Tenda Ovitangi Viove Lonjila Yimue ya Sunguluka

1-2. Nye tu sukila oku linga oco tu tẽle oku liyaka lovitangi vietu? (Talavo ociluvialuvia.)

ANGA hẽ o kasi oku liyaka lekambo liesunga, elambalalo vepata ale ocitangi cikuavo omo lioku vumba Yehova? O kasi hẽ oku tala ohali omo liuvei umue ale ovitangi vi tundilila koku kuka? Anga hẽ o kasi oku tala ohali omo liocilunga cimue ale oku fisa omunu umue o sole calua? Ndeci ca siata oku lipita lafendeli vakuavo va Yehova, pamue omuenyo wove ‘weyuka ohali kuenda esumuo.’—Osa. 90:10.

² Oco tu tẽle oku liyaka lovitangi vietu, tu sukila oku vi tenda lonjila yimue ya sunguluka. Tu ci linga ndati? Sokolola kocindekaise ci kuãimo: Ovitangi tua siata oku liyaka lavio komuenyo, vi sokisiwa lovina ukuakuendisa ekãlu a sanga vetapalo vi pondola oku u tateka oku pita ciwa. Nda olonjanela viekãlu via liña, ongendisi ka yi tẽla oku mola ciwa ovina viaco, pole, nda okuti olonjanela viekãlu via yela, eye o ka kũlĩha apa a sukila oku ñualela oco a pite ciwa. Cimuamue haico okuti, eci tu liyaka lovitangi komuenyo wetu, tu sukila oku tenda ovitangi viaco ndomo Yehova a vi tenda. Vocipama cilo, tu ka konomuisa (1) ndomo tu tenda ovitangi vietu lonjila yimue ya sunguluka, (2) ovina vi pondola oku lipita nda ka tua tendele ovitangi vietu lonjila ndomo Yehova a vi tenda kuenda (3) ovina tu sukila oku linga eci tu liyaka lovitangi.

NDOMO TU TENDA OVITANGI VIETU LONJILA YIMUE YA SUNGULUKA

3. Momo lie tua siatela oku liyaka lovitangi koloneke vilo?

³ Osimbu oluali lulo ka lua nyõliwile, tu ka amamako oku liyaka lovitangi. Vosi yetu tua siata oku liyaka lovitangi momo ka tua lipuile kuenda tu kasi voluali lumue lua vialiwa la Satana. Handi vali, osimbu oluali lulo lu panda kesulilo tu ka liyaka lovitangi vialua ndeci ovilunga, andunde ovava, okupia kuovisenge ale ovitangi vikuavo vi kokiwa lomanu olondingaĩvi. (Mat. 24:8; 2 Tim. 3:13) Nda okuti Yehova wa maleleko ovitangi viaco cilo, nda ca lekisa okuti eye o kasi oku kuatisa Satana oku viala oluali. Voluali lulo vosi yetu tu liyaka, ale tu ka liyaka lovitangi vi tundilila ‘kovilunga.’—Uku. 9:12.

4. Momo lie Akristão va siatela oku liyaka lovitangi vialua?

⁴ Tua siata oku liyaka lovitangi momo tu pokola ku Yesu. Yesu olonjanja vialua wa sapuila kolondonge viaye okuti, via laikele oku lambalaliwa omo liekolelo liavo. (Mat. 24:9; Yoa. 16:2) Oku kũlĩha ocili caco, ci tu kuatisa oco ekolelo lietu ka li ka hongue omo liovitangi tua siata oku liyaka lavio. (1 Va Tes. 3:​3, 4) Omo liaco, eci tu pandikisa poku liyaka lovitangi, tu pondola oku kolela okuti tu kasi oku linga ovina via sunguluka kuenda Yehova la Yesu va ka tu ĩha omuenyo ko pui. Handi vali, tu lekisavo okuti tua nõlapo oku fendela Yehova momo eye ombiali ya velapo voluali luosi, loku lekisavo okuti, Satana ohembi. Limue pokati kovohembi a Satana lieli liokuti, omanu ka va sole Yehova lutima wosi kuenda va kasi lika oku u vumba omo liovina viwa eye a siata oku eca kokuavo. Oco Satana a lekise okuti ovina a popia viocili, wa siata oku kokela ohali yalua afendeli va Yehova. (Yovi 1:​9-11) Pole, eci tu pandikisa kovitangi, tu lekisa okuti tu sole Yehova lutima wosi kuenda tu sanjuisa utima waye.—Olosap. 27:11.

5. Olondaka vi sangiwa Kelivulu Liukundi 7:​13, 14 vi tu longisa nye? (Talavo oviluvialuvia.)

⁵ Yehova wa siata oku ecelela okuti tu liyaka lovitangi. Yehova lalimue eteke a tatele omanu lungangala ale oku va seteka locina cimue cĩvi. (Tia. 1:13) Oco hẽ, momo lie Soma Salomone a sonehela okuti, ‘eteke liohali’ “upange wa Suku yocili?” (Tanga Ukundi 7:​13, 14.) Olondaka evi ka vi lomboloka okuti Yehova eye o kasi oku koka ohali, pole, vi lomboloka okuti eye o kasi lika oku ecelela ohali. Nye tu pondola oku lilongisila kolondaka via Salomone? Catete, tu sukila oku kũlĩha okuti voluali lulo lua Satana, tu ka kuata oloneke viwa kuenda oloneke vĩvi. Eci tu kuata ‘eteke limue liwa,’ tu sukila oku eca olopandu ku Suku loku tenda epuluvi liaco ndombanjaile yimue yi tunda kokuaye. Cavali, soma Salomone o tu ivaluisa okuti, ‘ka tu pondola oku kũlĩha eci ci ka lipita letu kovaso yoloneke.’ Volondaka vikuavo, ka tu pondola oku kũlĩha nda tu ka kuata eteke limue liwa ale eteke limue lĩvi. Eci ci lomboloka okuti ci kaile omanu vawa ale olondingaĩvi, va liyaka lovitangi vina okuti ka va vi lavokaile.

6. Momo lie Yehova a kasilili oku ecelela okuti tu liyaka lovitangi? (Va Heveru 12:​7, 11)

⁶ Yehova o kasi oku tu longisa oku kolela kokuaye, okuti kokuetu muẽle hakoko. Yehova o lete ovitangi viosi tua siata oku liyaka lavio kuenda eye wa siata oku tu tata. Ndaño ceci Yehova a tu ecelela oku endela “vocimbota cowelema walua,” eye wa siata oku amamako oku tu songuila loku lekisa okuti o tu sole kuenda o tu ĩha ongusu tu sukila oco tu pandikise. (Osa. 23:4) Ovitangi tua siata oku liyaka lavio, vi pondolavo oku tu kuatisa oku limbuka ahonguo etu kuenje lekuatiso lia Suku, tu pondola oku mioñolola ovituwa vietu. (Tanga Va Heveru 12:​7, 11.) Ndeci, Yovi wa sukilile oku lilongisa oku lekisa umbombe. Ocili okuti Yehova haeyeko wa koka ovitangi via Yovi. Pole, Yehova wa ecelela okuti ovina viaco vi lipita laye kuenda wa talavaya lepuluvi liaco, oco a longise Yovi ovolandu amue a kuete esilivilo. (Yovi 42:​1-6) Omo liaco, tu pondola oku kolela lutima wosi okuti, nda Yehova ecelela okuti ocitangi cimue ci lipita letu, eye o ka tu kuatisa oku amamako oku pandikisa loku tu sumũlũisa.—Va Rom. 8:​35-39.

7. Momo lie tu ponduila oku kuata esanju ndaño ceci tu lambaliwa omo lioku vumba Yehova?

⁷ Tu pondola oku kuata esanju ndaño ceci tu lambalaliwa. Nda okuti tu kasi oku liyaka lelambalalo omo lioku vumba Yehova, ka tu ka simi okuti Yehova ka kasi vali oku tu sumũlũisa. Pole, elambalalo liaco li lekisa okuti tua taviwa laye. (Mat. 5:​10-12) Nda tua tenda ovitangi viaco ndomo Yehova a vi tenda, tu ka kuata esanju ndeci ca lipita lovapostolo. (Ovil. 5:​40-42) Handi vali, tu pondola oku kuatisa omanu vakuavo oku kũlĩha ocili catiamẽla ku Yehova kuenda oku u ‘sivaya.’ (1 Pet. 2:12) Sokolola kulandu wa Yosefe omõla a Yakoba. Osimbu ovitangi viaye via kala oku amamako, Yehova wo kuatisa loku u sumũlũisa vokuenda kuotembo yaco. Cimuamue haico okuti, osimbu tu kasi oku liyaka lovitangi, tu pondola oku limbuka ekuatiso lia Yehova vokuenda kuotembo yaco ka ya lelukile.—Efet. 39:​3, 23.

8. Ocina cipi cikuavo ci pondola oku tu kuatisa oku amamako oku pandikisa ndaño lovitangi?

⁸ Ovitangi tu liyaka lavio ka vi ka kala otembo ka yi pui. Ulandu wa Yovi u tu ivaluisa okuti ovitangi tua siata oku liyaka lavio koloneke vilo, ndopo vi ka pua. Embimbiliya li popia hati: “Yehova wa sumũlũisa calua onepa ya sulako yomueyo wa Yovi okuti, kefetikilo ci sule.” (Yovi 42:12) Cimuamue haico okuti voluali luokaliye, Yehova o ka tu sumũlũisavo lonjila yimue yi komõhisa. Omuenyo tu kuete cilo okuti weyuka ovitangi haiwo umbumbulu, ka u sokisiwa lomuenyo ko pui tu ka kuata kovaso yoloneke. Ocili okuti, eli evetiyo limue liwa li tu kuatisa oku pandikisa toke kesulilo!—Mat. 24:13.

OVINA VI PONDOLA OKU LIPITA NDA KA TUA TENDELE OVITANGI VIETU LONJILA YIMUE YA SUNGULUKA

9. Nye ci ka lipita letu nda tua tenda ovitangi vietu lonjila yimue ka ya sungulukile?

⁹ Nda ka tua tendele ovitangi vietu lonjila yimue ya sunguluka, ohali tu kasi oku tala yi ka livokiya. Ndeci, tu pondola oku sima okuti Yehova eye o kasi oku tu kokela ovitangi. Yovi vokuenda kuotembo yimue, wa simĩle okuti Yehova eye wa kala oku u kokela ovitangi kuenje onjila ka ya sungulukile ndomo eye a tenda ovitangi viaco, vio vetiya oku “seteka oku lekisa okuti, wa kuata esunga okuti Suku sio.” (Yovi 32:2) Naomi kefetikilo wa simĩlevo okuti, Yehova eye wa kala oku u kokela ovitangi. (Ruti 1:​13, 20, 21) Nda Yovi kuenda Naomi va kakatelele kocisimĩlo caco ka ca sungulukile, ovo nda va kuatela onyeño Yehova kuenda nda va pumba ukamba wavo laye. (Olosap. 19:3) Pole, Yehova wa va kuatisa oku tenda ovitangi viavo lonjila yimue ya sunguluka kuenda wa va sumũlũisa omo liekolelo liavo.

10. Atatahãi api tu pondola oku kuata eci tu liyaka lovitangi?

¹⁰ Ndaño tua kũlĩha okuti Yehova haeyeko wa siata oku tu kokela ovitangi, olonjanja vimue tu pondola oku kuata atatahãi nda eye wa tu kapako muẽle ale sio. Ocisimĩlo caco ka ca sungulukile, ci pondola oku tu kokela esumuo kuenda oku koka okuti ka ci leluka kokuetu oku amamako oku vumba Yehova loku linga ovina via sunguluka. (Olosap. 24:10) Soma Daviti kuenda uprofeto Havakuki, va liyakavo lovitangi kuenje olonjanja vimue, va enda oku li pula nda Yehova wa kala muẽle oku yevelela olohutililo viavo. (Osa. 10:1; Hav. 1:2) Pole, ovo ka va liwekelepo oku likutilila. Yehova wa tambulula olohutililo vialume vaco vakuekolelo kuenda wamamako oku va kuatisa. Cimuamue haico Yehova a ka linga letu.—Osa. 10:17.

11. Nye ci pondola oku lipita nda ka tua tendele ovitangi vietu lonjila yimue ya sunguluka?

¹¹ Nda ka tua tendele ovitangi vietu lonjila yimue ya sunguluka, ovitangi viaco vi ka tu kuata ocipikipiki kuenda tu ka sima okuti ovio nda ka via lipitile letu. (1 Pet. 4:12) Kefetikilo olondonge via Yesu, ka via kuatele elomboloko liesunga lieci va laikele oku lambalaliwa. (Luka 18:​33, 34) Ndeci, upostolo Petulu wa simĩle okuti Suku ka ponduile oku ecelela okuti Yesu o tala ohali yalua, ndaño okuti Yesu wa popele ale kolondonge viaye ovina viosi via laikele oku lipita laye. Pole, Yesu wa kũlĩhĩle okuti ocisimĩlo caco ca ponduile oku u tateka oku linga ocipango ca Yehova kuenje wa pisa Petulu. (Mar. 8:​31-33) Ndaño muẽle noke liolofa via Yesu, ka ca lelukile kolondonge viaye oku kuata elomboloko liokuti eye wa sukilile oku fa. Pole, Yesu omo liocisola a va kuatelele, ka liwekelepo oku va kuatisa. Noke liepinduko liaye, wa sapela lolondonge viaye kuenda wa va kuatisa oku tenda ovitangi lonjila yimue ya sunguluka. Eye wa ci linga poku “va situluila Ovisonehua viosi viatiamẽla kokuaye.” (Luka 24:​25-27, 32, 44-48) Oku sokolola kovina Yesu a longisa kolondonge viaye, ca ponduile oku va kuatisa oku lipongiyila alambalalo va laikele oku liyaka lao. Cimuamue haico okuti, tu pondolavo oku sokolola kueci Embimbiliya li popia catiamẽla kalambalalo kuenda kovitangi tu ka liyaka lavio. Oku ci linga, ci ka tu kuatisa oku lipongiyila oku liyaka lovitangi viaco.

12. Oku kuata ovisimĩlo ka via sungulukile viatiamẽla kocitangi cimue ci pondola oku tu vetiya oku liyeva ndati?

¹² Oku kuata ovisimĩlo ka via sungulukile viatiamẽla kovitangi vietu, ci pondola oku tu vetiya oku sima okuti ovitangi viaco, via tĩla calua kuenda ka tu tẽla oku vi yula. Yesu wa lekisa ndomo ovina viaco via ponduile oku lipita, eci a ta olusapo lumue luatiamẽla kolonalavayi viocumbo cayuva. Olonalavayi vimue via kala oku lisiõsiõla momo via simĩle okuti via tatiwile lekambo liesunga eci via tambula ofeto yavo. Pole, muẽleacumbo wa sapuila umue pokati kavo hati: “Okuetu, ndi cĩ okuti o kuete esunga. Siti tua likunda oco o tambule odenariu yimosi?” (Mat. 20:​10-13) Olonalavayi viaco ka via kaile oku lisiõsiõla omo okuti muẽleacumbo wa kala oku lekisa ekambo liesunga kokuavo, pole, via ci lingila momo kua lipita ovina ka via lavokaile. Koloneke vilo, vamanji valua va siatavo oku liyeva ndoco. Ndeci, pamue va liyeva okuti va tatiwa lekambo liesunga omo okuti ka va tambuile ale va siapo ocikele cimue va solele calua. Oco hẽ, nye tu sukila oku linga oco tu kuate ovisimĩlo via sunguluka viatiamẽla kovitangi tu liyaka lavio?

OVINA TU SUKILA OKU LINGA ECI TU LIYAKA LOVITANGI

13. Nye ci pondola oku lipita letu eci tu liyaka lovitangi?

¹³ Citava okuti tua kũlĩha ovinimbu vimue Viembimbiliya vi lombolola catiamẽla kovitangi. Pamue tua siata oku talavaya lovinimbu viaco oco tu kuatise omanu vakuavo oku liyaka lovitangi viavo. Pole, eci etu tu liyaka lovitangi, pamue ka ci leluka oku amamako oku tenda ovitangi viaco lonjila yimue ya sunguluka. Ndeci, tu pondola oku sima okuti Yehova o kasi oku tu kangisa ale ka kasi oku yevelela olohutililo vietu. Nye o sukila oku linga nda wa fetika oku kuata ovisimĩlo viaco?

14. Ovina vipi o pondola oku tukula volohutililo viove eci o liyaka lovitangi? (Va Filipoi 4:13)

¹⁴ Pinga ekuatiso ku Yehova. Sapuila ku Yehova ovitangi viosi o kasi oku liyaka lavio kuenda onjila ndomo o liyevite. Likutilila kokuaye catiamẽla kocitangi ci kasi oku ku sakalaisa, loku u pinga oco a ku ĩhe espiritu sandu, ongusu kuenda olondunge, oco vi ku kuatise oku amamako oku pandikisa. Pole, ivaluka okuti Yehova o ka tambulula olohutililo viove lonjila yimue kua lavokaile. (Va Efe. 3:20) Eye o pondola oku talavaya lovangelo kuenda la vamanji oco va ku kuatise. (Osa. 34:7) Omo liaco, tava ekuatiso liosi vamanji va siata oku eca kokuove kuenda lekisa olopandu omo liekuatiso liaco. Yehova eca espiritu sandu liaye lutima wosi kuenda eye o ka ku ĩha ongusu o sukila oco o tẽle oku yula ovitangi viosi o kasi oku liyaka lavio.—Tanga Va Filipoi 4:13.

15. Nye ci ka ku kuatisa oku pandikisa poku liyaka lovitangi? (Talavo ociluvialuvia.)

¹⁵ Amamako oku pamisa ukamba wove la Yehova. Likolisilako oku pamisa ukamba wove la Yehova, ndaño okuti ku ci lingi ndomo wa ci lingaile kosimbu. Ove o sukilavo oku likolisilako oku kuata ovisimĩlo ndevi via Yehova, ca piãla enene kotembo ‘yohali kuenda yovitangi.’ (Osa. 119:143) Omo liaco, amamako oku tanga Embimbiliya eteke leteke loku sokolola kovina wa tanga. Amamako oku endaenda kupange woku kunda, kolohongele loku panga onepa kokuavio. Ku ka liamũhe la vamanji. Kuata ocituwa coku kala la vamanji ndaño okuti olonjanja vimue ku kuata onjongole yoku ci linga.—Olosap. 18:1.

16. Atatahãi api o pondola oku kuata eci o liyaka lovitangi kuenda o a yula ndati? (2 Va Korindo 10:​4, 5)

¹⁶ Yula atatahãi ove. Eci tu liyaka lovitangi, pamue tu kuata atatahãi kuenda ovisimĩlo ka via sungulukile viatiamẽla kokuetu muẽle ale ku Yehova. Ovisimĩlo viaco, vi pondola oku sokisiwa ‘ndombonge ya pama’ okuti, ka via lelukile oku vi yula. (Tanga 2 Va Korindo 10:​4, 5.) Ove o pondola oku yula atatahãi aco, poku talavaya “lukũlĩhĩso wa Suku” u sangiwa Vembimbiliya kuenda valivulu ocisoko. Ndeci, anga hẽ ove o kuete atatahãi vokuti Yehova handi o ku sole? Nda oco, tanga ulandu watiamẽla kupostolo Paulu. Vokuenda kupange waye woku kunda, Paulu wa liyaka lovitangi vialua ka via lelukile. Pole, ovitangi viosi a liyaka lavio, vio kuatisa oku kolela okuti wa taviwile la Yehova kuenda la Yesu. (2 Va Kor. 11:​23-27) Anga hẽ ove wa siata oku lipula nda Yehova wa ecela muẽle akandu wa linga kosimbu? Nda oco, soneha ulala umue wovisonehua Viembimbiliya vi lekisa okuti Yehova ecela akandu. (Isa. 43:25) Noke, tanga ovinimbu viaco kuenda sokolola kokuavio. (Osa. 119:97) Anga hẽ ocilunga cimue ca lipita love ale lomunu umue o sole, ca ku kokela oku kuata atatahãi atiamẽla kohuminyo ya Suku yoku teyuila afendeli vaye vakuekolelo? Nda oco, linga akonomuiso valivulu etu oco o kũlĩhe esunga lieci Suku a kasilili oku ecelela ohali kuenda ndomo eye a tu teyuila konepa yespiritu ndaño ceci tu liyaka lovitangi ka via lelukile. (Osa. 91:​9-12) Handi vali, tangavo ovolandu a vamanji vana va liyaka lovilunga ka via lelukile, pole, va tẽla oku amamako oku vumba Yehova lesanju ndaño lovitangi viaco.a

17. Nye o sukila oku linga eci o liyaka lovitangi?

¹⁷ Citava okuti cilo ku kasi oku liyaka lovitangi vina okuti ka via lelukile oku vi yula. Nda oco, sanjukila epuluvi liaco liwa kuenda eca olopandu ku Yehova omo liovina viosi viwa a ku ĩha. (Uku. 7:14) Pole, eci o ka liyaka lovitangi ka via lelukile, amamako oku kuata ovisimĩlo via sunguluka viatiamẽla kovitangi viaco kuenda pamisa ekolelo liove ku Yehova. Nda wa ci linga, Yehova o ka ku ‘muisa evelo lioku puluka okuti, o pandikisa lalio.’ (1 Va Kor. 10:13) Pole, nye tu sukila oku linga nda ocitangi cimue ci lipita la vamanjetu? Eci oco tu ka konomuisa vocipama ci kuãimo.