Mose o Nõlapo Oku Fendela Yehova

Epata lia Yakoba Kegito lieya oku kũlĩhĩwa okuti va Isareli. Eci Yakoba kumue la Yosefe va fa, kua fetika oku viala osoma yikuavo yokaliye yi tukuiwavo hati, Fareo. Eye wa kala lusumba wokuti, va Isareli va pama vali okuti va Egito ci sule. Kuenje Fareo wa lingisa va Isareli apika. Omo liaco, wa va kisika oku kosa onata kuenda oku tunga atisolu, loku linga ovopange osi o kovapia. Pole, osimbu va Isareli va kala oku kisikiwa la va Egito oku talavaya calua, ovo vamamako oku livokiya. Fareo ka ci solele kuenje wahandeleka okuti omãla vosi valume va va Isareli okuti va citiwa ndopo, va pondiwa. O pondola oku sokolola esakalalo va Isareli va kuata vepuluvi liaco?

Ukãi umue u Isareli o tukuiwa hati Yokevede, wa cita omõla ulume wa fina calua. Oco a popele oñaña yaco, eye wa yi kapa vekualu kuenje wa yi soleka voloneva vi kasi kohulo Yolui Nilu. Pole mukãi waye wa talama ocipãla oco a limbuke eci ca laikele oku pita lamanjaye.

Omõla ukãi wa Fareo wa enda oco a ka yue volui kuenje wa mõla ekualu. Eci a tuvula ekualu liaco, wa sangamo oñaña ya kala oku lila kuenje wa yi kuatela ohenda. Noke Miriama okuti mukãi woñaña wa pula komõla ufeko wa Fareo hati: “Citava hẽ okuti ndi ka kovonga ukãi umue u Heveru o nyamisa oco a ku nyamisileko omõla?” Eci omõla ufeko a Fareo a tambulula hati, kuende, Miriama wa enda oco a kovonge inaye Yokevede. Omõla ufeko a Fareo wa sapuila Yokevede hati: “Ambata omõla u, ka ndi nyamisileko noke ndu ku feta.”

Eci oñaña ya kula, Yokevede wa yeca komõla ukãi wa Fareo, una wo luka hati, Mose kuenje wo tekula ndomõlaye muẽle. Mose wa kala ndomunu wa velapo Kegito kuenda wa ponduile oku kuata ovina viosi a yonguile. Pole, Mose lalimue eteke a ivaleleko Yehova. Eye wa kũlĩhĩle okuti wa kala u Isareli, ka kaile u Egito. Omo liaco, wa nõlapo oku fendela Yehova.

Eci Mose a tẽlisa 40 kanyamo, wa nõlapo oku kuatisa vakuepata liaye. Kuenje eci a mola okuti umue u Egito wa kala oku tipula upika umue u Isareli, Mose wa tipula ulume waco u Egito longusu yalua toke eci a fa. Noke wa soleka etimba liaco veseke. Eci Fareo a ci yeva, wa yonguile oku ponda Mose. Mose poku ci yeva, wa tilila kofeka yo Midiane kuenje Yehova wo lava osimbu a kala vofeka yaco.