rayen.

10 O brẹ igbo rẹ ame phiyọ eragha na;

Ẹro rọyen mrẹ erọnvwọn eghanghanre eje.

11 O gbere ughwru vwọ kẹ esiri rẹ ame rẹ irhie na

Ọ je vwẹ erọnvwọn re djahenre vwọ rhe urhukpẹ.

12 Ẹkẹvuọvo aghwanre—tivọ yen a da sa mrẹ,

Tivọ yen esiri rẹ ẹruọ je hepha?

13 Ohworakpọ vuọvo riẹn ọghanrovwẹ rọyeen,

A je cha sa mrẹ vwẹ otọ rẹ ihwo ri yerẹẹn.

15 A cha sa vwẹ uvi rẹ oro vwọ dẹẹ;

Yẹrẹ vwanvwe idọnọ efuanfon vwo wenee.

16 A cha sa vwẹ oro rẹ Ofiẹ vwọ dẹẹ

Yẹrẹ kẹ ọniks ra fobọ mrẹẹ kugbe safaya.

17 A cha sa vwẹ oro vẹ ughegbe vwọ vwanvwọọ;

Yẹrẹ vwẹ ukoko rẹ uvi rẹ oro* vwo wenee.

18 A cha sa vwẹ ikora* vẹ kristal vwọ vwanvwọọ,

Kidie ekpu rọ vọnre vẹ aghwanre ghanre vrẹ ọ rọ vọnre vẹ ivie eghanghanre.

19 A cha sa vwẹ topaz ri Kush vwọ vwanvwọọ;

A cha sa tobọ vwẹ uvi rẹ oro vwọ dẹẹ.

20 Ẹkẹvuọvo tivọ yen aghwanre nẹcha,

Tivọ yen esiri rẹ ẹruọ je hepha?

21 E siro nu vwọ kẹ ẹro ri korọnvwọn korọnvwọn ro vwo arhọ

A je djahọn kẹ ephran rẹ idjuvwu na.

22 Oghwọrọ vẹ ughwu tanẹ,

‘Iyẹnrẹn rọyen ọvo yen erhọ rẹ avwanre nyo re.’

23 Ọghẹnẹ riẹn idjerhe ra wan guọnọ;

Ọyen ọvo yen riẹn asan rọ hepha,

24 Kidie ọ mrẹ oba rẹ akpọ na,

Ọ je mrẹ kemu kemu rehẹ otọ rẹ idjuvwu na.

25 Ọke rọ vwọ rhuẹrẹ ẹgba* rẹ odju na phiyọ

Je vwanvwe ame na,

26 Ọke ro vwo jurhi kẹ osio na

Je rhuẹrẹ idjerhe phiyọ vwọ kẹ evwru rẹ ogiribo kugbe agbraran na,

27 Ọ da mrẹ aghwanre ji dje fiotọ;

Ọ reyerọ vwo mu je davwọn ni.

‘Nighere! Oshọẹdjẹ ri Jihova—ọyen aghwanre,

Re vwo kuomarhẹriẹ nẹ obo re brare ọyen ẹruọ.’”

 2 “Mane ke me hẹ emeranvwe re wanvrẹ re,

Ọke rẹ Ọghẹnẹ vwọ rhẹrẹ ovwẹ ye,

 3 Ọke rọ vwọ nẹrhẹ urhukpẹ rọyen lo mu uyovwin mẹ,

Ọke me vwọ wan ebri vrẹ womarẹ elo rẹ urhukpẹ rọyen,

 4 Ọke me vwọ hẹ* eghene,

Ọke rẹ oyerinkugbe mẹ vẹ Ọghẹnẹ vwọ teyenphia vwẹ utughẹ mẹ,

 5 Ọke rẹ Ọromevwẹgba na vẹ ovwẹ je vwọ herọ,

Ọke rẹ emọ* mẹ je vwọ riariẹ ovwẹ phiyọ,

 6 Ọke mi vwo duvwun awọ mẹ phiyọ evunrẹ ibọta,

Rẹ eragha na je vwọ djẹ ọkẹre rẹ evwri vwọ kẹ vwẹ.

 7 Ọke mi vwo kpo otafe rẹ anurhoro rẹ orere na

Ri mi ji vwo chidia ọsuorere na,

 8 Ighene eshare na da mrẹ vwẹ, ayen mi bioma,*

Eshare re kpakore dede mi vrẹn, ayen mi mudia.

 9 Emọ rẹ ivie rhọnvwa ta otaa;

Ayen me vwẹ obọ rayen vwo rhurhu unu rayen.

10 E nyo urhurhu eshare ri titirii;

Ẹrẹnvwe rayen tamu obenu rẹ unu rayen.

11 Kohwo kohwo ro nyo vwe me ta omamọ ota kpahen ovwẹ,

Ihwo re mrẹ vwẹ me je chochọn mẹ.

12 Kidie mi sivwin ogbere ro kperẹ phia vwọ kẹ ukẹcha,

Ọtiọyen ji te ọmọ ro jẹ ọsẹ evwo kugbe kohwo kohwo ro vwo ọchukoo.

13 Ohwo ro ghwẹ mi bruba kẹ vwẹ,

Me je nẹrhẹ ubiudu rẹ ayeuku ghọghọ,

14 Mi ku ophiọnphiọn phiyọ kerẹ ewun mẹ;

Orhiẹn ọsoso mẹ pha kerẹ ewun ogrongron* kugbe ọpharuyovwin.

15 Me rhe dia ẹro vwọ kẹ irhuẹro

Kugbe awọ vwọ kẹ ikpono.

16 Mẹvwẹ ọsẹ vwọ kẹ igbere;

Me guọnọ otọ rẹ ẹdjọ rẹ ihwo ri mi jẹriẹn.

17 Mi vwirhin ọhwa rẹ ohwo umwemwu

Je savwan obo ro muru nẹ akon rọyen.

18 Me tanẹ, ‘Mi che ghwu vwẹ uwevwin robọ mẹ,*

Ẹdẹ mẹ je cha dia buebun kerẹ ehavwo.

19 Me cha dia kerẹ urhe rọ tan awọ ro evunrẹ ame,

Irho je cha dia eghọn mẹ kọkirhie.

20 Urinrin mẹ kpokpọ phiyọ kọke kọke,

Umurhabọ ro rhe vwe obọ na cha sa ọkieje.’

21 Ihwo kerhọ vwọrẹ ẹroerhe,

Ayen fọre rẹ ayen vwọ hẹrhẹ uchebro mẹ.

22 Me da ta ota nu, ayen rha mrẹ ota ta ọfaa;

Eta mẹ mi she* phiyọ erhọ rayen riẹiriẹi.

23 Ayen hẹrhẹ ovwẹ kerẹsiẹ ra da mrẹ nẹ ayen hẹrhẹ osio;

Ayen rhie unu rayen phiyọ hẹhẹre kerẹsiẹ ra da mrẹ nẹ ayen hẹrhẹ osio rọ koba vwẹ ọke osio.

24 Me da hwẹ kẹ ayen, ọ bẹn ro vwo mu ayen ẹro;

Elo rẹ opharo mẹ nẹrhẹ ẹwẹn rayen totọ.*

25 Me kẹ ayen odjekẹ kerẹ osun rayen,

Mi ji yerin kirobo rẹ ovie yerẹn vwẹ ohri rẹ isodje rọyen,

Kerẹ ohwo rọ nẹrhẹ ihwo ri vwere uvweri.

30 “Asaọkiephana ayen vwẹ ovwẹ jehwẹ re

—Eshare ri mi vienri,

Re me cha rhọnvwe jovwo nẹ

Esẹ rayen vẹ eranko re rhẹrẹ ichuru mẹ dia asan ọvoo.

 3 Oma ghwọrọ ayen fikirẹ ọkanrovwẹ vẹ owẹnvwe;

Ayen ria ekpẹn rẹ otọ ọyaya

Rọ ghwọrọ kufia je dia ofefe re.

 4 Ayen koko ẹbe rẹ ughwanka nẹ odin cha;

Awọ rẹ irhe re yara yen emu rayen.

 5 A djẹ ayen nẹ orere;

Ihwo van kuẹ ayen kirobo ra van kuẹ oji.

 6 Ayen dia ọghwrọrọ rẹ iyara,*

Vwevunrẹ inu rehẹ otọ kugbe e rehẹ eragha.

 7 Ayen kperẹ nẹ evunrẹ aghwa na cha

Ayen siomakoko vwẹ uvwre rẹ ekankọn igrongron.*

 8 Kerẹ emọ rẹ ihwo ri jẹ ọhọ evwo kugbe ihwo ra riẹn edẹ rayeen,

A djẹ* ayen nẹ otọ na.

 9 Ẹkẹvuọvo asaọkiephana kẹ ayen tobọ vwẹ ovwẹ jehwẹ vwevunrẹ ine rayen;

Me rhe dia emu rẹ ọjefia* vwọ kẹ ayen re.

10 Ayen vwo utuoma kpahen ovwẹ, ayen je kẹnoma kẹ vwẹ;

Oshọ muẹ ayen rẹ ayen vwo dje enya ku opharo mẹẹ.

11 Kidie nẹ Ọghẹnẹ mie vwe ẹgba* je vwẹ ovwẹ kpotọ,

Ayen rhe se suẹn oma rayen* vwẹ irharo mẹẹ.

12 Ayen vrẹnre vwẹ obọrhen mẹ kerẹ otu;

Ayen nẹrhẹ mi fru ugbonẹ

Ayen ji gbere ughwru rẹ oghwọrọ phiyọ idjerhe mẹ.

13 Ayen guọghọ idjerhe mẹ

Je nẹrhẹ okpetu mẹ braphiyọ,

Jẹ ohwo vuọvo herọ rọ da ayen obọ jii.*

14 Kọ ghwa họhọ nẹ uphrophro rode rọhẹ evunrẹ igbẹhẹ yen ayen wan rhe;

Ayen họrhọ ro evunrẹ uherevie rẹ oghwọrọ na.

15 Uguegue ro ovwẹ oma;

E dju ọghọ mẹ kufia kerẹ odju,

Usivwin mẹ je ranvwiẹ kerẹ evwru.

16 Asaọkiephana arhọ* mẹ nuvwe oma re;

Ẹdẹ rẹ ojaẹriọ yọnrọn ovwẹ.

17 Omiamiavwe duvwun ibeku mẹ* vwẹ ason.

Omiamiavwe ọgangan na dobọjẹẹ.

18 A vwẹ ogangan rode vwọ chahen iwun mẹ;*

Ọ vwra vwẹ kerẹ ohọre rẹ ewun mẹ.

19 Ọghẹnẹ genre uvwe she teyen ibehre;

Mi rhi hirhephiyọ ekpẹn vẹ iwurhie re.

20 Mi kperi se we vwọ kẹ ukẹcha, jẹ wọ kpahen kẹ vwẹẹ;

Mi vrẹnre, ẹkẹvuọvo wo di ni vwe.

21 Wọ vwọso ovwẹ vẹ ọkon;

Wọ vwẹ ẹgba rẹ obọ wẹn eje vwo gboja kẹ vwẹ.

22 Wo mu vwe wọ da vwẹ odju vwo dju vwe yanran;

Ku wo do vwe kpenẹ kpenẹ vwevunrẹ ogiribo na.*

23 Kidie me riẹnre nẹ wọ cha reyọ ovwẹ kpotọ kpo ughwu,

Kpo uwevwin rẹ ihwo eje ri yerẹn da cha vwoma.

24 Ẹkẹvuọvo o vwo ohwo vuọvo rọ cha ghwiẹ ohwo ro muomaphiyọọ*

Ro vwo kperẹ phia vwọ kẹ ukẹcha vwẹ ọke rẹ oghwọrọ rọyen.

26 Dede nẹ mi rhẹro rẹ erhuvwu, umiovwo da rhe;

Mi rhẹro rẹ urhukpẹ, ẹkẹvuọvo ebri da rhe.

27 Ukpokpogho rọhẹ evunrẹ oma mẹ na dobọjii;

Ẹdẹ rẹ ojaẹriọ hirharoku vwe.

29 Me rhe dia oniọvo rẹ eranko rẹ aghwa*

Kugbe ugbeyan rẹ emetẹ rẹ ogomugoro.

30 Ohọroma mẹ biri je kpanre she;

Ibeku mẹ rhorha fikirẹ oheri* na.

31 Ọke rẹ uvweri ọvo yen mi vwo hworo ihapu mẹ,

Edo rẹ oviẹ ọvo yen me je vwẹ iflutu* mẹ vwo hworo.

 2 Die kọyen cha dia ẹkẹn rẹ Ọghẹnẹ rọhẹ obenu na cha vwọ kẹ vwẹ,

Uku vọ yen che nẹ obọ rẹ Ọromevwẹgba rọhẹ obenu na rhe?

 3 Ọ dia oghwọrọ yen hẹrhẹ orumwemwu

Ukpokpogho ke rha vwọ kẹ ihwo ri ruẹ obo re brare?

 4 Ọ rha mrẹ idjerhe mẹ

Ji kere ichiyin mẹ eje?

 6 E jẹ Ọghẹnẹ vwẹ ovwanvwọ ọgbagba vwọ vwanvwe ovwẹ;

Ọke yena kọ cha mrẹ ọyọnregan mẹ vughe.

 7 Ichiyin mẹ de bo ghwru nẹ idjerhe na

Yẹrẹ ubiudu mẹ de nene ẹro mẹ

Yẹrẹ mi de gbe abọ mẹ ẹgua,

 8 Gbe juvwe kọn ubi rere ohwo ọfa riọ,

Jẹ e ji ghwie obo re me kọnre.*

 9 Ọ da dianẹ aye riẹriẹ ubiudu mẹ

Mi ji fiọnko hẹrhẹ vwẹ anurhoro rẹ ọrivẹ mẹ,

10 E gbe jẹ aye mẹ wunye eka vwọ kẹ ọshare ọfa,

Jẹ eshare efa ji nene vwerhẹn.*

11 Kidie ọyena cha dia uruemu rẹ ophọphọvwe,

Oruchọ ro fori nẹ iguẹdjọ na vwẹ fiki rọyen vwo gboja kẹ ohwo.

12 Ọ cha dia erhanre rọ cha torhẹ je ghwọrọ,*

Ọ cha tobọ torhẹ* awọ rẹ ekankọn mẹ eje.

13 Ọ da dianẹ me rhọnvwe brorhiẹn ọsoso kẹ idibo mẹ eshare yẹrẹ e rẹ eyaa

Ọke rẹ ayen de brenu* kpahen ovwẹ,

14 Die mi se ru ọke rẹ Ọghẹnẹ da vwẹ ovwẹ guẹdjọ?*

16 Ọ da dianẹ me rhọnvwe kẹ igbere oborẹ ayen guọnọree

Yẹrẹ me da nẹrhẹ ayeuku jẹ iphiẹrophiyọ evwo;*

17 Ọ da dianẹ mẹvwẹ ọvo re ẹkẹn rẹ emu mẹ

Mi nene emephrorivwin gharọọ;

18 (Kidie nẹ ọke eghene mẹ rhe yen ọmọphrorivwin na vwo nene uvwe dia kerẹsiẹ ra da mrẹ nẹ mẹvwẹ ọsẹ rọyen,

Vwo nẹ ọkiemọ mẹ rhe* yen me je vwọ dia ohwo ro suẹn ayeuku.)

19 Ọ da dianẹ me mrẹ ohwo rọ ghwọrọ fikirẹ ọkanrovwẹ rẹ ewun

Yẹrẹ ọshare rọ dia ogbere ro vwo emu vuọvo ro vwo phophoo;

20 Ọ da dianẹ o* bruba kẹ vwẹẹ

Rọ vwọ vwẹ ẹton rẹ igodẹ mẹ vwo rhurhu oma rọyen rere ọ rhorho;

21 Ọ da dianẹ mi rhurhu ubi vwọ djẹ uguegue mu ọmọphrorivwin

Ọke rọ vwọ guọnọ ukẹcha mẹ vwẹ anurhoro rẹ orere na;*

22 E gbe jẹ obọ mẹ she nẹ igabọ mẹ,

E jẹ obọ mẹ ji vwirhin vwẹ asan uwurhobọ mẹ.

23 Kidie me djoshọ rẹ okpetu ro che nẹ obọ rẹ Ọghẹnẹ rhe,

Mi ji che se mudia obaro rẹ ọrho rọyeen.

24 Ọ da dianẹ me vwẹroso oro

Yẹrẹ ta kẹ uvi rẹ oro nẹ, ‘Wẹwẹ yen ofuvwegbe mẹ!’

25 Ọ da dianẹ me mrẹ aghọghọ mẹ vwẹ efe obuebun mẹ na

Fikirẹ ekuakua buebun ri mi vwori;

26 Ọ da dianẹ me mrẹ ọnre* na ro lo

Yẹrẹ emeranvwe na ro kiẹn vwẹ erhuvwu rọyen;

27 E da riẹriẹ ubiudu mẹ vwẹ odjahọn,

Unu mẹ da je fiọnfiọn obọ mẹ vwọrẹ ẹga vwọ kẹ ayen;

28 Ọyena kọ cha dia oruchọ ro fori nẹ iguẹdjọ na vwẹ fiki rọyen vwo gboja kẹ vwẹ,

Kidie je me sen Ọghẹnẹ rẹ uyota rọhẹ obenu na re.

29 O vwo ọke ọvo re me vwọ ghọghọ fikirẹ oghwọrọ rẹ ọvweghrẹn mẹ

Yẹrẹ ghọghọ kidie nẹ okpetu she teyọn?

30 O vwo ọke vuọvo me vwọ vwẹ uphẹn kẹ unu mẹ nẹ o ru umwemwu

Womarẹ me vwọ nokpẹn rẹ arhọ* rọyen vwẹ iyorin eduvwoon.

31 Eshare rehẹ utughẹ mẹ je rhe ta jovwo nẹ,

‘Ono yen sa mrẹ ohwo ọvo rọ je rhe riemu* rọyen vọn evuun?’

32 Ọrhorha vuọvo vwerhẹn otafe kọkirhiee;

Mi rhie ẹchẹ mẹ phiyọ vwọ kẹ eyonyan.

33 O vwo ọke ọvo re me vwọ davwẹngba vwo rhurhu imwemwu mẹ kirobo rẹ ihwo efa ruẹ,

Womarẹ mi vwo siẹ oruchọ mẹ nẹ vwẹ idjabọ rẹ ewun mẹ?

34 Oshọ mu vwe fikirẹ oborẹ otu buebun che ru,

Yẹrẹ uguegue ro ovwẹ oma kidie nẹ erua efa cha phọphọ ovwẹ,

Ọ da nẹrhẹ me fọ je djoshọ ri mi vwo kpo otafe?

36 Mi che muo kpahen igabọ mẹ,

Mi ji che kuo phiyọ uyovwin mẹ kerẹ erhu rẹ ovie.

37 Mi che gbikun rẹ kowọ kowọ re me jẹre vwọ kẹ;

Mi ji che fiudugberi bro ra kerẹ ọmọ rẹ ovie.

38 Otọ robọ mẹ da viẹ vwọso ovwẹ

Ugbo rọhẹ uvwre rẹ ekpẹn re voro koko ji che siomakoko viẹ;

39 Ọ da dianẹ me re omamọ rọyen jẹ me hwosa phiyọọ,

Yẹrẹ ọ da dianẹ me nẹrhẹ ofu dje ihwo ri vworo;*

40 E gbe jẹ idjigbẹn djẹ rhe kẹ vwẹ ukperẹ iwiti

Kugbe odin ro gbon ukperẹ ibali.”

“Mẹvwẹ omotete*

Ovwan eshare na ghwanre re.

Ọtiọyena mi de rhurhu unu vwọrẹ ọghọ,

Mi yivwin vuẹ ovwan oborẹ me riẹnree.

 7 Mi de roro, ‘E jẹ ikpe* ta ota,

E jẹ ikpe buebun ji ghwoghwo aghwanre phia.’

 8 Ẹkẹvuọvo ẹwẹn rọhẹ oma rẹ ihwo,

Ẹwẹn rẹ Ọromevwẹgba na yen kẹ ayen ẹruọ.

 9 Ikpe ọvo* nẹrhẹ ohwo ghwanraa,

Yẹrẹ kẹ eshare re kpakore ọvo yen vwo ẹruọ rẹ obo re gbaree.

10 Ọtiọyena me da ta: ‘Kerhọ mẹ,

Rere me je vuẹ wẹ oborẹ me riẹnre.’

11 Nighere! me hẹrhẹ eta wẹn;

Me kerhọ rẹ iroro ru wọ vwọ phia

Ọke wọ vwọ hiẹ guọnọ oborẹ wọ cha ta.

12 Me nabọ kerhọ rẹ ovwan,

Ẹkẹvuọvo o vwo ọvuọvo vwẹ usun rẹ ovwan ro se djephia nẹ Job ru chọ*

Yẹrẹ kpahen phiyọ aphro rọyeen.

13 Ọtiọyena ovwan tanẹ, ‘Avwanre mrẹ aghwanre ree;

Ọghẹnẹ yen ghwọkuo, ọ dia ohworakpọọ.’

14 Ọ dia omẹvwẹ yen ọ ta eta rọyen na vwọsoo,

Ọtiọyena me cha reyọ aphro rẹ ovwan vwọ kpahen kẹẹ.

15 O gbe ayen unu, ayen rhe vwo ẹkpahọnphiyọ ọfaa;

Ayen vwo emu vuọvo ro chekọ rẹ ayen cha taa.

16 Me hẹrhẹre, ẹkẹvuọvo ayen rha ta ota kpobarophiyọọ;

Ayen di mudia etiyin, ayen rha kpahen ota ọfaa.

17 Ọtiọyena me je cha kpahen;

Me je cha ta oborẹ me riẹnre,

18 Kidie eta vọn unu mẹ;

Ẹwẹn rọhẹ oma mẹ mu vwe.

19 Obevun mẹ pha kerẹ iwaini rọ mrẹ asan da wẹn phiaa.

Kerẹ ekpu rẹ iwaini kpokpọ ro muegbe rọ vwọ sa.

21 Me cha ghwomaphiyọ ẹbẹre rẹ ohwo vuọvoo,

Yẹrẹ vwẹ ujiri rẹ omeru* vwọ kẹ ohworakpọ vuọvoo,

22 Kidie me riẹn obo ra vwẹ ujiri rẹ omeru vwọ kẹ ohwoo;

Mi de ru ọtiọyen, ọ cha ghwọrọ ọke Ọmemama mẹ ke vwẹ ovwẹ te obaa.

33 “Ẹkẹvuọvo asaọkiephana, Job, biko kerhọ rẹ eta mẹ;

Kerhọ ri kemu kemu re me cha ta.

 2 Nighere, biko! mi che rhie unu mẹ phiyọ;

Ẹrẹnvwe mẹ* cha ta ota.

 3 Eta mẹ ghwoghwo ophiọnphiọn rẹ ubiudu mẹ,

Ẹbẹrunu mẹ je ta uyota rẹ oborẹ me riẹnre.

 4 Ẹwẹn rẹ Ọghẹnẹ komobọ yen ma vwẹ,

Ẹwẹn rẹ Ọromevwẹgba na komobọ yen reyọ ovwẹ rhe akpọ.

 5 Kpahen kẹ vwẹ ọ da dianẹ wo se ru ọtiọyen;

Guẹdjọ wẹn vwẹ obaro mẹ; reyọ ẹdia wẹn.

 6 Nighere! me pha kerẹ owẹ vwẹ obaro rẹ Ọghẹnẹ rẹ uyota na;

Ọphiẹn yen a je vwọ ma vwẹ.

 7 Ọtiọyena wo jẹ oshọ mẹ mu wee,

Wo ji jẹ okeke ro nẹ obọ mẹ cha mu we rọọ.

 8 Ẹkẹvuọvo wọ ta eta ri mi nyori,

E, ọkieje yen mi vwo nyo eta nana,

 9 ‘Me fonro, mi ru umwemwu vuọvoo;

Me fonro, mi vwo oruchọ vuọvoo.

10 Ẹkẹvuọvo Ọghẹnẹ guọnọ idjerhe rọ sa vwọ reyọ vwọso ovwẹ;

Ọ reyọ ovwẹ phiyọ ọvweghrẹn rọyen.

11 O phiẹ awọ mẹ phiyọ igoni;

Ọ fuẹrẹn idjerhe mẹ eje.’

14 Ọghẹnẹ ta ota obọ ọvo kugbe obọ rivẹ,

Ẹkẹvuọvo ohwo vuọvo davwerhọọ,

15 Vwẹ evwerhẹn, vwẹ emramrẹ rẹ ason,

Ọke rẹ ovwerhẹn okokodo de shenyẹ ihwo

Ọke rẹ ayen vwọ vwerhẹn vwẹ ehwa rayen.

16 O mi rhie erhọ rayen phiyọ

O mi ruo rere uchebro rọyen vwo te ubiudu rayen,

17 Ro vwo ku ohwo rhẹriẹ vwo nẹ oruchọ rọyen

Je sẹro rẹ ohwo vwo nẹ omaephuo.

18 Ọghẹnẹ sivwin erhi* rọyen vwo nẹ ukpotọ na,*

Arhọ rọyen vwo nẹ ughwu rẹ ọlọkọ.*

19 Ọmiaovwẹ ghwọkuẹ ohwo vwẹ enu rẹ ehwa rọyen

Ọtiọyen ukpokpogho rẹ ọkieje rẹ ibeku rọyen je ghwọkuo,

20 Te ẹdia ro* de vwo utuoma kpahen ibrẹdi,

Je* sen omamọ emuọre dede.

21 Uvwo rọyen gbon kuẹfia,

Ibeku rọyen ri siomanu jovwo na teyenphia* re.

22 Erhi* rọyen sikẹre ukpotọ na;*

Arhọ rọyen sikẹre ihwo re sua ughwu.

23 Ọ da dianẹ ikọn ọvo* bruro rhe,

Ohwo ọvo ro biẹcha vwẹ usun rẹ ihwo uriorin ọvo,

Rọ vwọ vuẹ ohworakpọ obo re dia ọsoso,

24 Ọtiọyena Ọghẹnẹ de dje ẹroesiri vwọ kẹ, ọ da tanẹ,

‘Sivwon rere o vwo jẹ ukpotọ* na ẹruọ!

25 E jẹ ugboma rọyen kpokpọ vrẹ ọke rọ vwọ hẹ eghene;

E jẹ o rhivwin kpo ọke rẹ ẹgba rẹ eghene rọyen.’

26 Ọ cha rẹ Ọghẹnẹ, ohwo ro che rhiabọreyọ,

Kọ cha mrẹ opharo rọyen vẹ ukperi rẹ aghọghọ,

Kọ cha rhoma kere ohworakpọ phiyọ ọvwata.

27 Ohwo yena ko che ghwoghwo* kẹ ihworakpọ,

‘Mi ru umwemwu je chahen obo re dia ọsoso,

Ẹkẹvuọvo obo ri fo vwe te vwe omaa.*

28 Ọ tan erhi* mẹ hirhe rere o vwo jẹ ukpotọ* na ẹruọ,

Arhọ mẹ cha mrẹ urhukpẹ na.’

29 Vwọrẹ uyota, Ọghẹnẹ ruẹ erọnvwọn nana eje

Abọ ivẹ, abọ erha, vwọ kẹ ohworakpọ,

30 Rọ vwọ reyọ* rhivwin vwo nẹ ukpotọ* na rhe,

Rere ọ sa vwọ riavwerhen rẹ urhukpẹ rẹ arhọ na.

33 Wo rhe vwo oborẹ wọ cha taa, gba kerhọ mẹ;

Fotovwin, ki mi che yono uwe aghwanre.”

 2 “Ovwan kerhọ rẹ eta mẹ, ovwan ri vwo aghwanre na;

Ovwan nyo vwe, ovwan re riẹnre mamọ na.

 3 Kidie orhọ na davwan eta

Kirobo rẹ ẹrẹnvwe* na davwan emu.

 4 E jẹ avwanre komobọ fuẹrẹn obo re gbare;

E jẹ avwanre brorhiẹn rẹ obo ri yovwirin vwẹ ohri rẹ avwanre.

 5 Kidie Job tare nẹ, ‘Mi ru obo ri shephiyọ,

Ẹkẹvuọvo Ọghẹnẹ brorhiẹn rẹ abavo kẹ vwẹẹ.

 7 Ono yen họhọ Job,

Ohwo rọ da ehwẹjẹ kerẹ ame?

 8 Ọ vẹ irumwemwu yen gba yan usun

Ọ vẹ erharhe rẹ ihwo yen je dia igbeyan.

 9 Kidie ọ tare nẹ, ‘Ohworakpọ mrẹ ereree

Siẹrẹ ọ da davwẹngba ro vwo ru obo re vwerhan Ọghẹnẹ oma.’

Ọ dia obo re se roro rẹ Ọghẹnẹ rẹ uyota na vwo ru obo re braree,

Rẹ Ọromevwẹgba na vwo ru chọọ!

11 Ọ cha hwosa kẹ ohwo vwo nene obo ro ruru

Je nẹrhẹ ọ rioja rẹ obo ri che nẹ obuko rẹ idjerhe rọyen rhe.

12 Vwọrẹ imuẹro, Ọghẹnẹ ruẹ obo re braree;

Ọromevwẹgba na gẹrẹ orhiẹn ọsosoo.

13 Ono yen kẹ rẹ ẹgba nẹ ọ vwẹrote akpọ na,

Ono yen vwerọ vwo mu vwẹ enu rẹ akpọ na eje?

14 Ọ da nabọ tẹnrovi ayen,

O de koko arhọ vẹ ẹwẹn rayen kẹ oma rọyen,

15 Ihworakpọ* eje che ghwu kugbe,

Ihworakpọ ki che rhivwin kpo ekpẹn.

16 Ọtiọyena ovwan de vwo ẹruọ, ovwan gba davwerhọ rẹ ọnana;

Ovwan nabọ kerhọ rẹ obo re me ta na.

17 Ofori nẹ ohwo ro vwo utuoma kpahen orhiẹn ọsoso sun,

Gbanẹ wo che brorhiẹn hwe ohwo ro vwo ẹgba rọ dia ọvwata?

19 Ohwo ọvo herọ ro nẹ emọ rẹ ivie ruẹẹ

Ro ji dje ẹroesiri vwọ kẹ edafe jẹ ivwiogbere vwoo,*

Kidie ayen eje na iruo rẹ obọ rọyen.

20 Ayen se ghwu kpregede, vwẹ uherevie rẹ ason;

Ayen phariẹ gangan ji ghwẹ;

Ihwo ri vwo ẹgba dede ghwọrọ, ẹkẹvuọvo ọ dia womarẹ abọ rẹ ohworakpọọ.

21 Kidie ẹro rẹ Ọghẹnẹ hẹ enu rẹ idjerhe rẹ ohworakpọ,

Ọ je mrẹ ichiyotọ rọyen eje.

22 O vwo ebri vuọvo yẹrẹ uhoho okokodo vuọvo

Rẹ ihwo umwemwu de se si oma rayen nuu.

23 Kidie Ọghẹnẹ ji rhi bru ọke phiyotọ vwọ kẹ ohworakpọ vuọvo

Rọ vwọ vwomaphia vwẹ obaro rọyen vwọ kẹ ẹdjọeguoo.

24 Ọ guọnọ otọ rẹ ọgba tavwen ọ ke ghwọrọọ

O mi ji phi ihwo efa phiyọ ẹdia rayen.

25 Kidie ọ riẹn oborẹ ayen ruẹ;

O phiẹ ayen kparobọ vwẹ ason, ayen me ghwọrọ.

26 O gboja kẹ ayen fikirẹ umwemwu rayen,

Vwẹ asan rẹ ihwo eje da sa mrẹ ayen,

27 Kidie ayen kuomarhẹriẹ rẹ ayen vwo je enene

Ayen je davwerhọ rẹ idjerhe rọyen vuọvoo;

28 Ayen nẹrhẹ ogbere kperẹ se,

Ọtiọyena ko nyo oviẹ rẹ ohwo ro vwo ọchukoo.

Owenẹ ọ dia ẹgborho yẹrẹ ohworakpọ, obo ri che nẹ obuko rọyen rhe ọvuọvo,

30 Rere ohwo ro jẹ Ọghẹnẹ ẹriẹn* vwo jẹ ihwo esuon

Yẹrẹ ro vwo jẹ ufi ẹdia vwọ kẹ ihwo na.

31 Kidie ohwo ọvo sa ta kẹ Ọghẹnẹ nẹ,

‘E gboja kẹ vwẹ, dede nẹ mi ru emu vuọvo rọ chọree;

32 Yono uvwe oborẹ mi jẹriẹn;

Ọ da dianẹ mi ru orọnvwọn ọvo rọ chọre, mi rhe che ruo ọfaa’?

34 Ihwo ri vwo ẹruọ* cha ta kẹ vwẹ

—Kohwo kohwo ro vwo aghwanre ro nyo vwe—

35 ‘Job ta obo ro jẹriẹn,

Ọhọ jehẹ eta rọyeen.’

36 E jẹ a davwen Job ni* karekare

Kidie ẹkpahọnphiyọ rọyen pha kerẹ ẹkpahọnphiyọ rẹ ihwo umwemwu!

37 Ọ vwẹ ẹvwọsuọ vwọ ba umwemwu rọyen;

Ọ teyen abọ vwẹ obaro rẹ avwanre vwọrẹ ehwẹjẹ

Ọ je ta eta ibuebun vwọso Ọghẹnẹ rẹ uyota na!”

 2 “Wo vwo imuẹro mamọ nẹ oborẹ wọ ta na gbare te ẹdia ru wọ da tanẹ,

‘Me dia ọvwata nọ Ọghẹnẹ’?

 4 Me cha kpahen kẹ wẹ

Vẹ igbeyan wẹn re vẹ owẹ gba herọ na.

 5 Ni odjuvwu na rere wọ mrẹ,

Vwo oniso rẹ evwru rehẹ obenu wẹn na.

 7 Wọ da dia ọvwata, die yen wọ vwọ kẹ;

Die yen ọ reyọ mie we?

 8 Ohworakpọ kerẹ owẹ ọvo yen umwemwu wẹn djobọte,

Ọsoso wẹn, ke rha ọmọ rẹ ohworakpọ.

 9 Ihwo viẹ phia ọke rẹ ayen dahẹ otọ rẹ oshenyẹ ọgangan;

Ayen viẹ vwọ kẹ ugbomọphẹ vwo nẹ otọ usuon* rẹ egba.

10 Ẹkẹvuọvo o vwo ohwo vuọvo rọ nọ nẹ, ‘Tivọ yen Ọghẹnẹ, Ọmemama Rode mẹ na hepha,

Ọ rọ nẹrhẹ a sua ine vwẹ ason na?’

11 O yono avwanre vrẹ eranvwe rẹ aghwa rẹ otọrakpọ na,

Ọ je nẹrhẹ avwanre ghwanre vrẹ ephran rẹ idjuvwu na.

12 Ihwo kperẹ phia, ẹkẹvuọvo ọ kpahaan,

Fikirẹ omaephuo rẹ orumwemwu.

13 Vwọrẹ imuẹro, Ọghẹnẹ kerhọ rẹ oviẹ fefee;*

Ọromevwẹgba na davwerhọ rọyeen.

15 Kidie o ji rhi muophu nọ wẹ orhiẹẹn;

Yẹrẹ kọ jokaphiyọ eta wẹn ru wọ nama roro te wọ ke ta naa.

16 Job rhie unu rọyen phiyọ kufia;

Ọ ta eta ibuebun vwọrẹ jẹriẹn.”

 2 “Vwo edirin mẹ emerha rere mi djefiotọ,

Kidie mi ji vwo eta re me cha ta kpahen Ọghẹnẹ.

 3 Me cha ta eta buebun kpahen obo re me riẹnre,

Mi ji che djephia nẹ Ọmemama mẹ ohwo ọsoso.

 4 Vwọrẹ uyota, eta mẹ dia efiaan;

Ohwo rọ pha gbagba vwẹ erianriẹn vẹ owẹ hẹ etinẹ.

 5 Vwọrẹ uyota, Ọghẹnẹ vwo ẹgba, ọ je sian ohwo vuọvoo;

Ẹgba rẹ ẹruọ* rọyen rhoro.

 6 Ọ cha sẹro rẹ arhọ rẹ irumwemwuu,

Ẹkẹvuọvo o brorhiẹn ọsoso vwọ kẹ ihwo re rioja.

 7 O siẹ ẹro rọyen nẹ evwataa;

Ọ vwẹ ayen muẹ vẹ ivie,* ọ je kpara ayen kpenu bẹdẹ.

 8 Ẹkẹvuọvo a da vwẹ ejọnrọn vwọ kanre ayen

Je vwẹ ifi rẹ ojaẹriọ vwọ gba ayen,

 9 O dje oborẹ ayen ruru vwọ kẹ ayen,

Urhiẹchọ rayen rẹ omaephuo rayen soro.

10 O rhie erhọ rayen phiyọ vwọ kẹ ọkpọvi

Ọ je vuẹ ayen nẹ ayen kurhẹriẹ vwo nẹ oruchọ.

11 Ayen de nyo urhurhu rọyen je ga,

Ayen che yeren akpọ rayen eje vwọrẹ ofuvwegbe,

Ikpe rayen je cha dia ọ rẹ omavwerhovwẹn.

12 Ẹkẹvuọvo ayen rha kerhọọ, ayen che ghwu ughwu rẹ ọlọkọ*

Ji ghwu ababọ rẹ erianriẹn.

14 Ayen* ghwẹ ọke rẹ ayen je vwọ hẹ eghene,

Ayen ghwọrọ akpọ rayen kuẹfia vwẹ ohri rẹ eshare ri gbe igberadja vwẹ asan rẹ ayen da ga ẹga.*

15 Ẹkẹvuọvo Ọghẹnẹ* sivwin ihwo re rioja ọke rẹ ayen da rioja;

O rhie erhọ rayen phiyọ ọke re de shenyẹ ayen.

16 O sivwin uwe nẹ ọtonphiyọ rẹ ukpokpogho

Vwo kpo asan ro rhiephiyọ, re gbere ughwru phiyọọ,

Vẹ omamọ rẹ emuọre vwẹ enu rẹ imẹjẹ wẹn kerẹ onẹrhẹvwe.

17 Ọke yena, ẹdjọeguo ra cha vwọ kẹ irumwemwu kọ cha vọn wẹ evun,

Ọke re de guẹdjọ ji ru nene orhiẹn ọsoso re bruru.

18 Ẹkẹvuọvo jomaotọ rere ophu vwo juwe esuon rua eghrẹn,*

Wo ji jẹ udi ẹriọ obuebun sun we ghwrẹẹ.

19 Oviẹ ru wọ viẹ vwọ kẹ ukẹcha na

Yẹrẹ ẹgbaẹdavwọn ọgangan wẹn cha nẹrhẹ wọ vrabọ rẹ ukpokpogho?

20 Wo rhẹro rẹ ason naa,

Ọke rẹ ihwo da ranvwiẹ nẹ asan rayen na.

21 Jomaotọ rere wo vwo jẹ oma ekuorhẹriẹ kpo umwemwu eruo,

Ru wọ da jẹ ọnana ukperẹ ojaẹriọ.

22 Nighere! A kpare Ọghẹnẹ kpenu vwẹ ẹgba rọyen;

Oyono vọ yen họherọ?

23 Ono yen kpọ idjerhe rọyen vi* jovwore

Yẹrẹ ta kẹ nẹ, ‘Oborẹ wo ruru chọre’?

24 Karophiyọ titi iruo rọyen,

Rẹ ihworakpọ vwọ so une.

25 Ihworakpọ eje mrẹrẹ re,

Ihworakpọ no vwẹ ugboko.

26 E, Ọghẹnẹ rho nọ oborẹ avwanre sa riẹn;

Uchunu rẹ ikpe rọyen vrẹ oborẹ avwanre se vwo ẹruọ rọyen.*

27 O se eghwẹghwẹ rẹ ame na kpo obenu;

Ayen dje ji hirhephiyọ osio rọ rhọ nẹ evwru rọyen cha;

28 Evwru na kọ rhọ ame na kuotọ;

Ko tue kuẹ ihworakpọ.

29 O vwo ohwo ro se vwo ẹruọ rẹ oborẹ evwru na riẹnphiyọ wan,

Oborẹ agbraran van nẹ utughẹ rọyen cha?

30 Ni obo rọ hra enu rọ nyavwaro* na nene wan

Kugbe obo ro rhurhu ikokodo* rẹ abadi na wan.

31 Womarẹ enana yen ọ vwọ ghẹrẹ ihwo na;

Ọ kẹ ayen emuọre gbidiki.

32 Ọ vwẹ abọ rọyen vwo rhurhu enu rọ nyavwaro na,

Je kpọ kpo asan rọ guọnọre.

33 Agbraran rọyen ta ota kpahọn,

Ichuru dede ghwoghwo ohwo rọ cha na.*

37 “Ọnana nẹrhẹ ubiudu mẹ kpogho

O de ji pho nẹ asan rọ hepha.

 2 Nabọ kerhọ rẹ urhuru rẹ Ọghẹnẹ rọ vọnre vẹ ẹgba na

Kugbe agbraran ro nẹ unu rọyen cha.

 3 O siobọno vwẹ otọ rẹ idjuvwu na eje

O ji jẹ enu rọyen rọ nyavwaro na kpo oba rẹ akpọ na.

 4 Ọyena da wan nu, edo ọgangan ko nene;

Ọ van vẹ urhuru ọgangan,

O ji siẹ obọ rọyen te uko ọke re de nyo urhuru rọyeen.

 5 Ọghẹnẹ van vẹ urhuru rọyen vwẹ idjerhe rẹ igbevwunu;

O ruẹ erọnvwọn ride re vrẹ oborẹ avwanre se vwo ẹruọ rọyen.

 7 Ọghẹnẹ phioba phiyọ iruo rẹ ihworakpọ eje*

Rere ihworakpọ eje vwọ riẹn iruo rọyen.

 8 Eranvwe rẹ aghwa rua evunrẹ iwevwin rayen

Ayen me daji asan rẹ ayen dia.

 9 Ogiribo na djuẹ nẹ asan rọyen cha,

Ekpahen na ji nẹ odju rẹ obohwẹre ọnre na cha.

10 Womarẹ ẹwẹn rẹ Ọghẹnẹ yen ame na vwo muẹ ukori,

Ọ je nẹrhẹ ame na eje muẹ ukori.

11 E, ọ vwẹ ame vwo ruẹ evwru na rere ọ vwọ họhọ;

Ọ hra enu rọ nyavwaro na nene evwru na;

12 Ayen kiẹn riariẹ vwẹ asan rọ kpọ ayen ra;

Ayen ruẹ kemu kemu ro ji iji rọyen vwẹ enu rẹ akpọ na.

13 Owenẹ ọ dia fikirẹ oja re gbe kẹ ohwo* yẹrẹ fikirẹ otọ na

Yẹrẹ fikirẹ ẹguọnọ ro jẹ rhẹriẹ, ọ nẹrhẹ ọ phia.

14 Kerhọ rẹ ọnana, Job;

Domaji rere wọ nabọ fuẹrẹn iruo rẹ igbevwunu rẹ Ọghẹnẹ.

15 Wọ riẹn oborẹ Ọghẹnẹ suẹn* evwru na wan

Kugbe obo rọ nẹrhẹ enu nyavwaro nẹ evwru rọyen wan?

17 Diesorọ ewun wẹn vwọ tuabọ

Jẹ otọrakpọ na fọre fikirẹ odju ro nẹ obọrhen ọnre na cha?

18 Wẹ vẹ ọyen sa riẹn irharheghe na phiyọ

Rọ pha gangan kerẹ ughegbe rẹ utehru?

19 Vuẹ avwanre oborẹ avwanre cha ta kẹ;

Avwanre cha sa kpaheen kidie avwanre hẹ evunrẹ ebri.

21 Ayen cha sa mrẹ urhukpẹ naa,*

Dede nẹ o lo vwẹ irharheghe na,

Bẹsiẹ rẹ odju vwọ wanvrẹ ji phoro no.

22 Obohwẹre ọnre na yen urinrin ro lo kerẹ oro nẹcha;

Ọrho rẹ Ọghẹnẹ vọnre vẹ igbevwunu.

23 Avwanre che se vwo ẹruọ rẹ Ọromevwẹgba naa;

Ọ vọnre vẹ ẹgba,

O gbe orhiẹn ọsoso rọyen kugbe ophiọnphiọn rọyen rọ pha buebun na kuẹẹ.

 2 “Ọnana ono yen rhurhu uchebro mẹ na

Rọ ta eta ababọ rẹ erianriẹn?

 3 Biko rhanromavi kerẹ ọshare;

Me cha nọ wẹ enọ rere wọ kpahen kẹ vwẹ.

 5 Ono yen brorhiẹn rẹ ovwanvwọ rọyen, ọ da dianẹ wọ riẹnre,

Yẹrẹ ono yen riẹn ufi rẹ ovwanvwọ wan enu rọyen?

 6 Tivọ yen e duvwun ichivwo rọyen phiyọ,

Yẹrẹ ono yen vwẹ ubienyẹ rọyen vwo vi,

 7 Ọke rẹ isio rẹ urhiọke na vwo ku unu gbe vwo kperi vwọrẹ aghọghọ,

Rẹ emọ rẹ Ọghẹnẹ* eje vwo kperẹ ukperi rẹ aghọghọ?

 8 Ono yen kanre ẹchẹ gbe abadi na vwo gbere ughwru kẹ,

Ọke rọ vwọ va nẹ uwevwiẹ rhe,

 9 Ọke re me vwọ vwẹ evwru vwo rhuon

Je vwẹ ebri hwi vwọ pharọ,

10 Ọke ri mi vwo gbere ughwru kẹ

Je ghwẹ irhe kugbe ẹchẹ rọyen phiyọ,

11 Me da tanẹ, ‘Etinẹ wọ sa yan ba, wọ wan vrẹẹ;

Etinẹ yen ọgbogho ọgangan wẹn na cha yan ba’?

12 Wọ vwẹ iji vwọ kẹ urhiọke na dẹvure

Yẹrẹ nẹrhẹ ọke ro rhie cha obọ riẹn asan rọyen,

13 Nẹ ọ yọnrọn oba rẹ akpọ na

Ji kpogho orumwemwu nẹ evun rọyen?

14 O wene kerẹ ọphiẹn ra vwẹ utẹ vwo te,

Ona re bru phiyọ teyenphia kerẹ e rẹ ewun.

15 Ẹkẹvuọvo e si urhukpẹ rẹ irumwemwu nu vwọ kẹ ayen,

E ji vwirhin obọ rayen rẹ ayen kpare kpenu.

16 Wo kpo obotọ kpo esiri rẹ abadi na

Yẹrẹ fuẹrẹn ikokodo rẹ ame na jovwo re?

17 E dje anurhoro rẹ ughwu kẹ wẹ re,

Yẹrẹ wọ mrẹ anurhoro rẹ ebri hwi* jovwo re?

Yẹrẹ tivọ yen ebri na hepha,

20 Ru wọ da sa reyọ kpo ekogho rọyen

Je riẹn idjerhe ra wan kpo uwevwin rọyen?

21 Wọ riẹn ọnana kidie nẹ e vwiẹ wẹ ọke yena re

Ikpe* wẹn ji bun mamọ?

22 Wọ ro iwevwin ra sẹro rẹ imicho phiyọ re,

Yẹrẹ wọ mrẹ iwevwin ra sẹro rẹ ukori rẹ imicho phiyọ jovwo re,

23 Re me sẹro rọyen vwọ kẹ ọke rẹ ukpokpogho,

Vwọ kẹ ẹdẹ rẹ ohọnre kugbe ofovwin?

24 Ẹbẹre vọ yen elo rẹ urhukpẹ* nẹcha,

Tivọ yen odju rẹ ẹbẹre ọnre va nẹcha na nẹ cha vwẹ akpọ na?

25 Ono yen bru ugbo vwọ kẹ oghwe na

Je rhuẹrẹ idjerhe phiyọ vwọ kẹ ogiribo na vẹ evwru kugbe agbraran rọyen,

26 Rọ nẹrhẹ osio rhọ vwẹ asan rẹ ohwo vuọvo diaa,

Vwẹ aton rẹ ohworakpọ vuọvo hephaa,

27 Rọ nẹrhẹ evun vọn etọ re ghwọrọ kuẹfia

Je nẹrhẹ odin djẹ phia?

28 Osio na vwo ọsẹ,

Yẹrẹ ono yen ọsẹ rẹ irho na?

29 Uwevwiẹ rẹ ono yen ame ro djeri na nurhe,

Kẹ ono yen vwiẹ imicho rẹ odjuvwu na

30 Ọke rẹ enu rẹ ame na de dje kerẹ ukuta,

Enu rẹ ame ikokodo na de ji mu ukori?

31 Wo se churu ifi rẹ ẹko rẹ isio re se Kaima?*

Yẹrẹ rhan ifi rẹ ẹko rẹ isio re se Kisil?*

32 Wo se sun ẹko rẹ isio* ọvo phia vwẹ ọke rọyen

Yẹrẹ sun ẹko rẹ isio re se Ash* vẹ emọ rọyen?

33 Wọ riẹn irhi ri suẹn idjuvwu na,

Yẹrẹ wọ sa vwẹ ogangan rayen* vwo sun otọrakpọ na?

34 Wo se bunu se evwru na

Rere ọ nẹrhẹ oghwe rẹ ame rhurhu uwe?

36 Ono yen phi aghwanre phiyọ evwru na*

Yẹrẹ ono yen vwẹ ẹruọ vwọ kẹ erọnvwọn rẹ igbevwunu rehẹ irharheghe na?*

37 Ono yen ghwanre te ẹdia ro de se kere evwru na,

Yẹrẹ ono yen se ku ame rẹ echẹ rẹ idjuvwu na kufia

38 Ọke rẹ ekpẹn na de hirhephiyọ ibẹhre

Je nẹrhẹ ukori rẹ ekpẹn rẹ otọ na tan kugbe?

39 Wo se hwe eranvwe vwọ kẹ okpohrokpo

Yẹrẹ nẹrhẹ evun vọn emọ rẹ okpohrokpo

40 Ọke rẹ ayen de sherhẹn vwẹ asan rẹ ayen dia

Yẹrẹ fiọnko vwẹ iwevwin rayen?

41 Ono yen chere emu kẹ okpemu

Ọke rẹ emọ rọyen da viẹ kẹ Ọghẹnẹ vwọ kẹ ukẹcha

Ayen da je rhan cha rhan kpo kidie nẹ ayen vwo emu vuọvo rẹ ayen cha ree?

 3 Ayen rhuẹn totọ ọke rẹ ayen de vwiẹ emọ rayen,

Ọmiaovwẹ rẹ uvwiẹ rayen mi vwo ba.

 4 Emọ rayen gan je rhuaphiyọ vwẹ aghwa;

Ayen yanran, ayen rhivwẹn chaa.

 5 Ono yen siobọnẹ ekẹkẹtẹ rẹ aghwa na,

Ono yen je rhan ifi rẹ ekẹkẹtẹ rẹ aghwa na?

 6 Me vwẹ aton na vwo ru uwevwin rọyen

Je vwẹ otọ rẹ ughwanka na vwo ru asan rọ dia.

 7 Ọ kẹnoma kẹ edo rẹ orere na;

O nyo ukperi rẹ ohwo ro suẹn eranvwee.

 8 Ọ yancha yankpo vwẹ igbenu itete na rọ vwọ guọnọ odin rọ cha re,

Rọ vwọ guọnọ kodin kodin.

10 Wọ cha vwẹ ufi vwọ gba erhuẹn rẹ aghwa kpo uvwre rẹ ekpẹn re voro koko,

Yẹrẹ o che nene uwe re voro iyara na?

11 Wọ cha vwẹroso ẹgba rode rọyen

Rere wọ nẹrhẹ o ruiruo ọgangan wẹn?

12 Wọ sa vwẹrosuọ nẹ o che mu orhọ* wẹn rhivwin bru we rhe,

Nẹ o ji che koko kpo asan ru wo de wonro ibi ekankọn?

13 Ibekpe rẹ ogomugoro teyan vẹ aghọghọ,

Ẹkẹvuọvo a sa vwẹ ibekpe vẹ iphoro rọyen vwo dje e rẹ istọku?

14 Kidie ọ yanjẹ ikẹn rọyen vwo vwẹ otọ,

Ọ nẹrhẹ ayen rhorha vwevunrẹ ekpẹn.

15 Ọ chọrerọ ẹro nẹ awọ evo sa guọghọ ayen

Yẹrẹ nẹ eranvwe rẹ aghwa se chiyin ayen muotọ.

16 Ọ vwẹ oja vwọ ria emọ rọyen kerẹsiẹ ra da mrẹ nẹ e dia erọyeen;

Oshọ muo nẹ owian rọyen sa dia ofefee.

17 Kidie Ọghẹnẹ kẹ rẹ aghwanree*

Ọ je kẹ ẹruọ vuọvoo.

18 Ẹkẹvuọvo ọke ro de vrẹn je teyen ibekpe rọyen,

Kọ reyọ iyesi na kugbe ohwo rọ gua vwọ jehwẹ.

21 O chiyẹn otọ vwẹ iyara na ji pho vẹ ogangan;

Ọ họrhọ rua ofovwin.*

23 Ekpu rẹ edada na teyọn,

Oshuẹ vẹ javilin na nyavwaro.

24 Ọ pharha vẹ omavwerhovwẹn, ọ djẹ kpo obaro,*

O che se mudia asan ọvo ọke ro de nyo edo rẹ ọgbaan.

O nyo ọnrhe rẹ ofovwin na vwẹ awusheri

O ji nyo ukperi rẹ inotu rẹ ofovwin kugbe edo rẹ ofovwin.

26 Womarẹ ẹruọ wẹn yen ọso na vwọ rhan,

Je riẹn ibekpe rọyen kpo obọrhen ọnre na?

27 Yẹrẹ wẹwẹ yen vwẹ iji kẹ ugo na nẹ ọ rhan kpenu

Je bọn ẹho rọyen phiyọ asan ro kpenu,

28 Nẹ ọ vwerhẹn enu rẹ ugbenu kọkirhie,

Je dia asan ro fuoma vwẹ oragha?*

29 Etiyin yen ọ da guọnọ emuọre;

Ibiẹro rọyen nẹ kpo obaro shesheri.

30 Emọ rọyen se ọbara;

Kasan kasan rẹ ihwo re hweri hepha, etiyin ọ dia.”

 5 Me ta ota obọ ọvo, ẹkẹvuọvo me rha cha kpahen ọfaa;

Abọ ivẹ, ẹkẹvuọvo me rha cha ta ota ọfaa.”

 7 “Biko rhanromavi kerẹ ọshare;

Me cha nọ wẹ enọ rere wọ kpahen kẹ vwẹ.

 9 Wo vwo ugbobọ ro vwo ẹgba kerẹ ọ rẹ Ọghẹnẹ rẹ uyota na,

Yẹrẹ urhuru wẹn sa van gangan kerẹ ọrọyen?

10 Biko vwẹ urinrin vẹ ọrho vwọ sẹn;

Wọ vwẹ ọghọ vẹ erhuvwu vwo rhuon.

11 Siobọnu ophu ọgangan wẹn;

Ni kohwo kohwo rọ kparoma rere wọ reyọ vwo kpotọ.

12 Ni kohwo kohwo rọ kparoma rere wo vwo kpotọ,

Chiyin irumwemwu muotọ vwẹ asan rẹ ayen mudia.

13 Si ayen eje nu vwevunrẹ ekpẹn;

Gba ayen* phiyọ asan ro siomanu,

14 Ọke yena ke me cha rhọnvwe kẹ wẹ*

Nẹ obọrhen wẹn se sivwin uwe.

16 Ni ẹgba rọhẹ ehun rọyen

Kugbe ẹgba rọhẹ iriẹn rẹ evun rọyen!

17 O ruẹ urhurhu rọyen ghọnghọn kerẹ isida;

E rhuon iriẹn rẹ ekpoghawọ rọyen kugbe.

18 Ẹrovwo yen e vwo ru ibeku rọyen;

Awọ rọyen họhọ obo ra vwẹ utehru vwo ru.

19 Ọyen ọrẹsosuọ* vwẹ usun rẹ iruo rẹ Ọghẹnẹ;

Ọmemama rọyen ọvo yen se mu ọlọkọ rọyen bro ra.

20 Kidie igbenu na yen vwẹ emu vwọ kẹ,

Asan rẹ eranvwe rẹ aghwa na eje da heha.

21 O sherhẹn obotọ rẹ odin,*

O siomanẹ vwẹ ohri rẹ ekankọn rehẹ asan rẹ ame kuẹ.

22 Ophie rẹ odin na rhurho,

Irhe ri pọpla re djẹ vwẹ iyara* na riarierẹ phiyọ.

24 O vwo ohwo ro se muo jẹ o rhie ẹro phiyọ,

Yẹrẹ vwẹ oghọre vwo duvwun uwen rọyen?

41 “Wọ sa vwẹ oghọre re vwo muẹ iyerin vwo mu Levayatan*

Yẹrẹ vwẹ ufi vwọ gba ẹrẹnvwe rọyen?

 2 Wọ sa vwẹ ufi wan iwen rọyen

Yẹrẹ vwẹ oghọre* vwo duvwun ọhwa rọyen fi?

 3 Ọ cha rẹ wẹ gangan,

Yẹrẹ ọ cha ta ota bọrọbọrọ kẹ wẹ?

 4 O che nene uwe re ọphọ,

Rere wọ sa vwọ reyọ vwo ru ọviẹn wẹn bẹdẹ?

 5 Wo che nene heha kirobo re nene ọphran heha

Yẹrẹ vwẹ ufi vwọ gba vwọ kẹ emetẹ wẹn itete?

 7 Wọ cha sa ogha* buebun phiyọ ohọroma rọyen

Yẹrẹ vwẹ oshuẹ buebun vwo duvwun uyovwin rọyen?

 8 Djobọte;

Wọ cha karophiyọ ohọnre na, wọ rha cha davwọn ọfaa!

12 Mi che rhurhu unu vwọ kpahen awọ rọyeen,

Vwọ kpahen ẹgba rọyen vẹ ugboma rọyen rọ nabọ riẹn dia naa.

15 Ugbuko rọyen vwo irhiẹ rẹ esẹn

Re tamu ohwohwo kokoroko.

16 Ayen ọvuọvo tamu ohwohwo kokoroko

Te ẹdia rẹ odju vuọvo cha sa ro uvwre rayeen.

17 Ayen tamu ohwohwo;

Ayen churu mu ohwohwo, a cha sa hẹriẹ ayeen.

18 Iwen edje* rọyen nyavwaro,

Ẹro rọyen pha kerẹ elo rẹ urhiọke.

19 Urhukpẹ nyavwaro nẹ ugbunu rọyen cha;

Imwerhanre sara no cha.

20 Ivwirhi brẹ nẹ iwen rọyen cha,

Kerẹ ogidi erhanre ra ghwẹ odin eyaya phiyọ.

21 Ẹwẹn rọyen phiẹ erhanre phiyọ ibi,

Erhanre je la nẹ unu rọyen cha.

22 Ẹgba rode hẹ ohọre rọyen,

Oshọ je djẹ vwẹ obaro rọyen.

23 Uvwo rọyen ro kpirhirin na tamu ohwohwo kokoroko;

Ayen pha gangan kerẹ obo ra vwẹ utehru vwo duvwun, ayen yeghee.

24 Ubiudu rọyen pha gangan kerẹ ukuta,

E, gangan kerẹ ukuta ra vwọ lọ erọnvwọn.

25 O de vrẹn, egba dede guegue;

Oyan rọyen gbe ohwo unu.

26 O vwo ọlọkọ vuọvo ro tere oma rọ sa wan omaa;

Owenẹ ọ dia oshuẹ, edada, yẹre orọnvwọn ọfa rọ pha piọpiọpiọọ.*

27 O nẹ utehru kerẹ odin eyaya,

Ẹrovwo kerẹ urhe ro gbon re.

28 Edada nẹrhẹ ọ djẹẹ;

Ibiukuta re vwo phio hirhephiyọ odin eyaya.

29 O nẹ ubiurhe kerẹ odin,

Ọ je vwẹ edo ri javilin vwọ jehwẹ.

30 Evun rọyen pha dandan kerẹ ẹbẹre ochẹ;

Ọ hra oma rọyen phiyọ ibehre kerẹ urhe rode re vwo wonro ibi ekankọn.

31 Ọ nẹrhẹ ikokodo na họrhọ kerẹ ipọtu;

Ọ họnra abadi na kerẹ ipọtu re vwo chere ori.

33 O vwo orọnvwọn vuọvo rọ họherọ vwẹ akpọ naa,

Ọyen emama ra mare vwẹ idjerhe ro vwo jẹ oshọ ẹdjẹ.

 2 “Asaọkiephana me rhe riẹn re nẹ wo se ru kemu kemu,

Nẹ o vwo orọnvwọn vuọvo ro rhe we ẹwẹn rọ cha bẹn wẹ eruoo.

Ọtiọyena me da ta ota, ẹkẹvuọvo ababọ rẹ ẹruọ

Rẹ erọnvwọn ri gbe vwe unu mamọ, ri mi jẹ riẹn.

 5 Erhọ mẹ nyo kpahen owẹ jovwo re,

Ẹkẹvuọvo asaọkiephana me vwẹ ẹro mẹ vwọ mrẹ wẹ re.

 6 Kọyensorọ mi vwo si ota mẹ reyọ,

Mi ji kurhẹriẹ vwẹ ekpẹn vẹ iwurhie.”