ỌBE RẸ IVIE RẸSOSUỌ

1 Asaọkiephana Ovie Devid ghwore, ikpe* rọyen kpenu re, dede nẹ a vwẹ emwa vwo phopho jẹ oma rọyen sa tuabọọ. 2 Ọtiọyena idibo rọyen da ta kẹ nẹ: “E jẹ a guọnọ ọmọtẹ ọvo, ọmọtobẹ, vwọ kẹ ọrovwovwe ovie, kọyen che rhe muẹ emu kẹ je vwẹrote. O che sherhẹn kẹrẹ owẹ rere oma rẹ ọrovwovwe ovie sa vwọ tuabọ.” 3 Ayen da yan ekogho rẹ Izrẹl eje rẹ ayen vwọ guọnọ ọmọtẹ ro vwo erhuvwu, ayen da mrẹ Abishag ohwo ri Shunẹm, ayen da reyọ rhe ovie na. 4 Ọmọtẹ na vwo erhuvwu mamọ, ọ da rhe dia ohwo rọ vwẹrote ovie ji muẹ emu kẹ, ẹkẹvuọvo ovie na nenire mromaa.

5 Vwẹ uvwre rẹ ọke nana, jẹ Adonaijah ọmọ ri Hagit rha kparoma rọyen kpenu rọ vwọ tanẹ: “Me cha dia ovie!” O ru akpẹrẹ kẹ oma rọyen, o ji vwo iguiyesi kugbe eshare 50 re djẹ kobaro kẹ. 6 Ẹkẹvuọvo ọsẹ rọyen je rhe vwẹ ọke vuọvo vwọ nọ nẹ:* “Diesorọ wo vwo ruẹ ọnana?” Adonaijah ji vwo erhuvwu mamọ, oni rọyen vwiẹrẹ kpahen Absalọm. 7 Adonaijah vẹ Joab ọmọ ri Zẹruya kugbe Abayata orherẹn na jiroro kugbe, ayen da vwẹ ukẹcha vẹ obicha vwọ kẹ. 8 Ẹkẹvuọvo Zedọk orherẹn na, Bẹnaya ọmọ ri Jehoyada, Netan ọmraro na, Shimiai, Riai, kugbe egba ofovwin ri Devid bicha Adonaijaah.

9 Ukuotọ rọyen, Adonaijah da vwẹ igodẹ, erhuẹn, kugbe eranvwe re pha tubie tubie vwo ze izobo vwẹ ukuta ri Zohalẹt rọ kẹrẹ Ẹn-rogẹl, o durhie iniọvo rọyen eje emọ rẹ ovie na, kugbe eshare ri Juda eje idibo rẹ ovie na. 10 Ẹkẹvuọvo o durhie Netan ọmraro na, Bẹnaya kugbe egba ofovwin na, yẹrẹ Solomọn oniọvo rọyeen. 11 Netan da ta kẹ Bat-shiba oni ri Solomọn nẹ: “Wo ji rhi nyo nẹ Adonaijah ọmọ ri Hagit dia ovie re, jẹ ọrovwavwanre Devid riẹn emu vuọvo kpahọọn? 12 Biko yanrhe asaọkiephana rere me vuẹ wẹ oborẹ wo che ru wo se vwo sivwin arhọ robọ wẹn kugbe arhọ rẹ* ọmọ wẹn Solomọn. 13 Bru Ovie Devid ra rere wọ ta kẹ nẹ, ‘Ọrovwovwe ovie, ọ dia owẹ yen duvwun iyorin kẹ odibo wẹn nẹ: “Ọmọ wẹn Solomọn yen cha dia ovie ọke mi de no nu, nẹ ọyen ohwo ro che chidia ekete mẹ”? Kẹ diesorọ Adonaijah rha vwọ dia ovie?’ 14 Wo ji vwo nene ovie ta ota na, ke me cha ro uwevwin bru ovwan rhe je tanẹ oborẹ wọ ta na uyota.”

15 Ọtiọyena Bat-shiba de bru ovie na ra kpo uvun rọyen. Ovie na ghworo mamọ re, Abishag ohwo ri Shunẹm na kọyen ri muẹ emu kẹ ovie na. 16 Bat-shiba da vwẹ uyovwin kpotọ je riẹn totọ kẹ ovie na, ovie na da nọ nẹ: “Die yen wọ guọnọre?” 17 Ọ da kpahen nẹ: “Ọrovwovwe, wẹwẹ yen vwẹ odẹ ri Jihova Ọghẹnẹ wẹn vwo duvwun iyorin kẹ odibo wẹn nẹ, ‘Ọmọ wẹn Solomọn yen cha dia ovie ọke mi de no nu, nẹ ọyen ohwo ro che chidia ekete mẹ.’ 18 Ẹkẹvuọvo nighere! Adonaijah dia ovie re, jẹ ọrovwovwe ovie riẹn emu vuọvo kpahọọn. 19 Ọ vwẹ erhuẹn, eranvwe re pha tubie tubie, kugbe igodẹ buebun vwo ze izobo, o ji durhie emọ rẹ ovie eje kugbe Abayata orherẹn na vẹ Joab onotu rẹ otuofovwin na; ẹkẹvuọvo o durhie Solomọn odibo wẹẹn. 20 Asaọkiephana ọrovwovwe ovie, ẹro rẹ Izrẹl eje ni we ru wọ vwọ vuẹ ayen ohwo ro che chidia ekete rẹ ọrovwovwe ovie siẹrẹ o de no nu. 21 Ọ rha dia ọtiọyeen, ugege rẹ ọrovwovwe ovie de ghwu kerẹ esẹ rọyen ride nu, a cha vwẹ ẹro rẹ ihwo re phiẹn ihwo vwo ni vwe vẹ ọmọ mẹ Solomọn.”

22 Ọ je vwọ ta ota kẹ ovie na, Netan ọmraro na da ro uwevwin. 23 Ugege yena a da vuẹ ovie na nẹ: “Netan ọmraro na hẹ etinẹ!” O de bru ovie na rhe, ọ da riẹn totọ kẹ ovie vẹ opharo rọyen rọ bọvwọn rhuotọ. 24 Netan da tanẹ: “Ọrovwovwe ovie, wọ tare nẹ, ‘Adonaijah yen cha dia ovie ọke mi de no nu, nẹ ọyen ohwo ro che chidia ekete mẹ’? 25 Kidie nonẹna, ọ yanran ra vwẹ erhuẹn, eranvwe re pha tubie tubie, kugbe igodẹ buebun vwo ze izobo, o durhie emọ rẹ ovie eje kugbe inotu rẹ otuofovwin na vẹ Abayata orherẹn na. Ayen vẹ ọyen hẹ oboyin ria je da, jẹ ayen tanẹ, ‘E jẹ Ovie Adonaijah sun tọn!’ 26 Ẹkẹvuọvo o durhie uvwe rẹ odibo wẹn yẹrẹ Zedọk orherẹn na, yẹrẹ Bẹnaya ọmọ ri Jehoyada, yẹrẹ Solomọn ọmọ wẹẹn. 27 Kẹ Ọrovwovwe ovie rhọnvwephiyọ ọnana jẹ ọ vuẹ vwẹ rẹ odibo rọyen ohwo ro che chidia ekete rẹ ọrovwovwe ovie ọke ro de no nuu?”

28 Ovie Devid da kpahen nẹ: “Se Bat-shiba kẹ vwẹ.” Ọtiọyena ọ da ro uwevwin rhe, o de mudia obaro rẹ ovie na. 29 Ovie na de duvwun iyorin nana nẹ: “Rẹ Jihova vwọ herọ na, ohwo ro sivwin uvwe* vwo nẹ ukpokpogho mẹ eje, 30 kirobo re me vwẹ odẹ ri Jihova Ọghẹnẹ rẹ Izrẹl vwo duvwun iyorin kẹ wẹ tanẹ, ‘Ọmọ wẹn Solomọn yen cha dia ovie ọke mi de no nu, nẹ ọyen ohwo ro che chidia ekete mẹ vwẹ ẹdia mẹ!’ ọyen obo ri mi che ru nonẹna.” 31 Bat-shiba de she bọvwọn opharo rhuotọ, ọ da riẹn totọ kẹ ovie na, ọ da tanẹ: “E jẹ ọrovwovwe Ovie Devid dia bẹdẹ!”

32 Ugege yena Ovie Devid da tanẹ: “Ovwan se Zedọk orherẹn na, Netan ọmraro na, vẹ Bẹnaya ọmọ ri Jehoyada kẹ vwẹ.” Ọtiọyena ayen da rhe obaro rẹ ovie na. 33 Ovie na da ta kẹ ayen nẹ: “Ovwan reyọ idibo mẹ nene oma, ovwan jẹ ọmọ mẹ Solomọn gua eranvwe mẹ re se imiu na,* rere ovwan suon kpo Gaihọn. 34 Zedọk orherẹn na vẹ Netan ọmraro na che ku evwri kuo vwọ jẹreyọ vwẹ etiyin kerẹ ovie vwẹ enu rẹ Izrẹl; ọke yena ovwan gbe hworo ọgban na rere ovwan ta, ‘E jẹ Ovie Solomọn sun tọn!’ 35 Ovwan de ru ọyena nu, ovwan gbe nene rhe, ọ cha rhe ji chidia ekete mẹ; kọ cha dia ovie vwẹ ẹdia mẹ, ke me cha reyọ vwo mu kerẹ osun vwẹ enu rẹ Izrẹl kugbe Juda.” 36 Siẹvuọvo na Bẹnaya ọmọ ri Jehoyada da ta kẹ ovie na nẹ: “Isẹ! E jẹ Jihova Ọghẹnẹ rẹ ọrovwovwe ovie ghwobọphiyọ. 37 Kirobo rẹ Jihova nene ọrovwovwe ovie dia, ọtiọyen yen o ji nene Solomọn dia, e jẹ O ru ekete rọyen rho nọ ekete rẹ ọrovwovwe Ovie Devid.”

38 Ọyena vwọ wan nu, Zedọk orherẹn na, Netan ọmraro na, Bẹnaya ọmọ ri Jehoyada, kugbe ihwo ri Kẹrẹt vẹ ihwo ri Pẹlẹt na da yanran, ayen da nẹrhẹ Solomọn gua eranvwe rẹ Ovie Devid re se imiu, ayen de muo rhe Gaihọn. 39 Asaọkiephana Zedọk orherẹn na da reyọ ukoko* rẹ evwri na nẹ utughẹ na rhe, o de kuo ku Solomọn vwọ jẹreyọ, ayen da tuẹn ehworo rẹ ọgban na phiyọ, ihwo na eje ki kperẹ nẹ: “E jẹ Ovie Solomọn sun tọn!” 40 Ọyena vwọ wan nu, ihwo na eje de nene yanran, jẹ ayen hworo iflutu je ghọghọ gangan, te ẹdia rẹ otọ na da bẹre rhiephiyọ fikirẹ edo rayen.

41 Adonaijah vẹ ihwo eje ro durhieri de nyo edo na ọke rẹ ayen vwọ riemu nu. Ugege rẹ Joab vwo nyo edo rẹ ọgban na, ọ da tanẹ: “Diesorọ edo ọgangan tiọyen vwọ hẹ orere na?” 42 Rọ je vwọ ta ota na, Jonatan ọmọ rẹ Abayata orherẹn na da rhe. Adonaijah da tanẹ: “Ro uwevwin kidie wẹwẹ omamọ ohwo,* o muẹro nẹ iyẹnrẹn esiri yen wọ ghwa rhe.” 43 Ẹkẹvuọvo Jonatan da kpahen kẹ Adonaijah nẹ: “Ẹjo! Ọrovwavwanre Ovie Devid vwẹ Solomọn mu ovie re. 44 Ovie na ji Zedọk orherẹn na, Netan ọmraro na, Bẹnaya ọmọ ri Jehoyada, kugbe ihwo ri Kẹrẹt vẹ ihwo ri Pẹlẹt na nene, ayen da nẹrhẹ ọ gua eranvwe rẹ ovie re se imiu. 45 Zedọk orherẹn na vẹ Netan ọmraro na de ku evwri kuo vwọ jẹreyọ kerẹ ovie vwẹ Gaihọn. Ọyena vwọ wan nu, ayen de rhivwin nẹ oboyin rhe vẹ aghọghọ, orere na da rhe vọn vẹ edo ọgangan. Edo yena yen ovwan nyori na. 46 Vwọ vrẹ ọyena, Solomọn chidia ekete rẹ ovie na re. 47 Vwọba, idibo rẹ ovie na rhi nene ọrovwavwanre Ovie Devid ghọghọ tanẹ, ‘E jẹ Ọghẹnẹ ru odẹ ri Solomọn titi vwọ vrẹ odẹ wẹn, e jẹ o ru ekete rọyen rho nọ ekete wẹn!’ Ọtiọyena ovie na da vwẹ uyovwin kpotọ vwẹ ehwa na. 48 Ovie na da je tanẹ, ‘E jẹ ujiri dia kẹ Jihova Ọghẹnẹ rẹ Izrẹl, rọ rhọnvwere nẹ ohwo ọfa chidia ekete mẹ nonẹna, je vwẹ uphẹn kẹ vwẹ nẹ me vwẹ ẹro mẹ vwọ mrẹ!’”

49 Uguegue da ro ihwo eje rẹ Adonaijah durhieri oma, ayen ọvuọvo de vrẹn, ayen de kpo dohwo dasan rọyen. 50 Oshọ de ji mu Adonaijah fikirẹ Solomọn, ọtiọyena o de vrẹn, ọ da yanran ra yọnrọn idjo rẹ agbada na. 51 A da niyẹnrẹn kẹ Solomọn nẹ: “Oshọ rẹ Ovie Solomọn muẹ Adonaijah, ọ ra yọnrọn idjo rẹ agbada na tanẹ, ‘E jẹ Ovie Solomọn ke duvwun iyorin kẹ vwẹ nẹ ọyen cha vwẹ ọlọkọ vwọ teyen odibo rọyen hwee.’” 52 Ọtiọyena Solomọn da tanẹ: “O de dje uruemu ro fori phia, ogẹton rọyen vuọvo che she totọọ; ẹkẹvuọvo a da mrẹ obo re brare vwẹ oma rọyen, ko che ghwu.” 53 Ọtiọyena Ovie Solomọn de ji ohwo ra reyọ nẹ asan agbada na rhe. Ọ da rhe rhe vwẹ uyovwin kpotọ kẹ Ovie Solomọn, ọyena vwọ wan nu Solomọn da ta kẹ nẹ: “Yanran kpo uwevwin wẹn.”

2 Ọke rẹ ughwu ri Devid vwo sikẹre re, ọ da vwẹ iji nana vwọ kẹ ọmọ rọyen Solomọn: 2 “Ọke rẹ ughwu mẹ siẹkẹrẹ re.* Ọtiọyena, goma rere wo ru kerẹ ọshare. 3 Wo mi nyupho ri Jihova Ọghẹnẹ wẹn womarẹ wọ vwọ yan vwẹ idjerhe rọyen, wọ vwọ yọnrọn irhi rọyen kugbe iji rọyen, wo vwo ruẹ nene orhiẹn-ebro rọyen, kugbe ẹkarophiyọ rọyen kirobo re si ayen phiyọ Urhi ri Mosis; ọke yena ku wo phikparobọ* vwẹ kemu kemu ru wo ruẹ kugbe vwẹ kasan kasan ru wọ rare. 4 Jihova che ru ive rọyen ro ve kpahen ovwẹ gba: ‘Ọ da dianẹ emọ wẹn jomaotọ kpahen oborẹ ayen fuevun yan vwẹ obaro mẹ vẹ ubiudu kugbe erhi* rayen eje, o rhe vwo ọke vuọvo rẹ ohwo rẹ urhiẹ wẹn che vwo jẹ ekete rẹ Izrẹl echidiaa.’

5 “Wọ je nabọ riẹn oborẹ Joab ọmọ ri Zẹruya ru vwe, obo ro ru inotu rẹ ituofovwin rẹ Izrẹl ivẹ—Abna ọmọ ri Nẹr kugbe Amesa ọmọ ri Jita. O hwe ayen, o ku ọbara rẹ ofovwin kuotọ vwẹ ọke rẹ ufuoma, ọ da vwẹ ọbara rẹ ofovwin vwo te umuehun rọhẹ ehun rọyen kugbe isabatu rehẹ awọ rọyen. 6 Wọ me reyọ aghwanre vwo ruiruo, wo jẹ uyovwin rẹ esha rọyen kpo evunrẹ Ushi* vwọrẹ ufuomaa.

7 “Ẹkẹvuọvo wo mi dje ẹguọnọ ro jẹ rhẹriẹ kẹ emọ ri Bazilai ohwo ri Giliẹd, jẹ ayen dia usun rẹ ihwo re riemu vwẹ imẹjẹ wẹn, kidie ọtiọyen ayen bicha vwẹ ọke re me vwọ djẹ kẹ oniọvo wẹn Absalọm.

8 “Shimiai ọmọ ri Gira ohwo rẹ orua ri Bẹnjamin ro nẹ Bahurim rhe vẹ owẹ je herọ. Ọyen ohwo rọ vwẹ ekan egangan vwọ họ vwẹ vwẹ ẹdẹ ri mi vwo kpo Mehaneim; ẹkẹvuọvo ọke ro vwo bru vwe rhe rhe vwa vwẹ vwẹ Jọdan na, me vwẹ odẹ ri Jihova duvwun iyorin kẹ nẹ: ‘Me cha vwẹ ọlọkọ vwọ teyen owẹ hwee.’ 9 Asaọkiephana wo jẹ oja egbe kẹẹ, kidie wẹwẹ ohwo vẹ aghwanre, wọ je riẹn obo ro fori nẹ wo ruo; wọ me reyọ uyovwin rẹ esha rọyen kpo Ushi* vẹ ọbara.”

10 Ọyena vwọ wan nu, Devid de ghwu kerẹ esẹ rọyen ride, e de sho phiyọ Orere ri Devid. 11 Uchọke rẹ Devid sunru vwẹ enu rẹ Izrẹl da dia ẹgbukpe 40. Vwẹ Hẹbrọn o sunru ẹgbukpe 7, o de rhe sun vwẹ Jerusalẹm ẹgbukpe 33.

12 Ọyena vwọ wan nu, Solomọn de chidia ekete ri Devid ọsẹ rọyen, ememerha na uvie rọyen da rhe ghwotọ kokoroko.

13 Ọke vwọ yan obaro, Adonaijah ọmọ ri Hagit de bru Bat-shiba oni ri Solomọn rhe. Bat-shiba da nọ nẹ: “Ufuoma yen wọ ghwa rhe?” Ọ da kpahen nẹ: “E, ufuoma.” 14 Ọ da tanẹ: “O vwo emuọvo re me guọnọ vuẹ wẹ.” Ọtiọyena Bat-shiba da tanẹ: “Gba ta.” 15 Ọ da ta: “Wọ riẹnre nẹ ofori nẹ uvie na dia ọmẹ jovwo, Izrẹl eje ji rhẹro rọyen nẹ me cha dia ovie; ẹkẹvuọvo uvie na wan vwẹ vrẹ ọ da rhe dia ọ rẹ oniọvo mẹ, kidie Jihova yen nẹrhẹ ọ dia ọrọyen. 16 Jẹ asaọkiephana o vwo oyare ọvo me guọnọ yara mie we. Wọ sian kẹ vwẹẹ.” Ọtiọyena Bat-shiba da ta kẹ nẹ: “Gba ta.” 17 Adonaijah da tanẹ: “Biko vuẹ Solomọn ovie na—kidie ọ cha sen kẹ wẹẹ—nẹ ọ vwẹ Abishag ohwo ri Shunẹm na kẹ vwẹ kerẹ aye.” 18 Ọtiọyena Bat-shiba da tanẹ: “Oyoma! Mi che nene uwe ta ota kẹ ovie na.”

19 Ọtiọyena Bat-shiba da ro uwevwin bru Ovie Solomọn ra ra ta ota kẹ kpahen Adonaijah. Siẹvuọvo na, ovie na de vrẹn ra vwa, ọ da vwẹ uyovwin kpotọ kẹ. Ọyena vwọ wan nu, o de chidia ekete rọyen, ọ da tanẹ a rhuẹrẹ ekete kẹ oni rẹ ovie rere o se chidia obọrhen rọyen. 20 Bat-shiba da tanẹ: “O vwo omoyare ọvo re me guọnọ yara mie we. Wọ sian kẹ vwẹẹ.” Ọtiọyena ovie na da ta kẹ nẹ: “Yare oyare na, oni mẹ; kidie me cha sen kẹ wẹẹ.” 21 Bat-shiba da tanẹ: “Jẹ a vwẹ Abishag ohwo ri Shunẹm na vwọ kẹ oniọvo wẹn Adonaijah kerẹ aye.” 22 Ọtiọyena Ovie Solomọn da kpahen kẹ oni rọyen nẹ: “Diesorọ wọ vwọ yara nẹ a vwẹ Abishag ohwo ri Shunẹm na vwọ kẹ Adonaijah? Wọ rha je sa yare uvie na vwọ kẹ kidie ọyen oniọvo mẹ ọkpako, Abayata orherẹn na kugbe Joab ọmọ ri Zẹruya ji biẹcha.”

23 Ọtiọyena Ovie Solomọn da vwẹ odẹ ri Jihova duvwun iyorin nẹ: “E jẹ Ọghẹnẹ ru ọtiọyen kẹ vwẹ je vwọ ba, siẹrẹ Adonaijah rha vwẹ arhọ* rọyen hwosa rẹ oyare nana rọ yare naa. 24 Asaọkiephana, rẹ Jihova vwọ herọ na, ohwo rọ vwẹ owọ mẹ muotọ kokoroko, rọ vwẹ ovwẹ chidia ekete rẹ ọsẹ mẹ Devid, je bọn uwevwin* kẹ vwẹ kirobo ro veri na, a cha teyen Adonaijah hwe nonẹna.” 25 Ugege yena, Ovie Solomọn de ji Bẹnaya ọmọ ri Jehoyada, ọ da yanran ra teyen Adonaijah she,* o de ghwu.

26 Ovie na da ta kẹ Abayata orherẹn na nẹ: “Yan kpo etọ wẹn vwẹ Anatọt! Wo fo ughwu, ẹkẹvuọvo me cha teyen owẹ hwe nonẹnaa kidie wo mu Ekpeti rẹ Ọphọ ri Jihova Ọrovwori ro Me Kpenu na vwẹ obaro rẹ ọsẹ mẹ Devid, wo ji nene ọsẹ mẹ rioja rọ rere eje.” 27 Ọtiọyena Solomọn da djẹ Abayata nẹ ọ rha ga kerẹ orherẹn ri Jihovaa, rere o vwo ru orugba rẹ ota rẹ Jihova ta kpahen uwevwin rẹ Ilai vwẹ Shailo.

28 Ọke rẹ Joab vwo nyo iyẹnrẹn na—kidie Joab bicha Adonaijah ẹkẹvuọvo o bicha Absalọmuu—Joab da djẹ kpo utughẹ ri Jihova, ọ da yọnrọn idjo rẹ agbada na. 29 A da ta kẹ Ovie Solomọn nẹ: “Joab djẹ kpo utughẹ ri Jihova, o mudia kẹrẹ asan agbada na vwẹ oboyin.” Ọtiọyena Solomọn de ji Bẹnaya ọmọ ri Jehoyada tanẹ: “Yanran, ra teyọn hwe!” 30 Ọtiọyena Bẹnaya de kpo utughẹ ri Jihova na, ọ da ta kẹ Joab nẹ: “Ọnana yen oborẹ ovie na tare, ‘Ro otafe rhe!’” Ẹkẹvuọvo Joab da tanẹ: “Ẹjo! Mi che ghwu phiyọ etinẹ.” Bẹnaya de rhivwin rhe rhe vuẹ ovie na nẹ: “Ọnana yen oborẹ Joab tare, ọnana yen obo rọ kpahen kẹ vwẹ.” 31 Ọtiọyena ovie na da ta kẹ nẹ: “Ruo kirobo rọ tare na; teyọn hwe wo sho rere wo si ọbara rẹ ihwo rẹ Joab hweri ekueku vwo nẹ uyovwin mẹ vẹ uwevwin rẹ ọsẹ mẹ. 32 Jihova cha nẹrhẹ ọbara rọyen dia uyovwin rọyen, kidie vwẹ obuko rẹ ọsẹ mẹ Devid, ọ vwẹ ọlọkọ hwe eshare ivẹ re dia evwata nọ, ri ji yovwin nọ: Abna ọmọ ri Nẹr, onotu rẹ otuofovwin rẹ Izrẹl, kugbe Amesa ọmọ ri Jita, onotu rẹ otuofovwin ri Juda. 33 Ọbara rayen cha dia enu rẹ uyovwin ri Joab kugbe enu rẹ uyovwin rẹ emọ* rọyen bẹdi bẹdẹ; ẹkẹvuọvo vwọ kẹ Devid, emọ* rọyen, uwevwin rọyen, kugbe ekete rọyen, e jẹ ufuoma nẹ obọ ri Jihova rhe bẹdi bẹdẹ.” 34 Ọtiọyena Bẹnaya ọmọ ri Jehoyada da yanran, ọ da teyen Joab she, o de hwe ghwu, e de sho phiyọ uwevwin robọ rọyen vwẹ aton na. 35 Ọyena vwọ wan nu, ovie na da vwẹ Bẹnaya ọmọ ri Jehoyada vwo mu vwẹ enu rẹ otuofovwin na vwẹ ẹdia ri Joab, ovie na da je vwẹ Zedọk vwo mu orherẹn vwẹ ẹdia rẹ Abayata.

36 Ọyena vwọ wan nu, ovie na de se Shimiai ọ da ta kẹ nẹ: “Bọn uwevwin kẹ oma wẹn vwẹ Jerusalẹm rere wọ dia etiyin; wo vrẹn no kpo asan ọfaa. 37 Ẹdẹ wo vrẹn no ro otafe je shariẹ Iyara ri Kidrọn na vrẹ, jẹ o muwẹro nẹ wo che ghwu. Ọbara wẹn cha dia enu rẹ uyovwin wẹn.” 38 Shimiai da kpahen kẹ ovie na nẹ: “Oborẹ wọ tare na yoma. Odibo wẹn che ru kirobo rẹ ọrovwovwe ovie ghwa ta na.” Ọtiọyena Shimiai da dia Jerusalẹm vwẹ ẹdẹ buebun.

39 Ẹkẹvuọvo vwẹ oba rẹ ẹgbukpe erha, idibo ri Shimiai ivẹ da djẹ bru Ekish ọmọ ri Meaka ovie ri Gat ra. Ọke ra vwọ vuẹ Shimiai nẹ: “Nighere! Idibo wẹn hẹ Gat,” 40 Shimiai de muegbe rẹ ekẹkẹtẹ rọyen vwẹ ugege yena, ọ da yanran ra mrẹ Ekish vwẹ Gat rere ọ guọnọ idibo rọyen. Ọke rẹ Shimiai vẹ idibo rọyen vwo rhivwin nẹ Gat rhe, 41 a da vuẹ Solomọn nẹ: “Shimiai vrẹn nẹ Jerusalẹm kpo Gat, o ji rhivwin rhire.” 42 Ọtiọyena ovie na de se Shimiai, ọ da ta kẹ nẹ: “Me vwẹ odẹ ri Jihova duvwun iyorin kẹ wẹ ji si we orhọ nẹ: ‘Ẹdẹ ru wo vrẹn nẹ etinẹ kpo asan ọfa, jẹ o muwẹro nẹ wo che ghwu’? Wọ rha je ta kẹ vwẹ nẹ, ‘Oborẹ wọ tare na yoma; mi che ru nene’? 43 Diesorọ wo rhe ru nene iyorin re me vwẹ odẹ ri Jihova duvwun kugbe iji re me vwọ kẹ wẹẹ?” 44 Ovie na da ta kẹ Shimiai nẹ: “Wọ riẹnre vwevunrẹ ubiudu wẹn umiovwo eje ru wo ru ọsẹ mẹ Devid, Jihova cha hwosa rẹ umiovwo na kẹ wẹ. 45 Ẹkẹvuọvo e che bruba kẹ Ovie Solomọn, a je cha vwẹ ekete ri Devid vwo muotọ kokoroko vwẹ obaro ri Jihova bẹdi bẹdẹ.” 46 Ọtiọyena ovie na da vwẹ iji kẹ Bẹnaya ọmọ ri Jehoyada, ọ da yanran ọ da teyọn she, o de ghwu.

Ọtiọyena uvie na da ghwotọ kokoroko vwẹ obọ ri Solomọn.

3 Solomọn vẹ Fero ovie rẹ Ijipt de vwo obọechuro rẹ orọnvwe. Solomọn rọvwọn* ọmọtẹ ri Fero, ọ da reyọ rhe Orere ri Devid bẹsiẹ rọ vwọ bọn uwevwin romobọ rọyen re, kugbe uwevwin ri Jihova, kugbe igbẹhẹ rọ riariẹ Jerusalẹm. 2 Ẹkẹvuọvo ihwo na ji ze izobo vwẹ asan ri kpenu na, kidie rhi te ọke yena, a je rhe bọn uwevwin vwọ kẹ odẹ ri Jihovaa. 3 Solomọn ji vwo ẹguọnọ rẹ Jihova womarẹ ọ vwọ yan nene irhi rẹ Devid ọsẹ rọyen vwọ kẹ, jokparẹ izobo ro zeri vwẹ asan ri kpenu na je nẹrhẹ ivwirhi rayen bru kpenu.

4 Ovie na de kpo Gibiọn re ze izobo vwẹ oboyin, kidie ọyen asan ro kpenu ro me titi.* Solomọn vwẹ eranvwe 1,000 vwo ze izobo rẹ ẹtorhẹ vwẹ enu rẹ agbada na. 5 Vwẹ Gibiọn Jihova da vwomaphia kẹ Solomọn vwẹ evwerhẹn vwẹ ason, Ọghẹnẹ da vuẹ nẹ: “Nokpẹn rẹ oborẹ wọ guọnọre nẹ me vwọ kẹ wẹ.” 6 Ọtiọyena Solomọn da tanẹ: “Wo dje ẹguọnọ ro jẹ rhẹriẹ rode kẹ odibo wẹn Devid ọsẹ mẹ, rọ vwọ fuevun yan nene uwe vwẹ ophiọnphiọn vẹ ubiudu ọsoso. Wo ji dje ẹguọnọ ro jẹ rhẹriẹ rode nana kẹ rhi te ọke na, rẹ wọ vwọ kẹ ọmọshare ro chidia ekete rọyen. 7 Asaọkiephana Jihova Ọghẹnẹ mẹ, wọ vwẹ odibo wẹn vwo mu ovie vwẹ ẹdia rẹ Devid ọsẹ mẹ, dede nẹ mẹvwẹ eghene,* me je rhe tẹn ona rẹ isuesuun.* 8 Odibo wẹn hẹ usun rẹ ihwo wẹn ru wọ jẹreyọ, ihwo ri bunru mamọ te ẹdia rẹ e che se kere ayeen. 9 Ọtiọyena kẹ odibo wẹn ubiudu ro nyẹme ro vwo guẹdjọ rẹ ihwo wẹn, rọ vwọ riẹn obo ri yovwirin vẹ obo re brare kidie ono yen se guẹdjọ rẹ ihwo wẹn nana re pha buebun* na?”

10 Oma vwerhen Jihova nẹ Solomọn yare oyare nana. 11 Ọghẹnẹ da ta kẹ nẹ: “Kidie nẹ wọ yare ọnana wọ rha yare otọnvwe* yẹrẹ efe yẹrẹ ughwu* rẹ ivwighrẹn wẹẹn, ẹkẹvuọvo wọ yare ẹruọ ru wo se vwo brorhiẹn rẹ ẹdjọ, 12 mi che ru oborẹ wọ yare na. Me cha kẹ wẹ aghwanre vẹ ẹruọ,* rere kirobo ra je rhe mrẹ ohwo rọ họhọ owẹ jovwoo na, a je cha mrẹ ohwo rọ họhọ owẹ ọfaa. 13 Vwọba, oborẹ wọ nokpẹn rọyeen me cha vwọ kẹ wẹ, te efe te urinrin rere ovie ọfa rọ họhọ owẹ vwo jẹ ẹdia vwẹ uchọke ru wọ diarọ te.* 14 Wọ da yan vwẹ idjerhe mẹ womarẹ ẹyọnrọn rẹ irhi vẹ iji mẹ kirobo rẹ Devid ọsẹ wẹn yanre, me je cha kẹ wẹ otọnvwe.”*

15 Ọke rẹ Solomọn vwọ rhọvwọn, ọ da rhe mrẹvughe nẹ evwerhẹn yen ọyen hepha. O de kpo Jerusalẹm, o de mudia obaro rẹ ekpeti rẹ ọphọ ri Jihova, o de ze izobo rẹ ẹtorhẹ kugbe izobo rẹ ọrekugbe, o de chere udemu kẹ idibo rọyen eje.

16 Vwẹ ọke yena, igberadja ivẹ de bru ovie na rhe, ayen de mudia obaro rọyen. 17 Aye rẹsosuọ na da tanẹ: “Biko ọrovwovwe, mẹ vẹ aye nana dia uwevwin ọvo, mi de vwiẹ rọ vwọ hẹ uwevwin na. 18 Vwẹ ẹdẹ rerha ri mi vwo vwiẹ nu, aye nana de ji vwiẹ. Avwanre ihwo ivẹ ọvo yehẹ evunrẹ uwevwin na; ohwo ọfa hẹ uwevwin naa. 19 Vwẹ ason, ọmọ rẹ aye nana de ghwu kidie o sherhẹn nyẹ. 20 Ọtiọyena o de vrẹn vwẹ uherevie ason na, o de mu ọmọ mẹ nẹ ẹbẹre mẹ ọke rẹ odibo wẹn ọmọtẹ vwọ vwerhẹn, o de muo phiyọ ẹbẹre rọyen,* o de mu ọmọ rọyen ro ghwuru na phiyọ ẹbẹre mẹ. 21 Ọke ri mi vwo vrẹn vwẹ urhiọke rere me vwẹ evie kẹ ọmọ mẹ, me da mrẹ nẹ o ghwuru. Ọtiọyena me da nabọ fuẹrẹn vwẹ urhiọke na, me da mrẹ nẹ ọ dia ọmọ mẹ ri mi vwiẹre naa.” 22 Ẹkẹvuọvo aye ro chekọ na da tanẹ: “Ẹjo, ọmọ mẹ yen ọ rọhẹ akpọ na, ọmọ wẹn yen ọ ro ghwuru na!” Jẹ aye rẹsosuọ na rha ta: “Ẹjo, ọmọ wẹn yen ọ ro ghwuru na, ọmọ mẹ yen ọ rọhẹ akpọ na.” Ọtiọyen kọyen ayen phraphro vwẹ obaro rẹ ovie na.

23 Ukuotọ rọyen, ovie na da ta: “Aye nana tanẹ, ‘Ọnana ọmọ mẹ, ọ rọhẹ akpọ na, ọmọ wẹn yen ọ ro ghwuru na!’ aye ro chekọ tanẹ, ‘Ẹjo, ọmọ wẹn yen ọ ro ghwuru na, ọmọ mẹ yen ọ rọhẹ akpọ na!’” 24 Ovie na da tanẹ: “Ovwan kẹ vwẹ ọlọkọ.” Ọtiọyena a da vwẹ ọlọkọ kẹ ovie na. 25 Ovie na da tanẹ: “Ghare ọmọ rọhẹ akpọ na kpo ẹkẹn ivẹ, wọ vwẹ ẹbẹre ọvo kẹ aye ọvo, wọ rha vwẹ ẹbẹre ro chekọ vwọ kẹ aye ro chekọ.” 26 Siẹvuọvo na, aye ro vwo ọmọ rọhẹ akpọ na da rẹ ovie na, kidie ọ re ehrọre rẹ ọmọ rọyen na. Ọ da ta: “Biko ọrovwovwe! Mu ọmọ rọhẹ akpọ na vwọ kẹ! Wọ teyọn hwee!” Jẹ aye ro chekọ na rha tanẹ: “Ọ cha dia ọmẹẹ, ọ je cha dia ọwẹẹn! E jẹ ayen gharọ ẹkẹn ivẹ!” 27 Ọtiọyena ovie na da tanẹ: “Mu ọmọ rọhẹ akpọ na vwọ kẹ aye rẹsosuọ na! Wọ teyọn hwee, kidie ọyen yen oni rọyen.”

28 Ọtiọyena Izrẹl eje de nyo kpahen orhiẹn rẹ ovie na bruru na, oborẹ ovie na ruru na de gbe ayen unu,* kidie ayen mrẹrẹ nẹ aghwanre rẹ Ọghẹnẹ rhere ro vwo brorhiẹn ọsoso.

4 Ovie Solomọn sunru vwẹ enu rẹ Izrẹl ejobi. 2 Enana yen ihwo rehẹ ẹdia ri kpenu* vwẹ usuon rọyen: Azaraya ọmọ ri Zedọk yen orherẹn; 3 Ẹlihorẹf kugbe Ahaijah emọ ri Shaisha yen isiẹbe; Jẹhoshafat ọmọ rẹ Ahailọd yen siẹ obo re phiare vwẹ otọ na phiyotọ; 4 Bẹnaya ọmọ ri Jehoyada yen vwẹrote otuofovwin na; Zedọk kugbe Abayata irherẹn; 5 Azaraya ọmọ ri Netan yen vwẹrote isun na; Zebọd ọmọ ri Netan orherẹn kugbe ugbeyan rẹ ovie na; 6 Ahaisha yen vwẹrote evwruwevwin na; Adonairam ọmọ rẹ Abda yen vwẹrote ihwo rẹ ovie jurhi kẹ nẹ e wian kẹ ọyen.

7 Solomọn vwo isun 12 re vwẹrote Izrẹl eje ri muẹ emu vwo rhe ovie vẹ evwruwevwin rọyen. Ayen ohwo ọvuọvo vwo oghwa ro vwo mu emu rhe vwẹ emeranvwe ọvo vwẹ ẹgbukpe. 8 Enana yen edẹ rayen: Ọmọ ri Họr yen vwẹrote ekogho rẹ igbenu rẹ Ifrem; 9 ọmọ ri Dika yen vwẹrote Mekaz, Shealbim, Bẹt-shimẹsh, kugbe Ilọn-bẹt-henan; 10 ọmọ ri Hisẹd yen vwẹrote Arọbọt (ọyen vwẹrote Sokoh kugbe otọ ri Hifa ejobi); 11 ọmọ rẹ Abinadab yen vwẹrote eghwrọrọ ri Dọ eje (Tefat ọmọtẹ ri Solomọn da rhe dia aye rọyen); 12 Beana ọmọ rẹ Ahailọd yen vwẹrote Teanak, Mẹgido, kugbe Bẹt-shian eje, rọ kẹrẹ Zaretan vwẹ obotọ ri Jẹzriẹl, vwo nẹ Bẹt-shian kpo Ebẹl-mẹhola re te ekogho ri Jọkmiam; 13 ọmọ ri Gibar yen vwẹrote Remọt-giliẹd (ọyen vwẹrote eko ri Jeẹ ọmọ ri Manasẹ, rehẹ Giliẹd; ọyen je vwẹrote ekogho rẹ Agọb rọhẹ Beshan; irere ride 60 ri vwo igbẹhẹ kugbe ekpọ rẹ ẹrovwo); 14 Ahinadab ọmọ rẹ Ido yen vwẹrote Mehaneim; 15 Ahimahaz yen vwẹrote ekogho rẹ uvwiẹ ri Naftalai (ọ reyọ Basimat, ọmọtẹ ri Solomọn ọfa kerẹ aye); 16 Beana ọmọ ri Hushai yen vwẹrote ekogho rẹ uvwiẹ rẹ Asha vẹ Bielọt; 17 Jẹhoshafat ọmọ ri Parua yen vwẹrote ekogho rẹ uvwiẹ rẹ Isaka; 18 Shimiai ọmọ rẹ Ila yen vwẹrote ekogho rẹ uvwiẹ ri Bẹnjamin; 19 Gibar ọmọ rẹ Yurai yen vwẹrote otọ ri Giliẹd, otọ ri Saihọn rẹ ovie rẹ ihwo rẹ Amọ kugbe ọ rẹ Ọg rẹ ovie ri Beshan. O ji vwo osun ọvo rọ vwẹrote isun ri chekọ na eje vwẹ otọ na.

20 Juda vẹ Izrẹl pha buebun kerẹ ehavwo rehẹ orhoma rẹ abadi; ayen ria, da, je ghọghọ.

21 Solomọn sunru vwẹ enu rẹ ivie na eje vwo nẹ Urhie na* kpo otọ rẹ ihwo ri Filistia rhirin re te ughwru rẹ Ijipt. Ayen jẹ arhọghọ kẹ Solomọn je ga vwẹ ẹdẹ rẹ akpọ rọyen eje.

22 Emuọre ri Solomọn kẹdi kẹdẹ yen ovwanvwọ rẹ ikọ* 30 rẹ omamọ rẹ iflawa kugbe ovwanvwọ rẹ ikọ 60 rẹ iflawa, 23 erhuẹn re pha tubie tubie 10, erhuẹn re mu nẹ asan rẹ ayen da ria odin rhe 20, kugbe igodẹ 100, oka rẹ erhua sansan kugbe ephran ra nabọ ghẹre kugbee. 24 Kidie ọyen yen suẹn erọnvwọn eje rehẹ obonẹ rẹ Urhie na,* vwo nẹ Tifsa re te Gaza, ji te ivie na eje rehẹ ẹbẹre nana rẹ Urhie na; o vwo ufuoma vwẹ ekogho na eje re riarierẹ phiyọ. 25 Juda kugbe Izrẹl diarọ vwẹ ofuvwegbe, dohwo dotọ rẹ ivaini rọyen kugbe otọ rẹ urhe rẹ ifigi rọyen de chidia, vwo nẹ Dan re te Biẹ-shiba vwẹ ẹdẹ ri Solomọn eje.

26 Solomọn vwo asan 4,000* re muẹ iyesi re churu ekpẹrẹ rọyen siẹ phiyọ kugbe iyesi* 12,000.

27 Isun nana muẹ emuọre vwo rhe Ovie Solomọn kugbe kohwo kohwo rọ riemu vwẹ imẹjẹ rẹ Ovie Solomọn. Ayen ohwo ọvuọvo yen vwo oghwa rẹ emeranvwe ro tere, ọ me je mrẹ nẹ emu vuọvo kanre ovie naa. 28 Ayen ji mu ibali kugbe odin eyaya kpo kasan kasan ra da guọnọ vwọ kẹ iyesi kugbe iyesi re churu ekpẹrẹ siẹ na, ohwo ọvuọvo vwo nene uchunu ra guọnọ mie.

29 Ọghẹnẹ vwẹ aghwanre kugbe ẹruọ buebun vẹ ubiudu ọhẹhẹre* kerẹ ehavwo rọhẹ orhoma rẹ abadi kẹ Solomọn. 30 Aghwanre ri Solomọn nọ aghwanre rẹ ihwo rehẹ Ẹbẹre Ọnre Va Nẹcha eje kugbe aghwanre rẹ Ijipt eje. 31 Ọ ghwanre nọ kohwo kohwo ọfa, ọ ghwanre nọ Itan ohwo rẹ orua rẹ Ẹzrah kugbe Himan, Kalkọl, vẹ Dada emọ ri Mehọl; usi rọyen de nene ẹgborho na eje re riarierẹ phiyọ. 32 O bru* isẹ 3,000, ine rọyen ji bun te 1,005. 33 Ọ ta ota kpahen irhe, vwo nẹ isida vwẹ Lẹbanọn re te hisọp* rọ djẹ vwẹ enu rẹ igbẹhẹ; ọ ta ota kpahen eranvwe, ephran,* erọnvwọn ri kpono,* kugbe iyerin. 34 Ihwo ri nẹ ẹgborho na eje rhe da rhe rhi nyo aghwanre ri Solomọn, ji te ivie ri nẹ akpọ na eje rhe ri nyo kpahen aghwanre rọyen.

5 Ọke rẹ Hairam ovie ri Taya vwo nyo nẹ a jẹ Solomọn reyọ kerẹ ovie vwẹ ẹdia rẹ ọsẹ rọyen re, o de ji idibo rọyen bru Solomọn ra, kidie ọkieje yen Hairam vẹ Devid vwọ dia ugbeyan.* 2 Solomọn da rha vwẹ ovuẹ vwo rhe Hairam nẹ: 3 “Wọ nabọ riẹn nẹ ọsẹ mẹ Devid sa bọn uwevwin kẹ odẹ ri Jihova Ọghẹnẹ rọyeen, fikirẹ ifovwin re nenire phi vwẹ kẹbẹre kẹbẹre rhirin re te ọke rẹ Jihova vwo phi ivwighrẹn rọyen phiyọ obotọ rẹ awọ rọyen. 4 Ẹkẹvuọvo asaọkiephana Jihova Ọghẹnẹ mẹ kẹ vwẹ urovwoma vwẹ kẹbẹre kẹbẹre eje. O vwo ohwo vuọvo rọ vwọsua ovwẹẹ, emu ọbrabra vuọvo je phiaa. 5 Ọtiọyena mi vwo ẹwẹn me vwọ bọn uwevwin ọvo kẹ odẹ ri Jihova Ọghẹnẹ mẹ, kirobo rẹ Jihova ve kẹ Devid ọsẹ mẹ nẹ: ‘Ọmọ wẹn ri mi che vwo chidia ekete wẹn vwẹ ẹdia wẹn, ọyen ohwo rọ cha bọn uwevwin kẹ odẹ mẹ.’ 6 Asaọkiephana vwẹ iji kẹ ihwo wẹn nẹ ayen bru isida ri Lẹbanọn she kẹ vwẹ. Idibo mẹ che nene idibo wẹn wian, me cha hwosa kẹ idibo wẹn vwo nene uchunu rẹ igho ru wo bruru, kidie wọ riẹnre nẹ o vwo ohwo vuọvo vwẹ usun rẹ avwanre rọ riẹn obo re brẹ irhe kerẹ ihwo ri Saidọnii.”

7 Ọke rẹ Hairam vwo nyo eta ri Solomọn na, ọ da ghọghọ gangan, ọ da tanẹ: “E jẹ ujiri dia kẹ Jihova nonẹna, kidie ọ vwẹ ọmọ ro vwo aghwanre vwọ kẹ Devid nẹ o sun vwẹ enu rẹ ihwo nana re pha buebun na!” 8 Ọtiọyena Hairam da vwẹ ovuẹ rhe Solomọn nẹ: “Mi nyo ovuẹ ru wo vwo rhe vwe. Mi che ru erọnvwọn eje ru wọ guọnọre me vwọ vwẹ igedu rẹ isida vẹ junipa na vwo rhe we. 9 Idibo mẹ che mu ayen nẹ Lẹbanọn kpo abadi na, me cha gba ayen si ohwohwo rere e bi ayen wan abadi na kpo asan ru wo dje kẹ vwẹ. Me cha tanẹ a bẹrẹ ayen vwẹ etiyin rere wo se vwo mu ayen yanran. Wọ me rha vwẹ emuọre re me nokpẹn rọyen kẹ evwruwevwin mẹ vwọ hwosa kẹ vwẹ.”

10 Ọtiọyena Hairam de mu igedu rẹ isida vẹ junipa rẹ Solomọn guọnọre eje vwo rhe. 11 Solomọn da rha vwẹ ovwanvwọ rẹ ikọ* 20,000 rẹ iwiti vwọ kẹ Hairam kerẹ emuọre vwọ kẹ evwruwevwin rọyen kugbe ovwanvwọ rẹ ikọ 20 rẹ omamọ rẹ evwri rẹ oliv. Ọyena yen oborẹ Solomọn vwọ kẹ Hairam kukpe kukpe. 12 Jihova vwẹ aghwanre kẹ Solomọn kirobo ro ve vwọ kẹ. Ufuoma da rhe dia vwẹ uvwre rẹ Hairam vẹ Solomọn, ayen ihwo ivẹ na da re ọphọ.*

13 Ovie Solomọn de se eshare vwo nẹ Izrẹl eje rhe nẹ e rhe wian kẹ ọyen; eshare 30,000 yen o seri. 14 Ko jẹ ihwo 10,000 kpo Lẹbanọn re wene ihwo rehẹ oboyin kemeranvwe kemeranvwe. Ayen ghwọrọ emeranvwe ọvo vwẹ Lẹbanọn, ayen me rha ghwọrọ emeranvwe ivẹ vwẹ uwevwin rayen; Adonairam yen suẹn ihwo re jurhi kẹ nẹ i ruiruo na. 15 Solomọn vwo ewiowian 70,000 re dia ewenaa* kugbe 80,000 ri brẹ ikuta vwẹ enu rẹ igbenu na, 16 ọtiọyen ji te isun ri Solomọn 3,300 re ga kerẹ iniruo re vwẹrote ewiowian na. 17 Vwo nene iji rẹ ovie na, ayen de kporon ikuta ride, ikuta eghanghanre, rere ayen reyọ ikuta ra nabọ kare vwo ru uchivwo rẹ uwevwin na. 18 Ọtiọyena ihwo re bọn uwevwin ri Solomọn kugbe ihwo re bọn uwevwin rẹ Hairam kugbe ihwo ri Gibal de bru ikuta na, ayen de ji muegbe rẹ igedu kugbe ikuta ra cha vwọ bọn uwevwin na.

6 Vwẹ ukpe 480 rẹ ihwo rẹ Izrẹl* vwo vrẹn nẹ otọ rẹ Ijipt nu, vwẹ ukpe rẹne rẹ Solomọn vwọ dia ovie vwẹ enu rẹ Izrẹl, vwẹ emeranvwe ri Ziv,* (kọyen emeranvwe rivẹ), ọ da tuẹn ẹbọn rẹ uwevwin ri Jihova na* phiyọ. 2 Uwevwin rẹ Ovie Solomọn bọn kẹ Jihova na da dia kubit* 60 vwẹ ugrongron, kubit 20 vwẹ ohẹhẹre, o de rhe kpenu te kubit 30. 3 Umubruwevwin rọhẹ obaro rẹ uwevwin rẹ ẹga na* gron* te kubit 20, ọ vẹ ohẹhẹre rẹ uwevwin na abavo. A da vwanvwọ vwo nẹ obaro rẹ uwevwin na rhe, kubit ihwe.

4 O bru evakpo rẹ obotafe rayen hẹre nọ obevun* rayen phiyọ uwevwin na. 5 Vwọba, ọ bọn igbẹhẹ vwo vi igbẹhẹ rẹ uwevwin na; igbẹhẹ na riariẹ igbẹhẹ rẹ uwevwin na, igbẹhẹ rẹ uwevwin rẹ ẹga na* kugbe uvun rẹ obevun na phiyọ, ọ da bọn ivun phiyọ riariẹ. 6 Ọ rọ ka obotọ eje vwẹ ivun rọ bọn phiyọ ọkọkọ rẹ uwevwin na da dia kubit iyorin vwẹ ohẹhẹre, ọ rọhẹ uherevie na kubit esan vwẹ ohẹhẹre, ọrerha na ke rha kubit ighwrẹn vwẹ ohẹhẹre, kidie ọ bọn asan re de rovwoma riariẹ uwevwin na, a vwẹ orọnvwọn ọfa vwọ ba igbẹhẹ rẹ uwevwin naa.

7 Ikuta re kporonri ra je nabọ kare nure yen a vwọ bọn uwevwin na, ọtiọyena e rhe nyo edo rẹ ihama, ishurhe, yẹrẹ koka koka rẹ orọnvwọn ra vwẹ utehru ru vwẹ uwevwin na vwẹ ọke ra vwọ bọọn. 8 Anurhoro ra wan rua uvun rọ ka obotọ eje na hẹ obọrhen ọnre rẹ uwevwin na, o vwo asan ra wan yerẹn kpo uvun rọhẹ uherevie na, kugbe vwo nẹ uvun rẹ uherevie na vwo kpo ọrerha na. 9 Kọ bọn uwevwin na rhi te ọke rọ vwọ bọn re, ọ da vwẹ irhe rẹ isida kugbe ephapha rẹ isida vwọ kanre uwevwin na. 10 Ọ bọn ivun riariẹ uwevwin na, ọvuọvo rayen kpenu te kubit iyorin, igedu rẹ isida ọyen ọ vwọ bọn ayen tamu uwevwin na.

11 Vwẹ uvwre rẹ ọke nana, ota ri Jihova de bru Solomọn rhe nẹ: 12 “Vwọ kpahen uwevwin nana ru wọ bọn na, wọ da yọnrọn irhi mẹ, ru nene orhiẹn-ebro mẹ, je yọnrọn iji mẹ eje ru wọ da yan vwẹ evun rayen, ki mi ji che ru ive mẹ ri mi ve kẹ Devid ọsẹ wẹn gba kẹ wẹ, 13 ke me cha dia ohri rẹ ihwo rẹ Izrẹl, me je cha sen ihwo mẹ Izrẹẹl.”

14 Solomọn da bọn uwevwin na rhi te ọke rọ vwọ bọn re. 15 Ọ da vwẹ ephapha rẹ isida vwọ phare* igbẹhẹ rẹ obevun rẹ uwevwin na. Ọ vwẹ igedu vwọ hwa igbẹhẹ rẹ obevun na vwo nẹ otọ rẹ uwevwin na re te isilin na, ọ da je vwẹ ephapha ri junipa vwọ hwa otọ rẹ uwevwin na. 16 Ọ da vwẹ ephapha rẹ isida vwọ bọn uvun ọvo rọ rho te kubit 20 vwẹ oboba rẹ uwevwin na vwo nẹ otọ re te isilin na, uvun nana yen uvun rẹ obevun na, Asan rọ Ma Fon na. 17 Uwevwin rẹ ẹga na*—ẹbẹre rẹ obaro rẹ uwevwin na—kubit 40. 18 A kare ememamọ re pha ghorien ghorien kugbe idodo ri rhiephiyọ phiyọ isida rehẹ obevun rẹ uwevwin na. Ejobi isida; a mrẹ ukuta vuọvoo.

19 Ọ da rhuẹrẹ uvun rẹ obevun rẹ uwevwin na rere o mu ekpeti rẹ ọphọ ri Jihova na phiyọ. 20 Uvun rẹ obevun na kubit 20 vwẹ ugrongron, kubit 20 vwẹ ohẹhẹre, o de rhe kpenu te kubit 20; ọ da vwẹ uvi rẹ oro vwọ pharọ; ọ da vwẹ isida vwọ hwa agbada na. 21 Solomọn da vwẹ uvi rẹ oro vwọ phare obevun rẹ uwevwin na, o de si ejọnrọn rẹ oro nene obaro rẹ uvun rọhẹ obevun ra vwẹ oro vwọ phare na. 22 Ọ vwẹ oro vwọ phare uwevwin na eje re te ọke ra vwọ bọn uwevwin na eje re; ọ je vwẹ oro vwọ phare agbada na eje rọ kẹrẹ uvun rẹ obevun na.

23 O vwẹ urhe rẹ ipaini* vwo ru chẹrub ivẹ phiyọ uvun rọhẹ obevun na, ọvuọvo rayen kpenu te kubit ihwe. 24 Ibekpe ọvo ri chẹrub na gron te kubit iyorin, ibekpe ro chekọ ke rha kubit iyorin. Vwo nẹ ẹroro rẹ ibekpe ọvo re te ẹroro rẹ ibekpe ro chekọ, kubit ihwe. 25 Chẹrub rivẹ na jẹ kubit ihwe. Ọrho ri chẹrub ivẹ na vẹ obo re ru ayen wan ọvuọvo. 26 Ugrongron ri chẹrub ọvo kubit ihwe, ọtiọyen ji te chẹrub ro chekọ na. 27 Ọtiọyena o de mu chẹrub na phiyọ uvun rẹ obevun na.* Ibekpe ri chẹrub na hẹre te ẹdia rẹ ibekpe ri chẹrub ọvo de te igbẹhẹ ọvo, ibekpe ri chẹrub ro chekọ de rhe te igbẹhẹ ro chekọ, ibekpe rayen hẹre te uherevie rẹ uwevwin na te ẹdia rẹ ibekpe na ki te ohwohwo. 28 Ọ vwẹ oro vwọ phare chẹrub na.

29 Ọ kare ihoho ri chẹrub, iriẹ, kugbe idodo ri rhiephiyọ nene igbẹhẹ rẹ uwevwin na eje ji te igbẹhẹ rẹ uvun rẹ obevun vẹ uvun rẹsosuọ na. 30 Ọ vwẹ oro vwọ hwa otọ rẹ uvun rẹ obevun vẹ uvun rẹsosuọ na. 31 Ọ vwẹ urhe rẹ ipaini vwo ru ẹchẹ, ichivwo, kugbe edovi phiyọ anurhoro ra wan rua uvun rẹ obevun na, kerẹ ẹbẹre riyorin.* 32 Irhe rẹ ipaini yen e vwo ru ẹchẹ ivẹ na, ọ da kare chẹrub, iriẹ, kugbe idodo ri rhiephiyọ phiyọ ayen, ọ da vwẹ oro vwọ phare ayen; ọ da reyọ ihama vwọ teyen oro na mu oma rẹ chẹrub na vẹ iriẹ na. 33 Ọtiọyen yen ọ vwẹ urhe rẹ ipaini vwo ru edovi rẹ anurhoro ra wan rua uwevwin rẹ ẹga na,* rọ dia ẹbẹre rẹne.* 34 Ọ vwẹ urhe ri junipa vwo ru ẹchẹ ivẹ. Ẹchẹ ọvo vwo ẹbẹre ivẹ ri kpirhẹn ri rhie kpenẹ kpenẹ, ẹchẹ ro chekọ na ji vwo ẹbẹre ivẹ ri kpirhẹn ri ji rhie kpenẹ kpenẹ. 35 Ọ kare chẹrub, iriẹ, kugbe idodo ri rhiephiyọ phiyọ, ọ da vwẹ oro vwọ phare ayen.

36 Ọ vwẹ ikuta re bruru re mu kpahen ohwohwo asakuerha* vwọ bọn igbẹhẹ rẹ otegodo rẹ obevun na, ọ da rha vwẹ irhe rẹ isida vwọ hwa enu rọyen.

37 Vwẹ ukpe 4, vwẹ emeranvwe ri Ziv,* a da vwẹ uchivwo rẹ uwevwin ri Jihova vwo vi; 38 vwẹ ukpe 11, vwẹ emeranvwe ri Bul* (kọyen emeranvwe rẹrenren), a da bọn uwevwin na re vwo nene idjedje rọyen eje kugbe obo re muegbe rọyen. Ọtiọyena ẹgbukpe ighwrẹn yen ọ ghwọrọre vwọ bọn.

7 Ọ reyọ Solomọn ẹgbukpe 13 vwọ bọn uwevwin* robọ rọyen, bẹsiẹ rọ vwọ bọn ọsoso rẹ uwevwin rọyen na re.

2 Ọ bọn Uwevwin rẹ Egbo ri Lẹbanọn na phiyọ enu rẹ ichivwo rẹ isida ẹne, ugrongron rọyen kubit* 100, ohẹhẹre rọyen kubit 50, o de rhe kpenu te kubit 30; irhe rẹ isida hẹ enu rẹ ichivwo na. 3 A vwẹ irhe rẹ isida vwọ hwa enu rẹ irhe re mu kpahen ichivwo na; ayen eje 45, 15 yehẹ urhiẹ ọvuọvo. 4 Irhiẹ erha rẹ evakpo ra ghwẹ ifremu phiyọ herọ, ovakpo ọvuọvo hirharoku ovakpo ọfa vwẹ irhiẹ erha. 5 Anurhoro ra wan ruọ na eje kugbe edovi na vwo ifremu rẹ igogo ẹne rayen dia abavo, kirobo rẹ obaro rẹ evakpo ri hirharoku ohwohwo vwẹ irhiẹ erha na je hepha.

6 Ọ bọn Ọguan* rẹ Ichivwo na, o gron te kubit 50, ọ je hẹre te kubit 30, umubruwevwin ọvo hẹ obaro rọyen kugbe ichivwo vẹ urhurho vwẹ enu rayen.

7 Ọ je bọn Ọguan* rẹ Ekete na, asan ro de che guẹdjọ—Ọguan rẹ Ẹdjọeguo—a vwẹ irhe rẹ isida vwọ hwa nẹ otọ re te isilin.

8 Ọ bọn uwevwin* rọ cha dia vwẹ egodo ro chekọ na phiyọ obuko rẹ Ọguan na,* ọguan na vẹ uwevwin na họhọre. Solomọn je bọn uwevwin rọ họhọ Ọguan nana kẹ ọmọtẹ ri Fero ro vwo ru aye na.

9 Ikuta eghanghanre ra kare vwo nene ovwanvwọ rayen ra vwẹ isara rẹ ikuta vwo bru, te obevun te otafe rayen, yen a vwọ bọn enana eje vwo nẹ uchivwo na re te enu rọyen kugbe otafe na rhirin re te otegodo rode na. 10 Ikuta eghanghanre re pha rhuarho yen e vwo ru uchivwo na; ikuta evo rho te kubit ihwe, efa ke rha kubit ẹrenren. 11 Ikuta re pha ghanghanre re bruru nene ovwanvwọ rayen hẹ enu rayen, ọtiọyen ji te irhe rẹ isida. 12 Igbẹhẹ rẹ ikuta re bruru re mu kpahen ohwohwo asakuerha* riariẹ otegodo rode na phiyọ kugbe irhe rẹ isida ra vwọ hwa enu rọyen, kerẹ ọ rẹ otegodo rẹ obevun rẹ uwevwin ri Jihova kugbe umubruwevwin ra wan rua uwevwin na.

13 Ovie Solomọn da vwẹ ovuẹ vwo rhe Hairam vwẹ Taya, Hairam de bro rhe. 14 Hairam ọyen ọmọ rẹ ayeuku ro nẹ uvwiẹ ri Naftalai rhe, ọsẹ ri Hairam ohwo ri Taya, odjogun yen o ruẹ; ọwena rode, o vwo ẹruọ, ọ je tẹn ona rẹ koka koka rẹ iruo rẹ ẹrovwo* eje. Ọtiọyena o de bru Ovie Solomọn rhe, o de ruiruo rọyen eje.

15 O ru ichivwo rẹ ẹrovwo ivẹ; uchivwo ọvuọvo kpenu te kubit 18, ufi rẹ ovwanvwọ ro gron te kubit 12 yen se kin ọvuọvo rẹ ichivwo na riariẹ.* 16 Ọ da wran ẹrovwo vwo ku iyovwin ivẹ re che mu phiyọ enu rẹ ichivwo na. Uyovwin ọvo kpenu te kubit iyorin, uyovwin ro chekọ ji kpenu te kubit iyorin. 17 E bru ona rẹ orọnvwọn rọ họhọ ariri ra vwẹ ejọnrọn ru phiyọ uyovwin rọhẹ enu rẹ uchivwo ọvuọvo; uyovwin ọvo vwo ighwrẹn, uyovwin ro chekọ de rhe vwo ighwrẹn. 18 O ru irhiẹ ivẹ rẹ ipọmigranẹti riariẹ orọnvwọn rọ họhọ ariri na rere i rhurhu iyovwin rehẹ enu rẹ ichivwo na; orọnvwọn vuọvo na yen o ru phiyọ iyovwin ivẹ na. 19 E bru ona rẹ idodo rẹ ilili ri kpenu te kubit ẹne phiyọ iyovwin rehẹ enu rẹ ichivwo re kẹrẹ umubruwevwin ra wan rua uwevwin na. 20 Iyovwin na hẹ enu rẹ ichivwo ivẹ na, ayen ghwa hẹ obenu rẹ asan rọ pha ghorien ghorien rọ tamu orọnvwọn rọ họhọ ariri na; a vwẹ ipọmigranẹti 200 vwọ tẹnrẹn irhiẹ riariẹ uyovwin ọvuọvo phiyọ.

21 Ọ vwẹ ichivwo rẹ umubruwevwin ra wan rua uwevwin rẹ ẹga na* vwo vi. Ọ vwẹ uchivwo rẹ obọrhen* na vwo vi, o de se Jekin,* ọ da rha vwẹ uchivwo rẹ obohwẹre* na vwo vi, o de se Boaz.* 22 E bru ona rẹ idodo rẹ ilili phiyọ enu rẹ ichivwo na. Ọtiọyena owian rẹ ichivwo na de re.

23 Ọyena vwọ wan nu, ọ da vwẹ ẹrovwo vwo ru Abadi* na. Ọ pha ghorien ghorien, okinriariẹ rẹ unu rọyen kubit 10, o ji kpenu te kubit 5, ufi rẹ ovwanvwọ ro gron te kubit 30 yen se kion riariẹ. 24 Ememamọ re pha ghorien ghorien ra vwọ rhuẹrẹ asan fia hẹ obotọ rẹ unu rọyen, e riarierẹ phiyọ, ihwe yehẹ kubit ọvuọvo riariẹ Abadi na phiyọ, vẹ irhiẹ ivẹ rẹ ememamọ re pha ghorien ghorien na re ruru vẹ ọyen kugbe. 25 Ọ hẹ enu rẹ erhuẹn 12, 3 hirharoku obohwẹre ọnre, 3 hirharoku ẹbẹre ọnre shera, 3 hirharoku obọrhen ọnre, 3 de rhe hirharoku ẹbẹre ọnre va nẹcha; e de mu Abadi na kpahen enu rayen, eje chukoku uherevie na. 26 Ọkpan rọyen te omarẹ inshisi erha;* e ru unu rọyen kerẹ unu rẹ uko, kerẹ ododo rẹ ilili. Ovwanvwọ rẹ ibati* 2,000 sa ruọ.

27 Ọyena vwọ wan nu, ọ da vwẹ ẹrovwo vwo ru erọnvwọn re vwo muẹ eghwa* ihwe. Ọvuọvo rayen gron te kubit ẹne, ohẹhẹre rayen kubit ẹne, i ji kpenu te kubit erha. 28 Enẹ yen e ru erọnvwọn re vwo muẹ eghwa na: ayen vwo erọnvwọn re họhọ itaizi vwẹ ọkọkọ rayen, erọnvwọn re họhọ itaizi rehẹ ọkọkọ rayen na hẹ uvwre rẹ ekpọ rẹ ẹrovwo na. 29 Ikpohrokpo, erhuẹn, kugbe chẹrub hẹ oma rẹ erọnvwọn re họhọ itaizi rehẹ ọkọkọ na vwẹ uvwre rẹ ekpọ rẹ ẹrovwo na. Oka rẹ ona vuọvo na yen e ji bru phiyọ obenu rẹ ekpọ rẹ ẹrovwo na. Erọnvwọn ra vwọ rhuẹrẹ asan ri churu si ohwohwo hẹ obenu vẹ obotọ rẹ ikpohrokpo vẹ erhuẹn na. 30 Ọvuọvo rẹ erọnvwọn re vwo muẹ eghwa na vwo idjugẹn rẹ ẹrovwo ẹne kugbe ekpọ rẹ ẹrovwo ivẹ ra chọrọ idjugẹn na phiyọ, ọkọkọ ẹne na yen yọnrọn ayen. Erọnvwọn re yọnrọn ayen na hẹ obotọ rẹ oze na, e ku ọvuọvo rayen vẹ erọnvwọn ra vwọ rhuẹrẹ asan ri churu si ohwohwo vwẹ oma rayen. 31 Unu rọyen hẹ evunrẹ orọnvwọn rọ họhọ erhu rẹ ovie na, ọ vwẹ kubit ọvo vwo gron kpenu; unu rọyen na kinriariẹ, nẹ otọ re te enu rọyen gron te kubit ọvo gbubro, e ji bru ona sansan phiyọ unu rọyen na. Igogo ẹne rẹ erọnvwọn re họhọ itaizi rehẹ ọkọkọ rayen na abavo, i kinriariẹẹ. 32 Idjugẹn ẹne na hẹ obotọ rẹ erọnvwọn re họhọ itaizi rehẹ ọkọkọ rọyen na, erọnvwọn re yọnrọn idjugẹn na, e ru ayen tamu orọnvwọn re vwo muẹ eghwa na. Adjugẹn ọvuọvo kpenu te kubit ọvo gbubro. 33 E ru idjugẹn na kerẹ idjugẹn rẹ akpẹrẹ. Erọnvwọn re yọnrọn ayen, irhimu, ispoku, kugbe ihọbu, ẹrovwo yen e vwo ku ayen eje. 34 O vwo erọnvwọn ẹne re yọnrọn igogo ẹne rẹ orọnvwọn re vwo muẹ eghwa na ọvuọvo; e ru erọnvwọn re yọnrọn na vẹ orọnvwọn re vwo muẹ eghwa na kugbe. 35 Orọnvwọn ọvo ro kinriariẹ ro kpenu te ubro ri kubit ọvo hẹ enu rẹ orọnvwọn re vwo muẹ eghwa na; enu rẹ orọnvwọn re vwo muẹ eghwa na, ifremu rọyen vẹ erọnvwọn re họhọ itaizi rehẹ ọkọkọ rọyen na, e ku ayen kugbe kerẹ orọnvwọn ọvo. 36 E bru ona rẹ ema ri chẹrub, ikpohrokpo, kugbe iriẹ phiyọ oma rẹ ifremu rọyen vẹ erọnvwọn re họhọ itaizi rehẹ ọkọkọ na, vwo nene uche asan ro rhiephiyọ vwẹ ọvuọvo, vẹ erọnvwọn ra vwọ rhuẹrẹ asan ri churu si ohwohwo re riarierẹ phiyọ. 37 Enẹ yen o ru erọnvwọn re vwo muẹ eghwa ihwe na; ona vuọvo yen o vwo ru ayen eje, ovwanvwọ kugbe obo re ru ayen wan ọvuọvo.

38 O ru ize rẹ ẹrovwo ihwe; ovwanvwọ rẹ ibati 40 sa ro ọvuọvo. Oze ọvuọvo rho te kubit ẹne.* Erọnvwọn re vwo muẹ eghwa ihwe na vwo oze ọvuọvo. 39 Ọyena vwọ wan nu, o de mu erọnvwọn re vwo muẹ eghwa na iyorin phiyọ ẹbẹre rẹ obọrhen rẹ uwevwin na, o de rhe mu iyorin phiyọ ẹbẹre rẹ obohwẹre rẹ uwevwin na, o de mu Abadi na phiyọ ẹbẹre rẹ obọrhen rẹ uwevwin na, vwẹ ẹbẹre ọnre va nẹcha.

40 Hairam de ji ru ize efa, isaboro, kugbe imize ikokodo.

Ọtiọyena Hairam de ruiruo eje ro ru kẹ Ovie Solomọn vwẹ uwevwin ri Jihova na re: 41 ichivwo ivẹ na, iyovwin re pha kerẹ omoze okokodo rehẹ enu rẹ ichivwo ivẹ na; erọnvwọn re họhọ ariri ivẹ na re vwo rhurhu iyovwin re pha kerẹ omoze okokodo ivẹ rehẹ enu rẹ ichivwo na; 42 ipọmigranẹti 400 vwọ kẹ erọnvwọn re họhọ ariri ivẹ na, irhiẹ ivẹ rẹ ipọmigranẹti vwọ kẹ orọnvwọn rọ họhọ ariri ọvuọvo, rere a vwẹ ayen rhurhu iyovwin re pha kerẹ imize ikokodo ivẹ rehẹ enu rẹ ichivwo ivẹ na; 43 erọnvwọn re vwo muẹ eghwa ihwe na vẹ ize ihwe rehẹ enu rẹ erọnvwọn re vwo muẹ eghwa na; 44 Abadi na kugbe erhuẹn 12 rehẹ obotọ rẹ Abadi na; 45 igogono na, isaboro na, imize ikokodo na, kugbe ekuakua na eje rẹ Hairam vwẹ ẹrovwo ro lo wrowro ru kẹ Ovie Solomọn vwọ kẹ uwevwin ri Jihova na. 46 Ovie na de ku ayen phiyọ erọnvwọn ra vwẹ ọphiẹn ma vwẹ ubrotọ ri Jọdan, vwẹ uvwre ri Sọkọt vẹ Zaretan.

47 Solomọn vwanvwe ekuakua naa kidie e pha buebun. A riẹn ọnyẹ rẹ ẹrovwo naa. 48 Solomọn ru ekuakua na eje vwọ kẹ uwevwin ri Jihova: agbada rẹ oro na; imẹjẹ rẹ oro re che mu ibrẹdi re vwo dje na phiyọ; 49 igburhukpẹ rẹ uvi rẹ oro na, iyorin vwẹ obọrhen iyorin vwẹ obohwẹre vwẹ obaro rẹ uvun rẹ obevun na; idodo na, irhukpẹ na, kugbe erọnvwọn ra vwọ yọnrọn iwiki na, oro yen e vwo ru ayen; 50 ize na, utijoro* re vwo brẹ iwiki na, imize ikokodo na, iko na, kugbe erọnvwọn ra wan erhanre phiyọ na, uvi rẹ oro yen e vwo ru ayen; inu re duvwun awọ rẹ ẹchẹ rẹ uwevwin rẹ obevun na phiyọ, kọyen Asan rọ Ma Fon na, kugbe ẹchẹ rẹ uwevwin rẹ ẹga na, oro yen e vwo ru ayen.

51 Ọtiọyen kọyen Ovie Solomọn ruiruo eje ro fori nẹ o ru vwẹ uwevwin ri Jihova re. Solomọn da ghwẹ erọnvwọn rẹ Devid ọsẹ rọyen ru fon rhe, o de phi idọnọ efuanfon na, iro na, kugbe ekuakua na phiyọ asan ra ghwẹ efe phiyọ vwẹ uwevwin ri Jihova na.

8 Vwẹ ọke yena, Solomọn de se ekpako rẹ Izrẹl, igbuyovwin rẹ ivwiẹ na eje, kugbe igbuyovwin rẹ iwevwin rẹ esẹ rẹ Izrẹl koko. Ayen bru Ovie Solomọn rhe vwẹ Jerusalẹm rere ayen mu ekpeti rẹ ọphọ ri Jihova na vwo nẹ Orere ri Devid rhe, kọyen Zayọn. 2 Eshare rẹ Izrẹl eje de siomakoko vwẹ obaro rẹ Ovie Solomọn vwẹ ọke rẹ orẹ na,* vwẹ emeranvwe rẹ Ẹtanim,* kọyen emeranvwe righwrẹn na. 3 Ọtiọyena ekpako rẹ Izrẹl eje da rhe, irherẹn na de mu Ekpeti rẹ Ọphọ na. 4 Ayen mu Ekpeti rẹ Ọphọ ri Jihova na, utughẹ ra da vwoma na, kugbe ekuakua efuanfon eje rehẹ utughẹ na rhe. Irherẹn na kugbe ihwo ri Livae na yen mu ayen rhe. 5 Ovie Solomọn kugbe ọghwẹgbe rẹ Izrẹl na eje re se koko bro rhe na hẹ obaro rẹ Ekpeti rẹ Ọphọ na. Ọtiọyena a da vwẹ igodẹ vẹ erhuẹn buebun re che se kerii vwo ze izobo.

6 Ọyena vwọ wan nu, irherẹn na de mu ekpeti rẹ ọphọ ri Jihova na phiyọ ẹdia rọyen, vwevunrẹ uvun rẹ obevun rẹ uwevwin na, Asan rọ Ma Fon na, vwẹ obotọ rẹ ibekpe ri chẹrub na.

7 Ọtiọyena ibekpe ri chẹrub na de rhurhu asan rẹ Ekpeti rẹ Ọphọ na hepha, chẹrub na de rhurhu Ekpeti rẹ Ọphọ na vẹ ekpọ rọyen. 8 Ekpọ na gron te ẹdia ra da mrẹ ẹroro rayen vwẹ Asan Ọfuanfon rọhẹ obaro rẹ uvun rẹ obevun na, ẹkẹvuọvo a dia otafe da mrẹ ayeen. Ayen jehẹ etiyin te ọke na. 9 Orọnvwọn vuọvo hẹ evunrẹ Ekpeti rẹ Ọphọ naa jokparẹ ephapha rẹ ukuta ivẹ rẹ Mosis phi phiyọ vwẹ Horẹb, ọke rẹ Jihova vẹ ihwo rẹ Izrẹl vwọ re ọphọ rẹ ayen vwo rhivwin nẹ otọ rẹ Ijipt cha.

10 Ọke rẹ irherẹn na vwo nẹ asan ọfuanfon na rhe, evwru da vọn uwevwin ri Jihova na. 11 Irherẹn na se mudia gbodiboo fikirẹ evwru na, kidie urinrin ri Jihova vọn uwevwin ri Jihova na. 12 Vwẹ ọke yena Solomọn da tanẹ: “Jihova tare nẹ ọyen cha dia evunrẹ ebri hwi. 13 Me bọn uwevwin ro kpenu kẹ wẹ re, asan ra rhuẹrẹ kẹ wẹ nẹ wọ dia bẹdẹ.”

14 Ọtiọyena ovie na de kuomarhẹriẹ, kọ nẹrhovwo kẹ ọghwẹgbe rẹ Izrẹl eje, jẹ ọghwẹgbe rẹ Izrẹl eje mudia. 15 Ọ da ta: “E jẹ ujiri dia kẹ Jihova Ọghẹnẹ rẹ Izrẹl, ohwo rọ vwẹ unu rọyen ve ive kẹ ọsẹ mẹ Devid, rọ je vwẹ obọ rọyen ru ayen gba rọ vwọ tanẹ, 16 ‘Vwo nẹ ẹdẹ re me reyọ ihwo mẹ Izrẹl vwo nẹ Ijipt rhe, me je rhe sane orere ọvo vwo nẹ uvwiẹ rẹ Izrẹl eje rere a bọn uwevwin phiyọ rere odẹ mẹ vwọ dia etiyiin, ẹkẹvuọvo me sane Devid nẹ ọ dia enu rẹ ihwo mẹ Izrẹl.’ 17 Ọyen ọdavwẹ rẹ ọsẹ mẹ Devid rọ vwọ bọn uwevwin kẹ odẹ ri Jihova Ọghẹnẹ rẹ Izrẹl. 18 Ẹkẹvuọvo Jihova da ta kẹ Devid ọsẹ mẹ nẹ, ‘Ọyen ọdavwẹ wẹn ru wọ vwọ bọn uwevwin kẹ odẹ mẹ, wo ruru wo vwo vwo ọdavwẹ nana vwẹ ubiudu wẹn. 19 Ẹkẹvuọvo wọ cha bọn uwevwin naa, ọmọ robọ wẹn re che vwiẹ kẹ wẹ* yen ohwo rọ cha bọn uwevwin kẹ odẹ mẹ.’ 20 Jihova ru ive ro veri na gba re, kidie me reyọ ẹdia rẹ ọsẹ mẹ Devid, mi ji chidia ekete rẹ Izrẹl re kirobo rẹ Jihova veri. Me je bọn uwevwin kẹ odẹ ri Jihova Ọghẹnẹ rẹ Izrẹl 21 je rhuẹrẹ asan ọvo vwevunrẹ uwevwin na vwọ kẹ Ekpeti rẹ Ọphọ re phiẹ ephapha rẹ ọphọ rẹ Jihova vẹ esẹ rẹ avwanre ride rere ọke rọ vwọ reyọ ayen vwo nẹ Ijipt cha phiyọ.”

22 Ọyena vwọ wan nu, Solomọn de mudia obaro rẹ agbada ri Jihova, vwẹ obaro rẹ ọghwẹgbe rẹ Izrẹl eje, ọ da bẹrẹ abọ sa idjuvwu na, 23 ọ da ta: “E Jihova Ọghẹnẹ rẹ Izrẹl, Ọghẹnẹ ọfa herọ kerẹ owẹ vwẹ idjuvwu yẹrẹ otọrakpọ naa, rọ yọnrọn ọphọ ji dje ẹguọnọ ro jẹ rhẹriẹ kẹ idibo wẹn re vwẹ ubiudu rayen eje yan vwẹ obaro wẹn. 24 Wo ru nene ive ru wo ve kẹ odibo wẹn Devid ọsẹ mẹ. Wọ vwẹ unu robọ wẹn vwo ve ive na, wọ da rha vwẹ obọ wẹn vwo ruo gba nonẹna. 25 Asaọkiephana, E Jihova Ọghẹnẹ rẹ Izrẹl, gbe ru nene ive ru wo ve kẹ odibo wẹn Devid ọsẹ mẹ ọke ru wọ vwọ tanẹ: ‘O rhe vwo ọke vuọvo rẹ ohwo rẹ urhiẹ wẹn che vwo jẹ ekete rẹ Izrẹl echidia vwẹ obaro mẹẹ, ọ da dianẹ emọ wẹn jomaotọ kpahen oborẹ ayen yan vwẹ obaro mẹ kirobo ru wọ yanre vwẹ obaro mẹ.’ 26 Asaọkiephana, E Ọghẹnẹ rẹ Izrẹl, biko, jẹ ive ru wo ve vwọ kẹ odibo wẹn ọsẹ mẹ Devid rugba.

27 “Ẹkẹvuọvo kẹ Ọghẹnẹ cha ghene dia otọrakpọ na? Nighere! Idjuvwu na, e, odjuvwu rẹ idjuvwu na cha sa gba wẹẹ; kẹ uwevwin nana re me bọnre na! 28 Asaọkiephana kerhọ rẹ ẹrhovwo rẹ odibo wẹn kugbe oyare rọyen vwọ kẹ ẹroesiri, E Jihova Ọghẹnẹ mẹ, kerhọ rẹ oviẹ rẹ ukẹcha kugbe ẹrhovwo rẹ odibo wẹn nẹ vwẹ obaro wẹn nonẹna. 29 E jẹ ẹro wẹn dia enu rẹ uwevwin nana te ason te uvo, kpahen asan ru wọ tare nẹ, ‘Odẹ mẹ cha dia etiyin,’ rere wọ kerhọ vwọ kẹ ẹrhovwo rẹ odibo wẹn hirhe opharo ku etinẹ na nẹ. 30 Kerhọ kẹ oyare rẹ odibo wẹn vwọ kẹ ẹroesiri kugbe oyare rẹ ihwo wẹn Izrẹl ọke rẹ ayen de hirhe opharo ku asan nana nẹrhovwo, wo mi nyo vwo nẹ asan ru wọ dia vwẹ idjuvwu na rhe; e, nyo rere wo vwo ghovwo.

31 “Ọ da dianẹ ohwo ru umwemwu vwọso ọrivẹ rọyen, a da gba vwo duvwun iyorin* je nẹrhẹ ọ dia otọ rẹ iyorin na, ro vwo duvwun iyorin na nu, ọ da rhe obaro rẹ agbada wẹn vwẹ uwevwin nana, 32 wo mi nyo nẹ idjuvwu na rhe, rere wo guẹdjọ rẹ idibo wẹn, wo brorhiẹn hwe ọ ro ru umwemwu na nẹ ọ riabe,* wọ me je vwẹ obo ro ruru rhe enu rẹ uyovwin rọyen, wo mi rhe brorhiẹn kẹ ọvwata na nẹ ọ riase,* wọ me je hwosa kẹ vwo nene ophiọnphiọn rọyen.

33 “Ọke rẹ ivwighrẹn de phi ihwo wẹn Izrẹl kparobọ kidie nẹ ayen ruẹ umwemwu vwọso owẹ, rẹ ayen de rhivwin bru we rhe, vwẹ urinrin kẹ odẹ wẹn, nẹrhovwo je rẹ vwọ kẹ ẹroesiri vwẹ uwevwin nana, 34 wo mi nyo nẹ idjuvwu na rhe rere wọ vwẹ imwemwu rẹ ihwo wẹn Izrẹl vwo ghovwo ayen, wọ me je reyọ ayen rhivwin rhe otọ ru wọ vwọ kẹ esẹ rayen ride.

35 “Ọke ra da kanre ẹchẹ rẹ idjuvwu na rẹ osio rha rhọọ kidie nẹ ayen ruẹ umwemwu vwọso owẹ, rẹ ayen de hirhe opharo ku etinẹ na nẹrhovwo, vwẹ urinrin kẹ odẹ wẹn, ji kuobọrhẹriẹ nẹ umwemwu rayen kidie nẹ wọ vwẹ ayen kpotọ,* 36 wo mi nyo nẹ idjuvwu na rhe, wọ me vwẹ umwemwu rẹ idibo wẹn, ihwo wẹn Izrẹl, vwo ghovwo ayen, kidie wo che yono ayen kpahen omamọ rẹ idjerhe ro fori nẹ ayen wan; wọ me rhọ osio kuotọ wẹn ru wọ vwọ kẹ ihwo wẹn kerẹ uku.

37 “Ọ da dianẹ owẹnvwe firi, yẹrẹ ọga, odju ọrhorhorho, eyẹbuẹ, yẹrẹ ẹko rẹ igurube* vwomaphia vwẹ otọ na; yẹrẹ ọ da dianẹ ivwighrẹn rayen gba riariẹ ayen phiyọ vwẹ ọvo vwẹ usun rẹ irere rẹ otọ na* yẹrẹ koka koka rẹ ọtiekọ yẹrẹ ọga vwomaphia, 38 kẹrhovwo kẹrhovwo ra nẹre, koyare koyare vwọ kẹ ẹroesiri rẹ kohwo kohwo yẹrẹ ihwo wẹn Izrẹl eje yare (kidie ohwo ọvuọvo riẹn ọmiaovwẹ rọhẹ ubiudu rọyen) ọke rẹ ayen da bẹrẹ abọ rayen hirhe opharo ku uwevwin nana, 39 gbe nyo vwẹ idjuvwu na, asan ru wọ dia, wo mi vwo ghovwo je cha ayen uko; wọ me hwosa kẹ ohwo ọvuọvo vwo nene idjerhe rọyen eje, kidie wọ riẹn ubiudu rọyen (wẹ ọvo yen ghene riẹn ubiudu ri kohwo kohwo), 40 rere ayen sa vwọ djoshọ wẹn vwẹ uchọke rẹ ayen dia otọ ru wọ vwọ kẹ esẹ rẹ avwanre ride na.

41 “Vwọba, vwọ kpahen ọrhorha rọ dia ọvo vwẹ usun rẹ ihwo wẹn Izrẹẹl ro nẹ otọ oshesheri rhe fikirẹ odẹ wẹn,* 42 (kidie ayen che nyo kpahen odẹ wẹn rode na kugbe obọ ọgangan wẹn vẹ ugbobọ wẹn ru wọ riẹn phia), ọ da rhe rhi hirhe opharo ku uwevwin nana nẹrhovwo, 43 wọ me dia idjuvwu na, asan ru wọ dia de nyo, wo mi ru erọnvwọn eje rẹ ọrhorha na nokpẹn rọyen mie we, rere ihwo rehẹ otọrakpọ na eje sa vwọ riẹn odẹ wẹn je djoshọ wẹn kirobo rẹ ihwo wẹn Izrẹl ruẹ, ayen me je riẹn nẹ a vwẹ odẹ wẹn se uwevwin nana re me bọnre na.

44 “Ọ da dianẹ wo ji ihwo wẹn re phi ofovwin vwọso ivwighrẹn rayen, o toro asan rẹ ayen raree, ayen da nẹrhovwo rhe Jihova jẹ ayen hirhe opharo ku orere ru wọ jẹreyọ kugbe uwevwin re me bọn kẹ odẹ wẹn na, 45 gba dia idjuvwu na de nyo ẹrhovwo rayen kugbe oyare rayen vwọ kẹ ẹroesiri, wo mi ji brorhiẹn kẹ ayen.

46 “Ọ da dianẹ ayen ru umwemwu vwọso owẹ (kidie o vwo ohwo vuọvo ro jẹ umwemwu eruoo), ru wo de mu ophu ọgangan kpahen ayen, ru wọ da kpairoro vrẹ ayen kẹ ọvweghrẹn, rẹ ihwo ri mu ayen na de mu ayen kpo otọ rẹ ọvweghrẹn na, te o sheri yẹrẹ ọ kẹre; 47 rẹ ẹro da hiẹ ayen* vwẹ otọ re mu ayen ra na, rẹ ayen de rhivwin bru we rhe, je rẹ wẹ vwọ kẹ ẹroesiri vwẹ otọ rẹ ihwo ri mu ayen na nẹ, ‘Avwanre ru umwemwu, avwanre ru chọ; avwanre ru obo re brare,’ 48 ayen da vwẹ ubiudu rayen eje kugbe erhi* rayen eje vwo rhivwin bru we rhe vwẹ otọ rẹ ivwighrẹn rayen mu ayen ra na, rẹ ayen da nẹrhovwo rhe we jẹ ayen hirhe opharo kuotọ rayen ru wọ vwọ kẹ esẹ rayen ride kugbe orere ru wọ jẹreyọ vẹ uwevwin re me bọn kẹ odẹ wẹn na, 49 wọ me dia idjuvwu na, asan ru wọ dia de nyo ẹrhovwo rayen kugbe oyare rayen vwọ kẹ ẹroesiri, wo mi brorhiẹn kẹ ayen 50 je vwẹ umwemwu rẹ ihwo wẹn ru vwọso owẹ vwo ghovwo ayen, vwẹ oruchọ eje rẹ ayen ru vwọso owẹ vwo ghovwo ayen. Wo che ruo rere ihwo ri mu ayen kpo ighuvwu na vwo gbe arodọnvwẹ kẹ ayen, ayen ki che gbe arodọnvwẹ kẹ ayen 51 (kidie ayen ihwo wẹn kugbe uku wẹn, ru wọ reyọ vwo nẹ Ijipt rhe, vwo nẹ evunrẹ ogidi erhanre ra vwọ wran utehru). 52 Jẹ ẹro wẹn rhiephiyọ kẹ oyare rẹ ẹroesiri rẹ odibo wẹn kugbe oyare rẹ ẹroesiri rẹ ihwo wẹn Izrẹl, womarẹ wọ vwọ kerhọ kẹ ayen vwẹ kọke kọke rẹ ayen de kperi se we.* 53 Wọ sane ayen vwo nẹ ihwo rehẹ otọrakpọ na eje kẹ oma wẹn kerẹ uku, kirobo ru wọ womarẹ Mosis odibo wẹn ghwoghwo vwẹ ọke ru wọ vwọ reyọ esẹ rẹ avwanre ride nẹ Ijipt cha, E Ọrovwori ro Me Kpenu Jihova.”

54 Ugege rẹ Solomọn vwo ku ẹrhovwo nana eje rọ nẹ rhe Jihova kugbe oyare vwọ kẹ ẹroesiri na phiyọ nu, o de vrẹn nẹ obaro rẹ agbada ri Jihova, vwẹ asan ro de shiguẹ bẹrẹ abọ sa idjuvwu na. 55 O de vrẹn mudia, ọ da nẹrhovwo kẹ ọghwẹgbe rẹ Izrẹl na eje vẹ urhuru ọgangan nẹ: 56 “Ujiri dia kẹ Jihova rọ vwẹ asan rẹ omaerovwon kẹ ihwo rọyen Izrẹl, kirobo ro veri. O vwo ọvuọvo vwẹ usun rẹ ive esiri eje rọ womarẹ odibo rọyen Mosis ve, ro shefiaa. 57 E jẹ Jihova Ọghẹnẹ rẹ avwanre nene avwanre dia kirobo ro nene esẹ rẹ avwanre ride dia. E jẹ ọ kpairoro vrẹ avwanre yẹrẹ sian avwanree. 58 E jẹ ọ nẹrhẹ avwanre vwo owenvwe ra vwọ yan vwẹ idjerhe rọyen eje, kugbe ra vwọ yọnrọn iji rọyen, irhi rọyen, ji ru nene orhiẹn-ebro rọyen, ro ji iji rọyen kẹ esẹ rẹ avwanre ride nẹ ayen yọnre. 59 E jẹ Jihova Ọghẹnẹ rẹ avwanre karophiyọ eta mẹ nana re me vwọ rẹ Jihova vwọ kẹ ẹroesiri na te ason te uvo, rere o se vwo brorhiẹn kẹ odibo rọyen kugbe ihwo rọyen Izrẹl kirobo rẹ ẹdẹ ọvuọvo guọnọre, 60 rere ihwo rehẹ otọrakpọ na eje sa vwọ riẹn nẹ Jihova yen Ọghẹnẹ rẹ uyota na. Ọfa herọọ! 61 Ọtiọyena we jẹ ubiudu rẹ ovwan dia ọsoso kpahen* Jihova Ọghẹnẹ rẹ avwanre, womarẹ enene rẹ irhi rọyen kugbe ẹyọnrọn rẹ iji rọyen kirobo rẹ ovwan ruẹ nonẹna.”

62 Asaọkiephana ovie na kugbe ihwo rẹ Izrẹl eje re vẹ ọyen gba herọ de ze izobo buebun vwẹ obaro ri Jihova. 63 Solomọn ze izobo rẹ ọrekugbe kẹ Jihova: Ọ vwẹ erhuẹn 22,000 kugbe igodẹ 120,000 vwo ze izobo. Enẹ kọyen ovie na kugbe ihwo rẹ Izrẹl eje vwẹ uwevwin ri Jihova na vwọ kpahotọ. 64 Vwẹ ẹdẹ yena, ovie na de ru uherevie rẹ otegodo rọhẹ obaro rẹ uwevwin ri Jihova na fon, kidie etiyin yen o de ze izobo rẹ ẹtorhẹ na, izobo rẹ eka na, kugbe izobo rẹ ivwri rẹ eranvwe re vwo ze izobo rẹ ọrekugbe na, kidie agbada rẹ ẹrovwo rọhẹ obaro ri Jihova na hanvwe nọ rọ vwọ gba izobo rẹ ẹtorhẹ na, izobo rẹ eka na, kugbe izobo rẹ ivwri rẹ eranvwe re vwo ze izobo rẹ ọrekugbe na. 65 Vwẹ ọke yena Solomọn vẹ Izrẹl eje da re orẹ, ọghwẹgbe rode na nẹ Libo-hemat* rhirin re te Iwadi* rẹ Ijipt rhe, vwẹ obaro ri Jihova Ọghẹnẹ rẹ avwanre vwẹ ẹdẹ 7 kugbe ẹdẹ 7 ọfa, ẹdẹ na eje da dia 14. 66 Vwẹ ẹdẹ rọ vwọ kpahọn,* o de siobọnẹ ihwo na kpo, ayen de bruba kẹ ovie na, ayen de kpo iwevwin rayen vẹ aghọghọ kugbe ubiudu rọ vọnre vẹ omavwerhovwẹn, fikirẹ uyoyovwin eje rẹ Jihova dje kẹ Devid odibo rọyen kugbe ihwo rọyen Izrẹl.

9 Ugege rẹ Solomọn vwọ bọn uwevwin ri Jihova, uwevwin* rẹ ovie na, kugbe erọnvwọn eje rẹ Solomọn guọnọ ru nu, 2 Jihova da vwomaphia kẹ Solomọn vwẹ obọ rivẹ kirobo rọ vwomaphia kẹ vwẹ Gibiọn. 3 Jihova da ta kẹ nẹ: “Mi nyo ẹrhovwo wẹn kugbe oyare wẹn vwọ kẹ ẹroesiri ru wọ yare vwẹ obaro mẹ. Mi ru uwevwin nana ru wọ bọnre na fon womarẹ mi vwo phi odẹ mẹ phiyọ bẹdẹ, ẹro mẹ kugbe ubiudu mẹ cha dia etiyin ọkieje. 4 Vwọ kẹ wẹ, wọ da yan vwẹ obaro mẹ kirobo rẹ Devid ọsẹ wẹn yanre, vẹ ubiudu ọsoso kugbe ophiọnphiọn womarẹ eruo rẹ erọnvwọn eje ri mi ji iji rọyen kẹ wẹ, ru wọ da yọnrọn irhi mẹ, ji ru nene orhiẹn-ebro mẹ, 5 ke me cha vwẹ ekete rẹ uvie wẹn vwo muotọ vwẹ enu rẹ Izrẹl bẹdẹ, kirobo ri mi ve kẹ ọsẹ wẹn Devid nẹ, ‘O rhe vwo ọke vuọvo ohwo rẹ urhiẹ wẹn che vwo jẹ ekete rẹ Izrẹl echidiaa.’ 6 Ẹkẹvuọvo ọ da dianẹ owẹ kugbe emọ wẹn kuomarhẹriẹ rẹ ovwan rhe nene uvwee, rẹ ovwan rha yọnrọn iji mẹ kugbe irhi mẹ ri mi phi phiyọ obaro rẹ ovwaan, rẹ ovwan da yanran ra ga eghẹnẹ efa je vwẹ uyovwin kpotọ kẹ ayen, 7 me cha nyavwe Izrẹl kufia vwo nẹ otọ re me vwọ kẹ ayen na, mi che si uwevwin ri mi ru fon kẹ odẹ mẹ na nẹ obaro mẹ, Izrẹl kọ cha dia emu rẹ ọjẹfia* kugbe obo re sua ehwẹjẹ vwẹ ohri rẹ ihwo na eje. 8 Uwevwin nana cha dia uwevwin rọ guọghọ totọ. Kohwo kohwo rọ wanvrẹ ko che no, o mi gbe unu, o mi gbe ophiọrọ tanẹ, ‘Diesorọ Jihova vwo ru otọ nana vẹ uwevwin nana ọtiọna?’ 9 Ọke yena kẹ ayen cha tanẹ, ‘Kidie ayen kpairoro vrẹ Jihova Ọghẹnẹ rayen, rọ reyọ esẹ rayen ride vwo nẹ otọ rẹ Ijipt rhe, ayen de bru eghẹnẹ efa ra, vwẹ uyovwin kpotọ kẹ ayen, je ga ayen. Ọyensorọ Jihova vwọ vwẹ okpetu nana eje na rhe enu uyovwin rayen.’”

10 Vwẹ oba rẹ ẹgbukpe 20 rẹ uvwre rẹ ọke rẹ Solomọn vwọ bọn iwevwin ivẹ na, uwevwin ri Jihova kugbe uwevwin* rẹ ovie na, 11 Hairam ovie ri Taya mu irhe rẹ isida kugbe igedu rẹ junipa vẹ iro buebun rẹ Solomọn guọnọre kẹ, Ovie Solomọn da rha vwẹ irere 20 vwẹ otọ ri Galili vwọ kẹ Hairam. 12 Ọtiọyena Hairam da kparoma nẹ Taya re ni irere rẹ Solomọn vwọ kẹ na, ẹkẹvuọvo i je ree.* 13 Ọ da ta: “Enana eka rẹ irere vọ yen wọ vwọ kẹ vwẹ na, oniọvo mẹ?” Ọtiọyena e de se irere na Otọ ri Kebọl* rhi te ọke na. 14 Vwẹ uvwre rẹ ọke yena, Hairam vwẹ italẹnti* rẹ oro 120 vwo rhe ovie na.

15 Ọnana yen ikuegbe rẹ ihwo rẹ Ovie Solomọn jurhi kẹ nẹ e wian kẹ ọyen, nẹ ayen bọn uwevwin ri Jihova, uwevwin* robọ rọyen, Asan ro Kpenu* na, igbẹhẹ ri Jerusalẹm, Hezọ, Mẹgido, kugbe Giza. 16 (Fero ovie rẹ Ijipt rhere jovwo re, ọ da reyọ Giza je vwẹ erhanre torhẹ, o ji hwe ihwo ri Kenan re dia orere na. Ọtiọyena ọ da vwẹ otọ na kẹ ọmọtẹ rọyen rọ dia aye ri Solomọn kerẹ okẹ.*) 17 Solomọn bọn* Giza, Bẹt-horọn rẹ Obotọ, 18 Belat, kugbe Tema rọhẹ aton na, vwevunrẹ otọ na, 19 ọtiọyen ji te irere eje ra da sẹro rẹ erọnvwọn ri Solomọn, irere rẹ ekpẹrẹ na, irere vwọ kẹ iguiyesi na, kugbe kemu kemu rẹ Solomọn guọnọ bọn vwẹ Jerusalẹm, Lẹbanọn, kugbe otọ eje rehẹ otọ rẹ usuon rọyen. 20 Ihwo eje ri chekọ vwẹ usun rẹ ihwo rẹ Amọ, ihwo ri Hẹt, ihwo ri Pẹriz, ihwo ri Haiv, kugbe ihwo ri Jẹbus re dia ihwo rẹ Izrẹẹl, 21 emọ rayen ri chekọ vwẹ otọ na rẹ ihwo rẹ Izrẹl sa ghwọrọọ yen Solomọn jurhi kẹ nẹ e wian kẹ ọyen kerẹ eviẹn rhi te ọke na. 22 Ẹkẹvuọvo Solomọn reyọ ohwo rẹ Izrẹl vuọvo vwo ru ọviẹẹn, kidie ayen yen egba ofovwin, idibo, isun, ichuko rẹ inotu, kugbe inotu rẹ ihwo re gua ekpẹrẹ kugbe iguiyesi rọyen. 23 Inotu rẹ isun 550 yen vwẹrote owian rẹ Solomọn, iniruo re vwẹrote ihwo re wiowian na.

24 Ẹkẹvuọvo ọmọtẹ ri Fero de nẹ Orere ri Devid kpo uwevwin rọyen rọ bọn vwọ kẹ; ọyena vwọ wan nu, Solomọn da bọn Asan ro Kpenu* na.

25 Abọ erha ẹgbukpe yen Solomọn ze izobo rẹ ẹtorhẹ vẹ izobo rẹ ọrekugbe vwẹ enu rẹ agbada rọ so kẹ Jihova, ọ je nẹrhẹ ivwirhi rẹ izobo brẹ vwẹ enu rẹ agbada rọhẹ obaro ri Jihova na, enẹ kọyen ọ bọn uwevwin na re.

26 Ovie Solomọn ji ru ikuna buebun vwẹ Iziọn-giba rọ kẹrẹ Ilọt, vwẹ orhoma rẹ Abadi Ọvwavware na, vwẹ otọ rẹ Idọm. 27 Hairam de ji idibo rọyen, eshare re nabọ riẹn kpahen abadi nene ikuna buebun na, nẹ ayen re nene idibo ri Solomọn wian kugbe. 28 Ayen kpo Ofiẹ je reyọ italẹnti 420 rẹ oro nẹ etiyin, ayen da ghwa ayen rhe Ovie Solomọn.

10 Asaọkiephana ovie aye ri Shiba de nyo iyẹnrẹn ri Solomọn fikirẹ odẹ ri Jihova, ọtiọyena ọ da rhe rhe vwẹ enọ egangan* vwọ davwọn ni. 2 Ọ vẹ idibo buebun, ikamẹl ri mu evwri ri balsam, iro buebun, kugbe ibiukuta eghanghanre yen gba ro Jerusalẹm. O de bru Solomọn rhe, ọ da vuẹ erọnvwọn eje rehẹ ubiudu rọyen. 3 Ọtiọyena Solomọn da kpahen phiyọ enọ rọyen eje. O vwo emu vuọvo rọ bẹn* kẹ ovie na edjefiotọ kẹẹ.

4 Ọke rẹ ovie aye ri Shiba vwọ mrẹ aghwanre ri Solomọn eje, uwevwin rọ bọnre na, 5 emuọre rehẹ imẹjẹ rọyen, oborẹ idibo rọyen chidia wan, oborẹ idibo rọyen muẹ emu phiyọ imẹjẹ wan vẹ iwun rẹ ayen kuphiyọ, imuidi rọyen, kugbe izobo rẹ ẹtorhẹ ro ze ọkieje vwẹ uwevwin ri Jihova nu, o de ghwu mu.* 6 Ọtiọyena ọ da ta kẹ ovie na nẹ: “Iyẹnrẹn rẹ iruo* wẹn kugbe aghwanre wẹn ri mi nyori vwẹ ẹkuotọ mẹ uyota. 7 Ẹkẹvuọvo mi se iyẹnrẹn na gbuyotaa rhi te ọke re me vwọ rhe rhe vwẹ ẹro mẹ vwọ mrẹ na. Nighere! Emerha rẹ iyẹnrẹn na yen a tobọ vuẹ vwẹ. Aghwanre wẹn kugbe oyovwe wẹn rho vrẹ iyẹnrẹn ri mi nyori na shesheri. 8 Omavwerhovwẹn dia kẹ eshare wẹn, omavwerhovwẹn dia kẹ idibo wẹn ri muẹdia obaro wẹn ọkieje, re kerhọ rẹ aghwanre wẹn! 9 Ujiri dia kẹ Jihova Ọghẹnẹ wẹn, ohwo rẹ ivun wẹn vwerhenre rọ da vwẹ owẹ vwo chidia ekete rẹ Izrẹl. Fikirẹ ẹguọnọ ri bẹdẹ rẹ Jihova vwo kpahen Izrẹl, ọ da vwẹ owẹ vwo mu ovie rere wo brorhiẹn ọsoso kugbe ophiọnphiọn.”

10 Ọtiọyena ọ da vwẹ italẹnti* rẹ oro 120 kugbe evwri ri balsam buebun vẹ ibiukuta eghanghanre kẹ ovie na. A rha mrẹ ohwo ọfa ro mu oka rẹ evwri ri balsam buebun tiọyen rhe Ovie Solomọn kerẹ ọ rẹ ovie aye ri Shiba naa.

11 Ikuna ri Hairam buebun ri mu iro vwo nẹ Ofiẹ rhe ji mu igedu rẹ algọm buebun kugbe ikuta eghanghanre nẹ Ofiẹ rhe. 12 Ovie na vwẹ igedu rẹ algọm vwọ bọn ichivwo phiyọ uwevwin ri Jihova kugbe uwevwin* rẹ ovie na, ọ je vwẹ ayen vwo ru ihapu kugbe ekuakua rẹ uhworo ri vwo ifi tẹnrẹnrẹn vwọ kẹ ibuine na. A rha rhoma mu oka rẹ igedu rẹ algọm tiọyen rhee, a rha je mrẹ oka ọtiọyen ọfa rhi te ọke naa.

13 Ovie Solomọn je vwẹ kemu kemu rẹ ovie aye ri Shiba guọnọre rọ je nokpẹn rọyen vwọ kẹ, kugbe erọnvwọn efa rọ reyọ ọhọ robọ rọyen vwọ kẹ.* Ọyena vwọ wan nu, ọ vẹ idibo rọyen de rhivwin kpo ẹkuotọ robọ rọyen.

14 Ọnyẹ rẹ oro re mu rhe Solomọn vwẹ ẹgbukpe ọvo bun te italẹnti rẹ oro 666, 15 a vwẹ i ri nẹ obọ rẹ ineki ride rhe, erere ri nẹ obọ rẹ ineki rhe, e rẹ ivie eje rẹ ihwo rẹ Arab kugbe e rẹ isun rẹ otọ na mu rhe vwọ baa.

16 Ovie Solomọn reyọ oro ra guare vwo ru ekpọfia ride 200 (shẹkẹl* rẹ oro 600 yen o vwo ru ekpọfia ọvuọvo) 17 ọ je reyọ oro ra guare vwo ru ekpọfia itete* 300 (imaina* rẹ oro erha yen o vwo ru ọvuọvo rẹ ekpọfia itete na). Ọyena vwọ wan nu, ovie na da ghwẹ ayen phiyọ Uwevwin rẹ Egbo ri Lẹbanọn.

18 Ovie na je vwẹ akoeni vwo ru ekete rode ọvo, ọ da vwẹ oro re ru fon vwọ pharọ. 19 O vwo istẹpu esan re yerẹn kpo ekete na, urhurho rọ pha ghorien ghorien hẹ obuko rẹ ekete na, asan ra ghwabọ kpahan hẹ te obonẹ te obonẹ rẹ agbara na, ikpohrokpo ivẹ de rhe mudia ọkọkọ rẹ asan ra ghwabọ kpahan na. 20 Ikpohrokpo 12 mudiaphiyọ enu rẹ istẹpu esan na, ọvo hẹ te obonẹ te obonẹ rẹ oba rẹ istẹpu esan na. O vwo uvie ọfa ro ru orọnvwọn rọ họhọ ọtiọyen jovwo ree.

21 Oro yen e vwo ru iko rẹ Ovie Solomọn eje, ekuakua eje rehẹ Uwevwin rẹ Egbo ri Lẹbanọn uvi rẹ oro yen e vwo ru ayen. A vwẹ idọnọ ọfuanfon vwo ru orọnvwọn vuọvoo, kidie idọnọ ọfuanfon fiemu vuọvo vwẹ ọke ri Solomọnii. 22 Ovie na vwo ikuna ri Tashish buebun vwẹ abadi na kugbe ikuna buebun ri Hairam. Obọ ọvo vwẹ ẹgbukpe erha yen ikuna ri Tashish buebun na vwo muẹ iro, idọnọ efuanfon, akoeni, okpe,* kugbe ipikọku* cha.

23 Ọtiọyena Ovie Solomọn kọyen me fe ji vwo aghwanre nọ ivie ri chekọ eje rehẹ otọrakpọ na. 24 Ihworakpọ na eje ke guọnọ mrẹ Solomọn* rere ayen nyo aghwanre rẹ Ọghẹnẹ phi phiyọ ubiudu rọyen. 25 Ayen ohwo vuọvo mi mu okẹ rhe—ekuakua ra vwẹ idọnọ efuanfon vwo ru, ekuakua ra vwẹ iro vwo ru, iwun, ekuakua ofovwin, evwri ri balsam, iyesi, kugbe eranvwe re se imiu*—enẹ kọyen ayen ruẹ kukpe kukpe.

26 Solomọn ko koko ekpẹrẹ vẹ iyesi* buebun kẹ oma rọyen; o vwo ekpẹrẹ 1,400 kugbe iyesi* 12,000, o de mu ayen phiyọ irere rẹ akpẹrẹ na ji mu ayen kẹrẹ ovie na vwẹ Jerusalẹm.

27 Ovie na da nẹrhẹ idọnọ efuanfon buebun dia Jerusalẹm kerẹ ikuta, ọ je nẹrhẹ irhe rẹ isida dia buebun kerẹ irhe ri sikamọ vwẹ Shẹfila na.

28 Ijipt yen e mu iyesi ri Solomọn nurhe, unu rẹ igho ọvo yen ẹko rẹ ineki ride rẹ ovie na vwọ dẹ ẹko rẹ iyesi na.* 29 Idọnọ efuanfon 600 yen a vwọ dẹ akpẹrẹ ọvuọvo re mu nẹ Ijipt rhe, iyesi ọvo ke rha idọnọ efuanfon 150; ayen mi rhe mu ayen bru ivie ri Hẹt eje kugbe ivie ri Siria.

11 Ẹkẹvuọvo Ovie Solomọn vwo ẹguọnọ rẹ eya erhorha buebun vwọ ba ọmọtẹ ri Fero: eya re dia ihwo ri Moab, Amọn, Idọm, Saidọn, kugbe Hẹt. 2 Ayen ihwo ẹgborho rẹ Jihova vuẹ ihwo rẹ Izrẹl kpahen nẹ: “Ovwan rua ohri rayeen,* ayen je cha ohri rẹ ovwaan, kidie ayen che ku ubiudu rẹ ovwan rhẹriẹ re nene eghẹnẹ rayen.” Ẹkẹvuọvo Solomọn churu mu ayen ji vwo ẹguọnọ rayen. 3 O vwo eya 700 re dia emetẹ rẹ ivie kugbe esen 300, ememerha na, eya rọyen ki kuẹ ubiudu rọyen rhẹriẹ.* 4 Vwẹ ọke ọghwo ri Solomọn, eya rọyen de ku ubiudu rọyen rhẹriẹ* re nene eghẹnẹ efa, ubiudu rọyen rha dia ọsoso kpahen* Jihova Ọghẹnẹ rọyen kerẹ ubiudu ri Devid ọsẹ rọyeen. 5 Solomọn da ga Ashtorẹt, ọghẹnẹ aye rẹ ihwo ri Saidọn, kugbe Milkọm ọghẹnẹ ro tuẹn ohwo oma rẹ ihwo rẹ Amọn. 6 Solomọn ru obo re brare vwẹ ẹro ri Jihova, ọ vwẹ ubiudu rọyen eje nene Jihova kirobo rẹ Devid ọsẹ rọyen ruruu.

7 Ọke yena yen Solomọn vwọ bọn asan ro kpenu kẹ Kimọsh, ọghẹnẹ ro tuẹn ohwo oma ri Moab, ọ da rha bọn ọfa kẹ Molẹk, ọghẹnẹ ro tuẹn ohwo oma rẹ ihwo rẹ Amọn vwẹ enu rẹ ugbenu rọhẹ obaro ri Jerusalẹm. 8 Ọtiọyen yen o ru vwọ kẹ eya rọyen eje re dia erhorha re nẹrhẹ ivwirhi rẹ izobo brẹ kpenu ji ze izobo kẹ eghẹnẹ rayen.

9 Jihova de muophu ọgangan kpahen Solomọn kidie ubiudu rọyen kurhẹriẹ vwo nẹ Jihova Ọghẹnẹ rẹ Izrẹl, ohwo rọ vwomaphia kẹ abọ ivẹ 10 ọ vwẹ orhọesio vwọ kẹ kpahen orọnvwọn nana jovwo re nẹ, o nene eghẹnẹ efaa. Ẹkẹvuọvo o ru nene oborẹ Jihova ji iji rọyeen. 11 Asaọkiephana Jihova da ta kẹ Solomọn nẹ: “Kidie nẹ wo ru ọnana, wo ru nene ọphọ mẹ je yọnrọn iji ri mi ji kẹ wẹẹ na, me cha bẹrẹ uvie na mie we, ke me cha vwọ kẹ ọvo vwẹ usun rẹ idibo wẹn. 12 Ẹkẹvuọvo fikirẹ ọsẹ wẹn Devid, mi che ruo vwẹ ọke ru wọ vwọ hẹ akpọ naa. Me cha bẹrẹ nẹ obọ rẹ ọmọ wẹn, 13 ẹkẹvuọvo me cha bẹrẹ uvie na ejobii. Me cha vwẹ uvwiẹ ọvo vwọ kẹ ọmọ wẹn fikirẹ Devid odibo mẹ kugbe fikirẹ Jerusalẹm, orere re me jẹreyọ.”

14 Jihova da nẹrhẹ ohwo ọvo gbe vwọso Solomọn, Hedad ohwo rẹ Idọm, ro nẹ orua rẹ ovie rẹ Idọm rhe. 15 Ọke rẹ Devid vwo phi Idọm kparobọ, Joab onotu rẹ otuofovwin na da yanran re shi ihwo re hweri na, ọ da davwẹngba rọ vwọ teyen kọshare kọshare vwẹ Idọm hwe. 16 (Kidie Joab vẹ Izrẹl eje dia etiyin emeranvwe esan bẹsiẹ rọ vwọ teyen* kọshare kọshare rọhẹ Idọm hwe.) 17 Ẹkẹvuọvo Hedad vẹ idibo rẹ ọsẹ rọyen evo re dia ihwo rẹ Idọm da djẹ, ayen de kpo Ijipt; Hedad omotete vwẹ ọke yena. 18 Ọtiọyena ayen de nẹ Midian, ayen da rhe Peran. Ayen reyọ eshare nene oma nẹ Peran, ayen da rhe Ijipt vwo bru Fero ovie rẹ Ijipt rhe, rọ vwẹ uwevwin, emuọre, kugbe otọ vwọ kẹ. 19 Hedad da mrẹ ẹroesiri ri Fero, te ẹdia rọ da vwẹ oniọvo aye rọyen kẹ rọvwọn, oniọvo ri Tapinis aye ovie.* 20 Ọke vwọ yanran na, oniọvo ri Tapinis de vwiẹ ọmọshare re se Gẹnubat vwọ kẹ, Tapinis da yọnrọn ghwanre* vwẹ uwevwin ri Fero, Gẹnubat da dia uwevwin ri Fero vwẹ ohri rẹ emọ ri Fero.

21 Hedad de nyo vwẹ Ijipt nẹ Devid ghwuru kerẹ esẹ rọyen ride re, nẹ Joab onotu rẹ otuofovwin na ji ghwure. Ọtiọyena Hedad da ta kẹ Fero nẹ: “Siobọnu uvwe rere mi kpo otọ robọ mẹ.” 22 Ẹkẹvuọvo Fero da ta kẹ nẹ: “Die yen kanre owẹ rẹ wẹ vẹ ovwẹ vwọ herọ na, ru wọ vwọ guọnọ kpo otọ robọ wẹn asaọkiephana?” Ọtiọyena ọ da tanẹ: “Emuọvoo, ẹkẹvuọvo biko siobọnu uvwe yanran.”

23 Ọghẹnẹ da je nẹrhẹ ohwo ọfa gbe vwọso Solomọn, Rizọn ọmọ rẹ Ẹlayada, rọ djẹ jẹ ọrovworo Hadadiza ovie ri Zoba vwo. 24 Ọke rẹ Devid vwo phi eshare ri Zoba kparobọ,* Rizọn da ghwẹ eshare koko kẹ oma rọyen, ọ da dia onotu rẹ ẹko rẹ igborhugborho na. Ọtiọyena ayen de kpo Damaskọs, ayen da dia etiyin, ọ da tuẹn usuon phiyọ vwẹ Damaskọs. 25 Rizọn gbe vwọso Izrẹl vwẹ ẹdẹ rẹ akpọ ri Solomọn eje, o phiba ọmiaovwẹ rẹ Hedad soro, o vwo utuoma kpahen Izrẹl vwẹ ọke ro vwo suẹn vwẹ enu rẹ Siria.

26 O vwo ohwo ọvo re se Jeroboam ọmọ ri Nibat, ohwo rẹ Ifrem ro nẹ Zẹrida rhe, odibo ri Solomọn, odẹ rẹ oni rọyen Zẹrua, ayeuku. Ọ da je vwọso* ovie na. 27 Ọnana yen oboresorọ rọ vwọ reyọ vwọso ovie na: Solomọn bọn Asan ro Kpenu* na, o de ji din asan ro rhiephiyọ vwẹ igbẹhẹ rẹ Orere ri Devid ọsẹ rọyen. 28 Asaọkiephana Jeroboam nana ọgbowian. Ọke rẹ Solomọn vwọ mrẹ nẹ eghene ọshare nana ọgbowian, o de vwo mu oniruo rọ vwẹrote ewiowian re jurhi kẹ nẹ e wian vwẹ uwevwin ri Josẹf. 29 Vwẹ uvwre rẹ ọke yena, Jeroboam de vrẹn nẹ Jerusalẹm, ọmraro Ahaijah ohwo ri Shailo da mrẹ vwẹ idjerhe. Ahaijah ku ewun kpokpọ phiyọ, ayen ihwo ivẹ ọvo yehẹ evunrẹ aghwa na. 30 Ahaijah da yọnrọn ewun kpokpọ ro kuphiyọ na, ọ da bẹrẹ kpo ẹkẹn 12. 31 Ọ da ta kẹ Jeroboam nẹ:

“Reyọ ẹkẹn ihwe kẹ oma wẹn, kidie enẹ yen Jihova Ọghẹnẹ rẹ Izrẹl tare: ‘Me bẹrẹ uvie na nẹ obọ ri Solomọn, me cha vwẹ uvwiẹ ihwe vwọ kẹ wẹ. 32 Ẹkẹvuọvo uvwiẹ ọvo che chekọ vwọ kẹ fikirẹ odibo mẹ Devid kugbe fikirẹ Jerusalẹm, orere re me jẹreyọ vwo nẹ uvwiẹ rẹ Izrẹl eje. 33 Mi che ru ọnana kidie ayen yanjẹ uvwe vwo ra vwẹ uyovwin kpotọ kẹ Ashtorẹt ọghẹnẹ aye rẹ ihwo ri Saidọn, kẹ Kimọsh ọghẹnẹ ri Moab, kugbe Milkọm ọghẹnẹ rẹ ihwo rẹ Amọn, ayen yan vwẹ idjerhe mẹẹ womarẹ ayen vwo ru obo ri shephiyọ vwẹ ẹro mẹ je yọnrọn iji mẹ vẹ orhiẹn-ebro mẹ kirobo rẹ Devid ọsẹ rọyen ruruu. 34 Ẹkẹvuọvo me cha reyọ uvie na eje nẹ obọ rọyeen, me cha yan jovwo nẹ ọ dia osun vwẹ ẹdẹ rẹ akpọ rọyen eje fikirẹ Devid odibo mẹ re me jẹreyọ, kidie o ru nene iji vẹ irhi mẹ. 35 Ẹkẹvuọvo me cha reyọ usuon na nẹ obọ rẹ ọmọ rọyen, ke me cha vwọ kẹ wẹ, kọyen uvwiẹ ihwe. 36 Me cha vwẹ uvwiẹ ọvo vwọ kẹ ọmọ rọyen, rere Devid odibo mẹ se vwo vwo urhukpẹ vwẹ obaro mẹ vwẹ Jerusalẹm ọkieje, orere re me jẹ kẹ oma mẹ kerẹ asan ri mi che phi odẹ mẹ phiyọ. 37 Me cha jẹ wẹ reyọ, wo che sun vwẹ enu rẹ erọnvwọn eje ru wọ guọnọre,* wọ je cha dia ovie vwẹ enu rẹ Izrẹl. 38 Ọ da dianẹ wo ru nene erọnvwọn eje ri mi ji iji rọyen kẹ wẹ, wọ da yan vwẹ idjerhe mẹ ji ru obo ri shephiyọ vwẹ ẹro mẹ, womarẹ ẹyọnrọn rẹ irhi mẹ vẹ iji mẹ kirobo rẹ Devid odibo mẹ ruru, ki mi ji che nene uwe dia. Me cha bọn uwevwin ri bẹdẹ kẹ wẹ kirobo me bọn kẹ Devid, me je cha vwẹ Izrẹl kẹ wẹ. 39 Me cha phọphọ emọ ri Devid fikirẹ ọnana, ẹkẹvuọvo ọ dia ọkiejee.’”

40 Ọtiọyena Solomọn kọ davwẹngba rọ vwọ teyen Jeroboam hwe, ẹkẹvuọvo Jeroboam da djẹ kpo Ijipt bru Shaishak ovie rẹ Ijipt, ọ da dia Ijipt re te ọke rẹ Solomọn vwo ghwu.

41 Ikuegbe rẹ akpeyeren ri Solomọn ri chekọ, erọnvwọn eje ro ruru kugbe aghwanre rọyen, e rhe sio phiyọ ọbe rẹ ikuegbe rẹ akpeyeren ri Solomọn? 42 Uchọke* rẹ Solomọn sunru vwẹ Jerusalẹm vwẹ enu rẹ Izrẹl eje da dia ẹgbukpe 40. 43 Ọyena vwọ wan nu, Solomọn de ghwu kerẹ esẹ rọyen ride, e de sho phiyọ Orere ri Devid ọsẹ rọyen; ọmọ rọyen Rehoboam da rhe dia ovie vwẹ ẹdia rọyen.

12 Rehoboam de kpo Shikẹm, kidie Izrẹl eje rhe Shikẹm rhe reyọ vwo mu ovie. 2 Ugege rẹ Jeroboam ọmọ ri Nibat vwo nyo kpahọn (ọ jehẹ Ijipt kidie ọ djẹre fikirẹ Ovie Solomọn, ọ je dia Ijipt), 3 ayen de ji ohwo re se. Ọyena vwọ wan nu, Jeroboam vẹ ọghwẹgbe rẹ Izrẹl eje de bru Rehoboam rhe, ayen da tanẹ: 4 “Ọsẹ wẹn ru urhekpe rẹ avwanre họhọ. Ẹkẹvuọvo wo de ru iruo ọgangan rẹ avwanre ruẹ kẹ ọsẹ wẹn na lọhọ ji ru urhekpe ọhọhọhọ* ro mu nyẹ avwanre na pharhe, avwanre cha ga wẹ.”

5 Ọtiọyena ọ da ta kẹ ayen nẹ: “Ovwan yanran ẹdẹ erha; ọyena da wan nu, ovwan rhivwin bru vwe rhe.” Ọtiọyena ihwo na da yanran. 6 Ovie Rehoboam da vwẹ iroro nẹ eshare re kpakore* re ga ọsẹ rọyen Solomọn vwẹ ọke rọ vwọ hẹ akpọ nẹ: “Die yen iroroẹjẹ rẹ ovwan kpahen oborẹ me cha kpahen kẹ ihwo nana?” 7 Ayen da kpahen kẹ nẹ: “Wọ da vwẹ oma wẹn vwo ru odibo kẹ ihwo nana nonẹna, ru oyare rayen kẹ ayen je kẹ ayen ẹkpahọnphiyọ ro shephiyọ, ayen cha dia idibo wẹn ọkieje.”

8 Ẹkẹvuọvo ọ sen uchebro rẹ eshare re kpakore na* vwọ kẹ, ọ da vwẹ iroro na nẹ ighene eshare re vẹ ọyen gba ghwanre kugbe re dia idibo rọyen asaọkiephana. 9 Ọ da nọ ayen nẹ: “Die yen iroroẹjẹ rẹ ovwan kpahen oborẹ avwanre cha kpahen kẹ ihwo nana re ta kẹ vwẹ nẹ, ‘Ru urhekpe rẹ ọsẹ wẹn mu nyẹ avwanre na pharhe’?” 10 Ighene eshare re vẹ ọyen gba ghwanre kugbe na da ta kẹ nẹ: “Ọnana yen oborẹ wọ cha ta kẹ ihwo nana re ta kẹ wẹ nẹ, ‘Ọsẹ wẹn ru urhekpe rẹ avwanre họhọ ẹkẹvuọvo ruo pharhe kẹ avwanre’; ọnana yen oborẹ wọ cha ta kẹ ayen, ‘Urhiobọ otete mẹ che vwo ọkpan nọ ọchọn rẹ ọsẹ mẹ. 11 Ọsẹ mẹ mu urhekpe ọhọhọhọ nyẹ ovwan, ẹkẹvuọvo me cha vwọ ba urhekpe rẹ ovwan. Ọsẹ mẹ vwẹ uphiaphia vwo gboja kẹ ovwan, ẹkẹvuọvo mi che gboja kẹ ovwan vẹ uphiaphia ro vwo inwe vwẹ oboba rọyen.’”

12 Jeroboam vẹ ihwo na eje de bru Rehoboam rhe vwẹ ẹdẹ rerha kirobo rẹ ovie na tare nẹ: “Ovwan rhivwin bru vwe rhe vwẹ ẹdẹ rerha.” 13 Ẹkẹvuọvo ovie na da kpahen kẹ ihwo na gbaegbae, ọ sen uchebro rẹ eshare re kpakore na* vwọ kẹ. 14 Ọ ta ota kẹ ayen vwo nene uchebro rẹ ighene eshare na nẹ: “Ọsẹ mẹ ru urhekpe rẹ ovwan họhọ ẹkẹvuọvo me cha vwọ ba urhekpe rẹ ovwan. Ọsẹ mẹ vwẹ uphiaphia vwọ fa ovwan, ẹkẹvuọvo me cha vwẹ uphiaphia ro vwo inwe vwẹ oboba rọyen vwọ fa ovwan.” 15 Ọtiọyena ovie na rha kerhọ rẹ ihwo naa, kidie Jihova yen nẹrhẹ ọnana phia, rere o se vwo ru ota rẹ Jihova womarẹ Ahaijah ohwo ri Shailo ta kẹ Jeroboam ọmọ ri Nibat gba.

16 Ọke rẹ Izrẹl eje vwọ mrẹ nẹ ovie na rhọnvwe kerhọ rayeen, ihwo na da kpahen kẹ ovie na nẹ: “Ẹkẹn vọ yen avwanre vwori vwẹ Devid? Avwanre vwo uku vwẹ ọmọ ri Jẹsii. Bru eghẹnẹ wẹn ra, E Izrẹl. Asaọkiephana gba vwẹrote uwevwin robọ wẹn, E Devid!” Ọtiọyena Izrẹl de rhivwin kpo iwevwin* rayen. 17 Ẹkẹvuọvo Rehoboam de sun vwẹ enu rẹ ihwo rẹ Izrẹl re dia irere ri Juda.

18 Ọyena vwọ wan nu, Ovie Rehoboam de ji Adoram rọ vwẹrote ihwo rẹ ovie jurhi kẹ nẹ e wian kẹ ọyen, ẹkẹvuọvo Izrẹl eje de phio hwe. Ovie Rehoboam da vwẹ ẹgbẹgba ro akpẹrẹ rọyen, ọ da djẹ kpo Jerusalẹm. 19 Ihwo rẹ Izrẹl je vwọsua uwevwin ri Devid rhi te ọke na.

20 Ugege rẹ Izrẹl eje vwo nyo nẹ Jeroboam rhivwin rhire, ayen de se rhe ọghwẹgbe na, ayen de vwo mu ovie vwẹ enu rẹ Izrẹl eje. O vwo ohwo vuọvo vwẹ usun rẹ ihwo na ro nene uwevwin ri Devidii jokparẹ uvwiẹ ri Juda.

21 Ugege rẹ Rehoboam vwo te Jerusalẹm, o de koko uwevwin ri Juda eje kugbe uvwiẹ ri Bẹnjamin, egba ofovwin 180,000 re yonori,* rere ayen nene uwevwin rẹ Izrẹl họnre a sa vwọ vwẹ uvie na rhivwin bru Rehoboam ọmọ ri Solomọn rhe. 22 Etiyin ota rẹ Ọghẹnẹ rẹ uyota na de bru Shẹmaya ohwo rẹ Ọghẹnẹ rẹ uyota na rhe nẹ: 23 “Ta kẹ Rehoboam ọmọ ri Solomọn ovie ri Juda kugbe uwevwin ri Juda eje kugbe Bẹnjamin kugbe ihwo ri chekọ vwẹ usun rẹ ihwo na nẹ, 24 ‘Ọnana yen oborẹ Jihova tare: “Ovwan yanran re nene iniọvo rẹ ovwan, ihwo rẹ Izrẹl họnraa. Ovwan ọvuọvo rhivwin kpo uwevwin rọyen, kidie mẹvwẹ yen nẹrhẹ ọnana phia.”’” Ọtiọyena ayen de ru nene ota ri Jihova, ayen de rhivwin kpo uwevwin kirobo rẹ Jihova vuẹ ayen.

25 Ọyena vwọ wan nu, Jeroboam da bọn* Shikẹm vwẹ ekogho rẹ igbenu rẹ Ifrem, ọ da dia etiyin. O de nẹ etiyin ra bọn* Pẹnuẹl. 26 Jeroboam da ta vwẹ ubiudu rọyen nẹ: “Asaọkiephana uvie na che rhivwin kpo uwevwin ri Devid. 27 Ihwo nana da yanran re ze izobo vwẹ uwevwin ri Jihova vwẹ Jerusalẹm ọkieje, ubiudu rẹ ihwo nana je cha rhẹriẹ bru ọrovwori rayen, Ovie Rehoboam ri Juda. E, ayen che hwe vwe ji rhivwin bru Ovie Rehoboam ri Juda.” 28 Ọke rọ vẹ ihwo vwọ jiroro nu, ovie na da vwẹ oro vwọ ma emọ rẹ erhuẹn ivẹ, ọ da ta kẹ ihwo na nẹ: “Oyan rẹ ovwan yan kpo Jerusalẹm na gan nọ. Ọghẹnẹ wẹn na, E Izrẹl, rọ reyọ owẹ vwo nẹ otọ rẹ Ijipt rhe.” 29 O de mu ọvo phiyọ Bẹtẹl, o de rhe mu ọ ro chekọ phiyọ Dan. 30 Ọnana da nẹrhẹ ayen ru umwemwu, ihwo na da yan shesheri kpo Dan ra vwẹ ẹga kẹ ọ rọhẹ oboyin.

31 Ọ da bọn iwevwin rẹ ẹga phiyọ asan ri kpenu na je vwẹ irherẹn vwo mu vwẹ ohri rẹ ihwo na, ihwo re dia ihwo ri Livaee. 32 Jeroboam je tuẹn orẹ ọvo phiyọ vwẹ emeranvwe rẹrenren vwẹ ẹdẹ ri 15 rẹ emeranvwe na, kerẹ orẹ re ruẹ vwẹ Juda. O ze izobo kẹ emọ rẹ erhuẹn rọ mare na vwẹ enu rẹ agbada rọ soro vwẹ Bẹtẹl, o de phi irherẹn phiyọ asan ri kpenu ro ruru vwẹ Bẹtẹl. 33 Ko ze izobo vwẹ enu rẹ agbada rọ soro vwẹ Bẹtẹl na vwẹ ẹdẹ 15 rẹ emeranvwe rẹrenren na, vwẹ emeranvwe rọ sanere komobọ rọyen; ọ da tuẹn orẹ ọvo phiyọ kẹ ihwo rẹ Izrẹl, o de yerin kpenu rẹ agbada na re ze izobo je nẹrhẹ ivwirhi rẹ izobo bru kpenu.

13 Womarẹ ota ri Jihova, ohwo rẹ Ọghẹnẹ ọvo de nẹ Juda kpo Bẹtẹl vwẹ ọke rẹ Jeroboam vwo mudia asan agbada na ro vwo ze izobo ro bru ivwirhi. 2 Womarẹ ota ri Jihova, ọ da ta ota nana kpahen agbada na nẹ: “E agbada, agbada! Ọnana yen oborẹ Jihova tare: ‘Nighere! E che vwiẹ ọmọ re se Josaya kẹ uwevwin ri Devid! Ọ cha vwẹ irherẹn rẹ asan ri kpenu na ri ze izobo ri bru ivwirhi vwẹ enu wẹn na vwo ze izobo vwẹ enu wẹn, ọ cha torhẹ ibeku rẹ ihwo vwẹ enu wẹn.’” 3 Ọ da vwẹ oka ọvo phia vwẹ ẹdẹ yena tanẹ: “Ọnana yen oka nẹ Jihova yen tarọ: Nighere! Agbada na cha bẹre kpo ẹkẹn ivẹ, iwurhie* rehẹ enu rọyen ki che tue kufia.”

4 Ugege rẹ ovie na vwo nyo ota rẹ ohwo rẹ Ọghẹnẹ rẹ uyota na ta kpahen agbada na vwẹ Bẹtẹl, Jeroboam da rionbọ rọyen phia vwo nẹ asan agbada na, ọ da ta: “Ovwan shabọ phiyọ!” Ugege yena, obọ rọ riẹn phia vwọsuọ na da ghọn mu,* o rhe se sio rhivwiin. 5 Etiyin agbada na da bẹre kpo ẹkẹn ivẹ, iwurhie na de tue kufia nẹ agbada na vwo nene oka rẹ ohwo rẹ Ọghẹnẹ rẹ uyota na vwọ phia womarẹ ota ri Jihova.

6 Asaọkiephana ovie na da ta kẹ ohwo rẹ Ọghẹnẹ rẹ uyota na nẹ: “Biko nene uvwe rẹ kẹ ẹroesiri ri Jihova Ọghẹnẹ wẹn,* rere wo nene uvwe nẹrhovwo nẹ e jẹ obọ mẹ rhivwin kpo ẹdia rọyen.” Ọtiọyena ohwo rẹ Ọghẹnẹ rẹ uyota na da rẹ vwọ kẹ ẹroesiri ri Jihova, obọ rẹ ovie na de rhivwin kpo ẹdia rọyen. 7 Ovie na da ta kẹ ohwo rẹ Ọghẹnẹ rẹ uyota na nẹ: “Nene uvwe kpo uwevwin mẹ rere wọ riemu, me je kẹ wẹ okẹ.” 8 Ẹkẹvuọvo ohwo rẹ Ọghẹnẹ rẹ uyota na da ta kẹ ovie na nẹ: “Wọ da tobọ kẹ vwẹ ẹbẹre ọvo rẹ uwevwin wẹn, mi che nene uwee, me je cha re ibrẹdi yẹrẹ da ame vwẹ etinẹ naa. 9 Kidie ọnana yen oborẹ Jihova ji iji rọyen kẹ vwẹ: ‘Wọ ria ibrẹdi yẹrẹ da amee, wọ je wan idjerhe ru wọ wan yanran rhivwiin.’” 10 Ọtiọyena ọ da wan idjerhe ọfa kpo, ọ rha wan idjerhe rọ wan rhe Bẹtẹl naa.

11 O vwo ọmraro ọvo rọ ghwore rọ dia Bẹtẹl, emọ rọyen da rhe uwevwin, ayen de gbikun erọnvwọn eje rẹ ohwo rẹ Ọghẹnẹ rẹ uyota na ruru vwẹ ẹdẹ yena vwẹ Bẹtẹl kẹ kugbe eta rọ ta kẹ ovie na. Ọke rẹ ayen vwo gbikun nana kẹ ọsẹ rayen nu, 12 ọsẹ rayen da nọ ayen nẹ: “Idjerhe vọ yen ọ wanre?” Ọtiọyena emọ rọyen de dje idjerhe rẹ ohwo rẹ Ọghẹnẹ rẹ uyota ro nẹ Juda rhe na wanre kẹ. 13 Ọ da ta kẹ emọ rọyen nẹ: “Ovwan muegbe rẹ ekẹkẹtẹ na kẹ vwẹ.” Ayen de muegbe rẹ ekẹkẹtẹ na vwọ kẹ, ọ da ro enu rọyen.

14 Ọ da vwọ kpahen ohwo rẹ Ọghẹnẹ rẹ uyota na, ọ da mrẹ ro chidia vwẹ otọ rẹ urhe rode ọvo. Ọ da ta kẹ nẹ: “Wẹwẹ yen ohwo rẹ Ọghẹnẹ rẹ uyota ro nẹ Juda rhe na?” Ọ da kpahen nẹ: “E mẹvwẹ.” 15 Ọ da ta kẹ nẹ: “Nene uvwe kpo rere wọ re ibrẹdi.” 16 Ẹkẹvuọvo ọ da tanẹ: “Mi che se nene uwe rhivwin yẹrẹ rhiabọreyọ edurhie wẹẹn, me je cha sa re ibrẹdi yẹrẹ nene uwe da ame vwẹ etinẹ naa. 17 Kidie Jihova vuẹ vwẹ nẹ, ‘Wọ ria ibrẹdi yẹrẹ da ame vwẹ etiyiin. Wọ wan idjerhe ru wọ wan yanran rhivwiin.’” 18 Ọtiọyena ọ da ta kẹ nẹ: Mẹvwẹ jẹ ọmraro kerẹ owẹ, amakashe ọvo vwẹ iji nana ro nẹ obọ ri Jihova rhe kẹ vwẹ nẹ, ‘Reyọ nene oma kpo uwevwin wẹn rere ọ re ibrẹdi je da ame.’” (Ọ phiẹn rẹ.) 19 Ọtiọyena o de nene kpo ra re ibrẹdi je da ame vwẹ uwevwin rọyen.

20 Ọke rẹ ayen vwo chidia imẹjẹ na, ota ri Jihova de bru ọmraro rọ reyerọ rhivwin na rhe, 21 ọ da kpare upho kpenu ta kẹ ohwo rẹ Ọghẹnẹ rẹ uyota ro nẹ Juda rhe na nẹ, “Ọnana yen oborẹ Jihova tare: ‘Kidie nẹ wo gbe vwọso urhi ri Jihova, wọ yọnrọn iji rẹ Jihova Ọghẹnẹ wẹn vwọ kẹ wẹẹ, 22 ẹkẹvuọvo wo de rhivwin ra re ibrẹdi je da ame vwẹ asan ra vuẹ wẹ kpahen nẹ, “Wọ ria ibrẹdi yẹrẹ da amee na,” e che shi orivwin wẹn phiyọ ushi rẹ esẹ wẹn ridee.’”

23 Ọke rẹ ohwo rẹ Ọghẹnẹ rẹ uyota na vwọ re je da nu, ọmraro rọ ghwore na de muegbe rẹ ekẹkẹtẹ vwọ kẹ ọmraro rọ reyọ rhivwin rhe na. 24 Etiyin ọ da ro idjerhe, ẹkẹvuọvo okpohrokpo ọvo da rhe vwa vwẹ idjerhe na, o de hwe. Orivwin rọyen hẹ idjerhe na, ekẹkẹtẹ na mudia kẹrẹ; okpohrokpo na ji mudia kẹrẹ orivwin na. 25 O vwo eshare evo re wanvrẹ re mrẹ orivwin na vwẹ idjerhe vẹ okpohrokpo na ro mudia kẹrẹ. Ayen da rhe je ta ota kpahọn vwevunrẹ orere rẹ ọmraro rọ ghwore na dia.

26 Ọke rẹ ọmraro rọ reyerọ nẹ idjerhe rhivwin kpo na vwo nyo kpahọn, ọ da ta vwẹ ugege yena nẹ: “Ọyen ohwo rẹ Ọghẹnẹ rẹ uyota ro gbe vwọso urhi ri Jihova na; kọyen Jihova vwerọ kpahotọ kẹ okpohrokpo nẹ ọ wan oma gangan ji hwe, kirobo rẹ Jihova ta kẹ.” 27 Ọ da ta kẹ emọ rọyen nẹ: “Ovwan muegbe rẹ ekẹkẹtẹ na kẹ vwẹ.” Ọtiọyena ayen de muegbe rọyen. 28 Ọ da ro idjerhe, ọ da mrẹ orivwin na vwẹ idjerhe vẹ ekẹkẹtẹ kugbe okpohrokpo na ri mudia kẹrẹ. Okpohrokpo na re orivwin na yẹrẹ wan ekẹkẹtẹ na omaa. 29 Ọmraro na de mu orivwin rẹ ohwo rẹ Ọghẹnẹ rẹ uyota na phiyọ enu rẹ ekẹkẹtẹ na, o de muo rhivwin rhe orere rọyen rere o vwere ji sho. 30 Ọtiọyena o de shi orivwin na phiyọ ushi robọ rọyen, kẹ ayen viẹ fiki rọyen nẹ: “Ọ brareọ, oniọvo mẹ!” 31 Ọke ro vwo sho nu, ọ da ta kẹ emọ rọyen nẹ: “Ọke mi de ghwu, ovwan shi vwe phiyọ asan re shi ohwo rẹ Ọghẹnẹ rẹ uyota na phiyọ. Ovwan ghwẹ ibeku mẹ kẹrẹ ibeku rọyen. 32 Ota ri Jihova rọ ta kpahen agbada na vwẹ Bẹtẹl kugbe iwevwin rẹ ẹga eje rehẹ asan ri kpenu vwẹ irere ri Sameria na che je ruẹgbaa.”

33 Ọnana dede vwọ phia nu, Jeroboam je rhẹrioma vwo nẹ idjerhe ọbrabra rọyen naa, ẹkẹvuọvo ọ je vwẹ irherẹn vwo muẹ vwọ kẹ asan ri kpenu vwẹ ohri rẹ ihwo na. Kohwo kohwo ro jere yen o vwo muẹ orherẹn, ọ me tanẹ: “E jẹ ọ dia ọvo vwẹ usun rẹ irherẹn vwọ kẹ asan ri kpenu na.” 34 Umwemwu nana rẹ uwevwin ri Jeroboam ruru na da nẹrhẹ a ghwọrọ ayen ji si ayen nẹ otọrakpọ na karekare.

14 Vwẹ ọke yena, Abaijah ọmọ ri Jeroboam kọ muọga. 2 Ọtiọyena Jeroboam da ta kẹ aye rọyen nẹ: “Biko vrẹn, wo wene irhuon wẹn, rere ayen vwo jẹ riẹn nẹ wẹwẹ aye ri Jeroboam, rere wo kpo Shailo. Nighere! Ahaijah ọmraro na hẹ etiyin. Ọyen yen ohwo rọ tare nẹ me cha dia ovie vwẹ enu rẹ ihwo nana. 3 Reyọ ibrẹdi ihwe, ikeki, kugbe ọgọ rẹ ame ọnyọn nene oma rere wo bro ra. Kọ cha vuẹ wẹ obo re cha phia kẹ ọmọ na.”

4 Aye ri Jeroboam de ru obo rọ tare na. O de vrẹn, o de kpo Shailo, o de te uwevwin rẹ Ahaijah. Ahaijah tẹnrovi obaro jẹ ọ sa mrorẹẹ, kidie ọ ghwore.

5 Ẹkẹvuọvo Jihova vuẹ Ahaijah jovwo re nẹ: “Nighere, aye ri Jeroboam bru we cha cha rhe nọ wẹn kpahen ọmọ rọyen, kidie ọmọ na muọga. Me cha vuẹ wẹ oborẹ wọ cha ta kẹ.* Ọke rọ da rhe, o che ru oma rọyen vwẹ idjerhe re vwo je vughe.”

6 Ugege rẹ Ahaijah vwo nyo edo rẹ ichiyin rẹ aye ri Jeroboam rọ vwọ cha asan anurhoro na, ọ da tanẹ: “Ro uwevwin rhe, aye ri Jeroboam. Diesorọ wo vwo ru oma wẹn vwẹ idjerhe re vwo juwe evughe? E ji vwe nẹ me vuẹ wẹ ovuẹ ọgangan ọvo. 7 Yanran ra vuẹ Jeroboam nẹ, ‘Ọnana yen oborẹ Jihova Ọghẹnẹ rẹ Izrẹl tare: “Me sane owẹ vwo nẹ ohri rẹ ihwo wẹn rere me vwẹ owẹ ru osun vwẹ enu rẹ ihwo mẹ Izrẹl. 8 Me da bẹrẹ uvie na vwo nẹ uwevwin ri Devid, me da vwọ kẹ wẹ. Ẹkẹvuọvo wọ họhọ odibo mẹ Devid, rọ yọnrọn iji mẹ, yan nene uvwe vẹ ubiudu rọyen eje ji ru obo ri shephiyọ ọvo vwẹ ẹro mẹẹ. 9 Ẹkẹvuọvo wo ru obo re bra vrẹ ọ rẹ ihwo eje re kobaro kẹ wẹ, wo de ru ọghẹnẹ ọfa kugbe ema rẹ utehru* kẹ oma wẹn vwọ kpare ophu mẹ, mẹvwẹ yen wo chukoku na. 10 Fikirẹ ọyena, me cha so okpetu kẹ uwevwin ri Jeroboam, me cha ghwọrọ* kọmọshare kọmọshare* vwo nẹ uwevwin ri Jeroboam, te i ri jẹ ọchuko evwo kugbe evwiẹrẹ vwẹ Izrẹl, me cha kua uwevwin ri Jeroboam fiotọ kirobo rẹ ohwo ghwẹ isọn bẹsiẹ rọ vwọ ghwẹ ejobi re! 11 Kohwo kohwo rọ dia ọ ri Jeroboam ro ghwuru vwevunrẹ orere, eranko cha riọ; kohwo kohwo ro ghwuru vwevunrẹ aghwa, ephran rẹ idjuvwu na cha riọ kidie Jihova tarọ nure.”’

12 “Asaọkiephana gbe vrẹn rere wo kpo uwevwin wẹn. Ọke wo de phi owọ phiyọ orere na, ọmọ na ko che ghwu. 13 Izrẹl eje che vwere ji sho kidie ọyen ọvo yen e che shi phiyọ ushi vwẹ orua ri Jeroboam, kidie vwẹ oma rọyen ọvo yen Jihova Ọghẹnẹ rẹ Izrẹl da mrẹ orọnvwọn ro yovwirin vwẹ uwevwin ri Jeroboam. 14 Jihova cha vwẹ ovie ọvo vwo mu kẹ oma rọyen vwẹ enu rẹ Izrẹl rọ cha ghwọrọ uwevwin ri Jeroboam* vwo nẹ ẹdẹ yena yanran, e, tobọ vwẹ ọke nana. 15 Jihova cha teyen Izrẹl hwe kerẹ okankọn rọ nuẹcha nuẹkpo vwevunrẹ ame, o che ghwie Izrẹl vwo nẹ otọ oyoyovwin rọ vwọ kẹ esẹ rayen ride, kọ cha hra ayen wanvrẹ Urhie na* kidie ayen vwẹ ekpọ rẹ ẹga* rayen vwo vi vwọ kpare ophu ri Jihova. 16 Kọ cha kpairoro vrẹ Izrẹl fikirẹ imwemwu rẹ Jeroboam ruru rọ je nẹrhẹ Izrẹl ru.”

17 Ọtiọyena aye ri Jeroboam de vrẹn, ọ da ro idjerhe, ọ da rhe Tiẹza. O vwo te asan anurhoro rẹ uwevwin na, ọmọ na de ghwu. 18 Ọtiọyena ayen de sho, Izrẹl eje de vwere kirobo rẹ Jihova tare womarẹ odibo rọyen Ahaijah ọmraro na.

19 Ikuegbe rẹ akpeyeren ri Jeroboam ri chekọ, obo ro phi ofovwin wan vẹ obo ro sun wan, e si ayen phiyọ ọbe rẹ ikuegbe rẹ ọke rẹ ivie rẹ Izrẹl. 20 Uchọke* rẹ Jeroboam sunru da dia ẹgbukpe 22, ọyena vwọ wan nu, o de ghwu kerẹ esẹ rọyen ride; ọmọ rọyen Nedab da rhe dia ovie vwẹ ẹdia rọyen.

21 Vwẹ uvwre rẹ ọke nana, jẹ Rehoboam ọmọ ri Solomọn dia ovie vwẹ Juda re. Rehoboam hẹ ẹgbukpe 41 vwẹ ọke rọ vwọ dia ovie, o sunru ẹgbukpe 17 vwẹ Jerusalẹm, orere rẹ Jihova sanere vwẹ ivwiẹ rẹ Izrẹl eje kerẹ asan ra vwẹ odẹ rọyen se. Odẹ rẹ oni ri Rehoboam yen Neama ohwo rẹ Amọn. 22 Jẹ Juda ruẹ obo re brare vwẹ ẹro ri Jihova, womarẹ imwemwu rẹ ayen ruru ayen da kparọ ophu vwọ vrẹ oborẹ esẹ rayen ride ruru. 23 Ayen je bọn asan ri kpenu kẹ oma rayen, ichivwo rẹ ẹga, kugbe ekpọ rẹ ẹga* vwẹ enu rẹ kugbenu kugbenu otete ro kpenu kugbe vwẹ otọ rẹ kurhe kurhe rode. 24 Eshare ri gbe igberadja vwẹ asan rẹ ayen da ga ẹga* jehẹ otọ na. Ayen ru iruemu rẹ ẹgua eje rẹ ẹgborho rẹ Jihova djẹ nẹ obaro rẹ ihwo rẹ Izrẹl na ruẹ.

25 Vwẹ ukpe riyorin rẹ Ovie Rehoboam, Ovie Shaishak rẹ Ijipt da rhe vwọso Jerusalẹm. 26 Ọ ghwẹ efe rẹ uwevwin ri Jihova kugbe efe rẹ uwevwin* rẹ ovie na reyọ. Ọ ghwẹ erọnvwọn ejobi ji te ekpọfia rẹ oro eje rẹ Solomọn ruru. 27 Ọtiọyena Ovie Rehoboam de ru ekpọfia rẹ ẹrovwo vwo wene ayen, ọ da vwẹ ayen kẹ inotu rẹ orhẹrẹ* na re rhẹrẹ asan ra wan rua uwevwin rẹ ovie na. 28 Kọke kọke rẹ ovie na da rhe uwevwin ri Jihova, ihwo re rhẹrẹ na ki muẹ ayen, ayen de ru nu, ayen mi mu ayen rhivwin kpo uvun rẹ ihwo re rhẹrẹ na.

29 Ikuegbe rẹ akpeyeren ri Rehoboam ri chekọ, erọnvwọn eje ro ruru, e rhe si ayen phiyọ ọbe rẹ ikuegbe rẹ ọke rẹ ivie ri Juda? 30 Ọkieje yen Rehoboam vẹ Jeroboam vwo phi ofovwin. 31 Rehoboam de ghwu kerẹ esẹ rọyen ride, e de sho kugbe esẹ rọyen ride vwẹ Orere ri Devid. Odẹ rẹ oni rọyen Neama ohwo rẹ Amọn. Ọmọ rọyen Abaijam* da rhe dia ovie vwẹ ẹdia rọyen.

15 Vwẹ ukpe 18 rẹ Ovie Jeroboam ọmọ ri Nibat, Abaijam da rhe dia ovie vwẹ enu rẹ Juda. 2 O sunru vwẹ Jerusalẹm ẹgbukpe erha. Odẹ rẹ oni rọyen Meaka, uvwrọmọ rẹ Abishalọm. 3 Ọ da yan vwevunrẹ imwemwu eje rẹ ọsẹ rọyen rọ kobaro kẹ ruru, ubiudu rọyen dia ọsoso kpahen* Jihova Ọghẹnẹ rọyen kerẹ ubiudu ri Devid ọsẹ rọyen rodee. 4 Ẹkẹvuọvo fikirẹ Devid, Jihova Ọghẹnẹ rọyen da vwẹ urhukpẹ kẹ vwẹ Jerusalẹm rọ vwọ vwẹ ọmọ rọyen vwo mu ọke ro vwo no nu, ọ da nẹrhẹ Jerusalẹm je dia. 5 Kidie Devid ru obo ri shephiyọ vwẹ ẹro ri Jihova, ọ rhẹrioma vwo nẹ orọnvwọn vuọvo ro ji iji rọyen kẹ vwẹ ẹdẹ rẹ akpọ rọyen ejee, jokparẹ ota ro shekpahen Yuraya ohwo ri Hẹt na. 6 Ofovwin diarọ vwẹ uvwre rẹ Rehoboam vẹ Jeroboam vwẹ ẹdẹ rẹ akpọ rọyen eje.

7 Ikuegbe rẹ akpeyeren rẹ Abaijam ri chekọ, erọnvwọn eje ro ruru, e rhe si ayen phiyọ ọbe rẹ ikuegbe rẹ ọke rẹ ivie ri Juda? Ofovwin je dia uvwre rẹ Abaijam vẹ Jeroboam. 8 Abaijam de ghwu kerẹ esẹ rọyen ride, e de sho phiyọ Orere ri Devid; ọmọ rọyen Esa da rhe dia ovie vwẹ ẹdia rọyen.

9 Vwẹ ukpe 20 rẹ Ovie Jeroboam rẹ Izrẹl, Esa da tuẹn usuon phiyọ vwẹ enu rẹ Juda. 10 O sunru ẹgbukpe 41 vwẹ Jerusalẹm. Odẹ rẹ oni rọyen rode Meaka, uvwrọmọ rẹ Abishalọm. 11 Esa ru obo ri shephiyọ vwẹ ẹro ri Jihova kerẹ Devid ọsẹ rọyen rode. 12 Ọ djẹ eshare ri gbe igberadja vwẹ asan rẹ ayen da ga ẹga* vwo nẹ otọ na, o de si edjọ ri tuẹn ohwo oma* eje rẹ esẹ rọyen ride ruru vwo no. 13 Ọ tobọ si Meaka oni rọyen rode nẹ ẹdia rọyen kerẹ oni rẹ ovie kidie o ru ẹdjọ ro tuẹn ohwo oma ọvo rẹ ayen reyọ vwọ ga ọkpọ rẹ ẹga* na. Esa nyavwe ẹdjọ ro tuẹn ohwo oma na she je torhẹ vwẹ Iyara ri Kidrọn. 14 Ẹkẹvuọvo e si asan ri kpenu na noo. Dedena, ubiudu rẹ Esa dia ọsoso kpahen* Jihova vwẹ akpọ* rọyen eje. 15 Ọ da ghwẹ erọnvwọn rọ vẹ ọsẹ rọyen ru fon rhe uwevwin ri Jihova—idọnọ efuanfon, iro, kugbe ekuakua efa.

16 Ọkieje yen ofovwin vwọ dia vwẹ uvwre rẹ Esa kugbe Beasha ovie rẹ Izrẹl. 17 Ọtiọyena Ovie Beasha rẹ Izrẹl da rhe vwọso Juda, ọ da tuẹn ẹbọn rẹ Rema* phiyọ rere ohwo vuọvo vwo jẹ ekogho rẹ Ovie Esa ri Juda ẹruọ yẹrẹ e vrẹn no. 18 Ọtiọyena Esa da ghwẹ idọnọ efuanfon eje kugbe iro ri chekọ vwẹ asan ra ghwẹ efe phiyọ vwẹ uwevwin ri Jihova kugbe asan ra ghwẹ efe phiyọ vwẹ uwevwin* rẹ ovie na, o de mu ayen kẹ idibo rọyen. Ovie Esa de ji ayen bru Bẹn-hedad ọmọ ri Tabrimọn ọmọ ri Hiziọn, ovie ri Siria rọ dia Damaskọs ra, nẹ: 19 “Mẹ vẹ owẹ vwo obọechuro,* ọsẹ mẹ vẹ ọsẹ wẹn ji vwo obọechuro. Me vwẹ okẹ rẹ idọnọ efuanfon kugbe iro vwo rhe we. Yanrhe, phan obọechuro ru wọ vẹ Ovie Beasha rẹ Izrẹl vwori,* rere o vwo siomareyọ nuvwe.” 20 Bẹn-hedad da kerhọ rẹ Ovie Esa, o de ji inotu rẹ ituofovwin rọyen re nene irere rẹ Izrẹl họnre, ayen da reyọ Aijọn, Dan, Ebẹl-bẹt-meaka, Kinẹrẹt eje, kugbe otọ ri Naftalai eje. 21 Ọke rẹ Beasha vwo nyo kpahọn, o de brokpakpa dobọ rẹ ẹbọn rẹ Rema ji,* ọ da ra dia Tiẹza. 22 Ovie Esa de se Juda eje—ọ yanjẹ ohwo vuọvo vwoo—ayen de mu ikuta kugbe igedu ri Rema rẹ Beasha vwọ bọn jovwo na reyọ, Ovie Esa da reyọ ayen vwọ bọn* Giba vwẹ Bẹnjamin, kugbe Mizpa.

23 Ikuegbe rẹ akpeyeren rẹ Esa eje ri chekọ, ogangan rọyen eje, erọnvwọn eje ro ruru kugbe irere rọ bọnre,* e rhe si ayen phiyọ ọbe rẹ ikuegbe rẹ ọke rẹ ivie ri Juda? Ẹkẹvuọvo vwẹ ọke rẹ ọghwo rọyen, ọga ọvo de muo vwẹ awọ. 24 Esa de ghwu kerẹ esẹ rọyen ride, e de sho kugbe ayen vwẹ Orere ri Devid ọsẹ rọyen rode; ọmọ rọyen Jẹhoshafat da rhe dia ovie vwẹ ẹdia rọyen.

25 Nedab ọmọ ri Jeroboam da rhe dia ovie vwẹ enu rẹ Izrẹl vwẹ ukpe rivẹ rẹ Ovie Esa ri Juda, o de sun vwẹ enu rẹ Izrẹl vwẹ ẹgbukpe ivẹ. 26 O de muomaphiyọ obo re brare eruo vwẹ ẹro ri Jihova, ọ yan nene idjerhe rẹ ọsẹ rọyen ji ru oka rẹ imwemwu rẹ ọsẹ rọyen nẹrhẹ Izrẹl ru. 27 Beasha ọmọ rẹ Ahaijah rẹ uwevwin rẹ Isaka da ruero kpahọn, Beasha da teyọn hwe vwẹ Gibẹtọn rẹ ihwo ri Filistia, jẹ Nedab vẹ Izrẹl eje gbariariẹ Gibẹtọn phiyọ. 28 Ọtiọyena Beasha da teyọn hwe vwẹ ukpe rerha rẹ Ovie Esa ri Juda, ọ da rhe dia ovie vwẹ ẹdia rọyen. 29 Ọ ghwa vwọ dia ovie nu, ọ da teyen ihwo rẹ uwevwin ri Jeroboam eje hwe. Ọ yanjẹ ohwo vuọvo rọ wẹn rọ dia ọ ri Jeroboam vwoo; ọ ghwọrọ ayen vwo nene ota rẹ Jihova tare womarẹ odibo rọyen Ahaijah rẹ ohwo ri Shailo na. 30 Ọnana phiare fikirẹ umwemwu rẹ Jeroboam ruru rọ vwọ nẹrhẹ Izrẹl ru umwemwu kugbe kidie nẹ ọ kpare ophu ri Jihova Ọghẹnẹ rẹ Izrẹl gangan. 31 Ikuegbe rẹ akpeyeren ri Nedab ri chekọ, erọnvwọn eje ro ruru, e rhe si ayen phiyọ ọbe rẹ ikuegbe rẹ ọke rẹ ivie rẹ Izrẹl? 32 Ọkieje yen ofovwin vwọ dia vwẹ uvwre rẹ Esa vẹ Ovie Beasha rẹ Izrẹl.

33 Vwẹ ukpe rerha rẹ Ovie Esa ri Juda, Beasha ọmọ rẹ Ahaijah da rhe dia ovie vwẹ enu rẹ Izrẹl eje vwẹ Tiẹza, o de sun vwẹ ẹgbukpe 24. 34 Ẹkẹvuọvo o de muomaphiyọ obo re brare eruo vwẹ ẹro ri Jihova, ọ da yan nene idjerhe ri Jeroboam ji ru oka rẹ imwemwu rọ nẹrhẹ Izrẹl ru.

16 Ota ri Jihova kpahen Beasha de bru Jihu ọmọ ri Hanenai rhe tanẹ: 2 “Me kpare owẹ kpenu vwo nẹ ekpẹn me da vwẹ owẹ mu osun vwẹ enu rẹ ihwo mẹ Izrẹl, ẹkẹvuọvo wọ yan nene idjerhe ri Jeroboam wọ da nẹrhẹ ihwo mẹ Izrẹl ru umwemwu te ẹdia rẹ ayen da kpare ovwẹ ophu fikirẹ umwemwu rayen. 3 Ọtiọyena me cha ghwọrọ Beasha kugbe uwevwin rọyen, me cha nẹrhẹ uwevwin rọyen dia kerẹ uwevwin ri Jeroboam ọmọ ri Nibat. 4 Kohwo kohwo rọ dia ọ ri Beasha ro ghwuru vwẹ orere, eranko cha riọ; kohwo kohwo rọ dia ọrọyen ro ghwuru vwẹ aghwa, ephran rẹ idjuvwu na cha riọ.”

5 Ikuegbe rẹ akpeyeren ri Beasha ri chekọ, obo ro ruru kugbe ogangan rọyen, e rhe si ayen phiyọ ọbe rẹ ikuegbe rẹ ọke rẹ ivie rẹ Izrẹl? 6 Ọyena vwọ wan nu, Beasha de ghwu kerẹ esẹ rọyen ride, e de sho phiyọ Tiẹza; Ilah ọmọ rọyen da rhe dia ovie vwẹ ẹdia rọyen. 7 Vwọba, Jihova womarẹ ọmraro Jihu ọmọ ri Hanenai ghwoghwo ẹdjọeguo rọyen kpahen Beasha kugbe uwevwin rọyen fikirẹ erọnvwọn ebrabra eje ro ruru vwẹ ẹro ri Jihova womarẹ ọ vwọ reyọ iruo robọ rọyen vwọ kparọ ophu kirobo rẹ uwevwin ri Jeroboam ruru, kugbe kidie nẹ ọ teyenrọ* hwe.

8 Vwẹ ukpe 26 rẹ Ovie Esa ri Juda, Ilah ọmọ ri Beasha da rhe dia ovie vwẹ enu rẹ Izrẹl vwẹ Tiẹza, o sunru ẹgbukpe ivẹ. 9 Odibo rọyen Zimrai, onotu rẹ ẹbẹre ọvo rẹ ituofovwin re gua ekpẹrẹ rẹ ofovwin rọyen da ruero kpahọn rọ je vwọ hẹ Tiẹza da udi vroma vwẹ uwevwin rẹ Aza, ohwo rọ vwẹrote evwruwevwin na vwẹ Tiẹza. 10 Zimrai da rhe, ọ da teyọn she, o de hwe ghwu vwẹ ukpe 27 rẹ Ovie Esa ri Juda, ọ da rhe dia ovie vwẹ ẹdia rọyen. 11 Ọke rọ vwọ dia ovie nu, ugege ro vwo chidia ekete rọyen, ọ da teyen ihwo eje rehẹ uwevwin ri Beasha hwe. Ọ yanjẹ ọshare vuọvo* vwoo, te ọ dia ihwo rẹ orua rọyen* yẹrẹ igbeyan rọyen. 12 Enẹ kọyen Zimrai ghwọrọ uwevwin ri Beasha eje vwo nene ota rẹ Jihova tare kpahen Beasha womarẹ Jihu ọmraro na. 13 Ọnana phiare fikirẹ imwemwu eje rẹ Beasha kugbe ọmọ rọyen Ilah ruru kugbe imwemwu rẹ ayen nẹrhẹ Izrẹl ru rẹ ayen vwọ reyọ edjọ rayen ri fiemuu vwọ kpare ophu rẹ Jihova Ọghẹnẹ rẹ Izrẹl. 14 Ikuegbe rẹ akpeyeren rẹ Ilah ri chekọ, erọnvwọn eje ro ruru, e rhe si ayen phiyọ ọbe rẹ ikuegbe rẹ ọke rẹ ivie rẹ Izrẹl?

15 Vwẹ ukpe 27 rẹ Ovie Esa ri Juda, Zimrai da dia ovie ẹdẹ ighwrẹn vwẹ Tiẹza, jẹ ituofovwin na wonphiyọ* asan rẹ ayen de che nene Gibẹtọn rẹ ihwo ri Filistia họnre. 16 Ọke vwọ yanran na, isodje ri wonphiyọ asan na de nyo rẹ ihwo vwọ tanẹ: “Zimrai ruero, ọ je teyen ovie na hwe re.” Ọtiọyena Izrẹl eje da vwẹ Ọmrai, onotu rẹ otuofovwin na mu ovie vwẹ enu rẹ Izrẹl vwẹ ẹdẹ yena vwẹ asan rẹ ayen wonphiyọ na. 17 Ọmrai kugbe Izrẹl eje re vẹ ọyen gba herọ de vrẹn nẹ Gibẹtọn, ayen da gba riariẹ Tiẹza. 18 Ọke rẹ Zimrai vwọ mrẹ nẹ e phi orere na kparobọ re, ọ da ro uwevwin ro kpenu ra gbogba riariẹ rẹ uwevwin* rẹ ovie na, ọ da torhẹ uwevwin na dje oma rọyen, o de ghwu. 19 Ọnana phiare fikirẹ umwemwu robọ rọyen ro ruru ro vwo ru obo re brare vwẹ ẹro ri Jihova rọ vwọ yan nene idjerhe ri Jeroboam kugbe fikirẹ umwemwu rọ nẹrhẹ Izrẹl ru. 20 Ikuegbe rẹ akpeyeren ri Zimrai ri chekọ kugbe ero rọ roro, e rhe si ayen phiyọ ọbe rẹ ikuegbe rẹ ọke rẹ ivie rẹ Izrẹl?

21 Ọke yena yen ihwo rẹ Izrẹl vwọ ghare oma kpo ẹkẹn ivẹ. Ẹbẹre ọvo rẹ ihwo na de nene Tibnai ọmọ ri Gainat, re guọnọ vwo mu ovie, ẹbẹre ro chekọ de rhe nene Ọmrai. 22 Ẹkẹvuọvo ihwo ri nene Ọmrai de phi ihwo ri nene Tibnai ọmọ ri Gainat kparobọ. Ọtiọyena Tibnai de ghwu, Ọmrai da rhe dia ovie.

23 Vwẹ ukpe 31 rẹ Ovie Esa ri Juda, Ọmrai da rhe dia ovie vwẹ enu rẹ Izrẹl, o sunru ẹgbukpe 12. O sunru ẹgbukpe esan vwẹ Tiẹza. 24 Ọ vwẹ italẹnti* ivẹ rẹ idọnọ efuanfon vwọ dẹ ugbenu ri Sameria vwo mie Shima, ọ da bọn orere ọvo phiyọ enu rẹ ugbenu na. O se orere rọ bọnre na Sameria* vwo nene odẹ ri Shima ohwo* ro vwo ugbenu na. 25 Ọmrai de muomaphiyọ obo re brare eruo vwẹ ẹro ri Jihova, ọ bra vrẹ ihwo eje re kobaro kẹ. 26 Ọ yan nene idjerhe ri Jeroboam ọmọ ri Nibat eje kugbe imwemwu rọ nẹrhẹ Izrẹl ru rẹ ayen vwọ reyọ edjọ rayen ri fiemuu vwọ kpare ophu ri Jihova Ọghẹnẹ rẹ Izrẹl. 27 Ikuegbe rẹ akpeyeren rẹ Ọmrai ri chekọ, obo ro ruru kugbe iruo ride rọyen, e rhe si ayen phiyọ ọbe rẹ ikuegbe rẹ ọke rẹ ivie rẹ Izrẹl? 28 Ọmrai de ghwu kerẹ esẹ rọyen ride, e de sho phiyọ Sameria; ọmọ rọyen Ehab da rhe dia ovie vwẹ ẹdia rọyen.

29 Ehab ọmọ rẹ Ọmrai da rhe dia ovie vwẹ enu rẹ Izrẹl vwẹ ukpe 38 rẹ Ovie Esa ri Juda, Ehab ọmọ rẹ Ọmrai sunru ẹgbukpe 22 vwẹ enu rẹ Izrẹl vwẹ Sameria. 30 Ehab ọmọ rẹ Ọmrai bra vrẹ ihwo eje re kobaro kẹ vwẹ ẹro ri Jihova. 31 O niro frae ro vwo nene imwemwu ri Jeroboam ọmọ ri Nibat, ọ je reyọ Jẹzibẹl ọmọtẹ rẹ Ẹtbel ovie ri Saidọn vwo ru aye, ọ da tuẹn Bel ẹga phiyọ je vwẹ uyovwin kpotọ kẹ. 32 Vwọba, ọ so agbada kẹ Bel vwẹ uwevwin* ri Bel rọ bọnre vwẹ Sameria. 33 Ehab ji ru ọkpọ rẹ ẹga.* Ehab ru obo re kpare Jihova Ọghẹnẹ rẹ Izrẹl ophu vwọ vrẹ ivie rẹ Izrẹl eje re kobaro kẹ.

34 Vwẹ ọke rọyen, Haiẹl ohwo ri Bẹtẹl da rhoma bọn Jẹriko. Ọmọkpako rọyen Abairam yen ọ vwọ vwẹ uchivwo rọyen vi, ubrevwiẹ rọyen Sigọb kọyen ọ rha vwọ ghwẹ ẹchẹ rọyen phiyọ, vwo nene ota rẹ Jihova tare womarẹ Joshua ọmọ ri Nọn.

17 Asaọkiephana Ẹlaijah* ohwo ri Tishbi rọ dia Giliẹd da ta kẹ Ehab nẹ: “Rẹ Jihova Ọghẹnẹ rẹ Izrẹl re me ga* vwọ herọ na, vwẹ uvwre rẹ ikpe nana, irho che rho yẹrẹ osio cha rhọọ, jokpanẹ ke me tarọ!”

2 Ota ri Jihova de bro rhe, nẹ: 3 “Vrẹn nẹ etinẹ rere wo kpo ẹbẹre ọnre va nẹcha, wo siomanu vwẹ Iyara* ri Kirit vwẹ ẹbẹre ọnre va nẹcha ri Jọdan. 4 Wọ me da ame vwo nẹ ivwori na, me cha vwẹ iji kẹ ikpemu na nẹ i mu emu rhe we vwẹ etiyin.” 5 Ugege yena ọ da yanran, o de ru nene ota ri Jihova; ọ da yanran, ọ da dia kẹrẹ Iyara* ri Kirit, ẹbẹre ọnre va nẹcha ri Jọdan. 6 Ikpemu na ki muẹ ibrẹdi vẹ eranvwe rhe vwẹ urhiọke kugbe ovwọnvwọn, ame rẹ ivwori na yen ọ dare. 7 Ẹkẹvuọvo ẹdẹ evo vwọ wan nu, ame rẹ ivwori na da kpọ yamu, kidie osio rhọre vwẹ otọ naa.

8 Ota ri Jihova de bro rhe nẹ: 9 “Vrẹn rere wo kpo Zarefat ri Saidọn, rere wọ dia etiyin. Nighere! Me cha vuẹ ayeuku ọvo vwẹ etiyin nẹ ọ vwẹ emu kẹ wẹ.” 10 Ọtiọyena o de vrẹn, o de kpo Zarefat. Ọke ro vwo te anurhoro rẹ orere na, ayeuku ọvo tọrọ irhe vwẹ etiyin. Ọtiọyena o de se, ọ da ta kẹ nẹ: “Biko, jẹ amame phiyọ uko kẹ vwẹ rere me da.” 11 Ọke rẹ aye na vwọ yanran ra jẹ ame na, ọ da kpare unu vuẹ nẹ: “Biko je reyọ ibrẹdi ọvo nene oma rhe vwe.” 12 Ọtiọyena aye na da ta kẹ nẹ: “Rẹ Jihova Ọghẹnẹ wẹn vwọ herọ na, mi vwo ibrẹdii, jokparẹ imiflawa rọhẹ evunrẹ ochẹ rode na kugbe emevwri rọhẹ ochẹ otete na. Asaọkiephana me tọrọ imirhe evo, ke me cha yanran re ru emu kẹ oma mẹ vẹ ọmọ mẹ. Avwanre da re nu, kẹ avwanre che ghwu.”

13 Ẹlaijah da ta kẹ nẹ: “Wo jẹ oshọ mu wee. Yanran rere wo ru obo ru wọ tare na. Ẹkẹvuọvo ka vwẹ iflawa ro chekọ na vwo ru imibrẹdi rọ pha ghorien ghorien kẹ vwẹ rere wọ reyọ rhe vwe. Wo de ru ọyena nu, ku wo se ru emu kẹ oma wẹn vẹ ọmọ wẹn. 14 Kidie ọnana yen oborẹ Jihova Ọghẹnẹ rẹ Izrẹl tare: ‘Ochẹ rẹ iflawa rode na che ree, ochẹ otete rẹ evwri na cha kpọ yamuu rhirin re te ọke rẹ Jihova cha vwọ nẹrhẹ osio rhọ kuotọ na.’” 15 Ọtiọyena ọ da yanran, o de ru kirobo rẹ Ẹlaijah tare, aye na vẹ Ẹlaijah kugbe evwruwevwin rọyen da mrẹ emu re vwẹ ẹdẹ buebun. 16 Ochẹ rẹ iflawa rode na rerii, ochẹ rẹ evwri otete na kpọ yamuu, vwo nene ota rẹ Jihova womarẹ Ẹlaijah ta.

17 Erọnvwọn nana vwọ wan nu, ọmọ rẹ aye ro vwo uwevwin na de she ro ọga, ọga na ganre mamọ te ẹdia ro de fun ẹwẹn. 18 Ọtiọyena aye na da ta kẹ Ẹlaijah nẹ: “Die yen wọ mrẹ kpahen ovwẹ,* E ohwo rẹ Ọghẹnẹ rẹ uyota na? Wọ rhere rhe karophiyọ ovwẹ oruchọ mẹ je teyen ọmọ mẹ hwe?” 19 Ẹkẹvuọvo ọ da ta kẹ aye na nẹ: “Mu ọmọ wẹn na kẹ vwẹ.” Ọtiọyena o de mu ọmọ na nẹ abọ rọyen, o de muo kpo uvun rẹ obenu rọ dia na, o de muo sherhẹn ehwa robọ rọyen. 20 O de kperi se Jihova nẹ: “E Jihova Ọghẹnẹ mẹ, wọ je sua ọmiaovwẹ kẹ ayeuku re me dia uwevwin rọyen na womarẹ wọ vwọ teyen ọmọ rọyen hwe?” 21 Etiyin ọ da riẹn oma rọyen phiyọ enu rẹ ọmọ na abọ erha, o de kperi se Jihova nẹ: “E Jihova Ọghẹnẹ mẹ, biko jẹ arhọ* rẹ ọmọ nana rhivwin bro rhe.” 22 Jihova da kerhọ rẹ oyare rẹ Ẹlaijah, arhọ rẹ ọmọ na de rhivwin bro rhe, o de vrẹn.* 23 Ẹlaijah de mu ọmọ na vwo nẹ uvun rẹ obenu na wontọ ro uwevwin na, o de muo kẹ oni rọyen; Ẹlaijah da ta: “No, ọmọ wẹn vrẹn re.” 24 Etiyin aye na da ta kẹ Ẹlaijah nẹ: “Asaọkiephana me riẹnre nẹ wẹ ghene ohwo rẹ Ọghẹnẹ, nẹ ota ri Jihova rọhẹ unu wẹn uyota.”

18 Ọke evo vwọ wan nu, vwẹ ukpe rerha, ota ri Jihova de bru Ẹlaijah rhe nẹ: “Yanran ra vwẹ oma wẹn phia kẹ Ehab, me cha nẹrhẹ osio rhọ kuotọ na.” 2 Ọtiọyena Ẹlaijah da yanran ra vwomaphia kẹ Ehab, jẹ owẹnvwe na fiẹ gangan vwẹ Sameria.

3 Vwẹ uvwre rẹ ọke yena, Ehab de se Obedaya rọ vwẹrote evwruwevwin na. (Asaọkiephana Obedaya djoshọ ri Jihova gangan, 4 ọke rẹ Jẹzibẹl vwọ teyan* emraro ri Jihova hwe, Obedaya da reyọ emraro 100, o de si ayen nu ẹkuẹko 50 vwẹ inu rẹ ukuta, ọ da vwẹ ibrẹdi vẹ ame kẹ ayen.) 5 Ọtiọyena Ehab da ta kẹ Obedaya nẹ: “Wan otọ na, kpo igbugbu rẹ ame na eje kugbe iyara* na eje. Ọkiọvo avwanre sa mrẹ odin ro che te vwọ ghẹrẹ iyesi vẹ eranvwe re se imiu* na rere eranvwe rẹ avwanre eje vwo jeghwo.” 6 Ọtiọyena ayen da ghare oma rayen phiyọ otọ rẹ ayen cha wan na. Ehab ọvo da wan ẹbẹre ọvo, Obedaya ọvo da rha wan ẹbẹre ro chekọ.

7 Obedaya vwọ hẹ idjerhe yanran na, Ẹlaijah da vwa. O de vughe vwẹ ugege yena, o de she bọvwọn opharo rhuotọ, ọ da ta: “Ọnana owẹ, ọrovwovwe Ẹlaijah?” 8 Ọ da kpahen kẹ nẹ: “E omẹvwẹ. Yanran ra vuẹ ọrovwowe nẹ: ‘Ẹlaijah hẹ etinẹ.’” 9 Ẹkẹvuọvo Obedaya da tanẹ: “Umwemwu vọ yen mi ruru wọ vwọ reyọ odibo wẹn vwọ kpahotọ kẹ Ehab nẹ ọ teyen ovwẹ hwe? 10 Rẹ Jihova Ọghẹnẹ wẹn vwọ herọ na, o vwo ẹgborho yẹrẹ uvie vuọvo rẹ ọrovwovwe jẹ ihwo e jo ra ra guọnọ owẹẹ. Ọke rẹ ayen da tanẹ, ‘Ọ hẹ etinẹẹ nu,’ ọ me nẹrhẹ uvie na kugbe ẹgborho na duvwun iyorin nẹ ayen sa guọnọ owẹ mrẹẹ. 11 Asaọkiephana wọ tanẹ, ‘Yanran rere wọ vuẹ ọrovwowe nẹ: “Ẹlaijah hẹ etinẹ.”’ 12 Ọke me da yanjẹ uwe vwo, ẹwẹn ri Jihova che mu we yanran kpo asan re me cha riẹẹn, ọke re me da vuẹ Ehab ọ rha mrẹ wẹẹ, aphro herọọ, ọ cha teyen ovwẹ hwe. Dedena, nẹ ọke eghene mẹ rhe ọyen odibo wẹn vwọ djoshọ ri Jihova. 13 A je rhe vuẹ ọrovwovwe kpahen obo ri mi ruru ọke rẹ Jẹzibẹl vwọ teyan emraro ri Jihova hwe, obo mi si emraro 100 ri Jihova nu, ri mi vwo phi ayen phiyọ unu rẹ ukuta ẹkuẹko 50 je vwẹ ibrẹdi vẹ ame kẹ ayen? 14 Ẹkẹvuọvo asaọkiephana wọ tanẹ, ‘Yanran ra vuẹ ọrovwowe nẹ: “Ẹlaijah hẹ etinẹ.”’ O che juvwe ẹteyọn hwee.” 15 Ẹkẹvuọvo Ẹlaijah da tanẹ: “Rẹ Jihova rẹ otuofovwin re me ga* vwọ herọ na, nonẹna me cha vwẹ oma mẹ phia kẹ.”

16 Ọtiọyena Obedaya da yanran ra vwa Ehab, ọ da vuẹ, Ehab da yanran ra vwa Ẹlaijah.

17 Ugege rẹ Ehab vwọ mrẹ Ẹlaijah, ọ da ta kẹ nẹ: “Ọnana owẹ, ọ rọ ghwa okpetu rode cha Izrẹl na?”

18 Ọtiọyena ọ da tanẹ: “Me ghwa okpetu rhe Izrẹẹl, ẹkẹvuọvo wẹ vẹ uwevwin rẹ ọsẹ wẹn yen ghwa okpetu na rhe, kidie ovwan kpairoro vrẹ iji ri Jihova, ovwan de nene Bel. 19 Asaọkiephana se Izrẹl eje bru vwe rhe vwẹ Ugbenu ri Kamẹl, ọtiọyen ji te emraro ri Bel 450 kugbe emraro 400 rẹ ọkpọ rẹ ẹga* na re riemu vwẹ imẹjẹ ri Jẹzibẹl.” 20 Ọtiọyena Ehab da vwẹ ovuẹ rhe ihwo rẹ Izrẹl eje ji se emraro na koko vwẹ Ugbenu ri Kamẹl.

21 Ọyena vwọ wan nu, Ẹlaijah de sikẹrẹ ihwo na eje, ọ da ta: “Brọke yen ovwan che vwo iroro ivivẹ kri te?* Ọ da dianẹ Jihova yen Ọghẹnẹ rẹ uyota na, ovwan nene; ọ da dia Bel, ovwan nene!” Ẹkẹvuọvo ihwo na kpahen ota vuọvo kẹẹ. 22 Ẹlaijah da ta kẹ ihwo na nẹ: “Mẹvwẹ ọvo yen ọmraro ri Jihova ro chekọ, jẹ emraro ri Bel eshare 450. 23 E jẹ ayen mu erhuẹn itete ivẹ kẹ avwanre, e jẹ ayen jẹ erhuẹn ọvo rere ayen nyavwọ ibribro ghwẹ kpahen enu rẹ irhe na, ẹkẹvuọvo ayen phiẹ erhanre phiyọọ. Me cha nyavwe erhuẹn ro chekọ na ibribro, ke me cha ghwẹ kpahen enu rẹ irhe na, ẹkẹvuọvo mi che phi erhanre phiyọọ. 24 Ọke yena kẹ ovwan se odẹ rẹ ọghẹnẹ rẹ ovwan, ki mi che se odẹ ri Jihova. Ọghẹnẹ ro nyori womarẹ erhanre che djephia nẹ ọyen yen Ọghẹnẹ rẹ uyota na.” Ọtiọyena ihwo na eje da kpahen nẹ: “Oborẹ wọ tare na shephiyọ.”

25 Asaọkiephana Ẹlaijah da ta kẹ emraro ri Bel nẹ: “Ovwan ka jẹ ọvo vwẹ usun rẹ erhuẹn itete na rere ovwan nyavwọ, kidie ovwan yen me bun. We se odẹ rẹ ọghẹnẹ rẹ ovwan, ẹkẹvuọvo we phiẹ erhanre phiyọọ.” 26 Ọtiọyena ayen de mu erhuẹn otete re mu kẹ ayen na, ayen da nyavwọ, kẹ ayen kperẹ se odẹ ri Bel vwo nẹ urhiọke re te oghẹruvo, nẹ: “E Bel, nyo avwanre!” Ẹkẹvuọvo e nyo urhuru vuọvoo. Ohwo vuọvo je kpaheen. Kẹ ayen pho kraekrae riariẹ agbada rẹ ayen soro na. 27 Omarẹ oghẹruvo, Ẹlaijah kọ vwẹ ayen jehwẹ, ọ da ta: “Ovwan kperi se gangan! Kidie ọghẹnẹ yen o ruẹ! Ọkiọvo o roro iroro yẹrẹ o re kpirhin awọ.* Yẹrẹ ọkiọvo jẹ ọ vwerhẹn ọ guọnọ ohwo rọ cha rhọvwọn!” 28 Ayen ki kperẹ gangan je vwẹ agbogun kugbe ubiri vwo brẹ oma rayen vwo nene ẹkuruemu rayen, bẹsiẹ ọbara vwọ djẹ nene oma rayen eje. 29 Oghẹruvo wanre, jẹ ayen ji ruẹ kerẹ emraro re te ọke re vwo ze izobo rẹ eka rẹ ovwọnvwọn na, ẹkẹvuọvo e nyupho vuọvoo, ohwo vuọvo je kpaheen; ohwo vuọvo davwerhọọ.

30 Ukuotọ rọyen, Ẹlaijah da ta kẹ ihwo na eje nẹ: “Ovwan sikẹrẹ ovwẹ.” Ọtiọyena ihwo na eje de si kẹrẹ. Ọ da rhuẹrẹ agbada ri Jihova re kporon she jovwo na. 31 Ẹlaijah de mu ikuta 12, rọ vẹ unu rẹ ivwiẹ rẹ emọ ri Jekọp dia abavo, ohwo rẹ Jihova ta kẹ nẹ: “Izrẹl yen cha dia odẹ wẹn.” 32 Ọ da vwẹ ikuta na vwọ so agbada ọvo vwẹ odẹ ri Jihova. Ọ da tọn ukpotọ riariẹ agbada na phiyọ, ukpotọ na rho te asan ra sa kọn ibi rẹ ekankọn rẹ ovwanvwọ rẹ siya* ivẹ phiyọ. 33 O vwo ru ọyena nu, ọ da rhuẹrẹ irhe na phiyọ, ọ da nyavwe erhuẹn otete na ibribro, ọ da ghwẹ kpahen enu rẹ irhe na. Ọ da ta: “Ovwan vo ame vọn echẹ ride ẹne rere ovwan kuo ku izobo rẹ ẹtorhẹ na vẹ irhe na.” 34 Ọ da rhoma ta: “Ovwan rhoma ruo.” Ọtiọyena ayen da rhoma ruo. Ọ da je ta vwẹ obọfa nẹ: “Ovwan ruo obọ rerha.” Ọtiọyena ayen de ruo obọ rerha. 35 Ame na da djẹ riariẹ agbada na, o de ji vo ame vọn ukpotọ na.

36 Vwẹ omarẹ ọke re vwo ze izobo rẹ eka rẹ ovwọnvwọn na, Ẹlaijah ọmraro na da yan kpo obaro, ọ da tanẹ: “E Jihova, Ọghẹnẹ rẹ Ebraham, Aizik, kugbe Izrẹl, jẹ a riẹn nonẹna nẹ wẹwẹ yen Ọghẹnẹ vwẹ Izrẹl, nẹ mẹvwẹ odibo wẹn, nẹ womarẹ ota wẹn yen mi vwo ru erọnvwọn nana eje. 37 Nyo vwe, E Jihova! Nyo vwe rere ihwo nana vwọ riẹn nẹ wẹwẹ ri Jihova yen Ọghẹnẹ rẹ uyota na, nẹ wo kuẹ ubiudu rayen rhẹriẹ brẹ oma wẹn.”

38 Ọtiọyena erhanre ri Jihova de nẹ obenu rhe, ọ da torhẹ izobo rẹ ẹtorhẹ na, irhe na, ikuta na, kugbe ekpẹn na, ọ da rare ame rẹ ọgọdọ na muotọ. 39 Ọke rẹ ihwo na ejobi vwọ mrẹ, ugege yena, ayen de she bọvwọn opharo rhuotọ, ayen da ta: “Jihova yen Ọghẹnẹ rẹ uyota na! Jihova yen Ọghẹnẹ rẹ uyota na!” 40 Etiyin Ẹlaijah da ta kẹ ayen nẹ: “Ovwan yọnre emraro ri Bel na! Ovwan jẹ ọvuọvo usun rayen djẹ vabọọ!” Ugege yena, ayen de shabọ phiyọ ayen, Ẹlaijah da reyọ ayen kpo ivwori* ri Kaishọn, ọ da teyen ayen hwe vwẹ etiyin.

41 Asaọkiephana Ẹlaijah da ta kẹ Ehab nẹ: “Yerin kpenu rere wọ re, wọ je da kidie mi nyo edo rẹ osio ọgangan rọ rhọ.” 42 Ọtiọyena Ehab de yerin kpenu rere ọ re je da, Ẹlaijah de rhe kpo enu rẹ ugbenu ri Kamẹl, o de shiguẹ totọ, jẹ o phi opharo rọyen phiyọ uvwre rẹ igbon rọyen. 43 Ọtiọyena ọ da ta kẹ odibo rọyen nẹ: “Biko yerin kpenu rere wo ni obo abadi na.” Ọtiọyena ọ da yanran, o de ni, ọ da ta: “Me mrẹ emu vuọvo kakakaa.” Abọ ighwrẹn yen Ẹlaijah tare nẹ, “Rhivwin.” 44 Vwẹ ọ rẹ abọ righwrẹn na, odibo rọyen da tanẹ: “Nighere! Evwru otete rọ pha kerẹ obọ rẹ ohworakpọ nẹ evunrẹ abadi na cha.” Ẹlaijah da tanẹ: “Yanran rere wọ ta kẹ Ehab nẹ, ‘Muegbe rẹ akpẹrẹ wẹn! Djẹ wontọ rere osio na vwo juwe e ke dje!’” 45 Vwẹ uvwre rẹ ọke nana, evwru de mu vwẹ obenu, enu na de muebri, odju ko djuẹ, osio ọgangan da rhọ; jẹ Ehab rha djẹ akpẹrẹ rọyen yanran, ọ da djẹ te Jẹzriẹl. 46 Ẹkẹvuọvo obọ ri Jihova da rhe enu rẹ Ẹlaijah, ọ da vwẹ ewun rọyen vwọ chobiẹ ehun rọyen,* ọ da djẹ kobaro kẹ Ehab rhirin re te Jẹzriẹl.

19 Ọtiọyena Ehab da vuẹ Jẹzibẹl erọnvwọn eje rẹ Ẹlaijah ruru kugbe obo rọ vwẹ ọlọkọ vwọ teyen emraro na eje hwe. 2 Etiyin Jẹzibẹl de ji ikọn bru Ẹlaijah ra nẹ: “E jẹ eghẹnẹ na ru ọtiọyen kẹ vwẹ je vwọ ba, ọ da dianẹ vwẹ ọke ọtiọna vwẹ odẹ rọ cha na, mi rhe ru we kerẹ ọvuọvo rayeen!”* 3 Ọtiọyena oshọ de muo, o de vrẹn, ọ da djẹ fikirẹ arhọ* rọyen. Ọ da rhe Biẹ-shiba ri Juda, ọ da yanjẹ odibo rọyen vwo vwẹ etiyin. 4 Ọ da yan oyan rẹ ẹdọke ọvo ro evunrẹ aton na, ọ da rhe rhi chidia otọ rẹ urhe otete ọvo, ọ da tanẹ ọyen* ghwe ghwu. Ọ da ta: “O teri! Asaọkiephana E Jihova, reyọ arhọ* mẹ, kidie mi yovwin nọ esẹ mẹ ridee.”

5 O de sherhẹn, ọ da vwerhẹn vwẹ otọ rẹ urhe otete na. Siẹvuọvo na, amakashe ọvo de djobọte, ọ da ta kẹ nẹ: “Vrẹn rere wọ riemu.” 6 O vwo ni, ibrẹdi rọ pha ghorien ghorien re mu kpahen ikuta re rhorha kugbe ọtoto rẹ ame hẹ asan uyovwin rọyen. Ọ da re je da, ọ da rhoma sherhẹn. 7 Ọke vwọ yan obaro, amakashe ri Jihova na da rhoma rhivwin rhe vwẹ obọ rivẹ, o de djobọte, ọ da tanẹ: “Vrẹn rere wọ riemu kidie oyan na che gro nọ kẹ wẹ.” 8 Ọtiọyena o de vrẹn, ọ da re je da, ọ da vwẹ ogangan rẹ emu rọ rere na vwọ yan oyan rẹ ẹdẹ 40 kugbe ason 40 bẹsiẹ ro vwo te Horẹb, ugbenu rẹ Ọghẹnẹ rẹ uyota na.

9 Ọ da ro unu rẹ ukuta ọvo vwẹ etiyin je dia etiyin hrọke; nighere! ota ri Jihova de bro rhe, nẹ: “Die yen wo ruẹ vwẹ etinẹ, Ẹlaijah?” 10 Ọtiọyena ọ da tanẹ: “Rhi te ọke na, me ga Jihova Ọghẹnẹ rẹ otuofovwin na vẹ oruru ọgangan; ihwo rẹ Izrẹl sen ọphọ wẹn, ayen kporon egbada wẹn totọ, ayen je vwẹ ọlọkọ vwọ teyen emraro wẹn hwe, mẹvwẹ ọvo kọyen chekọ. Asaọkiephana ayen guọnọ reyọ arhọ* mẹ.” 11 Ẹkẹvuọvo Ọ da tanẹ: “Ro otafe rere wo mudia enu rẹ ugbenu na vwẹ obaro ri Jihova.” Nighere! Jihova rha wanvrẹ, jẹ odju ọgangan ọvo rhe kporon igbenu je va eragha vwẹ obaro ri Jihova, ẹkẹvuọvo Jihova hẹ evunrẹ odju naa. Odju na vwo dju fọ nu, otọ de kpogho, ẹkẹvuọvo Jihova hẹ evunrẹ otọ ro kpoghori naa. 12 Otọ na vwo kpogho nu, erhanre da la, ẹkẹvuọvo Jihova hẹ evunrẹ erhanre naa. Erhanre na vwọ la fuen nu, o de nyupho bọrọbọrọ ọvo rọ nẹrhẹ ẹwẹn rẹ ohwo totọ. 13 Ugege rẹ Ẹlaijah vwo nyo, ọ da vwẹ ewun* rọyen vwo rhurhu opharo rọyen, ọ da ro otafe, o de mudia asan ra wan rua unu rẹ ukuta na. Etiyin urhuru ọvo da nọ nẹ: “Die yen wo ruẹ vwẹ etinẹ, Ẹlaijah?” 14 Ọtiọyena ọ da tanẹ: “Rhi te ọke na, me ga Jihova Ọghẹnẹ rẹ otuofovwin na vẹ oruru ọgangan; ihwo rẹ Izrẹl sen ọphọ wẹn, ayen kporon egbada wẹn totọ, ayen je vwẹ ọlọkọ vwọ teyen emraro wẹn hwe, mẹvwẹ ọvo kọyen chekọ. Asaọkiephana ayen guọnọ reyọ arhọ* mẹ.”

15 Jihova da ta kẹ nẹ: “Rhivwin rere wo kpo aton ri Damaskọs. Wo de te etiyin, jẹ Hazaẹl reyọ kerẹ ovie vwẹ enu ri Siria. 16 Wọ me jẹ Jihu uvwrọmọ ri Nimshai reyọ kerẹ ovie vwẹ enu rẹ Izrẹl, wọ me je jẹ Ẹlaisha* ọmọ ri Shefat ro nẹ Ebẹl-mẹhola rhe reyọ kerẹ ọmraro rọ cha reyọ ẹdia wẹn. 17 Kohwo kohwo rọ djẹ vrabọ rẹ ọlọkọ ri Hazaẹl, Jihu kọ cha teyọn hwe; kohwo kohwo rọ djẹ vabọ rẹ ọlọkọ ri Jihu, Ẹlaisha kọ cha teyọn hwe. 18 Mi ji vwo ihwo 7,000 ri chekọ vwẹ Izrẹl, ugbon rẹ ọvuọvo vwẹ usun rayen ji rhi kpirhin kẹ Beel, unu rayen je rhe fiọnfiọọn.”

19 Ọtiọyena o de vrẹn nẹ etiyin, ọ da mrẹ Ẹlaisha ọmọ ri Shefat ọke ro vwo voro vẹ ẹko rẹ erhuẹn ivivẹ asakuẹ 12 rehẹ obaro rọyen, ọ vẹ ẹko ọ ri 12 na yen gba herọ. Ọtiọyena Ẹlaijah da yan bro ra, o de do ewun* rọyen vwọ ya. 20 Ọtiọyena, ọ da yanjẹ erhuẹn na vwo, ọ da djẹ nene Ẹlaijah, ọ da tanẹ: “Biko, juvwe fiọnfiọn ọsẹ mẹ vẹ oni mẹ. Ọyena da wan nu, ki mi che nene uwe.” Ọ da kpahen kẹ nẹ: “Rhivwin yanran, me djẹ wẹẹ.” 21 Ọtiọyena o de rhivwin, ọ da reyọ ẹko rẹ erhuẹn ọvo, ọ da vwẹ ayen ze izobo, ọ da reyọ irhe ro vwo voro kugbe urhekpe rọhẹ ohọre rẹ erhuẹn na vwo chere eranvwe na, ọ da vwọ kẹ ihwo na, ayen da re. Ọyena vwọ wan nu, o de vrẹn, o de nene Ẹlaijah, ko gbodibo kẹ.

20 Asaọkiephana Ovie Bẹn-hedad ri Siria de koko otuofovwin rọyen eje vẹ ivie 32 efa kugbe iyesi vẹ ekpẹrẹ rayen; ọ da yanran ra gba riariẹ Sameria, o de nene họnre. 2 O de ji ikọn bru Ovie Ehab rẹ Izrẹl vwẹ orere na, ayen da ta kẹ nẹ: “Ọnana yen oborẹ Bẹn-hedad tare, 3 ‘Idọnọ efuanfon vẹ iro wẹn emẹ, ọtiọyen ji te eya wẹn ri me yovwin kugbe emeshare wẹn.’” 4 Ọtiọyena ovie rẹ Izrẹl da kpahen nẹ: “Vwo nene ota wẹn, ọrovwovwe ovie, mẹvwẹ ọwẹn, ọtiọyen ji te erọnvwọn ri mi vwori eje.”

5 Ọke vwọ yan obaro, ikọn na da rhoma rhivwin rhe, ayen da ta: “Ọnana yen oborẹ Bẹn-hedad tare, ‘Me vwẹ ovuẹ nana rhe we nẹ: “Idọnọ efuanfon wẹn, iro wẹn, eya wẹn, kugbe emeshare wẹn, wọ cha vwẹ ayen kẹ vwẹ.” 6 Ẹkẹvuọvo vwẹ omarẹ ọke nana vwẹ odẹ rọ cha na, mi che ji idibo mẹ bru we rhe, kẹ ayen cha nabọ hiẹ uwevwin wẹn kugbe iwevwin rẹ idibo wẹn, kẹ ayen cha reyọ erọnvwọn re ghanre kẹ wẹ eje ji mu ayen kpo.’”

7 Ọtiọyena ovie rẹ Izrẹl de se ekpako rẹ otọ na eje, ọ da ta kẹ ayen nẹ: “Biko ovwan noso nẹ ọshare nana guọnọ sua okpetu, kidie ọ tare nẹ me vwẹ eya mẹ, emeshare mẹ, idọnọ efuanfon mẹ, kugbe iro mẹ vwọ kẹ ọyen, me sen kẹẹ.” 8 Etiyin ekpako na eje vẹ ihwo na eje da ta kẹ nẹ: “Wọ kerhọ rọyeen, wọ je rhọnvwa kẹẹ.” 9 Ọtiọyena ọ da ta kẹ ikọn ri Bẹn-hedad na nẹ: “Ovwan ta kẹ ọrovwovwe ovie nẹ, ‘Erọnvwọn eje wọ ka nokpẹn rọyen mie odibo wẹn, mi che ru ayen, ẹkẹvuọvo mi che se ru ọnanaa.’” Ọtiọyena ikọn na da yanran, ayen da vwẹ ovuẹ na vwo rhe.

10 Bẹn-hedad da vwẹ ovuẹ nana rhe nẹ: “E jẹ eghẹnẹ na ru ọtiọyen kẹ vwẹ je vwọ ba, siẹrẹ a da mrẹ ekpẹn vwẹ Sameria rọ cha vọn ẹkuobọ rẹ ọvuọvo rẹ ihwo ri nene uvwe!” 11 Ovie rẹ Izrẹl da kpahen nẹ: “Vuẹ nẹ, ‘E jẹ ohwo rọ ghwẹ ekuakua ofovwin rọyen phiyọ yonma kerẹ ohwo ro ku ayen nuu.’” 12 Ugege rẹ Bẹn-hedad vwo nyo ẹkpahọnphiyọ na, ọke rọ vẹ ivie na vwọ da udi vwẹ itughẹ rayen, ọ da ta kẹ idibo rọyen nẹ: “Ovwan muegbe rẹ ohọnre!” Ọtiọyena ayen de muegbe rere ayen ra vwọso orere na.

13 Ẹkẹvuọvo ọmraro ọvo de bru Ovie Ehab rẹ Izrẹl rhe, ọ da tanẹ: “Ọnana yen oborẹ Jihova tare, ‘Wọ mrẹ otu buebun nana eje? Mi che phi ayen phiyọ obọ wẹn nonẹna, ọke yena ku wọ cha riẹn nẹ mẹvwẹ Jihova.’” 14 Ehab da nọ nẹ: “Womarẹ ono?” ọ da tanẹ: “Ọnana yen oborẹ Jihova tare, ‘Womarẹ idibo rẹ isun rẹ ubrakpọ na.’” Ọtiọyena ọ da nọ: “Ono yen cha ton ofovwin na phiyọ?” ọ da tanẹ: “Wẹwẹ!”

15 Etiyin Ehab de kere idibo rẹ isun rẹ ubrakpọ na, ayen da dia 232; ọyena vwọ wan nu, o de kere eshare rẹ Izrẹl eje, 7,000. 16 Ayen da kparoma vwẹ oghẹruvo, ọke rẹ Bẹn-hedad vwọ da idi vroma vwevunrẹ itughẹ na vẹ ivie 32 re vwẹ ukẹcha kẹ. 17 Ọke rẹ idibo rẹ isun rẹ ubrakpọ na ka vwọ ro otafe, Bẹn-hedad de ji ikọn ugege yena. Ayen da niyẹnrẹn kẹ nẹ: “Eshare evo nẹ Sameria rhe.” 18 Ọtiọyena ọ da ta: “Ọ da dianẹ ufuoma yen ayen ghwa rhe, we mu ayen ọkpokpọ; ọ da dianẹ ofovwin yen ayen kpare rhe, ovwan ji mu ayen ọkpokpọ.” 19 Ẹkẹvuọvo ọke rẹ enana vwo nẹ evunrẹ orere na rhe—idibo rẹ isun rẹ ubrakpọ na kugbe ituofovwin ri nene ayen— 20 ayen ọvuọvo da teyen ohwo ro nene ayen họnra hwe. Etiyin ihwo ri Siria na da djẹ, Izrẹl da vwọtua ayen, ẹkẹvuọvo Ovie Bẹn-hedad ri Siria da ro iyesi djẹ vabọ vẹ iguiyesi evo. 21 Ẹkẹvuọvo ovie rẹ Izrẹl da kparoma, kọ teyan ihwo re gua iyesi kugbe ihwo re gua ekpẹrẹ na hwe, o de hwe ihwo ri Siria buebun.

22 Ọke vwọ yan obaro, ọmraro na de bru ovie rẹ Izrẹl rhe, ọ da ta kẹ nẹ: “Yanran re muegbe rẹ oma wẹn rere wo roro kpahen oborẹ wo che ru, kidie vwẹ ọtonphiyọ rẹ ukpe* rọ cha na, ovie ri Siria cha rhe vwọso owẹ.”

23 Asaọkiephana, idibo rẹ ovie ri Siria da ta kẹ nẹ: “Ọghẹnẹ rayen Ọghẹnẹ rẹ igbenu. Ọyensorọ ayen vwo phi avwanre kparobọ. Ẹkẹvuọvo avwanre de nene ayen họnre vwẹ otọ rọ pha riẹriẹriẹ, avwanre che phi ayen kparobọ. 24 Ji ru ọnana: Si ivie na eje vwo nẹ ẹdia rayen, rere wọ vwẹ isun vwo wene ayen. 25 Gbe koko otuofovwin ro bun te e re va wẹ obọ na, iyesi vwọ kẹ iyesi, akpẹrẹ vwọ kẹ akpẹrẹ. Gbe jẹ avwanre nene ayen họnre vwẹ otọ rọ pha riẹriẹriẹ, kẹ avwanre che phi ayen kparobọ.” Ọ da kerhọ rẹ uchebro rayen na, o de ru oborẹ ayen tare na.

26 Vwẹ ọtonphiyọ rẹ ukpe na,* Bẹn-hedad de koko ihwo ri Siria, ayen de kpo Efẹk re nene Izrẹl họnre. 27 E de ji koko ihwo rẹ Izrẹl ji mu emuọre kẹ ayen, ayen da yanran ra vwa ayen. Ọke rẹ ihwo rẹ Izrẹl vwo wonphiyọ* obaro rayen, ayen pha kerẹ ẹmẹko rẹ ẹvwe, jẹ ihwo ri Siria vọn otọ na eje. 28 Ohwo rẹ Ọghẹnẹ rẹ uyota na de bru ovie rẹ Izrẹl rhe, ọ da tanẹ: “Ọnana yen oborẹ Jihova tare, ‘Kidie nẹ ihwo ri Siria na tare nẹ: “Jihova ọyen Ọghẹnẹ rẹ igbenu, ọ dia Ọghẹnẹ rẹ otọ ọriẹriẹriẹẹ,” mi che phi otu buebun nana phiyọ obọ wẹn, ku wọ cha riẹn vwọrẹ uyota nẹ, mẹvwẹ Jihova.’”

29 Ayen da daji asan rẹ ayen wonphiyọ hirhe opharo ku ohwohwo na ẹdẹ ighwrẹn, vwẹ ẹdẹ righwrẹn na, ofovwin na da tonphiyọ. Ihwo rẹ Izrẹl da teyen isodje ri Siria 100,000 re vwẹ owọ yan hwe vwẹ ẹdẹ ọvo. 30 Ihwo ri chekọ da djẹ kpo Efẹk vwevunrẹ orere na. Ẹkẹvuọvo igbẹhẹ na de she teyen eshare 27,000 ri chekọ. Bẹn-hedad je djẹ, ọ da ro evunrẹ orere na, o de siomanu vwẹ uvun ọvo rọhẹ obevun.

31 Ọtiọyena idibo rọyen da ta kẹ nẹ: “Nighere, avwanre nyori nẹ ivie rẹ uwevwin rẹ Izrẹl ivie ri gbe arodọnvwẹ.* Biko, jẹ avwanre vwẹ emwa rẹ esiso vwo rhuon ehun rẹ avwanre je vwẹ ifi vwọ gba uyovwin rẹ avwanre, rere avwanre bru ovie rẹ Izrẹl ra. Ọkiọvo, o se juwe ehwe.” 32 Ọtiọyena ayen da vwẹ emwa rẹ esiso vwo rhuon ehun rayen je vwẹ ifi vwọ gba uyovwin rayen, ayen de bru ovie rẹ Izrẹl rhe, ayen da tanẹ: “Odibo wẹn Bẹn-hedad tare nẹ, ‘Biko wo hwe vwee.’”* Ọ da kpahen nẹ: “Ọ jehẹ akpọ? Oniọvo mẹ yen o ruẹ.” 33 Eshare na da reyọ kerẹ omamọ rẹ ovuẹ ro nẹ obọ rẹ eghẹnẹ na rhe, ayen de se obo rọ tare na gbuyota, ọtiọyena ayen da tanẹ: “Bẹn-hedad oniọvo wẹn.” Ọtiọyena ọ da tanẹ: “Ovwan yanran ra reyọ rhe.” Bẹn-hedad de bro rhe, ọ da tanẹ ọ ro akpẹrẹ na.

34 Bẹn-hedad da ta kẹ nẹ: “Irere rẹ ọsẹ mẹ reyọ mie ọsẹ wẹn, me cha vwẹ ayen kẹ wẹ, wọ je sa fan eki* kẹ oma wẹn vwẹ Damaskọs kirobo rẹ ọsẹ mẹ ruru vwẹ Sameria.”

Ehab da kpahen nẹ: “Fikirẹ ọrhọnvwekugbe* nana, mi che siobọnu uwe.”

Ọtiọyena ọ vẹ ọyen de vwo ọrhọnvwekugbe, o de siobono yanran.

35 Womarẹ ota ri Jihova, ọvo vwẹ usun rẹ emọ rẹ emraro na* da ta kẹ ọshare rọ vẹ ọyen gba hẹ etiyin nẹ: “Biko ghwiẹ vwẹ.” Ẹkẹvuọvo ọshare na rhọnvwe ghwiẹẹ. 36 Ọtiọyena ọ da ta kẹ nẹ: “Kidie nẹ wọ kerhọ rẹ urhuru ri Jihova naa, ugege wo de vrẹ nẹ asan me hepha, okpohrokpo ko che hwe we.”* Ọke ro vwo vrẹn nẹ asan rọ hepha, okpohrokpo de bro rhe, o de hwe.

37 Ọ da mrẹ ọshare ọfa, ọ da ta: “Biko ghwiẹ vwẹ.” Ọtiọyena ọshare na da ghwiẹ, ọ da wan oma.

38 Ọyena vwọ wan nu, ọmraro na da yanran ra hẹrhẹ ovie na vwẹ idjerhe, ọ da gba* ẹro rọyen rere e vwo je vughe. 39 Ọke rẹ ovie na vwọ wanvrẹ, o de kperi se ovie na nẹ: “Odibo wẹn kpo asan rẹ ofovwin na da tua mamọ, o vwo ọshare ọvo ro nẹ ofovwin na cha rọ vwẹ ọshare ọvo kẹ vwẹ, ọ da tanẹ, ‘Rhẹrẹ ọshare nana. Ọ da djẹ, a cha vwẹ arhọ wẹn vwo wene ọrọyen,* yẹrẹ wọ cha hwa italẹnti* ọvo rẹ idọnọ ọfuanfon.’ 40 Ọke rẹ odibo wẹn vwọ yancha yankpo ruẹ erọnvwọn sansan, siẹvuọvo na, me rha mrẹ ọshare naa.” Ovie rẹ Izrẹl da ta kẹ nẹ: “Ọtiọyen ẹdjọeguo wẹn cha dia, owẹ ọvo brorhiẹn na kẹ oma wẹn nure.” 41 O de brokpakpa si obo rọ vwọ gba ẹro rọyen na no, ovie rẹ Izrẹl de vughe nẹ ọyen ọvo vwẹ usun rẹ emraro na. 42 Ọ da ta kẹ nẹ: “Ọnana yen oborẹ Jihova tare, ‘Kidie nẹ wọ vwẹ uphẹn kẹ ohwo re me tare nẹ a ghwọrọ nẹ ọ djẹ va wẹ abọ, a cha vwẹ arhọ wẹn vwo wene arhọ rọyen,* arhọ rẹ ihwo wẹn cha reyọ ẹdia rẹ ọ rẹ ihwo rọyen.’” 43 Ọtiọyena ovie rẹ Izrẹl de kpo uwevwin rọyen vwẹ Sameria vẹ ophu jẹ o mu opharo phiyọ.

21 Enana vwọ wan nu, emuọvo da phia ro shekpahen ogba rẹ ivaini ri Nebọt ohwo ri Jẹzriẹl; ogba na hẹ Jẹzriẹl, ọ kẹrẹ ọguan rẹ Ehab, ovie ri Sameria. 2 Ehab da ta kẹ Nebọt nẹ: “Kẹ vwẹ ogba rẹ ivaini wẹn rere mi vwo ru ogba re me cha kọn erọnvwọn phiyọ kidie ọ kẹrẹ uwevwin mẹ. Ke me cha vwẹ ogba rẹ ivaini ro yovwin vrẹ ọyena vwo wene kẹ wẹ. Yẹrẹ o de je we, me vwẹ igho rọyen kẹ wẹ.” 3 Ẹkẹvuọvo Nebọt da ta kẹ Ehab nẹ: “Vwẹ ẹro ri Jihova, mi che se ru oborẹ wọ ta na re me vwọ vwẹ uku rẹ esẹ mẹ ride vwọ kẹ wẹẹ.” 4 Ọtiọyena Ehab da rhe uwevwin rọyen vẹ ophu kugbe opharo ro muphiyọ fikirẹ ẹkpahọnphiyọ rẹ Nebọt ohwo ri Jẹzriẹl na vwọ kẹ, ọke rọ vwọ tanẹ: “Me cha vwẹ uku rẹ esẹ mẹ ride vwọ kẹ wẹẹ.” O de sherhẹn ehwa rọyen gare opharo vi igbẹhẹ, ọ rha rhọnvwe riemuu.

5 Aye rọyen Jẹzibẹl de bro rhe, ọ da nọ nẹ: “Diesorọ wo* vwo muomaphiyọ te ẹdia rẹ wọ rha rhọnvwe riemuu?” 6 Ọ da kpahen kẹ nẹ: “Kidie me ta kẹ Nebọt ohwo ri Jẹzriẹl na nẹ, ‘Juvwe vwẹ igho dẹ ogba rẹ ivaini wẹn na. Yẹrẹ o de je we, juvwe vwẹ ogba rẹ ivaini ọfa vwo wene kẹ wẹ.’ Ẹkẹvuọvo ọ da ta, ‘Me cha vwẹ ogba rẹ ivaini mẹ kẹ wẹẹ.’” 7 Aye rọyen Jẹzibẹl da ta kẹ nẹ: “Ọ dia owẹ yen suẹn kerẹ ovie vwẹ enu rẹ Izrẹl? Vrẹn, riemu, jẹ ubiudu wẹn ghọghọ. Me cha vwẹ ogba rẹ ivaini ri Nebọt ohwo ri Jẹzriẹl na vwọ kẹ wẹ.” 8 Ọtiọyena ọ da vwẹ odẹ rẹ Ehab vwo si ẹbe, ọ da vwẹ oka rẹ Ehab vwọ tamu ayen, ọ da vwẹ ẹbe na vwo rhe ekpako vẹ ihwo ride re dia orere ri Nebọt. 9 O de si phiyọ ẹbe na nẹ: “Ovwan ghwoghwo owẹnvwe echiro rere ovwan vwẹ Nebọt vwo chidia obaro rẹ ihwo na. 10 Ovwan vwẹ eshare ivẹ re che se vwo ru emuọvoo vwo chidia obaro rọyen rere ayen soseri hwe nẹ, ‘Wọ hanrhe Ọghẹnẹ kugbe ovie na!’ Ọyena da wan nu, ovwan gba reyọ kpo otafe rẹ orere na rere ovwan vwẹ ukuta phio hwe.”

11 Ọtiọyena eshare rẹ orere rọyen, ekpako na vẹ ihwo ride re dia orere rọyen na de ru kirobo re si phiyọ ẹbe rẹ Jẹzibẹl vwo rhe ayen na. 12 Ayen de ghwoghwo owẹnvwe echiro, ayen da vwẹ Nebọt vwo chidia obaro rẹ ihwo na. 13 Etiyin eshare ivẹ vwẹ usun rẹ eshare re che se vwo ru emuọvoo na da rhe, ayen de chidia obaro rọyen, kẹ ayen soseri hwe Nebọt vwẹ obaro rẹ ihwo na nẹ: “Nebọt hanrhe Ọghẹnẹ kugbe ovie na!” Ọyena vwọ wan nu, ayen da reyọ kpo ughere rẹ orere na, ayen de phio hwe. 14 Ayen da vwẹ ovuẹ rhe Jẹzibẹl nẹ: “E phi Nebọt hwe re.”

15 Ugege rẹ Jẹzibẹl vwo nyo nẹ e phi Nebọt hwe re, ọ da ta kẹ Ehab nẹ: “Vrẹn, ra reyọ ogba rẹ ivaini ri Nebọt ohwo ri Jẹzriẹl na, ogba rọ rhọnvwere nẹ wọ vwẹ igho dẹẹ na, kidie Nebọt rha hẹ akpọọ. O ghwure.” 16 Ugege rẹ Ehab vwo nyo nẹ Nebọt ghwure, o de vrẹn rọ vwọ yan kpo ogba rẹ ivaini ri Nebọt ohwo ri Jẹzriẹl na rere ọ reyọ.

17 Ẹkẹvuọvo ota ri Jihova de bru Ẹlaijah ohwo ri Tishbi na rhe nẹ: 18 “Vrẹn, yanran ra vwa Ehab ovie rẹ Izrẹl rọhẹ Sameria. Ọ hẹ ogba rẹ ivaini ri Nebọt, ọ yanran kpo etiyin ra reyọ. 19 Ku wọ ta kẹ nẹ, ‘Ọnana yen oborẹ Jihova tare: “Wo hwe ohwo je reyọ otọ* rọyen nure?”’ Gba ta kẹ nẹ, ‘Ọnana yen oborẹ Jihova tare: “Asan rẹ eranko da rare ọbara ri Nebọt na, etiyin eranko da je cha rare ọbara wẹn.”’”

20 Ehab da ta kẹ Ẹlaijah nẹ: “Wọ guọnọ ovwẹ mrẹ re, E ọvweghrẹn mẹ!” Ọ da kpahen nẹ: “E, me guọnọ owẹ mrẹ re. ‘Kidie wo brorhiẹn* wo vwo ru obo re brare vwẹ ẹro ri Jihova, 21 nighe, me cha so okpetu kẹ wẹ, mi che hwerhe uwe fiotọ je ghwọrọ kọmọshare kọmọshare* vwẹ uwevwin rẹ Ehab, te i ri jẹ ọchuko evwo kugbe evwiẹrẹ vwẹ Izrẹl. 22 Mi che ru uwevwin wẹn kerẹ uwevwin ri Jeroboam ọmọ ri Nibat kugbe kerẹ uwevwin ri Beasha ọmọ rẹ Ahaijah, kidie wọ kpare ophu mẹ, wọ da je nẹrhẹ Izrẹl ru umwemwu.’ 23 Vwọba, Jihova da ta kpahen Jẹzibẹl nẹ: ‘Eranko cha re Jẹzibẹl vwẹ otọ ọvo vwẹ Jẹzriẹl. 24 Kohwo kohwo rọ dia ọ rẹ Ehab ro ghwuru vwevunrẹ orere, eranko cha riọ, kohwo kohwo ro ghwuru vwevunrẹ aghwa, ephran rẹ idjuvwu na cha riọ. 25 Vwọrẹ uyota, a je rhe mrẹ ohwo vuọvo ro brorhiẹn* ro vwo ru obo re brare vwẹ ẹro ri Jihova kerẹ Ehab rẹ aye rọyen Jẹzibẹl genrẹ vwo ruẹ erọnvwọọn. 26 O ru obo re brare mamọ ro vwo nene edjọ ri tuẹn ohwo oma,* kirobo rẹ ihwo rẹ Amọ eje ruru, rẹ Jihova djẹ nẹ obaro rẹ ihwo rẹ Izrẹl.’”

27 Ugege rẹ Ehab vwo nyo eta nana, ọ da bẹrẹ iwun rọyen, o de ku iwun rẹ esiso phiyọ; ọ da tuẹn owẹnvwe echiro phiyọ, ko sherhẹn vẹ iwun rẹ esiso je yancha yankpo jẹ o muomaphiyọ. 28 Etiyin ota ri Jihova de bru Ẹlaijah ohwo ri Tishbi rhe nẹ: 29 “Wọ mrẹ oborẹ Ehab vwomakpotọ vwẹ obaro mẹ? Kidie nẹ ọ vwẹ oma rọyen kpotọ vwẹ obaro mẹ, me cha vwẹ okpetu na rhe vwẹ ọke rọ vwọ hẹ akpọọ. Me cha vwẹ okpetu na rhe uwevwin rọyen vwẹ ọke rẹ ọmọ rọyen.”

22 Vwẹ ẹgbukpe erha, Siria vẹ Izrẹl phi ofovwiin. 2 Vwẹ ukpe rerha, Ovie Jẹhoshafat ri Juda de bru ovie rẹ Izrẹl ra. 3 Ovie rẹ Izrẹl da ta kẹ idibo rọyen nẹ: “Ovwan riẹnre nẹ avwanre yen vwo Remọt-giliẹd? Dedena, jẹ avwanre siomauko rẹ avwanre vwọ reyọ rhivwin vwo mie ovie ri Siria.” 4 Ọyena vwọ wan nu, ọ da ta kẹ Jẹhoshafat nẹ: “Wo che nene uvwe kpo ohọnre vwẹ Remọt-giliẹd?” Jẹhoshafat da kpahen kẹ ovie rẹ Izrẹl nẹ: “Mẹvwẹ vẹ owẹ ọvo. Ihwo mẹ, ihwo wẹn. Iyesi mẹ, iyesi wẹn.”

5 Ẹkẹvuọvo Jẹhoshafat da ta kẹ ovie rẹ Izrẹl nẹ: “Biko, guọnọ odjekẹ ri Jihova kpahọn tavwen.” 6 Ọtiọyena ovie rẹ Izrẹl de koko emraro na, omarẹ eshare 400, ọ da nọ ayen nẹ: “Me kpare ofovwin kpo Remọt-giliẹd, gbanẹ me raa?” Ayen da tanẹ: “Yanran, Jihova che phio phiyọ obọ rẹ ovie.”

7 Jẹhoshafat da ta: “Ọmraro ri Jihova vuọvo hẹ etinẹ? E jẹ avwanre je nọ mie.” 8 Ọtiọyena ovie rẹ Izrẹl da ta kẹ Jẹhoshafat nẹ: “O ji vwo ohwo ọvo rẹ avwanre sa wan oma rọyen guọnọ odjekẹ ri Jihova; ẹkẹvuọvo mi vwo utuoma kpahọn kidie o vwo ọke vuọvo rọ vwọ mraro rẹ obo ri yovwirin kpahen ovwẹẹ, obo re brare ọvo. Odẹ rọyen Mikaya ọmọ rẹ Imlah.” Ẹkẹvuọvo Jẹhoshafat da tanẹ: “Ofori nẹ ovie ta oka rẹ ota ọtiọyeen.”

9 Ọtiọyena ovie rẹ Izrẹl de se ọdiaguare* rọyen ọvo, ọ da tanẹ: “Se Mikaya ọmọ rẹ Imlah rhe kpakpata.” 10 Asaọkiephana ovie rẹ Izrẹl kugbe Jẹhoshafat ovie ri Juda chidia, dohwo dekete rọyen, ayen ku iwun rẹ ovie phiyọ vwẹ asan re de wonro ibi ekankọn rọhẹ asan ra wan rua Sameria, jẹ emraro na eje rha mraro vwẹ obaro rayen. 11 Etiyin Zẹdikaya ọmọ ri Kẹneana de ru idjo rẹ utehru kẹ oma rọyen, ọ da ta: “Ọnana yen oborẹ Jihova tare, ‘Enana yen wo che vwo dje* ihwo ri Siria bẹsiẹ wọ vwọ ghwọrọ ayen karekare.’” 12 Emraro ri chekọ na eje je mraro vwẹ idjerhe vuọvo na, ayen tanẹ: “Yan kpo Remọt-giliẹd, wo che phikparobọ; Jihova che phio phiyọ obọ rẹ ovie.”

13 Ọtiọyena ikọn re ji yanran re se Mikaya na da ta kẹ: “Nighere! Emraro na eje ta eta esiri kẹ ovie na. Biko, jẹ ota wẹn je dia kerẹ eta rayen, rere wọ ta ota esiri.” 14 Ẹkẹvuọvo Mikaya da tanẹ: “Rẹ Jihova vwọ herọ na, kemu kemu rẹ Jihova ta kẹ vwẹ, ọyen me cha ta.” 15 O de bru ovie na rhe, ovie na da nọ nẹ: “Mikaya, avwanre kpare ofovwin kpo Remọt-giliẹd, gbanẹ avwanre raa?” Ugege yena ọ da kpahen nẹ: “Yanran, wo che phikparobọ; Jihova che phio phiyọ obọ rẹ ovie.” 16 Ọtiọyena ovie na da ta kẹ nẹ: “Brabọ yen me cha vuẹ wẹ nẹ wọ ta ota vuọvo kẹ vwẹẹ jokparẹ uyota vwẹ odẹ ri Jihova?” 17 Ọtiọyena ọ da ta: “Me mrẹ ihwo rẹ Izrẹl eje re hrabọ nene igbenu na kerẹ igodẹ ri jẹ osuigodẹ evwo. Jihova da ta: ‘Enana vwo oninii. E jẹ ayen ọvuọvo rhivwin kpo uwevwin rọyen vwọrẹ ufuoma.’”

18 Etiyin ovie rẹ Izrẹl da ta kẹ Jẹhoshafat nẹ: “Me vuẹ wẹ nẹ, ‘Ọ cha mraro rẹ obo ri yovwirin kpahen ovwẹẹ, nẹ obo re brare ọvo’?”

19 Mikaya da ta: “Asaọkiephana gbe nyo ota ri Jihova: Me mrẹ Jihova ro chidia ekete rọyen vẹ otuofovwin rẹ idjuvwu na eje ri mudia kẹrẹ vwẹ obọrhen vẹ obohwẹre rọyen. 20 Jihova da tanẹ, ‘Ono yen cha phiẹn Ehab rere ọ yanran re ghwu vwẹ Remọt-giliẹd?’ Ọvo ta ota ọvo, jẹ ọfa ta ota ọfa. 21 Etiyin ẹwẹn* ọvo da yanrhe obaro, o de mudia obaro ri Jihova, ọ da ta, ‘Me cha phiẹn.’ Jihova da nọ nẹ, ‘Mavọ yen wo che ruo wan?’ 22 Ọ da kpahen nẹ, ‘Me cha yanran, ke me cha dia ẹwẹn rẹ ophiẹnvwe vwẹ unu rẹ emraro rọyen eje.’ Ọtiọyena Ọghẹnẹ da ta, ‘Wọ cha phiẹn, vwọ ba wo che phikparobọ. Yanran re ru ọtiọyen.’ 23 Asaọkiephana Jihova phi ẹwẹn rẹ ophiẹnvwe phiyọ unu rẹ emraro wẹn nana eje, ẹkẹvuọvo Jihova tarọ nure nẹ okpetu cha phia kẹ wẹ.”

24 Zẹdikaya ọmọ ri Kẹneana de sikẹrẹ Mikaya, ọ da ghwiẹ ọhwa, ọ da tanẹ: “Tivọ yen ẹwẹn ri Jihova wan nẹ oma mẹ rhe ta ota kẹ wẹ?” 25 Mikaya da kpahen nẹ: “Nighere! Wọ cha mrẹ vwẹ ẹdẹ ru wọ cha vwọ ro uvun rẹ obevun na re siomanu.” 26 Ovie rẹ Izrẹl da tanẹ: “Reyọ Mikaya rere wọ vwọ kẹ Emọn onotu rẹ orere na kugbe Joash ọmọ rẹ ovie na. 27 Vuẹ ayen nẹ, ‘Ọnana yen oborẹ ovie tare: “Ovwan phi ohwo nana phiyọ uwodi rere ovwan si obọ rẹ ibrẹdi kugbe ame rẹ ovwan cha vwọ ghẹrẹ kpotọ bẹsiẹ mi vwo rhivwin rhe vwọrẹ ufuoma.”’” 28 Ẹkẹvuọvo Mikaya da tanẹ: “Wo de rhivwin rhe vwọrẹ ufuoma, kọyen Jihova ta ota kẹ vwẹẹ.” Ọ da je ta: “Ovwan noso, ovwan ihwo eje.”

29 Ọtiọyena ovie rẹ Izrẹl kugbe Jẹhoshafat ovie ri Juda de kpo Remọt-giliẹd. 30 Ovie rẹ Izrẹl da ta kẹ Jẹhoshafat nẹ: “Mi che ru oma mẹ vwẹ idjerhe re vwo juvwe evughe, ke che kpo ofovwin na, ẹkẹvuọvo ku iwun rẹ ovie wẹn phiyọ.” Ọtiọyena ovie rẹ Izrẹl de ru oma rọyen vwẹ idjerhe re vwo je vughe, o de kpo ofovwin na. 31 Asaọkiephana ovie ri Siria vwẹ iji vwọ kẹ inotu 32 re gua ekpẹrẹ rọyen nẹ: “Ovwan nene ohwo vuọvo họnraa, owenẹ ọ dia ohwo otete yẹrẹ ohwo rode jokparẹ ovie rẹ Izrẹl.” 32 Ugege rẹ inotu rẹ ihwo re gua ekpẹrẹ na vwọ mrẹ Jẹhoshafat, ayen da ta kẹ oma rayen nẹ: “Vwọrẹ imuẹro, ọnana yen ovie rẹ Izrẹl na.” Ọtiọyena ayen de hirhe opharo kuo rere ayen vwo nene họnre; Jẹhoshafat ko kperẹ vwọ kẹ ukẹcha. 33 Ọke rẹ inotu rẹ ihwo re gua ekpẹrẹ na vwọ mrẹ nẹ ọ dia ovie rẹ Izrẹẹl, ayen da rhẹrioma vwẹ ugege yena, ayen rha vwọ tuaa.

34 Ẹkẹvuọvo ọshare ọvo de mu umurhabọ rọyen sa, ọ da sa ovie rẹ Izrẹl vwẹ uvwre rẹ asan ra da rhuọn ewun rẹ utehru* ro kuphiyọ kugbe. Ọtiọyena ovie na da ta kẹ ohwo rọ gua akpẹrẹ rọyen nẹ: “Kuomarhẹriẹ rere wo mu vwe nẹ ofovwin na,* kidie a wan vwẹ oma brabra.” 35 Ofovwin na da gan mamọ vwẹ ẹdẹ yena eje, a da yọnrọn ovie na mudia vwevunrẹ akpẹrẹ na, jẹ o hirhe opharo ku ihwo ri Siria na. Ọbara rẹ ora na de hwẹ phiyọ akpẹrẹ na, o de ghwu vwẹ ovwọnvwọn. 36 Vwẹ omarẹ ọke rẹ ọnre vwo she, ovuẹ de nene asan rẹ ayen wonphiyọ* na eje nẹ: “E jẹ kohwo kohwo rhivwin kpo orere rọyen! E jẹ kohwo kohwo rhivwin kpo otọ rọyen!” 37 Ọtiọyena ovie na de ghwu, e de muo rhe Sameria; ayen de shi ovie na vwẹ Sameria. 38 Ọke ra vwọ hworhẹ akpẹrẹ na vwẹ ẹtẹrhe ame ri Sameria, eranko da rare ọbara rọyen,* igberadja je họ vwẹ etiyin, kirobo rẹ Jihova tare.

39 Ikuegbe rẹ akpeyeren rẹ Ehab ri chekọ, erọnvwọn eje ro ruru, uwevwin* rẹ akoeni rọ bọnre kugbe irere eje rọ bọnre, e rhe si ayen phiyọ ọbe rẹ ikuegbe rẹ ọke rẹ ivie rẹ Izrẹl? 40 Ọtiọyena Ehab de ghwu kerẹ esẹ rọyen ride; ọmọ rọyen Ehazaya da rhe dia ovie vwẹ ẹdia rọyen.

41 Jẹhoshafat ọmọ rẹ Esa dia ovie vwẹ enu rẹ Juda vwẹ ukpe rẹne rẹ Ovie Ehab rẹ Izrẹl. 42 Jẹhoshafat hẹ ẹgbukpe 35 vwẹ ọke rọ vwọ dia ovie, o sunru ẹgbukpe 25 vwẹ Jerusalẹm. Odẹ rẹ oni rọyen Azuba ọmọtẹ ri Shilhai. 43 Kọ yan vwẹ idjerhe eje rẹ ọsẹ rọyen Esa. Ọ vwẹriẹ noo, o ru obo ri shephiyọ vwẹ ẹro ri Jihova. Ẹkẹvuọvo e si asan ri kpenu na noo, ihwo na ji ze izobo je nẹrhẹ ivwirhi rẹ izobo brẹ kpenu vwẹ asan ri kpenu na. 44 Jẹhoshafat vẹ ovie rẹ Izrẹl vwo oyerinkugbe rẹ ufuoma. 45 Ikuegbe rẹ akpeyeren ri Jẹhoshafat ri chekọ, iruo ride rọyen kugbe obo ro phi ofovwin wan, e rhe si ayen phiyọ ọbe rẹ ikuegbe rẹ ọke rẹ ivie ri Juda? 46 O ji si eshare ri gbe igberadja vwẹ asan rẹ ayen da ga ẹga* ra yan jovwo rhanvwẹ ọke rẹ ọsẹ rọyen Esa vwo nẹ otọ na.

47 Vwẹ ọke yena, ovie hẹ Idọmuu; osun yen ruiruo rẹ ovie.

48 Jẹhoshafat ji ru ikuna ri Tashish* rere i kpo Ofiẹ re mu iro, ẹkẹvuọvo ayen raree kidie ikuna na shuru vwẹ Iziọn-giba. 49 Ọke yena yen Ehazaya ọmọ rẹ Ehab vwọ ta kẹ Jẹhoshafat nẹ: “Jẹ idibo mẹ nene idibo wẹn vwevunrẹ ikuna na,” ẹkẹvuọvo Jẹhoshafat rhọnvweree.

50 Jẹhoshafat de ghwu kerẹ esẹ rọyen ride, e de sho kugbe esẹ rọyen ride vwẹ Orere ri Devid ọsẹ rọyen rode; ọmọ rọyen Jehoram da rhe dia ovie vwẹ ẹdia rọyen.

51 Ehazaya ọmọ rẹ Ehab da rhe dia ovie vwẹ enu rẹ Izrẹl vwẹ Sameria vwẹ ẹgbukpe 17 rẹ Ovie Jẹhoshafat ri Juda, o sunru ẹgbukpe ivẹ vwẹ enu rẹ Izrẹl. 52 Ko ruẹ obo re brare vwẹ ẹro ri Jihova, kọ yan vwẹ idjerhe rẹ ọsẹ rọyen kugbe oni rọyen kugbe idjerhe ri Jeroboam ọmọ ri Nibat, ohwo rọ nẹrhẹ Izrẹl ru umwemwu. 53 Kọ ga Bel, vwẹ uyovwin kpotọ kẹ ji ruẹ obo re nẹrhẹ ivun miovwo Jihova Ọghẹnẹ rẹ Izrẹl, kirobo rẹ ọsẹ rọyen ruru.