Olombangi Via Yehova ka vi Tava hẽ Oku Tomiwa Ovihemba Vioku Liteyuila?
Vi tava. Olombangi Via Yehova ka vi pisa oku tomiwa ovihemba vioku liteyuila. Kokuetu oku tomiwa ovihemba viaco ka ci lingiwa lekisika, Ukristão Lukristão eye o nõla. Olombangi vialua Via Yehova vi nõlapo oku tomiwa ovihemba vioku liteyuila.
Etu tu sanda oku tatiwa ciwa kuenda tua kapako calua oku mioñoloha ku kasi oku lingiwa kuloño woku sakula oco ku tepulule ovovei a kãla. Tu pandula calua ovopange osi kuenda oku lieca olumue kuomanu va talavaya kuloño woku sakula, ca piãla enene vepuluvi lilo liefengi.
Olombangi Via Yehova vi kuatisa vana va talavaya kuloño woku sakula. Ndeci, tunde kefetikilo liefengi lio COVID-19, vonumbi yilo yo Internet, Olombangi Via Yehova vi kasi oku amamako oku sandeka loku pongoluila kalimi alua ovipama vi vetiya loku ivaluisa omanu oco va kapeko olonumbi vioku liteyuila. Pokati kolonumbi viaco, mua kongela oku kala ocinãla la vakuetu, oku yuvula oku kala owiñi pocitumãlo cimue, oku likalila, oku sukula povaka, oku kapa ombindi komẽla kuenda olonumbi vikuavo vi kisikiwa ale vi vetiyiwa lolombiali.—Va Roma 13:1, 2.
Vokuenda kuanyamo alua, alivulu Olombangi Via Yehova, a siata oku tõlisa olonumbi vi kuãimo ndeci:
Catiamẽla koku sakuiwa, omunu lomunu eye o nõla onjila a kuama.—Va Galatia 6:5.
“[O revista yilo] ka yi vetiya oku tava ovihemba viosi, ale oku tatiwa luloño woku sakuiwa kuenda ka yeci olonumbi vioku sakuiwa lavio. Ocimãho co revista yaco, oku lekisa ovovangi loku ecelela okuti, omunu o yi tanga o talavaya luloño waye woku sokolola kuenda oku nõla eye muẽle onjila a kuama.”—Omasuli!, 8 ya Kayovo 1987.
“Catiamẽla kondaka yoku tava ale sio, oku tomiwa ovihemba vioku liteyuila, ca tamba kukuakutanga kuenda komãla vaye.”—Omasuli!, 22 Yenyenye 1965.
Tu sanda oku sakuiwa omo okuti, tua sumbila calua omuenyo.—Ovilinga 17:28.
Olombangi Via Yehova vi sandiliya ovoloño a litepa oku sakuiwa lao, oco ci va kuatise kekambo liavo liuhayele. Ovio vi sole omuenyo kuenda vi likolisilako oku linga cosi ca sunguluka haico ci taviwa Lembimbiliya, oco omuenyo wavo wamameko.”—Utala Wondavululi 1 Wevambi Linene 1975.
Olombangi Via Yehova vi tava ovihemba kuenda oku sakuiwa. Ovio vi sanjukila oku kuata uhayele kuenda oku amamako lomuenyo. Ocili okuti, vamue pokati kavo, ovifumelu ndeci ca kala Luka Ukristão wo kocita catete. . . . Olombangi Via Yehova via sanjukila calua ovopange osi kuenda oku lieca olumue kuomanu va talavaya kuloño woku sakula. Vi ecavo olopandu kokuavo omo lioku tata ciwa uhayele wavo.”—Utala Wondavululi 1 wa Kayovo 2011.