Ukuakayike o Kũlĩha Ocili

Ko Filipoi kua kala ufeko umue upika wa kuatiwile londele yimue. Ondele ya enda oku vetiya ufeko oku tãha kuenda vacime caye va enda oku ganyala olombongo vialua omo liupange waye. Eci Paulu la Sila veya ko Filipoi, ufeko waco wa enda oku va kuama oloneke vialua. Ondele yo vetiya oku kaluka lolukandi hati: “Alume ava va kasi oku ku sapuili onjila yepopelo, akuenje va Suku Fũ.” Noke Paulu wa sapuila ondele hati: ‘Vonduko ya Yesu, tunda vokuaye!’ Kuenje ondele ya tunda vufeko.

Eci vacime cufeko waco veya oku limbuka okuti ka va tambula vali olombongo, va tema calua. Ovo va kuata Paulu la Sila kuenda va va ambanta kolonganji, kuenje va popia vati: ‘Alume ava va kasi oku nyõla ocihandeleko kuenda va kasi oku koka ombuanja volupale luosi!’ Olonganji via tuma oku tipula Paulu la Sila kuenda oku va kapa vokayike. Ukuakayike wa va kapa vocitumãlo ca koka okuti ocitumãlo caco, ci kasi lowelema kuenda wa va kapa kovikumbi.

Osimbu Paulu la Sila va kala oku sivaya Yehova lovisungo, olomandekua vikuavo via kala oku yevelela. Vocipikipiki, vokati kuteke kua pita ocilemawe cinene okuti ociseveto cokayike ca lisenga. Kuenje apito okayike a yikuka, alienge olomandekua a kutuluka kuenda ovikumbi via lieca. Ukuakayike wa lupukila vokati kokayike kuenje wa mola okuti apito a kala upulule. Omo liaco, wopa osipata yimue oco a liponde, momo wa sima okuti olomandekua viosi via tila.

Noke Paulu wa vilikiya lolukandi hati: ‘Ku ka lilemẽhe! Vosi tu kasi mulo!’ Ukuakayike wa lupukila vokati kuenje wa kekamẽla Paulu la Sila. Eye wa va pula hati: “Nye ndi sukila oku linga oco mopeliwe?” Ovo vo sapuila vati: ‘Ove kumue la vakuanjo yove vu sukila oku kolela Yesu.’ Omo liaco, Paulu la Sila vo longisa ondaka ya Yehova kuenje ukuakayike la vosi vakuanjo yaye va papatisiwa.