Nye ci Lomboloka “Olosapi Viusoma?”
Etambululo Liembimbiliya
“Olosapi Viusoma,” vi lomboloka unene woku eca epuluvi lioku “iñila Vusoma wa Suku.” (Mateo 16:19; Ovilinga 14:22)a Yesu wa eca kupostolo Petulu “olosapi Viusoma wovailu.” Eci ci lomboloka okuti, Petulu wa tambula unene woku situlula ndomo omanu vakuekolelo va ponduile oku tambula espiritu sandu loku iñila Vusoma wokilu.
Ndamupi kua talavayiwa lolosapi?
Petulu wa talavaya lunene a tambula ku Suku oco a yikuile kovimunga vitatu viomanu apito Usoma:
Va Yudea kuenda olomongoloke. Noke yolofa via Yesu, Petulu wa vetiya va Yudea oku limbuka okuti, Suku wa nõla Yesu oco a kale Osoma Yusoma. Lonjila eyi, Petulu wa yikuila epito Liusoma kokuavo poku va longisa ovina va sukilile oku linga, oco va popeliwe kuenje valua “va tava kondaka yaye.”—Ovilinga 2:38-41.
Va Samaria. Noke yotembo yimue, Petulu wa tumiwa ku va Samaria.b Petulu wa talavaya vali losapi Yusoma eci eye kumue lupostolo Yoano va “va likutililako oco va tambule espiritu sandu.” (Ovilinga 8:14-17) Eci ca yikuila onjila ku va Samaria yoku iñila Vusoma.
Vakualofeka. Noke yoku pita anyamo atatu lomenyu tunde eci Yesu a fa, Suku wa situluila Petulu okuti vakualofeka (okuti omanu vana ka va kaile va Yudea) va ponduile oku kuatavo epuluvi lioku iñila Vusoma. Noke, Petulu wa talavaya la yimue pokati kolosapi eci a kundila loku longisa vakualofeka. Omo liaco, eye wa yikula onjila oco va tambule espiritu sandu, oku kala Akristão loku kuata elavoko lioku kala olosoma Viusoma.—Ovilinga 10:30-35, 44, 45.
Nye ci lomboloka oku “iñila Vusoma?”
Ci lomboloka oku ka viala kilu la Yesu. Embimbiliya li popia okuti omanu vamue, va ka “tumãla kovialo” kuenda “va ka viala ndolosoma koluali luosi.”—Luka 22:29, 30; Esituluilo 5:9, 10.
Uhembi watiamẽla kolosapi Viusoma
Uhembi: Petulu eye o nõla omunu o pondola oku iñila Vusoma wokilu.
Ocili: Embimbiliya li popia okuti Yesu Kristu, okuti Petulu hayeko, eye “una o ka sombisa vana va kasi lomuenyo lava va fa.” (2 Timoteo 4:1, 8; Yoano 5:22) Petulu wa popia eci catiamẽla ku Yesu hati: “U eye una Suku a tukuila oku linga onganji yava va kasi lomuenyo lava va fa.”—Ovilinga 10:34, 42.
Uhembi: Petulu eye wa nõla otembo ku talavayiwa lolosapi Viusoma.
Ocili: Yesu noke yoku sapuila Petulu okuti wa laikele oku tambula olosapi Viusoma wa popia hati: “Cosi o kuta palo posi, ci ka kutiwa ale kovailu kuenda cosi o kutuluila posi, ci ka kutuluiwa ale kovailu.” (Mateo 16:19) Omanu vamue va sima okuti olondaka evi vi lomboloka okuti Petulu eye o nõla otembo ku talavayiwa lolosapi Viusoma. Pole, olondaka viatete kelimi lio Helasi vi lekisa okuti, Petulu wa ponduile oku kuama lika olonjila via nõliwa ale kilu.
Embimbiliya li lekisa okuti Petulu wa enda lika oku kuama olonumbi via Suku poku talavaya lolosapi Viusoma. Ndeci, eye wa ci linga eci a talavaya losapi yatatu.—Ovilinga 10:19, 20.
a Vembimbiliya “osapi,” yi lomboloka unene kuenda ocikele. —Isaya 22:20-22; Esituluilo 3:7, 8.
b Va Samaria va tiamelẽle ketavo limue lia litepele leli lio Yuda, pole, va enda oku kuama alongiso kuenda ovituwa via kala Vocihandeleko Suku a ecele ku Mose.