Anga hẽ Akãi Olombangi Via Yehova vi Longisavo?

Oco, voluali luosi muli olohuluwa viakãi Olombangi Via Yehova okuti alongisi. Ovo va panga onepa kowiñi umue wakahandagala wakãi va kunda olondaka viwa Viusoma wa Suku. Catiamẽla kokuavo ocitumasuku ci sangiwa Kosamo 68:11 ci popia ndoco: “Yehova eca ocihandeleko; akãi va sapula olondaka viwa, olohoka vinene.”

Pole, ka tu sukila oku sokisa upange woku longisa wakãi Olombangi Via Yehova lowu akãi vatavo akuavo va siata oku linga. Kuli etepiso lialua pokati kovopange aco oku longisa. Volonjila vipi ovio via litepa?

Omanu ovo va longisa va litepa. Vatavo esanda akãi va kuete ocikele coku songola kuenda vamue pokati komanu ovo va longisa vana va kuete ocikele coku songola. Catiamẽla kakãi Olombangi Via Yehova, omanu ovo va kundila ka va kasi vakongelo avo pole, va kundila omanu konjo lanjo kuenda kovitumãlo vikuavo.

Onjila yikuavo yeci upange woku longisa wakãi Olombangi Via Yehova ya letepela leyi yakãi vatavo akuavo, ovopange ovo va siata oku linga vekongelo. Vatavo akuavo, akãi va songola kuenda va longisa volonembele. Pole akãi Olombangi Via Yehova, ka va longisa vekongelo osimbu alume va papatisiwa va kasipo. Alume vana va nõliwa ovo lika va longisa. —1 Timoteo 3:2; Tiago 3:1.

Embimbiliya li lombolola okuti alume ovo lika va kuete ocikele coku songola vekongelo. Kũlĩhĩsa olonumbi upostolo Paulu a tukula eci a sonehela Tito usongui ukuavo okuti: ‘Nda ku sia ko Kurete oco . . . o nõle akulu vekongelo volupale lolupale.’ Paulu wamisako poku popia okuti ulume wosi wa nõliwa, wa sukilile oku ‘pua eko, loku kala ulume wukãi umosi.’ (Tito 1:5, 6) Paulu wa eca olonumbi vimuamue ku Timoteo eci a popia hati: “Nda ulume umue o kasi oku likolisilako oku sanda ocikele coku kala mitavaso, o yongola upange uwa. Mitavaso a pue eko, a linge ulume wukãi umosi, . . . a loñolõhe koku longisa.” —1 Timoteo 3:1, 2.

Momo lie ovikele vioku songola vekongelo via eciwila lika kalume? Paulu wa popia hati: “Si ecelela okuti ukãi o longisa, pamue o viala ulume, pole, amameko oku ũha. Momo Adama eye wa lulikiwa tete, noke Eva.” (1 Timoteo 2:12, 13) Omo liaco, onjila ndomo tua lulikiwa yi lekisa esunga lieci Suku a nõlela oku eca kalume ocikele coku longisa kuenda oku songola.

Olondigupange Via Yehova vi kuãi ongangu yusongui wavo, Yesu Kristu. Ndonge Luka catiamẽla kupange woku kunda wa Yesu wa soneha hati: “Yesu wa linga ungende volupale lolupale, vimbo limbo, oku kunda loku sandeka olondaka viwa Viusoma wa Suku.” Noke Yesu wa tuma olondonge viaye oco vi linge upange umuamue kuenje “va pita vocikanjo, vimbo limbo oku kunda olondaka viwa.” —Luka 8:1; 9:2-6.

Koloneke vilo, olondigupange via Yehova okuti alume lakãi va siata oku lekisa ombili koku tẽlisa eci Yesu a popele hati: “Olondaka evi viwa Viusoma vi ka kundilua koluali luosi, ha vi lingi uvangi kolofeka viosi, oco esulilo liya noke.” —Mateo 24:14.