Suku wa Lulika Ulume Watete Lukãi Watete

Yehova wa pongiya ocumbo cimue vocitumãlo ci tukuiwa hati, Edene. Vocumbo caco, mueyukile olonelẽho, oviti kuenda ovinyama. Noke Suku wa panga ulume watete Adama loneketela yo posi kuenda wo fuimila ofela yomuenyo vanyulu aye. Wa kũlĩha eci ceya oku pita? Ulume wa linga omunu ukuamuenyo! Yehova wa eca ku Adama ocikele coku tata ocumbo kuenje wo sapuila oco a luke olonduko kovinyama viosi.

Yehova wa eca ku Adama ocikundi cimue ci kuete esilivilo lia velapo. Eye wa sapuila Adama hati: ‘Citava oku lia kapako oviti viosi vio vocumbo, te lika kuti umue u likasi owo okuti ka ci tava oku liako. Momo eteke o liako, o ka fa muẽle.’

Noke Yehova wa popia hati: ‘Ndi lulika oñuatisi yimue ya Adama. Yehova Suku wa pekelisa Adama otulo tualua kuenje wo upa olumati lumue oco a lulike ukãi.’ Onduko yukãi waco, Eva. Adama kumue lukãi waye va linga epata liatete. Nye Adama a yeva vutima eci a mola ukãi waye? Adama wa sanjuka calua kuenje wa popia hati: ‘Tala eci Yehova a linga lolumati luange! Ocili okuti eye omunu ndame.’

Yehova wa sapuila Adama kuenda Eva oco va cite omãla kuenda oku yukisa ongongo. Ocipango ca Yehova ca kala okuti, ovo va talavayela kumosi lesanju koku pongolola oluali oco lu linge ocumbo ceposo ale ocitumãlo ca fina ndeci ci kasi ocumbo Cedene. Pole, ovina ka via lingiwile ndomo via sokiyiwile. Momo lie? Tu lilongisa esunga liaco vocipama ci kuãimo.