Omõla Ulume Wukãi Umue Ocimbumba wa Kuata Vali Omuenyo

Vokuenda kuocitenya Yehova wa sapuila Eliya hati: ‘Kuende ko Sarepata. Ocimbumba cimue vocitumãlo caco oco ci ku ĩhe okulia.’ Eci a pitĩla pombundi yolupale, wa mola ukãi umue ocimbumba o kasi oku tiaña olohũi. Kuenje Eliya wa pinga kokuaye ovava. Osimbu ukãi a kala oku enda oku kopa ovava, Eliya wo vilikiya loku u sapuila hati: “Mange ohenda, ndi neneleko ombolo yimue.” Pole, ukãi ocimbumba wa popia hati: “Si kuete ombolo, ndi kuete lika epupu limue liosema vesanga limue linene kuenda ulela vesanga limue litito. Cilo ñasi oku ongolola olohũi kuenda ngenda konjo, ha linga cimue oco ndi lie lomõlange.” Eliya wa popia laye hati: “Vesanga linene liosema ka mu pui kuenda vesanga litito liulela ka mu puivo, toke keteke Yehova a ka lokisa ombela kilu lieve.”

Omo liaco, ukãi ocimbumba wa enda konjo kuenje wa panga ombolo yuprofeto wa Yehova. Ndomo Yehova a likuminyile, ukãi ocimbumba kuenda omõlaye vokuenda kuotembo yosi yocitenya, va kuata okulia. Vombia yosema kuenda vesanga liulela ka mua puile.

Pole, noke kua pita ocitangi cimue. Omõla ulume wukãi ocimbumba wa vela kuenje wa fa. Omo liaco, ukãi wa pinga ekuatiso ku Eliya. Eliya wa tambula omõla wa kala ponete yukãi kuenje wo wambata vohondo yimue yosapalalo vonjo yukãi waco. Eye wo pekelisa pula kuenje wa likutilila hati: “A Yehova a Suku yange, mange ohenda, omõla a kale vali lomuenyo.” Wa kũlĩha esunga lieci nda ca komõhĩsila omo lia Yehova oku linga ocikomo caco? Momo ndomo tua ci kũlĩha, lomue wa lingile ocikomo cimue coku pindula omunu wa file. Ukãi waco ocimbumba kumue lomõlaye, ka va kaile va Isareli.

Pole, omuenyo womõla wa tiukamo vali kuenje wa fetika oku fuima! Eliya wa popia lukãi ocimbumba hati: “Tala omõlove o kasi vali lomuenyo.” Ukãi wa kuata esanju lialua kuenje wa sapuila Eliya hati: “Kaliye nda limbuka okuti, ove wukuenje muẽle wa Suku kuenda ondaka ya Yehova vomẽla wove, yocili.”