Anga hẽ Olombangi Via Yehova Via Pongolola Embimbiliya Ndomo ci likuata Lalongiso Avo?

Sio haicoko. Momo, eci tua limbuka okuti a longiso etu ka a-a likuata leci Embimbiliya li longisa, tu a pongolola.

Osimbu handi ka tua fetikile oku pongolola Embimbiliya Li Kola—Epongololuilo Luoluali Luokaliye, kunyamo 1950, tua enda oku konomuisa ale Embimbiliya. Tua enda oku talavaya Lambimbiliya a kalako kuenje poku kunamẽla kueci tua enda oku lilongisa, tua sokiya a longisa etu. Kũlĩhĩsa amue pokati kalongiso osimbu Olombangi Via Yehova kuenda limbuka nda o-o a likuata leci Embimbiliya lilongisa.

1. Ceci tu tava: Suku Haumosiko Muvatatu. O revista A Torre de Vigia de Sião yosãi Yevambi Linene 1882 wa lombolola ndoco: “Vakuakutanga alivulu etu va limbuka okuti, ndaño tu tava ku Yehova, ku Yesu kuenda Kespiritu Sandu, pole, ka tu tava kelongiso liokuti, katatu kavo osuku yimuamue ale ndeci vamue va ci longisa okuti Suku Umosi Muvatatu.”

   Ceci Embimbiliya li popia: “Yehova Suku yetu, umosi lika Yehova.” (Esinumuĩlo 6:4) “Kokuetu kuli Suku umosi lika, Isia una okuti, eye wa lulika ovina viosi kuenda wa tu lulika oco tu linge ocipango caye; kulivo Ñala umosi lika, Yesu Kristu okuti, kokuaye oko kueyilila ovina viosi kuenda etu tu kuetele omuenyo vokuaye.” (1 Va Korindo 8:6) Yesu wa popia ndoco: “Tate wa mbelapo, ame ndi sule.”—Yoano 14:28.

2. Ceci tu tava: Ka kuli oku kangisiwa vondalu yifelu ka yi pui. O revista A Torre de Vigia de Sião yosãi Yevambi yunyamo 1882 ko ngelesi, ya kuatele osapi yokuti, ‘onima yekandu oku fa,’ poku tukula Va Roma 6:23 (Versão Rei Jaime). Ocipama caco ca lombolola ndoco: “Olondaka evi viocili kuenda via suapo. Pole, ci sumuisa vali calua ceci okuti, ndaño vana va tava okuti Embimbiliya Ondaka ya Suku, vamamako oku patãla ocili eci, pole, va kakatela kelongiso liokuti, Embimbiliya lilongisa okuti onima yekandu oku kangisiwa otembo ka yi pui vifelu viondalu.”

   Ceci Embimbiliya li popia: “Omunu wosi o linga ekandu eye o ka fa.” (Esekiele 18:4, 20) Ekangiso li ka eciwa kovanyãli va Suku, hakukangisiwako otembo ka yi pui, pole, “ovo va ka tambula eyambulo lienyõleho ka li pui.”—2 Va Tesalonike 1:9.

3. Ceci tu tava: Usoma wa Suku uviali umue wocili kuenda hacinacimueko ci kasi vutima womanu. Catiamẽla Kusoma wa Suku, o revista A Torre de Vigia de Sião yosãi ya Cembanima 1881, ya lombolola ndoco: “Oku tumbikiwa Kusoma Waco ku lomboloka oku nyõliwa kuolosoma viosi viokilu lieve.”

   Ceci Embimbiliya li popia: “Koloneke violosoma viaco, Suku yo kilu o ka tumbika usoma umue okuti lalimue eteke u ka nyõliwa. Usoma waco ka u ka eciwa komanu vakuavo. Owo u ka nyanyõla loku kundula ovosoma aco osi kuenje owo lika u ka kala otembo ka yi pui.”—Daniele 2:44.

Anga hẽ Olombangi Via Yehova viatamba Kembimbiliya Li Kola Epongoluilo Lioluali Luokaliye oco va teyuile alongiso avo?

Sio, haicoko. Momo handi tu talavaya Lambimbiliya akuavo kupange wetu woku kunda. Ndeci, vesokiyo lietu lioku longisa Embimbiliya ocali, tua siata oku eca ku vana va lekisa onjongole Embimbiliya Li Kola—Epongoluilo Lioluali Luokaliye, pole, tu kuetevo onjongole yoku longisa vana va yongola oku talavaya Lambimbiliya akuavo.